ଏପିସିୟ 2 - New Testament in Pengo Parja Languageଖ୍ରୀଷ୍ଟତାକେ ଜିବୁନ୍ ଆତାସ୍ନା 1 ଏପେଙ୍ଗ୍ ଖ୍ରୀଷ୍ଟତାକେ ପାର୍ତିକିୱି ଆଗେ, ଏପେଙ୍ଗ୍ ଈଶ୍ୱର ଆଦେସ୍ତିଙ୍ଗ୍ ମାନିକିୱାଦାଙ୍ଗ୍ ଆରେ ପାପ୍ କାମାୟ୍ କିଜି ହାଃତି ମାନାୟ୍ ଲେକେ ଆଜି ମାଚାଦେର୍। 2 ଇନେସ୍କି ହେପାଦ୍ନା ଏପେଙ୍ଗ୍ ଇ ପୁର୍ତିନି ମାନାୟାର୍ ହାଜ୍ଦିଙ୍ଗ୍ ତାଙ୍ଗ୍ଜି ମାଚାଦେର୍, ଆରେ ବାଦାଡ଼୍ନି କରାପ୍ ଆତ୍ମା କି ବୁତ୍ ଆତ୍ମାନି ନେତାନି ଆଦିକାର୍ ଶୟତାନନି କାତା ମାନିକିଜି ମାଚାଦେର୍। ଇ ଶୟତାନ ନଙ୍ଗୟ୍ ଈଶ୍ୱରତିଙ୍ଗ୍ ମାନିକିୱି ମାନାୟାରିଙ୍ଗ୍ କଣ୍ଟ୍ରୁଲ୍ କିଦ୍ନାତା। 3 ଆସେଙ୍ଗ୍ ପା ହେୱାର୍ ଲେକେ ଆଗେ ଜିବୁନ୍ କାଟିକିଜି ମାଚାପ୍। ଆପେଙ୍ଗ୍ ପାପ୍ ଗାଗାଡ଼୍ନି ଇଚାତାଙ୍ଗ୍ ଜିବୁନ୍ କାଟିକିଜି ମାନ୍ନି ୱିଜୁ ଇଚାତାଙ୍ଗ୍ ପୁରା କିଜି ମାଚାପ୍। ଆରେ ହେ ଆଦେସ୍ ମାନିକିୱି ହିମ୍ଣାର୍ ହୁଦାଙ୍ଗ୍ ଆପେଙ୍ଗ୍ ୱିଜାକାପ୍ ପା ରଞ୍ଜେମାଡ୍ ମା ଗାଗାଡ଼୍ନି ଇଚାତାଙ୍ଗ୍ ଜିବୁନ୍ କାଟିକିଜି ଗାଗାଡ଼୍ନି ଆରେ ମାନ୍ନି ଇଚା ପୁରା କିଜି ମାଚାପ୍। ଲାଗିଙ୍ଗ୍ ଜେକନିକାର୍ ଲେକେ ଆପେଙ୍ଗ୍ ପା ଈଶ୍ୱର ଦଣ୍ଡ୍ ପାୟାଆନି ଯଗ୍ଯ ଆଜି ମାଚାପ୍। 4 ମାତର୍ ଈଶ୍ୱର ମାଙ୍ଗେଙ୍ଗ୍ ବେସି ଲାଡ୍ କିଦ୍ନି କାଜିଙ୍ଗ୍ ଆରେ ହେୱାନ୍ ବେସି ଦୟା ଆତି କାଜିଙ୍ଗ୍, 5 ଆସେଙ୍ଗ୍ ପାପ୍ କାମାୟ୍ କିଜି ହାଃତି ମାନାୟ୍ ଲେକେ ଆତିସ୍ପା। ଈଶ୍ୱର ଖ୍ରୀଷ୍ଟତିଙ୍ଗ୍ ହାଃତିତାଙ୍ଗ୍ ଜିବୁନ୍ କିଜି ନିକ୍ତି କାଜିଙ୍ଗ୍ ମାଙ୍ଗେଙ୍ଗ୍ ହେୱାନ୍ ଜିବୁନ୍ ହିତ୍ତାନ୍ନା। ଲାଗିଙ୍ଗ୍ ଈଶ୍ୱର ଦୟାତାଙ୍ଗ୍ ଏପେଙ୍ଗ୍ ରକ୍ଷା ପାୟା ଆତାଦେର୍ନା। 6 ଆସେଙ୍ଗ୍ ଯୀଶୁ ଖ୍ରୀଷ୍ଟତାକେ ରବେ ଆତି କାଜିଙ୍ଗ୍, ଈଶ୍ୱର ମାଙ୍ଗେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ହାଃତିତାଙ୍ଗ୍ ନିକ୍ତାତାନ୍ନା ଆରେ ମାଙ୍ଗେଙ୍ଗ୍ ତା ହୁଦାଙ୍ଗ୍ ସରଗ୍ଜପି କୁଚିକିତ୍ତାନ୍ନା। 7 ତା ଦୟା ଯେ କେତେକ୍ ଗାଜା, ହେଦାଙ୍ଗ୍ ଜେକନିକାର୍ତାକେ ଆଗେ ୱାନି ଦିନ୍ତ ପୁନିକିଦେଙ୍ଗ୍ ଈଶ୍ୱର ଇଦାଙ୍ଗ୍ କିତାନ୍ନା। ଆରେ ଯୀଶୁ ଖ୍ରୀଷ୍ଟ ଇନାକା ମା କାଜିଙ୍ଗ୍ କିତାନ୍ନା, ହେଦାଙ୍ଗ୍ କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ଦୟା କିତ୍ତାନ୍ନା। 8 ଲାଗିଙ୍ଗ୍ ପାର୍ତିକିନି କାଜିଙ୍ଗ୍ ଈଶ୍ୱର ତା ଦୟାତାଙ୍ଗ୍ ମିଙ୍ଗେଙ୍ଗ୍ ଉଦାର୍ କିତ୍ତାନ୍ନା। ଏପେଙ୍ଗ୍ ନିଜେ ଜାର୍ତିଙ୍ଗ୍ ରକ୍ଷା କିମାଟ୍, ମାତର୍ ଇଦାଙ୍ଗ୍ ଈଶ୍ୱର ଦାନ୍ କିତ୍ତାକା। 9 ଏପେଙ୍ଗ୍ ଇମ୍ଣି ହାର୍ଦି କାମାୟ୍ କିତି କାଜିଙ୍ଗ୍ ଉଦାର୍ ପାୟାଆୱାତାସ୍ନା, ଲାଗିଙ୍ଗ୍ ଏପେଙ୍ଗ୍ ଜାର୍ତିଙ୍ଗ୍ ବାଟ୍ପାଣ୍ ଆମାଟ୍। 10 ଇନେସ୍କି ଆସେଙ୍ଗ୍ ନଙ୍ଗୟ୍ ଇନେସାତାସ୍ନା ଇଦାଙ୍ଗ୍ ଈଶ୍ୱର ରସ୍ତାତାନ୍ନା। ହାର୍ଦି କାମାୟ୍ କିନି କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ଯୀଶୁ ଖ୍ରୀଷ୍ଟତାକେ ପୁନି ମାନାୟ୍ ଲେକେ ରସ୍ତାତାନ୍ନା। ଆରେ ଇ ଲେକେ ଜିବୁନ୍ କାଟିକିନି କାଜିଙ୍ଗ୍ ଈଶ୍ୱର ଆଗେତାଙ୍ଗ୍ ନେ ମା କାଜିଙ୍ଗ୍ ଜଜ୍ନା କିଜି ମାଚାନ୍। ଖ୍ରୀଷ୍ଟତାକେ ରବେ ଆତାସ୍ନା 11 ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମାନେ କିୟାଟ୍ ଯେ ଏପେଙ୍ଗ୍ ଜନମ୍ତାଙ୍ଗ୍ ନେ ବିନ୍ଜାତି କାଦେର୍। ଲାଗିଙ୍ଗ୍ ଯିହୁଦି ମାନାୟାର୍ ମିଙ୍ଗେଙ୍ଗ୍ ଅପ୍ମାନ୍ କିଜି ସୁନତ ବିଦିତିଙ୍ଗ୍ ମାନିକିୱି ମାନାୟ୍ ଇଞ୍ଜି ୱେଚ୍ଚି ମାଞ୍ଚାର୍, ଆରେ ହେୱାର୍ ଜାର୍ତିଙ୍ଗ୍ ଈଶ୍ୱରନି ମାନାୟ୍ ଇଞ୍ଜି ବାବିକିଜି ମାଚାର୍। ସୁନତ ବିଦି ଆପ୍କା ଗାଗାଡ଼୍ ହୁଦାଙ୍ଗ୍ ନେ ମାହାଆଜି ମାଚାତ୍, ମାନ୍ ହୁଦାଙ୍ଗ୍ ଇନାକା ହିଲାତାତ୍। 12 ହେପାଦ୍ନା ଏପେଙ୍ଗ୍ ଖ୍ରୀଷ୍ଟତାଙ୍ଗ୍ ଜେକ ମାଚାଦେର୍। ଈଶ୍ୱର ବାଚିକିଜି ମାଚି ଇସ୍ରାଏଲନି ମାନାୟାର୍ ବିତ୍ରେ ଏପେଙ୍ଗ୍ ହିଲ୍ୱାତାଦେର୍ ଆରେ ଈଶ୍ୱର ହେୱାରିଙ୍ଗ୍ ପାର୍ମାଣ୍ କିଜିମାଚି ନିୟମ୍ନି ବାଗ୍ ଆୱାଦାଙ୍ଗ୍ ମାଚାଦେର୍। ଏପେଙ୍ଗ୍ ଈଶ୍ୱରତିଙ୍ଗ୍ ପୁନ୍ୱାଦାଙ୍ଗ୍ ମାଚାଦେର୍ ଆରେ ୱିଜ୍ୱି ଜିବୁନ୍ନି ଆହା ଇଟ୍ୱାଦାଙ୍ଗ୍ ଇ ପୁର୍ତିତାକେ ଜିବୁନ୍ କାଟିକିଜି ମାଚାଦେର୍। 13 ଏପେଙ୍ଗ୍ ଆଗେ ଈଶ୍ୱରତାଙ୍ଗ୍ ଦେହା ମାଚାଦେର୍, ମାତର୍ ନଙ୍ଗୟ୍ ଏପେଙ୍ଗ୍ ଯୀଶୁ ଖ୍ରୀଷ୍ଟତାକେ ରବେ ଆତାଦେର୍ନା। ଯୀଶୁ ନେତେର୍ତାଙ୍ଗ୍ ଈଶ୍ୱର ମିଙ୍ଗେଙ୍ଗ୍ ତା ଲାଗାୟ୍ ଅତ୍ତାନ୍ନା। 14 ଇନେସ୍କି ଖ୍ରୀଷ୍ଟ ନିଜେ ମା ବିତ୍ରେ ଶାନ୍ତି ତାତାନ୍ନା। ହେୱାନ୍ ଯିହୁଦି ଆରେ ବିନ୍ଜାତିନି ମାନାୟାର୍ ବିତ୍ରେ ମାନି ଶତ୍ରୁତିଙ୍ଗ୍ ବାଙ୍ଗାଇ କିତାନ୍ନା ଆରେ ରି ଜାତିତିଙ୍ଗ୍ ଏକ୍ କିତାନ୍ନା। 15 ଇନେସ୍ ହେୱାନ୍ ଯିହୁଦି ଆରେ ବିନ୍ଜାତିନି ମାନାୟାର୍ ବିତ୍ରେ ଶାନ୍ତି ତାତେଙ୍ଗ୍ ଆଡ୍ନାର୍ ଆରେ ହେୱାନ୍ତାକେ ହେୱାରିଙ୍ଗ୍ ର ପୁନି ଜାତି କିଦେଙ୍ଗ୍ ଆଡ୍ନାନ୍। ଇଦାଙ୍ଗ୍ କାଜିଙ୍ଗ୍ ହେୱାନ୍ ତା ହାଃତି କାଜିଙ୍ଗ୍, ଯିହୁଦିର୍ ୱିଜୁ ନିତି ନିୟମ୍ତିଙ୍ଗ୍ ବନ୍ଦ୍ କିତାନ୍ନା। 16 ଆରେ ଖ୍ରୀଷ୍ଟ ତା କୃଶକାଟ୍ତାକେ ହାଃତି କାଜିଙ୍ଗ୍ ରି ଜାତିତିଙ୍ଗ୍ ଏକ୍ କିତାନ୍ନା ଆରେ ଈଶ୍ୱରତାକେ ମାହାଇ କିତ୍ତାନ୍ନା। ଇଲେକେ ହେୱାନ୍ ଯିହୁଦି ଆରେ ବିନ୍ଜାତିନି ମାନାୟାର୍ ବିତ୍ରେ ମାନି ଶତ୍ରୁତିଙ୍ଗ୍ ନଷ୍ଟ କିତାନ୍ନା। 17 ଈଶ୍ୱରତାଙ୍ଗ୍ ଦେହା ମାନି ହେ ବିନ୍ଜାତିନି ମାନାୟାର୍ ଆରେ ଈଶ୍ୱର ଲାଗାୟ୍ ମାନି ହେ ଯିହୁଦି ମାନାୟାର୍, ମି ରି ଜାତି ଲାଗାୟ୍ ଖ୍ରୀଷ୍ଟ ୱାଜି ଶାନ୍ତିନି ହାର୍ଦିକାବୁର୍ ଶୁଣାୟ୍ କିତାନ୍। 18 ଲାଗିଙ୍ଗ୍ ଖ୍ରୀଷ୍ଟ କାଜିଙ୍ଗ୍, ଆସେଙ୍ଗ୍ ତା ପବିତ୍ର ଆତ୍ମାତାଙ୍ଗ୍ ଆବା ଈଶ୍ୱର ଲାଗାୟ୍ ହାନି କାଜିଙ୍ଗ୍ ହାଜି ଗାଟା ଆତାପ୍ନା। 19 ଇଦାଙ୍ଗ୍ କାଜିଙ୍ଗ୍ ହେ ବିନ୍ଜାତିନି ମାନାୟାର୍, ଏପେଙ୍ଗ୍ ଆରେ ଇଦେସ୍ କି ବିନ୍ଦେସ୍ ଆକାୟ୍। ମାତର୍ ସାଦୁ ମାନାୟାର୍ ହୁଦାଙ୍ଗ୍ ମାହାଆଜି ର ବାହାତାକେ ବାହାକିନି ମାନାୟ୍ ଆରେ ଈଶ୍ୱରନି ପରିବାର୍। 20 ବାଚିକିତି ଚେଲା ଆରେ ଭବିଷ୍ଯତବକ୍ତା ପାଉଣ୍ଡେସେନ୍, ଆରେ ତା ଜପି ର ଇଲ୍ ରସ୍ତି ଲେକେ ଆସେଙ୍ଗ୍ ଆତାସ୍ନା। ଆରେ ଯୀଶୁ ଖ୍ରୀଷ୍ଟ ନିଜେ ହେ ଇଲ୍ କନାନି ମୁଡ଼୍ କାଲ୍। 21 ଆରେ ହେୱାନ୍ତାକେ ୱିଜୁ ଇଲ୍ତିଙ୍ଗ୍ ରବେ କିତାନ୍ନା ଆରେ ଈଶ୍ୱରତି ପବିତ୍ର ମନ୍ଦିର୍ ଲେକେ ଆନି କାଜିଙ୍ଗ୍ ହେୱାନ୍ ୱିଜାକାରିଙ୍ଗ୍ ମାହାଇ କିତ୍ତାନ୍ନା। 22 ଏ ବିନ୍ଜାତିନି ମାନାୟ୍ କାଦେର୍ ଏପେଙ୍ଗ୍ ଖ୍ରୀଷ୍ଟତାକେ ରବେ ଆତି କାଜିଙ୍ଗ୍, ଈଶ୍ୱରତି ପବିତ୍ର ଆତ୍ମା ବାହାକିନି ଇଲ୍ ଲେକେ ଏପେଙ୍ଗ୍ ଆତାଦେର୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation