ଗାଲାତିୟ 2 - New Testament in Pengo Parja Languageବାଚିକିତି ଚେଲାର୍ ପାଉଲତିଙ୍ଗ୍ ଆସ୍ତାର୍ 1 ଚଉଦ ବାର୍ହୁ ହାଚି ପାଚେ, ଆନେଙ୍ଗ୍ ବର୍ଣ୍ଣବା ହୁଦାଙ୍ଗ୍ ଆରେରଗ ଯିରୁଶାଲାମ ସହର୍ତାକେ ହାଚାଙ୍ଗ୍, ତିତସତିଙ୍ଗ୍ ପା ନା ହୁଦାଙ୍ଗ୍ ଅସାହାଲ୍ଜି ମାଚାଙ୍ଗ୍। 2 ଈଶ୍ୱର ନାଙ୍ଗେଙ୍ଗ୍ ହାନି କାଜିଙ୍ଗ୍ ୱେଚ୍ଚିତିଲେ ଆନେଙ୍ଗ୍ ହେବେ ହାଚାଙ୍ଗ୍। ଆରେ ହେବେ ମାନି ମଣ୍ଡ୍ଲିନି ଦେକାଶୁଣା କିନି ନେତାରିଙ୍ଗ୍ ଆନେଙ୍ଗ୍ ଇନେର୍ ପୁଞ୍ଜ୍ୱି ଲେକେକିଜି ମାହା ଆତାଙ୍ଗ୍, ଆରେ ବିନ୍ଜାତିନି ମାନାୟାର୍ ଲାଗାୟ୍ ଆନେଙ୍ଗ୍ ଶୁଣାୟ୍ କିଜିମାଚି ହାର୍ଦିକାବୁର୍ତିଙ୍ଗ୍ ହେୱାରିଙ୍ଗ୍ ବୁଜାଇ କିତାଙ୍ଗ୍। ନା ୱିଜୁ କଷ୍ଟ କିତାକା ଇନେସ୍ ପଲିଆ ଆଉତ୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାର୍ ହୁଦାଙ୍ଗ୍ ମାହାଆଜି ରାଜି ଆତାଙ୍ଗ୍। 3 ତିତସ ରକାନ୍ ବିନ୍ଜାତିନି ମାନାୟ୍, ହେୱାନ୍ ନା ହୁଦାଙ୍ଗ୍ ମାଚାନ୍। ମାତର୍ ନେତାର୍ ହେୱାନିଙ୍ଗ୍ ସୁନତ ବିଦି ମାନି କିଦେଙ୍ଗ୍ ଜବର୍ଦସ୍ତି କିୱାତାର୍। 4 ମାତର୍ ଇଦାଙ୍ଗ୍ ଜାମ୍ଲା ଆତାତ୍, ଏଚେପାଦ୍ନା କେତେକ୍ ନକ୍ଲି ପାର୍ତିକିନି ଟଣ୍ଡାର୍ ମା ବିତ୍ରେ ଇନେର୍ ପୁନ୍ୱାଦାଙ୍ଗ୍ ୱାତାର୍। ହେୱାର୍ ଡ଼ୁଗ୍ଜି-ଡ଼ୁଗ୍ଜି ମାଙ୍ଗେଙ୍ଗ୍ ହୁଡ଼୍ଜି ମାନ୍ଞ୍ଚାର୍। ଆରେ ହେୱାର୍ ମା ଇମ୍ଣି ସ୍ୱାଦିନ୍ ଯୀଶୁ ଖ୍ରୀଷ୍ଟତାକେ ମାନାତ୍, ହେବେତାଙ୍ଗ୍ ମାଙ୍ଗେଙ୍ଗ୍ ହପ୍ଚି ଯିହୁଦିର୍ ନିୟମ୍ନି ଦାସ୍ କିଦ୍ଦେଙ୍ଗ୍ ଉପାୟ୍ କିଜି ମାନ୍ଞ୍ଚାର୍। 5 ମାତର୍ ଆପେଙ୍ଗ୍ ଅଲପ୍ପା ହେୱାର୍ ହୁଦାଙ୍ଗ୍ ରାଜି ଆୱାତାପ୍। ଇନେସ୍କି ଏପେଙ୍ଗ୍ ଇନେସ୍ ସତ୍ ହାର୍ଦିକାବୁର୍ତାକେ ତିର୍ଆଜି ମାନାଦେର୍। 6 ଆନେଙ୍ଗ୍ ଶୁଣାୟ୍ କିନି ବିଷୟରେ ହେ ମଣ୍ଡ୍ଲିନି ଜଣାସୁଣା ଆତି ନେତାର୍ ଅଲପ୍ପା ମାହାଇ କିୱାତାର୍। ହେୱାର୍ ଇନେସ୍ ଲେଗ୍ଦି ମାନାୟ୍ ମାଚାର୍, ହେବେ ନା ଜାଏଆସେ ଆକାୟ୍। ଇନେସ୍କି ଈଶ୍ୱର ଇନାୱେଡ଼ାଙ୍ଗ୍ ପା ରକାନ୍ ମାନାୟ୍ ନିପଣ୍ ଆଜି ଇନୁନ୍। 7 ଇନେସ୍କି ହେ ନେତାର୍ ହୁଡ଼୍ତାର୍ ଯେ ପିତରତିଙ୍ଗ୍ ଇନେସ୍ ଯିହୁଦିର୍ ଲାଗାୟ୍ ହାର୍ଦିକାବୁର୍ ଶୁଣାୟ୍ କିନି ଦାୟିତ୍ପ ହିତ୍ତାର୍ନା, ହେଲେକେ ନାଙ୍ଗେଙ୍ଗ୍ ବିନ୍ଜାତିର୍ ଲାଗାୟ୍ ଶୁଣାୟ୍ କିନି ଦାୟିତ୍ପ ହିତ୍ତାର୍ନା। 8 ଇମ୍ଣି ଈଶ୍ୱର ପିତରତିଙ୍ଗ୍ ଯିହୁଦିର୍ ଲାଗାୟ୍ ବାଚିକିତି ଚେଲା ପାଦ୍ନି କାମାୟ୍ କିନି କାଜିଙ୍ଗ୍ ବାଚି କିତାନ୍ନା, ହେ ଈଶ୍ୱର ନାଙ୍ଗେଙ୍ଗ୍ ପା ବିନ୍ଜାତିନି ମାନାୟାର୍ ଲାଗାୟ୍ ବାଚିକିତି ଚେଲା ପାଦ୍ନି କାମାୟ୍ କିନି କାଜିଙ୍ଗ୍ ବାଚି କିତାନ୍ନା। 9 ଈଶ୍ୱର ନାଙ୍ଗେଙ୍ଗ୍ ହିଜି ମାନ୍ଞ୍ଚି ବର୍ଦାନ୍ ବିଷୟରେ ଏଚେପାଦ୍ନା ହେୱାର୍ ବୁଜାଆତାର୍। ଲାଗିଙ୍ଗ୍ ମଣ୍ଡ୍ଲିତାକେ ର କମ୍ମୁଣ୍ଡା ଲେକେ ମାନି ଯାକୁବ, ପିତର ଇନେରିଙ୍ଗ୍ କେପା ଇଞ୍ଜି ଇନାର୍ ଆରେ ଯୋହନ, ନାଙ୍ଗେଙ୍ଗ୍ ଆରେ ବର୍ଣ୍ଣବାଙ୍ଗ୍ କେଇ ମାହାଇ କିଜି ରାଜି ଆତାର୍। ଆରେ ହେୱାର୍ ମାଙ୍ଗେଙ୍ଗ୍ ବିନ୍ଜାତିନି ମାନାୟାର୍ତାକେ ଶୁଣାୟ୍ କିଦେଙ୍ଗ୍ ସାହାସ୍ କିତ୍ତାର୍, ଆରେ ହେୱାର୍ ଯିହୁଦି ଜାତିନି ମାନାୟାର୍ ଲାଗାୟ୍ ଶୁଣାୟ୍ କିଦେଙ୍ଗ୍ ଲାଗାତାର୍। 10 ଯିରୁଶାଲାମ ସହର୍ତାକେ ମାନି ଗରିବ୍ ପାର୍ତିକିନି ଟଣ୍ଡାରିଙ୍ଗ୍ ସାଇଜ କିନି ବିଷୟରେ ନେ ହେୱାର୍ ମାଙ୍ଗେଙ୍ଗ୍ ଗୁୱାରି କିଜି ୱେଚ୍ଚାତାର୍, ହେଦାଙ୍ଗ୍ କିନି କାଜିଙ୍ଗ୍ ଆନେଙ୍ଗ୍ ପା ବେସି ଇଚା କିଜି ମାଚାଙ୍ଗ୍। ପାଉଲ ପିତରତିଙ୍ଗ୍ ଗୁୱାରି କିତାନ୍ 11 ଏଚେପାଦ୍ନା ପିତର ଇନେରିଙ୍ଗ୍ କେପା ଇଞ୍ଜି ଇନାର୍ ୱେନାନ୍ ଆନ୍ତିୟକିଆ ସହର୍ତାକେ ୱାତାନ୍, ହେପାଦ୍ନା ଆନେଙ୍ଗ୍ ହେୱାନିଙ୍ଗ୍ ପାର୍ତି କିନାକାର୍ ମୁମ୍ଦ ସିଦା ବିରଦ୍ କିତାଙ୍ଗ୍। ଇନେସ୍କି ହେୱାନ୍ ଇନାକା କିଜି ମାଚାନ୍ ହେଦାଙ୍ଗ୍ ବେସିବୁଲ୍ ମାଚାତ୍। 12 ଏଚେପାଦ୍ନା ହେୱାନ୍ ୱାତାନ୍, ହେୱାନ୍ ପାର୍ତୁମ୍ ବିନ୍ଜାତିର୍ ପାର୍ତିକିନି ମାନାୟାର୍ତାକେ କୁଚ୍ଚି ତିନ୍ଞ୍ଜି ମାଚାନ୍। ମାତର୍ ଏଚେପାଦ୍ନା ଯାକୁବନି କେତେକ୍ ହାଙ୍ଗ୍ଦାକାର୍ ଯିରୁଶାଲାମ ସହର୍ତାଙ୍ଗ୍ ୱାତାର୍, ହେୱାନ୍ ଜେକ ଆଜି ଆରେ ବିନ୍ଜାତିନି ପାର୍ତି କିନାକାର୍ତାକେ କୁଚ୍ଚି ତିନ୍ୱାତାନ୍। ଇନେସ୍କି ହେୱାନ୍ ମାଦିମାଚି ମାନାୟାରିଙ୍ଗ୍ ପାଣ୍ଡ୍ରା ଆତାନ୍, ଇନେସ୍କି ହେୱାର୍ ବିନ୍ଜାତିନି ପାର୍ତିକିନି ମାନାୟାର୍ ସୁନତ ବିଦି ମାନିକିନାକା ବାଦ୍ୟ ଇଞ୍ଜି ୱେଚ୍ଚି ମାଚାର୍। 13 ହେଲେକେ ଆନ୍ତିୟକିଆ ସହର୍ତାକେ ମାନି ଜେକନି ଯିହୁଦି ପାର୍ତି କିନାକାର୍ ପା ପିତର ଲେକେ ବାଟ୍ପାଣ୍ ଆଜି ବୁଲ୍ ବ୍ୟବହାର୍ କିତାର୍। ଇଲେକେକି ବର୍ଣ୍ଣବା ପା ହେୱାର୍ ଲେକେ ବୁଲ୍ ବ୍ୟବହାର୍ କିତାନ୍। 14 ଏଚେପାଦ୍ନା ଆନେଙ୍ଗ୍ ହେୱାରିଙ୍ଗ୍ ସତ୍ ହାର୍ଦିକାବୁର୍ ବିରଦ୍ରେ ବ୍ୟବହାର୍ କିନାକା ହୁଡ଼୍ତାଙ୍ଗ୍। ୱିଜାକାର୍ ମୁମ୍ଦ ପିତର ଇନେରିଙ୍ଗ୍ କେପା ଇଞ୍ଜି ଇନାର୍ ହେୱାନିଙ୍ଗ୍ ୱେଚ୍ଚାଙ୍ଗ୍, “ଏନେଙ୍ଗ୍ ନିଜେ ଯିହୁଦି ଆଜି ଯିହୁଦିର୍ ନିୟମ୍ତିଙ୍ଗ୍ ମାନି କିଉୟା, ଆରେ ବିନ୍ଜାତିର୍ ଲେକେ ବ୍ୟବହାର୍ କିନାୟା। ଲାଗିଙ୍ଗ୍ ଏନେଙ୍ଗ୍ ଇନାକିଦେଙ୍ଗ୍ ଇ ବିନ୍ଜାତିନି ମାନାୟାରିଙ୍ଗ୍ ଯିହୁଦିର୍ ନିତି ନିୟମ୍ତିଙ୍ଗ୍ ମାନି କିଦେଙ୍ଗ୍ ବାଦ୍ୟ କିନାୟା?” ପାର୍ତି କାଜିଙ୍ଗ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆନାସ୍ 15 ଆରେ ଆନେଙ୍ଗ୍ ହେୱାନିଙ୍ଗ୍ ୱେଚ୍ଚାଙ୍ଗ୍, “ଆପେଙ୍ଗ୍ ଜନମ୍ତାଙ୍ଗ୍ ଯିହୁଦି ମାନାୟ୍, ଆରେ ବିନ୍ଜାତିନି ମାନାୟ୍ ଲେକେ ପାପି ଆକାୟ୍। 16 ମାତର୍ ଆପେଙ୍ଗ୍ ପୁନାପ୍ ଯେ ରକାନ୍ ମାନାୟ୍ ଯୀଶୁ ଖ୍ରୀଷ୍ଟତାକେ ପାର୍ତି କିଜି ଈଶ୍ୱର ଲାଗାୟ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆନାନ୍, ମୋଶା ଲେକିକିତି ନିୟମ୍ ସାସ୍ତର୍ତାଙ୍ଗ୍ ଆକାୟ୍। ହେଦାଙ୍ଗ୍ କାଜିଙ୍ଗ୍ ଖ୍ରୀଷ୍ଟତାକେ ଆପେଙ୍ଗ୍ ପାର୍ତିକିତି କାଜିଙ୍ଗ୍, ଆସେଙ୍ଗ୍ ନଙ୍ଗୟ୍ ଈଶ୍ୱର ଲାଗାୟ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆନାସ୍, ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ମାନିକିନି କାଜିଙ୍ଗ୍ ଆକାୟ୍। ଇନେସ୍କି ରକାନ୍ ପା ନିୟମ୍ ସାସ୍ତର୍ ମାନିକିଜି ଈଶ୍ୱର ଲାଗାୟ୍ ଦରମ୍ ମାନାୟ୍ ଆଦେଙ୍ଗ୍ ଆଡୁନ୍।” 17 ଆପେଙ୍ଗ୍ ଖ୍ରୀଷ୍ଟତାକେ ପାର୍ତି କିଜି ଦରମ୍ ମାନାୟ୍ ଇଞ୍ଜି ଗାଣାକିୟା ଆଦେଙ୍ଗ୍ ଉପାୟ୍ କିଜି ମାଚିଲେ, କେତେକ୍ ଯିହୁଦିର୍ ନଙ୍ଗୟ୍ ମାଙ୍ଗେଙ୍ଗ୍ ହେୱାର୍ ନିୟମ୍ୱିଜୁ ମାନି କିଉରା ଇଞ୍ଜି ୱେଚ୍ଚି ଦସି କିଦ୍ନାରା। ଲାଗିଙ୍ଗ୍ ଇଦାଙ୍ଗ୍ନି ଅର୍ତ ଇନାକା, ଖ୍ରୀଷ୍ଟ ମାଙ୍ଗେଙ୍ଗ୍ ପାପ୍ କାମାୟ୍ କିଦେଙ୍ଗ୍ ଉସ୍କାଇ କିଦ୍ନାନା କି? ହେଲେକେ ଇନାୱେଡ଼ାଙ୍ଗ୍ ପା ଆଦେଙ୍ଗ୍ ଆଡୁତ୍। 18 “ଇନେସ୍କି ଆନେଙ୍ଗ୍ ଇମ୍ଣି ନିୟମ୍ ବାଙ୍ଗାୟ୍ କିତାଙ୍ଗ୍ନା, ହେୱିଜୁ ଆରେରଗ ରସ୍ତିସ୍, ଆନେଙ୍ଗ୍ ଜାର୍ତିଙ୍ଗ୍ ପାପି ଇଞ୍ଜି ଚଚି ଆନାଙ୍ଗା। 19 ଆନେଙ୍ଗ୍ ଏଚେପାଦ୍ନା ନିୟମ୍ତିଙ୍ଗ୍ ମାନି କିଦେଙ୍ଗ୍ ଉପାୟ୍ କିତାଙ୍ଗ୍, ଇଦାଙ୍ଗ୍ ନାଙ୍ଗେଙ୍ଗ୍ ଦସି କିତ୍ତାତ୍। ଆରେ ଆନେଙ୍ଗ୍ ନିୟମ୍ କାଜିଙ୍ଗ୍ ହାଃତାଙ୍ଗ୍ନା, ଲାଗିଙ୍ଗ୍ ଆନେଙ୍ଗ୍ ଇନେସ୍ ଈଶ୍ୱର କାଜିଙ୍ଗ୍ ଜିଜି ମାନାଙ୍ଗ୍, ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଆରେ ନିୟମ୍ ୱିଜୁତିଙ୍ଗ୍ ମାନି କିଦେଙ୍ଗ୍ ଉପାୟ୍ କିଉଙ୍ଗା। 20 ନା ପାନି ଚାଲିଚଲନ୍ ଖ୍ରୀଷ୍ଟ ହୁଦାଙ୍ଗ୍ କୃଶକାଟ୍ତାକେ ହାଃତାତ୍ନା। ଲାଗିଙ୍ଗ୍ ଆନେଙ୍ଗ୍ ଆରେ ଜିବୁନ୍ ଆକାୟ୍, ମାତର୍ ଖ୍ରୀଷ୍ଟ ନାବେ ଜିବୁନ୍ ମାନାନ୍। ଯୀଶୁ ଈଶ୍ୱର ମେହି, ହେୱାନ୍ ନାଙ୍ଗେଙ୍ଗ୍ ଲାଡ୍ କିତ୍ତାନ୍ ଆରେ ନା କାଜିଙ୍ଗ୍ ଜାର୍ ଜିବୁନ୍ତିଙ୍ଗ୍ ହିତାନ୍, ଲାଗିଙ୍ଗ୍ ଆନେଙ୍ଗ୍ ଇ ଗାଗାଡ଼୍ତ ହେୱାନ୍ତାକେ ପାର୍ତି କିଜି ଜିନାଙ୍ଗ୍। 21 ଈଶ୍ୱର ମାଙ୍ଗେଙ୍ଗ୍ ଦୟାକିଜି ଉଦାର୍ କିଦ୍ନି ବିଷୟତିଙ୍ଗ୍ ଆନେଙ୍ଗ୍ ବେକାରେ କିଉଙ୍ଗ୍। ଇନେସ୍କି ନିୟମ୍ ସାସ୍ତର୍ ମାନିକିନି କାଜିଙ୍ଗ୍ ଯିଦି ଦରମ୍ ଗାଟାଆଦ୍ନାତ୍, ଲାଗିଙ୍ଗ୍ ଖ୍ରୀଷ୍ଟ ହାଃନାକା ପା ବେକାରେ ଆନାତ୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation