ଏପିସିୟ 3 - New Testament in Pengo Parja Languageଈଶ୍ୱର ତା ଡ଼ୁକ୍ତି ଜଜ୍ନାତିଙ୍ଗ୍ ଚଚ୍ଚାନ୍ 1 ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ପାଉଲ ମି କାଜିଙ୍ଗ୍ ପାର୍ତାନା କିନାଙ୍ଗା। ଏପେଙ୍ଗ୍ ବିନ୍ଜାତିର୍ତାକେ ଯୀଶୁ ଖ୍ରୀଷ୍ଟ କାମାୟ୍ କିଜି ହାର୍ଦିକାବୁର୍ ଶୁଣାୟ୍ କିନି କାଜିଙ୍ଗ୍, ଆନେଙ୍ଗ୍ ନଙ୍ଗୟ୍ ଜଇଲ୍ ଇଞ୍ଜ ବନ୍ଦି ଆତାଙ୍ଗ୍ନା। 2 ମିଙ୍ଗେଙ୍ଗ୍ ସାଇଜ କିଦେଙ୍ଗ୍ ଈଶ୍ୱର ତା ଦୟାତାଙ୍ଗ୍ ନାଙ୍ଗେଙ୍ଗ୍ ଦାୟିତ୍ପ ହିତ୍ତାନ୍ନା, ଇଦାଙ୍ଗ୍ ଏପେଙ୍ଗ୍ ତ ୱେନ୍ଞ୍ଜି ମାନ୍ଗାନାଦେର୍। 3 ଈଶ୍ୱର ନାଙ୍ଗେଙ୍ଗ୍ ତା ଡ଼ୁକ୍ତି ଜଜ୍ନା ୱେଚ୍ଚାତାନ୍ନା, ଇମ୍ଣି ବିଷୟରେ ଆନେଙ୍ଗ୍ ମିଙ୍ଗେଙ୍ଗ୍ ଆଗେତାଙ୍ଗ୍ ଅଲପ୍ ଲେକିକିତାଙ୍ଗ୍ନା। 4 ହେଦାଙ୍ଗ୍ ଏପେଙ୍ଗ୍ ପଡ଼ିକିତିସ୍ ପୁଞ୍ଜେଙ୍ଗ୍ ଆଡ୍ନାଦେର୍ ଯେ ଆନେଙ୍ଗ୍ ଇନେସ୍ ଖ୍ରୀଷ୍ଟତି ଡ଼ୁକ୍ତି ବିଷୟରେ ପୁଞ୍ଜେଙ୍ଗ୍ ଆଡ଼୍ତାଙ୍ଗ୍ନା। 5 ଈଶ୍ୱର ଇ ଡ଼ୁକ୍ତି ଜଜ୍ନାତିଙ୍ଗ୍ ଆଗେ ପୁର୍ବେନି ମାନାୟାରିଙ୍ଗ୍ ୱେଚ୍ୱାଦାଙ୍ଗ୍ ମାଚାନ୍। ମାତର୍ ନଙ୍ଗୟ୍ ହେୱାନ୍ ପବିତ୍ର ଆତ୍ମାତାଙ୍ଗ୍ ତା ପବିତ୍ର ବାଚିକିତି ଚେଲା ଆରେ ଭବିଷ୍ଯତବକ୍ତାର୍ ଲାଗାୟ୍ ୱେଚ୍ଚାନ୍ନା। 6 ଈଶ୍ୱର ଡ଼ୁକ୍ତି ଜଜ୍ନା ଇଦାଙ୍ଗ୍ ଯେ, ହାର୍ଦିକାବୁର୍ କାଜିଙ୍ଗ୍ ଯୀଶୁ ଖ୍ରୀଷ୍ଟତାକେ ଆପେଙ୍ଗ୍ ରବେ ଆତି କାଜିଙ୍ଗ୍ ବିନ୍ଜାତିର୍ ପା ଯିହୁଦିର୍ ଲେକେ ହାମାନ୍ ଆଦିକାର୍ ପାୟାଆତାର୍ନା। ହେୱାର୍ ର ଗାଗାଡ଼୍, ଆରେ ଈଶ୍ୱର ପାର୍ମାଣ୍ତାକେ ମାହା ଆତାର୍ନା। 7 ଈଶ୍ୱର ଗାଜା ଶାକ୍ତି ଆରେ ଦୟାନି ଦାନ୍ କାଜିଙ୍ଗ୍, ହାର୍ଦିକାବୁର୍ ଶୁଣାୟ୍ କିଜି ହେୱାନିଙ୍ଗ୍ ହେବା କିଦେଙ୍ଗ୍ ଆନେଙ୍ଗ୍ ସୁଯଗ୍ ପାୟାଆତାଙ୍ଗ୍। 8 ଈଶ୍ୱର ୱିଜୁ ମାନାୟାର୍ ବିତ୍ରେ ଆନେଙ୍ଗ୍ ରକାଙ୍ଗ୍ ହିରୁକାଙ୍ଗ୍। ମାତର୍ ବିନ୍ଜାତିନି ମାନାୟାରିଙ୍ଗ୍ ଖ୍ରୀଷ୍ଟତାକେ ମାନି ୱିଜ୍ୱି ହେବାକିନି ବାବ୍ନାତାଙ୍ଗ୍ ଆଦିକ୍ ଆଶ୍ରିବାଦ୍ନି ହାର୍ଦିକାବୁର୍ ଆନେଙ୍ଗ୍ ୱେଚ୍ଚେଙ୍ଗ୍ ଆଡ୍ନାଙ୍ଗ୍। 9 ୱିଜୁ ବିଷୟତିଙ୍ଗ୍ ରସ୍ତାକାନ୍ ଈଶ୍ୱର ମାବେତାଙ୍ଗ୍ ଇନାକା ଡ଼ୁକ୍ଚି ଇଡ଼୍ଜି ମାଚାନ୍। ହେ ଡ଼ୁକ୍ତି ଜଜ୍ନାତିଙ୍ଗ୍ ଆନେଙ୍ଗ୍ ଇନେସ୍ ୱିଜାକାରିଙ୍ଗ୍ ବୁଜାଇକିଜି ୱେଚ୍ଚେଙ୍ଗ୍ ଆଡ୍ନାଙ୍ଗ୍, ଇଦାଙ୍ଗ୍ କାଜିଙ୍ଗ୍ ଈଶ୍ୱର ନାଙ୍ଗେଙ୍ଗ୍ ଦୟାକିଜି ଇ ସୁଯଗ୍ ହିତ୍ତାନ୍ନା। 10 ଇମ୍ଣି ୱିଜୁ ଦୁତ୍କୁ ଚଞ୍ଜିଆୱି ପୁର୍ତିତାକେ ଆଦିକାର୍ ହୁଦାଙ୍ଗ୍ ସାସନ୍ କିନିକ୍, ହେୱେକ୍ ଲାଗାୟ୍ ଈଶ୍ୱର ତା ୱିଜୁ ପର୍କାର୍ ବୁଦିତିଙ୍ଗ୍ ୱେଚ୍ଚେଙ୍ଗ୍ ମଣ୍ଡ୍ଲିତିଙ୍ଗ୍ ନଙ୍ଗୟ୍ ବ୍ଯବହାର୍ କିନି କାଜିଙ୍ଗ୍ ଜଜ୍ନା କିତାନ୍ନା। 11 ପୁର୍ତିତିଙ୍ଗ୍ ରହ୍ୱି ଆଗେ ଈଶ୍ୱର ଇ ଜଜ୍ନା କିଜି ମାଚାନ୍, ଆରେ ମା ମାପୃ ଯୀଶୁ ଖ୍ରୀଷ୍ଟତାଙ୍ଗ୍ ଇଦାଙ୍ଗ୍ ହେୱାନ୍ ରସ୍ତାନ୍ନା। 12 ଖ୍ରୀଷ୍ଟ କାଜିଙ୍ଗ୍ ଆରେ ଆସେଙ୍ଗ୍ ହେୱାନ୍ତାକେ ପାର୍ତିକିନି କାଜିଙ୍ଗ୍, ନଙ୍ଗୟ୍ ଆସେଙ୍ଗ୍ ପାଣ୍ଡ୍ରା ଆୱାଦାଙ୍ଗ୍ ସାହାସ୍ ହୁଦାଙ୍ଗ୍ ଈଶ୍ୱର ଲାଗାୟ୍ ହାଞ୍ଜେଙ୍ଗ୍ ଆଡ୍ନାସ୍। 13 ଲାଗିଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା ଯେ, ଆନେଙ୍ଗ୍ ଇମ୍ଣି ଦୁକ୍କଷ୍ଟ ପାୟାଆନାଙ୍ଗା, ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମନ୍ଦୁକ୍ କିମାଟ୍। ମାତର୍ ଇଦାଙ୍ଗ୍ ମିଙ୍ଗେଙ୍ଗ୍ ଲାବ୍ନି ବିଷୟ। ପାଉଲ ଆରେରଗ ଏପିସିୟ ସହର୍ନି ପାର୍ତି କିନାକାର୍ କାଜିଙ୍ଗ୍ ପାର୍ତାନା କିତାନ୍ନା 14-15 ଇଦାଙ୍ଗ୍ କାଜିଙ୍ଗ୍ ସରଗ୍ ଆରେ ପୁର୍ତିତାକେ ମାନି ୱିଜୁ ପାର୍ତିକିନି ପରିବାର୍ନି ଆବା, ଈଶ୍ୱର ଲାଗାୟ୍ ଆନେଙ୍ଗ୍ ମେଣ୍ଡାକୁନ୍ଦିକିଜି ପାର୍ତାନା କିନାଙ୍ଗା। 16 ଆନେଙ୍ଗ୍ ଇଦାଙ୍ଗ୍ ପାର୍ତାନା କିନାଙ୍ଗା ଯେ ତା ଗୌରବନି ଦନ୍ ତା ଆତ୍ମାତାଙ୍ଗ୍ ମି ଆତ୍ମା ଶାକ୍ତି ଆୟେତ୍। 17 ଆରେ ଏପେଙ୍ଗ୍ ହେୱାନ୍ତାକେ ପାର୍ତିକିନି କାଜିଙ୍ଗ୍ ଖ୍ରୀଷ୍ଟ ମି ଗରବ୍ ବିତ୍ରେ ବାହା କିଦେନ୍। 18 ଆରେ ଏପେଙ୍ଗ୍ ତାରେନ୍ ଆର୍ୱାଦାଙ୍ଗ୍ ଇନେସ୍ ବାଡ଼୍କାସ୍ ମାନାଦେର୍, ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଈଶ୍ୱରତିଙ୍ଗ୍ ଜାର୍-ଜାର୍ ଲାଡ୍ କିୟାଟ୍। ଖ୍ରୀଷ୍ଟତି ଲାଡ୍ ଯେ ଏଚେକ୍ ଗାଜା ଆରେ ବାବ୍ନାତାଙ୍ଗ୍ ଆଦିକ୍, ହେ ଲାଡ୍ ଇନେସ୍ ଏପେଙ୍ଗ୍ ଈଶ୍ୱର ମାନାୟାର୍ ହୁଦାଙ୍ଗ୍ ବୁଜା ଆଦେଙ୍ଗ୍ ଆଡ୍ନାଦେର୍। 19 ଆରେ ଈଶ୍ୱର ତା ୱିଜୁ ଗୁଣ୍ତାକେ ମିଙ୍ଗେଙ୍ଗ୍ ପୁରା କିଦ୍ନାନ୍। 20 ଇମ୍ଣି ଈଶ୍ୱର ମା ଗରବ୍ ବିତ୍ରେ କାମାୟ୍ କିନି ଶାକ୍ତିତାଙ୍ଗ୍ ମା ଏନ୍ନାକା କି ବାବି କିନାକା ଆଦିକ୍ତାଙ୍ଗ୍ ଆଦିକ୍ ହିଦ୍ନାନ୍। 21 ଯୁଗ୍ ଯୁଗ୍ତ ଆକଦାଦିର୍ତାକେ ମଣ୍ଡ୍ଲି ଆରେ ଯୀଶୁ ଖ୍ରୀଷ୍ଟତାଙ୍ଗ୍ ହେୱାନିଙ୍ଗ୍ ଗୌରବ ଆୟେତ୍। ଆମେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation