ପକ୍ୟାତାକା 15 - New Testament in Pengo Parja Languageଯିରୁଶାଲାମ୍ ସହର୍ତାକେ ଖ୍ରୀଷ୍ଟାନ୍ ମିଟିଙ୍ଗ୍ ଆତାତ୍ 1 କେତ୍ଜାଣ୍ ପାର୍ତିକିନି ମାନାୟାର୍ ଯିହୁଦା ଜିଲ୍ଲାତାଙ୍ଗ୍ ୱାଜି ଆନ୍ତିୟକିଆ ସହର୍ତାକେ ଟଣ୍ଡାରିଙ୍ଗ୍ ହିକ୍ଷାହିଦେଙ୍ଗ୍ ଲାଗାତାର୍, “ମୋଶା ଲେକିକିତି ସାସ୍ତର୍ନି ବିଦିତାଙ୍ଗ୍ ଏପେଙ୍ଗ୍ ସୁନତ କିୱିତିସ୍, ଏପେଙ୍ଗ୍ ରକ୍ଷା ପାୟା ଆଉଦେର୍।” 2 ଲାଗିଙ୍ଗ୍ ବାଚିକିତି ଚେଲା ପାଉଲ ଆରେ ବର୍ଣ୍ଣବା ହେୱାର୍ ହିକ୍ଷାତାଙ୍ଗ୍ ମେହା ଆୱାତାର୍ ଆରେ ହେୱାର୍ ହୁଦାଙ୍ଗ୍ ଜୁକ୍ତି କିବାଆତାର୍। ଲାଗିଙ୍ଗ୍ ପାର୍ତି କିନାକାର୍ ଆରେ ପ୍ରାଚିନାର୍ ହୁଦାଙ୍ଗ୍ ଇ ବିଷୟରେ ଆଲ୍ଚାନା କିଦେଙ୍ଗ୍, ମଣ୍ଡ୍ଲିନି ମାନାୟାର୍ ପାଉଲ, ବର୍ଣ୍ଣବା ଆରେ କେତେକ୍ ପାର୍ତି କିନାକାରିଙ୍ଗ୍ ଯିରୁଶାଲାମ୍ ସହର୍ତାକେ ପକ୍ତେଙ୍ଗ୍ ବାଚିକିତାର୍। 3 ଲାଗିଙ୍ଗ୍ ମଣ୍ଡ୍ଲିନି ମାନାୟାର୍ ହେୱାରିଙ୍ଗ୍ କେତେକ୍ ଡାବୁଙ୍ଗ୍ କର୍ଚ ହିଜି ପକ୍ତାର୍। ହେୱାର୍ ପୈନିକିଆ ସହର୍ ଆରେ ଶମିରଣିୟ ଜିଲ୍ଲା ନିପଣ୍ ଆଜି ହାନିହିଙ୍ଗ୍ ମଣ୍ଡ୍ଲିକାଙ୍ଗ୍ ବିନ୍ଜାତିନି ମାନାୟାର୍ ଇନେସ୍ ପାର୍ତି କିତାର୍ ହେ ବିଷୟରେ ୱେଚ୍ଚାର୍। ଇ କାତା ୱେନ୍ଞ୍ଜି ହେ ମଣ୍ଡ୍ଲିନି ଟଣ୍ଡାର୍ ୱାରି କିତାର୍। 4 ଏଚେପାଦ୍ନା ପାଉଲ, ବର୍ଣ୍ଣବା ଆରେ ଜେକନି ପାର୍ତି କିନାକାର୍ ଯିରୁଶାଲାମ ସହର୍ତାକେ ଇକାତାର୍, ଯିରୁଶାଲାମ ସହର୍ନି ପାର୍ତିକିନି ମଣ୍ଡ୍ଲିନିକାର୍, ବାଚିକିତି ଚେଲାର୍ ଆରେ ପ୍ରାଚିନାର୍ ହେୱାରିଙ୍ଗ୍ ଆସ୍ତାର୍। ଆରେ ଈଶ୍ୱର ହେୱାର୍ ହୁଦାଙ୍ଗ୍ ମାନ୍ଞ୍ଜି ଇମ୍ଣିୱିଜୁ କାମାୟ୍ କିଜି ମାଚାନ୍, ହେ ୱିଜୁ ୱେଚ୍ଚାର୍। 5 ପାରୁସିଦଳ୍ନି କେତ୍ଜାଣ୍ ପାର୍ତି କିନାକାର୍ ନିଙ୍ଗ୍ଞ୍ଜି ୱେଚ୍ଚାର୍, “ବିନ୍ଜାତିନି ମାନାୟାର୍ ସୁନତ ବିଦି ଆରେ ମୋଶା ଲେକିକିତି ନିୟମ୍ନି ସାସ୍ତର୍ ପା ମାନିକିନି ଦର୍କାର୍।” 6 ଲାଗିଙ୍ଗ୍ ଇ ବିଷୟରେ ଆଲ୍ଚାନା କିଦେଙ୍ଗ୍ ବାଚିକିତି ଚେଲାର୍ ଆରେ ପ୍ରାଚିନାର୍ ରବେ ରୁଣ୍ଡାଆତାର୍। 7 ହେୱାର୍ ବେସି ଆଲ୍ଚାନା କିତି ପାଚେ, ପିତର ନିଙ୍ଗ୍ଞ୍ଜି ହେୱାରିଙ୍ଗ୍ ୱେଚ୍ଚାନ୍, “ଏ ଟଣ୍ଡାର୍କାଦେର୍, ଆନେଙ୍ଗ୍ ଇନେସ୍ ବିନ୍ଜାତିନି ମାନାୟାର୍ତାକେ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଆଡ୍ନାଙ୍ଗ୍, ଆରେ ହେୱାର୍ ୱେନ୍ଞ୍ଜି ପାର୍ତି କିଦେଙ୍ଗ୍ ଆଡ୍ନାର୍, ହେଦାଙ୍ଗ୍ କାଜିଙ୍ଗ୍ କେତେକ୍ ଦିନ୍ ଆଗେ ମି ବିତ୍ରେତାଙ୍ଗ୍ ଈଶ୍ୱର ନାଙ୍ଗେଙ୍ଗ୍ ବାଚି କିତ୍ତାନ୍ନା, ଇ ବିଷୟରେ ଏପେଙ୍ଗ୍ ପୁଚାଦେର୍ନା। 8 ୱିଜୁ ବିଷୟରେ ପୁନି ଈଶ୍ୱର ମାଙ୍ଗେଙ୍ଗ୍ ଇନେସ୍ ପବିତ୍ର ଆତ୍ମା ଦାନ୍ ହିତ୍ତାନ୍ନା, ହେଲେକେ ନେ ବିନ୍ଜାତିରିଙ୍ଗ୍ ପା ଦାନ୍ ହିନାନ୍। ଆରେ ହେୱାନ୍ ହେୱାରିଙ୍ଗ୍ ତା ଜାର୍ ମାନାୟ୍ ଇଞ୍ଜି ୱେଚ୍ଚାନ୍ନା। 9 ହେୱାନ୍ ମାଙ୍ଗେଙ୍ଗ୍ କି ହେୱାରିଙ୍ଗ୍ ଜେକ-ଜେକ ଇଞ୍ଜି ବାବି କିୱାତାନ୍ନା। ହେୱାର୍ ପାର୍ତିକିତି କାଜିଙ୍ଗ୍ ହେୱାନ୍ ହେୱାରିଙ୍ଗ୍ ପାପ୍ କେମା କିତାନ୍ନା। 10 ଲାଗିଙ୍ଗ୍ ଯିହୁଦିର୍ ନିୟମ୍ ଆରେ ବିନ୍ଜାତିନି ପାର୍ତିକିନି ଚେଲାହିରିଙ୍ଗ୍ ବଜ୍ ଇଲେକେ ଇନା କିଦେଙ୍ଗ୍ ଲେଦି କିନାଦେରା? ଇମ୍ଣାକା ମା ଆକଦାଦିର୍ ଆରେ ଆପେଙ୍ଗ୍ ପିଣ୍ଦେଙ୍ଗ୍ ଆଡ୍ୱାତାର୍। ଏପେଙ୍ଗ୍ ଏଲେଙ୍ଗ୍ କିଜି ଈଶ୍ୱରତିଙ୍ଗ୍ ପରିକ୍ଷା କିନାଦେରା। 11 ଲାଗିଙ୍ଗ୍ ଆସେଙ୍ଗ୍ ଏଲେଙ୍ଗ୍ କିନାକା ହାର୍ ଆକାୟ୍। ହେୱାର୍ ଇନେସ୍ ମାପୃ ଯୀଶୁ ଦୟାତାଙ୍ଗ୍ ରକ୍ଷା ପାୟାଆନାପ୍ ଇଞ୍ଜି ପାର୍ତି କିତାର୍, ଆପେଙ୍ଗ୍ ପା ହେଲେକେ ପାୟାଆତାପ୍ନା, ମଶା ଲେକିକିତି ସାସ୍ତର୍ ନିୟମ୍ତିଙ୍ଗ୍ ମାନିକିତିସ୍ ଆସେଙ୍ଗ୍ ରକ୍ଷା ପାୟାଆଉସ୍।” 12 ଲାଗିଙ୍ଗ୍ ମିଟିଙ୍ଗ୍ତାକେ ମାନାକାର୍ ଚିମ୍ରା ଆଜି ମାଚାର୍। ଲାଗିଙ୍ଗ୍ ଈଶ୍ୱର ସାଇଜତାଙ୍ଗ୍ ପାଉଲ ଆରେ ବର୍ଣ୍ଣବା ଇମ୍ଣି ଚିନା ଆରେ ଚାନିଆଆନି କାମାୟ୍ ବିନ୍ଜାତିନି ମାନାୟାର୍ତାକେ କିଜି ମାଚାର୍, ହେ ୱିଜୁ କାତା ହେବେ ମାନି ମାନାୟାର୍ ୱେନ୍ଞ୍ଜି ମାଚାର୍। 13 ହେୱାର୍ କାତା ୱିସ୍ତି ପାଚେ ଯାକୁବ ୱେଚ୍ଚାନ୍, “ଏ ଟଣ୍ଡାର୍କାଦେର୍ ନା କାତା ୱେନାଟ୍। 14 ବିନ୍ଜାତିନି ମାନାୟାର୍ତାଙ୍ଗ୍ ଈଶ୍ୱର ଆଗେ ଦୟାକିଜି କେତେକ୍ ମାନାୟାରିଙ୍ଗ୍ ତା ଜାର୍ ମାନାୟ୍ କିତି ବିଷୟରେ ମାଙ୍ଗେଙ୍ଗ୍ ବୁଜାଇକିଜି ୱେଚ୍ଚାତାନ୍ନା। 15 ଇ କାତା ଆରେ ଭବିଷ୍ଯତବକ୍ତାର୍ ଲେକିକିତି କାତା ପା ହାମାନ୍ ମେହାଆନାତା, 16 ‘ଇଦାଙ୍ଗ୍ ପାଚେ ଆନେଙ୍ଗ୍ ୱାନାଙ୍ଗ୍, ଦାଉଦ ରାଜାନି ରାଜି ନଷ୍ଟ ଆତାତ୍ନା ହେଦାଙ୍ଗ୍ ଆରେରଗ ରହ୍ନାଙ୍ଗ୍। ଆରେ ନଷ୍ଟ ଆଜିମାଚି ବାହାତିଙ୍ଗ୍ ଆନେଙ୍ଗ୍ ଆରେରଗ ରହ୍ନାଙ୍ଗ୍। ଆନେଙ୍ଗ୍ ହେୱାରିଙ୍ଗ୍ ଶାକ୍ତି କିନାଙ୍ଗ୍। 17 ଜେକନିକାର୍ ଆରେ ବିନ୍ଜାତିନି ମାନାୟାର୍ ମାପୃତିଙ୍ଗ୍ ଦାହ୍ନାର୍, ଇନେରିଙ୍ଗ୍ ନା ଜାର୍ ମାନାୟ୍ କିତାଙ୍ଗ୍ନା। ଇ କାତା ଈଶ୍ୱର ୱେଚ୍ନାନ୍। 18 ଈଶ୍ୱର ପୁର୍ତି ଆରମ୍ତାଙ୍ଗ୍ ଇ କାତା ୱେଚ୍ଚାତାନ୍ନା।’ 19 ଆନେଙ୍ଗ୍ ଏଲେଙ୍ଗ୍ ବାବିକିନାଙ୍ଗା, ବିନ୍ଜାତିର୍ ବିତ୍ରେତାଙ୍ଗ୍ ଇମ୍ଣାକାର୍ ଈଶ୍ୱର ଲାଗାୟ୍ ୱାନାରା, ହେୱାରିଙ୍ଗ୍ ଆସେଙ୍ଗ୍ ଯିହୁଦିର୍ ନିୟମ୍ ଆରେ ବିଦି ବଜ୍ ଲେକେ ଲେଦିକିଉସ୍। 20 ତା ବାଦୁଲ୍ରେ ମାନାୟାର୍ ମୁର୍ତିତିଙ୍ଗ୍ ପୁଜାକିତି କାଦିତିଙ୍ଗ୍ ତିନ୍ୱେଦେଙ୍ଗ୍, ଦାରି କାମାୟ୍ କିୱେଦେଙ୍ଗ୍, ହାକ୍ତ ମିନ୍ଞ୍ଜି ଅସ୍ତି ପଶୁ ଜେଇ ତିନ୍ୱେଦେଙ୍ଗ୍ ଆରେ ନେତେର୍ ତିନ୍ୱି ବିଷୟରେ, ଆସେଙ୍ଗ୍ ହେୱାର୍ ଲାଗାୟ୍ ରଞ୍ଜାଙ୍ଗ୍ ଚିଟି ଲେକିକିଜି ୱେଚ୍ଚିସ୍ ଆନାତ୍। 21 ଆଗେପୁର୍ବେ ୱିଜୁ ସହର୍ତାକେ ମୋଶା ଲେକିକିତି ନିୟମ୍ନି ସାସ୍ତର୍ ଶୁଣାୟ୍ କିନାକାର୍ ଇ ବିଷୟରେ ଶୁଣାୟ୍ କିନାରା। ଆରେ ୱିଜୁ ଜମ୍ନିଦିନ୍ତ ପାର୍ତାନା ଇଲ୍କୁ ଲାଗାୟ୍ ତା ସାସ୍ତର୍ ପଡ଼ି କିନାରା।” ବିନ୍ଜାତିର୍ ପାର୍ତି କିନାକାର୍ ଲାଗାୟ୍ ଚିଟି ପକ୍ତାର୍ 22 ଲାଗିଙ୍ଗ୍ ବାଚିକିତି ଚେଲାର୍ ଆରେ ପ୍ରାଚିନାର୍ ମଣ୍ଡ୍ଲିନି ମାନାୟାର୍ ହୁଦାଙ୍ଗ୍ ମେହାଆଜି ହେୱାର୍ ବିତ୍ରେତାଙ୍ଗ୍ କେତେକ୍ ଜାଣ୍ତିଙ୍ଗ୍ ବାଚିକିଜି, ପାଉଲ ଆରେ ବର୍ଣ୍ଣବା ହୁଦାଙ୍ଗ୍ ଆନ୍ତିୟକିଆ ସହର୍ନି ମଣ୍ଡ୍ଲିତାକେ ପକ୍ତେଙ୍ଗ୍ ଇଚାକିତାର୍। ଲାଗିଙ୍ଗ୍ ହେୱାର୍ ବର୍ଶବା ଆରେ ଶିଲା ତର୍ଦାକାନିଙ୍ଗ୍ ବାଚିକିତାର୍। ବର୍ଣ୍ଣବାଙ୍ଗ୍ ଯିହୁଦା ଇଞ୍ଜି ପା କୁକ୍ଚି ମାଚାର୍। ଆରେ ଇ ରିକାର୍ ପାର୍ତି କିନାକାର୍ ବିତ୍ରେ ବେସି ସନ୍ମାନ୍ ପାୟାଆଜି ମାଚାର୍। 23 ହେୱାର୍ କେଇଦ ଇଦାଙ୍ଗ୍ ଲେକିକିଜି ପକ୍ତାର୍, ଆନ୍ତିୟକିଆ ସହର୍ ସିରିୟା ସହର୍ ଆରେ କିଲିକିୟା ସହର୍ନି ବିନ୍ଜାତିନି ପାର୍ତିକିନି ଟଣ୍ଡାର୍ ବାଚିକିତି ଚେଲାର୍ ଆରେ ପ୍ରାଚିନାର୍ ଜୁୱାର୍ କିନାରା। 24 ଆପେଙ୍ଗ୍ ୱେଚାପ୍ନା, ମା ଆଦେସ୍ ହିୱାଦାଙ୍ଗ୍ ମା ବିତ୍ରେତାଙ୍ଗ୍ କେତେକ୍ ମାନାୟ୍ ମି ଲାଗାୟ୍ ୱାତାର୍, ଆରେ ହେୱାର୍ କେତେକ୍ କାତା ୱେଚ୍ଚି ମି ମାନ୍ତିଙ୍ଗ୍ ବୁଲ୍କାଇ କିଜି ଚାନିଆ କିୟିକିତ୍ତାର୍। 25 ଲାଗିଙ୍ଗ୍ ମା ଲାଡ୍ନି ପାଉଲ ଆରେ ବର୍ଣ୍ଣବା ତା ଜିବୁନ୍ତିଙ୍ଗ୍ ଆହା କିୱାଦାଙ୍ଗ୍ ମାପୃ ଯୀଶୁ ଖ୍ରୀଷ୍ଟ ବିଷୟରେ ଶୁଣାୟ୍ କିତାର୍ନା, 26 ଇୱାର୍ ହୁଦାଙ୍ଗ୍ ଆପେଙ୍ଗ୍ ୱିଜାକାପ୍ ର ମାନ୍ଆଜି କେତେକ୍ ମାନାୟାରିଙ୍ଗ୍ ବାଚିକିଜି ପକ୍ତେଙ୍ଗ୍ ଇଚା କିତାପ୍। 27 ଲାଗିଙ୍ଗ୍ ଆପେଙ୍ଗ୍ ଯିହୁଦା ଆରେ ଶିଲାଙ୍ଗ୍ ପକ୍ତାତାପ୍, ଇୱାର୍ ପା ମିଙ୍ଗେଙ୍ଗ୍ ହେ ୱିଜୁ କାତା ୱେଚ୍ଚାନାର୍। 28 ମାନାୟାର୍ ମୁର୍ତିତିଙ୍ଗ୍ ପୁଜାକିତି କାଦିତିଙ୍ଗ୍ ତିନ୍ୱେଦେଙ୍ଗ୍, ଦାରି କାମାୟ୍ କିୱେଦେଙ୍ଗ୍, ହାକ୍ତ ମିନ୍ଞ୍ଜି ଅସ୍ତି ପଶୁ ଜେଇ ତିନ୍ୱେଦେଙ୍ଗ୍ ଆରେ ନେତେର୍ ତିନ୍ୱି ବିଷୟତିଙ୍ଗ୍ ମାନି କିୟାଟ୍। ଏପେଙ୍ଗ୍ ଇ ବିଷୟତିଙ୍ଗ୍ ନେ ମାନି କିଦେଙ୍ଗ୍ ପବିତ୍ର ଆତ୍ମା ଆରେ ଆପେଙ୍ଗ୍ ଇଚା କିନାପା। 29 ଯଦି ଏପେଙ୍ଗ୍ ଇୱିଜୁ ହାର୍ଦାଙ୍ଗ୍ ମାନିକିତିସ୍, ମି କାଜିଙ୍ଗ୍ ହାର୍ ଆନାତ୍। ଏପେଙ୍ଗ୍ ହାର୍ଦାଙ୍ଗ୍ ମାନାଟ୍। 30 ପାଉଲ ଆରେ ବର୍ଣ୍ଣବା ତା ହାଙ୍ଗ୍ଦାକାର୍ ଯିରୁଶାଲାମ ସହର୍ତାଙ୍ଗ୍ ଆନ୍ତିୟକିଆ ସହର୍ତାକେ ୱାତାର୍। ଆରେ ହେ ସହର୍ନି ପାର୍ତି କିନାକାର୍ ରବେ କୁକ୍ଚି ହେୱାରିଙ୍ଗ୍ ଚିଟି ହିତାର୍। 31 ହେ ପାର୍ତି କିନାକାର୍ ସାହାସ୍ ପାୟାଆନି କାତା ଚିଟିତାକେ ପଡ଼ିକିଜି ୱାରିଆ ଆତାର୍। 32 ଯିହୁଦା ଆରେ ଶିଲା ପା ରିକାର୍ ଭବିଷ୍ଯତବକ୍ତା ମାଚାର୍। ଲାଗିଙ୍ଗ୍ ହେୱାର୍ ପାର୍ତିକିନି ଟଣ୍ଡାରିଙ୍ଗ୍ ସାହାସ୍ନି ବେଣ୍ ୱେଚ୍ଚି, ପାର୍ତି କିନିତାକେ ବାଡ଼୍କାସ୍ କିତାର୍। 33 ହେୱାର୍ ହେବେ କେତେକ୍ ଦିନ୍ ମାଚାର୍। ପାଚେ ଇମ୍ଣାକାର୍ ଇୱାରିଙ୍ଗ୍ ପକ୍ଚି ମାଚାର୍, ପାର୍ତିକିନି ଟଣ୍ଡାର୍ ହେୱାରିଙ୍ଗ୍ ଆଶ୍ରିବାଦ୍ କିଜି ହେୱାର୍ ଲାଗାୟ୍ ଶାନ୍ତିତାଙ୍ଗ୍ ପକ୍ତାର୍। 34 ମାତର୍ ଶିଲା ଆନ୍ତିୟକିଆ ସହର୍ତାକେ ମାଞ୍ଜେଙ୍ଗ୍ ଇଚା କିତାନ୍। ଲାଗିଙ୍ଗ୍ ଯିହୁଦାନେ ରକାନ୍ ଯିରୁଶାଲାମ୍ ସହରତାକେ ଲେଉଟା ଆଜି ହାଚାନ୍। 35 ପାଉଲ ଆରେ ବର୍ଣ୍ଣବା ଆନ୍ତିୟକିଆ ସହର୍ତାକେ ମାଚାର୍। ହେୱାର୍ ହୁଦାଙ୍ଗ୍ ଜେକନିକାର୍ ପା ମାନାୟାରିଙ୍ଗ୍ ଯୀଶୁ ମାପୃ ବିଷୟରେ ହିକ୍ଷାହିଜି ମାଚାର୍, ଆରେ ହାର୍ଦିକାବୁର୍ ଶୁଣାୟ୍ କିଜି ମାଚାର୍। ପାଉଲ ଆରେ ବର୍ଣ୍ଣବା ଜେକ ଆତାର୍ 36 କେତ୍ଦିନ୍ ହାଚି ପାଚେ ପାଉଲ ବର୍ଣ୍ଣବାଙ୍ଗ୍ ୱେଚ୍ଚାନ୍, “ୱା, ଆସେଙ୍ଗ୍ ଇମ୍ଣି ସହର୍ତାକେ ମାପୃ ଯୀଶୁ କାତା ଶୁଣାୟ୍ କିଜି ମାଚାସ୍, ହେ ୱିଜୁ ସହର୍କୁକାଙ୍ଗ୍ ନଙ୍ଗୟ୍ ହାନାସ୍। ଆରେ ପାର୍ତିକିନି ଟଣ୍ଡାର୍ ଯୀଶୁତାକେ ଇନେସ୍ ପାର୍ତିକିନାର୍ ହେଦାଙ୍ଗ୍ ହୁଡ଼୍ନାସ୍।” 37 ହେବେ ମାର୍କ ମାଚାନ୍, ଇୱାନିଙ୍ଗ୍ ଯୋହନ ଇଞ୍ଜି ୱେଚ୍ଚି ମାଚାର୍। ଆରେ ବର୍ଣ୍ଣବା ଇ ମାନାୟ୍ତିଙ୍ଗ୍ ହେୱାର୍ତାକେ ଅଦେଙ୍ଗ୍ ଇଚାକିଜି ମାଚାନ୍। 38 ମାତର୍ ପାଉଲ ହେୱାନିଙ୍ଗ୍ ଅଦେଙ୍ଗ୍ ଇଚା କିୱାତାନ୍। ଇନେସ୍କି ମାର୍କ ପାଉଲ ଆରେ ବର୍ଣବାଙ୍ଗ୍ ପପୁଲିଆ ଜିଲ୍ଲାତାକେ ମାନିହିଙ୍ଗ୍ ପିସ୍ତି ହାଲ୍ଜି ମାଚାନ୍। ଆରେ ହେୱାର୍ ହେବା କାମାୟ୍ତାକେ ମେହାଆୱାଦାଙ୍ଗ୍ ମାଚାନ୍। 39 ଇଦାଙ୍ଗ୍ କାଜିଙ୍ଗ୍ ପାଉଲ ଆରେ ବର୍ଣ୍ଣବା ବେସି ଜୁକ୍ତି କିବାଆଜି ହେ ରିକାର୍ ବିନେ ଆତାର୍। ବର୍ଣ୍ଣବା ତା ହୁଦାଙ୍ଗ୍ ମାର୍କଙ୍ଗ୍ ଅଜି ଜାଜ୍ତାକେ କୁପ୍ରିୟ ଦ୍ୱିପ୍ତାକେ ହାଚାର୍। 40 ମାତର୍ ପାଉଲ ଶିଲାଙ୍ଗ୍ ବାଚିକିଜି ଆନ୍ତିୟକିଆ ସହର୍ତାକେ ହାଚାର୍। ହେପାଦ୍ନା ଈଶ୍ୱର ପାଉଲ ଆରେ ଶିଲାଙ୍ଗ୍ ଦୟା କିୟେନ୍ ଇଞ୍ଜି ପାର୍ତିକିନି ଟଣ୍ଡାର୍ ପାର୍ତାନା କିତାର୍। 41 ହେୱାର୍ ସିରିୟା ଜିଲ୍ଲା ଆରେ କିଲିକିୟା ଜିଲ୍ଲା ନିପଣ୍ ଆଜି ହାଚାର୍। ହେପାଦ୍ନା ପାଉଲ ମଣ୍ଡ୍ଲିନି ମାନାୟାରିଙ୍ଗ୍ କେତେକ୍ କାତା ୱେଚ୍ଚି ପାର୍ତିତାକେ ମାଞ୍ଜେଙ୍ଗ୍ ସାହାସ୍ ହିଜିମାଚାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation