କଲସିୟ 3 - New Testament in Pengo Parja Languageଈଶ୍ୱରତିଙ୍ଗ୍ ହାର୍ଆତି ଲେକେ ବ୍ଯବହାର୍ କିୟାଟ୍ 1 ଏଚେପାଦ୍ନା ଯୀଶୁ ଖ୍ରୀଷ୍ଟ ହାଃଜି ଆରେରଗ ଜିବୁନ୍ଆଜି ନିଙ୍ଗ୍ତାନ୍, ହେଲେକେ ନେ ମିଙ୍ଗେଙ୍ଗ୍ ପା ଈଶ୍ୱର ନିକ୍ତାତାନ୍ନା। ଈଶ୍ୱର ସନ୍ମାନ୍ ବାହାନି ତିନାବାଗାୟ୍ ଖ୍ରୀଷ୍ଟ କୁଚ୍ଚାନ୍ନା, ହେ ସରଗ୍ତାକେ ମାନି ୱିଜୁ ବିଷୟତାକେ ଏପେଙ୍ଗ୍ ମାନ୍ ହିୟାଟ୍। 2 ପୁର୍ତିନି ବିଷୟତିଙ୍ଗ୍ ନେ ମାନ୍ ହିମାଟ୍, ମାତର୍ ସରଗ୍ନି ବିଷୟତିଙ୍ଗ୍ ମାନ୍ ଲାଗାୟ୍ କିୟାଟ୍। 3 ଇନେସ୍କି ମି ପାପ୍ନି ଗୁଣ୍ ହାଃତାତ୍ନା, ଆରେ ମି ଜିବୁନ୍ ଖ୍ରୀଷ୍ଟ ହୁଦାଙ୍ଗ୍ ଈଶ୍ୱରତାକେ ଡ଼ୁକ୍ତାତ୍ନା। 4 ମିଙ୍ଗେଙ୍ଗ୍ ପୁନି ଜିବୁନ୍ ହିଦ୍ନି ଖ୍ରୀଷ୍ଟ ଏଚେପାଦ୍ନା ପୁର୍ତିତାକେ ୱାନାନ୍, ହେପାଦ୍ନା ଏପେଙ୍ଗ୍ ପା ତା ଗୌରବତାଙ୍ଗ୍ ଚଞ୍ଜି ଆନାଦେର୍। 5 ଲାଗିଙ୍ଗ୍ ପୁର୍ତିନି ପାପ୍ନି ୱିଜୁ ଗୁଣ୍ତିଙ୍ଗ୍ ପିହାଟ୍, ଇଦାଙ୍ଗ୍ନି ଅର୍ତ ଇୱିଜୁ ଗୁଣ୍, ଦାରି କାମାୟ୍, କରାପ୍ କାମାୟ୍, ଅପ୍ମାନ୍ନି କାମାୟ୍, ମାନ୍ ବିତ୍ରେ ଦାରି ଚିନ୍ତା କିନାକା, କରାପ୍ ଚିନ୍ତା, ଲବ୍ରା ଆନାକା। ରଞ୍ଜାଙ୍ଗ୍ ମୁର୍ତିତିଙ୍ଗ୍ ପୁଜା କିତିଲେକେ। 6 ଇ ୱିଜୁ ପାପ୍ ମାନାୟାର୍ କିନି କାଜିଙ୍ଗ୍ ଈଶ୍ୱର ସତ୍ରେ ହେୱାରିଙ୍ଗ୍ ବେସିକିଜି ଦଣ୍ଡ୍ ହିନାନ୍। 7 ଏଚେପାଦ୍ନା ଏପେଙ୍ଗ୍ ଇ ପୁର୍ତିନି ମାନାୟ୍ ଆଜି ମାଚାଦେର୍, ଏପେଙ୍ଗ୍ ଇ ଲେକେ କରାପ୍ ଜିବୁନ୍ କାଟିକିଜି ମାଚାଦେର୍। 8 ମାତର୍ ନଙ୍ଗୟ୍ ଏପେଙ୍ଗ୍ ରିସା ଆନାକା, ବେସି ରିସା ଆନାକା, ଆକାର୍ ଆନାକା, ନିନ୍ଦାକିନାକା, କରାପ୍ ବେଣ୍ ଇ ୱିଜୁତାଙ୍ଗ୍ ଦେହାଆଡ। 9 ଏପେଙ୍ଗ୍ ମିଚ୍ ୱେଚ୍ପା ଆମାଟ୍, ଇନେସ୍କି ଏପେଙ୍ଗ୍ ମି ଆଗେନି ପାପ୍ନି ଗୁଣ୍ତିଙ୍ଗ୍ ଆରେ ୱିଜୁ ପାପ୍ ବ୍ଯବହାର୍ତିଙ୍ଗ୍ ପିସ୍ତାଦେର୍ନା। 10 ଆରେ ଏପେଙ୍ଗ୍ ପୁନି ଗୁଣ୍ତିଙ୍ଗ୍ ଆସ୍ତାଦେର୍ନା। ଉବ୍ଜାଣ୍ କିତି ଈଶ୍ୱର ବିଷୟରେ ଏପେଙ୍ଗ୍ ଇନେସ୍ ପୁରା ଜ୍ଞାନ୍ ପାୟାଆନାଦେର୍, ହେଦାଙ୍ଗ୍ କାଜିଙ୍ଗ୍ ହେୱାନ୍ ପୁନି ଗୁଣ୍ତିଙ୍ଗ୍ ତା ଲେକେନେ ଚଞ୍ଜ୍ଞ୍ଜେଙ୍ଗ୍ ରହ୍ନାନା। 11 ଇଦାଙ୍ଗ୍ କାଜିଙ୍ଗ୍ ବିନ୍ଜାତି କି ଯିହୁଦି ଜାତିର୍ ବିତ୍ରେ, ସୁନତ ବିଦି ମାନିକିନାକାର୍ କି ମାନିକିୱାକାର୍, ବାର୍ ଦେସ୍ତାକାର୍ କି ଆଦିବାସିନି ମାନାୟାର୍, ଦାସ୍ କି ଦାସ୍ ଆୱି ମାନାୟାର୍ ବିତ୍ରେ ଇନା ବେଦ୍ବାବ୍ ଆକାୟ୍। ମାତର୍ ଖ୍ରୀଷ୍ଟ ନେ ୱିଜୁତାଙ୍ଗ୍ ମୁକ୍ଯା ଆରେ ହେୱାନ୍ ତାଙ୍ଗେଙ୍ଗ୍ ପାର୍ତିକିନି ମାନାୟାର୍ତାକେ ବାହା କିନାନ୍। 12 ଈଶ୍ୱର ମିଙ୍ଗେଙ୍ଗ୍ ପବିତ୍ର ମାନାୟ୍ କିଜି ବାଚି କିତ୍ତାନ୍ନା ଆରେ ଲାଡ୍ କିତ୍ତାନ୍ନା। ଲାଗିଙ୍ଗ୍ ଏପେଙ୍ଗ୍ ଜେକନିକାରିଙ୍ଗ୍ ସାଇଜ କିୟାଟ୍, ଦୟା କିୟାଟ୍ ଜାର୍ତିଙ୍ଗ୍ ହିରୁ କିୟାଟ୍, ମି ଆଦିକାର୍ ଚଚ୍ମାଟ୍ ଆରେ ସାହାସ୍ ଆସ୍ତି ମାନାଟ୍। 13 ଯଦି ମି ବିତ୍ରେ ଇନେର୍ ବୁଲ୍ କିତିସ୍ ସମ୍ୱାଲି କିୟାଟ୍, ମି ବିରଦ୍ତାକେ ଅପ୍ମାନ୍ କିଦ୍ନାକାରିଙ୍ଗ୍ କେମା କିୟାଟ୍। ଇନେସ୍କି ମାପୃ ମିଙ୍ଗେଙ୍ଗ୍ କେମା କିତ୍ତାନ୍ନା, ଲାଗିଙ୍ଗ୍ ଏପେଙ୍ଗ୍ ପା ମାନାୟାରିଙ୍ଗ୍ କେମା କିୟାଟ୍। 14 ଆରେ ଇ ୱିଜୁତାଙ୍ଗ୍ ଜାର୍-ଜାର୍ବିତ୍ରେ ଲାଡ୍ କିନାକା ନେ ମୁକ୍ୟ। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଟିକ୍ ବାବ୍ରେ ଏକ୍ ଆଜି ମାନାଦେର୍। 15 ଖ୍ରୀଷ୍ଟ ହିଜି ମାନ୍ଞ୍ଚି ଶାନ୍ତି ମି ଗରବ୍ନି ବାବ୍ନାତିଙ୍ଗ୍ କଣ୍ଟ୍ରୁଲ୍ କିଦେତ୍, ଇନେସ୍କି ଏପେଙ୍ଗ୍ ୱିଜାକାଦେର୍ ର ଗାଗାଡ଼୍ନି ଜିନିଷ୍ ଲେକେ। ଲାଗିଙ୍ଗ୍ ଏପେଙ୍ଗ୍ ଜାର୍ବିତ୍ରେ ଶାନ୍ତିତାଙ୍ଗ୍ ମାଞ୍ଜେଙ୍ଗ୍ ଈଶ୍ୱର କୁକ୍ତାତାନ୍ନା। ଆରେ ଏପେଙ୍ଗ୍ ୱିଜୁଦିନ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିୟାଟ୍। 16 ଖ୍ରୀଷ୍ଟ ବିଷୟନି ହିକ୍ଷାତିଙ୍ଗ୍ ୱିଜୁଦିନ୍ ଚିନ୍ତା କିୟାଟ୍, ତା ପୁରା ଜ୍ଞାନ୍ତାଙ୍ଗ୍ ଏପେଙ୍ଗ୍ ଜାର୍-ଜାର୍ବିତ୍ରେ ହିକାଇ କିବା ଆଡ ଆରେ ଜାଗ୍ରତ୍ କିବା ଆଡ। ଗିତସଙ୍ଗିତାନି କେର୍କଣ୍, ଈଶ୍ୱର ଭଜନ୍ କେର୍କଣ୍ କେର୍ଜି, ଖ୍ରୀଷ୍ଟାନ୍ କେର୍କଣ୍ କେର୍ଜି ଈଶ୍ୱରତିଙ୍ଗ୍ ଦନ୍ଯବାଦ୍ ହିୟାଟ୍। 17 ଏପେଙ୍ଗ୍ ଇନାକା କିନାଦେର୍ କି ୱେଚ୍ନାଦେର୍, ହେ ୱିଜୁ ମାପୃ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ଆବା ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଦେର୍। ଖ୍ରୀଷ୍ଟାନ୍ ପରିବାର୍ କାଜିଙ୍ଗ୍ ପାଉଲତି ଆଦେସ୍ 18 ଏ କଗ୍ଲେ କାଦେର୍ ଏପେଙ୍ଗ୍ ଇନେସ୍ ମାପୃ ଯୀଶୁଙ୍ଗ୍ ମାନି କିନାଦେରା, ହେଲେକେ ମି ଜାର୍-ଜାର୍ ଆଣ୍ଡ୍ରାଙ୍ଗ୍ କାତା ମାନିକିଜି ମାନାଟ୍। 19 ଏ ଆଣ୍ଡ୍ରା କାଦେର୍ ଜାର୍-ଜାର୍ କଗ୍ଲେକାଙ୍ଗ୍ ଲାଡ୍ କିୟାଟ୍, ଆରେ ହେୱେକ୍ ହୁଦାଙ୍ଗ୍ ହାର୍ଦି ବ୍ଯବହାର୍ କିୟାଟ୍। 20 ଏ ହିମ୍ଣା କାଦେର୍ ମି ଆୟା ଆବାର୍ କାତା ମାନିକିଜି ମାନାଟ୍, ହେଦାଙ୍ଗ୍ ନେ ଈଶ୍ୱରତିଙ୍ଗ୍ ୱାରି କିୟିକିନାତ୍। 21 ଏ ଆବା କାଦେର୍ ମି ହିମ୍ଣାକାଙ୍ଗ୍ ୱିଜୁଦିନ୍ ଗୁଜ୍-ଗୁଜ୍ଆଜି ରିସା କିୟିକିମାଟ୍, ଏଲେଙ୍ଗ୍ କିତିସ୍ ହେୱାର୍ ତା ସାହାସ୍ତିଙ୍ଗ୍ ଆରାୟ୍ କିନାର୍। 22 ଏ ଦାସ୍ ମାନାୟ୍ କାଦେର୍ ହେୱାନ୍ ମାନିହିଙ୍ଗ୍ ନେ କାମାୟ୍ କିମାଟ୍, ମାତର୍ ହେୱାନ୍ ହିଲ୍ୱିହିଙ୍ଗ୍ ପା କାମାୟ୍ କିୟାଟ୍। ଏପେଙ୍ଗ୍ ମାପୃଙ୍ଗ୍ ପାଣ୍ଡ୍ରାଆନି କାଜିଙ୍ଗ୍ ୱିଜୁଦିନ୍ ହେୱାରିଙ୍ଗ୍ ୱାରି ଆତିଲେକେ କାମାୟ୍ କିଜି ହାର୍ଦି ମାନ୍ତାଙ୍ଗ୍ କିୟାଟ୍। 23 ଏପେଙ୍ଗ୍ ଇନାକା ୱିଜୁ କିନାଦେର୍ ହେଦାଙ୍ଗ୍ତିଙ୍ଗ୍ ମାନାୟ୍ କାଜିଙ୍ଗ୍ କିନାଙ୍ଗା ଇଞ୍ଜି ବାବି କିୱାଦାଙ୍ଗ୍, ଈଶ୍ୱର କାଜିଙ୍ଗ୍ କାମାୟ୍ କିନାଙ୍ଗା ଇଞ୍ଜି ହାର୍ଦି ମାନ୍ତାଙ୍ଗ୍ କିୟାଟ୍। 24 ଏପେଙ୍ଗ୍ ମାନେ କିୟାଟ୍ ଯେ, ଏପେଙ୍ଗ୍ ଇମ୍ଣି ମାଲିକ୍ତିଙ୍ଗ୍ ହେବା କିନାଦେର୍ ହେୱାନ୍ ଖ୍ରୀଷ୍ଟ, ଲାଗିଙ୍ଗ୍ ମାପୃ ମିଙ୍ଗେଙ୍ଗ୍ ପୁରଷ୍କାର୍ ଲେକେ ଆଦିକାର୍ ହିଦ୍ନାନ୍। 25 ମାତର୍ ଏପେଙ୍ଗ୍ ଯଦି ବୁଲ୍ କାମାୟ୍ କିଜି ମାନ୍ଗାନାଦେର୍, ହେ ବୁଲ୍ କାମାୟ୍ନି ପାଡ଼୍ ପାୟାଆନାଦେର୍। ଇନେସ୍କି ଈଶ୍ୱର ମୁମ୍ ହୁଡ଼୍ଜି ବିଚାର୍ କିଉନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation