ପକ୍ୟାତାକା 7 - New Testament in Pengo Parja Languageସ୍ତିପାନ ବାଷଣ୍ ହିତି କାତା 1 ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ସ୍ତିପାନତିଙ୍ଗ୍ ୱେନ୍ବାତାନ୍, ମାନାୟାର୍ ନି ବିରଦ୍ତାକେ ଇମ୍ଣିବେଣ୍ ଇନାକା ସତ୍ କି? 2 ସ୍ତିପାନ ୱେଚ୍ଚାନ୍, “ଏ ଟଣ୍ଡାର୍କାଦେର୍ ଆରେ ଆଜ୍ଞା କାଦେର୍, ଆନେଙ୍ଗ୍ ୱେଚ୍ଚି କାତା ୱେନାଟ୍, ମା ଆକଦାଦି ଅବ୍ରାହାମ ହାରଣ ସହର୍ତାକେ ବାହା କିୱି ଆଗେ, ହେୱାନ୍ ମେସପଟାମିଆ ଦେସ୍ତାକେ ମାଚାନ୍। ହେପାଦ୍ନା ବେସି ଗୌରବମାନି ଈଶ୍ୱର ହେୱାନିଙ୍ଗ୍ ଚଞ୍ଜି ଆଜି ୱେଚ୍ଚାନ୍, 3 ‘ଏନେଙ୍ଗ୍ ଦେସ୍ ଆରେ ନି ପରିବାର୍ତିଙ୍ଗ୍ ପିସ୍ତି, ଆନେଙ୍ଗ୍ ଇମ୍ଣି ଦେସ୍ ଚଚ୍ଚାନାଙ୍ଗ୍ ହେ ଦେସ୍ତ ହାଲା।’ 4 ଲାଗିଙ୍ଗ୍ ମା ଆକଦାଦି ଅବ୍ରାହାମ କଲଦିୟ ମାନାୟ୍ ମାନି ମେସପଟାମିଆ ଦେସ୍ତିଙ୍ଗ୍ ପିସ୍ତି ହାରଣ ସହର୍ତାକେ ବାହା କିତାନ୍। ଆରେ ଲାତ୍ରାହି ହାଃତି ପାଚେ ଈଶ୍ୱର ଆସେଙ୍ଗ୍ ଇମ୍ଣି ଦେସ୍ତାକେ ବାହାକିନାସା ହେ ଦେସ୍ତାକେ ହେୱାନିଙ୍ଗ୍ ତାସିୱାତାନ୍। 5 ମାତର୍ ଈଶ୍ୱର ଅବ୍ରାହାମତିଙ୍ଗ୍ ଇନାକାପା ଆଦିକାର୍ ହିୱାତାନ୍, ଇନେସ୍କି ର କାଲ୍ପାନା ଏଚେକ୍ ପା ଜମି ହିୱାତାନ୍। ହେପାଦ୍ନା ଈଶ୍ୱର ହେୱାନିଙ୍ଗ୍ ପାର୍ମାଣ୍ କିଜି ୱେଚ୍ଚି ମାଚାନ୍, ‘ଏନେଙ୍ଗ୍ ଆରେ ନି ହିମ୍ଣାୱାକ୍ଡ଼ା ଇ ଦେସ୍ତିଙ୍ଗ୍ ଆଦିକାର୍ କିନାଦେର୍ ଇଞ୍ଜି।’ ମାତର୍ ହେପାଦ୍ନା ହେୱାନିଙ୍ଗ୍ ହିମ୍ଣାୱାକ୍ଡ଼ା ପା ହିଲ୍ୱାତାର୍। 6 ଈଶ୍ୱର ହେୱାନିଙ୍ଗ୍ ଇଦାଙ୍ଗ୍ ପା ୱେଚ୍ଚାନ୍, ‘ନି ଲାତ୍ରାନି ହିମ୍ଣାଙ୍ଗ୍ ବିନ୍ ଦେସ୍ତାକେ ବାହା କିନାର୍। ଆରେ ବିନ୍ ଦେସ୍ତାକାର୍ତାକେ ନି ହିମ୍ଣା ୱାକ୍ଡ଼ାରିଙ୍ଗ୍ ହଲିଆ କିନାର୍, ଆରେ ହେୱାର୍ ହେୱାରିଙ୍ଗ୍ ଚାରିଶହ ବାର୍ହୁ ପାତେକ୍ ବେସି ଗତିକାଟି କିୟିକିନାର୍।’ 7 ଆରେ ଈଶ୍ୱର ୱେଚ୍ଚାନ୍, ‘ନି ହିମ୍ଣା ୱାକ୍ଡ଼ାରିଙ୍ଗ୍ ଇନେର୍ ହଲିଆ କିଜି ମାନ୍ଗାନାର୍ ଆନେଙ୍ଗ୍ ହେୱାରିଙ୍ଗ୍ ବିଚାର୍ କିନାଙ୍ଗ୍। ଆରେ ହେ ଜାତିନିକାରିଙ୍ଗ୍ ତାହିୱାଜି ଇ ଦେସ୍ତାକେ ବାହା କିୟିକିନାଙ୍ଗ୍। ଆରେ ହେୱାର୍ ନା ପୁଜା କିନାର୍।’ 8 ଈଶ୍ୱର ଅବ୍ରାହାମତିଙ୍ଗ୍ ପାର୍ମାଣ୍କିତି ସୁନତ କିନି ବିଦିନି ନିୟମ୍ ହିତାନ୍। ପାଚେ ଏଚେପାଦ୍ନା ଅବ୍ରାହାମ ଇସାକତିଙ୍ଗ୍ ଜନମ୍ ହିତାନ୍, ଆରେ ହେୱାନ୍ ତା ମେହି ଇସାକତିଙ୍ଗ୍ ଆଟ୍ଦିନ୍ତ ସୁନତ କିତାନ୍। ହେଲେକେ ଇସାକ ଯାକୁବଙ୍ଗ୍ ସୁନତ କିତାନ୍, ଆରେ ଯାକୁବ ତା ବାରଜାଣ୍ ମେହିରିଙ୍ଗ୍ ସୁନତ କିତାନ୍। ହେୱାର୍ ମା ବାରଗଟା ଗଷ୍ଟିନି ଆକଦାଦିର୍। 9 ଇ ଆକଦାଦିର୍ ତା ହିରୁ ଟଣ୍ଡାହି ଯୋଷେପତିଙ୍ଗ୍ ଆକାର୍ ଆତାର୍। ଆରେ ହେୱାନିଙ୍ଗ୍ ର ହଲିଆ କିଜି ମିସର୍ ଦେସ୍ତ ପତାର୍। ମାତର୍ ଈଶ୍ୱର ଯୋଷେପତିଙ୍ଗ୍ ସାଇଜ କିଜି ମାଚାନ୍। 10 ଆରେ ଈଶ୍ୱର ଯୋଷେପତିଙ୍ଗ୍ ୱିଜୁ ଦୁଃକ୍କଷ୍ଟତାଙ୍ଗ୍ ଉଦାର୍ କିତାନ୍। ଈଶ୍ୱର ହେୱାନିଙ୍ଗ୍ ବୁଦି ହିତାନ୍, ଆରେ ମିସର ଦେସ୍ ରାଜା ଫାର ମୁମ୍ଦ ଦୟା କିୟିକିତାନ୍। ହେବେତାଙ୍ଗ୍ ଫାର ହେୱାନିଙ୍ଗ୍ ମିସର୍ ଦେସ୍ ଆରେ ତା ଦନ୍ସମ୍ପତିଙ୍ଗ୍ ଦେକାଶୁଣା କିଦେଙ୍ଗ୍ ଦାଇତ୍ପ ହିତାନ୍। 11 ଏଚେପାଦ୍ନା ଯୋଷେପ ଗବର୍ନର୍ ଆଜି ମାଚାନ୍, ମିସର ଦେସ୍ ଆରେ କିଣାନ ଦେସ୍ତାକେ ମାର୍ଡି ଆତାତ୍, ଆରେ ବେସି ଦୁଃକ୍ ଗଟାଆତାତ୍, ମା ଆକଦାଦିର୍ ଚିଞ୍ଜେଙ୍ଗ୍ କାଦି ଗାଟା ଆୱାତାର୍। 12 ହେପାଦ୍ନା ଯାକୁବ ମିସର ଦେସ୍ତାକେ କାଦି ମାନାତ୍ ଇଞ୍ଜି ୱେଚାନ୍। ଆରେ ହେୱାନ୍ ତା ମେହିର୍ ମା ଆକାଦାଦିରିଙ୍ଗ୍ ହେ ଦେସ୍ତାକେ କାଦି କଡ଼୍ଜି ତାତେଙ୍ଗ୍ ପକ୍ତାନ୍। ହେୱାର୍ ଯୋଷେପତିଙ୍ଗ୍ ଗିଟାଆଜି କାଦି କଡ଼୍ତାର୍, ମାତର୍ ହେୱାନିଙ୍ଗ୍ ମା ଆକଦାଦିର୍ ଇଞ୍ଜି ଚିନ୍ କିଦେଙ୍ଗ୍ ଆଡ୍ୱାତାର୍। 13 ଆରେରଗ ଯୋଷେପ ତା ଟଣ୍ଡାହିରିଙ୍ଗ୍ ଚିନାପରିଚ ଆତାନ୍। ଲାଗିଙ୍ଗ୍ ଫାର ଯୋଷେପ କୁଟୁମ୍ ବିଷୟରେ ପୁଞ୍ଜେଙ୍ଗ୍ ଆଡ଼୍ତାନ୍। 14 ତାପାଚେ ଯୋଷେପ ତା ଆବା ଯାକୁବ ଆରେ ସତୁରି ପାଞ୍ଚ୍ ଜାଣ୍ତିଙ୍ଗ୍ ତା ଜାତି କୁଟୁମ୍ ୱିଜାକାରିଙ୍ଗ୍ କୁକ୍ତେଙ୍ଗ୍ ପକ୍ତାନ୍। 15 ଲାଗିଙ୍ଗ୍ ଯାକୁବ ମିସର ଦେସ୍ତ ହାଚାନ୍। କେତ୍ଦିନ୍ ପାଚେ ଯୋଷେପ ଆରେ ମା ୱିଜୁ ଆକଦାଦିର୍ ହାଃତାର୍। 16 ମାତର୍ ହେୱାର୍ କୁଟୁମ୍ ନିକାର୍ ତା ହାଃତି ଗାଗାଡ଼୍ତିଙ୍ଗ୍ ଶିକିମ ସହର୍ତାକେ ତାତାର୍। ଆରେ ଅବ୍ରାହାମ ହମର ହିମ୍ଣା ୱାକ୍ଡ଼ାର୍ତାଙ୍ଗ୍ ରୁପାଡାବୁ ହିଜି ଶିକିମ ସହର୍ତାକେ ର ଜମି କଡ଼୍ଜି ମାଚାର୍। ହେୱାର୍ ହେ ଜିମିତାକେ ହେୱାରିଙ୍ଗ୍ ମୁଚ୍ଚାର୍। 17 ମାତର୍ ଈଶ୍ୱର ଅବ୍ରାହାମତାକେ ଇମ୍ଣି ପାର୍ମାଣ୍ କିଜି ମାଚାନ୍, ହେ ପାର୍ମାଣ୍ ପୁରା ଆନି ସମୟ୍ ଲାଗେ ଆଜି ୱାତିଲେ, ମାନାୟାର୍ ମିସର ଦେସ୍ତାକେ ବାଡା ଆଜି ବେସିହେନି ଆତାର୍। 18 ତାପାଚେ ମିସର ଦେସ୍ତାକେ ଆରେ ରକାନ୍ ରାଜା ଆତାନ୍। ହେୱାନ୍ ଯୋଷେପତିଙ୍ଗ୍ ପୁନ୍ୱାଦାଙ୍ଗ୍ ମାଚାନ୍। 19 ହେୱାନ୍ ମା ମାନାୟାର୍ କାଜିଙ୍ଗ୍ ବେସି କୁଟ୍ବୁଦି କିତାନ୍। ଆରେ ହେୱାନ୍ ହେୱାରିଙ୍ଗ୍ ବେସି ଇନସ୍ତାକିଜି ଦୁକ୍କଷ୍ଟ ହିତାନ୍। ଇନେସ୍କି ତା ହିମ୍ଣା ୱାକ୍ଡ଼ାକାଙ୍ଗ୍ ବାର୍ତ ତୁସିହିଜି ଅସ୍ତେଙ୍ଗ୍ ଲାତ୍ରାହିରିଙ୍ଗ୍ ଆଦେସ୍ ହିତାନ୍। 20 ହେପାଦ୍ନା ମୋଶା ଭବିଷ୍ଯତବକ୍ତା ଜନମ୍ ଆତାନ୍। ହେୱାନ୍ ଈଶ୍ୱର କାଣ୍କୁକାଙ୍ଗ୍ ବେସି ହଲ୍ନାକାନ୍ ମାଚାନ୍। ଆରେ ତିନ୍ମାସ୍ ପାତେକ୍ ତାଞ୍ଜବାର୍ ଡ଼ୁକ୍ଚି ହେୱାନିଙ୍ଗ୍ ପହା କିତାର୍। 21 ଏଚେପାଦ୍ନା ଲାତ୍ରାହିର୍ ହେ ହିମ୍ଣାତିଙ୍ଗ୍ ଡ଼ୁକ୍ଚି ଇଡ଼୍ଜି ମାଞ୍ଜେଙ୍ଗ୍ ଆଡ୍ୱାତାର୍ ହେୱାନିଙ୍ଗ୍ ଇଲ୍ ବାର୍ତ ତୁସିହିତାର୍। ହେପାଦ୍ନା ଫାର ଡକ୍ରୁହି ହେୱାନିଙ୍ଗ୍ ନିକ୍ଚି ଅଜି ଜାର୍ ହିମ୍ଣା ଲେକେ ପହା କିତାତ୍। 22 ଆରେ ମୋଶା ଭବିଷ୍ଯତବକ୍ତା ମିସର ଦେସ୍ତି ୱିଜୁ ପର୍କାର୍ନି ବୁଦି ହିକାଆତାନ୍, ଆରେ କାତା ୱେଚ୍ଚେଙ୍ଗ୍ ଆରେ କାମାୟ୍ କିଦେଙ୍ଗ୍ ଶାକ୍ତି ମାଚାନ୍। 23 ମୋଶା ଚାଲିଶ୍ ବାର୍ହୁ ଆତିଲେ ହେୱାନ୍ ତା ଟଣ୍ଡାର୍ ଇସ୍ରାଏଲ ଜାତିନି ମାନାୟାରିଙ୍ଗ୍ ମେହାଆଦେଙ୍ଗ୍ ଇଚା କିତାନ୍। 24 ହେପାଦ୍ନା ରକାନ୍ ମିସର ଦେସ୍ତି ମାନାୟ୍ ଇସ୍ରାଏଲ ଜାତିନି ରକାନ୍ ମାନାୟ୍ତିଙ୍ଗ୍ ଅନ୍ୟାୟ୍ କିନାକା ମୋଶା ହୁଡ଼୍ଜି, ହେୱାନ୍ ତା ନିପଣ୍ ଆତାନ୍, ଆରେ ହେୱାନ୍ ମିସର ଦେସ୍ତି ହେୱାନିଙ୍ଗ୍ ମାର୍ନେ ଅସ୍ତି ତା ବାଦ୍ଲା ଅତାନ୍। 25 ମୋଶା ଇଚାକିଜି ମାଚାନ୍, ଈଶ୍ୱର ହେୱାନିଙ୍ଗ୍ ତା ଟଣ୍ଡାହିରିଙ୍ଗ୍ ମିସର ଦେସ୍ନି ହଲିଆତାଙ୍ଗ୍ ଉଦାର୍ କିଦେଙ୍ଗ୍ ବାଚିକିତ୍ନ୍ନା ଇଞ୍ଜି ମାନାୟାର୍ ପୁନେର୍ ଇଞ୍ଜି ହେୱାନ୍ ବାବିକିଜି ମାଚାନ୍। ମାତର୍ ହେୱାର୍ ଇଦାଙ୍ଗ୍ ବୁଜା ଆଦେଙ୍ଗ୍ ଆଡ୍ୱାତାର୍। 26 ତା ଆର୍କାତ୍ ନାଞ୍ଜିଙ୍ଗ୍ ହେୱାର୍ ଇସ୍ରାଏଲ ଜାତିନି ମାନାୟାର୍ ନେ ରିକାର୍ ମାଡ୍ଗଲ୍ ଆନିହିଙ୍ଗ୍ ହେୱାନ୍ ହୁଡ଼୍ତାନ୍। ଆରେ ହେ ରିକାରିଙ୍ଗ୍ ମେହାଇ କିଦେଙ୍ଗ୍ ଇଚାକିଜି ୱେଚ୍ଚାନ୍, ‘ଏପେଙ୍ଗ୍ ତ ଟଣ୍ଡ୍ରିୟାଦେର୍, ଇନା କିଦେଙ୍ଗ୍ ଜାର୍-ଜାର୍ବିତ୍ରେ ମାଡ୍ଗଲ୍ ଆନାଦେରା?’ 27 ମାତର୍ ଇମ୍ଣାକାନ୍ ତା ଟଣ୍ଡାରିଙ୍ଗ୍ ଅନ୍ୟାୟ୍ କିଜି ମାଚାନ୍, ହେୱାନ୍ ମୋଶାଙ୍ଗ୍ ହେମ୍ଲାଇ କିଜି ୱେଚ୍ଚାନ୍, ‘ଇନେର୍ ନିଙ୍ଗେଙ୍ଗ୍ ମା ଜପି ସାସନ୍ କିଦେଙ୍ଗ୍ ଆରେ ବିଚାର୍ କିଦେଙ୍ଗ୍ ଆଦିକାର୍ ହିତ୍ତାନ୍ନା? 28 ନିହିଙ୍ଗ୍ ଇନେସ୍ ହେ ମିସର୍ନି ମାନାୟ୍ତିଙ୍ଗ୍ ଅସ୍ତାଇ, ହେଲେକେ କି ନାଙ୍ଗେଙ୍ଗ୍ ପା ଅସ୍ତେଦେଙ୍ଗ୍ ଇଚା ହିଦ୍ନାୟା?’ 29 ମୋଶା ଇବେଣ୍ ୱେନ୍ଞ୍ଜି ହେ ବାହାତାଙ୍ଗ୍ ମିଦିୟନ ଦେସ୍ତାକେ ହାଲ୍ଜି ବାହା କିତାନ୍। ହେବେ ତା ରିକାର୍ ମେହି ଜନମ୍ ଆତାର୍। 30 ମୋଶା ମିଦିୟନ ଦେସ୍ତାକେ ଚାଲିଶ୍ ବାର୍ହୁ ବାହାକିତି ପାଚେ, ସିନୟ ମାଡ଼ିନି ଟାଙ୍ଗ୍ରାବାହାତାକେ ରଞ୍ଜାଙ୍ଗ୍ କାଚାଆନି ବୁଟାତାଙ୍ଗ୍ ଈଶ୍ୱର ଦୁତ୍ ଲେକେ ଆଜି ମୋଶାଙ୍ଗ୍ ଚଞ୍ଜିଆତାନ୍। 31 ମୋଶା ହେ ବୁଟା କାଚାଆଜି ପା କାଡୁତା ଇଦାଙ୍ଗ୍ ହୁଡ଼୍ଜି ଚାନିଆ ଆତାନ୍। ଆରେ ହେଦାଙ୍ଗ୍ତିଙ୍ଗ୍ ହାର୍ଦାଙ୍ଗ୍ ହୁଡ଼୍ନି କାଜିଙ୍ଗ୍ ଲାଗାୟ୍ ହାନିହିଙ୍ଗ୍ ଈଶ୍ୱର ହେୱାନିଙ୍ଗ୍ ୱେଚ୍ଚାନ୍, 32 ‘ଆନେଙ୍ଗ୍ ମି ଆକଦାଦିର୍ ଅବ୍ରାହାମ୍, ଇସାକ ଆରେ ଯାକୁବନି ଈଶ୍ୱର।’ ଇଦାଙ୍ଗ୍ ୱେନ୍ଞ୍ଜି ମୋଶା ତ୍ରିଗ୍ଜି ହାର୍ଦାଙ୍ଗ୍ ହୁଡ଼୍ଦେଙ୍ଗ୍ ଶାସ୍ କିୱାତାନ୍। 33 ତାପାଚେ ଈଶ୍ୱର ହେୱାନିଙ୍ଗ୍ ୱେଚ୍ଚାନ୍, ‘ଏନେଙ୍ଗ୍ ନାଙ୍ଗେଙ୍ଗ୍ ସନ୍ମାନ୍ କିଦ୍ଦେଙ୍ଗ୍ ନି କାଲ୍ନି ପାଣ୍ଡାୟ୍ ରିକା, ଇନେସ୍କି ଇଦାଙ୍ଗ୍ ପବିତ୍ର ମେଦ୍ନି। 34 ମିସର ଦେସ୍ତ ମା ଇମ୍ଣାକାର୍ ମାନାର୍, ଆନେଙ୍ଗ୍ ହେୱାର୍ ଦୁକ୍ ହୁଡ଼୍ତାଙ୍ଗ୍ନା ଆରେ ହେୱାର୍ ଆଡ଼୍ବାନାକା ପା ୱେଚାଙ୍ଗ୍ନା, ଲାଗିଙ୍ଗ୍ ହେୱାରିଙ୍ଗ୍ ଉଦାର୍ କିଦେଙ୍ଗ୍ ୱାତାଙ୍ଗ୍ନା। ଆରେ ନଙ୍ଗୟ୍ ୱା, ଆନେଙ୍ଗ୍ ନିଙ୍ଗେଙ୍ଗ୍ ମିସର୍ ଦେସ୍ତାକେ ଆରେରଗ ପକ୍ତାନାଙ୍ଗ୍।’ 35 ଇ ମୋଶାଙ୍ଗ୍ ଇସ୍ରାଏଲ ଜାତି ନିକାର୍ ମାନିକିୱାଦାଙ୍ଗ୍ ମାଚାର୍। ଆରେ ହେୱାର୍ ହେୱାନିଙ୍ଗ୍ ୱେଚ୍ଚାର୍, ‘ମାଙ୍ଗେଙ୍ଗ୍ ସାସନ୍ କିଦେଙ୍ଗ୍ ଆରେ ବିଚାର୍ କିଦେଙ୍ଗ୍ ଇନେର୍ ନିଙ୍ଗେଙ୍ଗ୍ ବାଚି କିତ୍ତାନ୍ନା?’ ମାତର୍ ଈଶ୍ୱର ବୁଟାତାଙ୍ଗ୍ ମଶାଙ୍ଗ୍ ଚଞ୍ଜିଆତାନ୍, ଆରେ ଦୁତ୍ ମଶାଙ୍ଗ୍ ହେୱାରିଙ୍ଗ୍ ସାସନ୍ କିଦେଙ୍ଗ୍ ଆରେ ମିସର ଦେସ୍ନି ହଲିଆ କାମାୟ୍ତାଙ୍ଗ୍ ଉଦାର୍ କିଦେଙ୍ଗ୍ ହେୱାନିଙ୍ଗ୍ ପକ୍ତାନ୍ନା 36 ଆରେ ହେୱାନ୍ ମିସର ଦେସ୍ତାଙ୍ଗ୍ ହେୱାରିଙ୍ଗ୍ ହପ୍ଚି ତାତାନ୍। ହେୱାନ୍ ମିସର ଦେସ୍ତାକେ, ସୁପ ହାମ୍ଦୁର୍ତାକେ ଆରେ ଚାଲିଶ୍ ବାର୍ହୁ ପାତେକ୍ ଟାଙ୍ଗ୍ରାବାହାତାକେ ବାରବିନି ଚାନିଆଆନି କାମାୟ୍ କିତାନ୍। 37 ଇବେଣ୍ ମୋଶା ଇସ୍ରାଏଲନି ମାନାୟାରିଙ୍ଗ୍ ୱେଚ୍ଚାନ୍, ‘ଈଶ୍ୱର ମି ଟଣ୍ଡାର୍ ବିତ୍ରେତାଙ୍ଗ୍ ମି କାଜିଙ୍ଗ୍ ନା ଲେକେ ରକାନ୍ ଭବିଷ୍ଯତବକ୍ତାତିଙ୍ଗ୍ ପକ୍ନାନ୍।’ 38 ହେୱାର୍ ଏଚେପାଦ୍ନା ଟାଙ୍ଗ୍ରାବାହାତାକେ ରବେଆଜି ମାଚାର୍, ହେପାଦ୍ନା ଇ ମଶା ମା ଆକଦାଦିର୍ ଭବିଷ୍ଯତବକ୍ତା ମାଚାନ୍। ଈଶ୍ୱର ମଶା ଲାଗାୟ୍ ର ଦୁତ୍ତିଙ୍ଗ୍ ପକ୍ତାନ୍, ହେ ଦୁତ୍ ହେୱାନ୍ ହୁଦାଙ୍ଗ୍ ସିନୟ ମାଡ଼ିତାକେ ବେଣ୍କିତାନ୍, ଆରେ ମା ନିୟମ୍ ସାସ୍ତର୍ ହେୱାନିଙ୍ଗ୍ ହିତାର୍। ଆରେ ମଶା ମା ଆକଦାଦିରିଙ୍ଗ୍ ହେ ନିୟମ୍ ସାସ୍ତର୍ ହିତ୍ତାନ୍। ଈଶ୍ୱର ମଶାଙ୍ଗ୍ ଜିବୁନ୍ହିନି କାତାହିତାନ୍, ଆରେ ହେୱାନ୍ ମାଙ୍ଗେଙ୍ଗ୍ ହିତ୍ତାନ୍ନା। 39 ମାତର୍ ମା ଆକଦାଦିର୍ ହେୱାନ୍ କାତା ୱେଞ୍ଜେଙ୍ଗ୍ ଇଚା କିୱାତାର୍ ଆରେ ହେୱାନିଙ୍ଗ୍ ମାନ୍କିୱାତାର୍। ଆରେ ହେ ମାନାୟାର୍ ମିସର ଦେସ୍ତାକେ ଲେଉଟା ଆଜି ହାଞ୍ଜେଙ୍ଗ୍ ଇଚାକିତାର୍। 40 ହେଦାଙ୍ଗ୍ କାଜିଙ୍ଗ୍ ମୋଶା ଗାଜା ଟଣ୍ଡାହି ହାରଣତିଙ୍ଗ୍ ୱେଚ୍ଚାନ୍, ‘ମାଙ୍ଗେଙ୍ଗ୍ ଆଗେ-ଆଗେ ଆଜି ହାଜି ଚଚ୍ଚେଦେଙ୍ଗ୍ ମା କାଜିଙ୍ଗ୍ ର ପୁତ୍ଡ଼ା ରସ୍ତି ହିଦାଟ୍। ଇନେସ୍କି ଇମ୍ଣି ମଶା ମାଙ୍ଗେଙ୍ଗ୍ ମିସର୍ ଦେସ୍ତାଙ୍ଗ୍ ହପ୍ଚି ତାତ୍ତାନ୍ନା, ତା କାଜିଙ୍ଗ୍ ଇନାକା ଗଟାଆତାତ୍ ହେଦାଙ୍ଗ୍ ଆପେଙ୍ଗ୍ ପୁନୁପ୍।’ 41 ହେଦାଙ୍ଗ୍ କାଜିଙ୍ଗ୍ ହେ ମାନାୟାର୍ ବାଚି ଲେକେ ର ମୁର୍ତି ହନାତାଙ୍ଗ୍ ରସ୍ତାର୍। ତାପାଚେ ହେୱାର୍ ମୁର୍ତିତିଙ୍ଗ୍ ବଲିପୁଜା କିତାର୍। ଆରେ ନିଜେ ରସ୍ତି ମୁର୍ତିତିଙ୍ଗ୍ ସନ୍ମାନ୍ କିଦେଙ୍ଗ୍ ହେୱାର୍ ବଜିପାତି କିଜି ୱାରି କିତାର୍। 42 ଲାଗିଙ୍ଗ୍ ଈଶ୍ୱର ହେୱାରିଙ୍ଗ୍ ରିସାଆଜି ୱେଡ଼ା, ଲେଞ୍ଜ୍ ଆରେ ବାଦାଡ଼୍ନି ହୁକାକାଙ୍ଗ୍ ପୁଜା କିଦେଙ୍ଗ୍ ପିସ୍ତି ହିତାନ୍। ଇନେସ୍କି ଭବିଷ୍ଯତବକ୍ତାର୍ ସାସ୍ତର୍ତାକେ ଈଶ୍ୱର ୱେଚ୍ଚାନ୍ନା, ‘ଏ ଇସ୍ରାଏଲ ଜାତିନି ମାନାୟାର୍, ଟାଙ୍ଗ୍ରାବାହାତାକେ ଚାଲିଶ୍ ବାର୍ହୁ ପାତେକ୍ ଏପେଙ୍ଗ୍ ମା କାଜିଙ୍ଗ୍ ପଶୁକାଙ୍ଗ୍ ବଲିପୁଜା କିତାଦେର୍, ଆରେ ବାରବିନି ଜିନିଷ୍ ହିତାଦେର୍ କି? 43 ମାତର୍ ଏପେଙ୍ଗ୍ ପୁଜାକିନି କାଜିଙ୍ଗ୍ ମୁର୍ତି ରସ୍ତାଦେର୍। ଏପେଙ୍ଗ୍ ମଲାକ ମୁର୍ତି ମାନି ପୁଟ୍ ଆରେ ରେଫାନ୍ ମୁର୍ତି ମାନି ହୁକାକାଙ୍ଗ୍ ଆସ୍ତି ବୁଲାଆନାଦେରା। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ବାବିଲନ୍ ଦେସ୍ନି ଆରେ ର ପାଡ଼୍କା ବନ୍ଦିକିଜି ପକ୍ତାନାଙ୍ଗ୍।’ 44 ମା ଆକଦାଦିର୍ ଟାଙ୍ଗ୍ରାବାହାତାକେ ମାନିହିଙ୍ଗ୍ ଈଶ୍ୱର ମାନି ପୁଟ୍ତିଙ୍ଗ୍ ହେବା କିତାର୍। ଈଶ୍ୱର ମୋଶାଙ୍ଗ୍ ଇନେସ୍ କିଜି ଆଦେସ୍ ହିଜିମାଚାନ୍ ହେଲେକେ ହେୱାର୍ ରଞ୍ଜାଙ୍ଗ୍ ପୁଟ୍ ରସ୍ତାର୍। ସିନୟ ମାଡ଼ିତାକେ ଇନେସ୍ ଲେଗ୍ଦାକା ମଶା ହୁଡ଼୍ଜି ମାଚାନ୍ ହେଲେକେ ନେ ଇଦାଙ୍ଗ୍ ପା ମାଚାତ୍। 45 ତାପାଚେ ମା ଆକଦାଦିର୍ ହେ ପୁଟ୍ ପାୟାଆତାର୍। ଯିହଶୁୟ ତର୍ଦାକାନ୍ ରକାନ୍ ନେତା ଆଜି ମାଚିହିଙ୍ଗ୍ ହେ ପୁଟ୍ତିଙ୍ଗ୍ ଇ ଦେସ୍ତିଙ୍ଗ୍ ତାସିୱାତାର୍। ହେପାଦ୍ନା ଈଶ୍ୱର ବିନ୍ଜାତିନି ମାନାୟାରିଙ୍ଗ୍ ହେ ଦେସ୍ତାଙ୍ଗ୍ ହପ୍ତାର୍, ଲାଗିଙ୍ଗ୍ ହେବେ ମା ଆକଦାଦିର୍ ଆଦିକାର୍ କିତାର୍। ଆରେ ହେ ପୁଟ୍ତିଙ୍ଗ୍ ଦାଉଦ ରାଜା ସାସନ୍ କିନି ପାତେକ୍ ହେୱାର୍ ଲାଗାୟ୍ ଇଡ଼୍ଜି ମାଚାର୍। 46 ଦାଉଦ ରାଜା ଈଶ୍ୱର ମୁମ୍ଦ ଦୟା ପାୟାଆତାନ୍। ହେୱାନ୍ ଯାକୁବନି ଈଶ୍ୱର କାଜିଙ୍ଗ୍ ର ମନ୍ଦିର୍ ରସ୍ତେଙ୍ଗ୍ ଈଶ୍ୱରତାକେ ପାର୍ତାନା କିଜି ଗୁୱାରି କିତାନ୍। 47 ମାତର୍ ତା ମେହି ଶଲମନ ଈଶ୍ୱର କାଜିଙ୍ଗ୍ ର ମନ୍ଦିର୍ ରସ୍ତାନ୍। 48 ମାତର୍ ୱିଜୁତାଙ୍ଗ୍ ଗାଜା ଈଶ୍ୱର ମାନାୟ୍ ରସ୍ତି ମନ୍ଦିର୍ତାକେ ବାହା କିଉନ୍। ଯିଶାୟ ଭବିଷ୍ଯତବକ୍ତା ଇନେସ୍ ୱେଚ୍ଚାନ୍ନା, 49 ‘ସରଗ୍ ମା ସିଂହାସନ୍, ପୁର୍ତି ମା କାଲ୍ପାନା ଇଟ୍ନି ବାହା। ଲାଗିଙ୍ଗ୍ ଏପେଙ୍ଗ୍ ମା କାଜିଙ୍ଗ୍ ଇନେସ୍ କିଜି ମନ୍ଦିର୍ ରହ୍ନାଦେର୍? କି ଆନେଙ୍ଗ୍ ଜମ୍ନି ଇଲ୍ ଇମେତ୍? 50 ଆନେଙ୍ଗ୍ ଇନାକା ଇୱିଜୁ ବିଷୟ ରହ୍ୱାତାତ୍ନା କି?’ ” 51 ସ୍ତିପାନ ଆରେରଗ ୱେଚ୍ଚାନ୍, “ଏପେଙ୍ଗ୍ ବେସି ଅବୁଜା ମାନାୟ୍ କାଦେର୍। ଲାଗିଙ୍ଗ୍ ଏପେଙ୍ଗ୍ ଈଶ୍ୱର କାତାତିଙ୍ଗ୍ ୱେନୁଦେରା କି ମାନି କିଉଦେରା। ଏପେଙ୍ଗ୍ ମି ଆକଦାଦିର୍ ପାପ୍ କିତିଲେକେ ଏପେଙ୍ଗ୍ ପାପ୍ କିତାଦେର୍ନା। ହେଦାଙ୍ଗ୍ କାଜିଙ୍ଗ୍ ପବିତ୍ର ଆତ୍ମାତିଙ୍ଗ୍ ବିରଦ୍ କିନାଦେରା। 52 ମି ଆକଦାଦିର୍ ଭବିଷ୍ଯତବକ୍ତାରିଙ୍ଗ୍ ଦୁକ୍କଷ୍ଟ ହିଜି ମାଚାର୍। ଦରମ୍ ରକ୍ଷା କିଦ୍ନି ମାନାୟ୍ ୱାନାନ୍ ଇଞ୍ଜି ଇମ୍ଣାକାର୍ ଆଗେ ୱେଚ୍ଚି ମାଚାର୍ ହେୱାରିଙ୍ଗ୍ ପା ମି ଆକଦାଦିର୍ ମାର୍ନେ ଅସ୍ତାର୍। ନଙ୍ଗୟ୍ ଏପେଙ୍ଗ୍ ହେ ଦରମ୍ ଖ୍ରୀଷ୍ଟଙ୍ଗ୍ ଶତ୍ରୁ କେଇଦ ଆହିକିଜି ମାର୍ନେ ଅସ୍ତାଦେର୍। 53 ଏପେଙ୍ଗ୍ ସରଗ୍ ଦୁତ୍ତାଙ୍ଗ୍ ଈଶ୍ୱର ନିୟମ୍ତିଙ୍ଗ୍ ପାୟା ଆତାଦେର୍ନା, ମାତର୍ ହେ ନିୟମ୍ତିଙ୍ଗ୍ ମାନ୍କିୱାତାଦେର୍।” ସ୍ତିପାନତିଙ୍ଗ୍ ମାର୍ନେ ଅସ୍ତାର୍ 54 ଯିହୁଦି ନେତାର୍ ଇ ୱିଜୁବେଣ୍ ୱେନ୍ଞ୍ଜି ବେସି ରିସାଆତାର୍, ଆରେ ହେୱାନ୍ କାଜିଙ୍ଗ୍ ଟାଡାଙ୍ଗ୍ କାପ୍ତେଙ୍ଗ୍ ଲାଗାତାର୍। 55 ମାତର୍ ସ୍ତିପାନ ପବିତ୍ର ଆତ୍ମାତାଙ୍ଗ୍ ପୁରାଆଜି ସରଗ୍ ନିପଣ୍ ହୁଡ଼୍ତାନ୍। ଆରେ ଈଶ୍ୱରତିଙ୍ଗ୍ ଗୌରବ ଆରେ ଯୀଶୁଙ୍ଗ୍ ଈଶ୍ୱର ତିନାବାଗାୟ୍ନି ସନ୍ମାନ୍ ପାୟାଆନି ବାହାତାକେ ନିଲ୍ତାକା ହୁଡ଼୍ଜି ୱେଚ୍ଚାନ୍, 56 “ହୁଡ଼ାଟ୍, ଆନେଙ୍ଗ୍ ସରଗ୍ ଜେୟାଆନାକା ଆରେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଯୀଶୁ ଈଶ୍ୱର ତିନାବାଗାୟ୍ ସନ୍ମାନ୍ ପାୟାଆନି ବାହାତାକେ ନିଲ୍ତାକା ହୁଡ଼୍ନାଙ୍ଗା।” 57 ମାତର୍ ହେୱାର୍ ଗାଜାକାଟ୍ କିଜି ୱେଚ୍ଚାର୍, “ଇୱାନ୍ ଈଶ୍ୱରତିଙ୍ଗ୍ ନିନ୍ଦା କିନାନା,” ଆରେ ତା କିତୁଲିକାଙ୍ଗ୍ କେଇ ଗେସ୍ତି ବନ୍ଦ୍ କିତାର୍। ଆରେ ହେୱାର୍ ଏକ୍ଜୁଟ୍ ଆଜି ହେୱାନିଙ୍ଗ୍ ଅସ୍ତେଙ୍ଗ୍ ହାଚାର୍। 58 ଆରେ ହେୱାର୍ ହେୱାନିଙ୍ଗ୍ ଯିରୁଶାଲାମ ସହର୍ତାଙ୍ଗ୍ ହପ୍ଚି କାଲ୍କୁ ହୁଦାଙ୍ଗ୍ ଟ୍ରାକ୍ତେଙ୍ଗ୍ ଲାଗାତାର୍। ଇମ୍ଣାକାର୍ ସ୍ତିପାନ ବିରଦ୍ତାକେ ମିଚ୍ ସାକି ହିଜି ମାଚାର୍, ହେୱାର୍ ଜପି ଉସ୍ପିନି କଟ୍ ଉନ୍ନ୍ଦି ଶାଉଲ ତର୍ଦାକାନ୍ ର ବେଣ୍ଡିଆ ହିମ୍ଣା ଲାଗାୟ୍ ଇଡ଼୍ତାର୍। 59 ହେୱାର୍ ସ୍ତିପାନତିଙ୍ଗ୍ କାଲ୍କୁ ହୁଦାଙ୍ଗ୍ ଟ୍ରାକ୍ଚି ମାଚିହିଙ୍ଗ୍, ହେପାଦ୍ନା ହେୱାନ୍ ପାର୍ତାନା କିଜି ୱେଚ୍ଚାନ୍, “ଏ ମାପୃ ଯୀଶୁ ନା ଆତ୍ମାତିଙ୍ଗ୍ ଆସ୍ତା।” 60 ଆରେ ହେୱାନ୍ ମେଣ୍ଡାକୁନ୍ଦିକିଜି ଗାଜାକାଟ୍ କିଜି କୁକ୍ଚି ୱେଚ୍ଚାନ୍, “ଏ ମାପୃ, ଇ ପାପ୍ତିଙ୍ଗ୍ ଏନେଙ୍ଗ୍ କେମା କିୟା।” ହେୱାନ୍ ଏଲେଙ୍ଗ୍ ୱେଚ୍ଚି ହାଃତାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation