ପକ୍ୟାତାକା 25 - New Testament in Pengo Parja Languageପାଉଲ ତା ବିଷୟରେ ପେଷ୍ଟସ୍ ରାଜାଙ୍ଗ୍ ୱେଚ୍ଚାନ୍ 1 ପେଷ୍ଟସ୍ ରାଜା ପାଦ୍ ପାୟାଆଜି ଯିହୁଦା ଜିଲ୍ଲାତାକେ ୱାତାନ୍, ଆରେ ତିନ୍ଦିନ୍ ପାଚେ ହେୱାନ୍ କାଇସରିଆ ସହର୍ତାଙ୍ଗ୍ ଯିରୁଶାଲାମ ସହର୍ତାକେ ହାଚାନ୍। 2 ଈଶ୍ୱର ହେବାକିନି ମୁଡ଼୍ଦି ପୁଜାରିର୍ ଆରେ ଯିହୁଦି ନେତାର୍ ହେ ରାଜା ଲାଗାୟ୍ ୱାତାର୍, ଆରେ ହେୱାର୍ ପାଉଲ ବିରଦ୍ତାକେ ୱେଚ୍ଚାର୍। 3 ପାଉଲତିଙ୍ଗ୍ ଯିରୁଶାଲାମ ସହର୍ତାକେ କୁକ୍ଚି ତାହିୱା ଇଞ୍ଜି ରାଜାର୍ ଲାଗାୟ୍ ହାଲ୍ଜି ଦୟାକିଦା ଇଞ୍ଜି ଗୁୱାରି କିତାର୍। ଇନେସ୍କି ହେୱାର୍ ପାଉଲତିଙ୍ଗ୍ ହାଜ୍ଦ ନେ ମାର୍ନେ ଅହ୍ନାପ୍ ଇଞ୍ଜି ଉପାଇକିଜି ମାଚାର୍। 4 ହେବେ ପେଷ୍ଟସ୍ ରାଜା ହେୱାରିଙ୍ଗ୍ ୱେଚ୍ଚାନ୍, “ପାଉଲ ତ କାଇସରିଆ ସହର୍ନି ଜଇଲ୍ ଇଞ୍ଜ ବନ୍ଦି ଆତାନ୍ନା, ଆନେଙ୍ଗ୍ ନିଜେ ଅଲପ୍ଦିନ୍ ପାଚେ ହେବେ ହାନାଙ୍ଗ୍। 5 ହେଦାଙ୍ଗ୍ କାଜିଙ୍ଗ୍ ମି ନେତା ବିତ୍ରେତାଙ୍ଗ୍ କେତେକ୍ ନେତାର୍ ନା ହୁଦାଙ୍ଗ୍ ୱାଡୁ, ଯଦି ହେୱାନ୍ ଇନାକା ବୁଲ୍ କିଜିମାଚିସ୍ ତା ବିରଦ୍ତାକେ ହେବେ ୱେଚାଟ୍।” 6 ରାଜା ଯିରୁଶାଲାମ ସହର୍ତାକେ ଆଟ୍ ଦଶ୍ଦିନ୍ ମାଚାନ୍, ପାଚେ କାଇସରିଆ ସହର୍ତାକେ ହାଚାନ୍। ତା ଆର୍କାତ୍ ନାଞ୍ଜିଙ୍ଗ୍ ବିଚାର୍କିନି ବାହାତାକେ କୁଚ୍ଚି ପାଉଲତିଙ୍ଗ୍ ତାସି ୱାଦେଙ୍ଗ୍ ଆଦେସ୍ ହିତାନ୍। 7 ଏଚେପାଦ୍ନା ହେୱାନିଙ୍ଗ୍ ତାହିୱାତାର୍, ଯିରୁଶାଲାମ ସହର୍ତାଙ୍ଗ୍ ହାଲ୍ଜି ମାଚି ଯିହୁଦିର୍ ହେୱାନ୍ ଚାରିବେଣ୍ତାଙ୍ଗ୍ ନିଲ୍ତାର୍, ଆରେ ହେୱାର୍ ତା ବିରଦ୍ତାକେ ଗାଜା ଦସ୍ ହିଜି ୱେଚ୍ଚାର୍, ମାତର୍ ହେୱାର୍ ହେ ୱିଜୁ କାତାତିଙ୍ଗ୍ ସତ୍ ଇଞ୍ଜି ଚଚ୍ଚେଙ୍ଗ୍ ଆଡ୍ୱାତାର୍। 8 ଲାଗିଙ୍ଗ୍ ପାଉଲ ତା ବିଷୟରେ ୱେଚ୍ଚାନ୍, “ଯିହୁଦିର୍ ନିୟମ୍ ସାସ୍ତର୍ କି ଈଶ୍ୱର ମାନି ମନ୍ଦିର୍ କି ରୋମ୍ ଦେସ୍ନି ମହା ରାଜା ବିରଦ୍ତାକେ ଆନେଙ୍ଗ୍ ଇନା ଦସ୍ କିୱାତାଙ୍ଗ୍ନା।” 9 ପେଷ୍ଟସ୍ ରାଜା ଯିହୁଦି ନେତାର୍ତାକେ ବାଲ୍ବଲାଇ ଆଦେଙ୍ଗ୍ ପାଉଲତିଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଯିରୁଶାଲାମ ସହର୍ତାକେ ହାଲ୍ଜି ଇ ବିଷୟରେ ହେବେ ନାଙ୍ଗେଙ୍ଗ୍ ବିଚାର୍ କିଦା ଇଞ୍ଜି ଇଚା କିନାୟା କି?” 10 ମାତର୍ ପାଉଲ ୱେଚ୍ଚାନ୍, “ଆନେଙ୍ଗ୍ ନଙ୍ଗୟ୍ ରୋମ୍ ଦେସ୍ନି ମହା ରାଜା ସିଙ୍ଗାସନ ଆଗେ ନିଲ୍ତାଙ୍ଗ୍ନା, ଇ ବାହାତାକେ ନେ ନାଙ୍ଗେଙ୍ଗ୍ ବିଚାର୍ କିଦ୍ନି ଦର୍କାର୍। ଏପେଙ୍ଗ୍ ହାର୍ଦାଙ୍ଗ୍ ପୁଚାଦେର୍ନା ଯେ, ଆନେଙ୍ଗ୍ ଯିହୁଦିରିଙ୍ଗ୍ ଇନେରିଙ୍ଗ୍ ପା ଅନ୍ୟାୟ୍ କିୱାତାଙ୍ଗ୍ନା। 11 ଯଦି ଆନେଙ୍ଗ୍ ଇନେରିଙ୍ଗ୍ ଅନ୍ୟାୟ୍ କିଜିମାଚିସ୍, ଆରେ ହାଃନିଲେକେ ଇନାକା ଦସ୍ କିଜିମାଚିସ୍, ଆନେଙ୍ଗ୍ ହାଃଦେଙ୍ଗ୍ ପାଣ୍ଡ୍ରା ଆଉଙ୍ଗା। ମାତର୍ ନା ବିରଦ୍ତାକେ ଇ ମାନାୟାର୍ ୱେଚ୍ଚି କାତା ରଞ୍ଜାଙ୍ଗ୍ ପା ସତ୍ ଆକାୟ୍, ହେଦାଙ୍ଗ୍ କାଜିଙ୍ଗ୍ ଯିହୁଦି ନେତାର୍ କେଇଦ ଆହିକିଦ୍ଦେଙ୍ଗ୍ ଇନେରିଙ୍ଗ୍ ପା ଆଦିକାର୍ ଆକାୟ୍। ରୋମ୍ ଦେସ୍ନି ମହା ରାଜା ନାଙ୍ଗେଙ୍ଗ୍ ବିଚାର୍ କିଦେନ୍ ଇଞ୍ଜି ଗୁୱାରି କିନାଙ୍ଗା।” 12 ଲାଗିଙ୍ଗ୍ ପେଷ୍ଟସ୍ ରାଜା ତା ମନ୍ତ୍ରିର୍ ହୁଦାଙ୍ଗ୍ କାତାବାର୍ତା କିଜି ୱେଚ୍ଚାନ୍, “ଏନେଙ୍ଗ୍ ରୋମ୍ ଦେସ୍ନି ମହା ରାଜାତାକେ ବିଚାର୍ କିୟା ଆଦେଙ୍ଗ୍ ଇଚା କିନାୟା, ଲାଗିଙ୍ଗ୍ ଏନେଙ୍ଗ୍ ମହା ରାଜା ଲାଗାୟ୍ ନେ ହାନାୟ୍।” ପାଉଲ ଆଗ୍ରିପା ରାଜାତାକେ ବିଚାର୍ କିୟା ଆଦେଙ୍ଗ୍ ନିଲ୍ତାନ୍ 13 କେତ୍ଦିନ୍ ପାଚେ ଆଗ୍ରିପା ରାଜା ଆରେ ତା ତଣ୍ଦେହି ବର୍ଣ୍ଣିକି କାଇସରିଆ ସହର୍ତାକେ ୱାତାର୍ ଆରେ ପେଷ୍ଟସ୍ ରାଜାଙ୍ଗ୍ ଗିଟାଆତାର୍। 14 ହେୱାର୍ ହେବେ ବେସିଦିନ୍ ମାଚାର୍, ଲାଗିଙ୍ଗ୍ ପେଷ୍ଟସ୍ ରାଜା ପାଉଲ କାତାତିଙ୍ଗ୍ ଆଗ୍ରିପା ରାଜାଙ୍ଗ୍ ୱେଚ୍ଚାନ୍, “ଫେଲିକ୍ସ ରାଜା ରକାନିଙ୍ଗ୍ ବନ୍ଦିକିଜି ଇଡ଼୍ତାନ୍ନା। 15 ଆନେଙ୍ଗ୍ ଏଚେପାଦ୍ନା ଯିରୁଶାଲାମ ସହର୍ତାକେ ହାଲ୍ଜି ମାଚାଙ୍ଗ୍, ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିର୍ ଆରେ ଯିହୁଦିର୍ ପ୍ରାଚିନ୍ ହେ ମାନାୟ୍ ବିଷୟରେ ବେସି ଦସ୍ ଆହିକିଜି ୱେଚ୍ଚାନ୍, ଆରେ ହେୱାନ୍ ହାଃନି ଦଣ୍ଡ୍ ପାୟାଆନି ଦର୍କାର୍ ଇଞ୍ଜି ଗୁୱାରି କିତାନ୍। 16 ଆନେଙ୍ଗ୍ ହେୱାରିଙ୍ଗ୍ ୱେଚ୍ଚାଙ୍ଗ୍, ଦସି ତା ବିରଦ୍ କିନି ମାନାୟାର୍ ଆଗେ ନିଲ୍ଚି ତା ବିଷୟରେ ୱେଚ୍ୱି ପାତେକ୍, ହେୱାନିଙ୍ଗ୍ ଦଣ୍ଡ୍ ହିନାକା ରୋମିୟ ସର୍କାର୍ ବିଦି ହିଲୁତ୍। 17 ଲାଗିଙ୍ଗ୍ ହେ ଯିହୁଦି ନେତାର୍ ନା ହୁଦାଙ୍ଗ୍ କାଇସରିଆ ସହର୍ତାକେ ୱାତାର୍। ଆନେଙ୍ଗ୍ ଡେରି କିୱାଦାଙ୍ଗ୍ ନେ ତା ଆର୍କାତ୍ ନାଞ୍ଜିଙ୍ଗ୍ ସିଙ୍ଗାସନ୍ତାକେ କୁଚ୍ଚି ବିଚାର୍ କିଦେଙ୍ଗ୍ ପାଉଲତିଙ୍ଗ୍ ତାହିୱାଦେଙ୍ଗ୍ ଆଦେସ୍ ହିତାଙ୍ଗ୍। 18 ବିରଦ୍ କିନି ମାନାୟାର୍ ନିଲ୍ଚି ହେୱାନିଙ୍ଗ୍ ଦସ୍ ଆହିକିତାର୍। ମାତର୍ ଆନେଙ୍ଗ୍ ଇମ୍ଣି ଦସ୍ କାତାତିଙ୍ଗ୍ ପୁଞ୍ଜେଙ୍ଗ୍ ଇଚାକିଜି ମାଚାଙ୍ଗ୍, ହେୱାର୍ ହେଲେକେ ଦସ୍ ବିଷୟରେ ୱେଚ୍ୱାତାର୍। 19 ହେୱାର୍ ତା ଜାର୍ ଦରମ୍ ବିଷୟରେ ଆରେ ହାଃତି ମାନାୟ୍ ଯୀଶୁ ତର୍ ବିଷୟରେ ଜୁକ୍ତି କିବାଆଜି ମାଚାର୍। ମାତର୍ ପାଉଲ ହେୱାନ୍ ଜିବୁନ୍ ମାନାନ୍ ଇଞ୍ଜି ୱେଚ୍ଚାନ୍। 20 ଇ ବିଷୟରେ ଆନେଙ୍ଗ୍ ସତ୍ ଇନାକା ପୁଞ୍ଜେଙ୍ଗ୍ ଆଡ୍ୱାତାଙ୍ଗ୍। ଲାଗିଙ୍ଗ୍ ଆନେଙ୍ଗ୍ ପାଉଲତିଙ୍ଗ୍ ୱେନ୍ବାତାଙ୍ଗ୍, ‘ଏନେଙ୍ଗ୍ ଯିରୁଶାଲାମ ସହର୍ତାକେ ହାଲ୍ଜି ଇ ବିଷୟରେ ହେବେ ବିଚାର୍ ଆଦେଙ୍ଗ୍ ଇଚାକି ଆକାଇ।’ 21 ମାତର୍ ପାଉଲ ରୋମ୍ ଦେସ୍ନି ମାହାରାଜାତାକେ ବିଚାର୍ କିୟା ଆଦେଙ୍ଗ୍ ଗୁୱାରି କିତାନ୍, ଲାଗିଙ୍ଗ୍ ମହା ରାଜାତାକେ ପକ୍ୱି ପାତେକ୍ ହେୱାନିଙ୍ଗ୍ ବନ୍ଦିକିଦେଙ୍ଗ୍ ଆଦେସ୍ ହିତାଙ୍ଗ୍।” 22 ହେଦାଙ୍ଗ୍ କାଜିଙ୍ଗ୍ ଆଗ୍ରିପା ରାଜା ପେଷ୍ଟସ୍ ରାଜାଙ୍ଗ୍ ୱେଚ୍ଚାନ୍, “ଆନେଙ୍ଗ୍ ପା ନିଜେ ଇୱାନ୍ କାତାତିଙ୍ଗ୍ ୱେଞ୍ଜେଙ୍ଗ୍ ଇଚା କିନାଙ୍ଗା।” ହେୱାନ୍ ହେୱାନିଙ୍ଗ୍ ୱେଚ୍ଚାନ୍, “ୱିଗାଲିଙ୍ଗ୍ ତା କାତା ଏନେଙ୍ଗ୍ ୱେନାଇ।” 23 ତା ଆର୍କାତ୍ ନାଞ୍ଜିଙ୍ଗ୍ ଆଗ୍ରିପା ରାଜା ଆରେ ତା ତଣ୍ଦେହି ବର୍ଣ୍ଣିକି ଗାଜା ଦୁମ୍-ଦାମ୍ ଆଜି ସେନାର୍ ମୁକ୍ୟା ଆରେ ସହର୍ନି ମୁକ୍ୟାର୍ ହୁଦାଙ୍ଗ୍ ମିଟିଙ୍ଗ୍ ଇଞ୍ଜ ୱାତାର୍। ପେଷ୍ଟସ୍ ରାଜା ଆଦେସ୍ ହିତିଲେ ପାଉଲତିଙ୍ଗ୍ ତାହିୱାତାର୍। 24 ଲାଗିଙ୍ଗ୍ ପେଷ୍ଟସ୍ ରାଜା ୱେଚ୍ଚାନ୍, “ଏ ଆଗ୍ରିପା ରାଜା ଆରେ ଇବେ କୁଚ୍ଚି ୱିଜୁ ମୁକ୍ୟାର୍, ଇୱାନ୍ ଇମ୍ଣାକାନ୍ ମା ହୁଦାଙ୍ଗ୍ ମାନାନ୍, ଇୱାନ୍ ବିଷୟରେ ଯିହୁଦି ଜାତିର୍ ଯିରୁଶାଲାମ ସହର୍ ଆରେ ଇ ବାହାତାକେ ପା ରାଟୁଆଜି ୱେଚ୍ଚାର୍ ଇୱାନ୍ ଜିଜି ମାଞ୍ଜେଙ୍ଗ୍ ଆଦିକାର୍ ଆକାୟ୍। 25 ମାତର୍ ଆନେଙ୍ଗ୍ ପୁଚାଙ୍ଗ୍ ଯେ, ଇୱାନ୍ ହାଃନି ଦଣ୍ଡ୍ ପାୟାଆନି ଲେକେ ଦସ୍ କିୱାତାନ୍ନା, ହେୱାନ୍ ରୋମ୍ ଦେସ୍ନି ମହା ରାଜାତାକେ ବିଚାର୍ ଆଦେଙ୍ଗ୍ ଗୁୱାରି କିତିଲେ, ଆନେଙ୍ଗ୍ ହେବେ ପକ୍ତେଙ୍ଗ୍ ଇଚା କିତାଙ୍ଗ୍ନା। 26 ମାତର୍ ଇୱାନ୍ ବିଷୟରେ ମହା ରାଜା ଲାଗାୟ୍ ଚିଟି ଲେକିକିଦେଙ୍ଗ୍ ଇନା ବିଷୟ ପା ଗାଟାଆଦ୍ୱାତାତ୍। ଲାଗିଙ୍ଗ୍ ଇୱାନ୍ ବିଷୟରେ ଆନେଙ୍ଗ୍ ମହା ରାଜାତାକେ ଇନେସ୍ ର ବିଷୟ ଲେକିକିଦେଙ୍ଗ୍ ଆଡ୍ନାଙ୍ଗ୍, ହେଦାଙ୍ଗ୍ କାଜିଙ୍ଗ୍ ଇୱାନିଙ୍ଗ୍ ଆଗ୍ରିପା ରାଜା ଆରେ ମି ଲାଗାୟ୍ ତାହିୱାତାଙ୍ଗ୍ନା। 27 ଇନେସ୍କି ମହା ରାଜାତାକେ ରକାନ୍ ବନ୍ଦି ମାନାୟ୍ତିଙ୍ଗ୍ ତା ଦସ୍ ଟିକ୍କିଜି ଲେକିକିୱାଦାଙ୍ଗ୍ ପକ୍ତେଙ୍ଗ୍ ଆନେଙ୍ଗ୍ ଟିକ୍ ଆକାୟ୍ ଇଞ୍ଜି ବାବିକିନାଙ୍ଗା।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation