ପକ୍ୟାତାକା 24 - New Testament in Pengo Parja Language1 ପାଞ୍ଚ୍ଦିନ୍ ପାଚେ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ହାନାନ କେତେକ୍ ପ୍ରାଚିନ୍ ଆରେ ତର୍ତୁଲ ତର୍ଦି ଅକିଲ୍ତିଙ୍ଗ୍ ଆସ୍ତି କାଇସର୍ ସହର୍ତାକେ ୱାତାର୍, ଆରେ ହେୱାର୍ ପାଉଲ ଦସ୍ ବିଷୟରେ ଫେଲିକ୍ସ ଗବର୍ନର୍ତିଙ୍ଗ୍ ୱେଚ୍ଚାର୍। 2 ରାଜା ପାଉଲତିଙ୍ଗ୍ କୁକିକିଜି ତାହିୱାତାନ୍, ତର୍ତୁଲ ହେୱାନିଙ୍ଗ୍ ଦସ୍ ହିଜି ୱେଚ୍ଚାନ୍, “ମହାଶୟ୍ ଫେଲିକ୍ସ, ଏନେଙ୍ଗ୍ ବୁଦିତାଙ୍ଗ୍ ରାଜାଆଜି ସାସନ୍ କିତିଲେ ଆପେଙ୍ଗ୍ ଶାନ୍ତିତାଙ୍ଗ୍ ମାନାପ୍। ଆରେ ଇ ଜାତିନି ମାନାୟାରିଙ୍ଗ୍ ବେସି ଉନତି କିତାଇନା। 3 ଇଦାଙ୍ଗ୍ କାଜିଙ୍ଗ୍ ୱିଜୁ ବାହାତାକେ ଇୱିଜୁ ବିଷୟରେ ନିଙ୍ଗେଙ୍ଗ୍ ଦନ୍ଯବାଦ୍କିଜି ମାନି କିଦ୍ନାପା। 4 ଆନେଙ୍ଗ୍ ନିଙ୍ଗେଙ୍ଗ୍ ବିଜାର୍ କିଦେଙ୍ଗ୍ ଇଚା କିଦୁଙ୍ଗା, ମାତର୍ ଆନେଙ୍ଗ୍ କେତେଗଟା କାତା ୱେଚ୍ଚାନାଙ୍ଗ୍ ଦୟାକିଜି ନା କାତା ୱେନା। 5 ଇୱାନ୍ ରକାନ୍ ଗଣ୍ଡ୍ଗଲ୍ କିୟିକିନି ମାନାୟ୍ ଇଞ୍ଜି ଆପେଙ୍ଗ୍ ପୁଚାପ୍ନା। ଇନେସ୍କି ଯିହୁଦି ଜାତିର୍ ମାନି ୱିଜୁ ବାହାକାଙ୍ଗ୍ ହାଲ୍ଜି ଗଣ୍ଡ୍ଗଲ୍ କିୟିକିନାନା, ଆରେ ଇୱାନ୍ ରକାନ୍ ନାଜରିତିୟ ବୁଲ୍ ହାଜ୍ଦିଙ୍ଗ୍ ଅନି ଦଳ୍ନି ମୁକ୍ୟା। 6 ଆରେ ଇ ମାନାୟ୍ ଈଶ୍ୱର ମାନି ମନ୍ଦିର୍ତିଙ୍ଗ୍ ବିଟାଡ଼୍ କିଦେଙ୍ଗ୍ ଉପାଇକିଜି ମାଚାନ୍, ଲାଗିଙ୍ଗ୍ ଇୱାନିଙ୍ଗ୍ ଆପେଙ୍ଗ୍ ଆସ୍ତାପ୍। ଆରେ ମି ନିୟମ୍ ଇସାବ୍ରେ ଇୱାନିଙ୍ଗ୍ ବିଚାର୍ କିଦେଙ୍ଗ୍ ଇଚାକିଜି ମାଚାପ୍। 7 ମାତର୍ ହାଜାର୍ ସେନାର୍ ମୁକ୍ୟା ଲୁସିୟା ୱାଜି ମାବେତାଙ୍ଗ୍ ବଲତ୍କାର୍ କିଜି ଇୱାନିଙ୍ଗ୍ କିସ୍ତି ଅତାନ୍। 8 ଆରେ ଇୱାନିଙ୍ଗ୍ ବିରଦ୍ କିନି ମାନାୟାରିଙ୍ଗ୍ ମି ଲାଗାୟ୍ ୱାଦେଙ୍ଗ୍ ଆଦେସ୍ ହିତ୍ତାର୍। ଆପେଙ୍ଗ୍ ଇୱାନିଙ୍ଗ୍ ଇମ୍ଣି ଦସ୍ କିନାପା, ହେଦାଙ୍ଗ୍ ନିଜେ ଏନେଙ୍ଗ୍ ୱେନ୍ବିତିସ୍ ସତ୍ କାତା ପୁଞ୍ଜେଙ୍ଗ୍ ଆଡ୍ନାଇ।” 9 ତର୍ତୁଲ କାତା ସତ୍ ଇଞ୍ଜି ତା ହୁଦାଙ୍ଗ୍ ମାନି ଯିହୁଦିର୍ ପା ୱେଚ୍ଚାର୍। ପାଉଲ ତା ବିଷୟରେ ପେଲିକ୍ସ୍ ରାଜାତିଙ୍ଗ୍ ୱେଚ୍ଚାନ୍ 10 ଗବର୍ନର୍ ପାଉଲତିଙ୍ଗ୍ ୱେଚ୍ଚେଙ୍ଗ୍ କେଇ ସାକିୟା କିତାନ୍, ଲାଗିଙ୍ଗ୍ ହେୱାନ୍ ୱେଚ୍ଚାନ୍, “ଏନେଙ୍ଗ୍ ବେସି ବାର୍ହୁ ଆତାତ୍ ଇ ଜାତିର୍ ମାନାୟାରିଙ୍ଗ୍ ବିଚାର୍ କିଜି ୱାନାୟା, ଲାଗିଙ୍ଗ୍ ଆନେଙ୍ଗ୍ ୱାରିଆଜି ଦସି ଆକାୟ୍ ଇଞ୍ଜି ୱେଚ୍ଚାନାଙ୍ଗ୍। 11 ଏନେଙ୍ଗ୍ ୱେନ୍ବିତିସ୍ ପୁଞ୍ଜେଙ୍ଗ୍ ଆଡ୍ନାଇ, ଆନେଙ୍ଗ୍ ବାର ଦିନ୍ ଆଗେ ଯିରୁଶାଲାମ ସହର୍ନି ଈଶ୍ୱର ମାନି ମନ୍ଦିର୍ତାକେ ପୁଜା କିଦେଙ୍ଗ୍ ହାଲ୍ଜି ମାଚାଙ୍ଗ୍। 12 ନାଙ୍ଗେଙ୍ଗ୍ ଈଶ୍ୱର ମାନି ମନ୍ଦିର୍ତାକେ କି ପାର୍ତାନା ଇଞ୍ଜ କି ସହର୍ତାକେ ମାନି ମାନାୟାର୍ ହୁଦାଙ୍ଗ୍ ଜୁକ୍ତି କିନାକା, ଆରେ ଇନେରିଙ୍ଗ୍ ପୁସ୍ରାଇ କିଜି ବିରଦ୍ କିନାକା ମାନାୟାର୍ ହୁଡ଼୍ୱାତାର୍ନା। 13 ଇ ମାନାୟାର୍ ନଙ୍ଗୟ୍ ଇମ୍ଣି କାତା ନାଙ୍ଗେଙ୍ଗ୍ ବିରଦ୍ କିଜି ୱେଚ୍ଚାନାର୍, ହେ ୱିଜୁ କାତାନି ମୁମ୍ଦ ସତ୍ ଇଞ୍ଜି ଚଚ୍ଚେଙ୍ଗ୍ ଆଡୁର୍। 14 ଆନେଙ୍ଗ୍ ମାନିକିନାଙ୍ଗା ଯେ, ମା ଆକଦାଦିର୍ ଈଶ୍ୱରତିଙ୍ଗ୍ ପୁଜା କିନାଙ୍ଗା, ଆରେ ଯୀଶୁ ଖ୍ରୀଷ୍ଟନି ଚେଲା ଆତାଙ୍ଗ୍ନା। ମୋଶା ଲେକିକିତି ନିୟମ୍ନି ସାସ୍ତର୍ ଆରେ ଭବିଷ୍ଯତବକ୍ତା ଇନାକା ଲେକିକିତାର୍ନା, ହେଦାଙ୍ଗ୍ ଆନେଙ୍ଗ୍ ପାର୍ତି କିନାଙ୍ଗା। ମାତର୍ ଇ ମାନାୟାର୍ ବୁଲ୍ ହାଜ୍ଦିଙ୍ଗ୍ ଅନି ଦଳ୍ ନିକାନ୍ ଇଞ୍ଜି ୱେଚ୍ଚାନାରା। 15 ଇ ମାନାୟାର୍ ଇନେସ୍ ଅଦରମ୍ ଆରେ ଦରମ୍ ମାନାୟ୍ ହାଃଜି ଆରେରଗ ଜିବୁନ୍ ଆନାର୍ ଇଞ୍ଜି ଆହା କିନାରା, ଆନେଙ୍ଗ୍ ପା ଈଶ୍ୱରତାକେ ହେଲେକେ ନେ ଆହା କିନାଙ୍ଗା। 16 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ପା ୱିଜୁଦିନ୍ ଈଶ୍ୱରତାକେ ଆରେ ମାନାୟାର୍ତାକେ ଦସି ଆଉଙ୍ଗ୍ ଇଞ୍ଜି ନା ମାନ୍ତିଙ୍ଗ୍ ଜାତୁନ୍ କିନାଙ୍ଗା। 17 ଆନେଙ୍ଗ୍ କେତେକ୍ ବାର୍ହୁ ପାଚେ ନା ଜାତିନି ଗରିବ୍ ଲକାଙ୍ଗ୍ ଦାନ୍ ହିଦେଙ୍ଗ୍, ଆରେ ଈଶ୍ୱରତାକେ ପୁଜା କିଦେଙ୍ଗ୍ ଯିରୁଶାଲାମ ସହର୍ତାକେ ୱାଜି ମାଚାଙ୍ଗ୍। 18 ହେପାଦ୍ନା ଈଶ୍ୱର ମାନି ମନ୍ଦିର୍ତାକେ ଆନେଙ୍ଗ୍ ସତୁକ୍ ଆତାକା ଇ ମାନାୟାର୍ ହୁଡ଼୍ଦାତାର୍। ଆନେଙ୍ଗ୍ ମାନାୟ୍ ଗଉଲି ବିତ୍ରେ କି ଗଣ୍ଡ୍ଗଲ୍ତାକେ ମେହାଆୱାଦାଙ୍ଗ୍ ମାଚାଙ୍ଗ୍, 19 ମାତର୍ ଏସିଆ ଜିଲ୍ଲାନି କେତେକ୍ ଯିହୁଦି ମାନାୟାର୍ ହେବେ ମାଚାର୍। ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଯଦି ହେ ମନ୍ଦିର୍ତାକେ ଇନାକା ବୁଲ୍ କିଜିମାଚିସ୍, ହେୱାର୍ ମି ଲାଗାୟ୍ ୱାଜି ନା ବିରଦ୍ତାକେ ୱେଚ୍ନାକା ମାଚାତ୍। 20 ନଇଲେ ଆନେଙ୍ଗ୍ ବିଚାର୍କିନି ବାହାତାକେ ନିଲ୍ଚି ମାଚିହିଙ୍ଗ୍, ହେୱାର୍ ନାବେତାଙ୍ଗ୍ ଇନା ବୁଲ୍ ଗାଟାଆତାର୍, ହେଦାଙ୍ଗ୍ ଇ ମାନାୟାର୍ ୱେଚ୍ଚେର୍। 21 ଇ ମାନାୟାର୍ ର ବିଷୟରେ ନାଙ୍ଗେଙ୍ଗ୍ ଦସ୍ ହିଦେଙ୍ଗ୍ ଆଡ଼୍ଦାନାର୍, ବିଚାର୍କିନି ବାହାତାକେ ଆନେଙ୍ଗ୍ ଗାଜାକାଟ୍ କିଜି ୱେଚ୍ଚାଙ୍ଗ୍, ‘ହାଃତାକାର୍ ଆରେରଗ ଜିବୁନ୍ଆନି ବିଷୟରେ ଆହା ଇଡ଼୍ଜି ମାଚିଲେ, ଆନେଙ୍ଗ୍ ନଙ୍ଗୟ୍ ବିଚାର୍ କିୟି ଆନାଙ୍ଗା।’” ପେଲିକ୍ସ୍ ରାଜା ପାଉଲ ବିଚାର୍ କିନାକା ଟେବାଇ କିତାନ୍ 22 ଫେଲିକ୍ସ ରାଜା ଯୀଶୁ ବିଷୟରେ କେତେକ୍ ପୁନ୍ଞ୍ଜି ମାଚାନ୍, ହେଦାଙ୍ଗ୍ କାଜିଙ୍ଗ୍ ହେ ବିଚାର୍ତିଙ୍ଗ୍ ଟେବାଇ କିତାନ୍। ଆରେ ରାଜା ୱେଚ୍ଚାନ୍, “ହାଜାର୍ ସେନାର୍ ମୁକ୍ଯା ଲୁସିୟା ୱାତିସ୍ ଆନେଙ୍ଗ୍ ମିଙ୍ଗେଙ୍ଗ୍ ବିଚାର୍ କିଦ୍ନାଙ୍ଗ୍।” 23 ଆରେ ହେ ରାଜା ଶହେ ସେନାର୍ ମୁକ୍ୟା ଆଦେସ୍ ହିତାନ୍, ପାଉଲତିଙ୍ଗ୍ ଜଇଲ୍ ଇଞ୍ଜ ହାର୍ଦାଙ୍ଗ୍ ଦେକାଶୁଣା କିୟାଟ୍, ଆରେ ତା ହାଙ୍ଗ୍ଦାକାର୍ ୱାଜି ହେୱାନିଙ୍ଗ୍ ହେବା କିତିସ୍ ମୁନା କିମାଟ୍। 24 କେତ୍ଦିନ୍ ପାଚେ ରାଜା ଫେଲିକ୍ସ ଡକ୍ରୁହି ଦ୍ରୁସିଲା ହୁଦାଙ୍ଗ୍ ମେହାଆଜି ପାଉଲତିଙ୍ଗ୍ କୁକିକିତାର୍। ରାଜା ଡକ୍ରୁହି ରଞ୍ଜେଲ୍ ଯିହୁଦି ଜାତିନି କଗ୍ଲେ ମାଚାତ୍। ପାଉଲ ହେୱାରିଙ୍ଗ୍ ଖ୍ରୀଷ୍ଟ ଯୀଶୁତାକେ ପାର୍ତିକିନି ବିଷୟରେ ୱେଚ୍ଚାନ୍। 25 ଆରେ ଈଶ୍ୱର କାତାତିଙ୍ଗ୍ ମାନିକିଜି ମାନାକା, ଜାର୍ କରାପ୍ ବାବ୍ନାତିଙ୍ଗ୍ ସମ୍ବାଲି କିନାକା ଆରେ ଈଶ୍ୱର ସେସ୍ଦିନ୍ତ ବିଚାର୍କିନି ବିଷୟରେ ପାଉଲ ୱେଚ୍ଚାନ୍। ଲାଗିଙ୍ଗ୍ ଫେଲିକ୍ସ ରାଜା ପାଣ୍ଡ୍ରାଆଜି ୱେଚ୍ଚାନ୍, “ନେଞ୍ଜେଙ୍ଗ୍ ଏଚେକ୍ ମାନେତ୍, ସୁବିଦା ଆତିସ୍ ନିଙ୍ଗେଙ୍ଗ୍ କୁକ୍ତାନାଙ୍ଗ୍ ଏନେଙ୍ଗ୍ ନଙ୍ଗୟ୍ ହାଲା।” 26 ରାଜା ପାଉଲତିଙ୍ଗ୍ ଲାଞ୍ଚ୍ ହିଦ୍ନାନ୍ ଇଞ୍ଜି ଆହାକିଜି, ପାଉଲତିଙ୍ଗ୍ ବାରମ୍-ବାରମ୍ କୁକ୍ଚି କାତାବାର୍ତା ଆଜି ମାଚାନ୍। 27 ଦୁଇ ବାର୍ହୁ ପାଚେ ଫେଲିକ୍ସ ରାଜା ବାହାତାକେ ପର୍କିୟ ପେଷ୍ଟସ୍ ରାଜା ଆତାନ୍। ପେଲିକ୍ସ୍ ରାଜା ଯିହୁଦି ମାନାୟାର୍ ମୁମ୍ଦ ବାଲ୍ବଲାଇ ଆଦେଙ୍ଗ୍ ପାଉଲତିଙ୍ଗ୍ ଜଇଲ୍ ଇଞ୍ଜ ବନ୍ଦିକିଜି ନେ ଇଡ଼୍ଜି ମାଚାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation