Biblia Todo Logo
Bìoball air-loidhne

- Sanasan -

ପକ୍ୟାତାକା 22 - New Testament in Pengo Parja Language

1 ପାଉଲ ହେୱାରିଙ୍ଗ୍ ୱେଚ୍‌ଚାନ୍, “ଏ ଟଣ୍ଡାର୍ ଆରେ ଆବା କାଦେର୍, ନାଙ୍ଗେଙ୍ଗ୍ ବିରଦ୍ କିଦ୍‌ନି ମାନାୟାର୍ ଆନେଙ୍ଗ୍ ନଙ୍ଗୟ୍ ଉତର୍ ହିଦ୍‌ନାଙ୍ଗା ଏପେଙ୍ଗ୍ ୱେନାଟ୍।”

2 ପାଉଲ ଏବ୍ରୀ ବାଷାତାଙ୍ଗ୍ ବେଣ୍ କିନାକା ହେ ମାନାୟାର୍ ୱେନ୍‌ଞ୍ଜି ଆଦିକ୍ ଚିମ୍ରା ଆଜି ମାଚାର୍।

3 ହେୱାନ୍ ୱେଚ୍‌ଚାନ୍, “ଆନେଙ୍ଗ୍ ଯିହୁଦି ଜାତିନି ମାନାୟ୍, କିଲିକିୟା ଜିଲ୍ଲାନି ତାର୍ଷ ସହର୍‌ତାକେ ଆନେଙ୍ଗ୍ ଜନମ୍ ଆତାଙ୍ଗ୍‌ନା। ମାତର୍ ଆନେଙ୍ଗ୍ ଇ ଯିରୁଶାଲାମ ସହର୍‌ତାକେ ଗାଜା ଆତାଙ୍ଗ୍‌ନା। ଗମଲିୟେଲ ଗୁରୁର୍ କାଲ୍‌କୁ ତାରେନ୍ କୁଚ୍‌ଚି ଈଶ୍ୱର ମା ଆକଦାଦିର୍ ମାଚି ନିୟମ୍ ସାସ୍ତର୍‌ତିଙ୍ଗ୍ ହିକାଆତାଙ୍ଗ୍‌ନା, ଏପେଙ୍ଗ୍ ଇନେସ୍ ଈଶ୍ୱରତିଙ୍ଗ୍ ହେବା କିଦେଙ୍ଗ୍ ଷ୍ଟିଟ୍ ମାଚାଦେର୍, ଆନେଙ୍ଗ୍ ପା ମି ଲେକେ ମାଚାଙ୍ଗ୍।

4 ଆନେଙ୍ଗ୍ ଯୀଶୁତାକେ ପାର୍ତି କିନାକାରିଙ୍ଗ୍ ଆଣ୍ଡ୍ରା ଆରେ କଗ୍‍ଲେକାଙ୍ଗ୍ ଗାଚ୍‌ଚି ଜଇଲ୍ ଇଞ୍ଜ ବନ୍ଦିକିଜି ହାଃନି ପାତେକ୍ ଦୁକ୍‌କଷ୍ଟ ହିଜି ମାଚାଙ୍ଗ୍।

5 ଇ ବିଷୟରେ ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରି ଆରେ ବିଚାର୍ ସବାନି ପ୍ରାଚିନ୍‌ନାର୍ ପା ସାକି ମାନାର୍। ପାର୍ତି କିନାକାରିଙ୍ଗ୍ ଗାଚ୍‌ଚି ଯିରୁଶାଲାମ ସହର୍‌ତାକେ ତାହିୱାଜି ଦଣ୍ଡ୍ ହିଦେଙ୍ଗ୍, ଇ ଟଣ୍ଡାର୍‌ତାଙ୍ଗ୍‌ ଚିଟି ପାୟାଆଜି ଦମେସକ ସହର୍‌ତାକେ ମାନି ଯିହୁଦିର୍ ଲାଗାୟ୍ ହାଲ୍‌ଜି ମାଚାଙ୍ଗ୍।

6 ଆନେଙ୍ଗ୍ ଦମେସକ ସହର୍ ଏକିନିହିଙ୍ଗ୍, ପାକାପାକି ମୁଣ୍ଡେ ମେଦାଣ୍ ଆତିହିଙ୍ଗ୍ ସରଗ୍‌ତାଙ୍ଗ୍ ହେଦାପ୍ରେ ର ଅଜଡ଼୍ ନା ଚାରିବେଣ୍‌ତାଙ୍ଗ୍ ୱାତାତ୍।

7 ହେବେତାଙ୍ଗ୍ ଆନେଙ୍ଗ୍ ମେଦ୍‌ନିତ ଗୁର୍‌ତାଙ୍ଗ୍ ଆରେ ର କାଟ୍ ୱେଚାଙ୍ଗ୍, ‘ଏ ଶାଉଲ, ଏ ଶାଉଲ ଇନା କିଦେଙ୍ଗ୍ ନାଙ୍ଗେଙ୍ଗ୍ ଦୁକ୍‌କଷ୍ଟ ହିଦ୍‌ନାୟା?’

8 ଆନେଙ୍ଗ୍ ୱେଚ୍‌ଚାଙ୍ଗ୍, ‘ଏନେଙ୍ଗ୍ ଇନେର୍ ମାପୃ? ଲାଗିଙ୍ଗ୍ ହେୱାନ୍ ନାଙ୍ଗେଙ୍ଗ୍ ୱେଚ୍‌ଚାତାନ୍, ଏନେଙ୍ଗ୍ ଇମ୍‌ଣି ନାଜରିତିୟ ସହର୍‌ନି ଯୀଶୁଙ୍ଗ୍ ଦୁକ୍‌କଷ୍ଟ ହିନାୟା, ଆନେଙ୍ଗ୍ ନେ ହେୱାନ୍।’

9 ଇମ୍‌ଣାକାର୍ ନା ହୁଦାଙ୍ଗ୍ ମାଚାର୍, ହେୱାର୍ ହେ ଅଜଡ଼୍‌ତିଙ୍ଗ୍ ହୁଡ଼୍‌ତାର୍ ସତ୍, ମାତର୍ ଇନେର୍ ନାଙ୍ଗେଙ୍ଗ୍ ବେଣ୍ କିତ୍‌ତାନ୍ ତା ବେଣ୍‌ତିଙ୍ଗ୍ ବୁଜାଆୱାତାର୍।

10 ଲାଗିଙ୍ଗ୍ ଆନେଙ୍ଗ୍ ୱେଚ୍‌ଚାଙ୍ଗ୍, ‘ମାପୃ ଆନେଙ୍ଗ୍ ଇନାକା କିନାଙ୍ଗ୍?’ ଲାଗିଙ୍ଗ୍ ମାପୃ ନାଙ୍ଗେଙ୍ଗ୍ ୱେଚ୍‌ଚାତାନ୍, ‘ନିଙ୍ଗା, ଆରେ ଏନେଙ୍ଗ୍ ଦମେସକ ସହର୍‌ତାକେ ହାଲା। ଆରେ ଏନେଙ୍ଗ୍ ଇନା କାମାୟ୍ କିଦେଙ୍ଗ୍ ଆନାତ୍‌ ହେବେ ହାଚିସ୍ ଆନେଙ୍ଗ୍ ନିଙ୍ଗେଙ୍ଗ୍ ୱେଚ୍‌ଚାନାଙ୍ଗ୍।’

11 ଆନେଙ୍ଗ୍ ହେ ଗୌରବ କାଜିଙ୍ଗ୍ ହୁଡ଼୍‌ଦେଙ୍ଗ୍ ଆଡ୍‌ୱାତାଙ୍ଗ୍, ନା ହୁଦାଙ୍ଗ୍ ମାନି ମାନାୟାର୍ ନାଙ୍ଗେଙ୍ଗ୍ ଆସ୍ତି ଦମେସକ ସହର୍‌ତାକେ ଅସାହାନ୍‌ଞ୍ଚାର୍।

12 ହନନିୟ ତର୍‍ଦାକାନ୍ ନାଙ୍ଗେଙ୍ଗ୍ ମେହାଆଦେଙ୍ଗ୍ ୱାତାନ୍, ହେୱାନ୍ ଈଶ୍ୱର ନିୟମ୍ ସାସ୍ତର୍‌ତିଙ୍ଗ୍ ମାନିକିଜି ର ସାଦୁ ମାନାୟ୍ ମାଚାନ୍। ୱିଜୁ ଯିହୁଦି ଜାତିର୍ ହେୱାନିଙ୍ଗ୍ ମାନିକିଜି ମାଚାର୍।

13 ନା ଲାଗାୟ୍ ନିଲ୍‌ଚି ୱେଚ୍‌ଚାତାନ୍, ‘ଏ ଶାଉଲ ଟଣ୍ଡେନ୍, ଏନେଙ୍ଗ୍ ନଙ୍ଗୟ୍ ହୁଡ଼୍‌ନି ଶାକ୍ତି ପାୟା ଆ।’ ହେଦାପ୍ରେ ନେ ଆନେଙ୍ଗ୍ ହେୱାନିଙ୍ଗ୍ ହୁଡ଼୍‌ଦେଙ୍ଗ୍ ଆଡ଼୍‌ତାଙ୍ଗ୍।

14 ଲାଗିଙ୍ଗ୍ ହେୱାନ୍ ୱେଚ୍‌ଚାତାନ୍, ‘ଏନେଙ୍ଗ୍ ଈଶ୍ୱର ଇଚା ଇନାକା ପୁଞ୍ଜେଙ୍ଗ୍, ତା ଦରମ୍ ମାନାୟ୍ ଖ୍ରୀଷ୍ଟଙ୍ଗ୍ ହୁଡ଼୍‌ଦେଙ୍ଗ୍, ଆରେ ତା କାତାତିଙ୍ଗ୍ ଏନେଙ୍ଗ୍ ୱେଞ୍ଜେଙ୍ଗ୍ ମା ଆକଦାଦିର୍ ଈଶ୍ୱର ନିଙ୍ଗେଙ୍ଗ୍ ବାଚି କିତ୍‌ତାନ୍‌ନା।

15 ଏନେଙ୍ଗ୍ ଇନା-ଇନାକା ହୁଡ଼୍‌ନାୟ୍ ଆରେ ୱେନାଇ ହେଦାଙ୍ଗ୍‌ୱିଜୁ ତା ବିଷୟରେ ୱିଜୁ ମାନାୟାର୍ ଲାଗାୟ୍ ୱେଚ୍‌ନାୟ୍।

16 ଏନେଙ୍ଗ୍ ନଙ୍ଗୟ୍ ଇନା କିଦେଙ୍ଗ୍ ଡେରି କିନାୟା, ନିଙ୍ଗା! ଆରେ ଡୁବନ୍ ଆ। ଆରେ ନି ପାପ୍ କେମା ପାୟା ଆଦେଙ୍ଗ୍ ଏନେଙ୍ଗ୍ ତା ତର୍‍ଦାଙ୍ଗ୍ ପାର୍ତାନା କିୟା।’

17 ତାପାଚେ ଆନେଙ୍ଗ୍ ଯିରୁଶାଲାମ ସହର୍‌ତାକେ ୱାଜି ଈଶ୍ୱର ମାନି ମନ୍ଦିର୍‌ତାକେ ପାର୍ତାନା କିଜି ମାଚାଙ୍ଗ୍। ହେପାଦ୍ନା ଆନେଙ୍ଗ୍ ଜାକ୍ ଆଜି ମାପୃଙ୍ଗ୍ ହୁଡ଼୍‌ତାଙ୍ଗ୍।

18 ହେୱାନ୍ ନାଙ୍ଗେଙ୍ଗ୍ ୱେଚ୍‌ଚାତାନ୍, ‘ଡେରି କିୱାଦାଙ୍ଗ୍ ବେଗି ଯିରୁଶାଲାମ ସହର୍‌ତାଙ୍ଗ୍ ହସିହାଲା। ଇନେସ୍‌କି ଇବେ ମାନି ମାନାୟାର୍ ନା ବିଷୟରେ ନି କାତା ୱେନୁର୍।’

19 ଲାଗିଙ୍ଗ୍ ଆନେଙ୍ଗ୍ ୱେଚ୍‌ଚାଙ୍ଗ୍, ‘ମାପୃ, ଆନେଙ୍ଗ୍ ପାର୍ତିକିନି ମାନାୟାରିଙ୍ଗ୍ ୱିଜୁ ପାର୍ତାନା ଇଲ୍‌କୁକାଙ୍ଗ୍ ହାଲ୍‌ଜି, ହେୱାରିଙ୍ଗ୍ ଆସ୍ତି ଜଇଲ୍ ଇଞ୍ଜ ଗେସ୍ତି ମାଚାଙ୍ଗ୍ ଆରେ ଟ୍ରାକ୍‌ଚି ମାଚାଙ୍ଗ୍, ଇଦାଙ୍ଗ୍ ହେୱାର୍ ନିଜେ ପୁନାର୍।

20 ଆରେ ଏଚେପାଦ୍ନା ନି ସାକି ସ୍ତିପାନତିଙ୍ଗ୍ ମାର୍ନେ ଅସ୍ତି ମାଚାର୍, ଆନେଙ୍ଗ୍ ପା ହେୱାର୍ ସପଟ୍ ଆଜି ହେବେ ନିଲ୍‌ଚି ମାଚାଙ୍ଗ୍। ଆରେ ହେୱାନିଙ୍ଗ୍ ଅହ୍‌ନି ମାନାୟାର୍ ହେନ୍ଦ୍ରାପାଟାତିଙ୍ଗ୍ ଆନେଙ୍ଗ୍ କାସି ମାଚାଙ୍ଗ୍।’

21 ଲାଗିଙ୍ଗ୍ ମାପୃ ନାଙ୍ଗେଙ୍ଗ୍ ୱେଚ୍‌ଚାତାନ୍, ‘ହାଲା, ଇନେସ୍ ଆନେଙ୍ଗ୍ ନିଙ୍ଗେଙ୍ଗ୍ ନା ସାକି ଆନି କାଜିଙ୍ଗ୍ ବିନ୍‌ଜାତିର୍‌ତାକେ ଦେହା ପକ୍ତାନାଙ୍ଗା।’”


ପାଉଲ ରମିୟ ଦେସ୍‌ତାକେ ମାନି ମାନାୟ୍ ଇଞ୍ଜି ୱେଚ୍‌ଚି କାତା

22 ପାଉଲ ଏଚେକ୍ କାତା ୱେଚ୍‌ଚାକା ମାନାୟାର୍ ୱେଚାର୍, ଆରେ ହେୱାର୍ ଗାଜାକାଟ୍ କିଜି ୱେଚ୍‌ଚାର୍, “ଇ ମାନାୟ୍‌ତିଙ୍ଗ୍ ମାର୍ନେ ଅହାଟ୍। ଇୱାନ୍ ଜିଦେଙ୍ଗ୍ ଆଦିକାର୍ ଆକାୟ୍।”

23 ହେୱାର୍ ରାଟୁ ଆଦେଙ୍ଗ୍ ଲାଗାତାର୍, ଆରେ ପାଉଲତିଙ୍ଗ୍ ରିସାଆଜି ଜାର୍-ଜାର୍ ଜପି ଉସ୍‌ପିନି କଟ୍‌ତିଙ୍ଗ୍ ଉନ୍‌ନ୍ଦି ତୁସିହିତାର୍, ଆରେ ବାଦାଡ଼୍ ନିପଣ୍ ଦୁଡ଼ି ତୁସିହିଦେଙ୍ଗ୍ ଲାଗାତାର୍।

24 ହେପାଦ୍ନା ହାଜାର୍ ସେନାର୍ ମୁକ୍ଯା ପାଉଲତିଙ୍ଗ୍ ସେନାର୍ ମାନି ବାହାତାକେ ଅସାହାଞ୍ଜେଙ୍ଗ୍ ୱେଚ୍‌ଚାନ୍। ଆରେ ମାନାୟାର୍ ପାଉଲତିଙ୍ଗ୍ ବିରଦ୍ କିଜି ଇନା କିଦେଙ୍ଗ୍ ଏଚେକ୍ ରାଟୁ ଆନାରା ଇଞ୍ଜି ପୁଞ୍ଜେଙ୍ଗ୍, ହେୱାନିଙ୍ଗ୍ କର୍‌ଡା ହୁଦାଙ୍ଗ୍ ଟ୍ରାକ୍‌ଚି ସତ୍ କାତା ୱେଚିକିନି କାଜିଙ୍ଗ୍ ଆଦେସ୍ ହିତାନ୍।

25 ସେନାର୍ ପାଉଲତିଙ୍ଗ୍ କର୍‌ଡା ହୁଦାଙ୍ଗ୍ ଟ୍ରାକ୍‌ତେଙ୍ଗ୍ ଗାଚ୍‌ଚି ପାଚେ, ତା ଲାଗାୟ୍ ନିଲ୍‌ଚିମାଚି ଶହେ ସେନାର୍ ମୁକ୍ୟାଙ୍ଗ୍ ୱେଚ୍‌ଚାନ୍, “ରୋମ ଦେସ୍‌ତାକେ ବାହାକିନି ରକାନ୍ ମାନାୟ୍‌ତିଙ୍ଗ୍ ଦସ୍ କିୱାଦାଙ୍ଗ୍ ଟ୍ରାକ୍‌ନାକା ନିୟମ୍ ହିସାବ୍‌ରେ ଟିକ୍ କି?”

26 ହେ ଶହେ ସେନାର୍ ମୁକ୍ଯା ହାଲ୍‌ଜି ହେ ବିଷୟରେ ହାଜାର୍ ସେନାର୍ ମୁକ୍ୟାଙ୍ଗ୍ ୱେଚ୍‌ଚାନ୍, “ଏନେଙ୍ଗ୍ ଇନାକା କିଦେଙ୍ଗ୍ ହାନାୟା? ଇୱାନ୍‌ତ ରକାନ୍ ରୋମ ଦେସ୍‌ତ ମାନି ମାନାୟ୍।”

27 ହେବେ ହାଜାର୍ ସେନାର୍ ମୁକ୍ୟା ୱାଜି ପାଉଲତିଙ୍ଗ୍ ୱେନ୍‌ବାତାନ୍, “ଏନେଙ୍ଗ୍ ନାଙ୍ଗେଙ୍ଗ୍ ୱେଚ୍‌ଚା, ଏନେଙ୍ଗ୍ ରୋମ ଦେସ୍ତାକାଇ କି?” ୱେଚାନ୍ ୱେଚ୍‌ଚାନ୍, “ଆଁ।”

28 ଲାଗିଙ୍ଗ୍ ହାଜାର୍ ସେନାର୍ ମୁକ୍ୟା ୱେଚ୍‌ଚାନ୍, “ଆନେଙ୍ଗ୍ ଇ ଦେସ୍‌ତାକେ ବାହାକିନି ଆଦିକାର୍ ଡାବୁଙ୍ଗ୍ କର୍ଚ କିଜି ପାୟାଆତାଙ୍ଗ୍‌ନା।” ମାତର୍ ପାଉଲ ୱେଚ୍‌ଚାନ୍, “ଆନେଙ୍ଗ୍ ଜନମ୍‌ତାଙ୍ଗ୍ ରମିୟ ଦେସ୍‌ତାକେ ବାହା କିନାକାଙ୍ଗ୍।”

29 ଇମ୍‌ଣାକାର୍ ହେୱାନିଙ୍ଗ୍ ସତ୍ କାତା ୱେଚିକିଦେଙ୍ଗ୍ ଇଚାକିଜି ମାଚାର୍, ହେୱାର୍ ହେଦାପ୍ରେ ତାବେତାଙ୍ଗ୍ ଗୁଚା ଆତାର୍। ଆରେ ପାଉଲତିଙ୍ଗ୍ ରୋମ ଦେସ୍ତାକାନ୍‌ ଇଞ୍ଜି ପୁନ୍‌ଞ୍ଜି ହାଜାର୍ ସେନାର୍ ମୁକ୍ୟା ପା ଗାଚ୍‍ଚେଙ୍ଗ୍ ପାଣ୍ଡ୍ରା ଆତାନ୍।


ବିଚାର୍‌କିନି ବାହାତାକେ ପାଉଲତିଙ୍ଗ୍ ନିଲି କିତାର୍

30 ତା ଆର୍‌କାତ୍ ନାଞ୍ଜିଙ୍ଗ୍ ହାଜାର୍ ସେନାର୍ ମୁକ୍ୟା ପାଉଲତିଙ୍ଗ୍ ଯିହୁଦିର୍ ଇନା କିଦେଙ୍ଗ୍ ବିରଦ୍ କିନାରା ହେଦାଙ୍ଗ୍ ପୁଞ୍ଜେଙ୍ଗ୍ ଗାଚ୍‌ଚାକା ରିକ୍‌ତାନ୍‌। ଆରେ ହେୱାନ୍ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍ ଆରେ ବିଚାର୍‌କିନି ବାହାନି ମେମ୍ୱରାରିଙ୍ଗ୍ ରୁଣ୍ଡାଆଦେଙ୍ଗ୍ ଆଦେସ୍ ହିତାନ୍। ଆରେ ହେୱାନ୍ ପାଉଲତିଙ୍ଗ୍ ଅଜି ହେୱାର୍ ମୁମ୍‌ଦ ନିଲି କିତାନ୍।

Pengo Parja Bible by The Love Fellowship is licensed under Creative Commons Attribution-ShareAlike 4.0 License.

Beyond Translation
Lean sinn:



Sanasan