ଗାଲାତିୟ 1 - New Testament in Pengo Parja Languageଜୱାର୍ 1 ଆନେଙ୍ଗ୍ ବାଚିକିତି ଚେଲା ପାଉଲ ଇ ଚିଟି ଲେକିକିନାଙ୍ଗା। ଆନେଙ୍ଗ୍ ରକାଙ୍ଗ୍ ବାଚିକିତି ଚେଲା। ଆନେଙ୍ଗ୍ ଇନେର୍ ଆଦିକାର୍ତାକେ କି ମାନାୟ୍ ନାଙ୍ଗେଙ୍ଗ୍ ବାଚି କିଦ୍ୱାତାର୍ନା, ମାତର୍ ଯୀଶୁ ଖ୍ରୀଷ୍ଟ ଆରେ ଆବା ଈଶ୍ୱର ନାଙ୍ଗେଙ୍ଗ୍ ବାଚି କିତ୍ତାର୍ନା। ହେ ଈଶ୍ୱର ଯୀଶୁଙ୍ଗ୍ ହାଃତି ମାନାୟାର୍ତାଙ୍ଗ୍ ଜିବୁନ୍ କିଜି ନିକ୍ତାନ୍ନା। 2 ନା ହୁଦାଙ୍ଗ୍ ମାନି ଟଣ୍ଡାର୍ ହୁଦାଙ୍ଗ୍ ଆନେଙ୍ଗ୍ ଇ ଚିଟି ଗାଲାତିୟ ଜିଲ୍ଲାତାକେ ମାନି ମଣ୍ଡ୍ଲିତିଙ୍ଗ୍ ପକ୍ନାଙ୍ଗା। 3 ମା ଆବା ଈଶ୍ୱର ଆରେ ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା ଆରେ ଶାନ୍ତି ହିଦେନ୍। 4 ମା ପାପ୍ କାଜିଙ୍ଗ୍ ଆରେ ଆପେଙ୍ଗ୍ ଇନେସ୍ ଇ କରାପ୍ ଜଗତ୍ତାଙ୍ଗ୍ ଉଦାର୍ ପାୟାଆଦେଙ୍ଗ୍ ଆଡ୍ନାସ୍, ଇଦାଙ୍ଗ୍ କାଜିଙ୍ଗ୍ ମା ଆବା ଈଶ୍ୱର ଇଚାତାଙ୍ଗ୍ ଯୀଶୁ ଖ୍ରୀଷ୍ଟ ତା ଜାର୍ ଜିବୁନ୍ତିଙ୍ଗ୍ ବଲିପୁଜା କିୟାଆତାନ୍ନା। 5 ଯୁଗ୍ତ-ଯୁଗ୍ତ ଈଶ୍ୱରତିଙ୍ଗ୍ ଗୌରବ ଆୟେତ୍। ଆମେନ୍। ସତ୍ ହାର୍ଦିକାବୁର୍ ରଞ୍ଜାଙ୍ଗ୍ ନେ ମାନାତ୍ 6 ଆନେଙ୍ଗ୍ ଚାନିଆ ଆନାଙ୍ଗା ଯେ ଖ୍ରୀଷ୍ଟ ଦୟାତାଙ୍ଗ୍ ମିଙ୍ଗେଙ୍ଗ୍ ଈଶ୍ୱର ତା ମାନାୟ୍ କିଦ୍ନି କାଜିଙ୍ଗ୍ କୁକ୍ତାତାନ୍ନା। ମାତର୍ ହେୱାନ୍ତାଙ୍ଗ୍ ଏପେଙ୍ଗ୍ ଏଚେକ୍ ବେଗି ଜେକ ଆଜି ବିନ୍ ହାର୍ଦିକାବୁର୍ତିଙ୍ଗ୍ ପାର୍ତି କିନାଦେରା। 7 ଇଦାଙ୍ଗ୍ ସତ୍ ହାର୍ଦିକାବୁର୍ ଆକାୟ୍। ମାତର୍ କେତେକ୍ ମାନାୟ୍ ମି ମାନ୍ତିଙ୍ଗ୍ ଡିସ୍ଟାପ୍ କିଦେଙ୍ଗ୍ ଇଚା କିନାରା ଆରେ ଖ୍ରୀଷ୍ଟତି ହାର୍ଦିକାବୁର୍ତିଙ୍ଗ୍ ନଷ୍ଟ କିଦେଙ୍ଗ୍ ଇଚା କିନାରା। 8 ଆପେଙ୍ଗ୍ ଇମ୍ଣି ହାର୍ଦିକାବୁର୍ ମି ଲାଗାୟ୍ ଶୁଣାୟ୍ କିଜି ମାନ୍ଞ୍ଚାପ୍, ହେଦାଙ୍ଗ୍ ପିସ୍ତି ଜେକନି ହିକ୍ଷା ଶୁଣାୟ୍ କିତିସ୍ ଆସେଙ୍ଗ୍ କି ସରଗ୍ନି ଦୁତ୍ ଆତିସ୍ପା, ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିୟେନ୍। 9 ଆପେଙ୍ଗ୍ ଆଗେ ଇନେସ୍ ୱେଚ୍ଚାତାପ୍ନା ହେଲେକେ ଆନେଙ୍ଗ୍ ନଙ୍ଗୟ୍ ଆରେରଗ ୱେଚ୍ଚାନାଙ୍ଗା। ଏପେଙ୍ଗ୍ ଇମ୍ଣି ହାର୍ଦିକାବୁର୍ ଆସ୍ତି ମାଚାଦେର୍, ହେଦାଙ୍ଗ୍ ପିସ୍ତି ଯଦି ଜେକନି ହିକ୍ଷା ଜେକନିକାର୍ ଇନେର୍ ଶୁଣାୟ୍ କିତିସ୍, ଈଶ୍ୱର ହେୱାନିଙ୍ଗ୍ ଦଣ୍ଡ୍ ହିୟେନ୍। 10 ସତ୍ରେ ଆନେଙ୍ଗ୍ ମାନାୟାରିଙ୍ଗ୍ ୱାରି କିୟିକିଦେଙ୍ଗ୍ ଉପାୟ୍ କିଉଙ୍ଗା, ମାତର୍ ଈଶ୍ୱରତିଙ୍ଗ୍ ୱାରି କିୟିକିଦେଙ୍ଗ୍ ଇଚା କିନାଙ୍ଗା। ଯଦି ଆନେଙ୍ଗ୍ ନଙ୍ଗୟ୍ ପା ମାନାୟାରିଙ୍ଗ୍ ୱାରି କିୟିକିଦେଙ୍ଗ୍ ଇଚା କିନାଙ୍ଗା, ଲାଗିଙ୍ଗ୍ ଆନେଙ୍ଗ୍ ଖ୍ରୀଷ୍ଟ ଦାସ୍ ଆକାୟ୍। ପାଉଲତିଙ୍ଗ୍ ଈଶ୍ୱର କୁକ୍ତାନ୍ନା 11 ଏ ପାର୍ତିକିନି ଟଣ୍ଡାର୍କାଦେର୍, ଏପେଙ୍ଗ୍ ଇଦାଙ୍ଗ୍ ପୁନାଟ୍ ଯେ ଆନେଙ୍ଗ୍ ଇମ୍ଣି ହାର୍ଦିକାବୁର୍ ମି ଲାଗାୟ୍ ଶୁଣାୟ୍ କିତ୍ତାଙ୍ଗ୍ନା, ହେଦାଙ୍ଗ୍ ମାନାୟାର୍ ମାନ୍ତାଙ୍ଗ୍ ରସ୍ତାକା ଆକାୟ୍। 12 ଇନେସ୍କି ଆନେଙ୍ଗ୍ ହେଦାଙ୍ଗ୍ ପଣ୍ଡିତାର୍ତାଙ୍ଗ୍ ପାୟା ଆୱାତାଙ୍ଗ୍ନା କି ହିକାଆୱାତାଙ୍ଗ୍ନା, ମାତର୍ ଯୀଶୁ ଖ୍ରୀଷ୍ଟ ନିଜେ ହେଦାଙ୍ଗ୍ ନାବେ ଚଚ୍ଚାତାନ୍ନା। 13 ଆନେଙ୍ଗ୍ ଯିହୁଦି ଦରମ୍ତାକେ ଆଗେ ମାନିହିଙ୍ଗ୍ ନା ଚାଲିଚଲନ୍ ବିଷୟରେ ଏପେଙ୍ଗ୍ ତ ୱେଚାଦେର୍ନା: ଆନେଙ୍ଗ୍ ଈଶ୍ୱର ମଣ୍ଡ୍ଲିତିଙ୍ଗ୍ ବେସି ଦୁକ୍କଷ୍ଟ ହିଜି ମାଚାଙ୍ଗ୍ ଆରେ ହେଦାଙ୍ଗ୍ ନଷ୍ଟ କିଦେଙ୍ଗ୍ ଇଚା କିଜି ମାଚାଙ୍ଗ୍। 14 ଆରେ ନା ଆକଦାଦିନି ନିତି ନିୟମ୍ତିଙ୍ଗ୍ ବେସି ମାନିକିଜି ମାଚାଙ୍ଗ୍। ନା ଜାତିତାକେ ମାନି ନା ବୟସ୍ନି ମାନାୟାର୍ତାଙ୍ଗ୍ ଆନେଙ୍ଗ୍ ବେସି ମାନିକିଜି ମାଚାଙ୍ଗ୍। 15 ମାତର୍ ଆନେଙ୍ଗ୍ ଜନମ୍ ଆୱି ଆଗେତାଙ୍ଗ୍ ନେ ଈଶ୍ୱର ନାଙ୍ଗେଙ୍ଗ୍ ଜେକ କିଜି ମାନ୍ଞ୍ଚାନ୍। ଆରେ ତା ଜାର୍ ଦୟାରେ ନାଙ୍ଗେଙ୍ଗ୍ କୁକ୍ତାତାନ୍। 16 ଇନେସ୍ ଆନେଙ୍ଗ୍ ବିନ୍ଜାତିନି ମାନାୟାର୍ ବିତ୍ରେ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଆଡ୍ନାଙ୍ଗ୍, ଇଦାଙ୍ଗ୍ କାଜିଙ୍ଗ୍ ଈଶ୍ୱର ଜାର୍ ମେହି ଯୀଶୁଙ୍ଗ୍ ନାବେ ଚଚ୍ଚିନି କାଜିଙ୍ଗ୍ ୱାରି ଆତାନ୍। ହେପାଦ୍ନା ଆନେଙ୍ଗ୍ ଇନେରିଙ୍ଗ୍ ସାଇଜ ଏନ୍ତେଙ୍ଗ୍ ହାଲ୍ୱାତାଙ୍ଗ୍ନା। 17 ନା ଆଗେ ବାଚି କିୟିଆଜି ମାନି ବାଚିକିତି ଚେଲାର୍ ଲାଗାୟ୍ ଯିରୁଶାଲାମ ସହର୍ତାକେ ପା ହାଲ୍ୱାତାଙ୍ଗ୍ନା। ମାତର୍ ଆନେଙ୍ଗ୍ ଆରବ ଦେସ୍ତାକେ ହସି ହାଚାଙ୍ଗ୍, ତାପାଚେ ଆନେଙ୍ଗ୍ ଦମେସକ ସହର୍ତାକେ ଲେଉଟା ଆଜି ୱାତାଙ୍ଗ୍। 18 ଆରେ ତିନ୍ ବାର୍ହୁ ପାଚେ ଆନେଙ୍ଗ୍ ବାଚିକିତି ଚେଲା ପିତର ଇନେରିଙ୍ଗ୍ କେପା ଇଞ୍ଜି ଇନାର୍ ହେୱାନିଙ୍ଗ୍ ଗିଟାଆଦେଙ୍ଗ୍ ଯିରୁଶାଲାମ ସହର୍ତାକେ ହାଚାଙ୍ଗ୍। ହେୱାନ୍ ହୁଦାଙ୍ଗ୍ ଗିଟାଆଜି ପନ୍ଦ୍ର ଦିନ୍ ମାଚାଙ୍ଗ୍। 19 ମାତର୍ ହେବେ ମାପୃ ଟଣ୍ଡାହି ଯାକୁବଙ୍ଗ୍ ପିସ୍ତି ଆରେ ଜେକନି ବାଚିକିତି ଚେଲାରିଙ୍ଗ୍ ଇନେରିଙ୍ଗ୍ ପା ହୁଡ଼୍ୱାତାଙ୍ଗ୍। 20 ଈଶ୍ୱର ସାକି ମାନାନ୍ ଆନେଙ୍ଗ୍ ଇମ୍ଣି ୱିଜୁ ବିଷୟ ମିଙ୍ଗେଙ୍ଗ୍ ଲେକିକିଦ୍ନାଙ୍ଗା ହେଦାଙ୍ଗ୍ ୱିଜୁ ସତ୍। 21 ପାଚେ ଆନେଙ୍ଗ୍ ଯିରୁଶାଲାମ ସହର୍ ପିସ୍ତି ସିରିୟା ଆରେ କିଲିକିୟା ସହର୍ତାକେ ହାଚାଙ୍ଗ୍। 22 ଯିହୁଦା ଜିଲ୍ଲାତାକେ ମାନି ଖ୍ରୀଷ୍ଟତାକେ ପାର୍ତିକିନି ମଣ୍ଡ୍ଲିନି ମାନାୟାର୍ ନାଙ୍ଗେଙ୍ଗ୍ ପୁଞ୍ଜ୍ୱାଦାଙ୍ଗ୍ ମାନ୍ଞ୍ଚାର୍। 23 ମାତର୍ ମାନାୟାର୍ ଇ କାତା ୱେଚ୍ନାକା ହେୱାର୍ ୱେନ୍ଞ୍ଜି ଇଦାଙ୍ଗ୍ ପୁନ୍ଞ୍ଜି ମାଚାର୍। “ଇମ୍ଣି ମାନାୟ୍ ଆଗେ ମାଙ୍ଗେଙ୍ଗ୍ ଦୁକ୍କଷ୍ଟ କିଜି ମାନ୍ଞ୍ଚାନ୍, ଆରେ ଇମ୍ଣି ମାନାୟ୍ ରଗ ଖ୍ରୀଷ୍ଟତାକେ ପାର୍ତିକିନି ମାନାୟାରିଙ୍ଗ୍ ନଷ୍ଟ କିଜି ମାଚାନ୍। ହେୱାନ୍ ନଙ୍ଗୟ୍ ହେ ହାର୍ଦିକାବୁର୍ ଶୁଣାୟ୍ କିନାନା।” 24 ଆରେ ଈଶ୍ୱର ଇନାକା ନା କାଜିଙ୍ଗ୍ କିତାନ୍, ହେଦାଙ୍ଗ୍ କାଜିଙ୍ଗ୍ ହେୱାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation