ପକ୍ୟାତାକା 20 - New Testament in Pengo Parja Languageମାକଦନିଆ ଆରେ ଗ୍ରିସ୍ ଜିଲ୍ଲାତାକେ ପାଉଲ ହାଚାନ୍ 1 ଏପିସ ସହର୍ନି ମାନାୟାର୍ ଗଣ୍ଡ୍ଗଲ୍ କିନାକା ବନ୍ଦ୍ କିତି ପାଚେ, ପାଉଲ ଚେଲାହିରିଙ୍ଗ୍ କୁକ୍ଚି ସାହାସ୍ କିତାନ୍। ତାପାଚେ ହେୱାନ୍ ହେୱାର୍ତାଙ୍ଗ୍ ହସି ମାକଦନିଆ ଜିଲ୍ଲାତାକେ ହାଚାନ୍। 2 ହେ ଜିଲ୍ଲାତାକେ ପାର୍ତିକିନି ମାନାୟାର୍ ମାନି ସହର୍ ବାହାକାଙ୍ଗ୍ ହାଲ୍ଜି, ହେୱାରିଙ୍ଗ୍ ସାହାସ୍ନି କାତା ୱେଚ୍ଚି ମାଚାନ୍। ତାପାଚେ ହେୱାନ୍ ଗ୍ରିସ୍ ଜିଲ୍ଲାତାକେ ଇକାତାନ୍। 3 ହେ ବାହାତାକେ ହେୱାନ୍ ତିନ୍ମାସ୍ ମାଚାନ୍। ପାଚେ ହେୱାନ୍ ଜାଜ୍ତାକେ ଦୁମ୍ଜି ସୁରିଆ ଜିଲ୍ଲାତାକେ ହାଞ୍ଜେଙ୍ଗ୍ ମାନ୍ତ ବାବିକିତାନ୍। ମାତର୍ ଯିହୁଦି ନେତାର୍ ହେୱାନିଙ୍ଗ୍ ଅସ୍ତେଙ୍ଗ୍ ଉପାୟ୍ କିତାର୍ନା ଇଞ୍ଜି ପୁନ୍ଞ୍ଜି ମାକଦନିଆ ଜିଲ୍ଲା ନିପଣ୍ ଆଜି ସିରିୟା ଜିଲ୍ଲାତାକେ ହାଞ୍ଜେଙ୍ଗ୍ ବାବିକିତାନ୍। 4 କେତେକ୍ ମାନାୟାର୍ ହେୱାନ୍ ହୁଦାଙ୍ଗ୍ ମେହାଆଜି ହାଚାର୍। ହେୱାର୍ ତର୍ ବେରିୟା ସହର୍ନି ସୋପାତ୍ର, ହେୱାନ୍ ପୁରନି ମେହି ମାଚାନ୍, ଥେସଲନିକି ସହର୍ନି ଆରିସ୍ତାର୍ଖ ଆରେ ସେକୁନ୍ଦ, ଦର୍ବି ସହର୍ନି ଗାୟ, ଲୁସ୍ତ୍ରା ସହର୍ନି ତିମତି ଆରେ ଏସିଆ ଜିଲ୍ଲାନି ତୁକିକ ଆରେ ତ୍ରପିମ ମାଚାର୍। 5 ଇୱାର୍ ଆଗେ ହାଲ୍ଜି ତ୍ରୋୟା ସହର୍ତାକେ ମାଙ୍ଗେଙ୍ଗ୍ କାସି ମାନ୍ଞ୍ଚାର୍। 6 ମାତର୍ ଆପେଙ୍ଗ୍ ଫିଲିପ ସହର୍ତାକେ ହାଚାପ୍। ସଡ଼ା ମେହାଆୱିତି ରୁଟି ପାର୍ବୁ ୱିସ୍ତି ପାଚେ ଜାଜ୍ତାକେ ଦୁମ୍ଜି ତ୍ରୋୟା ସହର୍ତାକେ ହାଞ୍ଜେଙ୍ଗ୍ ହତାପ୍। ପାଞ୍ଚ୍ଦିନ୍ ପାଚେ ହେ ସହର୍ତାକେ ଇକାତାପ୍, ଆରେ ମା ଆଗେ ହାଲ୍ଜି ମାଚି ମାନାୟାର୍ ହୁଦାଙ୍ଗ୍ ମେହା ଆତାପ୍। ଆରେ ହେୱାର୍ ହୁଦାଙ୍ଗ୍ ହେ ବାହାତାକେ ସାତ୍ଦିନ୍ ମାଚାପ୍। ପାଉଲ ରକାନ୍ ହାଃତାକାନିଙ୍ଗ୍ ଜିବୁନ୍ କିତି କାତା 7 ସାତ୍ଦିନ୍ନି ପାର୍ତୁମ୍ ନାଞ୍ଜିଙ୍ଗ୍ ଆପେଙ୍ଗ୍ ପ୍ରବୁବଜ୍ ଚିଞ୍ଜେଙ୍ଗ୍ ରବେ ରୁଣ୍ଡାଆଜି ମାଚାପ୍। ହେପାଦ୍ନା ପାଉଲ ମାନାୟାରିଙ୍ଗ୍ ଶୁଣାୟ୍ କିତାନ୍। ହେୱାନ୍ ୱିଗାଲିଙ୍ଗ୍ ହାନାକା ମାଚିଲେ ମାଦିମାଦାନାଣା ପାତେକ୍ ଶୁଣାୟ୍ କିଦେଙ୍ଗ୍ ଲାଗାତାନ୍। 8 ଇମ୍ଣି ଜପି ବାକ୍ରାତାକେ ଆପେଙ୍ଗ୍ ରୁଣ୍ଡାଆଜି ମାଚାପ୍, ହେ ବାହାତାକେ ବେସି ବଇଟା ମାଚିକ୍। 9 ଆରେ ଉଇତୁକ ତର୍ଦାକାନ୍ ରକାନ୍ ବେଣ୍ଡିଆ ହିମ୍ଣା ଜର୍କା ଜପି କୁଚ୍ଚି ମାଚାନ୍। ହେୱାନିଙ୍ଗ୍ ବେସି ହୁଚ୍କାଣ୍କୁ ଲାଗି ମାଚିକ୍। ଆରେ ପାଉଲ ବେସି ଗାଡ଼ି ଶୁଣାୟ୍ କିତିଲେ, ହେ ବେଣ୍ଡିଆ ହିମ୍ଣା ହୁନ୍ଞ୍ଜି ତିନ୍ ପାଉଜ୍ ଇଞ୍ଜାଙ୍ଗ୍ ତାରେନ୍ ଆର୍ତାନ୍। ଆରେ ମାନାୟାର୍ ୱାଜି ନିକ୍ନିହିଙ୍ଗ୍ ହେୱାନ୍ ହାଃଜି ମାଚାନ୍ 10 ପାଉଲ ହେବେତାଙ୍ଗ୍ ତାରେନ୍ ଜୁଜି ହେୱାନିଙ୍ଗ୍ ପମ୍ଜି ୱେଚ୍ଚାନ୍, “ଇବେ ରାଟୁ ଆମାଟ୍, ହେୱାନ୍ ନଙ୍ଗୟ୍ ପାତେକ୍ ଜିବୁନ୍ ମାନାନ୍।” 11 ତାପାଚେ ହେୱାନ୍ ଜପ୍ଣି ପାଉଜ୍ତାକେ ହାଲ୍ଜି ପ୍ରବୁବଜ୍ ଚିଚାନ୍ ଆରେ କାଦି ପା ଚିଚାନ୍। ତାପାଚେ ହେୱାନ୍ ହେୱାର୍ ହୁଦାଙ୍ଗ୍ ଅଜଡ଼୍ ଆନି ପାତେକ୍ ବେସି କାତାବାର୍ତା କିଜି ହେବେତାଙ୍ଗ୍ ହସିହାଚାନ୍। 12 ଆରେ ମାନାୟାର୍ ହେ ବେଣ୍ଡିଆ ହିମ୍ଣାତିଙ୍ଗ୍ ଜିବୁନ୍ ଆତାକା ହୁଡ଼୍ଜି ତାଞ୍ଜ ଅସାହାଚାର୍। ଆରେ ହେୱାର୍ ବେସି ୱାରିୟା ଆତାର୍। ପ୍ରାଚିନ୍ ହୁଦାଙ୍ଗ୍ ପାଉଲ ମେହା ଆତାନ୍ 13 ମାତର୍ ଆପେଙ୍ଗ୍ ଜାଜ୍ତାକେ ଦୁମ୍ଜି ଆସସ୍ ସହର୍ତାକେ ହାଞ୍ଜେଙ୍ଗ୍ ହାଚାପ୍। ଆରେ ପାଉଲତିଙ୍ଗ୍ ପା ଅସାହାଞ୍ଜେଙ୍ଗ୍ ବାବି କିତାପ୍, ମାତର୍ ପାଉଲ ହାଜ୍ଦିଙ୍ଗ୍ ଆସସ୍ ସହର୍ତାକେ ହାଞ୍ଜେଙ୍ଗ୍ ବାବିକିତାନ୍। 14 ହେପାଦ୍ନା ହେୱାନ୍ ମାଙ୍ଗେଙ୍ଗ୍ ଆସସ୍ ସହର୍ତାକେ ଗିଟା ଆତ୍ତାନ୍। ଆପେଙ୍ଗ୍ ହେୱାନିଙ୍ଗ୍ ଜାଜ୍ତାକେ ଦୁପ୍ଚି ମିତୁଲିନି ସହର୍ତାକେ ୱାତାପ୍। 15 ଆରେ ହେ ବାହାତାଙ୍ଗ୍ ଜାଜ୍ ରିକ୍ଚି ଆପେଙ୍ଗ୍ ଆର୍କାତ୍ ନାଞ୍ଜିଙ୍ଗ୍ ଖୀୟସ୍ ଦ୍ୱିପ୍ ଲାଗାୟ୍ ଇକାତାପ୍, ରିଦିନ୍ ମାନ୍ଞ୍ଜି ସାମ ଦ୍ୱିପ୍ତାକେ ଜାଜ୍ ଇକାତାତ୍, ଆରେ ତା ଆର୍କାତ୍ ନାଞ୍ଜିଙ୍ଗ୍ ମିଲିତ ସହର୍ତାକେ ଇକାତାପ୍। 16 ପାଉଲ ଏସିଆ ଜିଲ୍ଲାତାକେ ମାଞ୍ଜେଙ୍ଗ୍ ଇଚା କିୱାଦାଙ୍ଗ୍ ଏପିସ ସହର୍ତାକେ ଜୁଦେଙ୍ଗ୍ ଇଚା କିତାନ୍। ଇନେସ୍କି ହେୱାନ୍ ପେଣ୍ଟିକଷ୍ଟ ପାର୍ବୁ ନାଞ୍ଜିଙ୍ଗ୍ ଯିରୁଶାଲାମ ସହର୍ତାକେ ହାଞ୍ଜେଙ୍ଗ୍ ତାନ୍ଦ୍ରା ଆଜି ମାଚାନ୍। 17 ଏଚେପାଦ୍ନା ଆପେଙ୍ଗ୍ ମିଲିତ ସହର୍ ଲାଗାୟ୍ ଇକାତାପ୍, ପାଉଲ ଏପିସ ସହର୍ନି ମଣ୍ଡ୍ଲିନି ପ୍ରାଚିନାରିଙ୍ଗ୍ ୱାଜି ମେହାଆଦେଙ୍ଗ୍ ର କାବୁର୍ ପକ୍ତାନ୍। 18 ପ୍ରାଚିନାର୍ ତା ଲାଗାୟ୍ ଏକିତି ପାଚେ, ହେୱାନ୍ ହେୱାରିଙ୍ଗ୍ ୱେଚ୍ଚାନ୍, “ଏସିଆ ଜିଲ୍ଲାତାକେ ଆନେଙ୍ଗ୍ ୱାତି ଦିନ୍ତାଙ୍ଗ୍ ମିହୁଦାଙ୍ଗ୍ ଆନେଙ୍ଗ୍ ଇନେସ୍ ଜିତାଙ୍ଗ୍ନା ହେଦାଙ୍ଗ୍ ଏପେଙ୍ଗ୍ ପୁଚାଦେର୍ନା। 19 ଯିହୁଦି ନେତାର୍ ନାଙ୍ଗେଙ୍ଗ୍ ଅସ୍ତେଦେଙ୍ଗ୍ ଉପାୟ୍ କିତିଲେ ଆନେଙ୍ଗ୍ ବେସି ଦୁକ୍କଷ୍ଟ ପାୟାଆତାଙ୍ଗ୍ନା, ମାତର୍ ଆନେଙ୍ଗ୍ ଆଡ଼୍ବିସ୍-ଆଡ଼୍ବିସ୍ ନିଜେତିଙ୍ଗ୍ ହିରୁ କିଜି ମାପୃତିଙ୍ଗ୍ ହେବା କିତାଙ୍ଗ୍ନା। 20 ଇ ବିଷୟତିଙ୍ଗ୍ ଏପେଙ୍ଗ୍ ପୁଚାଦେର୍ନା, ମି କାଜିଙ୍ଗ୍ ଇମ୍ଣି ବିଷୟ ହାର୍ ଆଦ୍ନାତ୍ ହେ ବିଷୟତିଙ୍ଗ୍ ଶୁଣାୟ୍ କିଦେଙ୍ଗ୍ ଆନେଙ୍ଗ୍ ପାଚ୍ଗୁଚା ଆୱାତାଙ୍ଗ୍ନା। ଆନେଙ୍ଗ୍ ୱିଜାକାର୍ ଆଗେ ଆରେ ଇଲ୍-ଇଲ୍ ବୁଲାଆଜି ହିକ୍ଷା ହିତ୍ତାଙ୍ଗ୍ନା। 21 ପାପ୍ କାମାୟ୍ ପିସ୍ତି ଈଶ୍ୱରତାକେ ୱାଦେଙ୍ଗ୍ ଆରେ ମା ମାପୃ ଯୀଶୁତାକେ ପାର୍ତିକିନି କାଜିଙ୍ଗ୍, ଯିହୁଦି ଆରେ ବିନ୍ଜାତିନି ମାନାୟାରିଙ୍ଗ୍ ଶୁଣାୟ୍ କିତ୍ତାଙ୍ଗ୍ନା। 22 ନଙ୍ଗୟ୍ ଏପେଙ୍ଗ୍ ୱେନାଟ୍, ପବିତ୍ର ଆତ୍ମା ନାଙ୍ଗେଙ୍ଗ୍ ୱେଚ୍ଚିତି କାଜିଙ୍ଗ୍ ଆନେଙ୍ଗ୍ ଯିରୁଶାଲାମ ସହର୍ତାକେ ହାନାଙ୍ଗା, ହେବେ ନାଙ୍ଗେଙ୍ଗ୍ ଇନାକା-ଇନାକା ଗାଟାଆଦ୍ନାତ୍ ହେଦାଙ୍ଗ୍ ଆନେଙ୍ଗ୍ ପୁନୁଙ୍ଗ୍। 23 ୱିଜୁ ସହର୍ନି ମାନାୟାର୍ ଦୁକ୍କଷ୍ଟ ହିଜି ନାଙ୍ଗେଙ୍ଗ୍ ଜଇଲ୍ ଇଞ୍ଜ ଗେସ୍ତାନାର୍, ଇ ବିଷୟରେ ପବିତ୍ର ଆତ୍ମା ନାଙ୍ଗେଙ୍ଗ୍ ପୁନି କିତ୍ତାନ୍ନା। 24 ଈଶ୍ୱର ଇମ୍ଣି ଦୟା ଚଚ୍ଚାତାନ୍ନା ହେ ବିଷୟରେ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍, ମାପୃ ଯୀଶୁ ନାଙ୍ଗେଙ୍ଗ୍ ହିତ୍ତାନ୍ନା ଇ କାମାୟ୍ତିଙ୍ଗ୍ ପୁରା କିଜି ୱିହ୍ୱି ପାତେକ୍ ଆନେଙ୍ଗ୍ ନା ଜିବୁନ୍ତିଙ୍ଗ୍ କିଚି ମୁଲ୍ଯ ଆକାୟ୍ ଇଞ୍ଜି ବାବିକିନାଙ୍ଗା। 25 ଆନେଙ୍ଗ୍ ମି ବିତ୍ରେ ଈଶ୍ୱର ସାସନ୍ କିନି ରାଜି ବିଷୟରେ ଶୁଣାୟ୍ କିତ୍ତାଙ୍ଗ୍ନା। ଆରେ ନଙ୍ଗୟ୍ ଏପେଙ୍ଗ୍ ୱେନାଟ୍, ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦୁଦେର୍। 26 ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନେଞ୍ଜେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଯୀଶୁତାକେ ଯଦି ଏପେଙ୍ଗ୍ ପାର୍ତି କିୱାଦାଙ୍ଗ୍ ହାଃତିସ୍ ହେଦାଙ୍ଗ୍ ନା ଦସ୍ ଆକାୟ୍। 27 ଈଶ୍ୱର ମି କାଜିଙ୍ଗ୍ ଇମ୍ଣି ବିଷୟ ବାବି କିତ୍ତାନ୍ନା, ହେ ୱିଜୁ ବିଷୟ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାତାଙ୍ଗ୍ନା। 28 ଏପେଙ୍ଗ୍ ଆରେ ପାର୍ତି କିନାକାଦେର୍ ଜାଗ୍ରତ୍ ଆଜି ମାନାଟ୍। ଇନେସ୍କି ପବିତ୍ର ଆତ୍ମା ଇ ମାନାୟାର୍ ବିତ୍ରେ ବିଶପ୍ କିଜି ଦାଇତ୍ପ ହିତ୍ତାନ୍ନା। ଆରେ ଈଶ୍ୱର ତା ମେହି ଯୀଶୁ ନେତେର୍ତାଙ୍ଗ୍ ଇମ୍ଣି ମଣ୍ଡ୍ଲିତିଙ୍ଗ୍ କଡ଼୍ତାନ୍ନା, ହେ ମଣ୍ଡ୍ଲିନି ଗଡ଼ିୟା ଆଜି ମାନାଟ୍। 29 ଇନେସ୍କି ଆନେଙ୍ଗ୍ ପୁଚାଙ୍ଗ୍ନା, ଆନେଙ୍ଗ୍ ହାଚି ପାଚେ, ମିଚ୍ୱା ମାଷ୍ଟେର୍ ୱାଜି ପାର୍ତି କିନାକାରିଙ୍ଗ୍ ବେସି ହଇରାଣ୍ କିନାର୍। ହୁଣ୍ଡେର୍ ଇନେସ୍ ମେଣ୍ଢାକାଙ୍ଗ୍ ପାଗ୍ନାତ୍ ହେଲେକେ ଇ ମାଷ୍ଟେରାର୍ କିନାର୍। 30 ମି ପାର୍ତିକିନି ଚେଲାହିର୍ ବିତ୍ରେତାଙ୍ଗ୍ କେତେକ୍ ମାନାୟ୍ ୱାଜି ପାର୍ତି କିନାକାରିଙ୍ଗ୍ ତାପାଚେ ଅସାହାଞ୍ଜେଙ୍ଗ୍ ବୁଲ୍ ହିକ୍ଷା ହିଦ୍ନାର୍। 31 ଲାଗିଙ୍ଗ୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍! ଆରେ ଆନେଙ୍ଗ୍ ତିନ୍ ବାର୍ହୁ ପାତେକ୍ ୱେଡ଼ା ନାଣା ଆଡ଼୍ବିସ୍-ଆଡ଼୍ବିସ୍ ମିଙ୍ଗେଙ୍ଗ୍ ହିକ୍ଷାହିଜି ମାନ୍ଞ୍ଚାଙ୍ଗ୍ ହେଦାଙ୍ଗ୍ ଏପେଙ୍ଗ୍ ମାନ୍ତ ଏତୁକିୟାଟ୍। 32 ଆନେଙ୍ଗ୍ ମିଙ୍ଗେଙ୍ଗ୍ ଈଶ୍ୱରତାକେ ଆରେ ତା ଦୟାକିନି କାତାତିଙ୍ଗ୍ ହାର୍ପି କିଜି ହିତ୍ତାଙ୍ଗ୍ନା। ଇନେସ୍କି ହେୱାନ୍ ମିଙ୍ଗେଙ୍ଗ୍ ପାର୍ତି କିଜି ମାଞ୍ଜେଙ୍ଗ୍ ସାଇଜ କିଦ୍ନାନ୍। ହେୱାନ୍ ଇମ୍ଣାକାରିଙ୍ଗ୍ ଦରମ୍ ମାନାୟ୍ ରସ୍ତି ଆଦିକାର୍ ହିଦ୍ଦେଙ୍ଗ୍ କାତା ହିତ୍ତାନ୍ନା, ହେ ଆଦିକାର୍ ମିଙ୍ଗେଙ୍ଗ୍ ପା ହିଦ୍ନାନ୍। 33 ଆନେଙ୍ଗ୍ ଇନେର୍ ରୁପା, ହନା କି ହେନ୍ଦ୍ରା ଲବ୍ରା ଆୱାଦାଙ୍ଗ୍ ମାଚାଙ୍ଗ୍। 34 ଏପେଙ୍ଗ୍ ପୁଚାଦେର୍ନା, ନାଙ୍ଗେଙ୍ଗ୍ ଆରେ ନା ହାଙ୍ଗ୍ଦାକାରିଙ୍ଗ୍ ଦର୍କାର୍ଆନି ଜିନିଷ୍ତିଙ୍ଗ୍ ଆନେଙ୍ଗ୍ କାମାୟ୍ କିଜି ପୁରା କିତାଙ୍ଗ୍ନା। 35 ଆନେଙ୍ଗ୍ ଏଲେଙ୍ଗ୍ ୱିଜୁ କାମାୟ୍ କିଜି ମିଙ୍ଗେଙ୍ଗ୍ ଚଚ୍ଚାତାଙ୍ଗ୍ନା, ଏପେଙ୍ଗ୍ ଇଲେକେ କାମାୟ୍ କିଜି ଗରିବ୍ ଲଗାଙ୍ଗ୍ ସାଇଜ କିୟାଟ୍। ମାପୃ ଯୀଶୁ ନିଜେ ୱେଚ୍ଚିତି କାତାତିଙ୍ଗ୍ ମାନ୍ତ ଏତୁକିୟାଟ୍, ‘ଅନାକାତାଙ୍ଗ୍ ହିନାକା ବେସି ଆଶ୍ରିବାଦ୍ ଆନାତ୍।’ ” 36 ଇୱିଜୁ କାତା ୱେଚ୍ଚି ପାଉଲ ମେଣ୍ଡାକୁନ୍ଦିକିଜି ୱିଜାକାର୍ ହୁଦାଙ୍ଗ୍ ମେହାଆଜି ପାର୍ତାନା କିତାନ୍। 37 ହେୱାର୍ ୱିଜାକାର୍ ପାଉଲତିଙ୍ଗ୍ ପମ୍ଜି ଆଡ଼୍ବାତାର୍ ଆରେ ଚୁମା ହିତାର୍। 38 ଏପେଙ୍ଗ୍ ନାଙ୍ଗେଙ୍ଗ୍ ହୁଡ଼୍ଦୁଦେର୍ ଇଞ୍ଜି ପାଉଲ ୱେଚ୍ଚି କାତାତିଙ୍ଗ୍ ହେୱାର୍ ବେସିଦୁକ୍ ଆଜି ମାଚାର୍। ପାଚେ ହେୱାର୍ ହେୱାନିଙ୍ଗ୍ ଜାଜ୍ ପାତେକ୍ ଇଡ୍ଗେଦେଙ୍ଗ୍ ହାଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation