ପକ୍ୟାତାକା 16 - New Testament in Pengo Parja Languageପାଉଲ ଆରେ ଶିଲା ହୁଦାଙ୍ଗ୍ ତିମତି ହାଚାନ୍ 1 ତାପାଚେ ପାଉଲ ଆରେ ଶିଲା ଦର୍ବି ସହର୍ତାକେ ହାଚାର୍। ପାଚେ ହେୱାର୍ ଲୁସ୍ତ୍ରା ସହର୍ତାକେ ହାଚାର୍। ହେବେ ତିମତି ତର୍ଦାକାନ୍ ରକାନ୍ ପାର୍ତିକିନି ଚେଲାହି ମାଚାନ୍। ତା ତେହି ରଞ୍ଜେଲ୍ ପାର୍ତି କିନାକାଦେଲ୍ ମାଚାତ୍, ହେଦେଲ୍ ଯିହୁଦି ଜାତି ନିକାଦେଲ୍ ମାଚାତ୍। ଲାତ୍ରାହି ରକାନ୍ ବିନ୍ଜାତିନି ମାନାୟ୍ ମାଚାନ୍। 2 ଲୁସ୍ତ୍ରା ସହର୍ ଆରେ ଇକନିୟ ସହର୍ତାକେ ମାନି ପାର୍ତିକିନି ଟଣ୍ଡାର୍ ତିମତି ବିଷୟରେ ହାର୍ ଇଞ୍ଜି ୱେଚ୍ଚି ମାଚାର୍। 3 ପାଉଲ ତିମତିଙ୍ଗ୍ ତା ହୁଦାଙ୍ଗ୍ ଅସାହାଚାନ୍ ଆରେ ସୁନତ କିତାନ୍। ଇନେସ୍କି ହେ ଏରିୟାନି ଯିହୁଦି ଜାତିନି ମାନାୟାର୍ ଲାତ୍ରାହି ରକାନ୍ ବିନ୍ଜାତିନି ମାନାୟ୍ ଇଞ୍ଜି ୱିଜାକାର୍ ପୁନ୍ଞ୍ଜି ମାଚାର୍। 4 ଯିରୁଶାଲାମ ସହର୍ତାକେ ମାନି ବାଚିକିତି ଚେଲାର୍ ଆରେ ପ୍ରାଚିନାର୍ ଇମ୍ଣିୱିଜୁ ବିଦି ମାନାୟାରିଙ୍ଗ୍ ମାନି କିୟେର୍ ଇଞ୍ଜି ଇଚାକିଜି ମାଚାର୍, ହେ ୱିଜୁ ବିଷୟ ପାଉଲ ଆରେ ତା ହାଙ୍ଗ୍ଦାକାର୍ ସହର୍ତାଙ୍ଗ୍ ସହର୍ ହାଲ୍ଜି ପାର୍ତି କିନାକାରିଙ୍ଗ୍ ୱେଚ୍ଚି ମାଚାର୍। 5 ଲାଗିଙ୍ଗ୍ ମଣ୍ଡ୍ଲିନି ମାନାୟାର୍ ପାର୍ତିତାଙ୍ଗ୍ ଗାଜା ଆତାର୍। ଆରେ ୱିଜୁଦିନ୍ ମଣ୍ଡ୍ଲିତାକେ ଜେକନି ମାନାୟାର୍ ମେହାଆଦେଙ୍ଗ୍ ଲାଗାତାର୍। ମାକଦନିଆ ସହର୍ତାକେ ହାଞ୍ଜେଙ୍ଗ୍ ପାଉଲ କେଚ୍କଣ୍ ହୁଡ଼୍ତାନ୍ 6 ପବିତ୍ର ଆତ୍ମା ପାଉଲ ଆରେ ତା ହାଙ୍ଗ୍ଦାକାରିଙ୍ଗ୍ ଏସିଆ ଜିଲ୍ଲାତାକେ ଈଶ୍ୱର କାତା ଶୁଣାୟ୍ କିଦେଙ୍ଗ୍ ମୁନା କିତାତ୍। ଲାଗିଙ୍ଗ୍ ହେୱାର୍ ଫ୍ରୁଗିଆ ଆରେ ଗାଲାତିୟ ଜିଲ୍ଲା ନିପଣ୍ ଆଜି ହାଚାର୍। 7 ହେୱାର୍ ମୁସିଆ ଜିଲ୍ଲାନି ହାନ୍ଦିତାକେ ଇକାତାର୍। ଆରେ ହେୱାର୍ ବେଥୁନିଆ ଜିଲ୍ଲାତାକେ ହାଞ୍ଜେଙ୍ଗ୍ ଉପାୟ୍ କିତାର୍। ମାତର୍ ଯୀଶୁ ଆତ୍ମା ହେୱାରିଙ୍ଗ୍ ହେବେ ହାଞ୍ଜେଙ୍ଗ୍ ମୁନା କିତାତ୍। 8 ଲାଗିଙ୍ଗ୍ ହେୱାର୍ ମୁସିଆ ଜିଲ୍ଲା ନିପଣ୍ ଆଜି ତ୍ରୋୟା ସହର୍ତାକେ ହାଚାର୍। 9 ହେ ମିକାଲିଙ୍ଗ୍ ଈଶ୍ୱର ପାଉଲତିଙ୍ଗ୍ ର କେଚ୍କଣ୍ ହୁଡ଼ିକିତାନ୍। ହେ କେଚ୍କଣ୍ତାକେ ମାକିଦନିଆ ଜିଲ୍ଲାନି ରକାନ୍ ମାନାୟ୍ ହେୱାନିଙ୍ଗ୍ ଗୁୱାରି କିଜି ମାଚାନ୍, “ମାକଦନିଆ ନାସିୱାଜି ମାଙ୍ଗେଙ୍ଗ୍ ସାଇଜକିଦା।” 10 ହେୱାନ୍ ଇ କେଚ୍କଣ୍ ହୁଡ଼୍ତି ପାଚେ ନାଡ଼ିସ୍ ମାକଦନିଆ ଜିଲ୍ଲାତାକେ ଆପେଙ୍ଗ୍ ହାଞ୍ଜେଙ୍ଗ୍ ଉପାୟ୍ କିତାପ୍। ଇନେସ୍କି ହେୱାର୍ ଲାଗାୟ୍ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଈଶ୍ୱରଆତ୍ମା ମାଙ୍ଗେଙ୍ଗ୍ ହିର୍ବାଆତ୍ତାନ୍ନା ଇଞ୍ଜି ଆପେଙ୍ଗ୍ ବୁଜାଆତାପ୍। ଲୁଦିଆ ତର୍ଦି ରଞ୍ଜେଲ୍ କଗ୍ଲେ ଯୀଶୁଙ୍ଗ୍ ପାର୍ତି କିତାତ୍ 11 ଲାଗିଙ୍ଗ୍ ଆପେଙ୍ଗ୍ ତ୍ରୋୟା ସହର୍ତାଙ୍ଗ୍ ସାମଥ୍ରାକି ଦ୍ୱିପ୍ତ ସିଦା ଜାଜ୍ତାକେ ହାଚାପ୍। ଆରେ ତା ଆର୍କାତ୍ ନାଞ୍ଜିଙ୍ଗ୍ ଜାଜ୍ତାକେ ନେ ନିୟାପଲି ସହର୍ତାକେ ହାଚାପ୍। 12 ହେବେତାଙ୍ଗ୍ ଫିଲିପ ସହର୍ତାକେ ହାଚାପ୍। ଇ ସହର୍ ମାକଦନିଆ ଗାଜା ସହର୍ ମାଚାତ୍। ଆରେ ଇବେ ରମିୟ ଦେସ୍ନି ମାନାୟାର୍ ବାହାକିଜି ମାଚାର୍। ଆପେଙ୍ଗ୍ ଇ ସହର୍ତାକେ କେତେକ୍ ଦିନ୍ ମାଚାପ୍। 13 ଜମ୍ନିଦିନ୍ ନାଞ୍ଜିଙ୍ଗ୍ ଆପେଙ୍ଗ୍ ହେ ସହର୍ତାଙ୍ଗ୍ ହସି ନାଗୁଡ଼୍ କାଣ୍ଡିତାକେ ହାଚାପ୍। ହେବେ ପାର୍ତାନା କିନି ବାହା ମାନାତ୍ ଇଞ୍ଜି ଆପେଙ୍ଗ୍ ୱେନ୍ଞ୍ଜି ମାଚାପ୍, ହେବେ କୁଚ୍ଚି ମାନି କଗ୍ଲେକାଙ୍ଗ୍ ହୁଡ଼୍ଜି ଆପେଙ୍ଗ୍ ହେବେ କୁଚ୍ଚି ହେୱେକିୟାକାଙ୍ଗ୍ ଯୀଶୁ ବିଷୟରେ ୱେଚ୍ଚାପ୍। 14 ଲୁଦିଆ ତର୍ଦି ବିନ୍ଜାତିନି କଗ୍ଲେ ମା କାତା ୱେନ୍ଞ୍ଜି ମାଚାତ୍। ହେଦେଲ୍ ଥୁୟତିରା ସହର୍ ନିକାଦେଲ୍ ମାଚାତ୍। ହେଦେଲ୍ ବେସି ଦାମ୍ନି ୱାଙ୍ଗା କଲର୍ନି ହେନ୍ଦ୍ରାଙ୍ଗ୍ ପନାକାଦେଲ୍ ମାଚାତ୍। ହେଦେଲ୍ ଈଶ୍ୱରତିଙ୍ଗ୍ ପୁଜାକିଜି ମାଚାତ୍, ହେଦେଲ୍ ଇନେସ୍ ପାଉଲ ୱେଚ୍ନି କାତାତିଙ୍ଗ୍ ବୁଜା ଆଦେଙ୍ଗ୍ ଆଡ୍ନାତ୍, ହେଦାଙ୍ଗ୍ କାଜିଙ୍ଗ୍ ମାପୃ ହେଦେଲିଙ୍ଗ୍ ବୁଜା ଆଦେଙ୍ଗ୍ ସାଇଜ କିତାନ୍। 15 ତାପାଚେ ହେଦେଲ୍ ଆରେ ତା ପରିବାର୍ ଡୁବନ୍ ଅତାର୍। ପାଚେ ହେଦେଲ୍ ମାଙ୍ଗେଙ୍ଗ୍ ଗୁୱାରି କିଜି ୱେଚ୍ଚାତ୍, “ଏପେଙ୍ଗ୍ ଯଦି ନାଙ୍ଗେଙ୍ଗ୍ ମାପୃ ଲାଗାୟ୍ ପାର୍ତିକିନାପ୍ ଇଞ୍ଜି ବାବିକିନାଦେରା, ଲାଗିଙ୍ଗ୍ ମାଞ୍ଜ ୱାଜି ବାହା କିୟାଟ୍।” ଆରେ ହେଦେଲ୍ ମାଙ୍ଗେଙ୍ଗ୍ ତାଞ୍ଜାଙ୍ଗ୍ ହାଞ୍ଜେଙ୍ଗ୍ ହିଦ୍ୱାତାତ୍। ପାଉଲ ଆରେ ଶିଲାଙ୍ଗ୍ ଜଇଲ୍ ଇଞ୍ଜ ବନ୍ଦିକିତାର୍ 16 ଦିନେକ୍ ଆପେଙ୍ଗ୍ ପାର୍ତାନା କିନି ବାହାତାକେ ମାନିହିଙ୍ଗ୍ ଗୁର୍ମାଇ ଆତ୍ମା ଆହିଆତି ର ଦାସି ମାଙ୍ଗେଙ୍ଗ୍ ଗିଟାଆତ୍ତାତ୍। ହେଦେଲ୍ ବାଗ୍ଯନି କାତା ୱେଚ୍ଚି ମାଲିକାରିଙ୍ଗ୍ ଡାବୁଙ୍ଗ୍ ଆର୍ଜାଆଜି ହିଜିମାଚାତ୍। 17 ହେଦେଲ୍ ପାଉଲ ଆରେ ମା ପାଚେ-ପାଚେ ୱାଜି ଚେରାଆଜି ୱେଚ୍ଚେଙ୍ଗ୍ ଲାଗାତାତ୍, “ଇ ମାନାୟାର୍ ୱିଜୁତାଙ୍ଗ୍ ଶାକ୍ତିକାଟି ଈଶ୍ୱରତିଙ୍ଗ୍ ହେବାକିନି ମାନାୟାର୍, ଇୱାର୍ ମିଙ୍ଗେଙ୍ଗ୍ ଉଦାର୍ ପାୟାଆନି ବିଷୟରେ ଚଚ୍ଚାନାରା।” 18 ହେଦେଲ୍ କେତେକ୍ ଦିନ୍ ୱେଚ୍ଚି ମାଚାତ୍। ଲାଗିଙ୍ଗ୍ ପାଉଲ ବିଜାର୍ ଆଜି ହେ ବୁତ୍ଆତ୍ମାତିଙ୍ଗ୍ ୱେଚ୍ଚାନ୍, “ତାବେତାଙ୍ଗ୍ ହସି ହାଞ୍ଜେଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ଆଦେସ୍ ହିଦ୍ନାଙ୍ଗା।” ଲାଗିଙ୍ଗ୍ ହେ ଆତ୍ମା ହେଦାପ୍ରେ ହେ ଦାସିତାଙ୍ଗ୍ ହସିହାଚାତ୍। 19 ମାତର୍ ତା ମାଲିକାର୍ ଡାବୁଙ୍ଗ୍ ଆର୍ଜା ଆନାକା ଆହା ବନ୍ଦ୍ ଆତାତ୍ ଇଞ୍ଜି ପୁଚାର୍। ହେୱାର୍ ପାଉଲ ଆରେ ଶିଲାଙ୍ଗ୍ ଆସ୍ତି ସାସନ୍ କିନି ମାନାୟାର୍ ଆଗେ ନିଲି କିଦେଙ୍ଗ୍ ହେ ସହର୍ନି ଚକ୍ ବାହାତାକେ ଜେଲ୍ଜି ଅତାର୍। 20 ଆରେ ହେ ଦାସିନି ମାଲିକାର୍ ହେୱାରିଙ୍ଗ୍ ବିଚାର୍ କିନାକାର୍ ଲାଗାୟ୍ ତାହିୱାଜି ୱେଚ୍ଚାର୍, “ଇୱାର୍ ଯିହୁଦି ଜାତିନି ମାନାୟାର୍, ଇୱାର୍ ମା ସହର୍ତାକେ ବିଗ୍ଡ଼ାଇ କିଦ୍ନାରା। 21 ରୋମିୟ ଦେସ୍ନି ମାନାୟାର୍ ଇମ୍ଣିୱିଜୁ ରିତିନିତି ମାନିକିନି ବିଦି ହିଲେତ୍, ହେଦାଙ୍ଗ୍ ଇୱାର୍ ୱେଚ୍ନାରା।” 22 ଲାଗିଙ୍ଗ୍ ମାନାୟାର୍ ପା ପାଉଲ ଆରେ ଶିଲାଙ୍ଗ୍ ବିରଦ୍ କିଦେଙ୍ଗ୍ ଲାଗାତାର୍। ଆରେ ବିଚାର୍ କିନାକାର୍ ହେୱାର୍ ଆଙ୍ଗିଙ୍ଗ୍ ଉନ୍ଦ୍ଜି ହେୱାରିଙ୍ଗ୍ ବେତ୍ ବେଡ୍ଗାତାଙ୍ଗ୍ ଟ୍ରାକ୍ତେଙ୍ଗ୍ ଆଦେସ୍ ହିତାର୍। 23 ହେ ବିଚାର୍ କିନାକାର୍ ହେୱାରିଙ୍ଗ୍ ବେସି ଟ୍ରାକି କିତାର୍। ଆରେ ହେୱାରିଙ୍ଗ୍ ଜଇଲ୍ ଇଞ୍ଜ ବନ୍ଦିକିଜି ହେୱାରିଙ୍ଗ୍ ହାର୍ଦାଙ୍ଗ୍ ଇଡ଼୍ଦେଙ୍ଗ୍ ଜାଗୁୱାଡ଼ିଙ୍ଗ୍ ଆଦେସ୍ ହିତାର୍। 24 ଲାଗିଙ୍ଗ୍ ଜାଗୁୱାଡ଼ି ହେଲେକେ ଆଦେସ୍ ପାୟାଆଜି, ହେୱାନ୍ ହେୱାରିଙ୍ଗ୍ ବିତ୍ରେନି ଜଇଲ୍ ଇଞ୍ଜ ଅଜି ଇଡ଼୍ତାନ୍। ଆରେ ହେୱାରିଙ୍ଗ୍ ପାଟିଆ ଲେକେ ମୁଟ୍ଲାତାଙ୍ଗ୍ ଗାଚ୍ଚି ଇଡ଼୍ତାନ୍। ଜାଗୁୱାଡ଼ି ଆରେ ତା ପରିବାର୍ ଯୀଶୁତାକେ ପାର୍ତି କିତାର୍ 25 ପାକାପାକି ମାଦିମାଦାନାଣା, ପାଉଲ ଆରେ ଶିଲା ଈଶ୍ୱର ଲାଗାୟ୍ ପାର୍ତାନା କିଜି କେର୍କଣ୍ କେର୍ଜି ମାଚାର୍। ଆରେ ହେବେ ବନ୍ଦି ଆତାକାର୍ ୱେନ୍ଞ୍ଜି ମାଚାର୍। 26 ହେପାଦ୍ନା ହେଦାପ୍ରେ ଗାଜା ବୁମିକମ୍ପ୍ ଆତାତ୍। ଆରେ ଜଇଲ୍ ଇଲ୍ ୱିଜୁ ଜଲା ଆଦେଙ୍ଗ୍ ଲାଗାତାତ୍, ଆରେ ହେଦାପ୍ରେ ଜଇଲ୍ନି ୱିଜୁ କାପାଟିଙ୍ଗ୍ ଜେୟା ଆତିକ୍, ଆରେ ୱିଜାକାରିଙ୍ଗ୍ ଗାଚ୍ଚାକା ରିଙ୍ଗ୍ଜି ହାଚିକ୍। 27 ଜାଗୁୱାଡ଼ି ହୁଚ୍କାଣ୍କୁତାଙ୍ଗ୍ ନିଙ୍ଗ୍ଞ୍ଜି ଜଇଲ୍ ଇଲ୍ନି କାପାଟିଙ୍ଗ୍ ଜେୟା ଆତାକା ହୁଡ଼୍ତାନ୍, ବନ୍ଦି ଆତାକାର୍ ହନ୍ଚିହାଚାର୍ ଇଞ୍ଜି ବାବିକିଜି, କାଣ୍ଡା ହପ୍ଚି ହେୱାନ୍ ନିଜେ ହାଃଦେଙ୍ଗ୍ ହାଲ୍ଜି ମାଚାନ୍। 28 ମାତର୍ ପାଉଲ ଗାଜାକାଟ୍ କିଜି କୁକ୍ଚି ୱେଚ୍ଚାନ୍, “ଆପେଙ୍ଗ୍ ୱିଜାକାପ୍ ଇବେ ମାନାପ୍, ଏନେଙ୍ଗ୍ ଜାର୍ତିଙ୍ଗ୍ ଅହି ଆମା।” 29 ଲାଗିଙ୍ଗ୍ ଜାଗୁୱାଡ଼ି ବଇଟା ତାସି ୱାଦେଙ୍ଗ୍ ୱେଚ୍ଚାନ୍, ହେୱାନ୍ ବିତ୍ରେ ବେଗି ହାଚାନ୍ ଆରେ ପାଣ୍ଡ୍ରାଆଜି ତ୍ରିଗ୍ଜି-ତ୍ରିଗ୍ଜି ପାଉଲ ଆରେ ଶିଲା ମୁମ୍ଦ ମେଣ୍ଡାକୁନ୍ଦି କିତାନ୍। 30 ତାପାଚେ ହେୱାରିଙ୍ଗ୍ ବାର୍ତ ତାହିୱାଜି ୱେଚ୍ଚାନ୍, “ଆଜ୍ଞା କାଦେର୍, ରକ୍ଷା ପାୟା ଆଦେଙ୍ଗ୍ ନାଙ୍ଗେଙ୍ଗ୍ ଇନାକା କିନାକା ଆନାତ୍?” 31 ହେୱାର୍ ୱେଚ୍ଚାର୍, “ମାପୃ ଯୀଶୁତାକେ ପାର୍ତି କିୟା। ଲାଗିଙ୍ଗ୍ ଏନେଙ୍ଗ୍ ଆରେ ୱିଜୁ ପରିବାର୍ ରକ୍ଷା ପାୟାଆନାଦେର୍।” 32-34 ଲାଗିଙ୍ଗ୍ ହେ ମିକାଲିଙ୍ଗ୍ ନେ ଜାଗୁୱାଡ଼ି ପାଉଲ ଆରେ ଶିଲାଙ୍ଗ୍ ତାଞ୍ଜ ଅସାହାଚାନ୍। ଆରେ ହେୱାରିଙ୍ଗ୍ ଟ୍ରାକ୍ତି ଗାଉଦାଉ ୱିଜୁ ନୁଜ୍ଦି ହିତାନ୍, ଆରେ ହେୱାରିଙ୍ଗ୍ ଚିଞ୍ଜେଙ୍ଗ୍ ହିତାନ୍। ତାପାଚେ ହେୱାର୍ ଜାଗୁୱାଡ଼ିଙ୍ଗ୍ ଆରେ ତା ପରିବାର୍ ମାନାୟାରିଙ୍ଗ୍ ଈଶ୍ୱର କାତା ୱେଚ୍ଚାର୍। ଲାଗିଙ୍ଗ୍ ହେୱାନ୍ ଆରେ ତା ପରିବାର୍ନି ମାନାୟାର୍ ହେଦାପ୍ରେ ଡୁବନ୍ ଅତାର୍। ତା ପରିବାର୍ ୱିଜାକାର୍ ଈଶ୍ୱରତାକେ ପାର୍ତି କିଜି ବେସି ୱାରିୟା ଆତାର୍। 35 ଅଜଡ଼୍ ଆତିଲେ ବିଚାର୍ କିନାକାର୍ ହେ ରିକାରିଙ୍ଗ୍ ପିସ୍ତି ହିୟାଟ୍ ଇଞ୍ଜି ୱେଚ୍ଚି ସେନାହିରିଙ୍ଗ୍ ପକ୍ତାର୍। 36 ଲାଗିଙ୍ଗ୍ ମିଙ୍ଗେଙ୍ଗ୍ ପିସ୍ତି ହିଦ୍ନି କାଜିଙ୍ଗ୍ ବିଚାର୍ କିନାକାର୍ ମାନାୟାରିଙ୍ଗ୍ ପକ୍ତାତାର୍ନା ଇଞ୍ଜି ଜାଗୁୱାଡ଼ି ପାଉଲତିଙ୍ଗ୍ ୱେଚ୍ଚାନ୍। ଏପେଙ୍ଗ୍ ନଙ୍ଗୟ୍ ବାର୍ତ ୱାଜି ଶାନ୍ତିତାଙ୍ଗ୍ ହାଲାଟ୍। 37 ମାତର୍ ପାଉଲ ହେ ସେନାରିଙ୍ଗ୍ ୱେଚ୍ଚାନ୍, “ଆପେଙ୍ଗ୍ ରୋମ ଦେସ୍ନି ମାନାୟ୍କାପ୍, ଆତିସ୍ପା ମାଙ୍ଗେଙ୍ଗ୍ ବିଚାର୍ କିଦ୍ୱାଦାଙ୍ଗ୍ ହେୱାର୍ ମାନାୟ୍ ମୁମ୍ଦ ଟ୍ରାକ୍ତାର୍ନା ଆରେ ଜଇଲ୍ ଇଞ୍ଜ ବନ୍ଦି କିତ୍ତାର୍ନା। ଆରେ ନଙ୍ଗୟ୍ ଡ଼ୁକ୍ଚି ମାଙ୍ଗେଙ୍ଗ୍ ପିସ୍ତି ହିଦ୍ଦେଙ୍ଗ୍ ଇଚା କିନାରା କି? ହେଦାଙ୍ଗ୍ ଆଉତ୍, ମାତର୍ ହେୱାର୍ ନିଜେ ୱାଜି ମାଙ୍ଗେଙ୍ଗ୍ ବାର୍ତ ହପ୍ତେର୍।” 38 ହେବେତାଙ୍ଗ୍ ସେନାର୍ ବିଚାର୍ କିନାକାରିଙ୍ଗ୍ ଇୱିଜୁ କାତା ହାଲ୍ଜି ୱେଚ୍ଚାର୍। ପାଉଲ ଆରେ ଶିଲା ରୋମ ଦେସ୍ନି ମାନାୟାର୍ ଇଞ୍ଜି ପୁନ୍ଞ୍ଜି ବିଚାର୍ କିନାକାର୍ ପାଣ୍ଡ୍ରା ଆତାର୍। 39 ଆରେ ବିଚାର୍ କିନାକାର୍ ୱାଜି ହେୱାରିଙ୍ଗ୍ କେମା ଏନ୍ତାର୍। ଆରେ ହେୱାରିଙ୍ଗ୍ ବାର୍ତ ହପ୍ଚି ତାହିୱାଜି ହେ ସହର୍ତାଙ୍ଗ୍ ହସି ହାଞ୍ଜେଙ୍ଗ୍ ଗୁୱାରି କିତାର୍। 40 ଲାଗିଙ୍ଗ୍ ପାଉଲ ଆରେ ଶିଲା ଜଇଲ୍ ଇଞ୍ଜାଙ୍ଗ୍ ହସି ୱାଜି ଲୁଦିଆ ଇଞ୍ଜ ହାଚାର୍। ଆରେ ପାର୍ତିକିନି ଟଣ୍ଡାରିଙ୍ଗ୍ ମେହାଆଜି ହେୱାରିଙ୍ଗ୍ ସାହାସ୍ ହିନି କାତା ୱେଚ୍ଚି ହେବେତାଙ୍ଗ୍ ହସିହାଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation