ଏପିସିୟ 6 - New Testament in Pengo Parja Language

ଆବାଆୟା ଆରେ ହିମ୍‌ଣାକାଙ୍ଗ୍ ପାଉଲ ଆଦେସ୍ ହିତାନ୍

^1-3 ସାସ୍ତର୍‌ତାକେ ଲେକାଆତାତ୍‌ନା, “ମି ଆବାଆୟାରିଙ୍ଗ୍ ସନ୍‌ମାନ୍ କିୟାଟ୍, ଲାଗିଙ୍ଗ୍ ମିଙ୍ଗେଙ୍ଗ୍ ହାର୍ ଆଦ୍‌ନାତ୍ ଆରେ ଏପେଙ୍ଗ୍ ପୁର୍ତିତାକେ ବେସିଦିନ୍ ପାତେକ୍ ଜିଜି ମାନାଦେର୍।” ଇ ପାର୍ତୁମ୍ ଆଦେସ୍ ଈଶ୍ୱର ପାର୍ମାଣ୍ କିଜି ହିତ୍‌ତାନ୍‌ନା। ଲାଗିଙ୍ଗ୍ ମାପୃତାକେ ପାର୍ତିକିନି ହିମ୍‌ଣା କାଦେର୍, ଏପେଙ୍ଗ୍ ଜାର୍-ଜାର୍ ଆୟା ଆବାର୍‌ କାତା ମାନିକିଜି ମାନାଟ୍।

⁴ ଏ ଆବା କାଦେର୍ ଜାର୍-ଜାର୍ ହିମ୍‌ଣାକାଙ୍ଗ୍ ରିସା ଆମାଟ୍, ମାତର୍ ହେୱାରିଙ୍ଗ୍ ମାପୃ କାତାତାଙ୍ଗ୍ ହିକ୍ଷା ଆରେ ଜାଗ୍ରତ୍ କିୟିକିଜି ଗାଜାୟ୍ କିୟାଟ୍।

ଦାସ୍ ଆରେ ମାଲିକାର୍ କାଜିଙ୍ଗ୍ ପାଉଲ ଆଦେସ୍ ହିତାନ୍

⁵ ଏ ଦାସ୍ କାଦେର୍, ଏପେଙ୍ଗ୍ ଇନେସ୍ ଖ୍ରୀଷ୍ଟ କାତାତିଙ୍ଗ୍ ମାନିକିଜି ମାନାଦେରା, ହେଲେକେ ଏପେଙ୍ଗ୍ ସନ୍‌ମାନ୍ ଆରେ ସାଦୁ ଆଜି ଜାର୍‌ତିଙ୍ଗ୍ ପାଣ୍ଡ୍ରାଆଜି ଆରେ ଗାଗାଡ଼୍‌ନି ହାର୍ଦି ମାନ୍‌ତାଙ୍ଗ୍ ମି ମାଲିକାର୍ କାତା ମାନିକିଜି ମାନାଟ୍।

⁶ ହେୱାରିଙ୍ଗ୍ ୱାରି କିଦେଙ୍ଗ୍ ଆରେ ହେୱାର୍ ହୁଡ଼୍‌ନିହିଙ୍ଗ୍ ହେଦାଙ୍ଗ୍ କିମାଟ୍। ମାତର୍ ଏପେଙ୍ଗ୍ ଖ୍ରୀଷ୍ଟ ଦାସ୍ ଲେକେ ବାବିକିଜି ଆତ୍ମାତାଙ୍ଗ୍ ଈଶ୍ୱରତିଙ୍ଗ୍ ଇନାକା ଇଚା ଏପେଙ୍ଗ୍ ହେଦାଙ୍ଗ୍ କିୟାଟ୍।

⁷ ମାନାୟାରିଙ୍ଗ୍ ହେବା କିତିଲେକେ ଆକାୟ୍, ମାତର୍ ମାପୃଙ୍ଗ୍ ହେବା କିତିଲେକେ ୱାରିତାଙ୍ଗ୍ ହେବା କିୟାଟ୍।

⁸ ଇନେସ୍‌କି ଏପେଙ୍ଗ୍ ପୁଚାଦେର୍‌ନା ଯେ ଦାସ୍ ଆୟେନ୍ କି ଦାସ୍ ଆୱାଦାଙ୍ଗ୍ କାମାୟ୍ କିନାକାନ୍, ଇନେର୍ ହାର୍ଦି କାମାୟ୍ କିନାନ୍, ହେୱାନ୍ ମାପୃତାଙ୍ଗ୍ ହେବେନି ପୁରଷ୍କାର୍ ଆୟାଆନାନ୍।

⁹ ଆରେ ଏ ମାଲିକ୍ କାଦେର୍, ଏପେଙ୍ଗ୍ ପା ହେଲେକେ ମି ଦାସ୍ ମାନାୟାରିଙ୍ଗ୍ ବ୍ଯବହାର୍ କିୟାଟ୍। ଏପେଙ୍ଗ୍ ହେୱାରିଙ୍ଗ୍ ଦମ୍‌କାଇ କିମାଟ୍ ମାତର୍ ହେୱାରିଙ୍ଗ୍ ହାର୍ଦି ବ୍ଯବହାର୍ ହିୟାଟ୍। ଏପେଙ୍ଗ୍ ଇଦାଙ୍ଗ୍ ପୁନାଟ୍ ଯେ ମିଙ୍ଗେଙ୍ଗ୍ ଆରେ ହେୱାରିଙ୍ଗ୍ ସରଗ୍‌ଜପି ମାପୃ ମାନାନ୍ ଆରେ ହେୱାନ୍ ଇନେରିଙ୍ଗ୍ ମୁମ୍ ହୁଡ଼୍‌ଜି ବେଣ୍ ୱେଚୁନ୍।

ଈଶ୍ୱର ହିତ୍‌ତି ୱିଜୁ ପିତାଡ଼୍‌ତାଙ୍ଗ୍ ରସ୍ତି ଆଙ୍ଗିଙ୍ଗ୍ ଆର୍‌ପି ଜାଗ୍ରତ୍ ଆଜି ମାନି ଦର୍‌କାର୍

¹⁰ ସେସ୍ କାତା ଇଦାଙ୍ଗ୍, ମାପୃତାଙ୍ଗ୍ ଶାକ୍ତି ପାୟାଆଜି ତା ଶାକ୍ତିତାଙ୍ଗ୍ ବାଡ଼୍‌କାସ୍ ଆଡ।

¹¹ ଏପେଙ୍ଗ୍ ଇନେସ୍ ଶୟତାନନି ୱିଜୁ ଚାତୁର୍ ବିରୁଦ୍‌ତାକେ ନିଲ୍‌ତେଙ୍ଗ୍ ଆଡ୍‌ନାଦେର୍। ଇଦାଙ୍ଗ୍ କାଜିଙ୍ଗ୍ ସେନା ଇନେସ୍ ନାଲି କାଣ୍ଡାଙ୍ଗ୍ ଆସ୍ତି ରେଡି ଆଜି ମାନାନ୍ ହେଲେକେ ଈଶ୍ୱର ହିତ୍‌ତି ୱିଜୁ ନାଲି କାଣ୍ଡାକାଙ୍ଗ୍ ଉସ୍‌ପିସ୍ ଜାଗ୍ରତ୍ ଆଜି ମାନାଟ୍।

¹² ଇନେସ୍‌କି ମା ଯୁଜ୍ ନେତେର୍ ଜେଇ ଇ ପୁର୍ତିନି ମାନାୟାର୍ କାଜିଙ୍ଗ୍ ଆକାୟ୍, ମାତର୍ ମାଜ୍‌ଗା ଜଗତ୍‌ନି ଶାକ୍ତି, ଆଦିକାର୍ ଆରେ ସାସନ୍ କିନାକାର୍ ବିରଦ୍‌ତାକେ ଆରେ ବାଦାଡ଼୍‌ନି କରାପ୍ ଆତ୍ମା ବିରଦ୍ କାଜିଙ୍ଗ୍।

¹³ ଲାଗିଙ୍ଗ୍ ଈଶ୍ୱର ହିତ୍‌ତି ୱିଜୁ ନାଲି କାଣ୍ଡାଙ୍ଗ୍ ଆସ୍ତି ରେଡି ଆଜି ମାନାଟ୍। ଲାଗିଙ୍ଗ୍ ଏପେଙ୍ଗ୍ ଶୟ୍‌ତାନତିଙ୍ଗ୍ ବିରଦ୍ କିଦେଙ୍ଗ୍ ଆଡ୍‌ନାଦେର୍ ଆରେ ଏପେଙ୍ଗ୍ ଜିତାଆଜି ବାଡ଼୍‌କାସ୍ ଆଦେଙ୍ଗ୍ ଆଡ୍‌ନାଦେର୍।

¹⁴ ଲାଗିଙ୍ଗ୍ ସେନା ଇନେସ୍ ମେଙ୍ଗାକାଙ୍ଗ୍ ଗାଚିୟାଆଜି ଯୁଜ୍ କାଜିଙ୍ଗ୍ ରେଡି ଆଜି ମାନାନ୍, ହେଲେକେ ମି ମେଙ୍ଗାକାଙ୍ଗ୍ ଈଶ୍ୱର ସତ୍‌ତିଙ୍ଗ୍ ବେଲ୍‌ଟ୍ ଲେକେ ଗାଚାଟ୍। ସେନା ଇନେସ୍ ଜାର୍ ରକ୍ଷା କାଜିଙ୍ଗ୍ ପିତାଡ଼୍ ଆଙ୍ଗି ରସ୍ତି ଜପି ଉସ୍‌ପାନାନ୍, ହେଲେକେ ଏପେଙ୍ଗ୍ ପା ଶୟ୍‌ତାନ୍‌ତାଙ୍ଗ୍ ରକ୍ଷା ପାୟା ଆଦେଙ୍ଗ୍ ଈଶ୍ୱର ହିତ୍‌ତି ଦରମ୍‌ତିଙ୍ଗ୍ ଉସ୍‌ପାଟ୍‌।

¹⁵ ସେନା ଇନେସ୍ ବୁଟ୍ ତୁଜ୍‌ଦି ରେଡିରେ ମାନ୍‌ଗାନାନ୍, ହେଲେକେ ଏପେଙ୍ଗ୍ ଈଶ୍ୱର ହୁଦାଙ୍ଗ୍ ଶାନ୍ତିରେ ମାନି ହାର୍ଦିକାବୁର୍‌ତିଙ୍ଗ୍ ଆହା କିଜି କରାପ୍ ବିଷୟରେ ଯୁଜ୍ କିଦେଙ୍ଗ୍ ରେଡି ଆଜି ମାନାଟ୍।

¹⁶ ଇଦାଙ୍ଗ୍ ହୁଦାଙ୍ଗ୍ ସେନା ଇନେସ୍ ଶତ୍ରୁନି ବାଣ୍‌ତାଙ୍ଗ୍ ରକ୍ଷା ପାୟା ଆଦେଙ୍ଗ୍ ମୁକ୍‌ନାକା ଆହ୍‌ନାନ୍, ହେଲେକେ ଏପେଙ୍ଗ୍ ଶୟତାନତାଙ୍ଗ୍ ଜାର୍‌ତିଙ୍ଗ୍ ରକ୍ଷା କିଦେଙ୍ଗ୍ ଖ୍ରୀଷ୍ଟତାକେ ପାର୍ତି କିଜି ମାନାଟ୍।

¹⁷ ସେନା ଇନେସ୍ ଜାର୍ କାପ୍‌ଡ଼ା ଉଦାର୍ କିଦେଙ୍ଗ୍ ପିତାଡ଼୍‌ନି ହେଲ୍‌ମେଟ୍ ତୁଜ୍‌ନାନ୍, ଶୟ୍‌ତାନ୍‌ତାଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଉଦାର୍ କିଦେନ୍। ଯୁଜ୍ କିଦେଙ୍ଗ୍ ସେନା ଇନେସ୍ କାଣ୍ଡା ବ୍ଯବହାର୍ କିନାନ୍, ହେଲେକେ ଈଶ୍ୱର କାତା ଇନାକା ପବିତ୍ର ଆତ୍ମା ହିଦ୍‌ନାତ୍ ହେଦାଙ୍ଗ୍ ବ୍ଯବହାର୍ କିୟାଟ୍।

¹⁸ ୱିଜୁଦିନ୍ ପବିତ୍ର ଆତ୍ମା ସାଇଜତାଙ୍ଗ୍ ଈଶ୍ୱରତାକେ ପାର୍ତାନା ଆରେ ଗୁୱାରି କିୟାଟ୍। ଆରେ ୱିଜୁ ସାଦୁ ମାନାୟାର୍ କାଜିଙ୍ଗ୍ କାସି ମାନ୍‌ଞ୍ଜି ପାର୍ତାନା କିୟାଟ୍।

¹⁹ ଆନେଙ୍ଗ୍ ଇନେସ୍ ସାହାସ୍ ହୁଦାଙ୍ଗ୍ ହାର୍ଦିକାବୁର୍‌ନି ଡ଼ୁକ୍‌ତି ଜଜ୍‌ନାତିଙ୍ଗ୍ ୱେଚ୍‌ଚେଙ୍ଗ୍ ଆଡ୍‌ନାଙ୍ଗ୍, ଆରେ ଈଶ୍ୱର ଇନେସ୍ ନାଙ୍ଗେଙ୍ଗ୍ ଟିକ୍ କାତା ହିଦ୍‌ନାନ୍, ହେଦାଙ୍ଗ୍ ନା କାଜିଙ୍ଗ୍ ପା ପାର୍ତାନା କିୟାଟ୍।

²⁰ ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଚେନ୍‌ତାଙ୍ଗ୍ ଗାଚିଆ ଆତାଙ୍ଗ୍‌ନା, ଆରେ ଈଶ୍ୱର ରାଜ୍‌ଦୁତ୍ ଲେକେ ଆଜି ଶୁଣାୟ୍ କିନାଙ୍ଗା। ନା କାଜିଙ୍ଗ୍ ପାର୍ତାନା କିୟାଟ୍, ଆନେଙ୍ଗ୍ ଇନେସ୍ ହେ ବିଷୟରେ ଟିକ୍ ବାବ୍‌ରେ ବେଣ୍‌କିଦେଙ୍ଗ୍ ସାହାସ୍ ପାୟାଆନାଙ୍ଗ୍।

ସେସ୍ ଜୱାର୍

²¹ ମାପୃ କାମାୟ୍‌ତାକେ ବିସ୍‌ବାସ୍ ଆଜି କାମାୟ୍ କିନି ପାର୍ତିକିନି ଟଣ୍ଡେନ୍ ତୁକିକ, ଆନେଙ୍ଗ୍ ଇନେସ୍ ମାନାଙ୍ଗ୍ ଆରେ ଇନାକା କିନାଙ୍ଗା, ମି ୱିଜାକାରିଙ୍ଗ୍ ନା ବିଷୟରେ ୱେଚ୍‌ନାନ୍।

²² ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ମି ଲାଗାୟ୍ ପକ୍ତାତାଙ୍ଗ୍, ଇନେସ୍ ଏପେଙ୍ଗ୍ ମା ଅବସ୍ତା ବିଷୟରେ ପୁଞ୍ଜେଙ୍ଗ୍ ଆଡ୍‌ନାଦେର୍ ଆରେ ହେୱାନ୍ ଇନେସ୍ ମି ଗରବ୍ ବିତ୍ରେ ସାହାସ୍ କିଦେଙ୍ଗ୍ ଆଡ଼୍‌ଦାନାନ୍।

²³ ଆବା ଈଶ୍ୱର ଆରେ ମା ମାପୃ ଯୀଶୁ ଖ୍ରୀଷ୍ଟ ପାର୍ତିକିନି ଟଣ୍ଡାରିଙ୍ଗ୍ ଶାନ୍ତି ଆୟେତ୍‌, ଖ୍ରୀଷ୍ଟତାକେ ପାର୍ତିତାଙ୍ଗ୍ ଆରେ ଜାର୍-ଜାର୍ ଲାଡ୍‌ତାକେ ମାଞ୍ଜେଙ୍ଗ୍ ସାଇଜ କିୟାଟ୍।

²⁴ ଇମ୍‌ଣାକାର୍ ମା ମାପୃ ଯୀଶୁ ଖ୍ରୀଷ୍ଟଙ୍ଗ୍ ୱିଜ୍‌ୱି ଲାଡ୍‌ତାକେ ଲାଡ୍ କିନାର୍, ହେୱାରିଙ୍ଗ୍ ଈଶ୍ୱର ଦୟା କିନାନ୍।