ପକ୍ୟାତାକା 27 - New Testament in Pengo Parja Languageପେଷ୍ଟସ୍ ରାଜା ରୋମ୍ ଦେସ୍ତାକେ ପାଉଲତିଙ୍ଗ୍ ପକ୍ତାନ୍ 1 ପେଷ୍ଟସ୍ ରାଜା ଇଚା କିତାନ୍ ଯେ ଆପେଙ୍ଗ୍ ଜାଜ୍ତାକେ ଦୁମ୍ଜି ରୋମ୍ ଦେସ୍ନି ଇତାଲିଆ ଜିଲ୍ଲାତାକେ ହାଞ୍ଜେଙ୍ଗ୍। ହେପାଦ୍ନା ପାଉଲ ଆରେ ଜେକନି କେତେକ୍ ବନ୍ଦି ଆତି ମାନାୟାରିଙ୍ଗ୍ ଶହେ ସେନାର୍ ମୁକ୍ୟା ଯୁଲିଅ କେଇଦ ହାର୍ପି କିଜି ହିତାନ୍। ହେୱାନ୍ ଅଗଷ୍ଟସ୍ ମାହା ରାଜାନି ସେନା ମାଚାନ୍। 2 ହେବେତାଙ୍ଗ୍ ଆଦ୍ରାମୁତ୍ତିୟ ସହର୍ତାଙ୍ଗ୍ ୱାଜିମାଚି ଜାଜ୍ତାକେ ଦୁମ୍ଜି ଆପେଙ୍ଗ୍ ହାଚାପ୍। ହେ ଜାଜ୍ ଏସିଆ ଜିଲ୍ଲାନି ହାମ୍ଦୁର୍ କାଣ୍ଡିତାକେ କେତେକ୍ ବାହାତାକେ ହାନାକା ମାଚାତ୍। ମା ହୁଦାଙ୍ଗ୍ ଆରିସ୍ତାର୍ଖ ତର୍ଦାକାନ୍ ରକାନ୍ ମାଚାନ୍, ହେୱାନ୍ ମାକଦନିଆ ଜିଲ୍ଲାନି ଥେସଲନିକିୟ ସହର୍ତାକେ ମାନି ମାନାୟ୍। 3 ଆର୍କାତ୍ ନାଞ୍ଜିଙ୍ଗ୍ ଆପେଙ୍ଗ୍ ସିଦନ୍ ସହର୍ତାକେ ଇକାତାପ୍। ଯୁଲିଅ ପାଉଲତିଙ୍ଗ୍ ଦରମ୍ କିତାନ୍, ଆରେ ହେୱାନିଙ୍ଗ୍ ଦର୍କାର୍ଆନି ଜିନିଷ୍ ତାହିୱାଦେଙ୍ଗ୍ ହେ ସହର୍ତାକେ ମାନି ପାଉଲ ହାଙ୍ଗ୍ଦାକାର୍ ଲାଗାୟ୍ ହାଞ୍ଜେଙ୍ଗ୍ ୱେଚ୍ଚାନ୍। 4 ହେବେତାଙ୍ଗ୍ ଆରେରଗ ଜାଜ୍ତାକେ ଦୁମ୍ଜି ହାଚାପ୍, ମାତର୍ ବେସି ଡ଼ୁଇ ଆତି କାଜିଙ୍ଗ୍ ଆପେଙ୍ଗ୍ କୁପ୍ରଦ୍ୱିପ୍ତାକେ ହାଚାପ୍। 5 କିଲିକିୟା ସହର୍ ଆରେ ପପୁଲିଆ ଜିଲ୍ଲାନି ହାମ୍ଦୁର୍ ନିପଣ୍ ଆଜି ଲୁକିଆ ଜିଲ୍ଲାନି ମୁରା ସହର୍ତାକେ ୱାତାପ୍। 6 ଲାଗିଙ୍ଗ୍ ଯୁଲିଅ ଇତାଲିଆ ଜିଲ୍ଲାତାକେ ହାନି ରଞ୍ଜାଙ୍ଗ୍ ଆଲେକ୍ଜାଣ୍ଡ୍ରିଆ ସହର୍ତାଙ୍ଗ୍ ୱାଜିମାଚି ଜାଜ୍ତାକେ ମାଙ୍ଗେଙ୍ଗ୍ ଦୁପ୍ତାତାନ୍। 7 ବେସିଦିନ୍ କଷ୍ଟଆଜି ଦିରେ-ଦିରେ କ୍ନିଦ ସହର୍ତାକେ ଇକାତାପ୍। ଆରେ ଡ଼ୁଇ ଆତିଲେ ଆପେଙ୍ଗ୍ ଆଗେ ହାଞ୍ଜେଙ୍ଗ୍ ଆଡ୍ୱାତାପ୍, ଆରେ ଆପେଙ୍ଗ୍ ସାଲ୍ମୋନି ନିପଣ୍ ଆଜି କ୍ରୀତି ଦ୍ୱିପ୍ତାକେ ହାଚାପ୍। 8 ଆରେ ବେସି କଷ୍ଟତାଙ୍ଗ୍ ହାମ୍ଦୁର୍ ଗୁଟି-ଗୁଟି ହାଲ୍ଜି ହାର୍ଦି ଜାଜ୍ ଇଟ୍ନି ବାହାତାକେ ୱାତାପ୍, ଲାସାୟା ସହର୍ ହେ ଲାଗାୟ୍ ମାଚାତ୍। 9 ଏଲେଙ୍ଗ୍ ଆଜି ବେସିଦିନ୍ ଆତାତ୍, ଆରେ ଜାଜ୍ତାକେ ଆଗେ ହାନାକା ବେସି ବିପତ୍ ଆଜି ମାଚାତ୍। ହେପାଦ୍ନା ଯିହୁଦିର୍ ଉପାସ୍ ପାର୍ବୁ ୱିଜ୍ଦି ମାଚାତ୍। ଲାଗିଙ୍ଗ୍ ପାଉଲ ହେୱାରିଙ୍ଗ୍ ଜାଗ୍ରତ୍ କିଜି ୱେଚ୍ଚାନ୍, 10 “ଆଜ୍ଞା କାଦେର୍, ଆନେଙ୍ଗ୍ ପୁନାଙ୍ଗ୍ ଯେ ଆସେଙ୍ଗ୍ ଯଦି ଜାଜ୍ତାକେ ଆଗେ ହାଚିସ୍ ବେସି ବିପତ୍ ଗିଟାଆଦ୍ନାତ୍, ଇନେସ୍କି ଜାଜ୍ ଆରେ ହେବେ ମାନି ଜିନିଷ୍ ଆରେ ଆସେଙ୍ଗ୍ ପା ହାନାସ୍। ଲାଗିଙ୍ଗ୍ ଆନେଙ୍ଗ୍ ବାବିକିନାଙ୍ଗା ଯେ ବିପତ୍ନି ସମୟ୍ ହାନିପାତେକ୍ ଇବେ ମାନ୍ଗାନାସ୍।” 11 ମାତର୍ ଯୁଲିୟସ୍ ପାଉଲ କାତାତିଙ୍ଗ୍ ମାନିକିୱାଦାଙ୍ଗ୍ ଜାଜ୍ ଡ୍ରାଇବର୍ ଆରେ ଜାଜ୍ନି ମାଲିକ୍ କାତାତିଙ୍ଗ୍ ବେସି ଦିୟାନ୍ ହିତାନ୍। 12 ହେ ସୁନ୍ଦର ଜାଜ୍ ଇଟ୍ନି ବାହା ପିନି ମାସ୍ତ ହେବେ ମାଞ୍ଜେଙ୍ଗ୍ ସୁବିଦା ହିଲାତାତ୍। ଲାଗିଙ୍ଗ୍ ବେସିହେନି ମାନାୟାର୍ ଜାଜ୍ ଚାଲାଇ କିଦେଙ୍ଗ୍ ୱେଚ୍ଚାର୍, ଇନେସ୍ଆଜି ପା ପୈନିକ୍ସ୍ ସହର୍ତାକେ ହାଲ୍ଜି ହେ ପିନିମାସ୍ କାଟି କିନାସ୍, ହେ ପୈନିକ୍ସ୍ ସହର୍ କ୍ରୀତି ଦ୍ୱିପ୍ନି ରଞ୍ଜାଙ୍ଗ୍ ଜାଜ୍ ଇଟ୍ନି ବାହା ମାଚାତ୍। ହେଦାଙ୍ଗ୍ ଉତ୍ତରପଶ୍ଚିମ ଆରେ ଦକ୍ଷିଣପଶ୍ଚିମ ନିପଣ୍ ମାଚାତ୍। ହାମ୍ଦୁର୍ତାକେ ଦୁକା ବାର୍ହା ଆତାତ୍ 13 ତାପାଚେ ଦକ୍ଷିଣ ନିପ୍ଣି ଦୁକା ଦିରେ-ଦିରେ ଆତିଲେ ହେୱାର୍ ପୈନିକ୍ସ୍ ସହର୍ତାକେ ହାଞ୍ଜେଙ୍ଗ୍ ଏକିଆନାତ୍ ଇଞ୍ଜି ମାନ୍ତ ବାବିକିତାକା ପୁରାଆନାତ୍ ଇଞ୍ଜି ପୁନ୍ଞ୍ଜି ଗାଚ୍ଚି ଜାଜ୍ତିଙ୍ଗ୍ ରିକ୍ଚି କ୍ରୀତି ଦ୍ୱିପ୍ନି ଗୁଟି-ଗୁଟି ହାଞ୍ଜେଙ୍ଗ୍ ଲାଗାତାର୍। 14 ମାତର୍ ଅଲପ୍ ସମୟ୍ ଆତିପାଚେ, ହାମ୍ଦୁର୍ତାକେ ବେସି ଦୁକା ଆତାତ୍, ହେ ଦୁକାତିଙ୍ଗ୍ ଇଉରକ୍ୱିଲ ଇନାର୍। 15 ହେ ଦୁକା ଆତିଲେ ଜାଜ୍ ଆଗେ ହାଞ୍ଜେଙ୍ଗ୍ ଆଡ୍ୱାତାତ୍, ଲାଗିଙ୍ଗ୍ ଦୁକା ଜାଜ୍ତିଙ୍ଗ୍ ଇମେନିପଣ୍ ଅତିସ୍ ଅୱେତ୍ ଇଞ୍ଜି ପିସ୍ତାପ୍। 16 ଲାଗିଙ୍ଗ୍ କ୍ଲାଉଦ ତର୍ଦି ର ହିରୁ ଦ୍ୱିପ୍ନି କାଣ୍ଡିତାକେ ଇକାତାପ୍, ଆରେ ହିରୁ ଡଙ୍ଗାଙ୍ଗ୍ ଜାଜ୍ ଜପି ବେସି କଷ୍ଟତାଙ୍ଗ୍ ଇଡ଼୍ତାପ୍। 17 ମାନାୟାର୍ ହେ ହିରୁ ଡଙ୍ଗାକାଙ୍ଗ୍ ଜାଜ୍ ଜପି ଦୁପ୍ତି ପାଚେ, ଜାଜ୍ ଚାରିବେଣ୍ତାଙ୍ଗ୍ ଗାଚ୍ଚାର୍। ଜାଜ୍ ସୁର୍ତ୍ତି ତର୍ଦି ବାଲିଆତାକେ ହାଲ୍ଜି ଟେବାଆନାତ୍ ଇଞ୍ଜି ପାଣ୍ଡ୍ରା ଆତାର୍, ଲାଗିଙ୍ଗ୍ ହେୱାର୍ ଜାଜ୍ନି ପାର୍ଦା ୱିଜୁ ରିକ୍ଚି ତାରେନ୍ ତୁସିହିତାର୍। 18 ଦୁକାତାକେ ବେସି କଷ୍ଟ ଆତିଲେ ଆର୍କାତ୍ ନାଞ୍ଜିଙ୍ଗ୍ ଡ୍ରାଇବରାର୍ ଜିନିଷ୍ ତୁସିହିଦେଙ୍ଗ୍ ଲାଗାତାର୍। 19 ତିନ୍ଦିନ୍ ନାଞ୍ଜିଙ୍ଗ୍ ଡ୍ରାଇବରାର୍ ହେୱାର୍ ନିଜେ ଜାଜ୍ ରହ୍ନି ରେନ୍ଚିଙ୍ଗ୍ ମାନି ପେଡ଼ିତିଙ୍ଗ୍ ତୁସିହିତାର୍। 20 ବେସିଦିନ୍ ପାତେକ୍ ୱେଡ଼ା କି ହୁକାଙ୍ଗ୍ ଚଞ୍ଜିଆ ଆଦ୍ୱିତିଲେ, ଆରେ ବେସି ଦୁକା ବାର୍ହା ଆଜି ମାଚାତ୍, ଲାଗିଙ୍ଗ୍ ଆପେଙ୍ଗ୍ ରକ୍ଷା ପାୟାଆନାପ୍ ଇଞ୍ଜି ଆହା କିୱାତାପ୍। 21 ୱିଜାକାର୍ କେତେକ୍ ଦିନ୍ ପାତେକ୍ ନାସ୍କି ମାଚାର୍। ଲାଗିଙ୍ଗ୍ ପାଉଲ ହେୱାର୍ତାକେ ନିଲ୍ଚି ୱେଚ୍ଚାନ୍, “ଆଜ୍ଞା କାଦେର୍, ନା କାତା ମାନିକିଜି କ୍ରୀତି ଦ୍ୱିପ୍ତାଙ୍ଗ୍ ଜାଜ୍ ରିକ୍ୱାଦାଙ୍ଗ୍ ମାଚିସ୍, ଏଚେକ୍ ଜିନିଷ୍ ବୁଡା ଆୱାତାତ୍ମା। 22 ମାତର୍ ନଙ୍ଗୟ୍ ଏପେଙ୍ଗ୍ ଶାସ୍ ଆହାଟ୍, ଇନେସ୍କି ମା ବିତ୍ରେତାଙ୍ଗ୍ ଇନେର୍ ହାଃଉର୍। ମାତର୍ ଜାଜ୍ ନେ ବୁଡାଆନାତ୍। 23 ଆନେଙ୍ଗ୍ ଇମ୍ଣି ଈଶ୍ୱର ମାନାୟ୍, ଆରେ ଆନେଙ୍ଗ୍ ଇନେରିଙ୍ଗ୍ ପୁଜା କିନାଙ୍ଗା, ତା ରକାନ୍ ଦୁତ୍ ମିକା ନା ଲାଗାୟ୍ ନିଲ୍ଚି ୱେଚ୍ଚାତାତ୍। 24 ‘ପାଉଲ ପାଣ୍ଡ୍ରାଆମା, ରୋମ୍ ଦେସ୍ନି ମହା ରାଜାତାକେ ନିଲ୍ନାକା ମାନାତ୍, ଆରେ ନି ହୁଦାଙ୍ଗ୍ ୱାନି ୱିଜାକାରିଙ୍ଗ୍ ପା ଈଶ୍ୱର ତା ଦୟାତାଙ୍ଗ୍ ରକ୍ଷା କିନାନ୍।’ 25 ଲାଗିଙ୍ଗ୍ ଆଜ୍ଞା କାଦେର୍, ଶାସ୍ ଆହାଟ୍, ଈଶ୍ୱର ଇନେସ୍ ନାଙ୍ଗେଙ୍ଗ୍ ୱେଚ୍ଚାତାନ୍ନା ହେଲେକେ ନେ ଗଟାଆନାତ୍ ଇଞ୍ଜି ଆନେଙ୍ଗ୍ ଈଶ୍ୱରତାକେ ପାର୍ତି କିନାଙ୍ଗା। 26 ମାତର୍ ଆସେଙ୍ଗ୍ ଇମ୍ଣି ର ଦ୍ୱିପ୍ତାକେ ହାଲ୍ଜି ଇକାନାକା ମାନାତ୍।” 27 ହେଲେକେ ଏପେଙ୍ଗ୍ ଚଉଦ ଦିନ୍ ଆଦ୍ରିଆ ହାମ୍ଦୁର୍ତାକେ ଇନି ଆନି ଆନିହିଙ୍ଗ୍, ହେ ମିକାନି ମାଦିମାଦାନାଣା ଜାଜ୍ ଡ୍ରାଇବରାର୍ ହାମାନ୍ ବାହାତାକେ ଇକାନାପା ଇଞ୍ଜି ଅନ୍ମାନ୍ କିତାର୍। 28 ଲାଗିଙ୍ଗ୍ ହେୱାର୍ ହେ ଏଜୁକାଙ୍ଗ୍ ଲାଚ୍ଚାର୍, ଆରେ ଶହେ କୁଡ଼େ ପୁଟ୍ ମାନାତ୍ ଇଞ୍ଜି ପୁଚାର୍। ଆରେ ଅପଲ୍ ଦେହା ହାଲ୍ଜି ଲାଚ୍ଚାର୍ ଆରେ ନବେ ପୁଟ୍ ଇଞ୍ଜି ପୁଚାର୍। 29 କେଜାଣେ ଆପେଙ୍ଗ୍ ଇମ୍ଣି କାଲ୍କୁକାଙ୍ଗ୍ ଜାଜ୍ ଟେବାଆନାତ୍ ଇଞ୍ଜି ପାଣ୍ଡ୍ରାଆଜି ଡ୍ରାଇବରାର୍ ପାଚ୍ବାଗାୟ୍ ଚାରିଗଟା ଲଙ୍ଗର୍ ତୁସିହିଜି ଗାଚ୍ଚାର୍। ଆରେ ହେୱାର୍ ଅଜଡ଼୍ ଆନାକାଦିଙ୍ଗ୍ କାସି ମାଚାର୍। 30 ମାତର୍ ଜାଜ୍ତାକେ କାମାୟ୍ କିନାକାର୍ ଜାଜ୍ନି ଆଗ୍ବାଗାୟ୍ ଲଙ୍ଗର୍ ତୁସିହିଜି ଗାଚ୍ନାପ୍ ଇଞ୍ଜି ଟକାଇ କିଜି, ହିରୁ ଡଙ୍ଗାଙ୍ଗ୍ ଜାଜ୍ତାଙ୍ଗ୍ ଜୁତ୍ତି ହାନାପ୍ ଇଞ୍ଜି ଉପାଇକିଜି ମାଚାର୍। 31 ଲାଗିଙ୍ଗ୍ ପାଉଲ ସେନାର୍ ମୁକ୍ଯା ଆରେ ସେନାରିଙ୍ଗ୍ ୱେଚ୍ଚାନ୍, “ହେୱାର୍ ଜାଜ୍ତାକେ ମାନ୍ୱିତିସ୍ ଏପେଙ୍ଗ୍ ରକ୍ଷା ପାୟା ଆଉଦେର୍।” 32 ଲାଗିଙ୍ଗ୍ ସେନାର୍ ହିରୁ ଡଙ୍ଗାତାକେ ଗାଚ୍ଚି ଡରିକାଙ୍ଗ୍ ହଣ୍ଜି ତାରେନ୍ ରାତ୍ତାର୍। 33 ଅଜଡ଼୍ଆଜି ୱାନିହିଙ୍ଗ୍ ପାଉଲ ହେୱାରିଙ୍ଗ୍ ଶାସ୍ ହିଜି ଇନାକା ତିନାଟ୍ ଇଞ୍ଜି ୱେଚ୍ଚାନ୍, “ନେଞ୍ଜ୍ତାଙ୍ଗ୍ ଚଉଦ ଦିନ୍ ପାତେକ୍ ଚିନ୍ତା କିଜି ଇନାକା ତିନ୍ୱାଦାଙ୍ଗ୍ ନାସ୍କି ମାନାଦେର୍। 34 ଲାଗିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ଇଚ୍କେ ତିନାଟ୍ ଇଞ୍ଜି ୱେଚ୍ଚାନାଙ୍ଗା, ଇନେସ୍କି ଏପେଙ୍ଗ୍ ଜିବୁନ୍ତିଙ୍ଗ୍ ଉଦାର୍ କିଦେଙ୍ଗ୍ କାଦି ଦର୍କାର୍। ମି କାପ୍ଡ଼ାନି ତେମୁଲ୍ ରଞ୍ଜାଙ୍ଗ୍ ପା ତେମୁଲ୍ ନଷ୍ଟ ଆଉତ୍।” 35 ଇୱିଜୁ କାତା ୱେଚ୍ଚି ପାଚେ, ପାଉଲ ରୁଟି ଆସ୍ତି ୱିଜାକାର୍ ମୁମ୍ଦ ଈଶ୍ୱରତାକେ ପାର୍ତାନା କିତାନ୍, ଆରେ ରୁଟିତିଙ୍ଗ୍ ଡ୍ରିକ୍ଚି ଚିଞ୍ଜେଙ୍ଗ୍ ଲାଗାତାର୍। 36 ହେବେତାଙ୍ଗ୍ ହେୱାର୍ ୱିଜାକାର୍ ଶାସ୍ ପାୟାଆଜି ଚିଞ୍ଜେଙ୍ଗ୍ ଲାଗାତାର୍। 37 ଆପେଙ୍ଗ୍ ଜାଜ୍ତାକେ ଦୁଇଶ ସତୁରି ଚଅଜାଣ୍ ମାଚାପ୍। 38 ହେୱାର୍ ୱିଜାକାର୍ ପଟ ପାଞ୍ଜୁ-ପାଞ୍ଜୁ ଚିଚି ପାଚେ, ଜାଜ୍ତିଙ୍ଗ୍ ଉସାସ୍ କିନି କାଜିଙ୍ଗ୍ ଗହମ୍ତିଙ୍ଗ୍ ହାମ୍ଦୁର୍ତାକେ ତୁସିହିତାର୍। ଜାଜ୍ ଡିଙ୍ଗ୍ତାତ୍ 39 ଅଜଡ଼୍ ଆତିଲେ ହେୱାର୍ ହେ ହାମାନ୍ ବାହାତିଙ୍ଗ୍ ଚିନ୍ କିଦେଙ୍ଗ୍ ଆଡ୍ୱାତାର୍, ମାତର୍ ହେୱାର୍ ବାଲିଆ ମାନି ର କଡ଼ି ହୁଡ଼୍ତାର୍। ହେଦାଙ୍ଗ୍ କାଜିଙ୍ଗ୍ ଇନେସ୍ କିଜି ପା ଜାଜ୍ ହେବେ ଏକି କିଦେଙ୍ଗ୍ ଇଚାକିତାର୍। 40 ଲାଗିଙ୍ଗ୍ ହେୱାର୍ ଲଙ୍ଗର୍ ୱିଜୁ ହଣ୍ଜି ହାମ୍ଦୁର୍ତାକେ ପିସ୍ତାର୍, ଆରେ ସାଙ୍ଗେ-ସାଙ୍ଗେ ଜାଜ୍ନି ଡରିଙ୍ଗ୍ ୱିଜୁ ରିକ୍ତାର୍, ଆରେ ଜାଜ୍ନି ପାର୍ଦା ୱିଜୁ ରିକ୍ଚି ଦୁକା ନିପଣ୍ କିତାର୍, ଆରେ ହାମ୍ଦୁର୍ କାଣ୍ଡି ନିପଣ୍ ହାଞ୍ଜେଙ୍ଗ୍ ଉପାୟ୍ କିତାର୍। 41 ମାତର୍ ହେୱାର୍ ରିଣ୍ଡାଙ୍ଗ୍ ହାମ୍ଦୁର୍ ମେହାଆନି ବାହାତାକେ ଇକାତାର୍, ଜାଜ୍ ବାଲିଆ ମାନି ବାହାତାକେ ଡୁକା ଆତାତ୍। ଆରେ ତା ଆଗ୍ବାଗାୟ୍ନି ମୁଣ୍ଡି ବାଲିଆ ବିତ୍ରେ ମୁନ୍ଞ୍ଚାତ୍, ଲାଗିଙ୍ଗ୍ ଜାଜ୍ନି ପାଚ୍ବାଗାୟ୍ନି ମୁଣ୍ଡି ଲଉଡ଼ି ଡୁକା ଆଜି-ଆଜି ଡିଙ୍ଗ୍ଦେଙ୍ଗ୍ ଲାଗାତାତ୍। 42 କେଜାଣେ ବନ୍ଦି ଆତାର୍ ପଁରାଆଜି ଉମ୍ଜି ହାନାର୍ ଇଞ୍ଜି ବାବିକିଜି, ସେନାର୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍। 43 ମାତର୍ ଶହେ ସେନାର୍ ମୁକ୍ୟା ପାଉଲତିଙ୍ଗ୍ ଉଦାର୍ କିଦେଙ୍ଗ୍ ଇଚା କିତାନ୍। ଆରେ ସେନାର୍ ବାବିକିତି ବିଷୟତିଙ୍ଗ୍ ଟେବାଇ କିତାନ୍, ଆରେ ହେୱାନ୍ ଆଦେସ୍ ହିତାନ୍, “ମି ବିତ୍ରେ ଇନେର୍ ପଁରାଆଦେଙ୍ଗ୍ ପୁଚାଦେର୍ନା ହେୱାର୍ ହାମ୍ଦୁର୍ତାକେ ଗୁମ୍ଜି କାଣ୍ଡିତାକେ ହାଲାଟ୍। 44 ଆରେ ଇମ୍ଣାକାର୍ ପଁରାଆଦେଙ୍ଗ୍ ପୁନୁର୍ ହେୱାର୍ ଜାଜ୍ନି ଡିଙ୍ଗ୍ତି ପାଟା ଆରେ ଜିନିଷ୍ ଆସ୍ତି କାଣ୍ଡିତାକେ ହାଲାଟ୍।” ଏଲେଙ୍ଗ୍ ଆଜି ଆପେଙ୍ଗ୍ ୱିଜାକାପ୍ ହାମାନ୍ ବାହାତାକେ ଇକିସ୍ ରକ୍ଷା ପାୟାଆତାପ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation