ପକ୍ୟାତାକା 28 - New Testament in Pengo Parja Languageମେଲିତି ଦ୍ୱିପ୍ତାକେ ପାଉଲ 1 ଆପେଙ୍ଗ୍ ରକ୍ଷା ପାୟାଆଜି ହାମାନ୍ ବାହାତାକେ ଏକିତି ପାଚେ, ହେ ଦ୍ୱିପ୍ ମେଲିତି ଇଞ୍ଜି ପୁଚାପ୍। 2 ହେବେ ମାନି ମାନାୟାର୍ ମାଙ୍ଗେଙ୍ଗ୍ ବେସି ଦୟା କିତ୍ତାର୍। ବାର୍ହା ଆରେ ପିନି ଆଜି ମାଚିଲେ ହେୱାର୍ ନାଣି କାଚାୟ୍ କିଜି ମାଙ୍ଗେଙ୍ଗ୍ କୁକ୍ତାତାର୍। 3 ମାତର୍ ପାଉଲ ର ମୁଟା ଚିଲ୍ପାଙ୍ଗ୍ ରୁଣ୍ଡାଇକିଜି ନାଣିତାକେ ଦେସ୍ତାନ୍, ଗରମ୍ ଆତିଲେ ରଞ୍ଜାଙ୍ଗ୍ ବିସ୍ ରାଚ୍ ହସି ପାଉଲ କେଇଦ କାପ୍ଚି ଡାନ୍ଞ୍ଜି ମାଚାତ୍। 4 ଆରେ ତା କେଇଦ ରାଚ୍ ଜଲାଆନାକା ହୁଡ଼୍ଜି, ହେ ଦ୍ୱିପ୍ତାକେ ମାନି ମାନାୟାର୍ ବିତ୍ରେ-ବିତ୍ରେ ୱେଚ୍ପାଆଜି ୱେଚ୍ଚାର୍, “ଇୱାନ୍ ରକାନ୍ ମାନାୟ୍ ମାରୁ ଆଜି ମାନ୍ଗାନାନ୍, ଲାଗିଙ୍ଗ୍ ହାମ୍ଦୁର୍ତାଙ୍ଗ୍ ରକ୍ଷା ପାୟାଆଜି ୱାତିଲେ ପା ମା ଦରମ୍ ଦେବି ଜିଦେଙ୍ଗ୍ ପିହ୍ୱାତାତ୍।” 5 ମାତର୍ ପାଉଲ ହେ ରାଚ୍ତିଙ୍ଗ୍ ଡ଼ାତ୍ତି ନାଣିତାକେ ଦେସ୍ତାନ୍, ଆରେ ହେୱାନିଙ୍ଗ୍ ଇନାକାପା ନଷ୍ଟ ଆୱାତାତ୍। 6 ହେ ମାନାୟାର୍ ପାଉଲ ପୁଲାଆଜି କି ହେଦାପ୍ରେ ହାଃଜି ତାରେନ୍ ଗୁର୍ନାନ୍ ଇଞ୍ଜି ମାନ୍ତ ବାବିକିଜି କାସି ମାଚାର୍। ମାତର୍ କେତେକ୍ ସମୟ୍ ପାତେକ୍ ହେୱାନିଙ୍ଗ୍ ଇନାକାପା ଆୱାତାକା ହୁଡ଼୍ଜି, କାତା ବାଦ୍ଲାୟ୍ କିଜି ୱେଚ୍ଚାର୍, “ଇୱାନ୍ ରକାନ୍ ପେନ୍ ଆଜି ମାନ୍ଗାନାନ୍।” 7 ହେ ଦ୍ୱିପ୍ନି କାଣ୍ଡି ଲାଗାୟ୍ ପୁବ୍ଲିୟ ତର୍ଦାକାନ୍ ଇଲ୍ ଆରେ ଜମି ମାଚାତ୍, ହେୱାନ୍ ହେ ଦ୍ୱିପ୍ନି ମୁକ୍ୟା ମାଚାନ୍। ହେୱାନ୍ ମାଙ୍ଗେଙ୍ଗ୍ ତାଞ୍ଜ କୁକ୍ଚି ଅତ୍ତାନ୍ ଆରେ ତିନ୍ଦିନ୍ ପାତେକ୍ ଗତାଙ୍ଗ୍ ଲେକେକିଜି ମାନି କିତ୍ତାନ୍। 8 ହେପାଦ୍ନା ପୁବ୍ଲିୟ ଲାତ୍ରାହି ନମେର୍ ଆରେ ପଟ ମଡ଼ିକିନାକା ଆରେ ବାନ୍ଦାଣ୍ ରଗ୍ ଆହିଆଜି ଟାଟିତାକେ ହୁନ୍ଞ୍ଜି ମାଚାନ୍। ପାଉଲ ତା ଲାଗାୟ୍ ହାଲ୍ଜି ପାର୍ତାନା କିତାନ୍, ଆରେ କେଇ ତିଗ୍ଜି ହାର୍କିତାନ୍। 9 ଇ ଗଟ୍ନା ପାଚେ ହେ ଦ୍ୱିପ୍ତାକେ ମାନି ରଗ୍ଦାକାର୍ ପାଉଲ ଲାଗାୟ୍ ୱାଜି ହାର୍ଆତାର୍। 10 ହେୱାର୍ ମାଙ୍ଗେଙ୍ଗ୍ ବେସି ସନ୍ମାନ୍ କିଜି ହେବା କିତ୍ତାର୍, ଆରେ ହେୱାର୍ତାଙ୍ଗ୍ ଆପେଙ୍ଗ୍ ହସିହାନିହିଙ୍ଗ୍ ଦର୍କାର୍ଆନି ଜିନିଷ୍ ୱିଜୁ ଜଗାଇ କିତ୍ତାର୍। ରୋମ୍ ସହର୍ତାକେ ପାଉଲ ହାଚାନ୍ 11 ଇ ଦ୍ୱିପ୍ତାକେ ତିନିମାସ୍ ମାଚି ପାଚେ, ଆଲେକ୍ଜାଣ୍ଡ୍ରିଆ ସହର୍ତାଙ୍ଗ୍ ୱାନି ଜାଜ୍ତାକେ ଆପେଙ୍ଗ୍ ଦୁମ୍ତାପ୍, ଇ ଦ୍ୱିପ୍ତାକେ ଇ ଜାଜ୍ ପିନିମାସ୍ ୱିଜ୍ନି ପାତେକ୍ ମାଚାତ୍। ଇ ଜାଜ୍ନି ଆଗ୍ବାଗାୟ୍ ଜାଉଁଣା ପେନ୍ନି ଚିନା ମାଚାତ୍। 12 ସୁରାକୁସା ସହର୍ତାକେ ଏକିସ୍ ଆପେଙ୍ଗ୍ ହେବେ ତିନିଦିନ୍ ମାଚାପ୍। 13 ହେବେତାଙ୍ଗ୍ ହସି ଆଗେ ହାଲ୍ଜି ରେଗିୟ ସହର୍ତାକେ ଇକାତାପ୍, ରଦିନ୍ ପାଚେ ଦକ୍ଷିଣ ନିପ୍ଣି ଦୁକା ୱାତିଲେ ଆର୍କାତ୍ ନାଞ୍ଜିଙ୍ଗ୍ ପୁତେଅଲି ସହର୍ତାକେ ୱାତାପ୍। 14 ହେ ବାହାତାକେ ଆପେଙ୍ଗ୍ ଟଣ୍ଡାରିଙ୍ଗ୍ ମେହା ଆତାପ୍, ଆରେ ହେୱାର୍ ହୁଦାଙ୍ଗ୍ ସାତ୍ଦିନ୍ ମାଞ୍ଜେଙ୍ଗ୍ ମାଙ୍ଗେଙ୍ଗ୍ ଗୁୱାରି କିତ୍ତାର୍। ହେୱାର୍ ହୁଦାଙ୍ଗ୍ ମାଚି ପାଚେ ଆପେଙ୍ଗ୍ ରୋମ ସହର୍ତାକେ ହାଞ୍ଜେଙ୍ଗ୍ ହତାପ୍। 15 ରମ ସହର୍ତାକେ ମାନି କେତେକ୍ ପାର୍ତିକିନି ଟଣ୍ଡାର୍ ଆପେଙ୍ଗ୍ ହେବା କିନାପ୍ ଇଞ୍ଜି ୱେଚାର୍, ଆରେ ହେୱାର୍ କେତ୍ଜାଣ୍ ଆପ୍ପିୟ ସହର୍ନି ଆଟ୍ ଆରେ ତିନ୍ଗଟା ସରେଇ ଇଲ୍ ସହର୍ତାକେ କେତ୍ଜାଣ୍ ମେହାଆଦେଙ୍ଗ୍ ୱାତାର୍। ପାଉଲ ହେୱାରିଙ୍ଗ୍ ହୁଡ଼୍ଜି ଈଶ୍ୱରତିଙ୍ଗ୍ ଜୟ୍-ଜୟ୍ କିତାନ୍ ଆରେ ନିଜେ ଶାସ୍ ପାୟାଆତାନ୍। 16 ଏଚେପାଦ୍ନା ଆପେଙ୍ଗ୍ ରୋମ ସହର୍ତାକେ ଇକାତାପ୍, ପାଉଲତିଙ୍ଗ୍ ନିଜେ ମାଞ୍ଜେଙ୍ଗ୍ ୱେଚ୍ଚାର୍, ଆରେ ତାଙ୍ଗେଙ୍ଗ୍ କାତେଙ୍ଗ୍ ର ଜାଗୁୱାଡ଼ି ସେନାଙ୍ଗ୍ ହିତାର୍। 17 ତିନ୍ଦିନ୍ ପାଚେ ପାଉଲ ଯିହୁଦିର୍ ମୁଡ଼୍-ମୁଡ଼୍ଦି ମାନାୟାରିଙ୍ଗ୍ କୁକ୍ତାନ୍। ଆରେ ହେୱାର୍ ରବେ ରୁଣ୍ଡାଆତି ପାଚେ ହେୱାନ୍ ହେୱାରିଙ୍ଗ୍ ୱେଚ୍ଚାନ୍, “ଏ ଟଣ୍ଡାକାଦେର୍, ଆନେଙ୍ଗ୍ ୱିଜୁଜାତି ବିରଦ୍ତାକେ କି ମା ଆକଦାଦିର୍ ରିତିନିତି ବିରଦ୍ତାକେ ଇନାକାପା କିୱାଦାଙ୍ଗ୍ ମାଚାଙ୍ଗ୍। ମାତର୍ କେତେକ୍ ମାନାୟାର୍ ନାଙ୍ଗେଙ୍ଗ୍ ଯିରୁଶାଲାମ ସହର୍ତାକେ ଆସ୍ତାତାର୍ ଆରେ ବନ୍ଦିଲେକେ କିଜି ରୋମିୟ ସରକାର୍ କେଇଦ ହେୱାର୍ ନାଙ୍ଗେଙ୍ଗ୍ ଆହିକିତ୍ତାର୍। 18 ରୋମିୟ୍ ସରକାର୍ ନାଙ୍ଗେଙ୍ଗ୍ ବିଚାର୍ କିତ୍ତାର୍, ହାଃନି ଦଣ୍ଡ୍ ପାୟାଆନି ଲେକେ ଦସ୍ ଗାଟା ଆୱିତିଲେ ନାଙ୍ଗେଙ୍ଗ୍ ମୁକ୍ତି କିଦ୍ଦେଙ୍ଗ୍ ଇଚାକିଜି ମାଚାର୍। 19 ମାତର୍ ଯିହୁଦି ନେତାର୍ ବିରଦ୍ କିତି କାଜିଙ୍ଗ୍ ଆନେଙ୍ଗ୍ ରୋମ୍ ଦେସ୍ନି ମହା ରାଜା ଲାଗାୟ୍ ବିଚାର୍ କିୟା ଆଦେଙ୍ଗ୍ ଗୁୱାରି କିତାଙ୍ଗ୍, ଆନେଙ୍ଗ୍ ନା ମାନାୟାରିଙ୍ଗ୍ ବିରଦ୍ତାକେ ଦସି କିଦେଙ୍ଗ୍ ଇଚା କିୱାତାଙ୍ଗ୍। 20 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ନା ହୁଦାଙ୍ଗ୍ ମେହାଆଜି କାତାବାର୍ତା ଆଦେଙ୍ଗ୍ କୁକ୍ତାତାଙ୍ଗ୍ନା। ଇନେସ୍କି ଇସ୍ରାଏଲ ଜାତିନି ମାନାୟାର୍ ଆହାକିଜି ମାଚି ରକ୍ଷାକିଦ୍ନାକାନ୍ କାଜିଙ୍ଗ୍ ଆନେଙ୍ଗ୍ ହିକ୍ଡ଼ିକାଙ୍ଗ୍ ଗାଚିଆ ଆତାଙ୍ଗ୍ନା।” 21 ହେବେତାଙ୍ଗ୍ ଯିହୁଦି ନେତାର୍ ପାଉଲତିଙ୍ଗ୍ ୱେଚ୍ଚାର୍, “ନି ବିଷୟରେ ଯିହୁଦା ଜିଲ୍ଲାତାଙ୍ଗ୍ ଇନା ଚିଟି ପା ପାୟା ଆୱାତାପ୍ନା, କି ଟଣ୍ଡାର୍ ବିତ୍ରେତାଙ୍ଗ୍ ଇନେର୍ ପା ୱାଜି ନି ବିରଦ୍ତାକେ ଇନାକା ୱେଚ୍ଚାୱାତାର୍ନା କି କାବୁର୍ ହିଦ୍ୱାତାର୍ନା। 22 ମାତର୍ ନି ବେଣ୍ ଇନାକା ହେଦାଙ୍ଗ୍ ଆପେଙ୍ଗ୍ ୱେଞ୍ଜେଙ୍ଗ୍ ଇଚା କିନାପା, ଇନେସ୍କି ୱିଜୁ ନିପଣ୍ ଇ ଖ୍ରୀଷ୍ଟାନ୍ ଦଳ୍ନି ମାନାୟାରିଙ୍ଗ୍ ତା ବିରଦ୍ତାକେ ୱେଚ୍ନାକା ୱେନାପା।” 23 ହେ ମୁଡ଼୍ଦାକାର୍ ପାଉଲ ହୁଦାଙ୍ଗ୍ ମେହାଆଦେଙ୍ଗ୍ ରଦିନ୍ ଟିକ୍ କିତାର୍, ଆରେ ମାନାୟାର୍ ଅଜି ତାଞ୍ଜ ହାଚାର୍। ଲାଗିଙ୍ଗ୍ ପାଉଲ ନାଡ଼ିସ୍ତାଙ୍ଗ୍ ମିକାହାରେସ୍ ପାତେକ୍ ହେୱାରିଙ୍ଗ୍ ଈଶ୍ୱର ସାସନ୍ କିନି ରାଜି ବିଷୟରେ ହିକ୍ଷା ହିତାନ୍। ଆରେ ମୋଶା ଲେକିକିତି ନିୟମ୍ନି ସାସ୍ତର୍ ଆରେ ଭବିଷ୍ଯତବକ୍ତାର୍ ସାସ୍ତର୍ତାଙ୍ଗ୍ ଯୀଶୁ ବିଷୟରେ ହେୱାରିଙ୍ଗ୍ ବୁଜାଇ କିଦେଙ୍ଗ୍ ଉପାୟ୍ କିତାନ୍। 24 ଲାଗିଙ୍ଗ୍ ପାଉଲ ୱେଚ୍ଚି କାତାତିଙ୍ଗ୍ କେତ୍ଜାଣ୍ ପାର୍ତି କିତାର୍ ଆରେ କେତ୍ଜାଣ୍ ପାର୍ତି କିୱାତାର୍। 25 ହେଦାଙ୍ଗ୍ କାଜିଙ୍ଗ୍ ହେୱାର୍ ବିତ୍ରେ ରାଜି ଆୱିତିଲେ ହେବେତାଙ୍ଗ୍ ହାଚାର୍। ହେୱାର୍ ହେବେତାଙ୍ଗ୍ ହାନି ଆଗେ ପାଉଲ ଇ କାତା ୱେଚ୍ଚାନ୍, “ଯିଶାୟ ଭବିଷ୍ଯତବକ୍ତାତାଙ୍ଗ୍ ପବିତ୍ର ଆତ୍ମା ମି ଆକଦାଦିରିଙ୍ଗ୍ ସତ୍ କାତା ୱେଚ୍ଚାନ୍ନା, 26 ‘ନା ମାନାୟାର୍ ଲାଗାୟ୍ ହାଲ୍ଜି ୱେଚାଟ୍। ଏପେଙ୍ଗ୍ ୱେନ୍ଞ୍ଜି ମାନାଦେର୍ ମାତର୍ ଅଲପ୍ପା ବୁଜାଆଉଦେର୍, ଆରେ ହୁଡ଼୍ଜି ମାନାଦେର୍, ମାତର୍ ଅଲପ୍ପା ପୁଞ୍ଜେଙ୍ଗ୍ ଆଡୁଦେର୍। 27 ମାତର୍ ଇ ମାନାୟାର୍ ଗରବ୍ ଅମାନ୍ୟା ଆତାତ୍ନା। ହେୱାର୍ ତା କିତୁଲ୍ତାଙ୍ଗ୍ ବେସି କଷ୍ଟତାଙ୍ଗ୍ ୱେଚାର୍, ଆରେ ଜାର୍ କାଣ୍କୁ ଜୁଚ୍ଚାର୍। ଇଲେକେ ଆୱାଦାଙ୍ଗ୍ ମାଚିସ୍, ହେୱାର୍ ଜାର୍ କାଣ୍କୁତାଙ୍ଗ୍ ହୁଡ଼୍ତାର୍ମା, ଆରେ ଜାର୍ କିତୁଲ୍ତାଙ୍ଗ୍ ୱେଚାର୍ମା, ଆରେ ହେୱାର୍ ଗରବ୍ତାକେ ବୁଜାଆଜି ପାପ୍ କାମାୟ୍ ପିସ୍ତି ନା ଲାଗାୟ୍ ୱାତାଦେର୍ମା। ଆରେ ଆନେଙ୍ଗ୍ ହେୱାରିଙ୍ଗ୍ ହାର୍ କିତାଙ୍ଗ୍ମା।’ ” 28 “ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ପୁନାଟ୍ ଯେ ଈଶ୍ୱର ମାନାୟାରିଙ୍ଗ୍ ଉଦାର୍ କିତି ବିଷୟ ବିନ୍ଜାତିନି ମାନାୟାର୍ତାକେ ହାଚାତ୍ନା, ଆରେ ହେୱାର୍ ହେଦାଙ୍ଗ୍ତିଙ୍ଗ୍ ମାନିକିନାର୍।” 29 ଇୱିଜୁ କାତା ପାଉଲ ୱେଚ୍ଚି ପାଚେ, ଇ ଯିହୁଦି ମାନାୟାର୍ ଜାର୍-ଜାର୍ବିତ୍ରେ ଜୁକ୍ତି କିଜି ହେବେତାଙ୍ଗ୍ ହାଚାର୍। 30 ପାଉଲ ରି ବାର୍ହୁ ପାତେକ୍ ବାଡ଼ା ଇଞ୍ଜ ମାଚାନ୍। ହେୱାନିଙ୍ଗ୍ ହୁଡ଼୍ଦେଙ୍ଗ୍ ୱାଜି ମାଚାକାରିଙ୍ଗ୍ କୁକ୍ଚି ଅଜି ମାଚାନ୍। 31 ଆରେ ତା ଲାଗାୟ୍ ୱାଜିମାଚାର୍ ହେ ୱିଜାକାରିଙ୍ଗ୍ ଶାସ୍ ହୁଦାଙ୍ଗ୍ ଆରେ ପାଣ୍ଡ୍ରା ଆୱାଦାଙ୍ଗ୍ ଈଶ୍ୱର ସାସନ୍ କିନି ରାଜି ବିଷୟରେ ଶୁଣାୟ୍ କିଜି ମାଚାନ୍, ଆରେ ମାପୃ ଯୀଶୁ ଖ୍ରୀଷ୍ଟ ବିଷୟରେ ହିକ୍ଷା କିଜି ମାଚାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation