ପକ୍ୟାତାକା 19 - New Testament in Pengo Parja Languageପାଉଲ ଏପିସ ସହର୍ତାକେ ହେବା କାମାୟ୍ କିତାନ୍ 1 ଆପୋଲ କରନ୍ତିୟ ସହର୍ତାକେ ମାନିହିଙ୍ଗ୍, ପାଉଲ ଗାଲାତିୟ ଆରେ ଫ୍ରୁଗିଆ ସହର୍ ନିପଣ୍ ଆଜି ଏପିସ ସହର୍ତାକେ ଇକାତାନ୍। ଆରେ ହେବେ କେତେକ୍ ପାର୍ତିକିନି ଚେଲାହିରିଙ୍ଗ୍ ଗିଟାଆତାନ୍। 2 ହେୱାନ୍ ହେୱାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ପାର୍ତି କିନିହିଙ୍ଗ୍ ପବିତ୍ର ଆତ୍ମା ପାୟାଆଜି ମାଚାଦେର୍ କି?” ହେୱାର୍ ୱେଚ୍ଚାର୍, “ଆକାୟ୍, ଆପେଙ୍ଗ୍ ପବିତ୍ର ଆତ୍ମା ମାନାତ୍ ଇଞ୍ଜି ୱେନ୍ୱାତାପ୍ନା।” 3 ପାଉଲ ହେୱାରିଙ୍ଗ୍ ୱେନ୍ବାତାନ୍, “ଏପେଙ୍ଗ୍ ଇମ୍ଣି ଡୁବନ୍ ଅଜି ମାଚାଦେର୍?” ହେୱାର୍ ୱେଚ୍ଚାର୍, “ଯୋହନତାଙ୍ଗ୍ ଡୁବନ୍ ଅଜି ମାଚାପ୍।” 4 ହେବେତାଙ୍ଗ୍ ପାଉଲ ୱେଚ୍ଚାନ୍, “ମାନାୟ୍ ପାପ୍ କାମାୟ୍ ପିସ୍ତି ମାପୃତାକେ ୱାତାକାରିଙ୍ଗ୍ ଯୋହନ ଡୁବନ୍ହିଜି ମାଚାନ୍। ଆରେ ହେ ମାନାୟାରିଙ୍ଗ୍ ୱେଚ୍ଚି ମାଚାନ୍, ନା ପାଚେ ଇନେର୍ ୱାନାନା ହେୱାନିଙ୍ଗ୍ ଏପେଙ୍ଗ୍ ପାର୍ତିକିୟାଟ୍। ହେୱାନ୍ନେ ଯୀଶୁ ରକ୍ଷାକିଦ୍ନାକାନ୍।” 5 ହେୱାର୍ ପାଉଲ କାତା ୱେନ୍ଞ୍ଜି ମାପୃ ଯୀଶୁ ତର୍ଦାଙ୍ଗ୍ ଡୁବନ୍ ଆତାର୍। 6 ଆରେ ପାଉଲ ହେୱାର୍ ଜପି କେଇ ଇଡ଼୍ଜି ପାର୍ତାନା କିତାନ୍। ଲାଗିଙ୍ଗ୍ ହେୱାର୍ ଜପି ପବିତ୍ର ଆତ୍ମା ୱାତାତ୍। ଆରେ ହେୱାର୍ ବାରବିନି ବାଷାତାଙ୍ଗ୍ ବେଣ୍ କିତାର୍ ଆରେ ଈଶ୍ୱର କାତା ପା ୱେଚ୍ଚେଙ୍ଗ୍ ଲାଗାତାର୍। 7 ହେୱାର୍ ପାକାପାକି ବାରଜାଣ୍ ଆଣ୍ଡ୍ରାଙ୍ଗ୍ ମାଚାର୍। 8 ପାଚେ ପାଉଲ ପାକାପାକି ତିନ୍ମାସ୍ ପାତେକ୍ ପାର୍ତାନା ଇଞ୍ଜ ହାଲ୍ଜି ମାଚାନ୍। ହେୱାର୍ ଇନେସ୍ ଈଶ୍ୱର ସାସନ୍ କିନି ରାଜି ବିଷୟରେ ପାର୍ତିକିନାର୍ ହେଦାଙ୍ଗ୍ କାଜିଙ୍ଗ୍ ହେୱାର୍ ହୁଦାଙ୍ଗ୍ ଆଲ୍ଚାନା କିଜି ମାଚାନ୍। 9 ମାତର୍ ହେବେ ମାନି କେତ୍ଜାଣ୍ ମାନାୟ୍ ଅମାନ୍ୟା ଆଜି ପାର୍ତି କିୱାତାର୍। ଆରେ ହେୱାର୍ ୱିଜାକାର୍ ମୁମ୍ଦ ଯୀଶୁତାକେ ପାର୍ତିକିନି ବିଷୟରେ ନିନ୍ଦା କିଦେଙ୍ଗ୍ ଲାଗାତାର୍। ଲାଗିଙ୍ଗ୍ ପାଉଲ ହେୱାର୍ ହୁଦାଙ୍ଗ୍ ଅଲ୍ଗା ଆତାନ୍। ଆରେ ହେୱାନ୍ ପାର୍ତିକିନି ଚେଲାହିରିଙ୍ଗ୍ ଅଜି ତୁରାନ ତର୍ଦି ସ୍କୁଲ୍ତାକେ ହିକ୍ଷାହିଜି ମାଚାନ୍। 10 ଦୁଇ ବାର୍ହୁ ପାତେକ୍ ହେୱାନ୍ ହେ ସ୍କୁଲ୍ତାକେ ହିକ୍ଷା ହିତାନ୍। ଲାଗିଙ୍ଗ୍ ଏସିଆ ଜିଲ୍ଲାନି କେତେକ୍ ଯିହୁଦି ଆରେ ବିନ୍ଜାତିନି ମାନାୟାର୍ ମାପୃ କାତା ୱେଚାର୍। ସ୍କେବାର ମେହିର୍ ବୁତ୍ଆତ୍ମାତିଙ୍ଗ୍ ପିହିକିଦେଙ୍ଗ୍ ଉପାୟ୍ କିନି କାତା 11 ଈଶ୍ୱର ପାଉଲତିଙ୍ଗ୍ ବେସି ଚାନିଆଆନି କାମାୟ୍ କିଦେଙ୍ଗ୍ ସାକ୍ତି ହିଜିମାଚାନ୍। 12 ପାଉଲ ଇଲେକେ ସାକ୍ତି ପାୟାଆଜି ମାଚାନ୍ ଯେ, ହେୱାନ୍ ବାଉରା ଆତି ରୁମାଲ୍ କି ତା ତୁୱାଲ୍ ମାନାୟାର୍ ରଗି ଲାଗାୟ୍ ଅତିସ୍, ରଗ୍ଦାକାର୍ ହାର୍ ଆଜି ମାଚାର୍। ଆରେ ବୁତ୍ ଡୁୟାଆତି ମାନାୟାର୍ତାଙ୍ଗ୍ ବୁତ୍ଆତ୍ମା ହସିହାଲ୍ଜି ମାଚିକ୍। 13 କେତେକ୍ ବୁତ୍ଆତ୍ମା ପିହିକିନି ଯିହୁଦି ମାନାୟାର୍ ଯୀଶୁ ତର୍ଦାଙ୍ଗ୍ ମାନାୟାର୍ତାଙ୍ଗ୍ ବୁତ୍ଆତ୍ମା ପିହିକିଦେଙ୍ଗ୍ ଉପାୟ୍ କିଜି ମାଚାର୍। ହେୱାର୍ ଇଲେକେ ୱେଚ୍ଚି ମାଚାର୍, “ପାଉଲ ଶୁଣାୟ୍ କିନି ଯୀଶୁ ତର୍ଦାଙ୍ଗ୍ ଆନେଙ୍ଗ୍ ୱେଚ୍ଚାନାଙ୍ଗା ଏନେଙ୍ଗ୍ ହସିହାଲା।” 14 ସ୍କେବା ତର୍ଦାକାନ୍ ତା ସାତ୍ଜାଣ୍ ମେହିର୍ ଇଲେକେକିଜି ମାଚାର୍। ହେୱାନ୍ ରକାନ୍ ଯିହୁଦି ଈଶ୍ୱର ହେବାକିନି ପ୍ରଦାନ୍ ମୁଡ଼୍ଦି ପୁଜାରି ମାଚାନ୍। 15 ଦିନେକ୍ ହେୱାର୍ ବୁତ୍ଆତ୍ମା ପିହିକିନିହିଙ୍ଗ୍ ହେ ବୁତ୍ଆତ୍ମା ହେୱାରିଙ୍ଗ୍ ୱେଚ୍ଚିକ୍, “ଆପେଙ୍ଗ୍ ଯୀଶୁଙ୍ଗ୍ ପୁନାପ୍ ଆରେ ପାଉଲତିଙ୍ଗ୍ ଚିନ୍ କିତାପ୍ନା, ମାତର୍ ଏପେଙ୍ଗ୍ ଇମ୍ଣା କାଦେର୍?” 16 ତାପାଚେ ହେ ବୁତ୍ଆତ୍ମା ଡୁୟାଆତି ମାନାୟ୍ ହେୱାର୍ ଜପି ଗୁମ୍ତାନ୍, ଆରେ ହେୱାରିଙ୍ଗ୍ ହେନ୍ଦ୍ରା କେଚ୍ପି ଚିତ୍ରା କାବ୍ରା କିଜି ଟ୍ରାକ୍ତାତ୍। ଲାଗିଙ୍ଗ୍ ହେୱାର୍ ଇଞ୍ଜାଙ୍ଗ୍ ହସି ବାର୍ତ ହନ୍ଚିହାଚାର୍। 17 ଏପିସ ସହର୍ତାକେ ମାନି ଯିହୁଦି ଆରେ ବିନ୍ଜାତିନି ମାନାୟାର୍ ଇବେଣ୍ ୱେଚାର୍। ଲାଗିଙ୍ଗ୍ ହେୱାର୍ ପାଣ୍ଡ୍ରା ଆତାର୍, ଆରେ ମାପୃ ଯୀଶୁ ତର୍ଦିଙ୍ଗ୍ ଜୟ୍-ଜୟ୍ କିତାର୍। 18 ହେପାଦ୍ନା ଇମ୍ଣାକାର୍ ପାର୍ତି କିଜି ମାଚାର୍ ହେୱାର୍ ବିତ୍ରେତାଙ୍ଗ୍ ବେସିହେନି ୱାଜି, ଜାର୍-ଜାର୍ କିତି ପାପ୍ କାମାୟ୍ତିଙ୍ଗ୍ ୱିଜାକାର୍ ଆଗେ ୱେଚ୍ଚାର୍। 19 ଆରେ ଗୁଣିଆ କାମାୟ୍ କିନାକାର୍ ବିତ୍ରେତାଙ୍ଗ୍ ବେସିହେନି ମାନାୟାର୍ ଜାର୍-ଜାର୍ ଗୁଣିଆ କାମାୟ୍ କିନି ବହିତିଙ୍ଗ୍ ତାହିୱାଜି ୱିଜାକାର୍ ମୁମ୍ଦ କାଡିକିତାର୍। ତାପାଚେ ହେୱାର୍ ହେଦାଙ୍ଗ୍ ପଚାସ୍ ହାଜାର୍ ରୁପା ଡାବୁଙ୍ଗ୍ ଇଞ୍ଜି ଇସାବ୍ କିତାର୍। 20 ଇଲେକେ ମାପୃ କାତା ୱିଜୁ ନିପଣ୍ ବିଚାଆତାତ୍, ଆରେ ତା ବିଷୟରେ ୱେନ୍ଞ୍ଜି ପାର୍ତି କିଦେଙ୍ଗ୍ ଲାଗାତାର୍। ଏପିସ ସହର୍ତାକେ ପୁତ୍ଡ଼ା ରହ୍ନାକାର୍ ପାଉଲ ହୁଦାଙ୍ଗ୍ ଗଣ୍ଡ୍ଗଲ୍ ଆତାର୍ 21 ଇୱିଜୁ ବିଷୟ ଗଟାଆତି ପାଚେ ପାଉଲ ମାକଦନିଆ ଆରେ ଆକାୟା ଜିଲ୍ଲାତାକେ ମାନି ପାର୍ତି କିନାକାରିଙ୍ଗ୍ ମେହାଆଜି ଯିରୁଶାଲାମ ସହର୍ତାକେ ହାଞ୍ଜେଙ୍ଗ୍ ପବିତ୍ର ଆତ୍ମା ପାଉଲତିଙ୍ଗ୍ ୱେଚ୍ଚାନ୍। ହେୱାନ୍ ୱେଚ୍ଚାନ୍, ଆନେଙ୍ଗ୍ ହେବେ ହାଚି ପାଚେ ରୋମ ଦେସ୍ତାକେ ପା ହାନାଙ୍ଗ୍। 22 ହେୱାନ୍ ହାଲ୍ୱି ଆଗେ ତା ହୁଦାଙ୍ଗ୍ ମାନି ରିକାର୍ ତିମତି ଆରେ ଏରାଷ୍ଟତିଙ୍ଗ୍ ମାକଦନିଆ ଜିଲ୍ଲାତାକେ ପକ୍ତାନ୍, ଆରେ ହେୱାନ୍ ଏସିଆ ଜିଲ୍ଲାନି ଏପିସ ସହର୍ତାକେ ନେ କେତେକ୍ ଦିନ୍ ମାନ୍ଗାତାନ୍। 23 ହେପାଦ୍ନା ଯୀଶୁତାକେ ପାର୍ତି କିଜିମାଚି ମାନାୟାରିଙ୍ଗ୍ ବେସି ଗାଜା ଦୁକ୍ ଗିଟାଆଦେଙ୍ଗ୍ ଲାଗାତାତ୍। 24 ଦିମିତ୍ରିୟ ତର୍ଦାକାନ୍ ରକାନ୍ ହନେରି ମାଚାନ୍। ହେୱାନ୍ ଆର୍ତ୍ତେମି ଦେବିନି ହିରୁ-ହିରୁ ରୁପାନି ମନ୍ଦିର୍ ରସ୍ତି ମାଚାନ୍, ଆରେ ଇ କାମାୟ୍ କାଜିଙ୍ଗ୍ ମିସ୍ତୁରିର୍ ବେସି ଡାବୁଙ୍ଗ୍ ଲାବ୍ କିଜି ମାଚାର୍। 25 ହେ ହନେରି ମିସ୍ତୁରିରିଙ୍ଗ୍ ଆରେ ତା ଲେକେ ହନା ବେପାର୍ କିନାକାରିଙ୍ଗ୍ ରବେକିଜି ୱେଚ୍ଚାନ୍, “ଆଜ୍ଞା କାଦେର୍, ଇ ବେପାର୍ କିଜି ବେସି ଡାବୁଙ୍ଗ୍ ଲାବ୍ ଆଦ୍ନିକା ଇଞ୍ଜି ଏପେଙ୍ଗ୍ ପୁଚାଦେର୍ନା। 26 ମାତର୍ ଏପେଙ୍ଗ୍ ହୁଡ଼୍ତାଦେର୍ନା ଆରେ ୱେଚାଦେର୍ନା, ପାଉଲ ଏପିସ ସହର୍ ଆରେ ଏସିଆ ଜିଲ୍ଲାନି ୱିଜୁ ସହର୍ନି ମାନାୟାରିଙ୍ଗ୍ କେଇଦାଙ୍ଗ୍ ରସ୍ତି ପୁତ୍ଡ଼ାଙ୍ଗ୍ ଈଶ୍ୱର ଆକାୟ୍ ଇଞ୍ଜି ୱେଚ୍ଚି ବୁଲ୍କାଇ କିନାନା। 27 ଇ କାତା ୱେନ୍ଞ୍ଜି ମାନାୟାର୍ ମା ବେପାର୍ ବାଟ୍ତିଙ୍ଗ୍ ବିରଦ୍ କିଦ୍ନାର୍। ଆରେ ଏସିଆ ଜିଲ୍ଲା ଆରେ ପୁର୍ତିନି ୱିଜୁ ନିପ୍ଣି ମାନାୟାର୍ ଆର୍ତ୍ତେମି ମନ୍ଦିର୍ତାକେ ହାଲ୍ଜି ପୁଜା କିନାକା କିଚି ମୁଲ୍ଯ ଆକାୟ୍ ଇଞ୍ଜି ବାବିକିନାର୍। ଆରେ ମାନାୟାର୍ ଗାଜା ଦେବି ଇଞ୍ଜି ମାନ୍କିଉର୍।” 28 ଇ କାତା ୱେନ୍ଞ୍ଜି ହେ ରୁଣ୍ଡାଆତି ମାନାୟାର୍ ରିସାଆଜି ଗାଜାକାଟ୍ କିଜି ୱେଚ୍ଚାର୍, “ମା ଏପିସିୟ ସହର୍ନି ଆର୍ତ୍ତେମି ଦେବି ନେ ଗାଜା।” 29 ଇ ମାନାୟାର୍ ରାଟୁ ଆନାକା ୱେନ୍ଞ୍ଜି ସହର୍ନି ମାନାୟାର୍ ହେୱାର୍ ଲାଗାୟ୍ ହାଚାର୍, ତାପାଚେ ସହର୍ନି ୱିଜୁ ନିପଣ୍ ରାଟୁଆଜି ଗଉଲି ଆତାର୍। ଆରେ ମାନାୟାର୍ ମାକଦନିଆ ଜିଲ୍ଲାନି ଗାୟ ଆରେ ଆରିସ୍ତାର୍ଖ ତର୍ଦି ଇ ରିକାରିଙ୍ଗ୍ ଆସ୍ତି ସହର୍ନି ମିଟିଙ୍ଗ୍ ବାହାତାକେ ବେଗି-ବେଗି ହାଚାର୍। ଇ ରିକାର୍ ପାଉଲ ହାଙ୍ଗ୍ଦାକାର୍ ମାଚାର୍। 30 ଲାଗିଙ୍ଗ୍ ପାଉଲ ହେ ମିଟିଙ୍ଗ୍ ବାହାତାକେ ହାଲ୍ଜି ମାନାୟାର୍ ହୁଦାଙ୍ଗ୍ ବେଣ୍କିଦେଙ୍ଗ୍ ଇଚା କିତାନ୍। ମାତର୍ ପାର୍ତିକିନି ଚେଲାହିର୍ ହେୱାନିଙ୍ଗ୍ ହାଞ୍ଜେଙ୍ଗ୍ ହିୱାତାର୍। 31 ହେ ଜିଲ୍ଲାତାକେ ମାନି ଅପିସର୍ କେତ୍ଜାଣ୍ ପାଉଲ ସାଙ୍ଗହି ମାଚାର୍, ହେୱାର୍ ପା ପାଉଲତିଙ୍ଗ୍ ହେ ବାହାତାକେ ହାଲ୍ଜି ମାନାୟାର୍ ହୁଦାଙ୍ଗ୍ କାତାବାର୍ତା ଆଦେଙ୍ଗ୍ ହାଲ୍ମା ଇଞ୍ଜି କାବୁର୍ ପକ୍ତାର୍। 32 ହେପାଦ୍ନା ମିଟିଙ୍ଗ୍ ବାହାତାକେ ମାନି ମାନାୟାର୍, କେତେକ୍ ର କାତା ଆରେ କେତେକ୍ ଆରେ ର କାତା ୱେଚ୍ଚି ମାଚାର୍। ହେଦାଙ୍ଗ୍ କାଜିଙ୍ଗ୍ ହେ ମିଟିଙ୍ଗ୍ ଇଞ୍ଜ ମାନି ମାନାୟାର୍ ରାଟୁଆଜି ମାଚାର୍। ଆରେ ହେବେ ଇନା କିଦେଙ୍ଗ୍ ରୁଣ୍ଡା ଆତାର୍ନା ଇଞ୍ଜି କେତେକ୍ ମାନାୟାର୍ ପୁନ୍ୱାଦାଙ୍ଗ୍ ମାଚାର୍। 33 ହେ ରୁଣ୍ଡାଆତି ମାନାୟାର୍ ବିତ୍ରେ ଆଲେକ୍ଜାଣ୍ଡ୍ରିଆ ତର୍ଦାକାନ୍ ଯିହୁଦି ମାନାୟ୍ ମାଚାନ୍। ମାନାୟାର୍ ମୁମ୍ଦ ୱାଜି ଇନେସ୍ କାତା ୱେଚ୍ଚେଙ୍ଗ୍ ଆଡ୍ନାନ୍, ହେଦାଙ୍ଗ୍ କାଜିଙ୍ଗ୍ କେତେକ୍ ମାନାୟ୍ ଆଗେ ନିଲି କିତାର୍। ଆରେ ହେୱାନ୍ ଯିହୁଦି ନିପଣ୍ଡାଙ୍ଗ୍ ଆଜି ଇ ଗଟ୍ନା ବିଷୟରେ ମାନାୟାରିଙ୍ଗ୍ ୱେଚ୍ଚେଙ୍ଗ୍ କି ବୁଜାଇ କିଦେଙ୍ଗ୍ ଇଚାକିଜି, ହେୱାନ୍ କେଇ ଜଲାଇ କିଜି ମାନାୟାରିଙ୍ଗ୍ ଚିମ୍ରା କିତାନ୍। 34 ମାତର୍ ହେୱାନିଙ୍ଗ୍ ମାନାୟାର୍ ଯିହୁଦି ମାନାୟ୍ ଇଞ୍ଜି ପୁଚାର୍। ହେୱାର୍ ପାକାପାକି ଦୁଇ ଗଣ୍ଟା ର କାଟ୍ କିଜି ୱେଚ୍ଚେଙ୍ଗ୍ ଲାଗାତାର୍, ମା ଏପିସିୟ ଆର୍ତ୍ତେମି ଦେବି ନେ ଗାଜା। 35 ତାପାଚେ ସହର୍ନି ମୁକ୍ୟା ମାନାୟାରିଙ୍ଗ୍ ଚିମ୍ରା କିୟିକିଜି ୱେଚ୍ଚାନ୍, “ଏ ଏପିସିୟ ସହର୍ତାକେ ମାନି ମାନାୟାର୍, ଆସେଙ୍ଗ୍ ନେ ଆର୍ତ୍ତେମି ଗାଜା ଦେବିନି ମନ୍ଦିର୍ ଆରେ ବାଦାଡ଼୍ତାଙ୍ଗ୍ ଆର୍ତି ପୁତ୍ଡ଼ାକାଙ୍ଗ୍ ରକ୍ଷା କିନାକାସ୍। ପୁର୍ତିନି ଚାରିବେଣ୍ତି ମାନାୟାର୍ ପୁଚାର୍ନା। 36 ଇ କାତାତିଙ୍ଗ୍ ଇନେର୍ ପା ମିଚ୍ ଇଞ୍ଜି ୱେଚ୍ଚେଙ୍ଗ୍ ଆଡୁର୍। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଚିମ୍ରା ଆଡୁ, ଆରେ ବୁଜାଆୱାଦାଙ୍ଗ୍ ଇନାକାପା କିମାଟ୍। 37 ଏପେଙ୍ଗ୍ ଇ ରିକାରିଙ୍ଗ୍ ଆସ୍ତି ଇବେ ତାୱାଦାଙ୍ଗ୍ ମାଚିସ୍ ଆତାତ୍ମା। ଇନେସ୍କି ହେୱାର୍ ମା ମନ୍ଦିର୍ନି ଜିନିଷ୍ ଚର୍ୱାତାର୍ନା କି ମା ଦେବିନି ବିରଦ୍ତାକେ ନିନ୍ଦା କାତା ଇନାକା ଇନ୍ୱାତାର୍ନା। 38 ହେଦାଙ୍ଗ୍ କାଜିଙ୍ଗ୍ ଦିମିତ୍ରିୟ ଆରେ ତା ହାଙ୍ଗ୍ଦି ମିସ୍ତୁରିର୍ ଯଦି ଇନେର୍ ବିରୁଦ୍ତାକେ ଇନାକା ୱେଚ୍ନାକା ମାନାତ୍, ଲାଗିଙ୍ଗ୍ ବିଚାର୍କିନି ବାହା ମାନାତ୍, ଆରେ ବିଚାର୍ କିନାକାର୍ ପା ମାନାର୍। ହେବେ ହାଲ୍ଜି ଏପେଙ୍ଗ୍ ୱେଚ୍ପା-ୱେଚ୍ପି ଆଡୁ। 39 ମାତର୍ ଇ ବିଷୟତିଙ୍ଗ୍ ପିସ୍ତି ଅଲ୍ଗା ବିଷୟ ମାନାତ୍, ଲାଗିଙ୍ଗ୍ ହେ ବିଷୟ ଇବେ ବିଚାର୍ ଆନାତ୍। 40 ନେଞ୍ଜେଙ୍ଗ୍ ଆତି ଗଣ୍ଡ୍ଗଲ୍ ବିଷୟରେ ଯଦି ରୋମିୟ ସକାର୍ ୱେନ୍ବାଆତ୍ତିସ୍, ଆସେଙ୍ଗ୍ ହେବେନି ବୁଲ୍ତିଙ୍ଗ୍ ଚଚ୍ୱିତିସ୍, ରୋମିୟ ସର୍କାର୍ ମାଙ୍ଗେଙ୍ଗ୍ ବିରଦ୍ କିଦ୍ନାନ୍ ଇଞ୍ଜି ଆନେଙ୍ଗ୍ ପାଣ୍ଡ୍ରାଆନାଙ୍ଗା।” 41 ଇଦାଙ୍ଗ୍ ୱେଚ୍ଚି ହେ ମୁକ୍ଯା ମିଟିଙ୍ଗ୍ତାକେ ମାଚି ୱିଜାକାରିଙ୍ଗ୍ ପକ୍ତାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation