ଗାଲାତିୟ 5 - New Testament in Pengo Parja Languageଖ୍ରୀଷ୍ଟତାକେ ସ୍ୱାଦିନ୍ 1 ଖ୍ରୀଷ୍ଟ ମାଙ୍ଗେଙ୍ଗ୍ ମୋଶା ନିୟମ୍ ସାସ୍ତର୍ତାଙ୍ଗ୍ ସ୍ୱାଦିନ୍ କିତ୍ତାନ୍ନା। ଲାଗିଙ୍ଗ୍ ଏପେଙ୍ଗ୍ ନଙ୍ଗୟ୍ ଆରେ ନିୟମ୍ ସାସ୍ତର୍ନି ଦାସ୍ ଆଜି ମାଞ୍ଜେଙ୍ଗ୍ ଉପାୟ୍ କିୱାଦାଙ୍ଗ୍, ସ୍ୱାଦିନ୍ ଆଜି ମାନାଟ୍। 2 ଆନେଙ୍ଗ୍ ପାଉଲ ମିଙ୍ଗେଙ୍ଗ୍ ଇନାକା ୱେଚ୍ଦେଙ୍ଗ୍ ହାନାଙ୍ଗା ମାନ୍ଦିୟାନ୍ କିଜି ୱେନାଟ୍!, ଈଶ୍ୱର ଲାଗାୟ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆଦେଙ୍ଗ୍ ଏପେଙ୍ଗ୍ ନଙ୍ଗୟ୍ ପା ଯଦି ସୁନତ ବିଦି ମାନି କିନାଦେରା, ଲାଗିଙ୍ଗ୍ ଖ୍ରୀଷ୍ଟ ଇନାକା କିତାନ୍ନା ହେଦାଙ୍ଗ୍ ମି କାଜିଙ୍ଗ୍ ଇନା ଲାବ୍ ଆଉତ୍। 3 ଆନେଙ୍ଗ୍ ଆରେରଗ ୱେଚ୍ଚେଦେଙ୍ଗ୍ ଇଚା କିନାଙ୍ଗା, ଏପେଙ୍ଗ୍ ଯଦି ସୁନତ ବିଦି ମାନିକିନି କାଜିଙ୍ଗ୍ ଈଶ୍ୱର ଦୟା ପାୟା ଆଦେଙ୍ଗ୍ ଇଚା କିନାଦେରା, ଲାଗିଙ୍ଗ୍ ଏପେଙ୍ଗ୍ ମୋଶା ଲେକିକିତି ନିୟମ୍ ସାସ୍ତର୍ ୱିଜୁ ମାନିକିନି ଦର୍କାର୍। 4 ଇନେସ୍କି ଏପେଙ୍ଗ୍ ଯଦି ମୋଶା ଲେକିକିତି ନିୟମ୍ତିଙ୍ଗ୍ ମାନିକିତି କାଜିଙ୍ଗ୍ ଈଶ୍ୱର ଲାଗାୟ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆଦେଙ୍ଗ୍ ଇଚା କିନାଦେରା, ଲାଗିଙ୍ଗ୍ ଏପେଙ୍ଗ୍ ଖ୍ରୀଷ୍ଟତାଙ୍ଗ୍ ଜେକ ଆତାଦେର୍ନା ଆରେ ଏପେଙ୍ଗ୍ ଈଶ୍ୱର ଦୟାତିଙ୍ଗ୍ ଆହୁଦେରା। 5 ଇନେସ୍କି ଈଶ୍ୱର ମାଙ୍ଗେଙ୍ଗ୍ ହିଜି ମାନ୍ଞ୍ଚି ପାର୍ମାଣ୍ତାଙ୍ଗ୍ ଦରମ୍ ମାନାୟ୍ ଆନି କାଜିଙ୍ଗ୍, ଆପେଙ୍ଗ୍ ଖ୍ରୀଷ୍ଟତାକେ ପାର୍ତି କିଜି ଆରେ ପବିତ୍ର ଆତ୍ମା ସାଇଜତାଙ୍ଗ୍ ବେସି ଆହାକିଜି କାନାପା। 6 ସୁନତ ବିଦି ମାନିକିତିସ୍ କି କିୱିତିସ୍ ଇନା ମୁଲ୍ୟ ଆକାୟ୍, ଏଚେପାଦ୍ନା ଆପେଙ୍ଗ୍ ଯୀଶୁ ଖ୍ରୀଷ୍ଟତାକେ ପାର୍ତି କିନାପା। ଲାଗିଙ୍ଗ୍ ମୁଡ଼୍ ବିଷୟ ଆନାତା ଖ୍ରୀଷ୍ଟଙ୍ଗ୍ ପାର୍ତି କିନାସ୍, ହେଦାଙ୍ଗ୍ ଜେକନିକାରିଙ୍ଗ୍ ଲାଡ୍କିନି କାଜିଙ୍ଗ୍ ମାଙ୍ଗେଙ୍ଗ୍ ସାଇଜ କିଦ୍ନାତା। 7 ଇନେସ୍ ରକାନ୍ ମାନାୟ୍ ହନ୍ନି କେଲ୍ତାକେ ବାଗ୍ ଅଜି ହାର୍ କିଜି ହନ୍ନାନ୍, ହେଲେକେ ଏପେଙ୍ଗ୍ ପା ଖ୍ରୀଷ୍ଟ ହୁଦାଙ୍ଗ୍ ହାର୍ଦାଙ୍ଗ୍ ଜିଜି ମାନାଦେର୍। ଲାଗିଙ୍ଗ୍ ସତ୍ ବିଷୟତିଙ୍ଗ୍ ମାନି କିୱେଦେଙ୍ଗ୍ ଇନେର୍ ମିଙ୍ଗେଙ୍ଗ୍ ବାଦା ହିତ୍ତାର୍? 8 ସତ୍ରେ ଇଦାଙ୍ଗ୍ ଈଶ୍ୱର କିୱାଦାଙ୍ଗ୍ ମାନ୍ଗାନାନ୍, ଇନେସ୍କି ହେୱାନ୍ ମିଙ୍ଗେଙ୍ଗ୍ ସ୍ୱାଦିନ୍ ଆଜି ମାଞ୍ଜେଙ୍ଗ୍ କୁକ୍ତାତାନ୍ନା। 9 ଲାଗିଙ୍ଗ୍ ଜାଗ୍ରତ୍ ଆଜି ମାନାଟ୍, ଇନେସ୍କି ବେଣ୍ତ ମାନାତ୍, “ଅଲପ୍ ସାଡ଼ାକାର୍ ଅଟାଗୁଣ୍ଡା ଚାଟ୍କାଇ କିତି ଗୁଣ୍ଡାତିଙ୍ଗ୍ ପୁରା ପୁଲାଇ କିନାତ୍,” ହେଲେକେ ବୁଲ୍ ହିକ୍ଷା ମିଙ୍ଗେଙ୍ଗ୍ ପା ପୁରା କରାପ୍ କିଦ୍ନାତ୍। 10 ମାପୃ ମିଙ୍ଗେଙ୍ଗ୍ ବୁଲ୍ ହିକ୍ଷା ଆହ୍ନିତାଙ୍ଗ୍ ରକ୍ଷା କିଦ୍ନାନ୍ ଇଞ୍ଜି ଆନେଙ୍ଗ୍ ପାର୍ତି କିନାଙ୍ଗା। ମାତର୍ ଇନେର୍ ମିଙ୍ଗେଙ୍ଗ୍ ବାଦା ହିଦ୍ନାରା, ହେୱାରିଙ୍ଗ୍ ଈଶ୍ୱର ଦଣ୍ଡ୍ ହିନାନ୍। 11 ମାତର୍ ଏ ଟଣ୍ଡାର୍କାଦେର୍, ଯଦି ଆନେଙ୍ଗ୍ ସୁନତ ବିଦି ମାନି କିଦେଙ୍ଗ୍ ଶୁଣାୟ୍ କିତାଙ୍ଗ୍ମା, ଲାଗିଙ୍ଗ୍ ଆନେଙ୍ଗ୍ ନଙ୍ଗୟ୍ କଷ୍ଟ ପଡ଼ାଆୱାତାଙ୍ଗ୍ମା। ଆରେ ଆନେଙ୍ଗ୍ ଯଦି କୃଶକାଟ୍ତାକେ ହାଃତି ଖ୍ରୀଷ୍ଟ କାଜିଙ୍ଗ୍ ନେ ଉଦାର୍ ମାନାତ୍ ଇଞ୍ଜି ଶୁଣାୟ୍ କିୱାତାଙ୍ଗ୍ମା, ଲାଗିଙ୍ଗ୍ ଇନେର୍ତାକେ ପା ଅପ୍ମାନ୍ ପାୟାଆୱାତାଙ୍ଗ୍ମା। 12 ଇମ୍ଣାକାର୍ ମିଙ୍ଗେଙ୍ଗ୍ ସୁନତ ବିଦି ମାନିକିନି ବୁଲ୍ ହିକ୍ଷାହିଜି ବାଦା ହିତ୍ତାର୍ନା, ହେୱାର୍ ହେ ଜିନିଷ୍ ପା ହଣ୍ଡି ଆତିସ୍ ହାର୍ ଆତାତ୍ମା। 13 ଇନେସ୍କି ଏ ଟଣ୍ଡାର୍କାଦେର୍, ଈଶ୍ୱର ମିଙ୍ଗେଙ୍ଗ୍ ସ୍ୱାଦିନ୍ ଆଜି ମାନି କାଜିଙ୍ଗ୍ କୁକ୍ତାତାନ୍ନା। ଲାଗିଙ୍ଗ୍ ମି ଗାଗାଡ଼୍ନି ଇଚାତାଙ୍ଗ୍ ପୁରା କିଦେଙ୍ଗ୍ ମି ସ୍ୱାଦିନ୍ତିଙ୍ଗ୍ ବ୍ୟବହାର୍ କିମାଟ୍, ମାତର୍ ଲାଡ୍ତାଙ୍ଗ୍ ଜାର୍-ଜାର୍ତିଙ୍ଗ୍ ହେବା କିନି କାଜିଙ୍ଗ୍ ବ୍ଯବହାର୍ କିୟାଟ୍। 14 ଇନେସ୍କି ମୋଶା ଲେକିକିତି ନିୟମ୍ ସାସ୍ତର୍ ଇଦାଙ୍ଗ୍ ର କାତା ମାନିକିନି କାଜିଙ୍ଗ୍ ପୁରାଆନାତ୍, “ଏପେଙ୍ଗ୍ ମି ଲକ୍ବାକ୍ତିଙ୍ଗ୍ ଗରବ୍ତାଙ୍ଗ୍ ଲାଡ୍ କିୟାଟ୍।” 15 ମାତର୍ ଏପେଙ୍ଗ୍ ଲାଡ୍ କିବାଆୱାଦାଙ୍ଗ୍, ଏପେଙ୍ଗ୍ ଯଦି ପଶୁ ଲେକେ ଚାବାକାତ୍ରା ଆଜି ଗାଉଦାଉ ଆନାଦେର୍, ଲାଗିଙ୍ଗ୍ ଜାଗ୍ରତ୍ ଆଡ ଯେ ଏପେଙ୍ଗ୍ ଜାର୍-ଜାର୍ତିଙ୍ଗ୍ ନଷ୍ଟ କିମାଟ୍। ପବିତ୍ର ଆତ୍ମା ସାଇଜତାଙ୍ଗ୍ ଜିବୁନ୍ କାଟିକିୟାଟ୍ 16 ଲାଗିଙ୍ଗ୍ ଆନେଙ୍ଗ୍ ଇଦାଙ୍ଗ୍ ୱେଚ୍ଚାନାଙ୍ଗା, ପବିତ୍ର ଆତ୍ମା ସାଇଜତାଙ୍ଗ୍ ବ୍ଯବହାର୍ କିୟାଟ୍। ଲାଗିଙ୍ଗ୍ ଏପେଙ୍ଗ୍ ଗାଗାଡ଼୍ନି ଇଚାତାଙ୍ଗ୍ ପୁରା କିନିଲେକେ କାମାୟ୍ କିମାଟ୍। 17 ଇନେସ୍କି ଗାଗାଡ଼୍ନି ଇଚା କରାପ୍ ବିଷୟ କିଦେଙ୍ଗ୍ ଇଚା କିନାତ୍, ଇନାକାକି ପବିତ୍ର ଆତ୍ମା ଇଚାନି ବିରଦ୍ ଲେକେ। ପବିତ୍ର ଆତ୍ମା ମାଙ୍ଗେଙ୍ଗ୍ ହାର୍ଦି ବିଷୟ କିନି ଇଚା ହିଦ୍ନାତ୍, ହେଦାଙ୍ଗ୍ ଗାଗାଡ଼୍ନି ଇଚାନି ବିରଦ୍ ଲେକେ। ଇନେସ୍କି ଇ ରିଣ୍ଡାଙ୍ଗ୍ ଶାକ୍ତି ବିତ୍ରେତାଙ୍ଗ୍ ୱିଜୁଦିନ୍ ଜଗ୍ଡ଼ା ଲାଗିସ୍ ମାଚିସ୍। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ହାର୍ଦି ବିଷୟ ୱିଜୁଦିନ୍ କିଦେଙ୍ଗ୍ ଇଚା କିତିସ୍ ପା, ଆସେଙ୍ଗ୍ କିଦେଙ୍ଗ୍ ଆଡୁସ୍। 18 ମାତର୍ ଯଦି ଏପେଙ୍ଗ୍ ପବିତ୍ର ଆତ୍ମାନି ସାଇଜତାଙ୍ଗ୍ ଜିବୁନ୍ କାଟିକିନାଦେର୍, ଲାଗିଙ୍ଗ୍ ଏପେଙ୍ଗ୍ ମୋଶା ଲେକିକିତି ନିୟମ୍ ସାସ୍ତର୍ ତାରେନ୍ ହିଲୁଦେର୍। 19 ଏପେଙ୍ଗ୍ ଗାଗାଡ଼୍ନି ଇଚାନି କାମାୟ୍ ୱିଜୁ କିଲେର୍ କିଜି ପୁଚାଦେର୍ନା କି ଦାରି କାମାୟ୍, କରାପ୍ ଚିନ୍ତା। 20 ଆରେ ଅପ୍ମାନ୍ନି କାମାୟ୍, ମୁର୍ତି ପୁଜା, ମାନାୟ୍ ମାରୁ, ଗୁଣିଆ କାମାୟ୍, ଜେକନିକାନିଙ୍ଗ୍ ଗିଣ୍ କିନାକା। ଜଗ୍ଡ଼ା କିନାକା, ଜେକନିକାରିଙ୍ଗ୍ ହାର୍ଦାଙ୍ଗ୍ ହୁଡ଼୍ୱାକା, ରିସା ଆନାକା, ଜାର୍ ବିଷୟତିଙ୍ଗ୍ ଚିନ୍ତା କିନାକା, ଦଳ୍-ଦଳ୍ ଆନାକା, କାତା ମାନାମାନି ଆୱାକା, ଲକାରିଙ୍ଗ୍ ଆକାର୍ ଆନାକା। 21 ଆରେ ମଦୁଆ ଆନାକା, କରାପ୍ ମାନାୟ୍ ହୁଦାଙ୍ଗ୍ ମାହାଆଜି ୱାରି କିନାକା, ଇଲେକେ ଜେକନି ପାପ୍ କାମାୟ୍ କିନାର୍। ଆନେଙ୍ଗ୍ ଆଗେ ମିଙ୍ଗେଙ୍ଗ୍ ଇନେସ୍ ୱେଚ୍ଚି ମାନ୍ଞ୍ଚାଙ୍ଗ୍, ହେଲେକେ ଆରେରଗ ୱେଚ୍ଚାନାଙ୍ଗା ଯେ, ଇମ୍ଣାକାର୍ ଇ ୱିଜୁ ପର୍କାର୍ କାମାୟ୍ କିନାର୍, ହେୱାର୍ ଈଶ୍ୱର ସାସନ୍ କିନି ରାଜିନି ଅଦିକାର୍ ଆଦେଙ୍ଗ୍ ଆଡୁର୍। 22 ମାତର୍ ପବିତ୍ର ଆତ୍ମା ମାଙ୍ଗେଙ୍ଗ୍ ସାଇଜ କିତ୍ତିସ୍, ଇଲେକେ ଗୁଣ୍: ଲାଡ୍ କିନାକା, ୱାରି କିନାକା, ଶାନ୍ତିତାଙ୍ଗ୍ ମାନାକା, ବେସି କଷ୍ଟତିଙ୍ଗ୍ ସମ୍ୱାଲି କିନାକା, ଦୟା କିନାକା। 23 ଆରେ ହାର୍ଦି କାମାୟ୍ କିନାକା, ହାର୍ଦି ମାନାୟ୍ ଆନାକା, ହିରୁ ମାନାୟ୍ ଆନାକା, ଜାର୍ତିଙ୍ଗ୍ କଣ୍ଟ୍ରୁଲ୍ କିନାକା। ମୋଶା ଲେକିକିତି ନିୟମ୍ ସାସ୍ତର୍ ଇ ୱିଜୁ ଗୁଣ୍ତିଙ୍ଗ୍ ବିରଦ୍ କିଦେଙ୍ଗ୍ ଆଡୁତ୍। 24 ଇମ୍ଣାକାର୍ ଯୀଶୁ ଖ୍ରୀଷ୍ଟନି ମାନାୟ୍, ହେୱାର୍ ତା ଗାଗାଡ଼୍ନି ଇଚା ଆରେ କରାପ୍ ଚିନ୍ତାତିଙ୍ଗ୍ ତା କୃଶକାଟ୍ତାକେ ଅସ୍ତାର୍ନା। 25 ଆସେଙ୍ଗ୍ ପବିତ୍ର ଆତ୍ମା ସାଇଜତାଙ୍ଗ୍ ପୁନି ଜିବୁନ୍ ପାୟାଆତିଲେ, ନଙ୍ଗୟ୍ ଆସେଙ୍ଗ୍ ୱିଜୁ ସମୟ୍ତ ପବିତ୍ର ଆତ୍ମା ସାଇଜତାଙ୍ଗ୍ ବ୍ଯବହାର୍ କିନାସ୍। 26 ଆରେ ଜାର୍ତିଙ୍ଗ୍ ମାନ୍ ଗାର୍ବିୟା ଆମାଟ୍, ଜାର୍-ଜାର୍ତିଙ୍ଗ୍ ରିସା ଆମାଟ୍ ଆରେ ଜାର୍-ଜାର୍ତିଙ୍ଗ୍ ଆକାର୍ ଆମାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation