କଲସିୟ 1 - New Testament in Pengo Parja Languageଜୱାର୍ 1 ଆନେଙ୍ଗ୍ ପାଉଲତଙ୍ଗ୍ ଇ ଚିଟି ଲେକିକିନାଙ୍ଗା। ଆନେଙ୍ଗ୍ ଈଶ୍ୱର ଇଚାତାଙ୍ଗ୍ ଯୀଶୁ ଖ୍ରୀଷ୍ଟତାଙ୍ଗ୍ ରକାଙ୍ଗ୍ ବାଚିକିତି ଚେଲା। 2 ଆନେଙ୍ଗ୍ ଆରେ ନା ହୁଦାଙ୍ଗ୍ ମାନି ପାର୍ତିକିନି ଟଣ୍ଡେନ୍ ତିମତି, କଲସୀୟ ସହର୍ତାକେ ମାନି ସାଦୁ ମାନାୟ୍ ଆରେ ଖ୍ରୀଷ୍ଟତାକେ ପାର୍ତିକିନି ଟଣ୍ଡାର୍ରିଙ୍ଗ୍ ଜୱାର୍ କିଦ୍ନାପା। ମା ଆବା ଈଶ୍ୱର ମିଙ୍ଗେଙ୍ଗ୍ ଆଶ୍ରିବାଦ୍ କିଦେନ୍ ଆରେ ଶାନ୍ତି ହିଦେନ୍। ପାଉଲ କଲସୀୟନି ପାର୍ତି କିନାକାର୍ କାଜିଙ୍ଗ୍ ପାର୍ତାନା କିନି ବିଷୟ 3 ଆପେଙ୍ଗ୍ ମି କାଜିଙ୍ଗ୍ ପାର୍ତାନା କିନିହିଙ୍ଗ୍ ମା ମାପୃ ଯୀଶୁ ଖ୍ରୀଷ୍ଟ ଲାତ୍ରାହି ଈଶ୍ୱରତିଙ୍ଗ୍ ୱିଜୁଦିନ୍ ଦନ୍ଯବାଦ୍ ହିନାପା। 4 ଆପେଙ୍ଗ୍ ୱେଚାପ୍ ଯେ, ଏପେଙ୍ଗ୍ ଯୀଶୁ ଖ୍ରୀଷ୍ଟଙ୍ଗ୍ ଆହା କିନାଦେରା ଆରେ ଈଶ୍ୱର ମାନାୟାରିଙ୍ଗ୍ ଲାଡ୍ କିନାଦେରା। 5 ମି କାଜିଙ୍ଗ୍ ଈଶ୍ୱର ସରଗ୍ତାକେ ଇଡ଼୍ଜି ମାଚି ପୁରଷ୍କାର୍ତାକେ ଆହା ଇଡ଼୍ଜି ମାଚି କାଜିଙ୍ଗ୍ ଏପେଙ୍ଗ୍ ଇ ଲେକେ ପାର୍ତି ଆରେ ଲାଡ୍ କିନାଦେରା। ଏଚେପାଦ୍ନା ମାନାୟାର୍ ମିଙ୍ଗେଙ୍ଗ୍ ପାର୍ତୁମ୍ ଈଶ୍ୱରତି ସତ୍ କାତା ଯୀଶୁ ଖ୍ରୀଷ୍ଟ ବିଷୟନି ହାର୍ଦିକାବୁର୍ ୱେଚ୍ଚି ମାଚାର୍, ହେପାଦ୍ନା ଏପେଙ୍ଗ୍ ଇ ବିଷୟରେ ୱେଚାଦେର୍ନା। 6 ଇ ହାର୍ଦିକାବୁର୍ ପୁର୍ତିନି ଚାରିବେଣ୍ତି ମାନାୟାର୍ ୱେଚାର୍ ଆରେ ବେସିହେନି ପାର୍ତିକିନାରା। ଏପେଙ୍ଗ୍ ଇନେସ୍ ପାର୍ତୁମ୍ ହାର୍ଦିକାବୁର୍ ୱେନ୍ଞ୍ଜି ଆରେ ଈଶ୍ୱରତି ମହାନ୍ ଦୟା ବିଷୟନି ସତ୍ ବିଷୟତିଙ୍ଗ୍ ପୁନ୍ଞ୍ଜି ଇନେସ୍ ମି ଜିବୁନ୍ ବାଦ୍ଲା ଆତାତ୍ନା, ହେଲେକେ ୱିଜୁ ବାହାନି ମାନାୟାରିଙ୍ଗ୍ ଜିବୁନ୍ ବାଦ୍ଲାୟ୍ କିନାତା। 7 ଏପାଫ୍ରା ରକାନ୍ ମା ହାଙ୍ଗ୍ଦାକାନ୍ ହେୱାନିଙ୍ଗ୍ ଆପେଙ୍ଗ୍ ଲାଡ୍ କିନାପା, ହେୱାନ୍ତାଙ୍ଗ୍ ଇ ହାର୍ଦିକାବୁର୍ ହିକା ଆତାଦେର୍ନା। ହେୱାନ୍ ରକାନ୍ ଯୀଶୁ ଖ୍ରୀଷ୍ଟଙ୍ଗ୍ ମାନିକିଜି ହେବାକିନି ଦାସ୍, ଆରେ ମା ବାଦୁଲ୍ତ ହେୱାନ୍ ମିଙ୍ଗେଙ୍ଗ୍ ହେବା କିଦ୍ନାନା। 8 ପବିତ୍ର ଆତ୍ମାତାଙ୍ଗ୍ ଲାଡ୍ ପାୟାଆଜି ଜେକନିକାରିଙ୍ଗ୍ ଲାଡ୍କିନି ବିଷୟରେ ହେୱାନ୍ ମାଙ୍ଗେଙ୍ଗ୍ ୱେଚ୍ଚାନାନା। 9 ହେଦାଙ୍ଗ୍ କାଜିଙ୍ଗ୍ ହେ କାତା ୱେଚି ଦିନ୍ତାଙ୍ଗ୍ ୱିଜୁଦିନ୍ ଆପେଙ୍ଗ୍ ମି କାଜିଙ୍ଗ୍ ପାର୍ତାନା କିନାପା। ଆପେଙ୍ଗ୍ ପାର୍ତାନା କିନାପା ଯେ, ମିଙ୍ଗେଙ୍ଗ୍ ଈଶ୍ୱର ଆତ୍ମା ଜ୍ଞାନ୍ ଆରେ ବୁଦି ହିଦେନ୍, ଇନେସ୍କି ଏପେଙ୍ଗ୍ ତା ଇଚାତାଙ୍ଗ୍ ପୁରାପୁରି ପୁଞ୍ଜେଙ୍ଗ୍ ଆଡ୍ନାଦେର୍। 10 ଆରେ ଏପେଙ୍ଗ୍ ଇନେସ୍କି ମାପୃଙ୍ଗ୍ ୱିଜୁଦିନ୍ ସନ୍ମାନ୍ ଆରେ ୱାରି କିତିଲେକେ ଜିବୁନ୍ କାଟିକିନାଦେର୍। ଏପେଙ୍ଗ୍ ୱିଜୁଦିନ୍ ହାର୍ଦି କାମାୟ୍ କିନାଦେର୍, ଆରେ ଈଶ୍ୱରତିଙ୍ଗ୍ ଆଦିକ୍ତାଙ୍ଗ୍ ଆଦିକ୍ ହାର୍ଦାଙ୍ଗ୍ ପୁଞ୍ଜେଙ୍ଗ୍ ଆଡ୍ନାଦେର୍। 11 ଆପେଙ୍ଗ୍ ଈଶ୍ୱରତିଙ୍ଗ୍ ପାର୍ତାନା କିନାପା ଯେ, ତା ମହିମା ଶାକ୍ତିନି ସାଇଜତାଙ୍ଗ୍ ମିଙ୍ଗେଙ୍ଗ୍ ଶାକ୍ତି ହିଦେନ୍। ଇନେସ୍କି ଏପେଙ୍ଗ୍ ୱିଜୁ ପର୍କାର୍ କଷ୍ଟ ୱେଡ଼ାଙ୍ଗ୍ ପା ସାସ୍ ଆରେ ସମ୍ବାଲି କିଜି ୱାରିତାଙ୍ଗ୍ ମାଞ୍ଜେଙ୍ଗ୍ ଆଡ୍ନାଦେର୍। 12 ଇନେସ୍କି ଏପେଙ୍ଗ୍ ଆବା ଈଶ୍ୱରତିଙ୍ଗ୍ ଦନ୍ଯବାଦ୍ ହିନାଦେର୍। ଆରେ ହେ ଈଶ୍ୱର ମିଙ୍ଗେଙ୍ଗ୍ ଅଜଡ଼୍ ରାଜିତାକେ ମାନି ତା ମାନାୟାର୍ ହୁଦାଙ୍ଗ୍ ମାହାଆଜି ଆଦିକାର୍ କିନି କାଜିଙ୍ଗ୍ ଯଗ୍ୟ କିତ୍ତାନ୍ନା। 13 ଇନେସ୍କି ହେୱାନ୍ ମାଙ୍ଗେଙ୍ଗ୍ ମାଜ୍ଗାନି ରାଜିତାଙ୍ଗ୍ ଉଦାର୍ କିତ୍ତାନ୍ନା। ଆରେ ତା ଲାଡ୍ନି ମେହି ସାସନ୍ କିନି ରାଜିତାକେ ମାଙ୍ଗେଙ୍ଗ୍ ଅତ୍ତାନ୍ନା। 14 ତା ମେହି ହାଃତି କାଜିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ମୁକ୍ତି ଆରେ ମା ପାପ୍ତିଙ୍ଗ୍ କେମା କିତ୍ତାନ୍ନା। ଖ୍ରୀଷ୍ଟ ନେ ୱିଜୁତାଙ୍ଗ୍ ଗାଜା 15 ଆପେଙ୍ଗ୍ ଇନାୱେଡ଼ାଙ୍ଗ୍ ଈଶ୍ୱରତିଙ୍ଗ୍ ହୁଡ଼୍ୱାତାପ୍ନା, ମାତର୍ ଏଚେପାଦ୍ନା ତା ମେହି ଯୀଶୁ ଖ୍ରୀଷ୍ଟ ମାନାୟ୍ ରୁପ୍ ଆଜି ୱାତାନ୍, ହେୱାନ୍ ଈଶ୍ୱର ଇନେସ୍ ଚଞ୍ଜ୍ନାନା ହେଦାଙ୍ଗ୍ ବୁଜା ଆଦେଙ୍ଗ୍ ମାଙ୍ଗେଙ୍ଗ୍ ସାଇଜ କିତ୍ତାନ୍। ଇନେସ୍କି ହେୱାନ୍ ଈଶ୍ୱରଲେକେ ମାଚାନ୍। ଈଶ୍ୱର ଉବ୍ଜାଇ କିତି ଆଗେ ହେୱାନ୍ ମାଚାନ୍ ଆରେ ୱିଜୁ ଉବ୍ଜାଇ କିଜି ଜିନିଷ୍ ଜପି ଗାଜା ଆଦିକାରି ମାଚାନ୍। 16 ଇନେସ୍କି ଖ୍ରୀଷ୍ଟ ନେ ଈଶ୍ୱର ହୁଦାଙ୍ଗ୍ ମାନ୍ଞ୍ଜି ୱିଜୁତିଙ୍ଗ୍ ଉବ୍ଜାଇ କିତାନ୍ନା। ସରଗ୍ ଆରେ ପୁର୍ତିନି ୱିଜୁ ଜିନିଷ୍ତିଙ୍ଗ୍, ହୁଡ଼୍ଦେଙ୍ଗ୍ ଆଡ୍ନାକା ଆରେ ହୁଡ଼୍ଦେଙ୍ଗ୍ ଆଡ୍ୱାକା, ରାଜା କି ସାସନ୍ କିନାକାରିଙ୍ଗ୍, ଆରେ ଶାକ୍ତି କି ଆଦିକାର୍ ପାୟା ଆତାକାରିଙ୍ଗ୍ ତା ହେବା କିଦେଙ୍ଗ୍ ଉବ୍ଜାଇ କିତାନ୍ନା। 17 ପୁର୍ତିନି ୱିଜୁ ଜିନିଷ୍ ଉବ୍ଜାଆୱି ଆଗେ ଖ୍ରୀଷ୍ଟ ମାଚାନ୍, ଆରେ ତା କାଜିଙ୍ଗ୍ ଟିକ୍ଟାକ୍ ଆଜି ୱିଜୁ ବିଷୟ ମାନାତ୍। 18 ମଣ୍ଡ୍ଲି ଆନାତା ଖ୍ରୀଷ୍ଟନି ଗାଗାଡ଼୍ ଲେକେ, ଆରେ ହେୱାନ୍ ନେ ମଣ୍ଡ୍ଲିନି ମୁକ୍ୟା। ହେୱାନ୍ ନେ ଆରମ୍, ଆରେ ହେୱାନ୍ ଇନେସ୍କି ୱିଜୁ ବିଷୟରେ ଗାଜାଆଦେଙ୍ଗ୍ ଆଡ୍ନାନ୍, ଇଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାନିଙ୍ଗ୍ ପାର୍ତୁମ୍ ହାଃତିତାଙ୍ଗ୍ ନିକ୍ତାନ୍ନା। 19 ଇନେସ୍କି ଆବା ଈଶ୍ୱର ଇଚା କିତାନ୍ ଯେ ଈଶ୍ୱର ୱିଜୁ ଗୁଣ୍ ଖ୍ରୀଷ୍ଟତାକେ ବାହା କିୟେତ୍। 20 ଆରେ ଖ୍ରୀଷ୍ଟତାଙ୍ଗ୍ ଈଶ୍ୱର ଜାର୍ତାକେ ୱିଜୁ ବିଷୟତିଙ୍ଗ୍ ମାହାୟ୍ କିତାନ୍ନା। ଖ୍ରୀଷ୍ଟ କୃଶକାଟ୍ତାକେ ନେତେର୍ ବଡ଼ାଆତି କାଜିଙ୍ଗ୍ ଈଶ୍ୱର ସରଗ୍ ଆରେ ପୁର୍ତିତାକେ ମାନି ୱିଜୁ ବିଷୟତିଙ୍ଗ୍ ତା ହୁଦାଙ୍ଗ୍ ଶାନ୍ତି କିତାନ୍ନା। 21 ଆରେ ଆଗେ ଏପେଙ୍ଗ୍ ପାପ୍ କାମାୟ୍ କିଜି ଈଶ୍ୱରତାଙ୍ଗ୍ ଦେହା ମାଚାଦେର୍। ଆରେ ମି ମାନ୍ ବିତ୍ରେ କରାପ୍ ଚିନ୍ତା ଆରେ କରାପ୍ କାମାୟ୍ କିଜି ଏପେଙ୍ଗ୍ ହେୱାନିଙ୍ଗ୍ ଶତ୍ରୁ ଆଜି ମାଚାଦେର୍। 22 ମାତର୍ ଖ୍ରୀଷ୍ଟ ମାନାୟ୍ ରୁପ୍ ଆଜି କୃଶକାଟ୍ତାକେ ହାଃତି କାଜିଙ୍ଗ୍ ଈଶ୍ୱର ମା ହୁଦାଙ୍ଗ୍ ମାହାଆତ୍ତାନ୍ନା। ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଏଚେକାଡ଼୍ଦ ଈଶ୍ୱର ମୁମ୍ଦ ନିଲ୍ନାଦେର୍, ହେୱାନ୍ ମିଙ୍ଗେଙ୍ଗ୍ ପବିତ୍ର ଆରେ ମି ବିରଦ୍ତାକେ ଇନେର୍ପା ନିନ୍ଦା ବେଣ୍ ୱେଚ୍ଚି ଦସି କିଦ୍ଦେଙ୍ଗ୍ ଆଡ଼୍ଦୁର୍। 23 ହେୱାନ୍ ମିଙ୍ଗେଙ୍ଗ୍ ପବିତ୍ର କିତ୍ତାନ୍ନା, ମାତର୍ ଏପେଙ୍ଗ୍ ୱିଜୁଦିନ୍ ଖ୍ରୀଷ୍ଟତାକେ ପାର୍ତି କିଜି ମାନାଟ୍। ଇନେସ୍କି ର ବାଡ଼୍କାସ୍ ପାଉଣ୍ଡେସେନ୍ ତାକେ ଇଲ୍ ମାନ୍ଗାନାତ୍ ହେଲେକେ ପାର୍ତି ଖ୍ରୀଷ୍ଟତାକେ ବାଡ଼୍କାସ୍ ଆଜି ମାନେତ୍। ହାର୍ଦିକାବୁର୍ ୱେନ୍ଞ୍ଜି ଇମ୍ଣି ଆହା ପାୟା ଆତାଦେର୍ନା ହେ ଆହାତିଙ୍ଗ୍ ଏପେଙ୍ଗ୍ ପିହ୍ମାଟ୍। ଇ ହାର୍ଦିକାବୁର୍ ପୁର୍ତିନି ଚାରିବେଣ୍ତାଙ୍ଗ୍ ଶୁଣାୟ୍ କିନାରା। ଆରେ ଆନେଙ୍ଗ୍ ପାଉଲ ଈଶ୍ୱର ଦାସ୍ ଆଜି ଇ ହାର୍ଦିକାବୁର୍ ଶୁଣାୟ୍ କିନାଙ୍ଗା। ମଣ୍ଡ୍ଲି କାଜିଙ୍ଗ୍ ପାଉଲ ହେବା କାମାୟ୍ କିତାନ୍ 24 ଆନେଙ୍ଗ୍ ମି କାଜିଙ୍ଗ୍ କଷ୍ଟ ପାୟାଆତିଲେ ୱାରି ଆନାଙ୍ଗା। ଇନେସ୍କି ଖ୍ରୀଷ୍ଟ ଗାଗାଡ଼୍ ଲେକେ ମଣ୍ଡ୍ଲିତାକେ ଇନାକା ବାକି ମାଚାତ୍, ହେଦାଙ୍ଗ୍ ପୁରା କିଦେଙ୍ଗ୍ ଖ୍ରୀଷ୍ଟ ଇନେସ୍ କଷ୍ଟ ପାୟାଆଜି ମାଚାନ୍, ହେଲେକେ ଆନେଙ୍ଗ୍ ପା ନା ଗାଗାଡ଼୍ତ କଷ୍ଟ ପାୟାଆନାଙ୍ଗା। 25 ଈଶ୍ୱର କାତା ପୁରା-ପୁରି ମିଙ୍ଗେଙ୍ଗ୍ ବୁଜାଇକିନି କାଜିଙ୍ଗ୍ ହେୱାନ୍ ନାଙ୍ଗେଙ୍ଗ୍ ଦାୟିତ୍ପ ହିତ୍ତାନ୍ନା। ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନଙ୍ଗୟ୍ ମଣ୍ଡ୍ଲିନି ଦାସ୍ ଆତାଙ୍ଗ୍ନା। 26 ଇ କାତା ବାର୍ହୁ-ବାର୍ହୁ ଆସ୍ତି ଆଗେନି ମାନାୟାର୍ତାଙ୍ଗ୍ ଡ଼ୁଗ୍ଜି ମାଚାତ୍, ମାତର୍ ନଙ୍ଗୟ୍ ଈଶ୍ୱର ମାନାୟାର୍ ଲାଗାୟ୍ ଚଞ୍ଜିଆତାତ୍। 27 ଖ୍ରୀଷ୍ଟତି ଗୌରବନି ଦନ୍ ବିନ୍ଜାତିନି ମାନାୟାରିଙ୍ଗ୍ ପା ମାନାତ୍ ଇଞ୍ଜି ଈଶ୍ୱର ତା ମାନାୟାରିଙ୍ଗ୍ ପୁନିକିଦେଙ୍ଗ୍ ଇଚା କିତାନ୍। ଖ୍ରୀଷ୍ଟ ମି ବିତ୍ରେ ବାହା କିନାନ୍ ହେଦାଙ୍ଗ୍ ଆନାତା ଡ଼ୁଗ୍ତି ବିଷୟ। ତା ଗୌରବ ପାୟାଆନି କାଜିଙ୍ଗ୍ ଇଦାଙ୍ଗ୍ ମାଙ୍ଗେଙ୍ଗ୍ ଆହା ହିଦ୍ନାତ୍। 28 ଲାଗିଙ୍ଗ୍ ଆପେଙ୍ଗ୍ ଖ୍ରୀଷ୍ଟ ବିଷୟରେ ୱିଜାକାରିଙ୍ଗ୍ ୱେଚ୍ନାପା, ଆରେ ଈଶ୍ୱର ହିଜି ମାନ୍ଞ୍ଚି ଜ୍ଞାନ୍ତାଙ୍ଗ୍ ୱିଜାକାରିଙ୍ଗ୍ ଜାଗ୍ରତ୍ କିଜି ହିକ୍ଷା ହିନାପା। ଇନେସ୍କି ଆପେଙ୍ଗ୍ ହେୱାରିଙ୍ଗ୍ ଖ୍ରୀଷ୍ଟତାକେ ଟିକ୍ ବାବ୍ରେ ମାହାଆଜି ମାନାର୍ ଇଞ୍ଜି ଈଶ୍ୱର ମୁମ୍ଦ ନିଲି କିଦେଙ୍ଗ୍ ଆପେଙ୍ଗ୍ ଇ ଲେକେ କିନାପା। 29 ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ବେସି କଷ୍ଟ କିନାଙ୍ଗା। ଲାଗିଙ୍ଗ୍ ଖ୍ରୀଷ୍ଟ ନାଙ୍ଗେଙ୍ଗ୍ କାମାୟ୍ କିଦେଙ୍ଗ୍ ଶାକ୍ତି ହିତ୍ତାନ୍ନା, ଆରେ ହେ ବେସି ଶାକ୍ତି ସାଇଜତାଙ୍ଗ୍ ଆନେଙ୍ଗ୍ ହାର୍ଦିକାବୁର୍ ଶୁଣାୟ୍ କିନାଙ୍ଗା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation