ପକ୍ୟାତାକା 26 - New Testament in Pengo Parja Languageପାଉଲ ତା ବିଷୟରେ ଆଗ୍ରିପା ରାଜାଙ୍ଗ୍ ୱେଚ୍ଚାନ୍ 1 ଆଗ୍ରିପା ରାଜା ପାଉଲତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନଙ୍ଗୟ୍ନି ବିଷୟରେ ୱେଚ୍ଚେଙ୍ଗ୍ ଆଡ୍ନାଇ।” ଲାଗିଙ୍ଗ୍ ପାଉଲ କେଇ ଚଚ୍ଚି ୱେଚ୍ଚେଙ୍ଗ୍ ଲାଗାତାନ୍, 2 ଏ ଆଗ୍ରିପା ରାଜା ଯିହୁଦି ନେତାର୍ ନାଙ୍ଗେଙ୍ଗ୍ ଏଚେକ୍ ବିରଦ୍ କିଜି ଦସ୍ କିତ୍ତାର୍ନା, ହେ ବିଷୟରେ ନି ଲାଗାୟ୍ ୱେଚ୍ଚେଦେଙ୍ଗ୍ ସୁଯଗ୍ ପାୟାଆତି କାଜିଙ୍ଗ୍, ଆନେଙ୍ଗ୍ ରକାଙ୍ଗ୍ ବାଗ୍ୟନି ମାନାୟ୍ ଇଞ୍ଜି ବାବିକିନାଙ୍ଗା। 3 ଇନେସ୍କି ଏନେଙ୍ଗ୍ ଯିହୁଦି ଜାତିନି ମାନିକିନି ରିତିନିତି ଆରେ ମାନିକିୱି ରିତିନିତି ବିଷୟରେ ହାର୍ଦାଙ୍ଗ୍ ପୁଚାଇନା। ଲାଗିଙ୍ଗ୍ ଦୟାକିଜି ନା ବେଣ୍ ୱିଜ୍ନି ପାତେକ୍ ୱେନା। 4 ଆନେଙ୍ଗ୍ ହିମ୍ଣା ୱେଡ଼ାତାଙ୍ଗ୍ ନା ମାନାୟାର୍ତାକେ ଆରେ ଯିରୁଶାଲାମ ସହର୍ତାକେ ଇନେସ୍ଆଜି ମାଚାଙ୍ଗ୍ ହେଦାଙ୍ଗ୍ୱିଜୁ ଯିହୁଦି ମାନାୟାର୍ ୱିଜାକାର୍ ପୁନାର୍। 5 ହେୱାର୍ ନାଙ୍ଗେଙ୍ଗ୍ ହିମ୍ଣା ୱେଡ଼ାତାଙ୍ଗ୍ ପୁନ୍ଞ୍ଚାର୍ନା ଯଦି ହେୱାର୍ ଇଚା କିତିସ୍ ସାକି ହିଦେଙ୍ଗ୍ ଆଡ୍ନାର୍, ମା ଦରମ୍ତିଙ୍ଗ୍ ବେସି ଷ୍ଟିଟ୍କିଜି ମାନିକିନି ପାରୁସିଦଳ୍ନି ଆନେଙ୍ଗ୍ ରକାଙ୍ଗ୍ ପାରୁସି ମାଚାଙ୍ଗ୍। 6 ଈଶ୍ୱର ମା ଆକଦାଦିର୍ତାକେ ଇମ୍ଣି ପାର୍ମାଣ୍ କିଜି ମାଚାନ୍, ହେ ପାର୍ମାଣ୍ତିଙ୍ଗ୍ ଆହାକିଜି ମାଚିଲେ, ଆନେଙ୍ଗ୍ ନଙ୍ଗୟ୍ ଦସି ଆତାଙ୍ଗ୍ନା। 7 ମା ବାର କୁଟୁମ୍ ମାନାୟାର୍ ପା ହେ ପାର୍ମାଣ୍ ପୁରା ଆୟେତ୍ ଇଞ୍ଜି ଆହା ଇଡ଼୍ଜି ଈଶ୍ୱରତିଙ୍ଗ୍ ର ମାନ୍ଆଜି ୱେଡ଼ା ନାଣା ପୁଜା କିନାରା। ଏ ରାଜା ଇ ଆହା କାଜିଙ୍ଗ୍ ନାଙ୍ଗେଙ୍ଗ୍ ଯିହୁଦିର୍ ଦସି କିତ୍ତାର୍ନା। 8 ଈଶ୍ୱର ହାଃତାକାରିଙ୍ଗ୍ ଜିବୁନ୍ କିଜି ନିକ୍ନାନ୍ ଇଞ୍ଜି ପାର୍ତି କିନାଦେରା, ମାତର୍ ଯୀଶୁ ହାଃତିତାଙ୍ଗ୍ ଆରେରଗ ଜିବୁନ୍ ଆନାନ୍ ଇଞ୍ଜି ଇନା କିଦେଙ୍ଗ୍ ଏପେଙ୍ଗ୍ ମାନି କିଉଦେରା? 9 ଆନେଙ୍ଗ୍ ପା ନାଜରିତିୟ ସହର୍ନି ଯୀଶୁ ତର୍ଦାଙ୍ଗ୍ ପାର୍ତି କିନାକାରିଙ୍ଗ୍ ବିରଦ୍ କିଦେଙ୍ଗ୍ ଆଗେ ଇଚାକିଜି ମାଚାଙ୍ଗ୍। 10 ହେଦାଙ୍ଗ୍ କାଜିଙ୍ଗ୍ ଯିରୁଶାଲାମ ସହର୍ତାକେ ଆନେଙ୍ଗ୍ ବିରଦ୍ କିଜି ମାଚାଙ୍ଗ୍, ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିର୍ତାଙ୍ଗ୍ ଆଦିକାର୍ ପାୟାଆଜି ପାର୍ତିକିନି ମାନାୟାରିଙ୍ଗ୍ ଗାଚ୍ଚି ଜଇଲ୍ ଇଡ଼୍ତାଙ୍ଗ୍। ଆରେ ଏଚେପାଦ୍ନା ପାର୍ତି କିନାକାରିଙ୍ଗ୍ ମାର୍ନେ ଅସ୍ତି ମାଚାର୍, ହେପାଦ୍ନା ଆନେଙ୍ଗ୍ ପା ହେୱାର୍ ହୁଦାଙ୍ଗ୍ ରାଜି ଆଜି ମାଚାଙ୍ଗ୍। 11 ଆନେଙ୍ଗ୍ ୱିଜୁଦିନ୍ ପାର୍ତାନା ଇଲ୍କୁକାଙ୍ଗ୍ ବୁଲାଆଜି-ଆଜି ହେୱାରିଙ୍ଗ୍ ସାସ୍ତି ହିଜି ମାଚାଙ୍ଗ୍, ଆରେ ହେୱାରିଙ୍ଗ୍ ଜବର୍ଦସ୍ତିରେ ଯୀଶୁ ଖ୍ରୀଷ୍ଟଙ୍ଗ୍ ନିନ୍ଦାକିନି କାଜିଙ୍ଗ୍ ୱେଚ୍ଚି ମାଚାଙ୍ଗ୍। ଆନେଙ୍ଗ୍ ଏଚେକ୍ ରିସାଆଜି ମାଚାଙ୍ଗ୍ ଯେ, ଜେକନି ସହର୍କୁକାଙ୍ଗ୍ ହାଲ୍ଜି ପା ପାର୍ତି କିନାକାରିଙ୍ଗ୍ ଦୁକ୍କଷ୍ଟ ହିଜି ମାଚାଙ୍ଗ୍। ପାଉଲ ଯୀଶୁଙ୍ଗ୍ ପାର୍ତିକିନି କାତା ( କାମାୟ୍. ୯:୧-୧୯ ; ୨୬:୬-୧୬ ) 12 “ଆନେଙ୍ଗ୍ ଇ କାମାୟ୍ କିଦେଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିର୍ତାଙ୍ଗ୍ ଆଦେସ୍ ହିତ୍ତି ଚିଟି ଆସ୍ତି ଦମେସକ ସହର୍ତାକେ ହାଲ୍ଜି ମାଚାଙ୍ଗ୍। 13 ଏ ରାଜା ଆନେଙ୍ଗ୍ ହାନିହିଙ୍ଗ୍ ପାକାପାକି ମୁଣ୍ଡେ ମେଦାଣ୍ ଆତିହିଙ୍ଗ୍ ବାଦାଡ଼୍ତାଙ୍ଗ୍ ଆଦିକ୍ ଅଜଡ଼୍ କାଟାକା ନା ଜପି ଆରେ ନା ହାଙ୍ଗ୍ଦାକାର୍ ଚାରିବେଣ୍ତାଙ୍ଗ୍ ଆତାକା ହୁଡ଼୍ତାଙ୍ଗ୍। 14 ଆପେଙ୍ଗ୍ ୱିଜାକାପ୍ ମେଦ୍ନିତ ଗୁର୍ତାପ୍, ଆନେଙ୍ଗ୍ ଏବ୍ରୀ ବାଷାତାଙ୍ଗ୍ ର କାଟ୍ ୱେଚାଙ୍ଗ୍, ‘ଏ ଶାଉଲ ଶାଉଲ ଇନା କିଦେଙ୍ଗ୍ ନାଙ୍ଗେଙ୍ଗ୍ ଦୁକ୍କଷ୍ଟ ହିଦ୍ନାୟା? ବାଡ଼୍ଦୁ ଇନେସ୍ ତିତିରିତିଙ୍ଗ୍ ତଗ୍ଜି କଷ୍ଟ ପାୟାଆନାତ୍, ହେଲେକେ ଏନେଙ୍ଗ୍ ନାଙ୍ଗେଙ୍ଗ୍ ଅସ୍ତାନାଙ୍ଗ୍ ଇଞ୍ଜି ନିଜେ କଷ୍ଟ ପାୟାଆନାୟା।’ 15 ଲାଗିଙ୍ଗ୍ ଆନେଙ୍ଗ୍ ୱେଚ୍ଚାଙ୍ଗ୍, ‘ଏନେଙ୍ଗ୍ ଇନେର୍ ମାପୃ?’ ଲାଗିଙ୍ଗ୍ ମାପୃ ୱେଚ୍ଚାତାନ୍, ‘ଇନେରିଙ୍ଗ୍ ଏପେଙ୍ଗ୍ ଦୁକ୍କଷ୍ଟ ହିନାଦେରା, ଆନେଙ୍ଗ୍ ହେ ଯୀଶୁ।’ 16 ନଙ୍ଗୟ୍ ଏନେଙ୍ଗ୍ ନିଙ୍ଗା, ଇନେସ୍କି ଆନେଙ୍ଗ୍ ନିଙ୍ଗେଙ୍ଗ୍ ନା କାଜିଙ୍ଗ୍ କାମାୟ୍ କିଦେଙ୍ଗ୍ ବାଚି କିତ୍ତାଙ୍ଗ୍ନା, ଆରେ ନା ବିଷୟରେ ଇନାକା ହୁଡ଼୍ତାୟ୍ ଆରେ ଆଗେ ପା ହୁଡ଼୍ନାୟ୍ ହେ ବିଷୟରେ ସାକି ଆଦେଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଚଞ୍ଜିଆ ଆତ୍ତାଙ୍ଗ୍। 17 ଆନେଙ୍ଗ୍ ନିଙ୍ଗେଙ୍ଗ୍ ଜାର୍ ମାନାୟ୍ ଆରେ ବିନ୍ଜାତିନି ମାନାୟାର୍ତାଙ୍ଗ୍ ଉଦାର୍ କିଦ୍ନାଙ୍ଗ୍, ଈଶ୍ୱର କାତା ଶୁଣାୟ୍ କିଦେଙ୍ଗ୍ ନଙ୍ଗୟ୍ ହେୱାର୍ତାକେ ପକ୍ତାନାଙ୍ଗା। 18 ଲାଗିଙ୍ଗ୍ ହେୱାର୍ କରାପ୍ କାମାୟ୍ ପିସ୍ତି ହାର୍ଦି କାମାୟ୍ କିନାର୍, ଆରେ ଶୟତାନ୍ ଶାକ୍ତିତାଙ୍ଗ୍ ଈଶ୍ୱର ଲାଗାୟ୍ ୱାତିସ୍, ଈଶ୍ୱର ହେୱାର୍ ପାପ୍ତିଙ୍ଗ୍ କେମା କିନାନ୍। ଆରେ ନାବେ ପାର୍ତି କିଦେଙ୍ଗ୍ ଇନେରିଙ୍ଗ୍ ଦରମ୍ ମାନାୟ୍ କିତାନ୍ନା ହେୱାର୍ ହୁଦାଙ୍ଗ୍ ମାଞ୍ଜେଙ୍ଗ୍ ଈଶ୍ୱର ଆଦିକାର୍ ହିନାନ୍। 19 ହେଦାଙ୍ଗ୍ କାଜିଙ୍ଗ୍ ହେ ଆଗ୍ରିପା ରାଜା ସରଗ୍ତାଙ୍ଗ୍ ହୁଡ଼୍ତି ବିଷୟତିଙ୍ଗ୍ ଆନେଙ୍ଗ୍ ମାନି କିତାଙ୍ଗ୍ନା। 20 ଲାଗିଙ୍ଗ୍ ପାର୍ତୁମ୍ ଦମେସକ ସହର୍ତାକେ, ଆରେ ଯିରୁଶାଲାମ ସହର୍ନି ମାନାୟାର୍ତାକେ, ପାଚେ ଯିହୁଦା ଜିଲ୍ଲାତାକେ ମାନି ଯିହୁଦିରିଙ୍ଗ୍ ଆରେ ବିନ୍ଜାତିନି ମାନାୟାରିଙ୍ଗ୍ ଆନେଙ୍ଗ୍ ଶୁଣାୟ୍ କିତାଙ୍ଗ୍ନା। ଇନେସ୍କି ହେୱାର୍ ପାପ୍ କାମାୟ୍ ପିସ୍ତି ଈଶ୍ୱରତାକେ ୱାନାର୍ ଆରେ ହାର୍ଦି କାମାୟ୍ କିଜି ଜିନାର୍। 21 ଇଦାଙ୍ଗ୍ କାଜିଙ୍ଗ୍ କେତେକ୍ ଯିହୁଦି ମାନାୟାର୍ ଈଶ୍ୱର ମାନି ମନ୍ଦିର୍ତାକେ ନାଙ୍ଗେଙ୍ଗ୍ ଆସ୍ତି ଅସ୍ତେଦେଙ୍ଗ୍ ଉପାଇକିଜି ମାଚାର୍। 22 ମାତର୍ ଈଶ୍ୱରତାଙ୍ଗ୍ ସାଇଜ ପାୟାଆଜି ଆନେଙ୍ଗ୍ ନେଞ୍ଜେଙ୍ଗ୍ ପାତେକ୍ ଗାଜାକାର୍ ଆରେ ହିରୁକାର୍ ମୁମ୍ଦ ଶୁଣାୟ୍ କିଜି ୱାତାଙ୍ଗ୍ନା, ଭବିଷ୍ଯତବକ୍ତାର୍ ଆରେ ମୋଶା ଇନା-ଇନାକା ଗଟାଆନାତ୍ ଇଞ୍ଜି ୱେଚ୍ଚାର୍ନା ହେଦାଙ୍ଗ୍ନେ ଆନେଙ୍ଗ୍ ୱେଚ୍ନାଙ୍ଗା। 23 ଇବିଷୟ ୱେଚ୍ଚାର୍ନା ଯେ ଖ୍ରୀଷ୍ଟ ଦୁକ୍କଷ୍ଟ ପାୟା ଆନାନ୍, ଆରେ ହେୱାନ୍ନେ ପାର୍ତୁମ୍ ହାଃତାକାର୍ତାଙ୍ଗ୍ ଜିବୁନ୍ଆଜି ନିଙ୍ଗ୍ନାନ୍। ଇଦାଙ୍ଗ୍ କାଜିଙ୍ଗ୍ ଯିହୁଦିର୍ ଆରେ ବିନ୍ଜାତିନି ମାନାୟାର୍ ଲାଗାୟ୍ ହେୱାର୍ ପା ରକ୍ଷା ପାୟାଆନାର୍ ଇଞ୍ଜି ଶୁଣାୟ୍ କିନାନ୍।” 24 ପାଉଲ ତା ବିଷୟରେ ୱେଚ୍ନିହିଙ୍ଗ୍ ପେଷ୍ଟସ୍ ରାଜା ଗାଜାକାଟ୍ କିଜି ୱେଚ୍ଚାନ୍, “ପାଉଲ ଏନେଙ୍ଗ୍ ବାୟା! ବେସି ବିଷୟ ପୁଚିଲେ ଏନେଙ୍ଗ୍ ବାୟା ଆତାଇନା।” 25 ମାତର୍ ପାଉଲ ୱେଚ୍ଚାନ୍, “ଏ ପେଷ୍ଟସ୍ ରାଜା, ଆନେଙ୍ଗ୍ ବାୟା ଆକାୟ୍, ଆନେଙ୍ଗ୍ ସତ୍ ଆରେ ବିଦିନି କାତା ୱେଚ୍ନାଙ୍ଗା। 26 ରାଜା ତ ଇୱିଜୁ ବିଷୟରେ ପୁଚାନ୍ନା, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଶାସ୍ ହୁଦାଙ୍ଗ୍ ହେୱାନିଙ୍ଗ୍ ୱେଚ୍ନାଙ୍ଗା। ଆନେଙ୍ଗ୍ ପାର୍ତି କିନାଙ୍ଗା ଯେ ଇ ବିଷୟରେ ହେୱାନ୍ ପୁରା-ପୁରି ପୁଚାନ୍ନା, ଇୱିଜୁ ବିଷୟ ୱିଜାକାର୍ ଆଗେ ଗଟାଆତାତ୍ନା। 27 ରାଜା ଆଗ୍ରିପା ଏନେଙ୍ଗ୍ ଇନାକା ଭବିଷ୍ଯତବକ୍ତାରିଙ୍ଗ୍ ପାର୍ତି କିନାୟା? ଏନେଙ୍ଗ୍ ପାର୍ତି କିନାୟ୍ ଇଞ୍ଜି ଆନେଙ୍ଗ୍ ପୁଚାଙ୍ଗ୍ନା।” 28 ଆଗ୍ରିପା ରାଜା ପାଉଲତିଙ୍ଗ୍ ୱେଚ୍ଚାନ୍, “ଅଲପ୍ କାତା ୱେଚ୍ଚି ନାଙ୍ଗେଙ୍ଗ୍ ଖ୍ରୀଷ୍ଟାନ୍ କିଦ୍ନାଙ୍ଗ୍ ଇଞ୍ଜି ମାନ୍ତ ବାବିକିନାୟା କି?” 29 ପାଉଲ ୱେଚ୍ଚାନ୍, “ଅଲପ୍ କାତା ଆୟେତ୍ କି ବେସି କାତା ଆୟେତ୍, ଏନ୍ଜାଣି ଆକାୟ୍, ମାତର୍ ଏଚେଜାଣ୍ ନା କାତା ନେଞ୍ଜେଙ୍ଗ୍ ୱେନାରା, ହେୱାର୍ ୱିଜାକାର୍ ବନ୍ଦି ଆୱାଦାଙ୍ଗ୍ ନା ଲେକେ ଯୀଶୁଙ୍ଗ୍ ପାର୍ତି କିଦେଙ୍ଗ୍ ଆନେଙ୍ଗ୍ ଈଶ୍ୱରତାକେ ପାର୍ତାନା କିନାଙ୍ଗା।” 30 ଆଗ୍ରିପା ରାଜା, ତା ତଣ୍ଦେହି ବର୍ଣ୍ଣିକି, ଆରେ ପେଷ୍ଟସ୍ ଗବର୍ନର୍, ଆରେ ହେୱାର୍ ହୁଦାଙ୍ଗ୍ କୁଚ୍ଚି ମାଚାକାର୍ ନିଙ୍ଗ୍ଞ୍ଜି ହନ୍ତାର୍। 31 ହେୱାର୍ ହାନିହିଙ୍ଗ୍ ତା ବିତ୍ରେ କାତାବାର୍ତା ଆଜି ୱେଚ୍ଚାର୍, “ଇୱାନ୍ତ ହାଃନିଲେକେ କି ବନ୍ଦି ଆଜି ମାନିଲେକେ ଦସ୍ କିୱାତାନ୍ନା।” 32 ଆଗ୍ରିପା ପେଷ୍ଟସ୍ ରାଜାଙ୍ଗ୍ ୱେଚ୍ଚାନ୍, “ଇୱାନ୍ ଯଦି ରୋମ୍ ଦେସ୍ନି ମହା ରାଜାତାଙ୍ଗ୍ ବିଚାର୍ କିୟି ଆଦେଙ୍ଗ୍ ଇଚା କିୱାଦାଙ୍ଗ୍ ମାଚିସ୍, ଇୱାନ୍ ବନ୍ଦିତାଙ୍ଗ୍ ହତାନ୍ମା।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation