ଏବ୍ରି 1 - New Testament in Pengo Parja Languageଈଶ୍ୱର ମେହିତି ଗାଜା 1 ଈଶ୍ୱର ଆଗେ ବେସିହଟ୍ ବିନ୍-ବିନ୍କିଜି ଭବିଷ୍ଯତବକ୍ତାତାଙ୍ଗ୍ ମା ଆକଦାଦିର୍ ହୁଦାଙ୍ଗ୍ ବେଣ୍କିଜି ମାଚାନ୍। 2 ମାତର୍ ଇ ସେସ୍ କାଡ଼୍ଦ, ତା ମେହିତାଙ୍ଗ୍ ମାଙ୍ଗେଙ୍ଗ୍ ବେଣ୍ କିତ୍ତାନ୍ନା। ଈଶ୍ୱର ହେୱାନ୍ତାଙ୍ଗ୍ ପୁର୍ତିନି ୱିଜୁ ବିଷୟ ରସ୍ତାନ୍, ଆରେ ହେୱାନିଙ୍ଗ୍ ୱିଜୁ ବିଷୟନି ଅଦିକାର୍ କିଜି ବାଚିକିତାନ୍ 3 ହେ ହିମ୍ଣା ଈଶ୍ୱର ଗୌରବତାଙ୍ଗ୍ ଚଚ୍ଚାନାନ୍ ଆରେ ହେୱାନ୍ ୱିଜୁ ବିଷୟରେ ଈଶ୍ୱରଲେକେ ଚଞ୍ଜ୍ନାନ୍। ହେୱାନ୍ ଜାର୍ ଶାକ୍ତିମାନି କାତାତାଙ୍ଗ୍ ପୁର୍ତିନି ୱିଜୁ ବିଷୟ ଆସ୍ତାନ୍ନା। ଆରେ ହେୱାନ୍ ମାନାୟାର୍ ପାପ୍ତିଙ୍ଗ୍ ନୁସ୍ତି ପାଚେ ସରଗ୍ତାକେ ଈଶ୍ୱରତି ଗୌରବ ପାୟାଆନି ତିନାବାଗାୟ୍ନି ବାହାତାକେ କୁଚ୍ଚାନ୍ନା। ଖ୍ରୀଷ୍ଟ ଦୁତ୍କୁତାଙ୍ଗ୍ ବେସି ଗାଜାକାନ୍। 4 ଲାଗିଙ୍ଗ୍ ଈଶ୍ୱର ଖ୍ରୀଷ୍ଟଙ୍ଗ୍ ଇମ୍ଣି ତର୍ନି ଅଦିକାର୍ ହିତାନ୍ନା, ହେଦାଙ୍ଗ୍ ଦୁତ୍କୁତାଙ୍ଗ୍ ବେସି ଗାଜା, ଲାଗିଙ୍ଗ୍ ଆସେଙ୍ଗ୍ ହୁଡ଼୍ନାସା ଯେ ହିମ୍ଣା ଦୁତ୍କୁତାଙ୍ଗ୍ ବେସି ଗାଜା ଆତାନ୍ନା। 5 ଇନେସ୍କି ଈଶ୍ୱର ଦୁତ୍କୁ ବିତ୍ରେତାଙ୍ଗ୍ ଇନେରିଙ୍ଗ୍ ଇନାୱେଡ଼ାଙ୍ଗ୍ ପା ଇଲେକେ ୱେଚ୍ୱାତାନ୍ନା ଯେ, “ଏନେଙ୍ଗ୍ ନା ହିମ୍ଣା, ନେଞ୍ଜେଙ୍ଗ୍ ଏନେଙ୍ଗ୍ ନା ହିମ୍ଣାଇଞ୍ଜି ୱେଚ୍ନାଙ୍ଗା। ଆରେ ଆନେଙ୍ଗ୍ ମିଞ୍ଜ୍ବା ଆନାଙ୍ଗ୍, ଆରେ ଏନେଙ୍ଗ୍ ନା ହିମ୍ଣା ଆତାୟ୍ନା।” 6 ଆରେ ଈଶ୍ୱର ଏଚେପାଦ୍ନା ତା ଗୌରବମାନି ହିମ୍ଣାତିଙ୍ଗ୍ ଇ ପୁର୍ତିତାକେ ପକ୍ତାତାନ୍, ହେପାଦ୍ନା ଈଶ୍ୱର ୱେଚ୍ନାନ୍, “ଈଶ୍ୱରତି ୱିଜୁ ଦୁତ୍କୁ ହେୱାନିଙ୍ଗ୍ ପୁଜା କିୟେକ୍।” 7 ଆରେ ହେୱାନ୍ ଦୁତ୍କୁ ବିଷୟରେ ଇଦାଙ୍ଗ୍ ୱେଚ୍ନାନ୍, “ଈଶ୍ୱର ତା ଦୁତ୍କୁକାଙ୍ଗ୍ ଡ଼ୁଇ ଲେକେ କିନାନ୍, ଆରେ ଜାର୍ ହେବା କିନାକାରିଙ୍ଗ୍ ନାଣି ପିସ୍କି ଲେକେ କିନାନ୍।” 8 ଲାଗିଙ୍ଗ୍ ଈଶ୍ୱର ହିମ୍ଣା ବିଷୟରେ ଇଦାଙ୍ଗ୍ ୱେଚ୍ନାନ୍, “ଏ ଈଶ୍ୱର, ଏନେଙ୍ଗ୍ ରାଜାଆଜି ୱିଜୁଦିନ୍ ସାସନ୍ କିନାୟ୍, ଆରେ ଏନେଙ୍ଗ୍ ନ୍ୟାୟ୍ତାଙ୍ଗ୍ ସାସନ୍ କିନାୟ୍।” 9 “ଇନାକା ଟିକ୍ ଏପେଙ୍ଗ୍ ହେଦାଙ୍ଗ୍ତିଙ୍ଗ୍ ଲାଡ୍କିଜି ମାନାଟ୍ ଆରେ ଇନାକା ଅଦରମ୍ ହେଦାଙ୍ଗ୍ତିଙ୍ଗ୍ ଗିଣ୍କିଜି ମାନାଟ୍। ଲାଗିଙ୍ଗ୍ ଆନେଙ୍ଗ୍ ଈଶ୍ୱର, ମି ଈଶ୍ୱର, ମି ହାଙ୍ଗ୍ଦାକାର୍ତାଙ୍ଗ୍, ମିଙ୍ଗେଙ୍ଗ୍ ବାଚି କିତ୍ତାଙ୍ଗ୍ନା ଆରେ ମିଙ୍ଗେଙ୍ଗ୍ ବେସି ସନ୍ମାନ୍ ଆରେ ୱାରି ହିତ୍ତାଙ୍ଗ୍ନା।” 10 ଆରେ ଈଶ୍ୱର ୱେଚ୍ନାନ୍, “ଏ ମାପୃ, ଏନେଙ୍ଗ୍ ଆରମ୍ତାଙ୍ଗ୍ ନେ ପୁର୍ତିତିଙ୍ଗ୍ ରସ୍ତାଇନା, ଆରେ ସରଗ୍ତିଙ୍ଗ୍ ନି କେଇଦାଙ୍ଗ୍ ରସ୍ତାୟ୍।” 11 “ହେ ୱିଜୁ ନଷ୍ଟ ଆନାତ୍, ମାତର୍ ଏନେଙ୍ଗ୍ ୱିଜ୍ୱିଦିନ୍ ପାତେକ୍ ମାନ୍ଗାନାୟ୍। ଆରେ ହେୱିଜୁ ହେନ୍ଦ୍ରା ଲେକେ ନଷ୍ଟ ଆନାତ୍।” 12 “ଆରେ ଏପେଙ୍ଗ୍ ଶାଲ୍ ଲେକେ, ଆଁ ହେନ୍ଦ୍ରା ଲେକେ ହେୱିଜୁ ପରି କିଦ୍ନାତ୍, ଆରେ ହେୱିଜୁ ବାଦ୍ଲା ଆନାତ୍। ମାତର୍ ଏପେଙ୍ଗ୍ ୱିଜୁଦିନ୍ ହାମାନ୍ ମାନ୍ଗାନାଦେର୍। ଆରେ ମି ଜିବୁନ୍ ଇନାୱେଡ଼ାଙ୍ଗ୍ ପା ୱିଜୁତ୍।” 13 ଆରେ ଈଶ୍ୱର ଦୁତ୍କୁ ବିତ୍ରେତାଙ୍ଗ୍ ଇନେରିଙ୍ଗ୍ ଇନାୱେଡ଼ାଙ୍ଗ୍ ପା ଇଦାଙ୍ଗ୍ ୱେଚ୍ୱାତାନ୍ନା ଯେ, “ଆପେଙ୍ଗ୍ ଏଚେପାଦ୍ନା ପାତେକ୍ ମି ଶତ୍ରୁକାଙ୍ଗ୍, ମି କାଲ୍ପାନା ତାରେନ୍ ତାସି ୱାୱାତାପ୍ନା। ହେପାଦ୍ନା ପାତେକ୍ ମା ତିନାବାଗାୟ୍ କୁଚ୍ଚି ମାନାଟ୍।” 14 ଲାଗିଙ୍ଗ୍ ଦୁତ୍କୁ ଇନେର୍? ହେୱେକ୍ ଆପ୍କା ଈଶ୍ୱରତିଙ୍ଗ୍ ହେବା କିନିକିକ୍। ଆରେ ଉଦାର୍ ପାୟା ଆଦେଙ୍ଗ୍ ମାନି ମାନାୟାରିଙ୍ଗ୍ ସାଇଜ କିନି କାଜିଙ୍ଗ୍ ଈଶ୍ୱର ହେୱେକିୟାକାଙ୍ଗ୍ ପକ୍ଚି ମାନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation