ପକ୍ୟାତାକା 17 - New Testament in Pengo Parja Languageପାଉଲ ଆରେ ଶିଲା ଥେସଲନିକି ସହର୍ତାକେ ହେବା କାମାୟ୍ କିତାର୍ 1 ପାଉଲ ଆରେ ଶିଲା ଆପିପଲି ଆରେ ଆପଲନିଆ ସହର୍ ନିପଣ୍ ଆଜି ଥେସଲନିକି ସହର୍ତାକେ ୱାତାର୍। ହେବେ ଯିହୁଦିର୍ତି ରଞ୍ଜାଙ୍ଗ୍ ପାର୍ତାନା ଇଲ୍ ମାଚାତ୍। 2 ତା ବିଦିତାଙ୍ଗ୍ ଜମ୍ନିଦିନ୍ତ ପାଉଲ ପାର୍ତାନା ଇଞ୍ଜ ହାଚାନ୍। ଆରେ ତିନ୍ଗଟା ଜମ୍ନିଦିନ୍ ପାତେକ୍ ଦରମ୍ ସାସ୍ତର୍ କାତା ଆସ୍ତି ହେୱାରିଙ୍ଗ୍ ୱେଚ୍ଚାନ୍। 3 ଆରେ ପାଉଲ ହେୱାରିଙ୍ଗ୍ ଖ୍ରୀଷ୍ଟ ଦୁକ୍କଷ୍ଟ ପାୟାଆଜି ହାଃନାକା ଆରେ ହାଃତାକାର୍ତାଙ୍ଗ୍ ଆରେରଗ ଜିବୁନ୍ଆନି ବିଷୟରେ ବୁଜାଇକିଜି ୱେଚ୍ଚାନ୍। ଆରେ ହେୱାନ୍ ଇମ୍ଣି ଯୀଶୁର୍ ବିଷୟରେ ହେୱାରିଙ୍ଗ୍ ଶୁଣାୟ୍ କିଜି ମାଚାନ୍, ହେୱାନ୍ନେ ରକ୍ଷାକିଦ୍ନାକାନ୍ ଇଞ୍ଜି ହେୱାରିଙ୍ଗ୍ ସତ୍ ଇଞ୍ଜି ଚଚ୍ଚାନ୍। 4 ଲାଗିଙ୍ଗ୍ ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ଯିହୁଦି ମାନାୟାର୍ ପାର୍ତି କିଜି ପାଉଲ ଆରେ ଶିଲା ହୁଦାଙ୍ଗ୍ ମେହାଆତାର୍। ଆରେ ଯିହୁଦି ଦରମ୍ତିଙ୍ଗ୍ ମାନିକିନି ବିନ୍ଜାତିନି କେତେକ୍ ମାନାୟାର୍ ଆରେ ଈଶ୍ୱରତିଙ୍ଗ୍ ପାଣ୍ଡ୍ରାଆନି କେତେକ୍ କଗ୍ଲେକ୍ ପାର୍ତି କିଜି ହେୱାର୍ ହୁଦାଙ୍ଗ୍ ମେହାଆତାର୍। 5 ମାତର୍ ଯିହୁଦି ମାନାୟାର୍ ଆକାର୍ ଆଜି ସହର୍ତାଙ୍ଗ୍ କେତେକ୍ କରାପ୍ ମାନାୟାରିଙ୍ଗ୍ ରୁଣ୍ଡାଇ କିତାର୍, ଆରେ ହେୱାର୍ ରବେଆଜି ସହର୍ତାକେ ଗଣ୍ଡ୍ଗଲ୍ କିୟିକିତାର୍। ଆରେ ହେୱାର୍ ଯାସୋନ ଇଲ୍ତିଙ୍ଗ୍ ଡ୍ରିକ୍ଚି ପାଉଲ ଆରେ ଶିଲାଙ୍ଗ୍ ମାନାୟାର୍ ଲାଗାୟ୍ ତାତେଙ୍ଗ୍ ଉପାୟ୍ କିତାର୍। 6 ମାତର୍ ହେୱାର୍ ହେୱାରିଙ୍ଗ୍ ତାଞ୍ଜ ଗାଟା ଆୱାତାର୍। ଲାଗିଙ୍ଗ୍ ହେୱାର୍ ଯାସୋନ ଆରେ କେତେକ୍ ପାର୍ତି କିନାକାରିଙ୍ଗ୍ ସହର୍ନି ସାସନ୍ କିନାକାକାର୍ ଲାଗାୟ୍ ଜେଲ୍ଜି ତାହିୱାତାର୍। ଆରେ ଗାଜାକାଟ୍ କିଜି କୁକ୍ଚି ୱେଚ୍ଚାର୍, “ଇ ମାନାୟାର୍ ୱିଜୁ ବାହାତାକେ ହାଲ୍ଜି ଗଣ୍ଡ୍ଗଲ୍ କିନାରା, ହେୱାର୍ ଇବେ ପା ୱାତାର୍ନା, ହେୱାରିଙ୍ଗ୍ ଯାସୋନ ଇଞ୍ଜ ଇଡ଼୍ତାନ୍ନା। 7 ଇୱାର୍ ମା ମହା ରାଜା ଆଦେସ୍ ବିରଦ୍ତାକେ କାମାୟ୍ କିନାରା, ଆରେ ଯୀଶୁ ତର୍ଦାକାନ୍ ଆରେ ରକାନ୍ ରାଜା ମାନାନ୍ ଇଞ୍ଜି ଇୱାର୍ ୱେଚ୍ନାରା।” 8 ଇ କାତା ୱେନ୍ଞ୍ଜି ସାସନ୍ କିନାକାର୍ ଆରେ ମାନାୟାର୍ ଗଣ୍ଡ୍ଗଲ୍ କିୟିକିତାର୍। 9 ଆରେ ଯାସୋନ ଆରେ ଜେକନି ପାର୍ତି କିନାକାରିଙ୍ଗ୍ ଜାମିନ୍ତାକେ ପିସ୍ତି ହିତାର୍। ବେରିୟା ସହର୍ତାକେ ହେବା କାମାୟ୍ କିତାର୍ 10 ଲାଗିଙ୍ଗ୍ କେତେକ୍ ପାର୍ତିକିନି ଟଣ୍ଡାର୍ ପାଉଲ ଆରେ ଶିଲାଙ୍ଗ୍ ବିଲମ୍ କିୱାଦାଙ୍ଗ୍ ହେ ମିକା ନେ ବେରିୟା ସହର୍ତାକେ ପକ୍ତାର୍। ହେୱାର୍ ହେ ସହର୍ତାକେ ଇକାତାର୍ ଆରେ ଯିହୁଦିର୍ ପାର୍ତାନା ଇଞ୍ଜ ହାଚାର୍। 11 ଥେସଲନିକି ସହର୍ତାକେ ମାନି ଯିହୁଦି ମାନାୟାର୍ ଈଶ୍ୱର କାତା ୱେଞ୍ଜେଙ୍ଗ୍ ଇଚା କିୱାଦାଙ୍ଗ୍ ମାଚାର୍। ମାତର୍ ବେରିୟା ସହର୍ନି ମାନାୟାର୍ ୱେଞ୍ଜେଙ୍ଗ୍ ଇଚାକିଜି ମାଚାର୍। ଲାଗିଙ୍ଗ୍ ଇୱାର୍ତାଙ୍ଗ୍ ୱିଜୁ କାତା ୱେଚାର୍। ଆରେ ହେୱାର୍ ଇୱିଜୁ କାତା ଟିକ୍ କି ବୁଲ୍ ପୁଞ୍ଜେଙ୍ଗ୍ ୱିଜୁଦିନ୍ ଦରମ୍ ସାସ୍ତର୍ ପଡ଼ିକିଜି ମାଚାର୍। 12 ଲାଗିଙ୍ଗ୍ ବେସିହେନି ଯିହୁଦି ମାନାୟାର୍ ଆରେ ଜଣାସୁଣା ଗ୍ରୀକ୍ ଜାତିନି କଗ୍ଲେ ଆରେ ଆଣ୍ଡ୍ରାଙ୍ଗ୍ ପାର୍ତି କିତାର୍। 13 ପାଉଲ ବେରିୟା ସହର୍ତାକେ ପା ଈଶ୍ୱର କାତା ଶୁଣାୟ୍ କିନାନା ଥେସଲନିକି ସହର୍ତାକେ ମାନି ଯିହୁଦିର୍ ପୁନ୍ଞ୍ଜି, ଇ ସହର୍ତାକେ ୱାତାର୍। ଇ ସହର୍ ପା ମାନାୟାରିଙ୍ଗ୍ ଉସ୍କାଇ କିଜି ମାନାୟାରିଙ୍ଗ୍ ଗଣ୍ଡ୍ଗଲ୍ କିୟିକିଦେଙ୍ଗ୍ ଲାଗାତାର୍। 14 ଲାଗିଙ୍ଗ୍ କେତେକ୍ ପାର୍ତିକିନି ଟଣ୍ଡାର୍ ବିଲମ୍ କିୱାଦାଙ୍ଗ୍ ପାଉଲତିଙ୍ଗ୍ ହାମ୍ଦୁର୍ କାଣ୍ଡିତାକେ ପକ୍ତାର୍। ମାତର୍ ଶିଲା ଆରେ ତିମତି ହେ ସହର୍ତାକେ ମାଚାର୍। 15 ପାଉଲତିଙ୍ଗ୍ ଇମ୍ଣାକାର୍ ଇଡ୍ଗେଦେଙ୍ଗ୍ ହାଲ୍ଜି ମାଚାର୍, ହେୱାର୍ ଏଥେନ୍ସ୍ ସହର୍ ପାତେକ୍ ଇଡ୍ଗାତାର୍। ଶିଲା ଆରେ ତିମତି ନା ହୁଦାଙ୍ଗ୍ ମେହାଆଦେଙ୍ଗ୍ ଏଥେନ୍ସ୍ ସହର୍ତାକେ ବେଗି ୱାୟେର୍ ଇଞ୍ଜି, ହେ ଇଡ୍ଗାତାକାର୍ ଲେଉଟା ଆନିହିଙ୍ଗ୍ ପାଉଲ ହେୱାରିଙ୍ଗ୍ ୱେଚ୍ଚାନ୍। ପାଉଲ ଏଥେନ୍ସ୍ ସହର୍ତାକେ ହେବା କାମାୟ୍ କିତାନ୍ 16 ଏଥେନ୍ସ୍ ସହର୍ତାକେ ଶିଲା ଆରେ ତିମତି ୱାନାକା ପାଉଲ କାସି ମାଚାନ୍, ହେପାଦ୍ନା ପାଉଲ ହେ ସହର୍ତାକେ ମୁର୍ତିକାଙ୍ଗ୍ ବାର୍ତି ହୁଡ଼୍ଜି ତା ମାନ୍ ବିତ୍ରେ ବେସିଦୁକ୍ ଆତାତ୍। 17 ଲାଗିଙ୍ଗ୍ ପାଉଲ ପାର୍ତାନା ଇଞ୍ଜ ଯିହୁଦିରିଙ୍ଗ୍ ଆରେ ଯିହୁଦି ଦରମ୍ତିଙ୍ଗ୍ ମାନିକିନି ବିନ୍ଜାତିରିଙ୍ଗ୍ ଆରେ ସହର୍ ଚକ୍ତାକେ ଇମ୍ଣାକାର୍ ତା ହୁଦାଙ୍ଗ୍ ଗିଟାଆଜି ମାଚାର୍, ହେୱାର୍ ହୁଦାଙ୍ଗ୍ ଯୀଶୁ ବିଷୟରେ ଆଲ୍ଚାନା କିଜି ମାଚାନ୍। 18 ପାଉଲ କେତେକ୍ ଏପିକୁରିୟ ଆରେ ସ୍ତଇକ ଦଳ୍ନି ଜ୍ଞାନି ମାଷ୍ଟେରାର୍ ହୁଦାଙ୍ଗ୍ ଆଲ୍ଚାନା କିଦେଙ୍ଗ୍ ଲାଗାତାନ୍, ହେୱାର୍ ବିତ୍ରେତାଙ୍ଗ୍ କେତ୍ଜାଣ୍ ୱେଚ୍ଚାର୍, “ଇୱାନ୍ ବୁଦି ହିଲ୍ୱାକାନ୍ ଇନାକା ୱେଚ୍ଚେଙ୍ଗ୍ ଇଚା କିନାନା?” ଆରେ କେତ୍ଜାଣ୍ ୱେଚ୍ଚାର୍, “ହେୱାନ୍ ରକାନ୍ ପୁନି ପେନ୍ ବିଷୟରେ ଶୁଣାୟ୍ କିନି ମାନାୟ୍ ଲେକେ ଲାଗ୍ଦାନାନା।” ଇନେସ୍କି ପାଉଲ ଯୀଶୁ ଆରେ ଆରେରଗ ଜିବୁନ୍ଆନି ବିଷୟରେ ହାର୍ଦିକାବୁର୍ ଶୁଣାୟ୍ କିଜି ମାଚାନ୍। 19 ପାଚେ ହେ ମାଷ୍ଟେରାର୍ ହେୱାନିଙ୍ଗ୍ ର ବିଚାର୍କିନି ବାହାତାକେ ଅସାହାଚାର୍, ହେ ବାହାତିଙ୍ଗ୍ ଆରୟପାଗ ଇନାର୍। ଆରେ ହେୱାର୍ ହେୱାନିଙ୍ଗ୍ ୱେଚ୍ଚାର୍, “ଏନେଙ୍ଗ୍ ଇମ୍ଣି ପୁନି ହିକ୍ଷା ବିଷୟରେ ୱେଚ୍ନାୟା ହେ ବିଷୟରେ ଆପେଙ୍ଗ୍ ପୁଞ୍ଜେଙ୍ଗ୍ ଆଡ୍ନାପ୍ କି? 20 ଇନେସ୍କି ଏନେଙ୍ଗ୍ କେତେକ୍ ଆପେଙ୍ଗ୍ ପୁନ୍ୱିତି ବିଷୟନି କାତା ମାଙ୍ଗେଙ୍ଗ୍ ୱେଚ୍ଚାତାଇନା, ଲାଗିଙ୍ଗ୍ ହେ ବିଷୟନି ଅର୍ତ ଇନାକା ହେଦାଙ୍ଗ୍ ଆପେଙ୍ଗ୍ ପୁଞ୍ଜେଙ୍ଗ୍ ଇଚା କିନାପା।” 21 ଆଥିନୀୟ୍ ସହର୍ନି ମାନାୟାର୍ ଆରେ ଜେକନି ଦେସ୍ତି ଏଥେନ୍ସ୍ ସହର୍ତାକେ ହାଲ୍ଜି ମାନାକାର୍, ପୁନି-ପୁନି କାତା ୱେଚ୍ଚେଙ୍ଗ୍ ଆରେ ୱେଞ୍ଜେଙ୍ଗ୍ ନେ ହେୱାର୍ ଇଚା ଜିଜି ମାଚାର୍। ପାଉଲ ଆରୟପାଗ ବାହାତାକେ ଶୁଣାୟ୍ କିତାନ୍ 22 ଲାଗିଙ୍ଗ୍ ପାଉଲ ଆରୟପାଗ ବାହାନି ମାଦି ନିଲ୍ଚି ୱେଚ୍ଚାନ୍, “ଏ ଆଥିନୀୟ୍ ସହର୍ତାକେ ମାନି ମାନାୟ୍ କାଦେର୍, ଆନେଙ୍ଗ୍ ହୁଡ଼୍ଦାତାଙ୍ଗ୍ନା ଏପେଙ୍ଗ୍ ପେନ୍ତିଙ୍ଗ୍ ବେସି ମାନି କିନାକାଦେର୍। 23 ଇନେସ୍କି ଆନେଙ୍ଗ୍ ଚାରିବେଣ୍ତାଙ୍ଗ୍ ବୁଲାଆନିହିଙ୍ଗ୍ ଏପେଙ୍ଗ୍ ପୁଜାକିନି ଜିନିଷ୍ତିଙ୍ଗ୍ ହୁଡ଼୍ତାଙ୍ଗ୍ନା। ଆନେଙ୍ଗ୍ ହେଲେକେ ବେଦିତିଙ୍ଗ୍ ପା ହୁଡ଼୍ତାଙ୍ଗ୍, ହେବେ ଲେକାଆଜି ମାଚାତ୍, ‘ପୁନ୍ୱିତି ଈଶ୍ୱର କାଜିଙ୍ଗ୍।’ ଲାଗିଙ୍ଗ୍ ଏପେଙ୍ଗ୍ ପୁନୁୱାଦାଙ୍ଗ୍ ଇମ୍ଣି ଈଶ୍ୱରତିଙ୍ଗ୍ ହେବା କିନାଦେରା ଆନେଙ୍ଗ୍ ହେ ଈଶ୍ୱର ବିଷୟରେ ଶୁଣାୟ୍ କିଦ୍ନାଙ୍ଗା। 24 ଇମ୍ଣି ଈଶ୍ୱର ପୁର୍ତି ଆରେ ହେବେ ମାନି ୱିଜୁ ଜିନିଷ୍ତିଙ୍ଗ୍ ରସ୍ତାନ୍ନା, ହେୱାନ୍ ବାଦାଡ଼୍ ଆରେ ପୁର୍ତିନି ମାପୃ। ଲାଗିଙ୍ଗ୍ ହେୱାନ୍ ମାନାୟ୍ ରସ୍ତି ମନ୍ଦିର୍ତାକେ ବାହା କିଉନ୍। 25 ଆରେ ତାଙ୍ଗେଙ୍ଗ୍ ଇନାକା ଅବାବ୍ ହିଲେତ୍ ଯେ, ହେୱାନ୍ ମାନାୟାର୍ତାଙ୍ଗ୍ ସାଇଜ ପାୟା ଆଦେଙ୍ଗ୍ ଇଚା କିଉନ୍। ଇନେସ୍କି ହେୱାନ୍ ନିଜେ ୱିଜାକାରିଙ୍ଗ୍ ଜିବୁନ୍, ପାରାଣ୍ ଆରେ ୱିଜୁ ବିଷୟ ହିତ୍ତାନ୍ନା। 26 ଆରେ ହେୱାନ୍ ପୁର୍ତିନି ଚାରିବେଣ୍ତାଙ୍ଗ୍ ବାହା କିଦେଙ୍ଗ୍ ର ମାନାୟ୍ତାଙ୍ଗ୍ ବେସି ଜାତିନି ମାନାୟାରିଙ୍ଗ୍ ରସ୍ତାନ୍ନା, ହେୱାର୍ ସମୟ୍ ଆରେ କେତେକ୍ ହାନ୍ଦିପାତେକ୍ ମାନ୍ଗାନାର୍ ହେଦାଙ୍ଗ୍ତିଙ୍ଗ୍ ହେୱାନ୍ ରସ୍ତାନ୍ନା। 27 ଈଶ୍ୱର ମାବେତାଙ୍ଗ୍ ଦେହା ହିଲୁନ୍, ମାତର୍ ଈଶ୍ୱର ଇଲେକେ କିତାନ୍ନା ଯେ, ମାନାୟାର୍ ହେୱାନିଙ୍ଗ୍ ପାୟା ଆଦେଙ୍ଗ୍ ଆହାକିଜି ଟାମ୍ଡା ଆଜି-ଆଜି ଡେକ୍ନାର୍, ଆରେ ତା ବିଷୟ ପୁଞ୍ଜେଙ୍ଗ୍ ଆଡ୍ନାର୍। 28 ଲାଗିଙ୍ଗ୍ ରକାନ୍ ଲେକିକିନାକାନ୍ ଲେକିତାନ୍ନା, ‘ହେୱାନ୍ ମା ହୁଦାଙ୍ଗ୍ ମାନାନ୍, ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ଜିନାପା, ତାଙ୍ଗ୍ନାପା ଆରେ ଇନାକା ଇଚା ହେଦାଙ୍ଗ୍ କିଦେଙ୍ଗ୍ ଆଡ୍ନାପା।’ ହେଦାଙ୍ଗ୍ କାଜିଙ୍ଗ୍ ମି ଜାର୍ ଲକ୍ ଗିତ୍ କୁଡ଼ିଆତାକେ ୱେଚ୍ଚାନ୍ନା, ‘ଆସେଙ୍ଗ୍ ଈଶ୍ୱର ମେହିକାସ୍।’ 29 ହେଦାଙ୍ଗ୍ କାଜିଙ୍ଗ୍ ମାନାୟାର୍ ରସ୍ତି ହନା, ରୁପା କି କାଲ୍ ପୁତ୍ଡ଼ାତିଙ୍ଗ୍ ଈଶ୍ୱର ଇଞ୍ଜି ବାବିକିନି ଦର୍କାର୍ ଆକାୟ୍, ଇନେସ୍କି ଆସେଙ୍ଗ୍ ଈଶ୍ୱର ମେହିକାସ୍। 30 ଆଗେନି ଇ ଅବୁଜାନି କାମାୟ୍ତିଙ୍ଗ୍ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିଦେଙ୍ଗ୍ ଦିୟାନ୍ କିୱାଦାଙ୍ଗ୍ ମାଚାନ୍। ମାତର୍ ନଙ୍ଗୟ୍ ହେୱାନ୍ ୱିଜୁ ମାନାୟାରିଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାଦେଙ୍ଗ୍ ଆଦେସ୍ ହିତାନ୍ନା। 31 ପୁର୍ତିନି ନ୍ୟାୟ୍ତିଙ୍ଗ୍ ବିଚାର୍ କିଦେଙ୍ଗ୍ ହେୱାନ୍ ରକାନିଙ୍ଗ୍ ବାଚି କିତାନ୍ନା, ଆରେ ଦିନ୍ ପା ରସ୍ତାନ୍ନା। ହେୱାନିଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି ୱିଜାକାର୍ତାକେ ସତ୍ ଇଞ୍ଜି ଚଚ୍ଚାନ୍ନା।” 32 ଆରୟପାଗ ବାହାତାକେ କୁଚ୍ଚି ମାଚି ମାନାୟାର୍ ହାଃତାକାର୍ ଆରେରଗ ଜିବୁନ୍ଆନି କାତା ୱେନ୍ଞ୍ଜି, ହେୱାର୍ ବିତ୍ରେତାଙ୍ଗ୍ କେତେକ୍ ମାନାୟାର୍ ଗାଇଜି ଇନସ୍ତା କିତାର୍। ମାତର୍ କେତ୍ଜାଣ୍ ୱେଚ୍ଚାର୍, “ଇ କାତା ନିବେତାଙ୍ଗ୍ ଆରେ ଆଦିକ୍ ୱେଞ୍ଜେଙ୍ଗ୍ ଆପେଙ୍ଗ୍ ଇଚା କିନାପା।” 33 ତାପାଚେ ପାଉଲ ହେ ବାହାତାଙ୍ଗ୍ ହସିହାଚାନ୍। 34 ମାତର୍ କେତେକ୍ ମାନାୟାର୍ ପାଉଲ ପାଚେ ହାଚାର୍, ଆରେ ମାପୃତିଙ୍ଗ୍ ପାର୍ତି କିତାର୍। ଇୱାର୍ ବିତ୍ରେତାଙ୍ଗ୍ ଆରୟପାଗ ବିଚାର୍କିନି ଦିୟନୁସିୟ ତର୍ଦାକାନ୍ ରକାନ୍ ମେମର୍ ମାଚାନ୍, ଆରେ ଦାମାରି ତର୍ଦି ରଞ୍ଜେଲ୍ ଗକ୍ଲେ ଆରେ କେତେକ୍ ମାନାୟ୍ ମାଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation