ଗାଲାତିୟ 6 - New Testament in Pengo Parja Language

ଆସେଙ୍ଗ୍ ଇନେସ୍ କାମାୟ୍ କିନାସ୍ ହେଲେକେ ପାଡ଼୍‌ ପାୟାଆନାସ୍

¹ ଏ ପାର୍ତିକିନି ଟଣ୍ଡାର୍‌କାଦେର୍, ଏପେଙ୍ଗ୍ ପବିତ୍ର ଆତ୍ମାତାଙ୍ଗ୍ ବ୍ଯବହାର୍ କିତିଲେକେ, ଏପେଙ୍ଗ୍ ଇଦାଙ୍ଗ୍ କିୟାଟ୍: ଯଦି ଇନେର୍ ଇମ୍‌ଣି ପର୍‌କାର୍ ପାପ୍ କାମାୟ୍‌ତାଙ୍ଗ୍ ଦରାପାଡ଼ା ଆନାନ୍। ଏପେଙ୍ଗ୍ ହେୱାନିଙ୍ଗ୍ ହାର୍ଦି ମାନ୍‌ତାଙ୍ଗ୍ ଟିକ୍ କିୟାଟ୍ ଆରେ ହାର୍ଦି ହାଜ୍‌ଦିଙ୍ଗ୍ ତାସି ୱାଦେଙ୍ଗ୍ ସାଇଜ କିୟାଟ୍। ଏପେଙ୍ଗ୍ ଇନେସ୍ ହେଲେଗ୍‌ଦି ପାପ୍‌ତାକେ ପଡ଼ାଆଉଦେର୍‌, ଇଦାଙ୍ଗ୍ କାଜିଙ୍ଗ୍ ଜାଗ୍ରତ୍ ଆଜି ମାନାଟ୍।

² ଏଚେପାଦ୍ନା ଦୁକ୍‌କଷ୍ଟ ୱାନାତ୍ ଏପେଙ୍ଗ୍ ଜାର୍-ଜାର୍‌ବିତ୍ରେ ସାଇଜ କିବା ଆଡ। ଇଲେକେ ଏପେଙ୍ଗ୍ ଖ୍ରୀଷ୍ଟ ନିୟମ୍‌ତିଙ୍ଗ୍ ମାନି କିୟାଟ୍।

³ ଇନେର୍ ଯଦି ରକାନିଙ୍ଗ୍ ସାଇଜ କିନିହିଙ୍ଗ୍ ଜାର୍‌ତିଙ୍ଗ୍ ଗାଜା ଇଞ୍ଜି ବାବିକିନାନ୍, ଲାଗିଙ୍ଗ୍ ହେୱାନ୍ ଜାର୍-ଜାର୍‌ତିଙ୍ଗ୍ ଟକାଇକିୟା ଆନାନା। ଏପେଙ୍ଗ୍ ହେଲେକେ ବାଡା ଆମାଟ୍।

⁴ ମାତର୍ ୱିଜାକାର୍ ଜାର୍-ଜାର୍ କାମାୟ୍‌ତିଙ୍ଗ୍ ପରିକ୍ଷା କିୟେର୍। ଯଦି ହେୱାନ୍ ହାର୍ଦି କାମାୟ୍ କିଜି ମାନ୍‌ଙ୍ଗାନାନ୍, ଲାଗିଙ୍ଗ୍ ହେୱାନ୍ ଜାର୍ କାମାୟ୍‌ତିଙ୍ଗ୍ ୱାରି ଆନାନ୍, ମି କାମାୟ୍ ଜେକ ଇନେର୍ ହୁଦାଙ୍ଗ୍ ପା ହାମାନ୍ କିମାଟ୍।

⁵ ଇନେସ୍‌କି ୱିଜାକାର୍ ମାନାୟ୍ ଜାର୍ ବ୍ଯବହାର୍ କାଜିଙ୍ଗ୍ ନିଜେ ଦାୟି ମାନ୍‍ଙ୍ଗାନାର୍।

⁶ ଇମ୍‌ଣାକାର୍ ଈଶ୍ୱର କାତାନି ହିକ୍ଷା ହିକାଆନାରା, ହେୱାର୍ ତା ମାଷ୍ଟେରାରିଙ୍ଗ୍ ୱିଜୁ ହାର୍ଦି ବିଷୟ ହିନି ଦର୍‌କାର୍।

⁷ ଏପେଙ୍ଗ୍ ଈଶ୍ୱରତିଙ୍ଗ୍ ଟକାଇ କିନାଙ୍ଗ୍ ଇଞ୍ଜି ବାବିକିତିସ୍, ଏପେଙ୍ଗ୍ ନିଜେ ଟକାଇ କିୟାଆନାଦେର୍। ଇନେସ୍‌କି ମାନାୟ୍ ଇନାକା ୱିଜୁ ୱିତ୍‌ନାର୍, ହେଦାଙ୍ଗ୍ ନେ ତେଜ୍‌ନାର୍।

⁸ ଇନେସ୍‌କି ଇମ୍‌ଣାକାନ୍ ଜାର୍ ଗାଗାଡ଼୍ ଇଚାତାଙ୍ଗ୍ ୱାରି କିଦେଙ୍ଗ୍ ନେ ଇଚାକିନାନ୍, ହେୱାନ୍ ଗାଗାଡ଼୍‌ତାଙ୍ଗ୍ ନଷ୍ଟ ବିଷୟ ଆରେ ହାଃନାନ୍। ମାତର୍ ଇମ୍‌ଣାକାନ୍ ପବିତ୍ର ଆତ୍ମାତିଙ୍ଗ୍ ନେ ୱାରି କିୟିକିଦେଙ୍ଗ୍ ଇଚାକିନାନ୍, ହେୱାନ୍ ଆତ୍ମାତାଙ୍ଗ୍ ୱିଜ୍‌ୱି ଜିବୁନ୍ ପାୟା ଆନାନ୍।

⁹ ଲାଗିଙ୍ଗ୍ ଆସେଙ୍ଗ୍ ହାର୍ଦି କାମାୟ୍ କିଦେଙ୍ଗ୍ ବିଜାର୍ ଆଉସ୍। ଆସେଙ୍ଗ୍ ଯଦି ବିଜାର୍ ଆୱାଦାଙ୍ଗ୍ ହାର୍ଦି କାମାୟ୍ କିଜି ମାନ୍‌ଙ୍ଗାନାସ୍, ଲାଗିଙ୍ଗ୍ ଟିକ୍ ସମୟ୍‌ତ ଆଶ୍ରିବାଦ୍ ପାୟାଆନାସ୍।

¹⁰ ଲାଗିଙ୍ଗ୍ ଏଚେପାଦ୍ନା ମାଙ୍ଗେଙ୍ଗ୍ ସୁଯଗ୍ ଗାଟାଆଦ୍‍ନାତ୍, ୱିଜୁ ମାନାୟାର୍ କାଜିଙ୍ଗ୍ ବିଶେସ୍ କିଜି ପାର୍ତିକିନି ମାନାୟାରିଙ୍ଗ୍ ହାର୍ଦି କାମାୟ୍‌ତାକେ ସାଇଜ କିୟାଟ୍।

ପାଉଲତି ହାରିହାରା ଆଦେସ୍

¹¹ ହୁଡ଼ାଟ୍, ଆନେଙ୍ଗ୍ ଜାର୍ କେଇଦାଙ୍ଗ୍ କେତେକ୍ ଗାଜା-ଗାଜା ଅକ୍ଷର୍‌ତାକେ ମି ଲାଗାୟ୍ ଲେକିକିତାଙ୍ଗ୍‌ନା।

¹² ଇମ୍‌ଣାକାର୍ ସୁନତ ବିଦି ମାନିକିନି କାଜିଙ୍ଗ୍ ଜବର୍‌ଦସ୍ତି କିଦ୍‌ନାର୍, ହେୱାର୍ ଯିହୁଦି ମାନାୟାରିଙ୍ଗ୍ ୱାରି କିୟିକିଦେଙ୍ଗ୍ ଇଚା କିନାର୍। ଆରେ ଖ୍ରୀଷ୍ଟନି କୃଶକାଟ୍‌ତାକେ ଆପ୍‌କା ପାର୍ତି କିତିସ୍ ଉଦାର୍ ଗାଟାଆଦ୍‍ନାତ୍, ଇଦାଙ୍ଗ୍ ଶୁଣାୟ୍ କିତିସ୍ ଇନେସ୍ ହେୱାର୍ ଦୁକ୍‌କଷ୍ଟ ପାୟା ଆଉର୍, ଇଦାଙ୍ଗ୍ କାଜିଙ୍ଗ୍ ହେୱାର୍ ହେ ସୁନତ ବିଦି ମାନି କିଦେଙ୍ଗ୍ ୱେଚ୍‌ନାର୍।

¹³ ଆରେ ଇମ୍‌ଣି ସୁନତ ବିଦି ମାନିକିନି ପାର୍ତିକିନି ମାନାୟାର୍ ମିଙ୍ଗେଙ୍ଗ୍ ସୁନତ ବିଦି ମାନି କିଦେଙ୍ଗ୍ ୱେଚ୍‌ଚାନାର୍, ହେୱାର୍ ନିଜେ ମୋଶା ଲେକିକିତି ନିୟମ୍ ସାସ୍ତର୍ ମାନିକିଉର୍। ମାତର୍ ହେୱାର୍ କାଜିଙ୍ଗ୍ ଏପେଙ୍ଗ୍ ସୁନତ ବିଦି ଆତାଦେର୍‌ନା ଇଞ୍ଜି ଜାର୍‌ତିଙ୍ଗ୍ ଗର୍ବ ଆଜି ୱେଚ୍‌ଚେଙ୍ଗ୍, ହେୱାର୍ ସୁନତ ବିଦି କିୟାଟ୍ ଇଞ୍ଜି ମିଙ୍ଗେଙ୍ଗ୍ ୱେଚ୍‌ଚାନାର୍।

¹⁴ ମା ମାପୃ ଯୀଶୁ ଖ୍ରୀଷ୍ଟନି କୃଶକାଟ୍‌ତିଙ୍ଗ୍ ପିସ୍ତି, ଆନେଙ୍ଗ୍ ଆରେ ଇନାକାତାକେ ପା ଗର୍ବ କିଉଙ୍ଗ୍। ଇନେସ୍‌କି ଖ୍ରୀଷ୍ଟ କାଜିଙ୍ଗ୍, ଇ ଜଗତ୍‌ତାକେ ମାନି ନା ଇଚା କୃଶକାଟ୍‌ତାକେ ହାଃତାତ୍‌ନା, ଆରେ ନାବେ ମାନି ପୁର୍ତିନି ଇଚା ପା ହାଃତାତ୍‌ନା।

¹⁵ ସୁନତ ବିଦି ମାନିକିତିସ୍ କି କିୱିତିସ୍ ଇନାକା ଆକାୟ୍, ମାତର୍ ମୁଡ଼୍ ବିଷୟ ଇଦାଙ୍ଗ୍ ଯେ ପବିତ୍ର ଆତ୍ମାତାଙ୍ଗ୍ ଈଶ୍ୱର ମିଙ୍ଗେଙ୍ଗ୍ ପୁନି ମାନାୟ୍ କିତ୍‌ତାନ୍‌ନା।

¹⁶ ଆରେ ଏଚେଜାଣ୍ ଇ ନିୟମ୍ ଅନ୍‌ସାରେ ବ୍ଯବହାର୍ କିନାର୍, ଈଶ୍ୱର ସତ୍ ଇସ୍ରାଏଲ ମାନାୟାରିଙ୍ଗ୍ ତା ଶାନ୍ତି ଆରେ ଦୟା ହିନାନ୍, ଆରେ ହେୱାର୍ ଈଶ୍ୱରତି ପୁନି ମାନାୟ୍ ଆନାର୍।

¹⁷ ନେଞ୍ଜେଙ୍ଗ୍‌ତାଙ୍ଗ୍ ଇନେର୍ ଆରେ ନାଙ୍ଗେଙ୍ଗ୍ ଇ ବିଷୟରେ କଷ୍ଟ ହିଦ୍‌ମେର୍। ଇନେସ୍‌କି ନା ଗାଗାଡ଼୍‌ତ ଯୀଶୁଙ୍ଗ୍ ମାଡ୍‌ହିତି ଚିନା ମାନାତ୍, ହେ ଚିନା ଚଚ୍‌ନାତା ଯେ ଆନେଙ୍ଗ୍ ଯୀଶୁନି ମାନାୟ୍।

¹⁸ ଏ ପାର୍ତିକିନି ଟଣ୍ଡାର୍‌କାଦେର୍, ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା କିଦେନ୍। ଆମେନ୍।