ପକ୍ୟାତାକା 21 - New Testament in Pengo Parja Languageପାଉଲ ଯିରୁଶାଲାମ ସହର୍ତାକେ ହାଚାନ୍ 1 ପ୍ରାଚିନାରିଙ୍ଗ୍ ପିସ୍ତି ଆପେଙ୍ଗ୍ ଜାଜ୍ତାକେ ଦୁମ୍ଜି କୋସ୍ ଦ୍ୱିପ୍ତିଙ୍ଗ୍ ହାଚାପ୍, ଆର୍କାତ୍ ନାଞ୍ଜ୍ ରଦା ଦ୍ୱିପ୍ତିଙ୍ଗ୍ ହାଚାପ୍, ହେ ବାହାତାଙ୍ଗ୍ ପାତାରା ସହର୍ତାକେ ୱାତାପ୍। 2 ହେବେତାଙ୍ଗ୍ ପୈନିକିଆ ଏରିଆତାକେ ହାନି ର ଜାଜ୍ ଗାଟାଆତାପ୍, ହେବେ ଦୁମ୍ଜି ଆପେଙ୍ଗ୍ ହାଚାପ୍। 3 ମାଙ୍ଗେଙ୍ଗ୍ ଡେବା କେଇ ନିପଣ୍ଡାଙ୍ଗ୍ କୁପ୍ର ଦ୍ୱିପ୍ ଚଞ୍ଜ୍ଞ୍ଜାତାତ୍, ହେଦାଙ୍ଗ୍ ପିସ୍ତି ସିରିୟା ଜିଲ୍ଲା ନିପଣ୍ ହାଲ୍ଜି ସୋର୍ ସହର୍ତାକେ ଇକାତାପ୍। ହେବେ ଜାଜ୍ନି ଜିନିଷ୍ ପତର୍ ଜୁତ୍ନାକା ମାଚାତ୍। 4 ହେ ସହର୍ତାକେ ପାର୍ତିକିନି ଚେଲାହିରିଙ୍ଗ୍ ଗିଟାଆତାପ୍, ଆରେ ହେବେ ସାତ୍ଦିନ୍ ମାଚାପ୍। ପବିତ୍ର ଆତ୍ମା ସାଇଜତାଙ୍ଗ୍ ପାଉଲତିଙ୍ଗ୍ ଯିରୁଶାଲାମ ସହର୍ତାକେ ହାଲ୍ମା ଇଞ୍ଜି ଗୁୱାରି କିତାର୍। 5 ହେବେ ସାତ୍ଦିନ୍ ମାଚି ପାଚେ ହେବେତାଙ୍ଗ୍ ମା ହାଜ୍ଦିଙ୍ଗ୍ ଆପେଙ୍ଗ୍ ହାଚାପ୍। ହେୱାର୍ ୱିଜାକାର୍ କଗ୍ଲେକ୍ ଆରେ ହିମ୍ଣାୱାକ୍ଡ଼ା ହୁଦାଙ୍ଗ୍ ସହର୍ନି ହାମ୍ଦୁର୍ କାଣ୍ଡିତାକେ ଇଡ୍ଗି ୱାତାର୍। ହେବେ ଆପେଙ୍ଗ୍ ମେଣ୍ଡାକୁନ୍ଦିକିଜି ପାର୍ତାନା କିତାପ୍। 6 ତାପାଚେ ହେୱାରିଙ୍ଗ୍ ପିସ୍ତି ଆପେଙ୍ଗ୍ ଜାଜ୍ତାକେ ଦୁମ୍ତାପ୍, ଆରେ ହେୱାର୍ ତାଞ୍ଜ ଲେଉଟା ଆଜି ହାଚାର୍। 7 ଆପେଙ୍ଗ୍ ସୋର୍ ସହର୍ତାଙ୍ଗ୍ ଜାଜ୍ତାକେ ହାନି ହାଜି ୱିସ୍ତି ପତଲମାଇ ସହର୍ତାକେ ଇକାତାପ୍। ଆରେ ପାର୍ତିକିନି ଟଣ୍ଡାରିଙ୍ଗ୍ ଗିଟାଆଜି ହେୱାର୍ ହୁଦାଙ୍ଗ୍ ମେହାଆଜି ହେବେ ରଦିନ୍ ମାଚାପ୍। 8 ଆର୍କାତ୍ ନାଞ୍ଜ୍ ହେ ବାହା ପିସ୍ତି ଆପେଙ୍ଗ୍ କାଇସରିଆ ସହର୍ତାକେ ହାଚାପ୍। ଆରେ ପିଲିପ ତର୍ଦି ଇଞ୍ଜ ମାଚାପ୍। ରାଣ୍ଡିକାଙ୍ଗ୍ ଦେକାଶୁଣା କିଦେଙ୍ଗ୍ ଯିରୁଶାଲାମ ସହର୍ତାକେ ମାନି ବାଚିକିତି ଚେଲାର୍, ଇମ୍ଣି ସାତ୍ ଜାଣ୍ତିଙ୍ଗ୍ ବାଚିକିଜି ମାଚାର୍ ହେ ବିତ୍ରେତାଙ୍ଗ୍ ଇ ପିଲିପ ରକାନ୍ ମାଚାନ୍। 9 ଇୱାନିଙ୍ଗ୍ ଚାରିଗଟା ଗାଡ଼୍ଚେକ୍ ମାଚିକ୍, ହେୱେକ୍ ଈଶ୍ୱରତାଙ୍ଗ୍ ୱେଚି ବେଣ୍ତିଙ୍ଗ୍ ୱେଚ୍ନି ଗାଡ଼୍ଚେକ୍ ମାଚିକ୍। 10 ଆପେଙ୍ଗ୍ ହେବେ କେତେକ୍ ଦିନ୍ ମାଚି ପାଚେ, ଆଗାବ ଭବିଷ୍ଯତବକ୍ତା ଯିହୁଦା ଜିଲ୍ଲାତାଙ୍ଗ୍ ହେବେ ୱାତାନ୍। 11 ହେୱାନ୍ ମା କଚଣ୍ତ ୱାଜି ପାଉଲ ବେଲ୍ଟ୍ତିଙ୍ଗ୍ ଅତାନ୍। ଆରେ ତା କେଇକୁ କାଲ୍କୁକାଙ୍ଗ୍ ଗାଚିଆ ଆଜି ୱେଚ୍ଚାନ୍, “ପବିତ୍ର ଆତ୍ମା ଏଲେଙ୍ଗ୍ ୱେଚ୍ଚାନାନା, ‘ଯିରୁଶାଲାମ ସହର୍ତାକେ ମାନି ଯିହୁଦି ନେତାର୍ ଲେକେ ଗାଚ୍ଚି ବିନ୍ଜାତିର୍ କେଇଦ ହାର୍ପି କିଜି ହିଦ୍ନାର୍।’” 12 ଇ କାତା ୱେନ୍ଞ୍ଜି ଯିରୁଶାଲାମ ସହର୍ତାକେ ହାଲ୍ୱେଦେଙ୍ଗ୍ ଆପେଙ୍ଗ୍ ଆରେ ହେବେ ମାଚି ମାନାୟାର୍ ପାଉଲତିଙ୍ଗ୍ ଗୁୱାରି କିତାପ୍। 13 ହେବେତାଙ୍ଗ୍ ପାଉଲ ୱେଚ୍ଚାନ୍, “ଏପେଙ୍ଗ୍ ଇନା କିଦେଙ୍ଗ୍ ଆଡ଼୍ବିସ୍ ମାନ୍ ବାଙ୍ଗାୟ୍ କିଦ୍ନାଦେରା? ଆନେଙ୍ଗ୍ ମାପୃ ଯୀଶୁ ତର୍ଦାଙ୍ଗ୍ ଯିରୁଶାଲାମ ସହର୍ତାକେ ଗାଚିଆଦେଙ୍ଗ୍ ଆରେ ହାଃଦେଙ୍ଗ୍ ପା ରେଡି ମାନାଙ୍ଗ୍।” 14 ହେୱାନ୍ ମାନିକିୱିତିଲେ ଆପେଙ୍ଗ୍ ଚିମ୍ରା ଆତାପ୍, ଆରେ ମାପୃ ଇଚା ପୁରା ଆୟେତ୍ ଇଞ୍ଜି ୱେଚ୍ଚାପ୍। 15 କେତ୍ଦିନ୍ ପାଚେ ଆପେଙ୍ଗ୍ ୱିଜୁ ଜିନିଷ୍ ପତର୍ ଆସ୍ତି ଯିରୁଶାଲାମ ସହର୍ତାକେ ହାଞ୍ଜେଙ୍ଗ୍ ହତାପ୍। 16 କାଇସରିଆ ସହର୍ତାଙ୍ଗ୍ ପା କେତେକ୍ ପାର୍ତିକିନି ଚେଲାହିର୍ ମା ହୁଦାଙ୍ଗ୍ ୱାତାର୍। ହେୱାର୍ ମନାସନ ତର୍ଦାକାନ୍ ଇଞ୍ଜ ମାଙ୍ଗେଙ୍ଗ୍ ଅସାହାନ୍ଞ୍ଚାର୍। ହେୱାନ୍ କୁପ୍ର ଦ୍ୱିପ୍ ନିକାନ୍ ମାଚାନ୍ ଆରେ ହେୱାନ୍ ଆଗେତାଙ୍ଗ୍ ପାର୍ତିକିନାକାନ୍ ମାଚାନ୍। ଯିରୁଶାଲାମ ସହର୍ତାକେ ପାଉଲ ୱାତାନ୍ 17 ଆପେଙ୍ଗ୍ ଯିରୁଶାଲାମ ସହର୍ତାକେ ଇକାତାପ୍। ଲାଗିଙ୍ଗ୍ ପାର୍ତିକିନି ଟଣ୍ଡାର୍ ସନ୍ମାନ୍ କିତ୍ତାର୍। 18 ଆର୍କାତ୍ ନାଞ୍ଜିଙ୍ଗ୍ ପାଉଲ ମା ହୁଦାଙ୍ଗ୍ ମେହାଆଜି ଯାକୁବ ଇଞ୍ଜ ହାଚାନ୍। ଆରେ ୱିଜୁ ପ୍ରାଚିନାର୍ ହେବେ ରୁଣ୍ଡାଆଜି ମାଚାର୍। 19 ପାଉଲ ହେୱାରିଙ୍ଗ୍ ଜୁୱାର୍ କିତାନ୍। ଆରେ ଈଶ୍ୱର ସାଇଜତାଙ୍ଗ୍ ହେୱାନ୍ ଇମ୍ଣି-ଇମ୍ଣି କାମାୟ୍ କାଜିଙ୍ଗ୍ ବିନ୍ଜାତିନି ମାନାୟାରିଙ୍ଗ୍ ହେ ୱିଜୁତିଙ୍ଗ୍ ରଞ୍ଜାଙ୍ଗ୍-ରଞ୍ଜାଙ୍ଗ୍ କିଜି ହେୱାରିଙ୍ଗ୍ ୱେଚ୍ଚାନ୍। 20 ହେୱାର୍ ହେଦାଙ୍ଗ୍ ୱେନ୍ଞ୍ଜି ଈଶ୍ୱରତିଙ୍ଗ୍ ଜୟ୍-ଜୟ୍ କିତାର୍। ପାଚେ ହେୱାର୍ ପାଉଲତିଙ୍ଗ୍ ୱେଚ୍ଚାର୍, “ଏ ଟଣ୍ଡେନ୍ ଯିହୁଦିର୍ ବିତ୍ରେ କେତେକ୍ ହାଜାର୍ ମାନାୟ୍ ପାର୍ତି କିତାର୍ନା ହେଦାଙ୍ଗ୍ ଏନେଙ୍ଗ୍ ପୁଚାଇନା। ହେୱାର୍ ୱିଜାକାର୍ ମୋଶା ହିତି ନିୟମ୍ ସାସ୍ତର୍ତିଙ୍ଗ୍ ବେସି ଦିୟାନ୍ କିଜି ମାନି କିନାରା। 21 ବିନ୍ଜାତିନି ମାନାୟାର୍ ବିତ୍ରେ ମାନି ଯିହୁଦିର୍ ତା ହିମ୍ଣା ୱାକ୍ଡ଼ାକାଙ୍ଗ୍ ସୁନତ ବିଦି କିୱେଦେଙ୍ଗ୍ ଆରେ ଜେକନି ବିଦିତିଙ୍ଗ୍, ଆରେ ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ମାନି କିୱେଦେଙ୍ଗ୍ ହିକ୍ଷା ହିତି ବିଷୟରେ ଇ ଯିହୁଦି ଖ୍ରୀଷ୍ଟାନାର୍ ୱେଚାର୍ନା। 22 ନଙ୍ଗୟ୍ ଇନାକା କିଦେଙ୍ଗ୍ ଆନାତ୍? ଏନେଙ୍ଗ୍ ୱାତାୟ୍ନା ଇଞ୍ଜି ହେୱାର୍ ହାତ୍ପା ପୁନାର୍। 23 ଲାଗିଙ୍ଗ୍ ନିଙ୍ଗେଙ୍ଗ୍ ଆପେଙ୍ଗ୍ ଇନାକା ୱେଚ୍ଚାନାପା ହେଦାଙ୍ଗ୍ କିୟାଟ୍। ମା ବିତ୍ରେ ଚାରି ଜାଣ୍ ମାନାୟ୍ ମାନାର୍, ହେୱାର୍ ରଞ୍ଜାଙ୍ଗ୍ ମାନ୍ସି କିତାର୍ନା। 24 ଏନେଙ୍ଗ୍ ହେୱାରିଙ୍ଗ୍ ଅଜି ହେୱାର୍ ହୁଦାଙ୍ଗ୍ ସୁତକ୍ ଆ, ହେୱାର୍ କାପ୍ଡ଼ା ତେମୁଲ୍ ହେନି ଆତିସ୍ ଖର୍ଚ ଏନେଙ୍ଗ୍ ହିୟା। ଲାଗିଙ୍ଗ୍ ଏନେଙ୍ଗ୍ ପା ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ମାନିକିନାକା, ଆରେ ନି ବିଷୟରେ ଇନାକା ୱେନ୍ଞ୍ଜି ମାଚାର୍ ହେଦାଙ୍ଗ୍ ସତ୍ ଆକାୟ୍ ଇଞ୍ଜି ହେୱାର୍ ପୁନାର୍। 25 ଇମ୍ଣି ବିନ୍ଜାତିନି ମାନାୟାର୍ ପାର୍ତି କିତାର୍ନା, ତା ଲାଗାୟ୍ ଆପେଙ୍ଗ୍ ବିଚାର୍ କିଜି ଇ ବିଷୟରେ ଲେକିକିତାପ୍ନା। ମୁର୍ତିତିଙ୍ଗ୍ ପୁଜାକିତି କାଦିତିଙ୍ଗ୍ ତିନ୍ୱେଦେଙ୍ଗ୍, ନେତେର୍ ତିନ୍ୱେଦେଙ୍ଗ୍, ହାକ୍ ମିନ୍ଞ୍ଜି ଅସ୍ତି ପଶୁ ଜେଇ ତିନ୍ୱେଦେଙ୍ଗ୍, ଆରେ ଦାରି କାମାୟ୍ କିୱେଦେଙ୍ଗ୍।” 26 ହେବେତାଙ୍ଗ୍ ପାଉଲ ହେ ମାନାୟାରିଙ୍ଗ୍ ଆସ୍ତି ଆର୍କାତ୍ ନାଞ୍ଜିଙ୍ଗ୍ ହେୱାର୍ ହୁଦାଙ୍ଗ୍ ଜାର୍ତିଙ୍ଗ୍ ଜାତି ମାହାଆନି ବିଦି କିତାନ୍, ଆରେ ଈଶ୍ୱର ମାନି ମନ୍ଦିର୍ ବିତ୍ରେ ହାଚାନ୍। ଆରେ ଜାତି ମାହାଆନି ବିଦି ଏଚେଦିନ୍ ଲାଗ୍ଦାନାତ୍, ଆରେ ହେୱାର୍ କାଜିଙ୍ଗ୍ ଇନେୱାଡ଼ାଙ୍ଗ୍ ପୁଜାକିନି ଦାନ୍ ହିନାର୍ ହେଦାଙ୍ଗ୍ ଈଶ୍ୱର ହେବାକିନି ପୁଜାରିଙ୍ଗ୍ ୱେଚ୍ଚାନ୍। ପାଉଲତିଙ୍ଗ୍ ମନ୍ଦିର୍ ବିତ୍ରେ ଆସ୍ତାର୍ 27 ହେ ଜାତି ମାହାଆନି ବିଦି ସାତ୍ଦିନ୍ ପୁରା ଆତିହିଙ୍ଗ୍, ଏସିଆ ଜିଲ୍ଲାତାଙ୍ଗ୍ ୱାଜିମାଚି କେତେକ୍ ଯିହୁଦିର୍ ମନ୍ଦିର୍ତାକେ ପାଉଲତିଙ୍ଗ୍ ହୁଡ଼୍ତାର୍। ଆରେ ମାନାୟାରିଙ୍ଗ୍ ହେୱାର୍ ଉସ୍କାଇ କିଜି ପାଉଲତିଙ୍ଗ୍ ଆସ୍ତାର୍। ଆରେ ହେୱାର୍ ରାଟୁ କିଜି ୱେଚ୍ଚେଙ୍ଗ୍ ଲାଗାତାର୍, 28 “ଏ ଇସ୍ରାଏଲ ଜାତିନି ମାନାୟ୍ କାଦେର୍! ମାଙ୍ଗେଙ୍ଗ୍ ସାଇଜ କିଦାଟ୍! ଇୱାନ୍ନେ ମା ଜାତି, ମା ନିୟମ୍ ସାସ୍ତର୍ ଆରେ ଇ ମନ୍ଦିର୍ ବିରୁଦ୍ରେ ୱିଜାକାରିଙ୍ଗ୍ ହିକ୍ଷା ହିଜିମାନ୍ଞ୍ଚାନ୍। ଆରେ ହେୱାନ୍ ବିନ୍ଜାତିନି ମାନାୟାରିଙ୍ଗ୍ ଈଶ୍ୱର ମାନି ମନ୍ଦିର୍ ବିତ୍ରେ ତାସି ଇ ପବିତ୍ର ବାହାତିଙ୍ଗ୍ ଅପବିତ୍ର କିତାନ୍ନା।” 29 ଇନେସ୍କି ହେୱାର୍ ଆଗେ ଏପିସିୟ ସହର୍ତାକେ ମାନି ତ୍ରପିମ ତର୍ଦାକାନିଙ୍ଗ୍ ପାଉଲ ହୁଦାଙ୍ଗ୍ ଯିରୁଶାଲାମ ସହର୍ତାକେ ହୁଡ଼୍ଜି ମାଚାର୍। ଆରେ ହେୱାନିଙ୍ଗ୍ ପା ଈଶ୍ୱର ମାନି ମନ୍ଦିର୍ ବିତ୍ରେ ତାସି ମାନ୍ଗାନାନ୍ ଇଞ୍ଜି ବାବିକିତାର୍। 30 ଇ ବିଷୟରେ ୱିଜୁ ସହର୍ ନିପଣ୍ ଗଉଲି ଆତାର୍, ମାନାୟାର୍ ରବେଆଜି ପାଉଲ ମାନି ବାହାତାକେ ହନ୍ଞ୍ଚି ହାଚାର୍। ଆରେ ହେୱାର୍ ପାଉଲତିଙ୍ଗ୍ ଆସ୍ତି ମନ୍ଦିର୍ ବାର୍ତ ଜେଲ୍ଜି ତାତାର୍, ଆରେ ହେଦାପ୍ରେ ମନ୍ଦିର୍ ୱିଜୁ କାପାଟିଙ୍ଗ୍ ବନ୍ଦ୍ କିତାର୍। 31 ହେୱାର୍ ହେୱାନିଙ୍ଗ୍ ଅସ୍ତେଙ୍ଗ୍ ଉପାୟ୍ କିତିହିଙ୍ଗ୍, ଯିରୁଶାଲାମ ସହର୍ତାକେ ବେସି ମାନାୟାର୍ ଗଣ୍ଡ୍ଗଲ୍ ଆନାରା ଇଞ୍ଜି ହାଜାର୍ ସେନାର୍ ମୁକ୍ଯାଙ୍ଗ୍ କାବୁର୍ ୱାତାତ୍। 32 ହେଦାପ୍ରେ ହେୱାନ୍ ସେନାରିଙ୍ଗ୍ ଆରେ ଶହେଗଟା ସେନାର୍ ମୁକ୍ୟାକାଙ୍ଗ୍ ଆସ୍ତି ହେ ମାନାୟାର୍ ଲାଗାୟ୍ ହାଚାର୍। ହାଜାର୍ ସେନାର୍ ମୁକ୍ଯା ଆରେ ସେନାରିଙ୍ଗ୍ ହୁଡ଼୍ଜି ହେ ମାନାୟାର୍ ପାଉଲତିଙ୍ଗ୍ ଟ୍ରାକ୍ତେଙ୍ଗ୍ ବନ୍ଦ୍ କିତାର୍। 33 ହେପାଦ୍ନା ହାଜାର୍ ସେନାର୍ ମୁକ୍ଯା ପାଉଲ ଲାଗାୟ୍ ୱାଜି ହେୱାନିଙ୍ଗ୍ ଆସ୍ତାନ୍, ଆରେ ହେୱାନିଙ୍ଗ୍ ରିଣ୍ଡାଙ୍ଗ୍ ହିକ୍ଡ଼ିଙ୍ଗ୍ ହୁଦାଙ୍ଗ୍ ଗାଚ୍ଚେଙ୍ଗ୍ ଆଦେସ୍ ହିତାନ୍, ତାପାଚେ ହେୱାନ୍ ଇନେର୍ ଆରେ ଇନାକା କିନାନା ଇଞ୍ଜି ମାନାୟାରିଙ୍ଗ୍ ୱେନ୍ବାତାନ୍। 34 ହେବେତାଙ୍ଗ୍ ମାନାୟାର୍ ବିତ୍ରେତାଙ୍ଗ୍ ଇନେର୍-ଇନେର୍ ଇବେଣ୍ ଇନେର୍-ଇନେର୍ ହେ ବେଣ୍ ୱେଚ୍ଚି ରାଟୁ ଆତାର୍। ମାନାୟାର୍ ରାଟୁ ଆତି କାଜିଙ୍ଗ୍ ହାଜାର୍ ସେନାର୍ ମୁକ୍ଯା ହେ ଗଣ୍ଡ୍ଗଲ୍ ବିଷୟରେ ପୁଞ୍ଜେଙ୍ଗ୍ ଆଡ୍ୱାତାନ୍। ହେଦାଙ୍ଗ୍ କାଜିଙ୍ଗ୍ ହେୱାନ୍ ପାଉଲତିଙ୍ଗ୍ ୱେନ୍ବେଦେଙ୍ଗ୍ ସେନାର୍ ମାନି ବାହାତାକେ ଅସାହାଚାନ୍। 35 ପାଉଲ ଏଚେପାଦ୍ନା ସେନାର୍ ମାନି ପାଉଜ୍ ଜପି ୱାତାନ୍, ମାନାୟାର୍ ବେସି ଗଣ୍ଡ୍ଗଲ୍ ଆତାର୍। ଲାଗିଙ୍ଗ୍ ସେନାର୍ ପାଉଲତିଙ୍ଗ୍ ପିଣ୍ଜି ଅତାର୍। 36 ଇନେସ୍କି ବେସିହେନି ମାନାୟାର୍ ହେୱାର୍ ପାଚେ-ପାଚେ ହାଲ୍ଜି ପାଉଲତିଙ୍ଗ୍ ମାର୍ନେ ଅହାଟ୍ ଇଞ୍ଜି ରାଟୁ କିଜି ମାଚାର୍। ପାଉଲ ତା ବିଷୟରେ ୱେଚ୍ଚି କାତା 37 ସେନାର୍ ପାଉଲତିଙ୍ଗ୍, ସେନାର୍ ଇଲ୍ ବିତ୍ରେ ଅନିହିଙ୍ଗ୍ ହେୱାନ୍ ହାଜାର୍ ସେନାର୍ ମୁକ୍ଯାତିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନିଙ୍ଗେଙ୍ଗ୍ ଇନାକା ୱେଚ୍ଚେଦେଙ୍ଗ୍ ଆଡ଼୍ଦାନାଙ୍ଗ୍ କି?” ହାଜାର୍ ସେନାର୍ ମୁକ୍ଯା ପାଉଲତିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ଗ୍ରୀକ୍ ବାଷା ପୁନାଇ କି? 38 କେତେକ୍ ଦିନ୍ ଆଗେ ମିସର ଦେସ୍ତାକାନ୍ ରକାନ୍ ମାନାୟ୍ ଦେସ୍ତିଙ୍ଗ୍ ବିରଦ୍ କିନି ଚାରି ହାଜାର୍ ମାନାୟ୍ତିଙ୍ଗ୍ ଟାଙ୍ଗ୍ରାବାହାତାକେ ଅସାହାଚାନ୍, ଆରେ ସର୍କାର୍ ବିରଦ୍ତାକେ ଜୁଜ୍ କିୟିକିତାନ୍, ଏନେଙ୍ଗ୍ ହେୱାନ୍ ଆକାୟ୍କି?” 39 ହେବେତାଙ୍ଗ୍ ପାଉଲ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ଯିହୁଦି ଜାତିନି ମାନାୟ୍। ଆନେଙ୍ଗ୍ କିଲିକିୟା ଜିଲ୍ଲାନି ତାର୍ଷ ଗାଜା ସହର୍ତାକେ ମାନାକାଙ୍ଗ୍। ଦୟାକିଜି ଇ ମାନାୟାରିଙ୍ଗ୍ ବେଣ୍କିଦେଙ୍ଗ୍ ନାଙ୍ଗେଙ୍ଗ୍ ଆଦେସ୍ ହିଦା।” 40 ଲାଗିଙ୍ଗ୍ ହାଜାର୍ ସେନାର୍ ମୁକ୍ଯା ପାଉଲତିଙ୍ଗ୍ ଆଦେସ୍ ହିତାନ୍। ହେୱାନ୍ ହେ ପାଉଜ୍ତାକେ ନିଲ୍ତି ମାନାୟାରିଙ୍ଗ୍ କେଇ ଚଚ୍ଚାନ୍, ଆରେ ୱିଜାକାର୍ ଚିମ୍ରା ଆତାର୍। ତାପାଚେ ହେୱାନ୍ ଏବ୍ରୀ ବାଷାତାଙ୍ଗ୍ ହେୱାରିଙ୍ଗ୍ ବେଣ୍କିତାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation