ଏପିସିୟ 4 - New Testament in Pengo Parja Languageଖ୍ରୀଷ୍ଟ ଗାଗାଡ଼୍ ବିତ୍ରେ ରବେ ଆନାକା 1 ଆନେଙ୍ଗ୍ ଯେ ମାପୃଙ୍ଗ୍ ହେବା କିନି କାଜିଙ୍ଗ୍ ବନ୍ଦି ଆତାଙ୍ଗ୍ନା, ମିଙ୍ଗେଙ୍ଗ୍ ଗୁୱାରି କିଦ୍ନାଙ୍ଗା, ଈଶ୍ୱର ମିଙ୍ଗେଙ୍ଗ୍ ଇନାକିଦେଙ୍ଗ୍ କୁକ୍ତାତାନ୍ନା ହେବେ ଆସ୍ତି ଲେକେ ହାର୍ ଆଜି ଜିବୁନ୍ କାଟିକିୟାଟ୍। 2 ଇଦାଙ୍ଗ୍ନି ଅର୍ତ ଯେ ଏପେଙ୍ଗ୍ ଇନାକାପା ଜାର୍ତିଙ୍ଗ୍ ହିରୁ ଆଜି କିୟାଟ୍, ମି ଆଦିକାର୍ ଚଚ୍ମାଟ୍, ସାସ୍ ଆସ୍ତି ମାନାଟ୍, ଆରେ ଜେକନିକାରିଙ୍ଗ୍ ବ୍ଯବହାର୍ତାଙ୍ଗ୍ ରିସା ଆୱାଦାଙ୍ଗ୍ ଜାର୍-ଜାର୍ତିଙ୍ଗ୍ ଲାଡ୍ କିୟାଟ୍। 3 ଜାର୍-ଜାର୍ ମାହାଆଜି ମାନି କାଜିଙ୍ଗ୍ ପବିତ୍ର ଆତ୍ମା ଇମ୍ଣି ଶାନ୍ତି ହିଦ୍ନାତ୍, ହେ ବିଷୟରେ ମାଞ୍ଜେଙ୍ଗ୍ ଉପାୟ୍ କିୟାଟ୍। 4 ମା ୱିଜୁ ପାର୍ତି କିନାକାଦେର୍ ର ଗାଗାଡ଼୍ନି ଜିନିଷ୍ ଲେକେ, ଆସେଙ୍ଗ୍ ୱିଜାକାସ୍ ହାମାନ୍ ଆତ୍ମା ପାୟାଆତାସ୍ନା, ହେଲେକେ ଈଶ୍ୱର ତା ମାନାୟ୍ ଲେକେ କୁକ୍ତିନିହିଙ୍ଗ୍ ଏପେଙ୍ଗ୍ ହାମାନ୍ ଆହା ପାୟା ଆତାଦେର୍ନା। 5 ମା ୱିଜାକାସ୍ କାଜିଙ୍ଗ୍ ରକାନ୍ ମାପୃ ମାନାନ୍ ଆରେ ଆସେଙ୍ଗ୍ ୱିଜାକାସ୍ ହେ ରକାନ୍ ମାପୃତାକେ ପାର୍ତି କିନାସା, ଆସେଙ୍ଗ୍ ୱିଜାକାସ୍ ରକାନ୍ ଖ୍ରୀଷ୍ଟ ତର୍ଦାଙ୍ଗ୍ ଡୁବନ୍ ଆତାସ୍ନା। 6 ଆସେଙ୍ଗ୍ ୱିଜାକାସ୍ ରକାନ୍ ଈଶ୍ୱରତିଙ୍ଗ୍ ହେବା କିନାସା ଆରେ ହେୱାନ୍ ମା ୱିଜାର୍ ଆବା। ହେୱାନ୍ ୱିଜାକାସ୍ ଜପି ସାସନ୍ କିନାନ୍, ହେୱାନ୍ ମା ୱିଜାକାର୍ତାଙ୍ଗ୍ କାମାୟ୍ କିନାନ୍ ଆରେ ହେୱାନ୍ ମା ୱିଜାକାସ୍ ବିତ୍ରେ ମାନାନ୍। 7 ମାତର୍ ଖ୍ରୀଷ୍ଟ ତା କାମାୟ୍ କିଦେଙ୍ଗ୍ ମା ୱିଜାକାରିଙ୍ଗ୍ ଦୟା ହୁଦାଙ୍ଗ୍ ବିନ୍-ବିନ୍ ବର୍ଦାନ୍ ହିତ୍ତାନ୍ନା। 8 ଲାଗିଙ୍ଗ୍ ସାସ୍ତର୍ତାକେ ଲେକାଆତାତ୍ନା, “ହେୱାନ୍ ସରଗ୍ ବାହାତାକେ ହାଚାନ୍, ଆରେ ତା ହୁଦାଙ୍ଗ୍ ବନ୍ଦିକିଜି ତାହିୱାତି ଶତ୍ରୁରିଙ୍ଗ୍ ଅସାହାଚାନ୍, ଆରେ ମାନାୟାରିଙ୍ଗ୍ ବାରବିନି ବର୍ଦାନ୍ ହିତାନ୍।” 9 ଲାଗିଙ୍ଗ୍ ହେୱାନ୍ ଉଚା ବାହାତାକେ ହାଚାନ୍ ଇଞ୍ଜି ୱେଚ୍ନି ସାସ୍ତର୍ ଅର୍ତ ଇନାକା? ଇଦାଙ୍ଗ୍ନି ଅର୍ତ ଯେ ହେୱାନ୍ ପୁର୍ତିନି ତାରେନ୍ନି ବାହାତାକେ ୱାଜିମାଚାନ୍। 10 ହେୱାନ୍ ଇନେସ୍ ପୁର୍ତିନି ୱିଜୁ ବାହାତାକେ ମାଞ୍ଜେଙ୍ଗ୍ ଆଡ୍ନାନ୍, ହେଦାଙ୍ଗ୍ କାଜିଙ୍ଗ୍ ଖ୍ରୀଷ୍ଟ ତାରେନ୍ନି ବାହାତାକେ ୱାତାନ୍, ଆରେ ହେୱାନ୍ ନେ ରକାନ୍ ସରଗ୍ନି ଜପ୍ଣି ବାହାତାକେ ହାଚାନ୍। 11 ହେ ଖ୍ରୀଷ୍ଟ ନେ ମଣ୍ଡ୍ଲିତିଙ୍ଗ୍ ଇ ବର୍ଦାନ୍ ହିତାନ୍ନା, ହେୱାନ୍ ଇନେ-ଇନେରିଙ୍ଗ୍ ବାଚିକିତି ଚେଲା, ଆରେ ଇନେ-ଇନେରିଙ୍ଗ୍ ଭବିଷ୍ଯତବକ୍ତା ଇନାର୍। ଆରେ ଇନେ-ଇନେରିଙ୍ଗ୍ ହାର୍ଦିକାବୁର୍ ଶୁଣାୟ୍ କିନାକାନ୍, ଇନେ-ଇନେରିଙ୍ଗ୍ ପାଷ୍ଟେର୍ ଆରେ ମାଷ୍ଟେର୍ ଲେକେ ବାଚି କିତାନ୍ନା। 12 ହେୱାର୍ ଇନେସ୍ ଈଶ୍ୱର ମାନାୟାରିଙ୍ଗ୍ ତା ହେବା କିଦେଙ୍ଗ୍ ରେଡି କିନାର୍ ଆରେ ଖ୍ରୀଷ୍ଟନି ଗାଗାଡ଼୍ ଲେକେ ମଣ୍ଡ୍ଲିତିଙ୍ଗ୍ ଆତ୍ମିକ୍ ଜିବୁନ୍ତାକେ ବାଡା ଆଦେଙ୍ଗ୍ ସାଇଜ କିନାର୍। 13 ଆସେଙ୍ଗ୍ ଈଶ୍ୱର ମେହି ବିଷୟରେ ପୁନ୍ଞ୍ଜି ପାର୍ତିତାକେ ରବେ ଆନି ପାତେକ୍, ଆରେ ଆସେଙ୍ଗ୍ ପୁରାପୁରି ଖ୍ରୀଷ୍ଟ ଲେକେ ଆଜି ପାର୍ତିତାକେ ଗାଜା ମାନାୟ୍ ଲେକେ ଟିକ୍ଆଜି ମାନି ପାତେକ୍। 14 ଲାଗିଙ୍ଗ୍ ଆସେଙ୍ଗ୍ ହିରୁ ହିମ୍ଣା ଲେକେ ଆଜି ମାନୁସ୍, ଆରେ ହିରୁ ଡଙ୍ଗା ଲଉଡ଼ି ଆରେ ଡ଼ୁଇତାକେ ଇନି ଆନି ଆତି ଲେକେ ଆସେଙ୍ଗ୍ ଆଉସ୍। ଇନେସ୍କି ଟକୁୱା ମାନାୟାର୍ ମାଙ୍ଗେଙ୍ଗ୍ ଆରେ ଟକାଇ କିଦ୍ଦେଙ୍ଗ୍ ଆଡ଼୍ଦୁର୍, କି ଚାତୁର୍ ମାନାୟାର୍ ବୁଲ୍ ହିକ୍ଷାତାଙ୍ଗ୍ ମାଙ୍ଗେଙ୍ଗ୍ ବୁଲ୍କାଇ କିଦ୍ଦେଙ୍ଗ୍ ଆଡ଼୍ଦୁର୍। 15 ମାତର୍ ଈଶ୍ୱର ସତ୍ ବିଷୟତିଙ୍ଗ୍ ଲାଡ୍ତାଙ୍ଗ୍ ୱେଚ୍ନାସ୍, ଆରେ ଖ୍ରୀଷ୍ଟ ଲେକେ ଆନି କାଜିଙ୍ଗ୍ ୱିଜୁ ବିଷୟରେ ଗାଜା ମାନାୟ୍ ଲେକେ ବାଡା ଆଦେଙ୍ଗ୍ ଆନାତ୍, ଇନେସ୍କି ହେୱାନ୍ ମଣ୍ଡ୍ଲିନି ମୁକ୍ଯ। 16 ଖ୍ରୀଷ୍ଟତାକେ ପାର୍ତିକିନି ମାନାୟାର୍ ତା ଗାଗାଡ଼୍ନି ଜିନିଷ୍ ଲେକେ। ର ମାନାୟ୍ନି ଗାଗାଡ଼୍ନି ଜିନିଷ୍ ମାହାଆଜି ମାନ୍ଞ୍ଜି ଟିକ୍ ବାବ୍ରେ କାମାୟ୍ କିତିସ୍ ଗାଗାଡ଼୍ ଇନେସ୍ ବାଡ଼୍କାସ୍ ଆଜି ବାଡା ଆନାତ୍। ହେଲେକେ ଖ୍ରୀଷ୍ଟ ମାଙ୍ଗେଙ୍ଗ୍ ହିଜି ମାନ୍ଞ୍ଚି କାମାୟ୍ତିଙ୍ଗ୍ ଯଦି ମାହାଆଜି କିତିସ୍ ଆସେଙ୍ଗ୍ ବାଡ଼୍କାସ୍ ଆଜି ଜିନାସ୍ ଆରେ ଜାର୍-ଜାର୍ତିଙ୍ଗ୍ ଆଦିକ୍ତାଙ୍ଗ୍ ଆଦିକ୍ ଲାଡ୍ କିଦେଙ୍ଗ୍ ଆଡ୍ନାସ୍। ପୁନି ଜିବୁନ୍ନି ବ୍ଯବହାର୍ 17 ଲାଗିଙ୍ଗ୍ ଆନେଙ୍ଗ୍ ମାପୃ ଆଦିକାର୍ତାକେ ବିଷେସ୍କିଜି ଗୁୱାରି କିନାଙ୍ଗା, ପାର୍ତିକିୱାକାର୍ ଇନେସ୍ ଜାର୍-ଜାର୍ ଚିନ୍ତାତାକେ ଲାବ୍ ଆୱି ଜିବୁନ୍ତିଙ୍ଗ୍ କାଟିକିନାର୍, ଏପେଙ୍ଗ୍ ହେଲେକେ ଜିବୁନ୍ କାଟି କିମାଟ୍। 18 ଇନେସ୍କି ହେୱାର୍ ସତ୍ ବିଷୟରେ ବୁଜା ଆଦେଙ୍ଗ୍ ଆଡୁର୍। ହେୱାର୍ ଈଶ୍ୱର ବିଷୟରେ କିଚି ପୁନ୍ୱାଦାଙ୍ଗ୍ ମାନ୍ଗାନାର୍ ଆରେ ତା ବେଣ୍ ୱେଞ୍ଜେଙ୍ଗ୍ ଇଚା କିଉର୍, ଲାଗିଙ୍ଗ୍ ହେୱାର୍ ଈଶ୍ୱର ହିଦ୍ନି ଜିବୁନ୍ତାଙ୍ଗ୍ ଦେହା ମାନାର୍। 19 ହେୱାର୍ ଲାଜା ଆନାକା ବାବି କିଉର୍, ଆରେ ହେୱାର୍ କରାପ୍ କାମାୟ୍ କିନି କାଜିଙ୍ଗ୍ ପୁରା ମାନ୍ ହିତାର୍ନା। ହେୱାର୍ ଆଦିକ୍ତାଙ୍ଗ୍ ଆଦିକ୍ ୱିଜୁ ପର୍କାର୍ କରାପ୍ କାମାୟ୍ କିଦେଙ୍ଗ୍ ଇଚା କିନାର୍। 20 ମାତର୍ ଏପେଙ୍ଗ୍ ଖ୍ରୀଷ୍ଟ ବିଷୟରେ ହିକାଆନିହିଙ୍ଗ୍ ହେଲେକେ ଜିବୁନ୍ କାଟିକିନି କାଜିଙ୍ଗ୍ ହିକା ଆୱାତାଦେର୍ନା। 21 ଲାଗିଙ୍ଗ୍ ଆନେଙ୍ଗ୍ ପାର୍ତି କିନାଙ୍ଗା ଯେ ଏପେଙ୍ଗ୍ ଯୀଶୁ ଖ୍ରୀଷ୍ଟ ବିଷୟରେ ହିକାଆନିହିଙ୍ଗ୍, ଏପେଙ୍ଗ୍ ହେୱାନ୍ତାଙ୍ଗ୍ ସତ୍ ହିକ୍ଷା ହିକା ଆତାଦେର୍ନା। 22 ଏପେଙ୍ଗ୍ ପାୟା ଆତାଦେର୍ନା ଯେ ଆଗେ ଇନେସ୍ ଏପେଙ୍ଗ୍ ଜିବୁନ୍ କାଟିକିଜି ମାଚାଦେର୍ ହେଦାଙ୍ଗ୍ ୱିଜୁ ବନ୍ଦ୍ କିଦେଙ୍ଗ୍ ଆରେ ମି ପାପ୍ କାମାୟ୍ନି ବ୍ଯବାହାର୍ତିଙ୍ଗ୍ ପିସ୍ତେଙ୍ଗ୍। ଇନେସ୍କି ମି କରାପ୍ ଇଚା ମିଙ୍ଗେଙ୍ଗ୍ ଟକାଇ କିତ୍ତାତ୍ନା ଆରେ ମି ଜିବୁନ୍ତିଙ୍ଗ୍ ନଷ୍ଟ କିତାତ୍ନା। 23 ନଙ୍ଗୟ୍ ପବିତ୍ର ଆତ୍ମା ମି ଚିନ୍ତା ଆରେ ବାବ୍ନାତିଙ୍ଗ୍ ପୁନାକା କିଦେତ୍। 24 ଈଶ୍ୱର ମିଙ୍ଗେଙ୍ଗ୍ ତା ବ୍ଯବହାର୍ ଲେକେ ପୁନି ବ୍ଯବହାର୍ ହିତ୍ତାନ୍ନା। ଲାଗିଙ୍ଗ୍ ସତ୍ରେ ଦରମ୍ ଆରେ ପବିତ୍ର ଆଜି ପୁନି ବ୍ଯବହାର୍ତାଙ୍ଗ୍ ଜିବୁନ୍ କାଟିକିୟାଟ୍। 25 ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମିଚ୍ ୱେଚ୍ନାକା ପିହାଟ୍, ଆରେ ପାର୍ତିକିନାରିଙ୍ଗ୍ ସତ୍ ୱେଚାଟ୍। ଇନେସ୍କି ଆସେଙ୍ଗ୍ ୱିଜାକାସ୍ ର ଗାଗାଡ଼୍ନି ଜିନିଷ୍। 26 ଏପେଙ୍ଗ୍ ରିସାଆଜି ଇନା ପାପ୍ କାମାୟ୍ କିମାଟ୍, ୱେଡ଼ା ହାଲ୍ୱାଦାଙ୍ଗ୍ ନେ ରିସାତିଙ୍ଗ୍ ପିହାଟ୍। 27 ମିଙ୍ଗେଙ୍ଗ୍ ଟକାଇ କିଦ୍ଦେଙ୍ଗ୍ ଶୟତାନ୍ତିଙ୍ଗ୍ ବାହା ହିମାଟ୍। 28 ଚର୍ କାମାୟ୍ କିନାକାନ୍ ଆରେ ଚର୍ କାମାୟ୍ କିମେନ୍, ମାତର୍ ହେୱାନ୍ ନିଜେ କେଇଦାଙ୍ଗ୍ କାମାୟ୍ କିୟେନ୍। ଲାଗିଙ୍ଗ୍ ହେୱାନ୍ ଅବାବ୍ ମାନି ମାନାୟାରିଙ୍ଗ୍ ସାଇଜ କିଦେଙ୍ଗ୍ ଆଡ୍ନାନ୍। 29 ମି ୱେଇଦାଙ୍ଗ୍ ଇମ୍ଣି ପର୍କାର୍ କରାପ୍ କାତା ୱେଚ୍ମାଟ୍। ମାତର୍ ମି ବେଣ୍ ୱେନି ମାନାୟାର୍ ଇନେସ୍ ସାହାସ୍ ପାୟାଆନାର୍, ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଇନାକା ପା ୱେଚାଟ୍ ହାର୍ ଆରେ ସାଇଜନି କାତା ୱେଚାଟ୍। 30 ଈଶ୍ୱର ମିଙ୍ଗେଙ୍ଗ୍ ସିଲ୍ କିତ୍ତାନ୍ନା। ଇ ସିଲ୍ ଆନାତା ପବିତ୍ର ଆତ୍ମା ଇନାକା ହେୱାନ୍ ହିଦ୍ଦେଙ୍ଗ୍ ପାର୍ମାଣ୍ କିତାନ୍ନା। ଇ ପବିତ୍ର ଆତ୍ମା ର ଡିପଜିଟ୍ ଲେକେ ଗେରେଷ୍ଟି ହିଦ୍ନାତ୍ ଯେ ଈଶ୍ୱର ମାଙ୍ଗେଙ୍ଗ୍ ତା ଜାର୍ ମାନାୟ୍ କିଦେଙ୍ଗ୍ ମୁକ୍ତି କିତ୍ତାନ୍ନା, ଲାଗିଙ୍ଗ୍ ହେୱାନିଙ୍ଗ୍ ଦୁକ୍ ହିମାଟ୍। 31 ଜେକନିକାରିଙ୍ଗ୍ ବାନ୍ୟା ଆନାକା, ରିସା ଆରେ ଜଗ୍ଡ଼ା କିନାକା ବନ୍ଦ୍ କିୟାଟ୍। ହେୱାରିଙ୍ଗ୍ ନିନ୍ଦା କିମାଟ୍ ଆରେ ଇନେରିଙ୍ଗ୍ ଗିଣ୍ କିମାଟ୍। 32 ଆରେ ଏପେଙ୍ଗ୍ ଜାର୍-ଜାର୍ତିଙ୍ଗ୍ ସାଇଜ କିୟାଟ୍ ଆରେ ଦୟା ଚଚାଟ୍। ଆରେ ଖ୍ରୀଷ୍ଟତାକେ ରବେ ଆତି କାଜିଙ୍ଗ୍ ଈଶ୍ୱର ମିଙ୍ଗେଙ୍ଗ୍ ଇନେସ୍ କେମା କିତ୍ତାନ୍ନା, ହେଲେକେ ଜାର୍-ଜାର୍ତିଙ୍ଗ୍ କେମା କିୟାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation