କଲସିୟ 2 - New Testament in Pengo Parja Language1 ଏ କଲସୀୟ ମଣ୍ଡ୍ଲି ଆରେ ଲାଅଦିକୀଆ ମଣ୍ଡ୍ଲିନି ପାର୍ତିକିନି ମାନାୟ୍ କାଦେର୍, ଆରେ ଇମ୍ଣି ମାନାୟାରିଙ୍ଗ୍ ଆନେଙ୍ଗ୍ ହୁଡ଼ୁଙ୍ଗେ, ମି କାଜିଙ୍ଗ୍ ଆନେଙ୍ଗ୍ ଏଚେକ୍ କଷ୍ଟ କିତାଙ୍ଗ୍ନା ହେଦାଙ୍ଗ୍ ଏପେଙ୍ଗ୍ ପୁନାଟ୍ ଇଞ୍ଜି ଇଚା କିନାଙ୍ଗା। 2 ହେୱାର୍ ପାର୍ତିତାଙ୍ଗ୍ ସାସ୍ କିଦେଙ୍ଗ୍ ଆରେ ଲାଡ୍ତାଙ୍ଗ୍ ଜାର୍-ଜାର୍ବିତ୍ରେ ମିତ୍ରଆଜି ମାଞ୍ଜେଙ୍ଗ୍ ଆନେଙ୍ଗ୍ ଇଚା କିନାଙ୍ଗା। ଈଶ୍ୱରତି ଡ଼ୁକ୍ତି ବିଷୟ ଯୀଶୁ ଖ୍ରୀଷ୍ଟଙ୍ଗ୍ ପୁଞ୍ଜେଙ୍ଗ୍ ଆଡ୍ନାର୍ ଆରେ ପୁରାପୁରି ଆହା ଇଡ଼୍ଦେଙ୍ଗ୍ ଆଡ୍ନାର୍, ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଇଦାଙ୍ଗ୍ ୱେଚ୍ନାଙ୍ଗା। 3 ହେ ଖ୍ରୀଷ୍ଟତାକେ ୱିଜୁ ପର୍କାର୍ ବୁଦି ଆରେ ଜ୍ଞାନ୍ନି ଦନ୍ ଡ଼ୁକ୍ତାତ୍ନା। 4 ମାନାୟାର୍ ମିଚ୍ ହିକ୍ଷାହିଜି ମିଙ୍ଗେଙ୍ଗ୍ ଇନେସ୍ ଟକାୟ୍ କିଦ୍ମେର୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଇଦାଙ୍ଗ୍ ୱେଚ୍ଚାନାଙ୍ଗା। 5 ଆନେଙ୍ଗ୍ ଦେହା ମାଚିସ୍ ପା ଆନେଙ୍ଗ୍ ମି କାଜିଙ୍ଗ୍ ଚିନ୍ତା କିନାଙ୍ଗା। ଏପେଙ୍ଗ୍ ଇନେସ୍ ମାନି ଦର୍କାର୍ ହେଲେକେ ଏପେଙ୍ଗ୍ ଜାର୍-ଜାର୍ବିତ୍ରେ ମାହାଆଜି ମାନାଦେରା ଆରେ ଏପେଙ୍ଗ୍ ଖ୍ରୀଷ୍ଟଙ୍ଗ୍ ବେସି ପାର୍ତି କିନାଦେରା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମି କାଜିଙ୍ଗ୍ ୱାରି ଆନାଙ୍ଗା। ଖ୍ରୀଷ୍ଟତାକେ ଜିତାପ୍ନା 6 ନଙ୍ଗୟ୍ ଏପେଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ମାପୃ ଇଞ୍ଜି ଆସ୍ତାଦେର୍ନା, ଲାଗିଙ୍ଗ୍ ଏପେଙ୍ଗ୍ ତା ହୁଦାଙ୍ଗ୍ ମାହାଆତି ମାନାୟ୍ ଆଜି ଜିବୁନ୍ କାଟିକିୟାଟ୍। 7 ଆରେ ମାର୍ତି ଚିରା ଇନେସ୍ ମେଦ୍ନିତାକେ ହାଲ୍ଜି ଆଟ୍ୱା ଆଜି ମାନାତ୍, ହେଲେକେ ଏପେଙ୍ଗ୍ ହେୱାନ୍ତାକେ ବେସି ଆଟ୍ୱା ଆଜି ମାନାଟ୍। ମି ଜିବୁନ୍ ହେୱାନ୍ତାକେ ବାଡା ଆୟେତ୍, ଲାଗିଙ୍ଗ୍ ଏପେଙ୍ଗ୍ ଇମ୍ଣି ହିକ୍ଷା ପାୟା ଆତାଦେର୍ନା ହେ ଅନୁସାରେ ମି ପାର୍ତି ସତ୍ତାକେ ଆଦିକ୍ତାଙ୍ଗ୍ ଆଦିକ୍ ଆଟ୍ୱା ଆନାତ୍। ଆରେ ଆଦିକ୍ତାଙ୍ଗ୍ ଆଦିକ୍ ଏପେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଦେର୍। 8 ଏପେଙ୍ଗ୍ ଜାଗ୍ରତ୍ ଆଜି ମାନାଟ୍, ଇନେର୍ ପା ମିଙ୍ଗେଙ୍ଗ୍ ମୁଲ୍ୟ ହିଲ୍ୱି ଦର୍ମନି ହିକ୍ଷା ଆରେ ବେକାର୍ ଉପାୟ୍ନି ହିକ୍ଷାହିଜି ମିଙ୍ଗେଙ୍ଗ୍ ଜାଲ୍ଦ ରାତ୍ତେମେର୍। ଇନେସ୍କି ଇ ଲେକେ ହିକ୍ଷା ଖ୍ରୀଷ୍ଟତି ହିକ୍ଷା ଆକାୟ୍, ମାତର୍ ମାନାୟ୍ନି ଜ୍ଞାନ୍ନି ହିକ୍ଷା ଆରେ ପୁର୍ତିନି ମାନାୟାର୍ ହିକ୍ଷା। 9 ଲାଗିଙ୍ଗ୍ ଇ ମାନାୟାର୍ ମିଙ୍ଗେଙ୍ଗ୍ ଟକାଇ କିଦ୍ମେର୍, ଇନେସ୍କି ଖ୍ରୀଷ୍ଟ ମାନାୟ୍ ରୁପ୍ ଆତିହିଙ୍ଗ୍ ଈଶ୍ୱରନି ୱିଜୁ ଗୁଣ୍ ଆରେ ଶାକ୍ତି ତାବେ ମାଚାତ୍। 10 ହେୱାନ୍ ୱିଜୁ ଶାକ୍ତି ଆରେ ଆଦିକାରିର୍ ମାନାୟ୍ତାଙ୍ଗ୍ ବେସି ଗାଜାକାନ୍। ଲାଗିଙ୍ଗ୍ ଏପେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ରବେ ଆତି କାଜିଙ୍ଗ୍ ମିଙ୍ଗେଙ୍ଗ୍ ଇନାକା ଅବାବ୍ ଆକାୟ୍। 11 ଏଚେପାଦ୍ନା ଏପେଙ୍ଗ୍ ଖ୍ରୀଷ୍ଟତାକେ ପାର୍ତି କିତାଦେର୍ ଏପେଙ୍ଗ୍ ସୁନତ ଆତାଦେର୍ନା। ଯିହୁଦି ମାନାୟାର୍ ସୁନତ ଆତିଲେକେ ଏପେଙ୍ଗ୍ ସୁନତ ଆୱାତାଦେର୍ନା। ମାତର୍ ଖ୍ରୀଷ୍ଟ ଏପେଙ୍ଗ୍ କିତି ପାପ୍ନି ଗୁଣ୍ତିଙ୍ଗ୍ କାଟିକିଜି ମିଙ୍ଗେଙ୍ଗ୍ ସୁନତ କିତ୍ତାନ୍ନା। 12 ଖ୍ରୀଷ୍ଟଙ୍ଗ୍ ଇନେସ୍ ମୁଚ୍ଚାର୍ ହେଲେକେ ନେ ମି ପାପ୍ନି ଗୁଣ୍ ପା ମୁନ୍ଞ୍ଚାତ୍, ଏଚେପାଦ୍ନା ଏପେଙ୍ଗ୍ ଡୁବନ୍ ଅତାଦେର୍। ଖ୍ରୀଷ୍ଟ ଇନେସ୍ ପୁନି ଜିବୁନ୍ ପାୟାଆଜି ନିଙ୍ଗ୍ତାନ୍ ହେଲେକେ ଏପେଙ୍ଗ୍ ପା ପୁନି ଗୁଣ୍ ପାୟାଆଜି ନିଙ୍ଗ୍ତାଦେର୍ନା। ଇନେସ୍କି ଏପେଙ୍ଗ୍ ପାର୍ତି କିନାଦେରା ଯେ, ଈଶ୍ୱର ତା ଶାକ୍ତିତାଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିତାନ୍ନା। 13 ମି ପାପ୍ କାଜିଙ୍ଗ୍ ଏପେଙ୍ଗ୍ ହାଃତି ଲେକେ ଆଜି ମାଚାଦେର୍, ଆରେ ମି ପାପ୍ନି ଗୁଣ୍ ସୁନତ ଆତି ଲେକେ କାଟିଆୱାଦାଙ୍ଗ୍ ମାଚାତ୍। ମାତର୍ ଈଶ୍ୱର ମା ପାପ୍ତିଙ୍ଗ୍ ୱିଜୁ କେମାକିଜି ଖ୍ରୀଷ୍ଟ ହୁଦାଙ୍ଗ୍ ମାଙ୍ଗେଙ୍ଗ୍ ଜିବୁନ୍ କିତ୍ତାନ୍ନା। 14 ମା ବିରଦ୍ତାକେ ଏଚେକ୍ ପାପ୍ କାତାତାକେ ଲେକାଆଜି ମାଚାତ୍ ହେଦାଙ୍ଗ୍ ଈଶ୍ୱର ଲିବାଇ କିତାନ୍। ଖ୍ରୀଷ୍ଟ କୃଶକାଟ୍ତାକେ ହାଃତି କାଜିଙ୍ଗ୍ ପୁରାପୁରି ହେଦାଙ୍ଗ୍ ପୁରାପୁରି କେଚ୍ଚାନ୍। 15 ଇ ଲେକେ ଶୟତାନନି ଶାକ୍ତି ଆରେ ଆଦିକାରିର୍ ୱିଜୁ ନାଲି କାଣ୍ଡାକାଙ୍ଗ୍ ଈଶ୍ୱର କିସ୍ତି ଅତାନ୍। ଖ୍ରୀଷ୍ଟ କୃଶକାଟ୍ତାକେ ହାଃତି କାଜିଙ୍ଗ୍, ର ବନ୍ଦି ମାନାୟ୍ତିଙ୍ଗ୍ ଇନେସ୍ ୱିଜାକାର୍ ମୁମ୍ଦ ଅନାର୍ ହେଲେକେ ଈଶ୍ୱର ହେୱାରିଙ୍ଗ୍ ଆରାୟ୍ କିଜି ୱିଜାକାର୍ ମୁମ୍ଦ ଚଚ୍ଚାନ୍ନା। ଇନେର୍ତାଙ୍ଗ୍ ବିଚାର୍ ଆଉସ୍ 16 ଲାଗିଙ୍ଗ୍ ମିଙ୍ଗେଙ୍ଗ୍ ଇନେର୍ ପା ଟକାୟ୍ କିଦୁର୍। ଏପେଙ୍ଗ୍ ଇନାକା ଚିଚିସ୍ କି ଉଟିସ୍, ଆରେ ପୁର୍ଣିମା ଦିନ୍, କି ଜମ୍ନିଦିନ୍ ଇ ଲେକେ କେତେକ୍ ପାର୍ବୁ ଦିନ୍ ମାନିକିୱି କାଜିଙ୍ଗ୍ ମିଙ୍ଗେଙ୍ଗ୍ ଇନେର୍ ବିଚାର୍ କିଦୁର୍। 17 ଇନେସ୍କି ଇ ୱିଜୁ ନିୟମ୍ ର ଡ଼ିଗା ଲେକେ। ମାତର୍ ସତ୍ ବିଷୟ ଆନାତା ଯୀଶୁ ଖ୍ରୀଷ୍ଟ। 18-19 ଖ୍ରୀଷ୍ଟ ତା ଗାଗାଡ଼୍ ଲେକ ମଣ୍ଡ୍ଲିନି ମୁକ୍ୟା। ହେୱାନ୍ ତା ଗାଗାଡ଼୍ନି ୱିଜୁ ଜିନିଷ୍ତିଙ୍ଗ୍ ଜାତୁନ୍ କିନାନ୍ ଆରେ ୱିଜୁତିଙ୍ଗ୍ ମାହାଇ କିଜି ଇଡ଼୍ତାନ୍ନା। ଲାଗିଙ୍ଗ୍ ଈଶ୍ୱର ଇଚାତାଙ୍ଗ୍ ଇଦାଙ୍ଗ୍ ବାଡା ଆନାତ୍। ବାଟ୍ପାଣ୍ ଆଜି ଜାର୍ତିଙ୍ଗ୍ ହିରୁ କିନାକା ଆରେ ଦୁତ୍କୁକାଙ୍ଗ୍ ପୁଜା କିୟାଟ୍ ଇଞ୍ଜି ୱେଚ୍ଚି ଇନେର୍ ମିଙ୍ଗେଙ୍ଗ୍ ଟକାୟ୍ କିଦୁର୍। ଇ ବିଷୟରେ ହେୱାର୍ କେଚ୍କଣ୍ତ ହୁଡ଼୍ତାପ୍ନା ଇଞ୍ଜି ୱେଚ୍ନାର୍। ମାତର୍ ହେୱାର୍ ତା ମୁର୍କ କାଜିଙ୍ଗ୍ ବାଟ୍ପାଣିଆ ଆତାର୍ନା। 20 ଏପେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ହାଃତାଦେର୍ନା, ଲାଗିଙ୍ଗ୍ ହେୱାନ୍ ମିଙ୍ଗେଙ୍ଗ୍ ପୁର୍ତିନି ୱିଜୁ ଶୟତାନନି ଶାକ୍ତିତାଙ୍ଗ୍ ମୁକ୍ତି କିତାନ୍ନା। ଲାଗିଙ୍ଗ୍ ଏପେଙ୍ଗ୍ ଇନେକିଦେଙ୍ଗ୍ ଇ ପୁର୍ତିନି ନିତି ନିୟମ୍ତିଙ୍ଗ୍ ମାନି କିନାଦେରା। 21 ଇନେସ୍କି ହେ ଜିନିଷ୍ତିଙ୍ଗ୍ ଆହ୍ମାଟ୍! ହେ କାଦିତିଙ୍ଗ୍ ତିନ୍ମାଟ୍! ହେ ଜିନିଷ୍ତିଙ୍ଗ୍ ଆସ୍ପାମାଟ୍! 22 ଇ ୱିଜୁ ନିତି ନିୟମ୍ ମାନାୟ୍ ରସ୍ତି ହିକ୍ଷା, ଆରେ ହେ ୱିଜୁତିଙ୍ଗ୍ ଆସେଙ୍ଗ୍ ବାଉରା ଆତିସ୍ ନଷ୍ଟ ଆନାତ୍। 23 ଇ ୱିଜୁ ପୁର୍ତିନି ନିତି ନିୟମ୍ ବେସି ବୁଦି ହିତ୍ତି ଲେକେ ଚଞ୍ଜ୍ଜାନାତା, ଇଦାଙ୍ଗ୍ ହେୱାର୍ ଜବର୍ ଦସ୍ତ୍ ଦରମ୍ ଇଞ୍ଜି ଚଚିୟାଆଜି ଈଶ୍ୱରତିଙ୍ଗ୍ ପୁଜା କିଦେଙ୍ଗ୍ ରସ୍ତାର୍ନା। ଆରେ ହେୱାର୍ ଜାର୍ତିଙ୍ଗ୍ ଦୁକ୍କଷ୍ଟ ହିନାରା ଆରେ ବାଟ୍ପାଣ୍ ଆଜି ଜାର୍ତିଙ୍ଗ୍ ହିରୁ କିନାରା। ମାତର୍ ଇ ୱିଜୁ ନିତି ନିୟମ୍ତିଙ୍ଗ୍ ମାନିକିତିସ୍ ପା ହେୱାର୍ ପାପ୍ କାମାୟ୍ କିନାରା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation