ଏପିସିୟ 5 - New Testament in Pengo Parja Languageପାର୍ତି କିନାକାର୍ ବ୍ଯବହାର୍ 1 ଏପେଙ୍ଗ୍ ଈଶ୍ୱର ହିମ୍ଣା କାଦେର୍ ଆରେ ହେୱାନ୍ ମିଙ୍ଗେଙ୍ଗ୍ ଲାଡ୍ କିଦ୍ନାନ୍। ଲାଗିଙ୍ଗ୍ ଏପେଙ୍ଗ୍ ହେୱାନ୍ ଲେକେ ଆଦେଙ୍ଗ୍ ଉପାୟ୍ କିୟାଟ୍। 2 ଖ୍ରୀଷ୍ଟ ଇନେସ୍ ମିଙ୍ଗେଙ୍ଗ୍ ଲାଡ୍ କିତ୍ତାନ୍, ହେଲେକେ ଏପେଙ୍ଗ୍ ଜେକନିକାରିଙ୍ଗ୍ ଲାଡ୍ କିୟାଟ୍। ହେୱାନ୍ ମିଙ୍ଗେଙ୍ଗ୍ ଲାଡ୍ କିତିଲେ, ମି ପାପ୍ତିଙ୍ଗ୍ ଦେହା କିଦେଙ୍ଗ୍ ହେୱାନ୍ ନିଜେ ଜାର୍ ଜିବୁନ୍ତିଙ୍ଗ୍ ପୁଜା କିତିଲେକେ ବଲିଦାନ୍ କିୟିଆତାନ୍। ଈଶ୍ୱର ତା ବଲିଦାନ୍ତାଙ୍ଗ୍ ୱାରି ଆତାନ୍, ଇନେସ୍କି ହେୱାନ୍ ବଲିଦାନ୍ ବାସ୍ନା ଚିକାଣ୍ ଲେକେ ମାଚାତ୍। 3 ଲାଗିଙ୍ଗ୍ ଦାରି, ୱିଜୁ ପର୍କାର୍ କରାପ୍ କାମାୟ୍ କି ଲବ୍ରା, ଇୱିଜୁ ମି ବିତ୍ରେ ବାହା ଆମେତ୍। ଇନେସ୍କି ହେଦାଙ୍ଗ୍ ସାଦୁ ମାନାୟାର୍ କାଜିଙ୍ଗ୍ ଟିକ୍ ଆକାୟ୍। 4 ଆରେ ଏପେଙ୍ଗ୍ ଅପ୍ମାନ୍ ହିତିଲେକେ ବେଣ୍ ୱେଚ୍ମାଟ୍, ମୁର୍କିୟା କାତା ୱେଚ୍ମାଟ୍ ଆରେ କରାପ୍ ବେଣ୍ ଡେକ୍ମାଟ୍। ଇଦାଙ୍ଗ୍ ମି କାଜିଙ୍ଗ୍ ଟିକ୍ ଆକାୟ୍। ମାତର୍ ଏପେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିୟାଟ୍। 5 ଇନେସ୍କି ଏପେଙ୍ଗ୍ ହାର୍ଦାଙ୍ଗ୍ ପୁଚାଦେର୍ନା ଯେ, ଦାରି କାମାୟ୍ କିନି ମାନାୟ୍, କି କରାପ୍ ବ୍ଯବହାର୍ କିନି ମାନାୟ୍, କି ଦନ୍ ଲବ୍ରାର୍ କାଜିଙ୍ଗ୍, ଖ୍ରୀଷ୍ଟ ଆରେ ଈଶ୍ୱର ରାଜିତାକେ ଆଦିକାର୍ ଆକାୟ୍। ଦନ୍ ଲବ୍ରାର୍ ମୁର୍ତିତିଙ୍ଗ୍ ପୁଜା କିନାକାର୍ ଲେକେ। 6 ଲାଗିଙ୍ଗ୍ ମିଙ୍ଗେଙ୍ଗ୍ ଇନେର୍ପା ଟକାଇ କିଦ୍ମେର୍ ଯେ ଇ ୱିଜୁ ବିଷୟ କିତିସ୍ ଦଣ୍ଡ୍ ଗାଟାଆଦୁତ୍। ଇନେସ୍କି ଇମ୍ଣାକାର୍ ତା ଆଦେସ୍ତିଙ୍ଗ୍ ମାନିକିଉର୍ ହେୱାରିଙ୍ଗ୍ ଈଶ୍ୱର ଦଣ୍ଡ୍ ହିନାନ୍। 7 ଲାଗିଙ୍ଗ୍ ଇ ୱିଜୁ ପାପ୍ କାମାୟ୍ କିନିହିଙ୍ଗ୍ ଏପେଙ୍ଗ୍ ହେୱାର୍ ହୁଦାଙ୍ଗ୍ ମାହା ଆମାଟ୍। 8 ଇନେସ୍କି ଏପେଙ୍ଗ୍ ଆଗେ ମାଜ୍ଗାତାକେ ମାଚାଦେର୍, ମାତର୍ ନଙ୍ଗୟ୍ ମାପୃତାକେ ରବେ ଆତି କାଜିଙ୍ଗ୍ ଅଜଡ଼୍ତାକେ ମାନାଦେର୍। ଲାଗିଙ୍ଗ୍ ଅଜଡ଼୍ନି ହିମ୍ଣାଙ୍ଗ୍ ଲେକେ ବ୍ଯବହାର୍ କିୟାଟ୍। 9 ଇନେସ୍କି ଅଜଡ଼୍ନି ପାଡ଼୍ ଆନାତା, ହାର୍ କାମାୟ୍, ଦରମ୍ କାମାୟ୍ କିନାକା, ଆରେ ସତ୍ ବ୍ୟବହାର୍ କିୟାଟ୍। 10 ମାପୃଙ୍ଗ୍ ଇନାକା ୱାରିନି ବିଷୟ, ହେଦାଙ୍ଗ୍ କିଦେଙ୍ଗ୍ ଉପାୟ୍ କିୟାଟ୍। 11 ଏପେଙ୍ଗ୍ ହେୱାର୍ ହୁଦାଙ୍ଗ୍ ମାହା ଆମାଟ୍ ଇମ୍ଣାକାର୍ ମାଜ୍ଗାତାକେ ମାନି ମାନାୟାର୍ଲେକେ ପାପ୍ କାମାୟ୍ କିନାର୍। ମାତର୍ ହେୱାର୍ କିତି ପାପ୍ତିଙ୍ଗ୍ ୱିଜାକାର୍ ଆଗେ ଚଚାଟ୍। 12 ଇନେସ୍କି ମାଜ୍ଗାତାକେ ମାନି ମାନାୟାର୍ ଇନାକା ୱିଜୁ ଡ଼ୁକ୍ଚି କିନାର୍, ହେ ୱିଜୁବେଣ୍ ୱେଚ୍ନାକା ପା ଲାଜୁନି ବିଷୟ। 13 ମାତର୍ ଏଚେପାଦ୍ନା ଅଜଡ଼୍ ହେୱାର୍ ଜପି ଆନାତ୍ ହେୱାର୍ କିତି ପାପ୍ ୱିଜାକାର୍ ଆଗେ ଚଚ୍ଚି ହିନାତ୍। ଇନେସ୍କି ଇନାକା ଚଚ୍ଚି ହିନାତ୍, ହେଦାଙ୍ଗ୍ ଆନାତା ଅଜଡ଼୍। 14 ଲାଗିଙ୍ଗ୍ ମାନାୟାର୍ ଇ ଲେକେ କିନାର୍, “ଏ ହୁଞ୍ଜ୍ନି ମାନାୟ୍ କାଦେର୍ ନିଙ୍ଗାଟ୍, ହାଃନି ମାନାୟାର୍ ବିତ୍ରେତାଙ୍ଗ୍ ନିଙ୍ଗାଟ୍, ଆରେ, ଖ୍ରୀଷ୍ଟ ମିଙ୍ଗେଙ୍ଗ୍ ଅଜଡ଼୍ ହିଦ୍ନାନ୍।” 15 ଇଦାଙ୍ଗ୍ କାଜିଙ୍ଗ୍ ମି ବ୍ଯବାହାର୍ତାକେ ଜାଗ୍ରତ୍ ଆଡ। ଏପେଙ୍ଗ୍ ବୁଦିହିଲ୍ୱି ଲେକେ ଆୱାଦାଙ୍ଗ୍ ବୁଦି ମାନିଲେକେ ବ୍ଯବାହାର୍ କିୟାଟ୍। 16 ଆରେ ୱିଜୁ ସୁଯଗ୍ତିଙ୍ଗ୍ ହାର୍ଦି କାମାୟ୍ କିନି କାଜିଙ୍ଗ୍ ବ୍ଯବହାର୍ କିୟାଟ୍। ଇନେସ୍କି ଇ ସମୟ୍ତ ମାନାୟାର୍ ବେସି କରାପ୍ କାମାୟ୍ କିନାର୍। 17 ଲାଗିଙ୍ଗ୍ ବୁଦିହିଲ୍ୱି ମାନାୟ୍ ଲେକେ ଆୱାଦାଙ୍ଗ୍ ବୁଦି ମାନିଲେକେ ଆଡ, ଆରେ ମାପୃ ଇଚା ଇନାକା ହେଦାଙ୍ଗ୍ ବୁଜାଆଡ। 18 ଆରେ ଅଙ୍ଗୁର୍ ରାସ୍ ଉଣ୍ଜି ହଜ୍ଜି ମାନ୍ମାଟ୍। ଇନେସ୍କି ହେବେତାଙ୍ଗ୍ ନେ ମାନାୟାର୍ ପଶୁ ଲେକେ ବ୍ଯବହାର୍ କିନାର୍। ମାତର୍ ଏପେଙ୍ଗ୍ ପବିତ୍ର ଆତ୍ମାତାଙ୍ଗ୍ ପୁରା ଆଡ। 19 ଆରେ ଜାର୍-ଜାର୍ବିତ୍ରେ କେର୍କଣ୍ କେରାଟ୍, ଈଶ୍ୱର ଭଜନ୍ କିୟାଟ୍ ଆରେ ଆତ୍ମିକ୍ କେର୍କଣ୍ କେରାଟ୍। ଆରେ ଜାର୍-ଜାର୍ ଗାଗାଡ଼୍ ବିତ୍ରେ ଈଶ୍ୱର ତର୍ଦାଙ୍ଗ୍ ଭଜନ୍ ଆରେ ଗିତସଙ୍ଗିତାନି କେର୍କଣ୍ କେରାଟ୍। 20 ୱିଜୁଦିନ୍ ୱିଜୁ ବିଷୟରେ ମା ମାପୃ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ଆବା ଈଶ୍ୱରତିଙ୍ଗ୍ ଦନ୍ଯବାଦ୍ ହିୟାଟ୍। କଗ୍ଲେ ଆରେ ଆଣ୍ଡ୍ରାକାଙ୍ଗ୍ ପାଉଲ ଆଦେସ୍ ହିତାନ୍ 21 ଖ୍ରୀଷ୍ଟଙ୍ଗ୍ ସନ୍ମାନ୍ କିନି କାଜିଙ୍ଗ୍ ଜାର୍-ଜାର୍ ମାନା-ମାନି ଆଜି ମାନାଟ୍। 22 ଏ କଗ୍ଲେକ୍ ଏପେଙ୍ଗ୍ ଇନେସ୍ ମାପୃଙ୍ଗ୍ ମାନିକିଜି ମାନାଦେରା, ହେଲେକେ ଜାର୍-ଜାର୍ ଆଣ୍ଡ୍ରା କାତାତିଙ୍ଗ୍ ମାନିକିଜି ମାନାଟ୍। 23 ଇନେସ୍କି ଖ୍ରୀଷ୍ଟ ଇନେସ୍ ମଣ୍ଡ୍ଲିନି ମୁକ୍ଯ, ହେଲେକେ ଆଣ୍ଡ୍ରା ପା କଗ୍ଲେନି ମୁକ୍ଯ। ଖ୍ରୀଷ୍ଟ ମଣ୍ଡ୍ଲିତିଙ୍ଗ୍ ଉଦାର୍ କିନାକାନ୍, ହେଦାଙ୍ଗ୍ ତା ଗାଗାଡ଼୍ ଲେକେ। 24 ନଙ୍ଗୟ୍ ମଣ୍ଡ୍ଲି ଇନେସ୍ ଖ୍ରୀଷ୍ଟ ତାରେନ୍ ମାନାତ୍, ହେଲେକେ କଗ୍ଲେକ୍ ପା ୱିଜୁ ବିଷୟରେ ଜାର୍-ଜାର୍ ଆଣ୍ଡ୍ରାଙ୍ଗ୍ ତାରେନ୍ ମାନେକ୍। 25 ଏ ଆଣ୍ଡ୍ରା କାଦେର୍, ଖ୍ରୀଷ୍ଟ ଇନେସ୍ ମଣ୍ଡ୍ଲିତିଙ୍ଗ୍ ଲାଡ୍ କିତାନ୍, ଏପେଙ୍ଗ୍ ପା ହେଲେକେ ଜାର୍-ଜାର୍ କଗ୍ଲେକାଙ୍ଗ୍ ଲାଡ୍ କିୟାଟ୍। ଖ୍ରୀଷ୍ଟ ମଣ୍ଡ୍ଲି କାଜିଙ୍ଗ୍ ଜାର୍ ଜିବୁନ୍ ହିତାନ୍, 26 ଇନେସ୍ ହେୱାନ୍ ମଣ୍ଡ୍ଲିତିଙ୍ଗ୍ ପବିତ୍ର କିଦେଙ୍ଗ୍ ଆଡ୍ନାନ୍। ହେୱାନ୍ ଈଶ୍ୱର କାତା ଆରେ ଏଜୁଙ୍ଗ୍ତାଙ୍ଗ୍ ଇଦାଙ୍ଗ୍ ସପା କିତାନ୍ନା। 27 ଆରେ ହେୱାନ୍ ଇନେସ୍ ମଣ୍ଡ୍ଲିତିଙ୍ଗ୍ ପବିତ୍ର ଆରେ ବିନା ଦସ୍ନି ର ଗୌରବନି ମଣ୍ଡ୍ଲି ଲେକେ ଜାର୍ତାକେ ଚଚ୍ଚେଙ୍ଗ୍ ଆଡ୍ନାନ୍। ଇଦାଙ୍ଗ୍ କାଜିଙ୍ଗ୍ ହେୱାନ୍ ମଣ୍ଡ୍ଲିତିଙ୍ଗ୍ ଚିନ୍ କିୱାଦାଙ୍ଗ୍ ଆରେ ଇନେସ୍ ଲେଗ୍ଦି ଦସ୍ତାକେ ମାନ୍ୱି କାଜିଙ୍ଗ୍ ଖ୍ରୀଷ୍ଟ ଇଦାଙ୍ଗ୍ କିତାନ୍ନା। 28 ଇଲେକେ ଆଣ୍ଡ୍ରାଙ୍ଗ୍ ପା କଗ୍ଲେକାଙ୍ଗ୍ ହେୱାର୍ ଜାର୍ ଗାଗାଡ଼୍ ଇଞ୍ଜି ଲାଡ୍କିନି ଦର୍କାର୍। ଇମ୍ଣି ଆଣ୍ଡ୍ରା ଜାର୍ କଗ୍ଲେଙ୍ଗ୍ ଲାଡ୍ କିନାନ୍, ହେୱାନ୍ ଜାର୍ତିଙ୍ଗ୍ ଲାଡ୍ କିନାନ୍। 29 ଇନେସ୍କି ଇନେର୍ ଆତିସ୍ପା ଜାର୍ ଗାଗାଡ଼୍ତିଙ୍ଗ୍ ଇନାୱେଡ଼ାଙ୍ଗ୍ ପା ଗିଣ୍ କିଉନ୍। ମାତର୍ ହେୱାନିଙ୍ଗ୍ ପହା କିନାନ୍ ଆରେ ଗାଜାୟ୍ କିନାନ୍, ହେଲେକେ ଖ୍ରୀଷ୍ଟ ପା ମଣ୍ଡ୍ଲି କାଜିଙ୍ଗ୍ କିନାନ୍। 30 ଇନେସ୍କି ଆସେଙ୍ଗ୍ ତା ଗାଗାଡ଼୍ନି ଜିନିଷ୍। 31 ଇଦାଙ୍ଗ୍ କାଜିଙ୍ଗ୍ ସାସ୍ତର୍ତାକେ ଲେକା ମାନାତ୍, “ଇଦାଙ୍ଗ୍ କାଜିଙ୍ଗ୍ ଆଣ୍ଡ୍ରା ଆୟାଆବାରିଙ୍ଗ୍ ପିସ୍ତି ଜାର୍ କଗ୍ଲେତାକେ ମାହାଆଜି ମାନ୍ଗାନାନ୍, ଆରେ ହେୱାନ୍ ରିୟାର୍ ର ଗାଗାଡ଼୍ ଆନାର୍।” 32 ଇଦାଙ୍ଗ୍ ନେ ବେସି କଷ୍ଟନି ଅର୍ତ ମାନାତ୍, ମାତର୍ ଆନେଙ୍ଗ୍ ଖ୍ରୀଷ୍ଟ ଆରେ ମଣ୍ଡ୍ଲି ବିଷୟରେ ହାମାନ୍ କିଜି ୱେଚ୍ଚାନାଙ୍ଗା। 33 ଇଦାଙ୍ଗ୍ ମି କାଜିଙ୍ଗ୍ ପା, ଲାଗିଙ୍ଗ୍ ଏପେଙ୍ଗ୍ ୱିଜାକାଦେର୍ ଜାର୍-ଜାର୍ କଗ୍ଲେକାଙ୍ଗ୍ ଜାର୍ତିଙ୍ଗ୍ ଲାଡ୍ କିତିଲେକେ ଲାଡ୍ କିୟାଟ୍। ଆରେ କଗ୍ଲେକ୍ ପା ଜାର୍ ଆଣ୍ଡ୍ରାକାଙ୍ଗ୍ ସନ୍ମାନ୍ କିୟେକ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation