ଗାଲାତିୟ 3 - New Testament in Pengo Parja Languageଖ୍ରୀଷ୍ଟଙ୍ଗ୍ ପାର୍ତିକିତି କାଜିଙ୍ଗ୍ ଦରମ୍ ଆତାସ୍ନା 1 ଗାଲାତିୟ ସହର୍ତାକେ ମାନି ପାର୍ତିକିନି ମାନାୟ୍ କାଦେର୍ ଏପେଙ୍ଗ୍ ବକୁୱା କାଦେର୍ କି? ଯୀଶୁ ଖ୍ରୀଷ୍ଟ ଇନାକିଦେଙ୍ଗ୍ କୃଶକାଟ୍ତାକେ ହାଃଜି ମାଚାନ୍ ହେଦାଙ୍ଗ୍ ମିଙ୍ଗେଙ୍ଗ୍ କିଲେର୍ କିଜି ବୁଜାଇକିଜି ମାନ୍ଞ୍ଚାଙ୍ଗ୍। ଲାଗିଙ୍ଗ୍ ଇନେର୍ କାତା ଆସ୍ତି ଏପେଙ୍ଗ୍ ବୁଲ୍କା ଆତାଦେର୍ନା? 2 ଲାଗିଙ୍ଗ୍ ଆନେଙ୍ଗ୍ ରଞ୍ଜାଙ୍ଗ୍ ମିଙ୍ଗେଙ୍ଗ୍ ପଶ୍ନ ୱେନ୍ବାଆଦ୍ଦେଙ୍ଗ୍ ଇଚା କିନାଙ୍ଗା: ମୋଶା ଲେକିକିତି ନିୟମ୍ତିଙ୍ଗ୍ ମାନିକିଜି କି ଏପେଙ୍ଗ୍ ପବିତ୍ର ଆତ୍ମା ପାୟାଆଜି ମାଚାଦେର୍? ଇଦାଙ୍ଗ୍ ଆକାୟ୍! ମାତର୍ ଯୀଶୁ ଖ୍ରୀଷ୍ଟ ବିଷୟନି ହାର୍ଦିକାବୁର୍ ୱେନ୍ଞ୍ଜି ପାର୍ତିକିତି କାଜିଙ୍ଗ୍ ଏପେଙ୍ଗ୍ ପବିତ୍ର ଆତ୍ମା ପାୟାଆତାଦେର୍। 3 ଏପେଙ୍ଗ୍ ଇନେସ୍ ବକୁୱା ଆଦେଙ୍ଗ୍ ଆଡ୍ନାଦେର୍? ପବିତ୍ର ଆତ୍ମା ସାଇଜତାଙ୍ଗ୍ ଏପେଙ୍ଗ୍ ମି ଖ୍ରୀଷ୍ଟାନ୍ ଜିବୁନ୍ତିଙ୍ଗ୍ ଆରମ୍ କିତାଦେର୍ନା। ନଙ୍ଗୟ୍ ଏପେଙ୍ଗ୍ ଇନାକିଦେଙ୍ଗ୍ ଜାର୍ ଶାକ୍ତିତାଙ୍ଗ୍ ପୁରା ଟିକ୍ ଆଦେଙ୍ଗ୍ ଇଚା କିନାଦେରା? 4 ଏପେଙ୍ଗ୍ ଖ୍ରୀଷ୍ଟାନ୍ ଆତି ପାଚେ ବେସି ଦୁକ୍କଷ୍ଟ ପାୟାଆଜି ମାଚାଦେର୍। ହେଦାଙ୍ଗ୍ ଇନାକା ବେକାରେ ମାଚାତ୍ କି? ହାତ୍ପା ହେଲେକେ ହିଲାତାତ୍। 5 ଆନେଙ୍ଗ୍ ଆରେରଗ ମିଙ୍ଗେଙ୍ଗ୍ ପଶ୍ନ ୱେନ୍ବାଆଦ୍ନାଙ୍ଗ୍, ଏପେଙ୍ଗ୍ ମୋଶା ଲେକିକିତି ନିୟମ୍ତିଙ୍ଗ୍ ମାନିକିତି କାଜିଙ୍ଗ୍ କି ଈଶ୍ୱର ମିଙ୍ଗେଙ୍ଗ୍ ପବିତ୍ର ଆତ୍ମା ହିଜିମାନ୍ଞ୍ଚାନ୍ ଆରେ ମିବେ ଚାନିଆଆନି କାମାୟ୍ କିନାନ୍? ଇଦାଙ୍ଗ୍ ଆକାୟ୍! ମାତର୍ ଯୀଶୁ ଖ୍ରୀଷ୍ଟ ବିଷୟନି ହାର୍ଦିକାବୁର୍ ୱେନ୍ଞ୍ଜି ପାର୍ତିକିତି କାଜିଙ୍ଗ୍ ଇଦାଙ୍ଗ୍ ଆତାତ୍ନା। 6 ଅବ୍ରାହାମ ବିଷୟରେ ବାବିକିଜି ହୁଡ଼ାଟ୍, “ଅବ୍ରାହାମ ଇଶ୍ୱରତିଙ୍ଗ୍ ପାର୍ତି କିତାନ୍, ଆରେ ତା ପାର୍ତି କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ଦରମ୍ ମାନାୟ୍ ଇଞ୍ଜି ଗାଣା କିତାନ୍ନା।” 7 ଲାଗିଙ୍ଗ୍ ଏପେଙ୍ଗ୍ ପୁନି ଦର୍କାର୍ ଯେ, ଇମ୍ଣାକାର୍ ଅବ୍ରାହାମ ଲେକେ ଈଶ୍ୱରତିଙ୍ଗ୍ ପାର୍ତିକିନାର୍, ହାତ୍ପା ହେୱାର୍ ଅବ୍ରାହାମନି ମେହି। 8 ଈଶ୍ୱରତିଙ୍ଗ୍ ପାର୍ତିକିନି କାଜିଙ୍ଗ୍ ବିନ୍ଜାତିନି ମାନାୟାରିଙ୍ଗ୍ ଦରମ୍ ମାନାୟ୍ ଇଞ୍ଜି ଗାଣା କିନାନ୍, ଇଦାଙ୍ଗ୍ ନିୟମ୍ ସାସ୍ତର୍ତାକେ ଆଗେ ଲେକାଆଜି ମାଚାତ୍। ଈଶ୍ୱର ଅବ୍ରାହାମତିଙ୍ଗ୍ ଇ ହାର୍ଦିକାବୁର୍ ଆଗେ ଶୁଣାୟ୍ କିଜି ୱେଚ୍ଚି ମାଚାନ୍, “ୱିଜୁ ଜାତିନି ମାନାୟାର୍ ନି କାଜିଙ୍ଗ୍ ଆଶ୍ରିବାଦ୍ ପାୟାଆନାର୍।” 9 ହେଦାଙ୍ଗ୍ କାଜିଙ୍ଗ୍ ଅବ୍ରାହାମ ଇନେସ୍ ପାର୍ତି କିଜି ଆଶ୍ରିବାଦ୍ ପାୟାଆତାନ୍, ହେଲେକେ ଇମ୍ଣାକାର୍ ଖ୍ରୀଷ୍ଟତାକେ ପାର୍ତିକିନାର୍ ହେୱାର୍ ହାମାନ୍ ଆଶ୍ରିବାଦ୍ ପାୟାଆନାର୍। ଦରମ୍ ମାନାୟ୍ ପାର୍ତିତାଙ୍ଗ୍ ଜିନାର୍ 10 ମାତର୍ ଈଶ୍ୱର ଲାଗାୟ୍ ଦରମ୍ ମାନାୟ୍ ଆଦେଙ୍ଗ୍ ଇମ୍ଣାକାନ୍ ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ଆହା କିନାନ୍, ଈଶ୍ୱର ହେୱାରିଙ୍ଗ୍ ଅବିଶାପ୍ ହିନାନ୍। ଇନେସ୍କି ସାସ୍ତର୍ତାକେ ଲେକାଆତାତ୍ନା, “ଇମ୍ଣାକାନ୍ ମୋଶା ଲେକିକିତି ସାସ୍ତର୍ନି ନିୟମ୍ ୱିଜୁତିଙ୍ଗ୍ ମାନ୍ଦିୟାନ୍ କିଜି ମାନିକିୱିତିସ୍, ଈଶ୍ୱର ହେୱାନିଙ୍ଗ୍ ଅବିଶାପ୍ ହିନାନ୍।” 11 ହେଦାଙ୍ଗ୍ କାଜିଙ୍ଗ୍ ମୋଶା ଲେକିକିତି ନିୟମ୍ତିଙ୍ଗ୍ ମାନିକିଜି ଇନେର୍ ପା ଈଶ୍ୱର ଲାଗାୟ୍ ଦରମ୍ ମାନାୟ୍ ଆଦେଙ୍ଗ୍ ଆଡୁର୍। ଇନେସ୍କି ସାସ୍ତର୍ତାକେ କିଲେର୍ ବାବ୍ରେ ଲେକାଆତାତ୍ନା ଯେ, “ପାର୍ତିକିନି କାଜିଙ୍ଗ୍ ର ଦରମ୍ ମାନାୟ୍ ଜିନାନ୍।” 12 ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ମାନିକିନାକା ଆରେ ଈଶ୍ୱରତାକେ ପାର୍ତି କିଜି ଜିବୁନ୍ କାଟି କିନାକା ବେସି ଜେକ। ଇନେସ୍କି ସାସ୍ତର୍ତାକେ ଲେକାଆତାତ୍ନା, “ନିୟମ୍ ସାସ୍ତର୍ତାକେ ଲେକାଆତି ୱିଜୁ ନିୟମ୍ତିଙ୍ଗ୍ ଇନେର୍ ଯଦି ମାନି କିନାନ୍ ହେୱାନ୍ ଜିନାନ୍।” 13 ମାତର୍ ଖ୍ରୀଷ୍ଟ ମାଙ୍ଗେଙ୍ଗ୍ ନିୟମ୍ ସାସ୍ତର୍ନି ଅବିଶାପ୍ତାଙ୍ଗ୍ ମୁକ୍ତି କିତ୍ତାନ୍ନା। ହେ ଅବିଶାପ୍ତିଙ୍ଗ୍ ମା ପାପ୍ କାଜିଙ୍ଗ୍ ଖ୍ରୀଷ୍ଟ ନିଜେ ତା ଜପି ଅତାନ୍ ଆରେ କୃଶକାଟ୍ତାକେ ଜଲାଆଜି ହାଃତାନ୍ନା। ଇନେସ୍କି ସାସ୍ତର୍ତାକେ ଲେକା ମାନାତ୍, “ଇମ୍ଣାକାନ୍ ମାର୍ତି କୁଟ୍ରୁତାକେ ଜଲା ଆନାନ୍ ହେୱାନ୍ ରକାନ୍ ଅବିଶାପ୍ନି ମାନାୟ୍।” 14 ଖ୍ରୀଷ୍ଟତି ଇ କାମାୟ୍ କାଜିଙ୍ଗ୍, ଈଶ୍ୱର ଅବ୍ରାହାମତିଙ୍ଗ୍ କିଜିମାଚି ମାର୍ମାଣ୍ନି ହାମାନ୍ ଆଶ୍ରିବାଦ୍ ବିନ୍ଜାତିନି ମାନାୟାରିଙ୍ଗ୍ ହିତାନ୍। ଖ୍ରୀଷ୍ଟତାକେ ପାର୍ତିକିନି କାଜିଙ୍ଗ୍ ଈଶ୍ୱର ପାର୍ମାଣ୍କିତି ପବିତ୍ର ଆତ୍ମାତିଙ୍ଗ୍ ମାଙ୍ଗେଙ୍ଗ୍ ହିତ୍ତାନ୍ନା। ନିୟମ୍ ସାସ୍ତର୍ ଆରେ ଈଶ୍ୱର ପାର୍ମାଣ୍ 15 ଏ ପାର୍ତିକିନି ଟଣ୍ଡାର୍କାଦେର୍, ଆନେଙ୍ଗ୍ ନା ଜିବୁନ୍ତାଙ୍ଗ୍ ର କାତା ବୁଜାଇକିଜି ୱେଚ୍ଚେଦେଙ୍ଗ୍ ଇଚା କିନାଙ୍ଗା। ଏଚେପାଦ୍ନା ରିକାର୍ ରାଜିନାମା ଆଜି ସନ୍ତକ୍ କିତାର୍, ଇନେର୍ ପା ହେଦାଙ୍ଗ୍ତିଙ୍ଗ୍ ବାଙ୍ଗାୟ୍ କିଦେଙ୍ଗ୍ ଆଡୁର୍ କି ହେବେ ମାହାୟ୍ କିଦେଙ୍ଗ୍ ଆଡୁର୍। ଈଶ୍ୱର ପାର୍ମାଣ୍ କିତିତାକେ ପା ହେଲେକେ। 16 ଈଶ୍ୱର ଅବ୍ରାହାମ ଆରେ ତା ହିମ୍ଣାତିଙ୍ଗ୍ ପାର୍ମାଣ୍ କିଜି ମାଚାନ୍। ଆରେ “ତା ହିମ୍ଣା” ଇଦାଙ୍ଗ୍ନି ଅର୍ତ ବେସି ହିମ୍ଣାକାଙ୍ଗ୍ ଚଚ୍ଚି ସାସ୍ତର୍ତାକେ ଲେକାଆୱାତାତ୍ନା, ମାତର୍ ରକାନ୍ ହିମ୍ଣାତିଙ୍ଗ୍ ଚଚ୍ଚି ୱେଚ୍ଚାନ୍ନା ହେୱାନ୍ ଆନାନା ଯୀଶୁ ଖ୍ରୀଷ୍ଟ। 17 ଆନେଙ୍ଗ୍ ୱେଚ୍ଚେଦେଙ୍ଗ୍ ଇଚା କିନାଙ୍ଗା ଯେ, ଈଶ୍ୱର ଅବ୍ରାହାମ ହୁଦାଙ୍ଗ୍ ର ପାର୍ମାଣ୍ କିଜି ମାଚାର୍। ଆରେ ଈଶ୍ୱର ଚାର୍ଶ ତିରିଶ୍ ବାର୍ହୁ ପାଚେ ମୋଶାଙ୍ଗ୍ ଇମ୍ଣି ନିୟମ୍ ହିଜିମାଚାନ୍, ଇ ନିୟମ୍ ହେ ପାର୍ମାଣ୍ତିଙ୍ଗ୍ ବାଙ୍ଗାୟ୍ କିଦେଙ୍ଗ୍ ଆଡୁତ୍। ନଇଲେ ଈଶ୍ୱର ତା ପାର୍ମାଣ୍ତିଙ୍ଗ୍ ବାଙ୍ଗାୟ୍ କିତିଲେକେ ଆନାତ୍। 18 ମୋଶା ଲେକିକିତି ନିୟମ୍ ସାସ୍ତର୍ ମାନିକିତି କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ଦୟା କିଦୁନ୍, ମାତର୍ ହେୱାନ୍ ପାର୍ମାଣ୍ କିଜି ମାନ୍ଞ୍ଚି କାଜିଙ୍ଗ୍ ମାଙ୍ଗେଙ୍ଗ୍ ଦୟା କିଦ୍ନାନ୍। ହେଲେକେ ଈଶ୍ୱର ଅବ୍ରାହାମ ହୁଦାଙ୍ଗ୍ ପାର୍ମାଣ୍କିତି କାଜିଙ୍ଗ୍ ହେୱାନିଙ୍ଗ୍ ଏଚେକ୍ ଇଚା ହେଏଚେକ୍ ଦାନ୍ ହିତାନ୍। 19 ଲାଗିଙ୍ଗ୍ ଈଶ୍ୱର ଇନାକିଦେଙ୍ଗ୍ ମୋଶାଙ୍ଗ୍ ନିୟମ୍ ସାସ୍ତର୍ ହିତାନ୍ନା? ମାନାୟାରିଙ୍ଗ୍ ଦସି କିଦେଙ୍ଗ୍ ନିୟମ୍ ସାସ୍ତର୍ ହିୟାଆତାତ୍ନା। ପାର୍ମାଣ୍ କିଜିମାଚି ହିମ୍ଣା ୱାୱାଦାଙ୍ଗ୍ ହେ ନିୟମ୍ ସାସ୍ତର୍ ଚାଲାଆଜି ମାଚାତ୍। ଈଶ୍ୱର ଦୁତ୍କୁତାଙ୍ଗ୍ ମୋଶାଙ୍ଗ୍ ହିଜିମାଚାନ୍ ହେୱାନ୍ ଈଶ୍ୱର ଆରେ ମାନାୟାର୍ ବିତ୍ରେ ମାଦି ମାନ୍ଞ୍ଜି କାମାୟ୍ କିତାନ୍। 20 ରୱାନ୍ତାଙ୍ଗ୍ ଆଦିକ୍ ମାହାୟ୍ କିନି ରାଜିନାମା ଆନାକା ମାଚିସ୍ ରୱାନ୍ ମାଦିଆଜି କାମାୟ୍ କିନାକାନ୍ ଦର୍କାର୍ ଆନାତ୍। ମାତର୍ ଈଶ୍ୱର ନିଜେ ନେ ମାଦିଆଜି ଅବ୍ରାହାମ ହୁଦାଙ୍ଗ୍ ପାର୍ମାଣ୍ କିଜି ମାଚାନ୍। 21 ଲାଗିଙ୍ଗ୍ ମୋଶା ନିୟମ୍ ସାସ୍ତର୍ ଈଶ୍ୱରକିତି ପାର୍ମାଣ୍ତିଙ୍ଗ୍ ବିରଦ୍ କିନାତା କି? ହେଲେକେ ଇନାୱେଡ଼ାଙ୍ଗ୍ ପା ଆଦେଙ୍ଗ୍ ଆଡୁତ୍। ନିୟମ୍ ସାସ୍ତର୍ ମାନିକିନି କାଜିଙ୍ଗ୍ ଯଦି ୱିଜ୍ୱି ଜିବୁନ୍ ପାୟାଆତାଦେର୍ମା, ଲାଗିଙ୍ଗ୍ ହେ ନିୟମ୍ତିଙ୍ଗ୍ ମାନିକିଜି ଆପେଙ୍ଗ୍ ଈଶ୍ୱର ଲାଗାୟ୍ ପା ଦରମ୍ ମାନାୟ୍ ଆଦେଙ୍ଗ୍ ଆଡ଼୍ତାପ୍ମା। 22 ମାତର୍ ଦରମ୍ ସାସ୍ତର୍ ୱେଚ୍ଚାନାତା ଯେ, ଆସେଙ୍ଗ୍ ୱିଜାକାସ୍ ପାପ୍ ଶାକ୍ତିତାଙ୍ଗ୍ ବନ୍ଦି ଆତାସ୍ନା। ଲାଗିଙ୍ଗ୍ ଆସେଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ପାର୍ତିକିନି କାଜିଙ୍ଗ୍ ଈଶ୍ୱର କିଜିମାଚି ସ୍ୱାଦିନ୍ନି ପାର୍ମାଣ୍ତିଙ୍ଗ୍ ପାୟାଆତାସ୍। ପାର୍ତିକିନି କାଜିଙ୍ଗ୍ ଈଶ୍ୱର ମେହି ଆତାସ୍ନା 23 ମାତର୍ ଖ୍ରୀଷ୍ଟ ୱାୱି ଆଗେ, ଆସେଙ୍ଗ୍ ଯିହୁଦି ମାନାୟ୍ ବନ୍ଦି ଆତି ମାନାୟ୍ ଲେକେ ମାଚାସ୍ ଆରେ ନିୟମ୍ ସାସ୍ତର୍ ମା ଜାଗୁୱାଡ଼ି ଆଜି ମାଚାତ୍। ଲାଗିଙ୍ଗ୍ ଖ୍ରୀଷ୍ଟତାକେ ପାର୍ତିକିନି କାଜିଙ୍ଗ୍, ରକାନ୍ ମାନାୟ୍ ନିୟମ୍ ସାସ୍ତର୍ନି ବନ୍ଦିଆତିତାଙ୍ଗ୍ ମୁକ୍ତି ଆଦେଙ୍ଗ୍ ଆଡ୍ନାର୍ ଇଞ୍ଜି ଈଶ୍ୱର ୱେଚ୍ଚାନ୍। 24 ଖ୍ରୀଷ୍ଟତାକେ ପାର୍ତିକିନି କାଜିଙ୍ଗ୍ ଆସେଙ୍ଗ୍ ଇନେସ୍ ଈଶ୍ୱର ଲାଗାୟ୍ ଦରମ୍ ମାନାୟ୍ ଆଦେଙ୍ଗ୍ ଆଡ୍ନାସ୍, ଇଦାଙ୍ଗ୍ କାଜିଙ୍ଗ୍ ଖ୍ରୀଷ୍ଟ ୱାୱି ପାତେକ୍। ମାଙ୍ଗେଙ୍ଗ୍ କାସିମାଞ୍ଜେଙ୍ଗ୍ ଆରେ ଜାତୁନ୍ ଆନି କାଜିଙ୍ଗ୍ ନିୟମ୍ ସାସ୍ତର୍ ହିୟାଆଜି ମାଚାତ୍। 25 ନଙ୍ଗୟ୍ ଖ୍ରୀଷ୍ଟ ୱାତାନ୍ନା ଆରେ ଆସେଙ୍ଗ୍ ତାବେ ପାର୍ତି କିଦେଙ୍ଗ୍ ଆଡ୍ନାସ୍, ଲାଗିଙ୍ଗ୍ ମା ଜାଗୁୱାଡ଼ି ଆନି କାଜିଙ୍ଗ୍ ଆରେ ଜାତୁନ୍ ଆନି କାଜିଙ୍ଗ୍ ନିୟମ୍ ସାସ୍ତର୍ ଆରେ ଦର୍କାର୍ ଆକାୟ୍। 26 ଲାଗିଙ୍ଗ୍ ଯୀଶୁ ଖ୍ରୀଷ୍ଟତାକେ ପାର୍ତିକିତି କାଜିଙ୍ଗ୍ ଆସେଙ୍ଗ୍ ଈଶ୍ୱର ହିମ୍ଣା ଆତାସ୍ନା। 27 ଏପେଙ୍ଗ୍ ଏଚେଜାଣ୍ ଖ୍ରୀଷ୍ଟତାକେ ରବେଆଜି ଡୁବନ୍ ଆତାଦେର୍ନା, ଏପେଙ୍ଗ୍ ଖ୍ରୀଷ୍ଟଙ୍ଗ୍ ର ପୁନି ଆଙ୍ଗି ଲେକେ ଉସ୍ପାତାଦେର୍ନା। 28 ଲାଗିଙ୍ଗ୍ ଯିହୁଦି ଜାତି କି ବିନ୍ଜାତି, ଦାସ୍ କି ଦାସ୍ ଆୱିତି ମାନାୟ୍, ଆଣ୍ଡ୍ରା କି କଗ୍ଲେ ବିତ୍ରେ ଇନାକା ପା ଜେକ ଆକାୟ୍। ଇନେସ୍କି ଏପେଙ୍ଗ୍ ଯୀଶୁ ଖ୍ରୀଷ୍ଟତାକେ ରବେ ଆତାଦେର୍ନା। 29 ଏପେଙ୍ଗ୍ ନଙ୍ଗୟ୍ ଖ୍ରୀଷ୍ଟନି ମାନାୟ୍ କାଦେର୍, ଆରେ ଏପେଙ୍ଗ୍ ହାତ୍ପା ଅବ୍ରାହାମନି ମେହି କାଦେର୍। ଈଶ୍ୱର ଅବ୍ରାହାମତିଙ୍ଗ୍ କିଜିମାଚି ପାର୍ମାଣ୍ନି ଆଶ୍ରିବାଦ୍ତାଙ୍ଗ୍ ଏପେଙ୍ଗ୍ ତା ଅଦିକାର୍ ଆତାଦେର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation