ପକ୍ୟାତାକା 18 - New Testament in Pengo Parja Languageକରନ୍ତିୟ ସହର୍ତାକେ ପାଉଲ ହେବା କାମାୟ୍ କିତାନ୍ 1 ତାପାଚେ ପାଉଲ ଏଥେନ୍ସ୍ ସହର୍ ପିସ୍ତି କରନ୍ତିୟ ସହର୍ତାକେ ହାଚାନ୍। 2 ହେୱାନ୍ ହେ ସହର୍ତାକେ ଆର୍କିଲା ତର୍ଦାକାନିଙ୍ଗ୍ ଗିଟାଆତାନ୍। ହେୱାନ୍ ରକାନ୍ ଯିହୁଦି ମାନାୟ୍ ମାଚାନ୍। ହେୱାନ୍ ପନ୍ତ ଜିଲ୍ଲାତାକେ ଜନମ୍ ଆଜି ମାଚାନ୍। କ୍ଲାଉଦିଅ ମହା ରାଜା ଯିହୁଦି ମାନାୟାରିଙ୍ଗ୍ ରୋମ୍ ଦେସ୍ ପିସ୍ତି ହାଞ୍ଜେଙ୍ଗ୍ ଆଦେସ୍ ହିଜିମାଚାନ୍, ହେଦାଙ୍ଗ୍ କାଜିଙ୍ଗ୍ ଆର୍କିଲା ତା ଡକ୍ରୁହି ପ୍ରିସ୍କିଲା ହୁଦାଙ୍ଗ୍ ଇତାଲିଆ ଦେସ୍ତାଙ୍ଗ୍ ଜାର୍ ବାହାତାକେ ୱାଜିମାଚାର୍। ଲାଗିଙ୍ଗ୍ ପାଉଲ ହେୱାର୍ ହୁଦାଙ୍ଗ୍ ମେହାଆଦେଙ୍ଗ୍ ହାଚାନ୍। 3 ପାଉଲ ଲେକେ ହେୱାର୍ ପା ତମ୍ୱୁ ବେପାର୍ କିଜି ମାଚାର୍। ଲାଗିଙ୍ଗ୍ ହେୱାନ୍ ହେୱାର୍ ହୁଦାଙ୍ଗ୍ ମାନ୍ଞ୍ଜି କାମାୟ୍ କିତାନ୍। 4 ପାଉଲ ୱିଜୁ ଜମ୍ନିଦିନ୍ ପାର୍ତାନା ଇଞ୍ଜ ହାଲ୍ଜି ମାଚାନ୍। ଆରେ ହେୱାନ୍ ଯିହୁଦି ଆରେ ବିନ୍ଜାତିନି ମାନାୟାର୍ ହୁଦାଙ୍ଗ୍ ଆଲ୍ଚାନା କିଜି ଯୀଶୁତାକେ ପାର୍ତିକିନି କାଜିଙ୍ଗ୍ ଉପାୟ୍ କିଜି ମାଚାନ୍। 5 ଶିଲା ଆରେ ତିମତି ମାକଦନିଆ ସହର୍ତାଙ୍ଗ୍ ପାଉଲ ଲାଗାୟ୍ ୱାତାର୍। ଲାଗିଙ୍ଗ୍ ହେୱାନ୍ ତମ୍ୱୁ ରହ୍ନି କାମାୟ୍ କିୱାତାନ୍, ଆରେ ତା ୱିଜୁ ସମୟତିଙ୍ଗ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ସମୟ୍ ହିତାନ୍। ଯୀଶୁ ନେ ଖ୍ରୀଷ୍ଟ ଇଞ୍ଜି ଯିହୁଦି ମାନାୟାରିଙ୍ଗ୍ ହେୱାନ୍ ସାକି ହିଜିମାଚାନ୍। 6 ମାତର୍ ଯିହୁଦି ମାନାୟାର୍ ପାଉଲ କାତା ୱେନ୍ୱାତାର୍, ଆରେ ହେୱାନିଙ୍ଗ୍ ଅପ୍ମାନ୍ କିତାର୍। ଲାଗିଙ୍ଗ୍ ହେୱାନ୍ ତା ଉସ୍ପିତି ହେନ୍ଦ୍ରାତିଙ୍ଗ୍ ଡ଼ାତ୍ତି ହେୱାରିଙ୍ଗ୍ ୱେଚ୍ଚାନ୍, “ନାଦାଙ୍ଗ୍ ଇନାକା ବୁଲ୍ ଆକାୟ୍, ମାତର୍ ଈଶ୍ୱରତାଙ୍ଗ୍ ଦଣ୍ଡ୍ ପାୟା ଆଦେଙ୍ଗ୍ ଏପେଙ୍ଗ୍ ନିଜେ ନେ ଦାଇ। ନଙ୍ଗୟ୍ତାଙ୍ଗ୍ ଆନେଙ୍ଗ୍ ବିନ୍ଜାତିନି ମାନାୟାର୍ତାକେ ହାଲ୍ଜି ଈଶ୍ୱର କାତା ଶୁଣାୟ୍ କିନାଙ୍ଗ୍।” 7 ପାଉଲ ପାର୍ତାନା ଇଲ୍ତିଙ୍ଗ୍ ପିସ୍ତି, ତା ଲାଗାୟ୍ ମାନି ତିତସ ଯୁସ୍ତ ତର୍ଦି ମାନାୟ୍ ଇଞ୍ଜ ହାଲ୍ଜି ଈଶ୍ୱର କାତା ଶୁଣାୟ୍ କିତାନ୍। ହେୱାନ୍ ରକାନ୍ ଈଶ୍ୱରତିଙ୍ଗ୍ ହେବାକିନି ବିନ୍ଜାତିନି ମାନାୟ୍ ମାଚାନ୍। 8 ତାପାଚେ ପାର୍ତାନା ଇଲ୍ନି ମୁକ୍ୟା କ୍ରିଷ୍ପ ଆରେ ତା ପରିବାର୍ନି ମାନାୟାର୍ ମାପୃତାକେ ପାର୍ତି କିତାର୍। ଆରେ ପାଉଲ କାତା କରନ୍ତିୟ ସହର୍ତାକେ ମାନି କେତେକ୍ ମାନାୟ୍ ପାର୍ତି କିତାର୍, ଆରେ ଡୁବନ୍ ଅତାର୍। 9 ରଦିନ୍ ମିକାଲିଙ୍ଗ୍ ମାପୃ ପାଉଲତିଙ୍ଗ୍ କେଚ୍କଣ୍ତାକେ ୱେଚ୍ଚାନ୍, “ପାଣ୍ଡ୍ରାଆମା, ମାତର୍ ଚିମ୍ରା ଆୱାଦାଙ୍ଗ୍ ନା କାତା ୱେଚ୍ଚି ହାଲା, ଇନେସ୍କି ଆପେଙ୍ଗ୍ ନି ହୁଦାଙ୍ଗ୍ ମାନାପ୍। 10 ଇନେର୍ ପା ନିଙ୍ଗେଙ୍ଗ୍ ଟ୍ରାକ୍ଚି ଦୁକ୍ ହିଦୁର୍, ଇନେସ୍କି ଇ ସହର୍ତାକେ ନାଙ୍ଗେଙ୍ଗ୍ ପାର୍ତି କିଦ୍ନି କାଜିଙ୍ଗ୍ ବେସି ମାନାୟ୍ ମାନାର୍।” 11 ଲାଗିଙ୍ଗ୍ ପାଉଲ ହେବେ ଈଶ୍ୱର କାତା ବିଷୟରେ ହିକ୍ଷାହିଜି ବାର୍ହେକ୍ ଚଅ ମାସ୍ ମାନ୍ଗାତାନ୍। 12 ମାତର୍ ଗାଲ୍ଲିୟନ୍ ଆକାୟା ଜିଲ୍ଲାନି ରାଜା ମାନିହିଙ୍ଗ୍ ଯିହୁଦିର୍ ଏକ୍ ଆଜି ପାଉଲତିଙ୍ଗ୍ ଆସ୍ତାର୍। ଆରେ ହେୱାନିଙ୍ଗ୍ ବିଚାର୍କିନି ବାହାତାକେ ଅସାହାଚାର୍। 13 ହେୱାର୍ ୱେଚ୍ଚାର୍, “ଇ ମାନାୟ୍ ମା ନିତି ନିୟମ୍ ସାସ୍ତର୍ତିଙ୍ଗ୍ ବିରଦ୍ କିଜି, ଜେକନି ନିୟମ୍ତାଙ୍ଗ୍ ଈଶ୍ୱରତିଙ୍ଗ୍ ପୁଜାକିନି କାତା ୱେଚ୍ଚାନାନା।” 14 ପାଉଲ ୱେଚ୍ଚେଙ୍ଗ୍ ଇଚା କିନିହିଙ୍ଗ୍ ଗାଲ୍ଲିୟନ୍ ରାଜା ଯିହୁଦିରିଙ୍ଗ୍ ୱେଚ୍ଚାନ୍, “ଏ ଯିହୁଦି ମାନାୟ୍ କାଦେର୍ ୱେନାଟ୍, ଏପେଙ୍ଗ୍ ଯଦି ଗାଜା ବୁଲ୍ କି ଦସ୍ ବିଷୟରେ ୱେଚ୍ଚି ମାନ୍ଚିସ୍, ଆନେଙ୍ଗ୍ ମି କାତାତିଙ୍ଗ୍ ମାନ୍ଦିୟାନ୍ କିଜି ୱେଚାଙ୍ଗ୍ମା। 15 ମାତର୍ ଇଦାଙ୍ଗ୍ ମି ହିକ୍ଷା, ମି ମାନାୟ୍ ଆରେ ମି ନିତି ନିୟମ୍ ସାସ୍ତର୍ତିଙ୍ଗ୍ ମାନା-ମୁନି ଆୱି ବିଷୟନି କାତା। ଲାଗିଙ୍ଗ୍ ହେଦାଙ୍ଗ୍ତିଙ୍ଗ୍ ଏପେଙ୍ଗ୍ ନିଜେ ନେ ବୁଜାଆଡ, ଆନେଙ୍ଗ୍ ଇୱିଜୁ ବିଷୟରେ ବିଚାର୍ କିଦେଙ୍ଗ୍ ଇଚା କିଉଙ୍ଗା।” 16 ଲାଗିଙ୍ଗ୍ ହେୱାରିଙ୍ଗ୍ ବିଚାର୍କିନି ବାହାତାଙ୍ଗ୍ ବାର୍ତ ହପ୍ତେଙ୍ଗ୍ ସେନାହିରିଙ୍ଗ୍ ରାଜା ଆଦେସ୍ ହିତାନ୍। 17 ଲାଗିଙ୍ଗ୍ ହେୱାର୍ ପାର୍ତାନା ଇଲ୍ନି ମୁକ୍ୟା ସୋସ୍ତନା ତର୍ଦି ମାନାୟ୍ତିଙ୍ଗ୍ ଆସ୍ତାର୍, ଆରେ ହେୱାର୍ ବିଚାର୍କିନି ବାହା ମୁମ୍ଦ ନେ ଟ୍ରାକ୍ତାର୍। ମାତର୍ ଗାଲ୍ଲିୟନ୍ ରାଜା ହେ ବିଷୟରେ ମାନ୍ଦିୟାନ୍ କିୱାତାନ୍। ଆନ୍ତିୟକିଆ ସହର୍ତାକେ ପାଉଲ ଲେଉଟା ଆଜି ହାଚାନ୍ 18 ପାଉଲ ହେ ସହର୍ତାକେ କେତେକ୍ ଦିନ୍ ପାତେକ୍ ମାଚାନ୍। ହେବେ ମାନି ଟଣ୍ଡାରିଙ୍ଗ୍ ପିସ୍ତି କେଙ୍କ୍ରେୟା ସହର୍ତାକେ ପ୍ରିସ୍କିଲା ଆରେ ଆର୍କିଲା ହୁଦାଙ୍ଗ୍ ମେହାଆଜି ହାଚାନ୍। ର ମାନତ୍ ଇଡ଼୍ଜି ମାଚିଲେ ପାଉଲ ହେବେ କାପ୍ଡ଼ା କୁରାଇ କିୟାଆତାନ୍। ତାପାଚେ ହେୱାର୍ ସିରିୟା ଜିଲ୍ଲାତାକେ ହାଚାର୍। 19 ପାଚେ ହେୱାର୍ ଏପିସ ସହର୍ତାକେ ୱାତାର୍। ଆରେ ପାଉଲ ଆର୍କିଲା ଆରେ ପ୍ରିସ୍କିଲାଙ୍ଗ୍ ହେ ବାହାତାକେ ପିସ୍ତି ହାଚାନ୍। ତାପାଚେ ହେ ସହର୍ତାକେ ମାନି ପାର୍ତାନା ଇଞ୍ଜ ହାଲ୍ଜି ଯିହୁଦିର୍ ହୁଦାଙ୍ଗ୍ ଯୀଶୁ ବିଷୟରେ ଆଲ୍ଚାନା କିଦେଙ୍ଗ୍ ଲାଗାତାନ୍। 20 ଆରେ ଯିହୁଦିର୍ ପାଉଲତିଙ୍ଗ୍ ହେବେ ମାଞ୍ଜେଙ୍ଗ୍ ଗୁୱାରି କିତାର୍, ମାତର୍ ହେୱାନ୍ ରାଜି ଆୱାତାନ୍। 21 ମାତର୍ ହେୱାନ୍ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱର ଇଚା କିତ୍ତିସ୍ ଆରେରଗ ଆନେଙ୍ଗ୍ ମି ଲାଗାୟ୍ ଲେଉଟା ଆଜି ୱାନାଙ୍ଗ୍।” ତାପାଚେ ହେୱାନ୍ ଏପିସ ସହର୍ତାଙ୍ଗ୍ ଜାଜ୍ତାକେ ଦୁମ୍ଜି ହାଚାନ୍। 22 କାଇସରିଆ ସହର୍ତାକେ ଏକିସ୍ ହେୱାନ୍ ଜାଜ୍ତାଙ୍ଗ୍ ଜୁତାନ୍। ଆରେ ଯିରୁଶାଲାମ ସହର୍ତାକେ ମାନି ମଣ୍ଡ୍ଲିନି ମାନାୟାରିଙ୍ଗ୍ ମେହାଆଜି ଆନ୍ତିୟକିଆ ସହର୍ତାକେ ହାଚାନ୍। 23 ହେ ବାହାତାକେ କେତେକ୍ ସମୟ୍ ମାଚାନ୍, ଆରେ ହେ ବାହାତାଙ୍ଗ୍ ହସିହାଲ୍ଜି ଗାଲାତିୟ ଆରେ ଫ୍ରୁଗିଆ ଜିଲ୍ଲାନି କେତେକ୍ ବାହାତାକେ ହାଚାନ୍। ଆରେ ପାର୍ତିକିନି ଚେଲାହିରିଙ୍ଗ୍ ସାହାସ୍ନି କାତା ୱେଚ୍ଚି, ହେୱାରିଙ୍ଗ୍ ଯୀଶୁତାକେ ପାର୍ତି କିଜି ମାଞ୍ଜେଙ୍ଗ୍ ୱେଚ୍ଚାନ୍। ଆପଲ ଶୁଣାୟ୍ କିନି କାତା 24 ଏପାଦ୍ନା ଆପୋଲ ତର୍ଦାକାନ୍ ରକାନ୍ ଯିହୁଦି ମାନାୟ୍ ଏପିସ ସହର୍ତାକେ ୱାତାନ୍। ହେୱାନ୍ ଆଲେକ୍ଜାଣ୍ଡ୍ରିଆ ସହର୍ନି ମାନାୟ୍ ମାଚାନ୍। ହେୱାନ୍ ରକାନ୍ ହାର୍ଦି ବାଷଣ୍ ହିନାକାନ୍ ମାଚାନ୍, ଆରେ ଦରମ୍ ସାସ୍ତର୍ନି ବିଷୟ ବେସି ପୁନ୍ଞ୍ଜି ମାଚାନ୍। 25 ହେୱାନ୍ ମାପୃ ହାଜିତିଙ୍ଗ୍ ଇନେସ୍ ହାନାର୍ ହେ ବିଷୟରେ ହାର୍ଦାଙ୍ଗ୍ ହିକ୍ଷା ପାୟାଆଜି ମାଚାନ୍। ହେଦାଙ୍ଗ୍ କାଜିଙ୍ଗ୍ ତା ମାନ୍ତ ବେସି ୱାରିଆଜି ଯୀଶୁ ବିଷୟରେ ଟିକ୍ ବାବ୍ରେ ମାନାୟାରିଙ୍ଗ୍ ହିକ୍ଷାହିଜି ମାଚାନ୍। ମାତର୍ ହେୱାନ୍ ଯୋହନ ଡୁବନ୍ହିନି ବିଷୟ ନେ ପୁନ୍ଞ୍ଜି ମାଚାନ୍। 26 ହେୱାନ୍ ପାର୍ତାନା ଇଞ୍ଜ ସାହାସ୍ ହୁଦାଙ୍ଗ୍ ହିକ୍ଷାହିଜି ମାଚାନ୍। ଲାଗିଙ୍ଗ୍ ପ୍ରିସ୍କିଲା ଆରେ ଆର୍କିଲା ତାଞ୍ଜ କୁକ୍ଚି ଅଜି ହେୱାନିଙ୍ଗ୍ ଆରେ ଈଶ୍ୱର ଇନେସ୍ ମାନାୟାରିଙ୍ଗ୍ ଉଦାର୍ କିନାନ୍, ହେ ବିଷୟରେ ହେୱାନିଙ୍ଗ୍ ହାର୍ଦାଙ୍ଗ୍ ବୁଜାଇ କିତାର୍। 27 ଆପଲ ଆକାୟା ଜିଲ୍ଲାତାକେ ହାଞ୍ଜେଙ୍ଗ୍ ଇଚା କିତାନ୍, ଲାଗିଙ୍ଗ୍ ଏପିସ ସହର୍ତାକେ ମାନି ପାର୍ତିକିନି ଚେଲାହିର୍ ରାଜି ଆତାର୍। ଆରେ ହେୱାର୍ ଆପଲତିଙ୍ଗ୍ କୁକାଟ୍ ଇଞ୍ଜି ହେବେ ମାନି ପାର୍ତିକିନି ଟଣ୍ଡାର୍ ଲାଗାୟ୍ ଚିଟି ଲେକିକିତାର୍। ହେୱାନ୍ ହେବେ ଏକିତି ପାଚେ ଈଶ୍ୱର ଦୟାତାଙ୍ଗ୍ ହେବେ ମାନି ପାର୍ତି କିନାକାରିଙ୍ଗ୍ ବେସି ସାଇଜ କିତାନ୍। 28 ହେୱାନ୍ ଯିହୁଦି ମାନାୟାର୍ ଜୁକ୍ତିତିଙ୍ଗ୍ ସାହାସ୍ ହୁଦାଙ୍ଗ୍ କାଟିକିଜି ୱେଚ୍ଚି ମାଚାନ୍। ଆରେ ଦରମ୍ ସାସ୍ତର୍ତାଙ୍ଗ୍ ଯୀଶୁ ନେ ଖ୍ରୀଷ୍ଟ ସତ୍ ଇଞ୍ଜି ଚଚ୍ଚି ମାଚାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation