ଏପିସିୟ 1 - New Testament in Pengo Parja Languageଜୱାର୍ 1 ଆନେଙ୍ଗ୍ ପାଉଲ ଈଶ୍ୱର ଇଚାତାଙ୍ଗ୍ ଯୀଶୁ ଖ୍ରୀଷ୍ଟନି ରକାଙ୍ଗ୍ ବାଚିକିତି ଚେଲା। ଏପିସ ସହର୍ତାକେ ମାନି ସାଦୁ ଆରେ ଖ୍ରୀଷ୍ଟତାକେ ପାର୍ତିକିନି ମାନାୟାର୍ ଲାଗାୟ୍ ଆନେଙ୍ଗ୍ ଇ ଚିଟି ଲେକିକିନାଙ୍ଗା। 2 ମା ଆବା ଈଶ୍ୱର ଆରେ ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା ଆରେ ଶାନ୍ତି ହିଦେନ୍। ଆତ୍ମିକ୍ ଆଶ୍ରିବାଦ୍ 3 ମା ମାପୃ ଯୀଶୁ ଖ୍ରୀଷ୍ଟନି ଈଶ୍ୱର ଆରେ ଆବାତିଙ୍ଗ୍ ଜୟ୍-ଜୟ୍ କିୟାଟ୍। ଖ୍ରୀଷ୍ଟତାକେ ଆସେଙ୍ଗ୍ ରବେଆଜି ମାଚିଲେ, ଈଶ୍ୱର ମାଙ୍ଗେଙ୍ଗ୍ ସରଗ୍ନି ୱିଜୁ ଆଶ୍ରିବାଦ୍ତାକେ ଆଶ୍ରିବାଦ୍ କିତ୍ତାନ୍ନା। 4 ଇଦାଙ୍ଗ୍ନି ଅର୍ତ ଇନେସ୍ ଆସେଙ୍ଗ୍ ଈଶ୍ୱର ମୁମ୍ଦ ପବିତ୍ର ଆରେ ଦସି ଆଉସ୍। ଇଦାଙ୍ଗ୍ କାଜିଙ୍ଗ୍ ହେୱାନ୍ ପୁର୍ତିତିଙ୍ଗ୍ ଉବ୍ଜାଇ କିୱି ଆଗେ, ଖ୍ରୀଷ୍ଟ କାଜିଙ୍ଗ୍ ମାଙ୍ଗେଙ୍ଗ୍ ବାଚି କିତ୍ତାନ୍ନା। 5 ଈଶ୍ୱର ମାଙ୍ଗେଙ୍ଗ୍ ଲାଡ୍ କିତ୍ତାନ୍। ଲାଗିଙ୍ଗ୍ ହେୱାନ୍ ଯୀଶୁ ଖ୍ରୀଷ୍ଟତାଙ୍ଗ୍ ମାଙ୍ଗେଙ୍ଗ୍ ତା ଜାର୍ ମାଜି କିନି କାଜିଙ୍ଗ୍ ଆଗେତାଙ୍ଗ୍ ନେ ଜଜ୍ନା କିଜି ମାଚାନ୍। ଇଦାଙ୍ଗ୍ ଈଶ୍ୱର ତା ଇଚା ଆରେ ୱାରିତାଙ୍ଗ୍ କିତାନ୍ନା। 6 ଲାଗିଙ୍ଗ୍ ତା ଇ ବେସି ଦୟା କାଜିଙ୍ଗ୍ ଆସେଙ୍ଗ୍ ହେୱାନିଙ୍ଗ୍ ଜୟ୍-ଜୟ୍ କିନାସ୍। ତା ଲାଡ୍ନି ମାଜି କିଜିମାଚି କାମାୟ୍ କାଜିଙ୍ଗ୍ ହେୱାନ୍ ଇ ବେସି ଦୟା ହିତ୍ତାନ୍ନା। 7 ଈଶ୍ୱର ବେସି ଦୟାତାଙ୍ଗ୍ ଆସେଙ୍ଗ୍ ହେ ଯୀଶୁ ଖ୍ରୀଷ୍ଟନି ନେତେର୍ କାଜିଙ୍ଗ୍ ମୁକ୍ତି ପାୟାଆତାସ୍, ଇଦାଙ୍ଗ୍ନି ଅର୍ତ ଈଶ୍ୱର ମା ପାପ୍ ୱିଜୁତିଙ୍ଗ୍ କେମା କିତ୍ତାନ୍ନା। 8 ୱିଜୁ ପର୍କାର୍ ଜ୍ଞାନ୍ ଆରେ ବୁଦି ହିଜି ଈଶ୍ୱର ମାଙ୍ଗେଙ୍ଗ୍ ବେସି ଦୟା ଚଚ୍ଚାତାନ୍ନା। 9 ଈଶ୍ୱର ତା ଇଚାତାଙ୍ଗ୍ ଆଗେତାଙ୍ଗ୍ କିଜିମାଚି ଡ଼ୁକ୍ତି ଜଜ୍ନା ମାବେ ଚଚ୍ଚାତାନ୍ନା। ଆରେ ହେ ଜଜ୍ନା ଖ୍ରୀଷ୍ଟତାଙ୍ଗ୍ କିନି କାଜିଙ୍ଗ୍ ହେୱାନ୍ ଇଚା କିଜି ମାଚାନ୍। 10 ଈଶ୍ୱର ଜଜ୍ନା କିତି ଟିକ୍ ସମୟ୍ ୱାତିସ୍, ସରଗ୍ତାକେ ଆରେ ପୁର୍ତିତାକେ ମାନି ୱିଜୁ ବିଷୟ ଖ୍ରୀଷ୍ଟ ତାରେନ୍ ଇଟ୍ନି କାଜିଙ୍ଗ୍ ଈଶ୍ୱର ଇଚା କିଜି ମାଚାନ୍। 11 ତା ଆଗେ କିତି ଜଜ୍ନାତାଙ୍ଗ୍ ଖ୍ରୀଷ୍ଟତାକେ ରବେ କିଦେଙ୍ଗ୍ ଈଶ୍ୱର ମାଙ୍ଗେଙ୍ଗ୍ ତା ମାନାୟ୍ କିଜି ବାଚି କିତ୍ତାନ୍ନା। ହେୱାନ୍ ତା ଇଚା ଆରେ ଜଜ୍ନାତାଙ୍ଗ୍ ୱିଜୁ ବିଷୟ ଟିକ୍ ବାବ୍ରେ ପୁରା କିନାନ୍। 12 ଆସେଙ୍ଗ୍ ଯିହୁଦିକାସ୍ ଆଗେ ଖ୍ରୀଷ୍ଟତାକେ ଆହା କିତାପ୍, ଇନେସ୍ ଆପେଙ୍ଗ୍ ଜୟ୍-ଜୟ୍ କିଜି ଈଶ୍ୱରତିଙ୍ଗ୍ ଗୌରବ କିନାସ୍। 13 ଏପେଙ୍ଗ୍ ପା ସତ୍ କାତା, କି ଉଦାର୍ କିଦ୍ନି ହାର୍ଦିକାବୁର୍ ୱେନ୍ଞ୍ଜି ପାର୍ତିକିନି କାଜିଙ୍ଗ୍ ଖ୍ରୀଷ୍ଟତାକେ ରବେ ଆତାଦେର୍ନା। ଆରେ ଈଶ୍ୱର ମିଙ୍ଗେଙ୍ଗ୍ ସିଲ୍ କିତ୍ତାନ୍ନା, ଇ ସିଲ୍ ଆନାତା ପବିତ୍ର ଆତ୍ମା ଇନାକା ହେୱାନ୍ ହିଦ୍ନି କାଜିଙ୍ଗ୍ ପାର୍ମାଣ୍ କିଜି ମାଚାନ୍। 14 ଇ ପବିତ୍ର ଆତ୍ମା ରଞ୍ଜାଙ୍ଗ୍ ଡିପଜିଟ୍ ଲେକେ ଗେରେଣ୍ଟି ହିଦ୍ନାତ୍ ଯେ ଈଶ୍ୱର ମାଙ୍ଗେଙ୍ଗ୍ ତା ଜାର୍ ମାନାୟ୍ କିଦ୍ନି କାଜିଙ୍ଗ୍ ମୁକ୍ତି କିତ୍ତାନ୍ନା ଆରେ ହେୱାନ୍ କିଜିମାଚି ପାର୍ମାଣ୍ନି ଆଦିକାର୍ ମାଙ୍ଗେଙ୍ଗ୍ ହିଦ୍ନାନ୍। ଲାଗିଙ୍ଗ୍ ଆସେଙ୍ଗ୍ ଜୟ୍-ଜୟ୍ କିଜି ଈଶ୍ୱରତିଙ୍ଗ୍ ଗୌରବ କିନାସ୍। ପାଉଲ ପାର୍ତି କିନାକାର୍ କାଜିଙ୍ଗ୍ ପାର୍ତାନା କିତାନ୍ 15 ଇ ୱିଜୁ କାଜିଙ୍ଗ୍ ଆରେ ଏପେଙ୍ଗ୍ ମାପୃ ଯୀଶୁ ଖ୍ରୀଷ୍ଟତାକେ ପାର୍ତିକିନି ବିଷୟ ଆରେ ଏପେଙ୍ଗ୍ ୱିଜୁ ସାଦୁ ମାନାୟାରିଙ୍ଗ୍ ଲାଡ୍କିନି ବିଷୟ ୱେଚି ଦିନ୍ତାଙ୍ଗ୍, 16 ଆନେଙ୍ଗ୍ ଈଶ୍ୱରତିଙ୍ଗ୍ ୱିଜୁଦିନ୍ ମି କାଜିଙ୍ଗ୍ ଦନ୍ଯବାଦ୍ ହିନାଙ୍ଗା। ଆନେଙ୍ଗ୍ ପାର୍ତାନା କିନିହିଙ୍ଗ୍ ମିଙ୍ଗେଙ୍ଗ୍ ମାନ୍ତ ଏତୁକିଜି ପାର୍ତାନା କିନାଙ୍ଗା। 17 ଆନେଙ୍ଗ୍ ଇଦାଙ୍ଗ୍ ପା ପାର୍ତାନା କିନାଙ୍ଗ୍ ଯେ ଈଶ୍ୱର ମା ମାପୃ ଯୀଶୁ ଖ୍ରୀଷ୍ଟନି ଗୌରବମାନି ଆବା ମିଙ୍ଗେଙ୍ଗ୍ ଜ୍ଞାନ୍ ଆରେ ବୁଦି ହିଦେନ୍, ଲାଗିଙ୍ଗ୍ ଏପେଙ୍ଗ୍ ହେୱାନିଙ୍ଗ୍ ହାର୍ଦାଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍। 18 ଈଶ୍ୱର ମିଙ୍ଗେଙ୍ଗ୍ ଇମ୍ଣି ଆହା କାଜିଙ୍ଗ୍ କୁକ୍ତାତାନ୍ନା, ଆରେ ଈଶ୍ୱର ସାଦୁ ମାନାୟାର୍ କାଜିଙ୍ଗ୍ କେତେକ୍ ଗାଜା ଆରେ ଗୌରବନି ଆଶ୍ରିବାଦ୍ ପାର୍ମାଣ୍ କିତ୍ତାନ୍ନା। ଇବିଷୟ ଏପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍ ହେଦାଙ୍ଗ୍ କାଜିଙ୍ଗ୍ ଈଶ୍ୱର ମି ଗରବ୍ତିଙ୍ଗ୍ ଜେତେନ୍ ଇଞ୍ଜି ଆନେଙ୍ଗ୍ ପାର୍ତାନା କିନାଙ୍ଗ୍। 19 ଆସେଙ୍ଗ୍ ଖ୍ରୀଷ୍ଟତାକେ ପାର୍ତିକିନି ମାନାୟାର୍ କାଜିଙ୍ଗ୍ ଈଶ୍ୱର ଇଡ଼୍ତି ଗାଜା ଆରେ ବେସି ଶାକ୍ତି ବିଷୟରେ ଏପେଙ୍ଗ୍ ପୁନାଟ୍ ଇଞ୍ଜି ଆନେଙ୍ଗ୍ ପାର୍ତାନା କିନାଙ୍ଗା। 20 ଇଦାଙ୍ଗ୍ ନେ ହେ ଗାଜା ଶାକ୍ତିତାଙ୍ଗ୍ ଈଶ୍ୱର ଖ୍ରୀଷ୍ଟଙ୍ଗ୍ ହାଃତି ମାନାୟାର୍ ବିତ୍ରେତାଙ୍ଗ୍ ନିକ୍ତାନ୍ନା ଆରେ ସରଗ୍ଜପି ଈଶ୍ୱର ତିନାକେଇ ନିପ୍ଣି ସନ୍ମାନ୍ ପାୟାଆନି ବାହାତାକେ କୁଚିକିତାନ୍ନା। 21 ଖ୍ରୀଷ୍ଟ ହେ ବାହାତାକେ ୱିଜୁ ଅଦିକାର୍ନି ଶାକ୍ତିତାଙ୍ଗ୍ ଗାଜା ଅଦିକାର୍। ଆରେ ଅପିସର୍ତାଙ୍ଗ୍ ବେସି ଗାଜା ଅପିସର୍। ହେୱାନ୍ ଇ ଯୁଗ୍ଦ ନେ ଆକାୟ୍ ୱାନି ଯୁଗ୍ଦ ପା ଗାଜା। 22 ଈଶ୍ୱର ୱିଜୁ ବିଷୟ ଖ୍ରୀଷ୍ଟ କାଲ୍ପାନା ତାରେନ୍ ଇଡ଼୍ତାନ୍ନା, ଆରେ ଖ୍ରୀଷ୍ଟଙ୍ଗ୍ ମଣ୍ଡ୍ଲିନି ହାର୍ କାଜିଙ୍ଗ୍ ୱିଜୁ ବିଷୟରେ ନେତା କିଜି ବାଚି କିତାନ୍ନା। 23 ହେ ମଣ୍ଡ୍ଲି ଖ୍ରୀଷ୍ଟ ଗାଗାଡ଼୍ ଲେକେ, ଇନେସ୍ ହେୱାନ୍ ୱାତିଲେ ୱିଜୁ ବାହାନି ୱିଜୁ ବିଷୟତିଙ୍ଗ୍ ପୁରା କିନାନ୍ ହେଲେକେ ହେୱାନ୍ ମଣ୍ଡ୍ଲିତିଙ୍ଗ୍ ପୁରା କିତାନ୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation