ପକ୍ୟାତାକା 6 - New Testament in Pengo Parja Languageହେବା କାମାୟ୍ କିଦେଙ୍ଗ୍ ସାତ୍ ଜାଣ୍ତିଙ୍ଗ୍ ବାଚିକିତାର୍ 1 ହେପାଦ୍ନା ଚେଲାହିର୍ ବେସି ବାଡା ଆଜି ମାଚାର୍। ଲାଗିଙ୍ଗ୍ ଗ୍ରୀକ୍ ବାଷା ୱେଚ୍ନି ଯିହୁଦି ଚେଲାର୍, ଏବ୍ରୀ ବାଷା କିନି ଯିହୁଦି ଚେଲାରିଙ୍ଗ୍ ବିରଦ୍ କିଜି ୱେଚ୍ଚେଙ୍ଗ୍ ଲାଗାତାର୍। ଇନେସ୍କି ଏବ୍ରୀ ବାଷାନି ଯିହୁଦି ଚେଲାର୍ ରାଣ୍ଡି କଗ୍ଲେକାଙ୍ଗ୍ କାଦି କି ଡାବୁଙ୍ଗ୍ ହିନିହିଙ୍ଗ୍ ଗ୍ରୀକ୍ ବାଷା ୱେଚ୍ନି ଯିହୁଦି ଚେଲାର୍ ରାଣ୍ଡି କଗ୍ଲେକାଙ୍ଗ୍ ହାର୍ଦାଙ୍ଗ୍ ହିୱାଦାଙ୍ଗ୍ ମାଚାର୍। 2 ହେବେତାଙ୍ଗ୍ ବାରଜାଣ୍ ବାଚିକିତି ଚେଲାହିର୍ ଯିରୁଶାଲାମ ସହର୍ତାକେ ମାନି ଜେକନି ଚେଲାହିଙ୍ଗ୍ ଲାଗାୟ୍ କୁକ୍ଚି ୱେଚ୍ଚାର୍, “ଈଶ୍ୱର କାତା ଶୁଣାୟ୍ କିନାକା ପିସ୍ତି କାଦି କି ଡାବୁଙ୍ଗ୍ ବାଟା କିନିତାକେ ଆସେଙ୍ଗ୍ ଡାନ୍ଞ୍ଜି ମାନାକା ମା କାଜିଙ୍ଗ୍ ହାର୍ ଆକାୟ୍। 3 ଲାଗିଙ୍ଗ୍ ଏ ଟଣ୍ଡାର୍କାଦେର୍, ଇନେର୍ତାକେ ପବିତ୍ର ଆତ୍ମା ଆରେ ବୁଦି ପୁରା ଆତାତ୍ନା ଇଞ୍ଜି ୱିଜାକାର୍ ପୁଚାର୍ନା, ହେଲେକେ ମି ବିତ୍ରେତାଙ୍ଗ୍ ସାତ୍ ଜାଣ୍ତିଙ୍ଗ୍ ବାଚି କିୟାଟ୍। ଲାଗିଙ୍ଗ୍ ଆପେଙ୍ଗ୍ ହେୱାରିଙ୍ଗ୍ ଇ କାମାୟ୍ତିଙ୍ଗ୍ ଦେକାଶୁଣା କିଦେଙ୍ଗ୍ ଦାଇତ୍ ହିନାପ୍। 4 ହେଲେକେ ଆତିସ୍ ଆପେଙ୍ଗ୍ ପାର୍ତାନା ଆରେ ଯୀଶୁ କାତା ଶୁଣାୟ୍ କିଜି ହିକ୍ଷାହିଜି ମାନ୍ଗାନାପ୍।” 5 ବାଚିକିତି ଚେଲାହିର୍ ଇବେଣ୍ ଜେକନି ଚେଲାର୍ ହାର୍ ଇଞ୍ଜି ୱେଚ୍ଚାର୍। ଲାଗିଙ୍ଗ୍ ହେୱାର୍ ସ୍ତିପାନ ତର୍ଦାକାନ୍ ରକାନିଙ୍ଗ୍ ବାଚିକିତାର୍। ହେୱାନ୍ ଈଶ୍ୱରତାକେ ପାର୍ତି କିଜି ମାଚାନ୍ ଆରେ ପବିତ୍ର ଆତ୍ମାତାଙ୍ଗ୍ ପୁରାଆଜି ମାଚାନ୍। ଆରେ ହେୱାର୍ ପିଲିପ, ପ୍ରକର, ନିକାନୋର, ତିମୋନ, ପାର୍ମନା ଆରେ ଆନ୍ତିୟକିଆ ସହର୍ନି ନିକଲାୟତିଙ୍ଗ୍ ବାଚିକିତାର୍। ନିକଲାୟ ଯୀଶୁତାକେ ପାର୍ତିକିୱି ଆଗେ ଯିହୁଦି ଦରମ୍ ବିଦିତିଙ୍ଗ୍ ମାନିକିଜି ମାଚାନ୍। 6 ଜେକନି ଚେଲାର୍ ବାଚିକିତି ଚେଲାହିର୍ ଲାଗାୟ୍ ତାତାର୍। ଲାଗିଙ୍ଗ୍ ବାଚିକିତି ଚେଲାର୍ ପାର୍ତାନା କିଜି ହେ କାମାୟ୍ କିଦେଙ୍ଗ୍ ଦାଇତ୍ ହିତାର୍। 7 ଲାଗିଙ୍ଗ୍ ବାଚିକିତି ଚେଲାର୍ ଈଶ୍ୱର କାତା ଶୁଣାୟ୍ କିଦେଙ୍ଗ୍ ବୁଲାଆଦେଙ୍ଗ୍ ଲାଗାତାର୍, ଆରେ ଯିରୁଶାଲାମ ସହର୍ତାକେ ଯୀଶୁତାକେ ପାର୍ତିକିନି ଚେଲାହିର୍ ଆଦିକ୍ ବାଡା ଆଦେଙ୍ଗ୍ ଲାଗାତାର୍। ହେୱାର୍ ବିତ୍ରେତାଙ୍ଗ୍ ଯିହୁଦି ପୁଜାରିର୍ ପା ବେସିହେନି ଯୀଶୁ ହାର୍ଦିକାବୁର୍ତିଙ୍ଗ୍ ପାର୍ତି କିତାର୍। ବିଚାର୍କିନି ବାହାତାକେ ସ୍ତିପାନ 8 ଈଶ୍ୱର ଦୟାତାଙ୍ଗ୍ ଆରେ ଈଶ୍ୱର ଶାକ୍ତିତାଙ୍ଗ୍ ସ୍ତିପାନ ପୁରାଆଜି ମାନାୟାର୍ ବିତ୍ରେ ଗାଜା-ଗାଜା ଚାନିଆଆନି କାମାୟ୍ ଆରେ ଚିନ୍ କିଦେଙ୍ଗ୍ ଲାଗାତାନ୍। 9 ମାତର୍ କେତ୍ଜାଣ୍ ସ୍ତିପାନତିଙ୍ଗ୍ ବିରଦ୍ କିତାର୍। ହେୱାର୍ ହଲିଆ କାମାୟ୍ତାଙ୍ଗ୍ ମୁକ୍ତି ପାୟାଆତି ଯିହୁଦି ମାନାୟାର୍, କୁରିଣିୟ ସହର୍, ଆଲେକ୍ଜାଣ୍ଡ୍ରିଆ ସହର୍ନି ପାର୍ତାନା ଇଲ୍ନି କେତ୍ଜାଣ୍ ମାନାୟ୍, କିଲିକିୟା ଆରେ ଏସିଆ ଜିଲ୍ଲାନି ମାନାୟାର୍ ମାଚାର୍। ଇୱାର୍ ସ୍ତିପାନତିଙ୍ଗ୍ ଜୁକ୍ତି କିଦେଙ୍ଗ୍ ଲାଗାତାର୍। 10 ମାତର୍ ସ୍ତିପାନ ବୁଦି ଆରେ ଈଶ୍ୱର ଆତ୍ମାନି ଶାକ୍ତିତାଙ୍ଗ୍ ୱେଚ୍ଚି ମାଚାନ୍, ହେଦାଙ୍ଗ୍ କାଜିଙ୍ଗ୍ ହେୱାର୍ ହେ ବେଣ୍ନି ଉତର୍ ହିଦେଙ୍ଗ୍ ଆଡ୍ୱାତାର୍। 11 ହଲିଆ କାମାୟ୍ତାଙ୍ଗ୍ ମୁକ୍ତି ପାୟାଆତି ଯିହୁଦି ମାନାୟାର୍ ସ୍ତିପାନ ବିରଦ୍ତାକେ ୱେଚ୍ଚେଙ୍ଗ୍ ମାନାୟାରିଙ୍ଗ୍ ଉସ୍କାଇ କିତାର୍। ଲାଗିଙ୍ଗ୍ ହେୱାର୍ ୱେଚ୍ଚାର୍, “ଇୱାନ୍ ମୋଶା ଆରେ ଈଶ୍ୱର ବିରଦ୍ତାକେ ନିନ୍ଦା ବେଣ୍ ଇନାକା ଆପେଙ୍ଗ୍ ୱେଚାପ୍ନା।” 12 ଆରେ ହେୱାର୍ ମାନାୟାରିଙ୍ଗ୍ ଆରେ ପ୍ରାଚିନ୍ ଆରେ ପଣ୍ଡିତାରିଙ୍ଗ୍ ଉସ୍କାଇ କିତାର୍। ଆରେ ହେୱାନିଙ୍ଗ୍ ଆସ୍ତି ବିଚାର୍କିନି ବାହାତାକେ ତାତାର୍। 13 ହେବେ ହେୱାର୍ ମିଚ୍ ସାକି ୱେଚ୍ନାକାରିଙ୍ଗ୍ ତାତାର୍। ହେ ମିଚ୍ ସାକି ହିନାକାର୍ ସ୍ତିପାନ ବିରଦ୍ତାକେ ୱେଚ୍ଚାର୍, “ଇୱାନ୍ ଈଶ୍ୱର ମାନି ମନ୍ଦିର୍ ଆରେ ମୋଶା ଲେକିକିତି ନିୟମ୍ନି ସାସ୍ତର୍ ବିରୁଦ୍ତାକେ ନିନ୍ଦା କାତା ୱେଚ୍ଚି ଲାଗାନାନା। 14 ଆରେ ନାଜରିତିୟ ସହର୍ତାଙ୍ଗ୍ ୱାଜିମାଚି ଯୀଶୁ ଇ ଈଶ୍ୱର ମାନି ମନ୍ଦିର୍ତିଙ୍ଗ୍ ବୁଡାଇ କିନାନ୍। ଆରେ ମୋଶା ମାଙ୍ଗେଙ୍ଗ୍ ହିତ୍ତି ବିଦିତିଙ୍ଗ୍ ହେୱାନ୍ ବାଦ୍ଲାଇ କିନାନ୍ ଇଞ୍ଜି ହେୱାନ୍ ୱେଚ୍ନାକା ଆପେଙ୍ଗ୍ ୱେଚାପ୍।” 15 ହେପାଦ୍ନା ବିଚାର୍କିନି ବାହାତାକେ କୁଚ୍ଚି ମାଚି ୱିଜାକାର୍ ସ୍ତିପାନତିଙ୍ଗ୍ ମାନ୍ଦିୟାନ୍ କିଜି ହୁଡ଼୍ତାର୍। ଆରେରଗ ଦୁତ୍ ମୁମ୍ ଅଜଡ଼୍ ଆତିଲେକେ ତା ମୁମ୍ ପା ଅଜଡ଼୍ ଆନାକା ହେୱାର୍ ହୁଡ଼୍ତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation