ପକ୍ୟାତାକା 14 - New Testament in Pengo Parja Languageଇକନିୟ ସହର୍ତାକେ ପାଉଲ ଆରେ ବର୍ଣ୍ଣବା ଈଶ୍ୱର କାମାୟ୍ କିତାର୍ 1 ଇକନିୟ ସହର୍ତାକେ ପା ହେଲେକେ ଗଟାଆତାତ୍, ପାଉଲ ଆରେ ବର୍ଣ୍ଣବା ଯିହୁଦିର୍ ପାର୍ତାନା ଇଞ୍ଜ ହଣ୍ଜି ଯୀଶୁ ବିଷୟରେ ହିକ୍ଷା ହିତାର୍, ଯିହୁଦିର୍ ଆରେ ବିନ୍ଜାତିନି ମାନାୟାର୍ ବିତ୍ରେତାଙ୍ଗ୍ ବେସିହେନି ଯୀଶୁତାକେ ପାର୍ତି କିତାର୍। 2 ମାତର୍ ଇମ୍ଣି ଯିହୁଦି ମାନାୟାର୍ ପାର୍ତି କିୱାତାର୍, ହେୱାର୍ ବିନ୍ଜାତିନି ମାନାୟାରିଙ୍ଗ୍ ପାର୍ତି କିନାକାର୍ ମାନାୟାର୍ ବିରୁଦ୍ତାକେ ଉସ୍କାଇ କିତାର୍। ଲାଗିଙ୍ଗ୍ ବିନ୍ଜାତିନି ଟଣ୍ଡାରିଙ୍ଗ୍ ରିସାଆତାର୍। 3 ମାତର୍ ପାଉଲ ଆରେ ବର୍ଣ୍ଣବା ହେ ସହର୍ତାକେ କେତେକ୍ ଦିନ୍ ପାତେକ୍ ମାଚାର୍। ମାପୃତିଙ୍ଗ୍ ଆହାକିଜି ସାହାସ୍ତାଙ୍ଗ୍ ଶୁଣାୟ୍ କିତାର୍। ମାପୃ ହେୱାରିଙ୍ଗ୍ ବେସି ଚିନା ଆରେ ଚାନିଆଆନି କାମାୟ୍ କିଦେଙ୍ଗ୍ ସାଇଜ କିତାନ୍। ଆରେ ହେୱାନ୍ ହେୱାର୍ ଶୁଣାଇକିତି କାତା ସତ୍ ଇଞ୍ଜି ମାନାୟାରିଙ୍ଗ୍ ଚଚ୍ଚାନ୍। 4 ମାତର୍ ସହର୍ନି ମାନାୟାର୍ ରିବାଗ୍ ଆତାର୍। ର ବାଗ୍ ପାର୍ତିକିୱି ଯିହୁଦିର୍ ନିପଣ୍ ଆତାର୍, ଆରେ ର ବାଗ୍ ବାଚିକିତି ଚେଲା ପାଉଲ ଆରେ ବର୍ଣ୍ଣବା ନିପଣ୍ ଆତାର୍। 5 ଏଚେପାଦ୍ନା ବିନ୍ଜାତିର୍ ଆରେ ପାର୍ତିକିୱି ଯିହୁଦିର୍, ହେୱାର୍ ନେତାର୍ ହୁଦାଙ୍ଗ୍ ମେହାଆଜି ହେୱାର୍ ବିରଦ୍ତାଙ୍ଗ୍ ଇନସ୍ତାକିଜି କାଲ୍କୁ ହୁଦାଙ୍ଗ୍ ଇଡ଼୍ଦେଙ୍ଗ୍ ଉପାୟ୍ କିତାର୍। 6 ମାତର୍ ପାଉଲ ଆରେ ବର୍ଣ୍ଣବା ଇ ବିଷୟରେ ପୁଚାର୍। ଆରେ ହେୱାର୍ ଲୁକାୟନିଆ ଜିଲ୍ଲାନି ଲୁସ୍ତ୍ରା ଆରେ ଦର୍ବି ସହର୍ତାକେ ହାଚାର୍। ଆରେ ହେ ସହର୍ନି କଚଣ୍ନି ନାସ୍କୁକାଙ୍ଗ୍ ହାଚାର୍। 7 ଆରେ ହେୱାର୍ ହେବେ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ଲାଗାତାର୍। ଲୁସ୍ତ୍ରା ଆରେ ଦର୍ବି ସହର୍ତାକେ ଈଶ୍ୱର କାମାୟ୍ କିତାର୍ 8 ଲୁସ୍ତ୍ରା ସହର୍ତାକେ ରକାନ୍ ମାନାୟ୍ ମାଚାନ୍। ତା କାଲ୍ପାନା ଶାକ୍ତି ହିଲାତାତ୍, ଆରେ ହେୱାନ୍ ଜନମ୍ତାଙ୍ଗ୍ ନେ ଚଟା ମାଚାନ୍। ଆରେ ହେୱାନ୍ ଇନାୱେଡ଼ାଙ୍ଗ୍ ପା ତାଙ୍ଗ୍ୱାଦାଙ୍ଗ୍ ମାଚାନ୍। 9 ହେ ମାନାୟ୍ ପାଉଲ ଶୁଣାୟ୍ କିନାକା ୱେନ୍ଞ୍ଜି ମାଚାନ୍। ପାଉଲ ହେୱାନିଙ୍ଗ୍ ହାରାହାଣ୍କୁ ହୁଡ଼୍ଜି, ହେୱାନ୍ ହାର୍ ଆଦେଙ୍ଗ୍ ପାର୍ତି କିନାକା ପୁଚାନ୍। ଆରେ ପାଉଲ ଗାଜାକାଟ୍ କିଜି ୱେଚ୍ଚାନ୍, 10 “ନି କାଲ୍ପାନା ବାଡ଼୍କାସ୍ କିଜି ସିଦାଆଜି ନିଲା।” ହେବେତାଙ୍ଗ୍ ହେୱାନ୍ ଗୁମ୍ଜି ତାଙ୍ଗ୍ଦେଙ୍ଗ୍ ଲାଗାତାନ୍। 11 ପାଉଲ କିତି କାମାୟ୍ତିଙ୍ଗ୍ ମାନାୟାର୍ ହୁଡ଼୍ଜି ଲୁକାୟନିଆ ବାଷାତାଙ୍ଗ୍ ଗାଜାକାଟ୍ କିଜି ୱେଚ୍ଚେଙ୍ଗ୍ ଲାଗାତାର୍, “ପେନ୍କୁ ମାନାୟ୍ ରୁପ୍ ଆଜି ମା ଲାଗାୟ୍ ୱାତାତ୍ନା।” 12 ହେୱାର୍ ବର୍ଣ୍ଣବାଙ୍ଗ୍ ଗ୍ରୀକ୍ ଜାତିନି ବୃହସ୍ପତି ପେନ୍ ଇଞ୍ଜି ୱେଚ୍ଚାର୍। ଆରେ ହେୱାର୍ ପାଉଲତିଙ୍ଗ୍ ଶୁଣାୟ୍ କିନି ମୁକ୍ୟା ମାଚିଲେ ହେୱାନିଙ୍ଗ୍ ବୁଧ ପେନ୍ ଇଞ୍ଜି ୱେଚ୍ଚାର୍। 13 ସହର୍ ବାର୍ତ ବୃହସ୍ପତି ପେନ୍ ମାନି ମନ୍ଦିର୍ ମାଚାତ୍। ହେ ମନ୍ଦିର୍ ପୁଜାରି କେତେକ୍ ବାଡ଼୍ଦୁଙ୍ଗ୍ ଆରେ ପୁଇମାଡ଼୍ ଆସ୍ତି ତାସିୱାତାନ୍। ଆରେ ମାନାୟାର୍ ହୁଦାଙ୍ଗ୍ ମେହାଆଜି ହେୱାର୍ କାଜିଙ୍ଗ୍ ବଲିପୁଜା କିଦେଙ୍ଗ୍ ଇଚାକିଜି ମାଚାନ୍। 14 ମାତର୍ ବାଚିକିତି ଚେଲା ପାଉଲ ଆରେ ବର୍ଣ୍ଣବା ଇଦାଙ୍ଗ୍ ୱେନ୍ଞ୍ଜି ଜାର୍-ଜାର୍ ହେନ୍ଦ୍ରାଙ୍ଗ୍ କେଚ୍ଚାର୍। ହେୱାର୍ ମାନାୟ୍ ଲାଗାୟ୍ ହନ୍ଚିହାଚାର୍। ଆରେ ହେୱାର୍ ଗାଜାକାଟ୍ କିଜି ୱେଚ୍ଚାର୍, 15 “ଏ ଆଜ୍ଞା କାଦେର୍, ଇନା କିଦେଙ୍ଗ୍ ଇୱିଜୁ କିନାଦେରା? ଆପେଙ୍ଗ୍ ପା ମି ଲେକେ ଦୁକ୍ସୁକ୍ ପାୟାଆନି ମାନାୟ୍। ଇନେସ୍କି ଏପେଙ୍ଗ୍ ଇ ମୁର୍ତି ପୁଜା କିନାକା ପିସ୍ତି ଜିବୁନ୍ ମାନି ଈଶ୍ୱରତାକେ ୱାନାଦେର୍, ହେଦାଙ୍ଗ୍ କାଜିଙ୍ଗ୍ ଆପେଙ୍ଗ୍ ମି ଲାଗାୟ୍ ଇ ହାର୍ଦିକାବୁର୍ ଶୁଣାୟ୍ କିଦ୍ନାପା। ହେ ଈଶ୍ୱର ବାଦାଡ଼୍, ପୁର୍ତି, ହାମ୍ଦୁର୍ ଆରେ ହେବେ ମାନି ୱିଜୁ ଜିନିଷ୍ତିଙ୍ଗ୍ ରସ୍ତାନ୍ନା। 16 ହେ ଈଶ୍ୱର ୱିଜୁ ଜାତିନି ମାନାୟାରିଙ୍ଗ୍ ଜାର୍-ଜାର୍ ହାଜ୍ଦିଙ୍ଗ୍ ହାଞ୍ଜେଙ୍ଗ୍ ଆଗେ ପିସ୍ତିହିଜି ମାନ୍ଞ୍ଚାନ୍। 17 ମାତର୍ ହେୱାନ୍ ସବୁୱେଡ଼ାଙ୍ଗ୍ ହାର୍ଦି କାମାୟ୍ କିଜି ହେୱାନ୍ ଜାର୍ ବିଷୟରେ ୱେଚ୍ଚାନ୍ନା। ହେଦାଙ୍ଗ୍ କାଜିଙ୍ଗ୍ ସରଗ୍ତାଙ୍ଗ୍ ବାର୍ହା ଆରେ ମାସ୍ ଅନୁସାରେ ପାଡ଼୍ ହିତ୍ତାନ୍। ଆରେ ହେୱାନ୍ ମିଙ୍ଗେଙ୍ଗ୍ ଚିଞ୍ଜେଙ୍ଗ୍ କାଦି ଆରେ ମି ମାନ୍ତ ୱାରି କିୟିକିତ୍ତାନ୍ନା।” 18 ପାଉଲ ହେ ମାନାୟାରିଙ୍ଗ୍ ଇୱିଜୁ କାତା ୱେଚି ପାଚେ ପା, ହେୱାର୍ ବଲିପୁଜା କିଦେଙ୍ଗ୍ ଇଚାକିଜି ମାଚାର୍। ହେଦାଙ୍ଗ୍ କାଜିଙ୍ଗ୍ ହେୱାନ୍ ବେସି କଷ୍ଟତାଙ୍ଗ୍ ମାନାୟାରିଙ୍ଗ୍ ବଲିପୁଜା କିନାକା ବନ୍ଦ୍ କିୟିକିତାନ୍। ଲୁସ୍ତ୍ରା ସହର୍ତାକେ ପାଉଲତିଙ୍ଗ୍ କାଲ୍କୁ ଇଡ଼୍ତାର୍ 19 ଆନ୍ତିୟକିଆ ସହର୍ ଆରେ ଇକନିୟ ସହର୍ତାଙ୍ଗ୍ କେତେକ୍ ଯିହୁଦିର୍ ହେବେ ୱାଜି ମାନାୟାରିଙ୍ଗ୍ ତାପଣ୍ କିତାର୍। ହେୱାର୍ ପାଉଲତିଙ୍ଗ୍ କାଲ୍କୁ ଇଡ଼୍ତାର୍, ଆରେ ହେୱାର୍ ପାଉଲ ହାଃତାନ୍ ଇଞ୍ଜି ବାବିକିଜି ବାର୍ତ ନିର୍ଚି ଅତାର୍। 20 ମାତର୍ ହେ ନିର୍ଚି ଅଜି ପିସ୍ତି ବାହାତାକେ ପାର୍ତିକିନି ଚେଲାହିର୍ ୱାଜି ତା ଚାରିବେଣ୍ତାଙ୍ଗ୍ ନିଲ୍ତାର୍। ହେବେତାଙ୍ଗ୍ ପାଉଲ ନିଙ୍ଗ୍ଞ୍ଜି ସହର୍ ବିତ୍ରେ ହାଚାନ୍। ଆର୍କାତ୍ ନାଞ୍ଜିଙ୍ଗ୍ ହେୱାନ୍ ବର୍ଣ୍ଣବା ହୁଦାଙ୍ଗ୍ ଦର୍ବି ସହର୍ତାକେ ହାଚାର୍। 21 ହେୱାର୍ ହେ ସହର୍ତାକେ ହାର୍ଦିକାବୁର୍ ଶୁଣାୟ୍ କିତାର୍, ଆରେ କେତେକ୍ ମାନାୟାରିଙ୍ଗ୍ ଚେଲା ରସ୍ତାର୍। ତାପାଚେ ହେୱାର୍ ଆରେରଗ ଲୁସ୍ତ୍ରା ସହର୍ତାକେ ହାଚାର୍। ହେବେତାଙ୍ଗ୍ ଇକନିୟ ସହର୍ତାକେ ହାଚାର୍, ଆରେ ହେବେତାଙ୍ଗ୍ ଆନ୍ତିୟକିଆ ସହର୍ତାକେ ହାଚାର୍। 22 ଆରେ ହେୱାର୍ ୱିଜୁ ସହର୍ତାକେ ମାନି ପାର୍ତିକିନି ଚେଲାହିର୍ ମେହାଆଜି ହେୱାରିଙ୍ଗ୍ ଶାନ୍ତି କିଜି ମାଚାର୍। ଆରେ ହେୱାର୍ ହେୱାରିଙ୍ଗ୍ ପାର୍ତି କିଜି ମାଞ୍ଜେଙ୍ଗ୍ ସାହାସ୍ନି କାତା ୱେଚ୍ଚାର୍। ଆରେ ହେୱାର୍ ୱେଚ୍ଚାର୍, “ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ମାଙ୍ଗେଙ୍ଗ୍ ବେସି ଦୁକ୍କଷ୍ଟ ପାୟାଆନାକା ଆନାତ୍।” 23 ପାଉଲ ଆରେ ବର୍ଣ୍ଣବା ୱିଜୁ ମଣ୍ଡ୍ଲିତାକେ ପ୍ରାଚିନାରିଙ୍ଗ୍ ବାଚିକିତାର୍ ଆରେ ଉପାସ୍ କିଜି ପାର୍ତାନା କିତାର୍। ହେୱାର୍ ପାର୍ତିକିନି ମାପୃ ଲାଗାୟ୍ ପ୍ରାଚିନ୍ ଆରେ ପାର୍ତିକିନି ମାନାୟାରିଙ୍ଗ୍ ହାର୍ପି କିଜି ହିତାର୍। ପାଉଲ ଆରେ ବର୍ଣ୍ଣବା ସିରିୟା ଜିଲ୍ଲାନି ଆନ୍ତିୟକିଆ ସହର୍ତାକେ ହାଚାର୍ 24 ତାପାଚେ ପାଉଲ ଆରେ ବର୍ଣ୍ଣବା ପିସିଦିଆ ଜିଲ୍ଲା ନିପଣ୍ ଆଜି ପପୁଲିଆ ଜିଲ୍ଲାତାକେ ୱାତାର୍। 25 ହେୱାର୍ ପର୍ଗି ସହର୍ତାକେ ଈଶ୍ୱର କାତା ଶୁଣାୟ୍ କିଜି ଆତାଲିଆ ସହର୍ତାକେ ହାଚାର୍। 26 ହେବେତାଙ୍ଗ୍ ହେୱାର୍ ଆନ୍ତିୟକିଆ ହସର୍ତାକେ ଜାଜ୍ତାକେ ଲେଉଟା ଆଜି ୱାତାର୍। ଇବାହାତାକେ ପାର୍ତି କିନାକାର୍ ପାଉଲ ଆରେ ବର୍ଣବାଙ୍ଗ୍ ବିନ୍-ବିନ୍ ବାହାତାକେ ହାଲ୍ଜି ଈଶ୍ୱର କାତା ଶୁଣାୟ୍ କିଦେଙ୍ଗ୍ ବାଚିକିଜି ମାଚାର୍। ହେୱାର୍ ଈଶ୍ୱରତାକେ ପାର୍ତାନା କିଜି ମାଚାର୍, ହେୱାନ୍ ପାଉଲ ଆରେ ବର୍ଣ୍ଣବା କିନି କାମାୟ୍ତାକେ ଦୟା କିୟେନ୍। ହେ କାମାୟ୍ ନଙ୍ଗୟ୍ ହେୱାର୍ ପୁରା କିତାର୍ନା। 27 ହେୱାର୍ ହେ ସହର୍ତାକେ ଇକାତାର୍, ଆରେ ମଣ୍ଡ୍ଲିନି ମାନାୟାରିଙ୍ଗ୍ ରବେ କୁକ୍ତାର୍। ହେୱାର୍ ଈଶ୍ୱର ସାଇଜତାଙ୍ଗ୍ ଇନା-ଇନା କାମାୟ୍ କିତାର୍, ଆରେ ଈଶ୍ୱର ବିନ୍ଜାତିନି ମାନାୟାରିଙ୍ଗ୍ ଯୀଶୁତାକେ ପାର୍ତି କିଦେଙ୍ଗ୍ ସୁଯଗ୍ ହିତି ୱିଜୁ ବିଷୟ ହେୱାରିଙ୍ଗ୍ ୱେଚ୍ଚାର୍। 28 ପାଉଲ ଆରେ ବର୍ଣ୍ଣବା ହେ ପାର୍ତିକିନି ଚେଲାହିର୍ ହୁଦାଙ୍ଗ୍ କେତେକ୍ ଦିନ୍ ପାତେକ୍ ମାଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation