କଲସିୟ 4 - New Testament in Pengo Parja Language

ପାର୍ତି କିନାକାରିଙ୍ଗ୍ ହାର୍ଦି ବ୍ଯବହାର୍ କିୟାଟ୍

¹ ଏ ମାଲିକ୍ କାଦେର୍, ସରଗ୍‌ତାକେ ମି କାଜିଙ୍ଗ୍ ର ମାଲିକ୍ ମାନାନ୍ ଇଞ୍ଜି ପୁନ୍‌ଞ୍ଜି, ମି ହଲିଆରିଙ୍ଗ୍ ନ୍ୟାୟ୍ ଆରେ ହାର୍ଦି ବ୍ଯବହାର୍ ହିୟାଟ୍।

² ଏପେଙ୍ଗ୍ ୱିଜୁଦିନ୍ ପାର୍ତାନା କିଜି ମାନାଟ୍। ଏପେଙ୍ଗ୍ ପାର୍ତାନା କିନିହିଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିୟାଟ୍ ଆରେ ଜାଗ୍ରତ୍ ଆଜି ମାନାଟ୍।

³ ମା କାଜିଙ୍ଗ୍ ପା ପାର୍ତାନା କିୟାଟ୍, ଈଶ୍ୱର ଇନେସ୍ ମାଙ୍ଗେଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ସୁଯଗ୍ ହିଦ୍‌ନାନ୍, ଆରେ ଆପେଙ୍ଗ୍ ଖ୍ରୀଷ୍ଟନି ଡ଼ୁକ୍‌ତି ବିଷୟତିଙ୍ଗ୍ ଶୁଣାୟ୍ କିଦେଙ୍ଗ୍ ଆଡ୍‌ନାପ୍। ଆନେଙ୍ଗ୍ ଇ ହାର୍ଦିକାବୁର୍ ଶୁଣାୟ୍ କିନି କାଜିଙ୍ଗ୍ ବନ୍ଦି ଆତାଙ୍ଗ୍‌ନା।

⁴ ଲାଗିଙ୍ଗ୍ ନା କାଜିଙ୍ଗ୍ ପାର୍ତାନା କିୟାଟ୍, ଆନେଙ୍ଗ୍ ଇନେସ୍ ଖ୍ରୀଷ୍ଟନି ଡ଼ୁକ୍‌ତି ବିଷୟତିଙ୍ଗ୍ ହାର୍‌ଦାଙ୍ଗ୍ ୱିଜାକାରିଙ୍ଗ୍ ଶୁଣାୟ୍ କିଦେଙ୍ଗ୍ ଆଡ୍‌ନାଙ୍ଗ୍।

⁵ ପାର୍ତିକିୱି ମାନାୟାରିଙ୍ଗ୍ ବୁଦି ହୁଦାଙ୍ଗ୍ ବ୍ଯବହାର୍ କିୟାଟ୍, ଆରେ ୱିଜୁ ସୁଯଗ୍‌ତିଙ୍ଗ୍ ହାର୍‌ଦାଙ୍ଗ୍ ବ୍ଯବହାର୍ କିୟାଟ୍।

⁶ ହେୱାର୍ ହୁଦାଙ୍ଗ୍ ହାର୍‌ଦାଙ୍ଗ୍ କାତାବାର୍ତା କିୟାଟ୍, ଆରେ ହେୱାରିଙ୍ଗ୍ ମାନ୍ତ ହାଚି ଲେକେ କାତା ଆଡ। ଲାଗିଙ୍ଗ୍ ଏପେଙ୍ଗ୍ ଇନାକା ପାର୍ତି କିତାଦେର୍‌ନା ହେ ବିଷୟରେ ଏଚେପାଦ୍ନା ମିଙ୍ଗେଙ୍ଗ୍ ପ୍ରଶ୍ନ ୱେନ୍‌ବା ଆଦ୍‌ନାର୍, ଏପେଙ୍ଗ୍ ହାର୍‌ଦାଙ୍ଗ୍ ଉତର୍ ହିଦେଙ୍ଗ୍ ଆଡ୍‌ନାଦେର୍।

ପାଉଲ ପାର୍ତି କିନାକାରିଙ୍ଗ୍ ଜୱାର୍ କିତି କାତା

⁷ ନାଙ୍ଗେଙ୍ଗ୍ ଇନାକା ୱିଜୁ ଗାଟା ଆତ୍‌ତାନା ହେଦାଙ୍ଗ୍ ୱିଜୁ ତୁକିକ ମିଙ୍ଗେଙ୍ଗ୍ ୱେଚ୍‌ଚାନାନ୍। ହେୱାନ୍ ରକାନ୍ ପାର୍ତିକିନି ଟଣ୍ଡେନ୍, ଆରେ ଆନେଙ୍ଗ୍ ହେୱାନିଙ୍ଗ୍ ଲାଡ୍ କିନାଙ୍ଗ୍। ହେୱାନ୍ ରକାନ୍ କାତା ମାନିକିଜି ମାନାକାନ୍, ଆରେ ହେୱାନ୍ ନା ହୁଦାଙ୍ଗ୍ ମାନ୍‌ଞ୍ଜି ମାପୃଙ୍ଗ୍ ହେବା କିନାକାନ୍।

⁸ ମାଙ୍ଗେଙ୍ଗ୍ ଇନାକା ୱିଜୁ ଗଟା ଆତ୍‌ତାତ୍‌ନା ହେ ବିଷୟରେ ଇନେସ୍ ଏପେଙ୍ଗ୍ ପୁନାଦେର୍। ଆରେ ହେୱାନ୍ ମିଙ୍ଗେଙ୍ଗ୍ ପାର୍ତିତାଙ୍ଗ୍ ମାଞ୍ଜେଙ୍ଗ୍ ଇନେସ୍ ସାହାସ୍ ହିଦେଙ୍ଗ୍ ଆଡ଼୍‌ଦାନାନ୍, ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ମି କାଜିଙ୍ଗ୍ ପକ୍ତାତାଙ୍ଗ୍‌ନା।

⁹ ମା ଲାଡ୍‌ନି ପାର୍ତିକିନି ଟଣ୍ଡେନ୍ ଅନିସିମଙ୍ଗ୍ ହେୱାନ୍ ହୁଦାଙ୍ଗ୍ ଆନେଙ୍ଗ୍ ମି ଲାଗାୟ୍ ପକ୍ତାତାଙ୍ଗ୍‌ନା। ଅନିସିମ ରକାନ୍ କାତା ମାନିକିଜି ମାନାକାନ୍, ଆରେ ହେୱାନ୍ ମି ସହର୍‌ନି ମାନାୟ୍। ଇବେ ଗଟାଆତି ବିଷୟତିଙ୍ଗ୍ ଇ ରିକାର୍ ମିଙ୍ଗେଙ୍ଗ୍ ୱେଚ୍‌ଚାନାର୍।

¹⁰ ନା ହୁଦାଙ୍ଗ୍ ବନ୍ଦି ଆତି ଆରିସ୍ତାର୍ଖ ଆରେ, ବର୍ଣ୍ଣବା ବାଣ୍‌ଜାହି ମାର୍କ ମିଙ୍ଗେଙ୍ଗ୍ ଜୱାର୍ କିଦ୍‌ନାରା। (ଏପେଙ୍ଗ୍ ମାର୍କ ବିଷୟରେ ଚିଟି ପାୟାଆତାଦେରେ, ଯଦି ହେୱାନ୍ ମି ଲାଗାୟ୍ ୱାତିସ୍ ୱାରିତାଙ୍ଗ୍ ଆହାଟ୍।)

¹¹ ଯୀଶୁ ଇନେରିଙ୍ଗ୍ ଯୁସ୍ତ ଇଞ୍ଜି ମାନାୟାର୍ କୁକ୍‌ନାର୍, ହେୱାନ୍ ମିଙ୍ଗେଙ୍ଗ୍ ଜୱାର୍ କିଦ୍‌ନାନା। ଯିହୁଦି ପାର୍ତିକିନି ମାନାୟାର୍ ବିତ୍ରେତାଙ୍ଗ୍ ଇ ତିନ୍‌ଜାଣ୍ ନା ହୁଦାଙ୍ଗ୍ ମାନ୍‌ଞ୍ଜି ଈଶ୍ୱର ସାସନ୍ କିନି ରାଜି ବିଷୟରେ ଶୁଣାୟ୍ କିଦେଙ୍ଗ୍ ସାଇଜ କିତ୍‌ତାର୍‌ନା। ଆରେ ହେୱାର୍ ନାଙ୍ଗେଙ୍ଗ୍ ବେସି ସାହାସ୍ କିତ୍‌ତାର୍‌ନା।

¹² ଏପାଫ୍ରା ମିଙ୍ଗେଙ୍ଗ୍ ଜୱାର୍ କିଦ୍‌ନାନା, ହେୱାନ୍ ମି ସହର୍‌ନି ମାନାୟ୍। ହେୱାନ୍ ରକାନ୍ ଯୀଶୁ ଖ୍ରୀଷ୍ଟଙ୍ଗ୍ ହେବା କିନାକାନ୍। ଏପେଙ୍ଗ୍ ଇନେସ୍ ଈଶ୍ୱରତାକେ ଟିକ୍‌ଆଜି ମାଞ୍ଜେଙ୍ଗ୍ ଆଡ୍‌ନାଦେର୍, ଆରେ ଈଶ୍ୱର ଇଚା ଏପେଙ୍ଗ୍ ପୁରାପୁରି ପୁଞ୍ଜେଙ୍ଗ୍ ଆଡ୍‌ନାର୍, ହେଦାଙ୍ଗ୍ କାଜିଙ୍ଗ୍ ହେୱାନ୍ ମି କାଜିଙ୍ଗ୍ ୱିଜୁଦିନ୍ ମାନ୍‌ଦିୟାନ୍ କିଜି ପାର୍ତାନା କିନାନା।

¹³ ହେୱାନ୍ ମି କାଜିଙ୍ଗ୍ ଆରେ, ଲାଅଦିକୀଆ ଆରେ ହିଏରାପଲି ସହର୍‌ନି ମାନାୟାର୍ କାଜିଙ୍ଗ୍ ମାନ୍‌ଦିୟାନ୍ କିଜି ପାର୍ତାନା କିନାନା। ଆନେଙ୍ଗ୍ ହେବେନି ସାକି।

¹⁴ ଆପେଙ୍ଗ୍ ଲାଡ୍‌କିନି ଡାକ୍‍ଟର୍ ଲୁକ ଆରେ ଦୀମା ମିଙ୍ଗେଙ୍ଗ୍ ଜୱାର୍ କିଦ୍‌ନାରା।

¹⁵ ଲାଅଦିକୀଆ ସହର୍‌ତାକେ ମାନି ମଣ୍ଡ୍‌ଲିନି ଟଣ୍ଡାରିଙ୍ଗ୍, ନିମ୍‌ପା ତଣ୍‌ଦେଲ୍‌ତିଙ୍ଗ୍ ଆରେ ତାଞ୍ଜ ପାର୍ତାନା କିଦେଙ୍ଗ୍ କୁଚ୍‌ଚି ପାର୍ତି କିନାକାରିଙ୍ଗ୍ ଜୱାର୍ କିୟାଟ୍।

¹⁶ ମିଙ୍ଗେଙ୍ଗ୍ ଲେକିକିତି ଇ ଚିଟିତିଙ୍ଗ୍ ମି ବିତ୍ରେ ୱିଜାକାର୍ ପଡ଼ିକିଜି ୱେଚି ପାଚେ, ଲାଅଦିକୀଆ ସହର୍‌ତାକେ ମାନି ମଣ୍ଡ୍‌ଲିତାକେ ପା ଇ ଚିଟି ପଡ଼ିକିଦେଙ୍ଗ୍ ପକାଟ୍। ଆରେ ଲାଅଦିକୀଆ ସହର୍‌ତାକେ ମାନି ମଣ୍ଡ୍‌ଲିତିଙ୍ଗ୍ ଲେକିକିତି ଚିଟିତିଙ୍ଗ୍ ପା ଏପେଙ୍ଗ୍ ପଡ଼ି କିୟାଟ୍।

¹⁷ ଆର୍କିପଙ୍ଗ୍ ୱେଚାଟ୍, “ମାପୃ ହିଜି ମାନ୍‌ଞ୍ଚି ହେବା କାମାୟ୍‌ତିଙ୍ଗ୍ ଜାଗ୍ରତ୍ ଆଜି ପୁରା କିୟା।”

¹⁸ ଆନେଙ୍ଗ୍ ପାଉଲ ଇ ଚିଟି ନିଜେ ଲେକିକିଜି ଜୱାର୍ କିଦ୍‌ନାଙ୍ଗା। ଆନେଙ୍ଗ୍ ଜଇଲ୍ ଇଞ୍ଜ ମାନାକା ଏତୁକିଜି ନା କାଜିଙ୍ଗ୍ ପାର୍ତାନା କିୟାଟ୍। ଈଶ୍ୱର ମିଙ୍ଗେଙ୍ଗ୍ ଦୟା କିଦେନ୍।