ପକ୍ୟାତାକା 8 - New Testament in Pengo Parja Languageଶାଉଲ ପାର୍ତିକିନି ମାନାୟାରିଙ୍ଗ୍ ଦୁକ୍କଷ୍ଟ ହିତି କାତା 1 ଶାଉଲ ସ୍ତିପାନତିଙ୍ଗ୍ ଅସ୍ତେଙ୍ଗ୍ ମେହାଆଜି ମାଚାନ୍। ହେ ଦିନ୍ ମାନାୟାର୍ ଯିରୁଶାଲାମ ସହର୍ତାକେ ମାନି ମଣ୍ଡ୍ଲିନି ପାର୍ତି କିନାକାରିଙ୍ଗ୍ ଦୁକ୍କଷ୍ଟ ହିତାର୍। ହେଦାଙ୍ଗ୍ କାଜିଙ୍ଗ୍ ବାଚିକିତି ଚେଲାହିରିଙ୍ଗ୍ ପିସ୍ତି ଜେକନି ୱିଜାକାର୍ ଯିହୁଦା ଜିଲ୍ଲା ଆରେ ଶମିରଣିୟ ଜିଲ୍ଲାନି ଚାରିବେଣ୍ତାଙ୍ଗ୍ ଚିନ୍ବିନ୍ ଆତାର୍। 2 କେତେକ୍ ହେନି ଈଶ୍ୱରତିଙ୍ଗ୍ ପାଣ୍ଡ୍ରାଆନି ମାନାୟାର୍ ହାଃତି ସ୍ତିପାନତିଙ୍ଗ୍ ମୁଚ୍ଚି, ତା କାଜିଙ୍ଗ୍ ବେସି ଆଡ଼୍ବାତାର୍। 3 ଶାଉଲ ଯୀଶୁତାକେ ପାର୍ତିକିନି ମଣ୍ଡ୍ଲିନି ମାନାୟାରିଙ୍ଗ୍ ଦୁକ୍କଷ୍ଟ ହିଦେଙ୍ଗ୍ ଲାଗାତାନ୍। ହେୱାନ୍ ପାର୍ତିକିନି ଆଣ୍ଡ୍ରା ଆରେ କଗ୍ଲେକାଙ୍ଗ୍ ହେୱାର୍ ଇଞ୍ଜ-ଇଞ୍ଜ ହଣ୍ଜି ଜେଲ୍ଜି ତାସି ଜଇଲ୍ ଇଞ୍ଜ ଇଡ଼୍ଜି ମାଚାନ୍। ପିଲିପ ଶମିରଣିୟ ଜିଲ୍ଲାତାକେ ହାର୍ଦିକାବୁର୍ ଶୁଣାୟ୍ କିତାନ୍ 4 ଇମ୍ଣି ପାର୍ତି କିନାକାର୍ ଯିରୁଶାଲାମ ସହର୍ ପିସ୍ତି ଚିନ୍ବିନ୍ ଆଜି ମାଚାର୍। ହେୱାର୍ ଇମେନିପଣ୍ ହାଲ୍ଜି ମାଚାର୍, ହେଇନି ହାର୍ଦିକାବୁର୍ ଶୁଣାୟ୍ କିଜି ମାଚାର୍। 5 ଚିନ୍ବିନ୍ ଆତି ପାର୍ତିକିନି ମାନାୟାର୍ ବିତ୍ରେତାଙ୍ଗ୍ ପିଲିପ ତରଦାକାନ୍ ରକାନ୍ ଶମିରଣିୟ ଜିଲ୍ଲାତାକେ ହାଚାନ୍। ହେୱାନ୍ ହେ ସହର୍ନି ମାନାୟାରିଙ୍ଗ୍ ଯୀଶୁ ନେ ଖ୍ରୀଷ୍ଟ ଇଞ୍ଜି ଶୁଣାୟ୍ କିଦେଙ୍ଗ୍ ଲାଗାତାନ୍। 6 ମାନାୟାର୍ ପିଲିପ ବେଣ୍ ୱେନ୍ଞ୍ଜି ଆରେ ହେୱାନ୍ କିତି ଚାନିଆଆନି କାମାୟ୍ ହୁଡ଼୍ଜି, ହେୱାର୍ ତା କାତାତିଙ୍ଗ୍ ମାନ୍ଦିୟାନ୍ କିଜି ୱେନ୍ଞ୍ଜି ମାଚାର୍। 7 ଏଚେପାଦ୍ନା ପିଲିପ ବୁତ୍ଆତ୍ମା ଡୁୟାଆତି ମାନାୟାରିଙ୍ଗ୍ ଆଦେସ୍ ହିଜିମାଚାନ୍, ହେ ବୁତ୍କୁ ହେୱାର୍ତାଙ୍ଗ୍ ରାଟୁଆଜି ହସିହାଲ୍ଜି ମାଚିକ୍। ଆରେ ପିଲିପ କେତେକ୍ ହେନି ହିର୍କଲ୍ ରଗ୍ଦାକାରିଙ୍ଗ୍ ଆରେ ଚଟା ମେଟାରିଙ୍ଗ୍ ହାର୍ କିଜି ମାଚାନ୍। 8 ହେଦାଙ୍ଗ୍ କାଜିଙ୍ଗ୍ ହେ ସହର୍ତାକେ ମାନି ମାନାୟାର୍ ବେସି ୱାରିୟା ଆତାର୍। ଗୁଣିଆ କାମାୟ୍ କିନି ଶିମୋନ କାତା 9 ହେ ସହର୍ତାକେ ଶିମୋନ ତର୍ଦାକାନ୍ ରକାନ୍ ମାନାୟ୍ ମାଚାନ୍। ହେୱାନ୍ ଗୁଣିଆ କାମାୟ୍ କିଜି ଶମିରଣିୟନି ଜାତିନି ମାନାୟାରିଙ୍ଗ୍ ଚାନିଆ କିଜି ମାଚାନ୍। ଆରେ ଜାର୍ତିଙ୍ଗ୍ ଗାଜାକାଙ୍ଗ୍ ଇଞ୍ଜି ୱେଚ୍ଚି ମାଚାନ୍। 10 ହେ ସହର୍ନି ହିରୁତାଙ୍ଗ୍ ଗାଜାକାର୍ ପାତେକ୍ ୱିଜାକାର୍ ହେୱାନିଙ୍ଗ୍ ମାନିକିଜି ମାଚାର୍। ଆରେ ହେୱାର୍ ୱେଚ୍ଚି ମାଚାର୍, “ଇୱାର୍ ରକାନ୍ ପେନ୍କୁ ପୁଦାଙ୍ଗ୍ତାଙ୍ଗ୍ ଶାକ୍ତି ପାୟାଆତାକାନ୍, ଲାଗିଙ୍ଗ୍ ହିନା ଏଚେକ୍ ଚାନିଆଆନି କାମାୟ୍ କିନାନା।” 11 ହେୱାନ୍ ଆଗେ ପୁର୍ବେତାଙ୍ଗ୍ ଜାର୍ ଗୁଣିଆ କାମାୟ୍ତାଙ୍ଗ୍ ହେୱାରିଙ୍ଗ୍ ଚାନିଆ କିଜି ମାଚାନ୍। ଲାଗିଙ୍ଗ୍ ମାନାୟାର୍ ହେୱାନିଙ୍ଗ୍ ମାନିକିଜି ମାଚାର୍। 12 ମାତର୍ ପିଲିପତାଙ୍ଗ୍ ଏଚେପାଦ୍ନା ଈଶ୍ୱର ରାଜି ଆରେ ଯୀଶୁ ଖ୍ରୀଷ୍ଟ ତା ତର୍ ବିଷୟରେ ହାର୍ଦିକାବୁର୍ ଶୁଣାୟ୍ କିତାକା ହେୱାର୍ ୱେଚାର୍, ଆରେ ହେୱାର୍ ଯୀଶୁଙ୍ଗ୍ ପାର୍ତି କିତାର୍। ହେପାଦ୍ନା ଆଣ୍ଡ୍ରା ଆରେ କଗ୍ଲେ ଡୁବନ୍ ଆଦେଙ୍ଗ୍ ଲାଗାତାର୍। 13 ଆରେ ଗୁଣିଆ କାମାୟ୍ କିନି ଶିମୋନ ପା ପାର୍ତି କିଜି ଡୁବନ୍ ଆତାନ୍। ଆରେ ପିଲିପ ହୁଦାଙ୍ଗ୍ ରଚେ-ରଚେ ମାଚାନ୍। ପିଲିପ ବାରବିନି ଚିନ୍ ଆରେ ଚାନିଆଆନି କାମାୟ୍ କିତାକା ହୁଡ଼୍ଜି ହେୱାନ୍ କାବା ଆତାନ୍। 14 ଶମିରଣିୟ ଜିଲ୍ଲାନି ମାନାୟାର୍ ଈଶ୍ୱର କାତା ଆସ୍ତାର୍ନା ଇଞ୍ଜି, ଯିରୁଶାଲାମ ସହର୍ତାକେ ମାନି ବାଚିକିତି ଚେଲାହିର୍ ୱେଚାର୍। ହେପାଦ୍ନା ହେୱାର୍ ପିତର ଆରେ ଯୋହନତିଙ୍ଗ୍ ହେୱାର୍ ଶମିରଣିୟ ଜିଲ୍ଲାତାକେ ପକ୍ତାର୍। 15 ହେୱାର୍ ହାଲ୍ଜି ଇକାତାର୍, ଆରେ ହେୱାର୍ ହେବେ ମାନି ପାର୍ତିକିନି ମାନାୟାର୍ ଇନେସ୍ ପବିତ୍ର ଆତ୍ମା ପାୟାଆନାର୍, ଇଦାଙ୍ଗ୍ କାଜିଙ୍ଗ୍ ହେୱାର୍ ପାର୍ତାନା କିତାର୍। 16 ହେୱାର୍ ମାପୃ ଯୀଶୁ ତର୍ଦାଙ୍ଗ୍ ଡୁବନ୍ ଅଜିମାଚାର୍। ମାତର୍ ପବିତ୍ର ଆତ୍ମା ହେୱାର୍ତାକେ ୱାୱାଦାଙ୍ଗ୍ ମାଚାତ୍। 17 ହେପାଦ୍ନା ପିତର ଆରେ ଯୋହନ ହେୱାର୍ କାପ୍ଡ଼ା ଜପି କେଇ ଇଡ଼୍ତାର୍। ଆରେ ହେୱାର୍ ପବିତ୍ର ଆତ୍ମା ପାୟାଆତାର୍। 18 ବାଚିକିତି ଚେଲାହିର୍ କାପ୍ଡ଼ାତାକେ କେଇ ଇଡ଼୍ତିସ୍ ପବିତ୍ର ଆତ୍ମା ୱାନାତା ଇଞ୍ଜି ପୁନ୍ଞ୍ଜି, ଶିମୋନ ହେୱାରିଙ୍ଗ୍ ଡାବୁଙ୍ଗ୍ ଜାଚାଇ କିଜି ୱେଚ୍ଚାନ୍, 19 “ନାଙ୍ଗେଙ୍ଗ୍ ପା ଇ ଶାକ୍ତି ହିଦାଟ୍। ଇନେସ୍କି ଆନେଙ୍ଗ୍ ପା ଇନେର୍ ଜପି କେଇ ଇଡ଼୍ତିସ୍, ହେୱାର୍ ପବିତ୍ର ଆତ୍ମା ପାୟାଆନାର୍।” 20 ମାତର୍ ପିତର ହେୱାନିଙ୍ଗ୍ ୱେଚ୍ଚାନ୍, “ନି ଡାବୁଙ୍ଗ୍ ନି ହୁଦାଙ୍ଗ୍ ନଷ୍ଟ ଆୟେକ୍, ଈଶ୍ୱର ବର୍ଦାନ୍ତିଙ୍ଗ୍ ଡାବୁଙ୍ଗ୍ ହିଜି କଡ଼୍ନାଙ୍ଗ୍ ଇଞ୍ଜି, ଏନେଙ୍ଗ୍ ବୁଲ୍ ବାବିକିତାଇ। 21 ଇ ହେବା କାମାୟ୍ କିଦେଙ୍ଗ୍ ଈଶ୍ୱର ନିଙ୍ଗେଙ୍ଗ୍ ଆଦିକାର୍ ହିଦ୍ୱାତାନ୍ନା, ଇନେସ୍କି ଈଶ୍ୱର ନିଙ୍ଗେଙ୍ଗ୍ ପୁନ୍ଞ୍ଚାନ୍ନା ଏନେଙ୍ଗ୍ ହାର୍ଦି ଚିନ୍ତା କିୱାକାଇ। 22 ଲାଗିଙ୍ଗ୍ ନି କରାପ୍ ବିଷୟତାଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ପାର୍ତାନା କିୟା। ଈଶ୍ୱର କେଜାଣେ ନି ଗରବ୍ନି ବୁଲ୍ ବାବ୍ନାତିଙ୍ଗ୍ କେମା କିଦ୍ନାନ୍। 23 ଆନେଙ୍ଗ୍ ନିଙ୍ଗେଙ୍ଗ୍ ହୁଡ଼୍ଦାନାଙ୍ଗା, ଏନେଙ୍ଗ୍ ବେସି ଆକାର୍ ଆଜି ପାପ୍ ଜାଲ୍ଦ ମାନାଇ।” 24 ହେବେତାଙ୍ଗ୍ ଗୁଣିଆ କାମାୟ୍ କିନି ଶିମୋନ ୱେଚ୍ଚାନ୍, “ଏପେଙ୍ଗ୍ ଇନାକା ୱେଚ୍ଚାଦେର୍, ହେବେନି ଇନା ବିଷୟ ପା ନା କାଜିଙ୍ଗ୍ ଗଟା ଆମେତ୍, ଲାଗିଙ୍ଗ୍ ନା କାଜିଙ୍ଗ୍ ମାପୃତାକେ ପାର୍ତାନା କିୟାଟ୍।” 25 ପିତର ଆରେ ଯୋହନ ଯୀଶୁ ମାପୃ ବିଷୟରେ ଆରେ ହାର୍ଦିକାବୁର୍ ଶୁଣାୟ୍ କିତାର୍। ହେୱାର୍ ଯିରୁଶାଲାମ ସହର୍ତାକେ ଲେଉଟା ଆଜି ହାନିହିଙ୍ଗ୍, ଶମିରଣିୟ ଜିଲ୍ଲାନି କେତେକ୍ ନାସ୍କୁକାଙ୍ଗ୍ ହାର୍ଦିକାବୁର୍ ଶୁଣାୟ୍ କିଜି ହାଚାର୍। ପିଲିପ ଇତିଅପିଆ ଅପିସର୍ ହୁଦାଙ୍ଗ୍ ଗିଟାଆତି କାତା 26 ରଦିନ୍ ଈଶ୍ୱରତି ର ଦୁତ୍ ପିଲିପତିଙ୍ଗ୍ ୱେଚ୍ଚାତ୍, “ନିଙ୍ଗା! ଯିରୁଶାଲାମ ସହର୍ତାଙ୍ଗ୍ ଗଜା ସହର୍ତାକେ ହାଞ୍ଜେଙ୍ଗ୍ ଏନେଙ୍ଗ୍ ତିନାବାଗାୟ୍ନି ହାଜ୍ଦିଙ୍ଗ୍ ହାଲା। ହେ ହାଜି ଟାଙ୍ଗ୍ରାବାହାତାକେ ମାନାତ୍।” 27 ହେବେତାଙ୍ଗ୍ ପିଲିପ ନିଙ୍ଗ୍ଞ୍ଜି ହାଚାନ୍। ଆରେ ହେୱାନ୍ ହେଦାପ୍ରେ ଇତିଅପିଆ ଦେସ୍ତି ବେଜୁଙ୍ଗ୍ ଗିଟାଆତାନ୍, ହେ ବେଜୁ ଇତିଅପିଆ ଦେସ୍ତି କାଣ୍ଡାକି ତର୍ଦି ରାଣିନି ଦନ୍ସମ୍ଫତି ଦେକାଶୁଣା କିଦେଙ୍ଗ୍ ରକାନ୍ ଗାଜା ଅପିସର୍ ମାଚାନ୍। ହେୱାନ୍ ଈଶ୍ୱରତିଙ୍ଗ୍ ପୁଜା କିଦେଙ୍ଗ୍ ଯିରୁଶାଲାମ ସହର୍ତାକେ ୱାଜିମାଚାନ୍। 28 ହେୱାନ୍ ଲେଉଟା ଆଜି ହାନିହିଙ୍ଗ୍ ରତତାକେ କୁଚ୍ଚି ଯିଶାୟ ଭବିଷ୍ଯତବକ୍ତା ଦରମ୍ ସାସ୍ତର୍ ଗାଜାକାଟ୍ କିଜି ପଡ଼ିକିଜି ମାଚାନ୍। 29 ହେପାଦ୍ନା ପବିତ୍ର ଆତ୍ମା ପିଲିପତିଙ୍ଗ୍ ୱେଚ୍ଚାତ୍, “ଏନେଙ୍ଗ୍ ରତ ଲାଗାୟ୍ ହାଲା।” 30 ହେବେତାଙ୍ଗ୍ ପିଲିପ ହନ୍ଚି ହାଲ୍ଜି ହେ ରତ୍ ଲାଗାୟ୍ ଇକାତାନ୍, ଆରେ ଇତିଅପିଆ ଯିଶାୟ ଭବିଷ୍ଯତବକ୍ତା ଦରମ୍ ସାସ୍ତର୍ ପଡ଼ିକିନାକା ପିଲିପ ୱେଚାନ୍। ପିଲିପ ହେୱାନିଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇନାକା ପଡ଼ିକିନାୟା, ହେଦାଙ୍ଗ୍ ଇନାକା ବୁଜାଆନାୟା କି?” 31 ହେ ଇତିଅପିଆ ଅପିସର୍ ୱେଚ୍ଚାନ୍, “ଇନେର୍ ନାଙ୍ଗେଙ୍ଗ୍ ବୁଜାଇ କିଦ୍ୱିତିସ୍, ଆନେଙ୍ଗ୍ ଇନେସ୍ କିଜି ବୁଜା ଆଦେଙ୍ଗ୍ ଆଡ୍ନାଙ୍ଗ୍। ଆରେ ହେୱାନ୍ ତା ହୁଦାଙ୍ଗ୍ ପିଲିପତିଙ୍ଗ୍ ରତ୍ତାକେ କୁଚ୍ଚେଙ୍ଗ୍ ଗୁୱାରି କିତାନ୍।” 32 ହେ ଅପିସର୍ ସାସ୍ତର୍ନି ଇ ବିଷୟତିଙ୍ଗ୍ ପଡ଼ିକିଜି ମାଚାନ୍, “ମେଣ୍ଢାତିଙ୍ଗ୍ ଅସ୍ତେଙ୍ଗ୍ ଅତି ଲେକେ ମାନାୟାର୍ ହେୱାନିଙ୍ଗ୍ ପା ଅତାର୍। ଆରେ ମେଣ୍ଢା ତେମୁଲ୍ତିଙ୍ଗ୍ କୁରାଇ କିନାକାର୍ ଲାଗାୟ୍ ମେଣ୍ଢା ଇନେସ୍ ଚିମ୍ରା ଆଜିମାନାତ୍, ହେଲେକେ ନେ ମାନାୟାର୍ ହେୱାନିଙ୍ଗ୍ କଷ୍ଟ ହିନିହିଙ୍ଗ୍ ହେୱାନ୍ ଇନାକାପା ଇନ୍ୱାତାନ୍। 33 ହେୱାନ୍ ନିଜେ ହିରୁକାନ୍ଲେକେ ଆତାନ୍, ମାତର୍ ହେୱାନିଙ୍ଗ୍ ନ୍ୟାୟ୍ ଗାଟାଆୱାତାତ୍। ତା ଲାତ୍ରା ବିଷୟରେ ଇନେର୍ ପା ୱେଚ୍ଚେଙ୍ଗ୍ ଆଡୁର୍, ଇନେସ୍କି ପୁର୍ତିତାକେ ଲାତ୍ରା ଆୱାଦାଙ୍ଗ୍ ନେ ମାନାୟାର୍ ହେୱାନିଙ୍ଗ୍ ଅସ୍ତାର୍।” 34 ହେ ଅପିସର୍ ପିଲିପତିଙ୍ଗ୍ ୱେନ୍ବାତାନ୍, “ଭବିଷ୍ଯତବକ୍ତା ଇନେର୍ ବିଷୟରେ ଇବେଣ୍ ୱେଚ୍ନାନା, ହେୱାନ୍ ଜାର୍ ବିଷୟରେ କି ଆରେ ଇନେର୍ ବିଷୟରେ ୱେଚ୍ନାନା, ନାଙ୍ଗେଙ୍ଗ୍ ଅଲପ୍ ବୁଜାଇ କିଦା?” 35 ଲାଗିଙ୍ଗ୍ ପିଲିପ ହେ ପଡ଼ିକିତି ସାସ୍ତର୍ ବିଷୟରେ ବୁଜାଇ କିତାନ୍। ଆରେ ହେୱାନ୍ ଯୀଶୁ ବିଷୟରେ ପା ହାର୍ଦିକାବୁର୍ ଶୁଣାୟ୍ କିତାନ୍। ଲାଗିଙ୍ଗ୍ ହେ ଅପିସର୍ ବୁଜା ଆତାନ୍ ଆରେ ଯୀଶୁତାକେ ପାର୍ତି କିତାନ୍। 36 ଆରେ ହେୱାର୍ ହାନିହିଙ୍ଗ୍ ହାଜି ଲାଗାୟ୍ ର ବାନ୍ଦ୍ତାକେ ଇକାତାର୍। ଲାଗିଙ୍ଗ୍ ହେ ଅପିସର୍ ପିଲିପତିଙ୍ଗ୍ ୱେଚ୍ଚାନ୍, “ଏହେଁ ତ ବାନ୍ଦ୍ ମାନାତ୍, ନାଙ୍ଗେଙ୍ଗ୍ ଏନେଙ୍ଗ୍ ଡୁବନ୍ ହିଦ୍ନି କାଜିଙ୍ଗ୍ ଇନାକା ବାଦା ମାନାତ୍ କି?” 37 ପିଲିପ ହେୱାନିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଯଦି ନି ମାନ୍ ହିଜି ପାର୍ତି କିତିସ୍, ଲାଗିଙ୍ଗ୍ ଏନେଙ୍ଗ୍ ଡୁବନ୍ ଅଦେଙ୍ଗ୍ ଆଡ୍ନାଇ।” ହେବେତାଙ୍ଗ୍ ହେ ଅପିସର୍ ୱେଚ୍ଚାନ୍, “ଯୀଶୁ ଖ୍ରୀଷ୍ଟ ଈଶ୍ୱର ମେହି, ଇଦାଙ୍ଗ୍ ଆନେଙ୍ଗ୍ ପାର୍ତି କିନାଙ୍ଗା” 38 ହେ ଅପିସର୍ ରତ ନିଲି କିଦେଙ୍ଗ୍ ଆଦେସ୍ ହିତାନ୍। ପିଲିପ ଆରେ ଅପିସର୍ ରିକାର୍ ପା ବାନ୍ଦ୍ ବିତ୍ରେ ହାଚାର୍। ଆରେ ପିଲିପ ହେ ଅପିସର୍ତିଙ୍ଗ୍ ଡୁବନ୍ ହିତାନ୍। 39 ହେୱାର୍ ଏଜୁଙ୍ଗ୍ତାଙ୍ଗ୍ ନିଙ୍ଗ୍ଞ୍ଜି ୱାନିହିଙ୍ଗ୍, ପବିତ୍ର ଆତ୍ମା ପିଲିପତିଙ୍ଗ୍ ହେଦାପ୍ରେ ଅସିହାଚାତ୍। ଆରେ ହେ ଅପିସର୍ ପିଲିପତିଙ୍ଗ୍ ହୁଡ଼୍ୱାତାନ୍, ମାତର୍ ଈଶ୍ୱର ହେୱାନିଙ୍ଗ୍ ରକ୍ଷା କିତ୍ତାନ୍ନା ଇଞ୍ଜି ପୁନ୍ଞ୍ଜି ହେୱାନ୍ ୱାରିଆଜି ତା ଦେସ୍ତ ହାଚାନ୍। 40 ମାତର୍ ପିଲିପ ଅସ୍ଦୋଦ୍ ତର୍ଦି ସହର୍ତାକେ ଚଞ୍ଜିଆତାନ୍। ଆରେ ହେୱାନ୍ ହେ ସହର୍ନି ନାସ୍କୁକାଙ୍ଗ୍ ହାର୍ଦିକାବୁର୍ ଶୁଣାୟ୍ କିଉ-କିଉ କାଇସରିଆ ସହର୍ତାକେ ଇକାତାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation