ଗାଲାତିୟ 4 - New Testament in Pengo Parja Languageମେହି ଆରେ ମାଲିକ୍ 1 ଇଦାଙ୍ଗ୍ତିଙ୍ଗ୍ ଆନେଙ୍ଗ୍ ହାର୍ଦାଙ୍ଗ୍ ବୁଜାଇକିଜି ୱେଚ୍ଚାନାଙ୍ଗ୍, ହିମ୍ଣା ଲାତ୍ରାହି ସମ୍ଫତିନି ଆଦିକାରି ଆନାନ୍। ମାତର୍ ଏଚେଦିନ୍ ପାତେକ୍ ହେୱାନ୍ ହିରୁ ହିମ୍ଣା ଆଜି ମାନ୍ଙ୍ଗାନାନ୍, ହେଦିନ୍ ପାତେକ୍ ହେୱାନ୍ ୱିଜୁ ବିଷୟନି ମାଲିକ୍ ଆତିସ୍ପା, ହେୱାନ୍ ଦାସ୍ତାଙ୍ଗ୍ ଜେକ ଆକାୟ୍। 2 ଆରେ ଆଦିକାର୍ ପାୟାଆନି କାଜିଙ୍ଗ୍ ଲାତ୍ରାହି ଟିକ୍ କିତି ଦିନ୍ ପାତେକ୍, ହେୱାନ୍ ହିରୁ ହିମ୍ଣା ଦେକାଶୁଣା କିନି ମାନାୟ୍ ଆରେ ମେନେଞ୍ଜର୍ ତାରେନ୍ ମାନ୍ଙ୍ଗାନାନ୍। 3 ହେଲେକେ ଖ୍ରୀଷ୍ଟ ୱାଜି ମାଙ୍ଗେଙ୍ଗ୍ ଉଦାର୍ କିଦ୍ନି ପାତେକ୍, ଆସେଙ୍ଗ୍ ହିରୁ ହିମ୍ଣା ମାଚାସ୍। ଆରେ ଆସେଙ୍ଗ୍ ଇ ଜଗତ୍ନି ନିତି ନିୟମ୍ନି ଦାସ୍ ଆଜି ମାଚାସ୍। 4 ମାତର୍ ଈଶ୍ୱର ଟିକ୍ କିଜିମାଚି ଦିନ୍ ୱାତିଲେ, ଈଶ୍ୱର ତା ଜାର୍ ହିମ୍ଣାତିଙ୍ଗ୍ ଇ ଜଗତ୍ତାକେ ପକ୍ତାନ୍, ଆରେ ହେୱାନ୍ ମାନାୟ୍ ଜନମ୍ ଆତି ଲେକେ କଗ୍ଲେତାଙ୍ଗ୍ ଜନମ୍ ଆତାନ୍। ଆରେ ହେୱାନ୍ ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ମାନି କିତାନ୍। 5 ମୋଶା ଲେକିକିତି ନିୟମ୍ ସାସ୍ତର୍ ତାରେନ୍ ଆସେଙ୍ଗ୍ ଦାସ୍ ଲେକେ ମାଚାସ୍, ଆରେ ମାଙ୍ଗେଙ୍ଗ୍ ଇନେସ୍ ହେୱାନ୍ ମୁକ୍ତି କିଦ୍ନାନ୍ ଆରେ ମାଙ୍ଗେଙ୍ଗ୍ ତା ଜାର୍ ହିମ୍ଣା କିଜି ଅସାହାଞ୍ଜ୍ନାନ୍, ଇଦାଙ୍ଗ୍ କାଜିଙ୍ଗ୍ ଈଶ୍ୱର ଯୀଶୁଙ୍ଗ୍ ପକ୍ତାତାନ୍। 6 ଆରେ ଆସେଙ୍ଗ୍ ତା ହିମ୍ଣା ଆତି କାଜିଙ୍ଗ୍, ଈଶ୍ୱର ତା ହିମ୍ଣାନି ଆତ୍ମାତିଙ୍ଗ୍ ମା ଗରବ୍ ବିତ୍ରେ ପକ୍ତାତାନ୍ନା। ହେ ଆତ୍ମା ଆବା ପିତା ଇଞ୍ଜି କୁକ୍ତେଙ୍ଗ୍ ମାଙ୍ଗେଙ୍ଗ୍ ସାହାସ୍ ହିଦ୍ନାତା। 7 ଲାଗିଙ୍ଗ୍ ଏପେଙ୍ଗ୍ ଆରେ ନିୟମ୍ ସାସ୍ତର୍ନି ଦାସ୍ ଆକାୟ୍, ମାତର୍ ଈଶ୍ୱରନି ଜାର୍ ହିମ୍ଣା କାଦେର୍। ଆରେ ଏପେଙ୍ଗ୍ ଈଶ୍ୱର ମେହି ଆତି କାଜିଙ୍ଗ୍, ଈଶ୍ୱର ତା ହିମ୍ଣାରିଙ୍ଗ୍ ହିନି ଆଦିକାର୍ ମିଙ୍ଗେଙ୍ଗ୍ ହିତ୍ତାନ୍ନା। ପାଉଲ ଗାଲାତିୟ ମଣ୍ଡ୍ଲିନିକାର୍ କାଜିଙ୍ଗ୍ ଚିନ୍ତା କିତାନ୍ 8 ଏପେଙ୍ଗ୍ ଈଶ୍ୱରତିଙ୍ଗ୍ ପୁନ୍ୱାଦାଙ୍ଗ୍, ଇମ୍ଣାକାର୍ ସତ୍ରେ ଈଶ୍ୱର ହିଲାତାର୍, ହେୱାର୍ ଦାସ୍ ଏପେଙ୍ଗ୍ ଆଜି ମାଚାଦେର୍। 9 ମାତର୍ ନଙ୍ଗୟ୍ ଏପେଙ୍ଗ୍ ଈଶ୍ୱରତିଙ୍ଗ୍ ପୁଚାଦେର୍ନା, ନଇଲେ ଇଦାଙ୍ଗ୍ ପା ଆନେଙ୍ଗ୍ ୱେଚ୍ଚାନାଙ୍ଗ୍ ଯେ ଈଶ୍ୱର ନଙ୍ଗୟ୍ ମିଙ୍ଗେଙ୍ଗ୍ ପୁନ୍ଞ୍ଚାନ୍ନା। ଲାଗିଙ୍ଗ୍ ଇ ଜଗତ୍ନି ଦୁର୍ବଲ୍ ଆରେ ମୁଲ୍ୟ ହିଲ୍ୱି ହିକ୍ଷାନି ଦାସ୍ ଆଦେଙ୍ଗ୍, ଇନେସ୍ ଆରେରଗ ଲେଉଟା ଆଜି ହାଞ୍ଜେଙ୍ଗ୍ ଇଚା କିନାଦେରା? 10 ଏପେଙ୍ଗ୍ ଈଶ୍ୱରତାଙ୍ଗ୍ ସାଇଜ ପାୟାଆନି କାଜିଙ୍ଗ୍ ଉପାୟ୍ କିଜି କେତେକ୍ ଦିନ୍, ମାସ୍, ପର୍ବ ଆରେ ବାର୍ହୁ ମାନି କିନାଦେରା। 11 ଲାଗିଙ୍ଗ୍ ମି କାଜିଙ୍ଗ୍ ଆନେଙ୍ଗ୍ ଇମ୍ଣି କାମାୟ୍ କିତାଙ୍ଗ୍ନା, ହେଦାଙ୍ଗ୍ ବେକାରେ ଆନାତ୍ ଇଞ୍ଜି ବାବିକିଜି ଆନେଙ୍ଗ୍ ପାଣ୍ଡ୍ରାଆନାଙ୍ଗା। 12 ଏ ପାର୍ତିକିନି ଟଣ୍ଡାର୍କାଦେର୍, ଆନେଙ୍ଗ୍ ମିଙ୍ଗେଙ୍ଗ୍ ଗୁୱାରି କିଦ୍ନାଙ୍ଗା, ନା ଲେକେ ଏପେଙ୍ଗ୍ ପା ନିୟମ୍ ସାସ୍ତର୍ତାଙ୍ଗ୍ ସ୍ୱାଦିନ୍ ଆଡ। ଇନେସ୍କି ଆନେଙ୍ଗ୍ ମି ଲେକେ ବିନ୍ଜାତି ଆତାଙ୍ଗ୍ନା। ଏଚେପାଦ୍ନା ଆନେଙ୍ଗ୍ ପାର୍ତୁମ୍ ମି ଲାଗାୟ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ୱାଜି ମାଚାଙ୍ଗ୍, ଏପେଙ୍ଗ୍ ବେସି ହାର୍ଦାଙ୍ଗ୍ ନାଙ୍ଗେଙ୍ଗ୍ ଜାତୁନ୍ ଅତ୍ତାଦେର୍। 13 ଏପେଙ୍ଗ୍ ମାନ୍ତ ବାବିକିଜି ମାନ୍ଙ୍ଗାନାଦେର୍, ଏଚେପାଦ୍ନା ଆନେଙ୍ଗ୍ ପାର୍ତୁମ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ୱାଜି ମାଚାଙ୍ଗ୍, ହେପାଦ୍ନା ନା ଗାଗାଡ଼୍ ହାର୍ ହିଲାତାତ୍। 14 ନା ଗାଗାଡ଼୍ ହାର୍ ହିଲିତିସ୍ ପା, ଏପେଙ୍ଗ୍ ନାଙ୍ଗେଙ୍ଗ୍ ଇନସ୍ତା କିଦ୍ୱାତାଦେର୍ କି ଗିଣ୍ କିଦ୍ୱାତାଦେର୍। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ରକାନ୍ ଈଶ୍ୱର ଦୁତ୍ ଲେକେ ଜାତୁନ୍ କିତ୍ତାଦେର୍, ଆରେ ଯୀଶୁ ଖ୍ରୀଷ୍ଟଙ୍ଗ୍ ଆସ୍ତି ଲେକେ ନାଙ୍ଗେଙ୍ଗ୍ ଆସ୍ତାତାଦେର୍। 15 ହେପାଦ୍ନା ଏପେଙ୍ଗ୍ ବେସି ୱାରିତାଙ୍ଗ୍ ମାଚାଦେର୍, ଲାଗିଙ୍ଗ୍ ମି ହେ ୱାରି ଇମେତ୍? ହାତ୍ପା ଆନେଙ୍ଗ୍ ମି ବିଷୟରେ ୱେଚ୍ଚାନାଙ୍ଗା ଯେ, ଯଦି ଆଡ଼୍ତିସ୍ ଏପେଙ୍ଗ୍ ଜାର୍-ଜାର୍ କାଣ୍କୁ ଉନ୍ଦ୍ଦି ନାଙ୍ଗେଙ୍ଗ୍ ହିତ୍ତାଦେର୍ମା। 16 ଲାଗିଙ୍ଗ୍ ନଙ୍ଗୟ୍ ଆନେଙ୍ଗ୍ ସତ୍ ୱେଚ୍ଚିତିଲେ କି, ମି ଶତ୍ରୁ ଆତାଙ୍ଗ୍ନା? 17 ହେ ବୁଲ୍ ହିକ୍ଷାହିନି ମାଷ୍ଟେରାର୍ ମିଙ୍ଗେଙ୍ଗ୍ ହେୱାର୍ ନିପଣ୍ କିଦ୍ଦେଙ୍ଗ୍ ବେସି ଇଚା କିନାରା, ମାତର୍ ହେୱାର୍ ହାର୍ଦି ମାନ୍ତାଙ୍ଗ୍ ଇଦାଙ୍ଗ୍ କିଉରା। ମାତର୍ ଏପେଙ୍ଗ୍ ଇନେସ୍ ହେୱାର୍ ବିଷୟରେ ନେ ଦ୍ୟାନ୍ହିଜି ମାନାଦେର୍, ଇଦାଙ୍ଗ୍ କାଜିଙ୍ଗ୍ ହେୱାର୍ ମିଙ୍ଗେଙ୍ଗ୍ ନାବେତାଙ୍ଗ୍ ଜେକ କିଦ୍ଦେଙ୍ଗ୍ ଇଚା କିଦ୍ନାର୍। 18 ଯଦି ଇନେର୍ ମି କାଜିଙ୍ଗ୍ ହାର୍ଦି ବିଷୟ କିଦେଙ୍ଗ୍ ଇଚା କିନାନା, ଲାଗିଙ୍ଗ୍ ହେଦାଙ୍ଗ୍ ହାର୍ଦି ବିଷୟ। ମାତର୍ ହେୱାର୍ ୱିଜୁ ସମୟରେ କିୟେର୍, ଆନେଙ୍ଗ୍ ମି ବିତ୍ରେ ମାନି ୱେଡ଼ାଲିଙ୍ଗ୍ ନେ ଆକାୟ୍। 19 ଏ ନା ଲାଡ୍ନି କାଡ଼୍ଦେର୍, ର କଗ୍ଲେ ହିମ୍ଣା ଜନମ୍ କିନିହିଙ୍ଗ୍ ଇନେସ୍ କଷ୍ଟ ପାୟାଆନାତ୍, ହେଲେକେ ଆନେଙ୍ଗ୍ ମି କାଜିଙ୍ଗ୍ ଆରେରଗ କଷ୍ଟ ପାୟାଆନାଙ୍ଗା। ଏପେଙ୍ଗ୍ ପୁରାପୁରି ଖ୍ରୀଷ୍ଟ ଲେକେ ଆୱି ପାତେକ୍, ଆନେଙ୍ଗ୍ ହେ କଷ୍ଟ ପାୟାଆଜି ମାନ୍ଙ୍ଗାନାଙ୍ଗ୍। 20 ଆନେଙ୍ଗ୍ ଇଚା କିଜି ମାଚାଙ୍ଗ୍ ଯେ ନଙ୍ଗୟ୍ ଆନେଙ୍ଗ୍ ମି ଲାଗାୟ୍ ମାଚିସ୍ ଆତାତ୍ମା, ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଶାନ୍ତିଆଜି କାତା ବୁଜାଇ କିଦ୍ଦେଙ୍ଗ୍ ଆଡ଼୍ତାଙ୍ଗ୍ମା। ଇନେସ୍କି ଆନେଙ୍ଗ୍ ଦେହା ମାନ୍ଞ୍ଜି ଇନେସ୍ ମିଙ୍ଗେଙ୍ଗ୍ ସାଇଜ କିଦେଙ୍ଗ୍ ଆଡ଼୍ଦାନାଙ୍ଗ୍ ହେଦାଙ୍ଗ୍ ଆନେଙ୍ଗ୍ ପୁଞ୍ଜେଙ୍ଗ୍ ଆଡୁଙ୍ଗା। ହାଗାର ଆରେ ସାରାତି କାତା ୱେଚ୍ନିଲେକେ ବୁଜାଇକିନି କାତା 21 ଏପେଙ୍ଗ୍ ମୋଶା ଲେକିକିତି ନିୟମ୍ ସାସ୍ତର୍ ତାରେନ୍ ମାଞ୍ଜେଙ୍ଗ୍ ଇଚା କିନାଦେରା ଯେ, ନାଙ୍ଗେଙ୍ଗ୍ ୱେଚ୍ଚାଟ୍ ତ, ମୋଶା ଲେକିକିତି ନିୟମ୍ ସାସ୍ତର୍ ହାତ୍ପା ଇନାକା ୱେଚ୍ନାତା? 22 ପବିତ୍ର ସାସ୍ତର୍ତାକେ ଲେକାଆତାତ୍ନା, ଅବ୍ରାହାମତିଙ୍ଗ୍ ରିକାର୍ ମେହିର୍ ମାଚାର୍, ରକାନ୍ ଦାସିତାଙ୍ଗ୍ ଆରେ ରକାନ୍ ସ୍ୱାଦିନ୍ ପାୟାଆତି କଗ୍ଲେତାଙ୍ଗ୍ ଜନମ୍ ଆଜି ମାଚାନ୍। 23 ଇମ୍ଣାକାନ୍ ଦାସିନି ହିମ୍ଣା ମାଚାନ୍, ହେୱାନ୍ ମାନାୟ୍ ଉପାୟ୍ତାଙ୍ଗ୍ ଈଶ୍ୱରକିତି ପାର୍ମାଣ୍ତିଙ୍ଗ୍ ପୁରା କିଦେଙ୍ଗ୍ ଜନମ୍ ଆତାନ୍। ମାତର୍ ଇମ୍ଣାକାନ୍ ସ୍ୱାଦିନ୍ ପାୟାଆତି କଗ୍ଲେନି ହିମ୍ଣା ମାଚାନ୍, ହେୱାନ୍ ଈଶ୍ୱର ଇଚାତାଙ୍ଗ୍ ତା ପାର୍ମାଣ୍ତିଙ୍ଗ୍ ପୁରା କିଦେଙ୍ଗ୍ ଜନମ୍ ଆତାନ୍। 24 ଇ ୱିଜୁ କାତାନି ଅର୍ତ ମାନାତ୍, ଇ ରିଣ୍ଡେକ୍ କଗ୍ଲେକ୍ ଈଶ୍ୱରତି ରିଣ୍ଡାଙ୍ଗ୍ ନିୟମ୍ ଲେକେ। ପାର୍ତୁମ୍ ନିୟମ୍ ପାର୍ତୁମ୍ କଗ୍ଲେ ହାଗାର ଲେକେ। ଈଶ୍ୱର ଇ ନିୟମ୍ ସିନୟ ମାଡ଼ିତାକେ ହିଜିମାଚାନ୍, ଆରେ ଇ ନିୟମ୍ତିଙ୍ଗ୍ ମାନିକିନି ମାନାୟାର୍ ଦାସ୍ ଲେକେ ମାଚାର୍। 25 ହାଗାର ଆରବ ଦେସ୍ନି ସିନୟ ମାଡ଼ିତିଙ୍ଗ୍ ବୁଜାଇ କିନାତ୍, ଆରେ ଯିରୁଶାଲାମ ସହର୍ ତା ଲେକେ। ଇନେସ୍କି ତା ହିମ୍ଣାଙ୍ଗ୍ ନିୟମ୍ ସାସ୍ତର୍ନି ଦାସ୍ ଆଜି ମାନାରା। 26 ମାତର୍ ଦୁଇ ନମ୍ବର୍ କଗ୍ଲେ ଆନାତା ସାରା, ହେଦେଲ୍ ସରଗ୍ନି ଯିରୁଶାଲାମ ସହର୍ନି କଗ୍ଲେ ଲେକେ। ହେଦେଲ୍ ସ୍ୱାଦିନ୍ ପାୟାଆତି କଗ୍ଲେ, ଆରେ ହେଦେଲ୍ ମାଞ୍ଜ୍ୟା। 27 ଲାଗିଙ୍ଗ୍ ଯିଶାଇୟ ବହିତାକେ ଲେକା ମାନାତ୍, “ଏ ବାଞ୍ଜ୍ଣି, ଏନେଙ୍ଗ୍ ଇନାୱେଡ଼ାଙ୍ଗ୍ ପା ହିମ୍ଣା ଜନମ୍ କିୱାତାୟ୍ନା, ୱାରି କିୟା, ଏନେଙ୍ଗ୍ ଇନାୱେଡ଼ାଙ୍ଗ୍ ପା ହିମ୍ଣା ଜନମ୍ କିତି କଷ୍ଟ ପାୟାଆୱିତି କଗ୍ଲେ, ଗାଜା କାଟ୍ତାଙ୍ଗ୍ ଜୟ୍-ଜୟ୍ କିୟା। ଇନେସ୍କି ଆଣ୍ଡ୍ରା ଲାଗାୟ୍ ମାନି କଗ୍ଲେତାଙ୍ଗ୍ ଚାଡ୍ରି କଗ୍ଲେତାକେ ବେସି ହିମ୍ଣାଙ୍ଗ୍ ମାନାର୍।” 28 ଏ ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ଇସାକ ଲେକେ ପାର୍ମାଣ୍ନି ହିମ୍ଣା କାଦେର୍। 29 ମାତର୍ ମାନାୟ୍ନି ଉପାୟ୍ତାଙ୍ଗ୍ ଜନମ୍ ଆତି ଈଶ୍ମାଏଲ ଇନେସ୍, ପବିତ୍ର ଆତ୍ମା ଶାକ୍ତିତାଙ୍ଗ୍ ଜନମ୍ ଆତି ଇସାକତିଙ୍ଗ୍ ଦୁକ୍କଷ୍ଟ ହିଜିମାଚାନ୍। ହେଲେକେ ଏପେଙ୍ଗ୍ ପା ନଙ୍ଗୟ୍ ନିୟମ୍ ସାସ୍ତର୍ ମାନିକିନି ମାନାୟାର୍ କାଜିଙ୍ଗ୍ କଷ୍ଟ ପାୟାଆନାଦେରା। 30 ମାତର୍ ନିୟମ୍ ସାସ୍ତର୍ ଇ ବିଷୟରେ ଇନାକା ୱେଚ୍ନାତ୍? “ଦାସି ଆରେ ତା ହିମ୍ଣାତିଙ୍ଗ୍ ବାର୍ତ ହପାଟ୍; ଇନେସ୍କି ସ୍ୱାଦିନ୍ ପାୟାଆତି କଗ୍ଲେନି ହିମ୍ଣା ହୁଦାଙ୍ଗ୍ ଅଦିକାର୍ ଆଦେଙ୍ଗ୍ ଆଡୁନ୍।” 31 ଇଦାଙ୍ଗ୍ କାଜିଙ୍ଗ୍, ଏ ପାର୍ତିକିନି ଟଣ୍ଡାର୍କାଦେର୍, ଆପେଙ୍ଗ୍ ଦାସିନି ହିମ୍ଣାକାପ୍ ଆକାୟ୍, ମାତର୍ ସ୍ୱାଦିନ୍ ପାୟାଆତି କଗ୍ଲେ ମେହି। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation