ପକ୍ୟାତାକା 23 - New Testament in Pengo Parja Language1 ପାଉଲ ବିଚାର୍କିନି ବାହାତାକେ ମାନି ମେମ୍ୱରାରିଙ୍ଗ୍ ଦିୟାନ୍ କିଜି ହୁଡ଼୍ତାନ୍, ଆରେ ହେୱାନ୍ ୱେଚ୍ଚାନ୍, “ଏ ଟଣ୍ଡାର୍କାଦେର୍, ଆନେଙ୍ଗ୍ ନେଞ୍ଜେଙ୍ଗ୍ ପାତେକ୍ ଈଶ୍ୱରତାକେ ହାର୍ଦି ଜିବୁନ୍ କାଟି କିତାଙ୍ଗ୍ନା।” 2 ଇ କାତା ୱେନ୍ଞ୍ଜି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ହାନାନ ପାଉଲ ଲାଗାୟ୍ ନିଲ୍ତି ମାନାୟ୍ତିଙ୍ଗ୍ ପାଉଲ ମୁମ୍ଦ ଇଡ଼୍ଦେଙ୍ଗ୍ ୱେଚ୍ଚାନ୍। 3 ହେପାଦ୍ନା ପାଉଲ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିଙ୍ଗ୍ ୱେଚ୍ଚାନ୍, “ଏ ବାଟ୍ପାଣିଆ! ନିଙ୍ଗେଙ୍ଗ୍ ଈଶ୍ୱର ଟ୍ରାକ୍ତାନାନ୍, ଏନେଙ୍ଗ୍ ନିୟମ୍ ସାସ୍ତର୍ତାଙ୍ଗ୍ ନାଙ୍ଗେଙ୍ଗ୍ ବିଚାର୍ କିଦେଙ୍ଗ୍ କୁଚ୍ଚାଇନା, ମାତର୍ ନିୟମ୍ତିଙ୍ଗ୍ ବାଙ୍ଗାଇ କିଜି ନାଙ୍ଗେଙ୍ଗ୍ ଇଡ଼୍ଦେଦେଙ୍ଗ୍ କି ଆଦେସ୍ ହିତାଇ!” 4 ଲାଗିଙ୍ଗ୍ ପାଉଲ ଲାଗାୟ୍ ନିଲ୍ତି ମାନାୟାର୍ ୱେଚ୍ଚାର୍, “ଏନେଙ୍ଗ୍ ଇମ୍ଣି ସାସ୍ତାଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିଙ୍ଗ୍ ଅପ୍ମାନ୍ କିନାୟା?” 5 ପାଉଲ ୱେଚ୍ଚାନ୍, “ଟଣ୍ଡାର୍କାଦେର୍, ହେୱାନ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ଇଞ୍ଜି ଆନେଙ୍ଗ୍ ପୁନ୍ୱାଦାଙ୍ଗ୍ ମାଚାଙ୍ଗ୍। ଇନେସ୍କି ସାସ୍ତର୍ତାକେ ଲେକା ମାନାତ୍, ‘ମା କାଜିଙ୍ଗ୍ ଆଦିକାର୍ ପାୟାଆତି ମାନାୟାରିଙ୍ଗ୍ ଏପେଙ୍ଗ୍ ଅବିଶାପ୍ ହିମାଟ୍।’” 6 ପାଚେ ପାଉଲ ହେବେ କୁଚ୍ଚି ମାଚି କେତେକ୍ ସାଦୁକିଦଳ୍ନିକାର୍ ଆରେ କେତେକ୍ ପାରୁସିଦଳ୍ନିକାର୍ ଇଞ୍ଜି ପୁଚାନ୍, ଆରେ ଗାଜାକାଟ୍ କିଜି ୱେଚ୍ଚାନ୍, “ଏ ଟଣ୍ଡାର୍, ଆନେଙ୍ଗ୍ ପାରୁସି ଦଳ୍ନିକାଙ୍ଗ୍ ଆରେ ମାଞ୍ଜ୍ବା ପା ରକାନ୍ ପାରୁସି ମାଚାନ୍। ହାଃତାକାର୍ ଆରେରଗ ଜିବୁନ୍ଆନି ବିଷୟରେ ଆହା ଇଡ଼୍ଜି ମାଚିଲେ, ଆନେଙ୍ଗ୍ ନଙ୍ଗୟ୍ ବିଚାର୍ କିୟି ଆନାଙ୍ଗା।” 7 ପାଉଲ ଇ କାତା ୱେଚ୍ଚିଲେ ପାରୁସିଦଳ୍ ଆରେ ସାଦୁକିଦଳ୍ ବିତ୍ରେ ଜୁକ୍ତି କିବାଆତାର୍, ଆରେ ବିଚାର୍କିନି ମେମ୍ୱରାର୍ ବାଗ୍-ବାଗ୍ ଆତାର୍। 8 ଇନେସ୍କି ସାଦୁକିଦଳ୍ନି ମାନାୟାର୍ ହାଃତାକାର୍ ଆରେରଗ ଜିବୁନ୍ ଆନାକା, ଦୁତ୍ କି ବୁତ୍ଆତ୍ମା ହିଲେତ୍ ଇଞ୍ଜି ୱେଚ୍ନାର୍। ମାତର୍ ପାରୁସିଦଳ୍ନି ମାନାୟାର୍ ହେ ୱିଜୁ ବିଷୟରେ ପାର୍ତିକିନାର୍। 9 ଲାଗିଙ୍ଗ୍ ହେବେ ବେସି ରାଟୁ ଆତାର୍। ଆରେ ପାରୁସିଦଳ୍ନି କେତେକ୍ ପଣ୍ଡିତାର୍ ନିଲ୍ଚି ବେସି ଜୁକ୍ତି କିଜି ୱେଚ୍ଚାର୍, “ଆପେଙ୍ଗ୍ ଇୱାନ୍ତାକେ ଇନା ଦସ୍ ପା ଗାଟା ଆୱାତାପ୍। ଇୱାନିଙ୍ଗ୍ ଇମ୍ଣି ଦୁତ୍ କି ଆତ୍ମା ବେଣ୍କିଜି ମାନ୍ଗାନାତ୍।” 10 ହେୱାର୍ ବେସି ଜୁକ୍ତି କିବାଆଜି ମାଚାର୍, ହେଦାଙ୍ଗ୍ କାଜିଙ୍ଗ୍ ପାଉଲତିଙ୍ଗ୍ ହେୱାର୍ କେଜାଣେ ମାର୍ନେ ଅହ୍ନାର୍ ଇଞ୍ଜି ହାଜାର୍ ସେନାର୍ ମୁକ୍ୟା ବାବିକିଜି ହେ ବିଚାର୍ ବାହାତାଙ୍ଗ୍, ହେୱାନିଙ୍ଗ୍ ଆସ୍ତି ସେନାର୍ ମାନି ବାହା ବିତ୍ରେ ଅସାହାଞ୍ଜେଙ୍ଗ୍ ସେନାରିଙ୍ଗ୍ ଆଦେସ୍ ହିତାନ୍। 11 ହେ ଦିନ୍ ମିକାଲିଙ୍ଗ୍ ମାପୃ ପାଉଲ ଲାଗାୟ୍ ନିଲ୍ଚି ୱେଚ୍ଚାନ୍, “ପାଣ୍ଡ୍ରାଆମା! ଇନେସ୍କି ଏନେଙ୍ଗ୍ ଯିରୁଶାଲାମ ସହର୍ତାକେ ନା ବିଷୟରେ ମାନାୟାରିଙ୍ଗ୍ ୱେଚ୍ଚାଇନା, ହେଲେକେ ରୋମ ଦେସ୍ତାକେ ପା ନା ବିଷୟରେ ୱେଚ୍ନାକା ଆନାତ୍।” ପାଉଲତିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍ 12 ନାଡ଼ିସ୍ ଆତିଲେ ଯିହୁଦି କେତେକ୍ ମାନାୟାର୍ ଦଳ୍ ଆତାର୍। ପାଉଲତିଙ୍ଗ୍ ମାର୍ନେ ଅହ୍ୱି ପାତେକ୍ ଆପେଙ୍ଗ୍ ଆରାଣ୍ ଆସ୍ପୁପ୍ ଇଞ୍ଜି ଜାର୍-ଜାର୍ ପାର୍ମାଣ୍ କିତାର୍। 13 ଚାଲିଶ୍ତାଙ୍ଗ୍ ଆଦିକ୍ ମାନାୟାର୍ ଇ ପାର୍ମାଣ୍ କିଜି ମାଚାର୍। 14 ହେ ମାନାୟାର୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରିର୍ ଆରେ ପ୍ରାଚିନାର୍ ଲାଗାୟ୍ ୱାଜି ୱେଚ୍ଚାର୍, “ପାଉଲତିଙ୍ଗ୍ ମାର୍ନେ ଅହ୍ୱି ପାତେକ୍ ଆପେଙ୍ଗ୍ ଆରାଣ୍ ଆସ୍ପୁପ୍ ଇଞ୍ଜି ଆଦିକ୍ ବାଡ଼୍କାସ୍ କିଜି ପାର୍ମାଣ୍ କିତାପ୍ନା। 15 ପାଉଲତିଙ୍ଗ୍ ହାର୍ଦାଙ୍ଗ୍ ବିଚାର୍ କିନାପ୍ ଇଞ୍ଜି ଏପେଙ୍ଗ୍ ଆରେ ବିଚାର୍କିନି ମେମ୍ୱରାର୍ ହାଲ୍ଜି ସେନାର୍ ମୁକ୍ୟାଙ୍ଗ୍ ପୁସ୍ରାଇ କିଜି ଗୁୱାରି କିୟାଟ୍। ହେୱାନ୍ ବିଚାର୍କିନି ବାହାତାକେ ଇକାୱାୱିହିଙ୍ଗ୍ ନେ ଆପେଙ୍ଗ୍ ହେୱାନିଙ୍ଗ୍ ଅସ୍ତେଙ୍ଗ୍ କାସି ମାନାପ୍।” 16 ମାତର୍ ପାଉଲ ବାଣ୍ଜାହି ହେୱାର୍ କାସି ଅହ୍ନି କାତା ୱେଚାନ୍, ଆରେ ସେନାର୍ ମାନି ବାହାତାକେ ହାଲ୍ଜି ପାଉଲତିଙ୍ଗ୍ ୱେଚ୍ଚାନ୍। 17 ଲାଗିଙ୍ଗ୍ ପାଉଲ ରକାନ୍ ଶହେ ସେନାର୍ ମୁକ୍ୟାଙ୍ଗ୍ କୁକ୍ଚି ୱେଚ୍ଚାନ୍, “ଇ ହିମ୍ଣାତିଙ୍ଗ୍ ହାଜାର୍ ସେନାର୍ ମୁକ୍ୟାତାକେ ଅସାହାଲାଟ୍, ହେୱାନ୍ ମୁକ୍ୟାଙ୍ଗ୍ ର କାବୁର୍ ୱେଚ୍ନାକା ମାନାତ୍।” 18 ଲାଗିଙ୍ଗ୍ ହେ ଶହେ ସେନାର୍ ମୁକ୍ୟା ହେ ହିମ୍ଣାତିଙ୍ଗ୍ ଆସ୍ତି ହାଜାର୍ ସେନାର୍ ମୁକ୍ୟାତାକେ ଅସାହାଚାନ୍। ଆରେ ହେ ହାଜାର୍ ସେନାର୍ ମୁକ୍ୟାଙ୍ଗ୍ ୱେଚ୍ଚାନ୍, “ଇ ହିମ୍ଣା ନିଙ୍ଗେଙ୍ଗ୍ ର କାବୁର୍ ୱେଚ୍ଚାନାକା ମାନାତ୍ ଇଞ୍ଜି, ଜଇଲ୍ ଇଞ୍ଜ ମାନି ପାଉଲ ନାଙ୍ଗେଙ୍ଗ୍ କୁକ୍ଚି ନି ଲାଗାୟ୍ ଇ ହିମ୍ଣାତିଙ୍ଗ୍ ଅସିହାଲା ଇଞ୍ଜି ଗୁୱାରି କିଜି ୱେଚ୍ଚାତାନ୍।” 19 ଲାଗିଙ୍ଗ୍ ହାଜାର୍ ସେନାର୍ ମୁକ୍ୟା ହେ ହିମ୍ଣାତିଙ୍ଗ୍ ଆସ୍ତି ହେୱାନିଙ୍ଗ୍ ର ଚିମ୍ରା ବାହାତାକେ ଅଜି ୱେନ୍ବାତାନ୍, “ଏନେଙ୍ଗ୍ ନାଙ୍ଗେଙ୍ଗ୍ ଇନା କାବୁର୍ ୱେଚ୍ଚାନାକା ମାନାତ୍?” 20 ହେ ହିମ୍ଣା ହେୱାନିଙ୍ଗ୍ ୱେଚ୍ଚାନ୍, “ୱିଗାଲିଙ୍ଗ୍ ନି ଲାଗାୟ୍ ଯିହୁଦି ମାନାୟାର୍ ୱାଜି ପୁସ୍ରାଇ କିଜି, ପାଉଲତିଙ୍ଗ୍ ଆରେରଗ ବିଚାର୍କିନି ବାହାତାକେ ହାର୍ଦାଙ୍ଗ୍ ବିଚାର୍ କିନାପ୍ ଇଞ୍ଜି ଉପାୟ୍ କିତାର୍ନା। 21 ଲାଗିଙ୍ଗ୍ ହେୱାର୍ କାତାତାକେ ରାଜି ଆମା। ଇନେସ୍କି ଚାଲିଶ୍ତାଙ୍ଗ୍ ଆଦିକ୍ ମାନାୟ୍ ପାଉଲତିଙ୍ଗ୍ ମାର୍ନେ ଅହ୍ୱି ପାତେକ୍ ଆରାଣ୍ ଆସ୍ପୁପ୍ ଇଞ୍ଜି ଜାର୍-ଜାର୍ ପାର୍ମାଣ୍ କିତାର୍ନା। ନିବେତାଙ୍ଗ୍ ଆଦେସ୍ ପାୟା ଆଦେଙ୍ଗ୍ ହେୱାର୍ କାତାର୍ନା।” 22 ଲାଗିଙ୍ଗ୍ ହେ ହାଜାର୍ ସେନାର୍ ମୁକ୍ୟା ହେ ହିମ୍ଣାତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନାଙ୍ଗେଙ୍ଗ୍ ୱେଚ୍ଚିତି କାତା ଇନେରିଙ୍ଗ୍ ପା ୱେଚ୍ମା ଇଞ୍ଜି ଆଦେସ୍ ହିଜି ପକ୍ତାନ୍।” ପେଲିକ୍ସ୍ ରାଜା ଲାଗାୟ୍ ପାଉଲ 23 ପାଚେ ହାଜାର୍ ସେନାର୍ ମୁକ୍ୟା ଶହେ ସେନାର୍ ରିକାର୍ ମୁକ୍ୟାଙ୍ଗ୍ କୁକ୍ଚି ୱେଚ୍ଚାନ୍, “ନେଞ୍ଜେଙ୍ଗ୍ ମିକା ନଟା ୱେଡ଼ାଙ୍ଗ୍ କାଇସରିଆ ସହର୍ତାକେ ହାଞ୍ଜେଙ୍ଗ୍ ଦୁଇଶ ଜାଣ୍ ସେନାରିଙ୍ଗ୍, ସତୁରି ଜାଣ୍ତିଙ୍ଗ୍ ଗଡ଼ା ଚାଲାଇ କିଦେଙ୍ଗ୍ ଆରେ ଦୁଇଶ ବାଲା ଆହ୍ନି ଲଗାଙ୍ଗ୍ ରେଡି କିୟାଟ୍। 24 ଫେଲିକ୍ସ ଗବର୍ନର୍ ଲାଗାୟ୍ ପାଉଲ ହାର୍ଦାଙ୍ଗ୍ ଏକିନି କାଜିଙ୍ଗ୍, ହେୱାନ୍ କାଜିଙ୍ଗ୍ ରଞ୍ଜାଙ୍ଗ୍ ଗଡ଼ା ହିଦେଙ୍ଗ୍ ହେୱାରିଙ୍ଗ୍ ଆଦେସ୍ ହିତାନ୍।” 25 ହେ ହାଜାର୍ ସେନାର୍ ମୁକ୍ୟା ଇଲେକେ ର ଚିଟି ଲେକିକିତାନ୍, 26 ଆନେଙ୍ଗ୍ କ୍ଲାଉଦିଅ ଲୁସିୟା, ମହାଶୟ୍ ଗବର୍ନର୍ ଫେଲିକ୍ସ ଜୁୱାର୍। 27 ଯିହୁଦି ମାନାୟାର୍ ଇ ପାଉଲତିଙ୍ଗ୍ ମାର୍ନେ ଅସ୍ତେଙ୍ଗ୍ ଇଚାକିଜି ମାଚାର୍, ହେପାଦ୍ନା ହେୱାନ୍ ରୋମ ଦେସ୍ତାକେ ମାନାକାନ୍ ଇଞ୍ଜି ପୁନ୍ଞ୍ଜି, ଆନେଙ୍ଗ୍ ସେନାର୍ ହୁଦାଙ୍ଗ୍ ହାଲ୍ଜି ହେୱାନିଙ୍ଗ୍ ଉଦାର୍ କିତାଙ୍ଗ୍। 28 ଇନା କିଦେଙ୍ଗ୍ ଯିହୁଦିର୍ ଏଚେକ୍ ଦସ୍ କିନାରା ହେଦାଙ୍ଗ୍ ପୁଞ୍ଜେଙ୍ଗ୍, ଆନେଙ୍ଗ୍ ଇୱାନିଙ୍ଗ୍ ବିଚାର୍କିନି ବାହାତାକେ ଅସାହାଚାଙ୍ଗ୍। 29 ହେୱାର୍ ନିୟମ୍ ସାସ୍ତର୍ ବିଷୟରେ ଇୱାନିଙ୍ଗ୍ ଦସ୍ ହିନାରା ଇଞ୍ଜି ଆନେଙ୍ଗ୍ ପୁଚାଙ୍ଗ୍, ମାତର୍ ଇୱାନିଙ୍ଗ୍ ମାର୍ନେ ଅହ୍ନି ଦଣ୍ଡ୍ କି ଜଇଲ୍ ଇଞ୍ଜ ବନ୍ଦିକିନି ଦସ୍ ଆନେଙ୍ଗ୍ ଗାଟାଆୱାତାଙ୍ଗ୍। 30 ଇ ପାଉଲତିଙ୍ଗ୍ ମାର୍ନେ ଅହ୍ନାକା ଆତାତ୍ନା ଇଞ୍ଜି କାବୁର୍ ୱେନ୍ଞ୍ଜି, ହେଦାପ୍ରେ ଆନେଙ୍ଗ୍ ନି ଲାଗାୟ୍ ପକ୍ତାତାଙ୍ଗ୍। ଇୱାନିଙ୍ଗ୍ ବିରଦ୍ କିନି ମାନାୟାରିଙ୍ଗ୍ ପା ନି ଲାଗାୟ୍ ହାଲ୍ଜି ଇୱାନ୍ ବିଷୟରେ ୱେଚାଟ୍ ଇଞ୍ଜି ଆଦେସ୍ ହିତାଙ୍ଗ୍ନା। 31 ହାଜାର୍ ସେନାର୍ ମୁକ୍ଯା ଇନେସ୍ ୱେଚ୍ଚି ମାଚାନ୍ ହେଲେକେ ସେନାର୍ ପାଉଲତିଙ୍ଗ୍ ଆସ୍ତି ଆନ୍ତିପାତ୍ରି ସହର୍ତାକେ ହେ ନାଣା ଅସାହାଚାର୍। 32 ଆର୍କାତ୍ ନାଞ୍ଜିଙ୍ଗ୍ ସେନାର୍ ପାଉଲ ହୁଦାଙ୍ଗ୍ ଗଡ଼ା ଚାଲାଇ କିନି ମାନାୟାରିଙ୍ଗ୍ ପିସ୍ତି, ହେୱାର୍ ମାନି ବାହାତାକେ ଲେଉଟା ଆଜି ହାଚାର୍। 33 ଗଡ଼ା ଚାଲାଇ କିନି ମାନାୟାର୍ କାଇସରିଆ ସହର୍ତାକେ ଇକାତାର୍, ଆରେ ପେଲିକ୍ସ୍ ଗବର୍ନର୍ତିଙ୍ଗ୍ ଚିଟି ହିତାର୍। ଆରେ ପାଉଲତିଙ୍ଗ୍ ପା ତା ଲାଗାୟ୍ ନିଲି କିତାର୍। 34 ହେ ରାଜା ହେ ଚିଟିତିଙ୍ଗ୍ ପଡ଼ିକିତାନ୍। ଆରେ ପାଚେ ରାଜା ପାଉଲତିଙ୍ଗ୍ ୱେନ୍ବାତାନ୍, “ଏନେଙ୍ଗ୍ ଇମ୍ଣି ଜିଲ୍ଲାନି ମାନାୟ୍?” ହେୱାନିଙ୍ଗ୍ କିଲିକିୟା ଜିଲ୍ଲାନି ମାନାୟ୍ ଇଞ୍ଜି ପୁନ୍ଞ୍ଜି ରାଜା ୱେଚ୍ଚାନ୍, 35 “ନିଙ୍ଗେଙ୍ଗ୍ ବିରଦ୍ କିଦ୍ନି ମାନାୟାର୍ ୱାତିସ୍ ଆନେଙ୍ଗ୍ ନି କାତା ୱେନାଙ୍ଗ୍। ଆରେ ହେ ରାଜା ହେରୋଦ ରାଜାନି ରାଜ୍ ମହଲ୍ତାକେ ପାଉଲତିଙ୍ଗ୍ ଇଟ୍ନି କାଜିଙ୍ଗ୍ ଆଦେସ୍ ହିତାନ୍।” |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation