ପକ୍ୟାତାକା 13 - New Testament in Pengo Parja Languageଆନ୍ତିୟକିଆ ମଣ୍ଡ୍ଲିତାକେ ବର୍ଣ୍ଣବା ଆରେ ଶାଉଲତିଙ୍ଗ୍ ପକ୍ତାର୍ 1 ଆନ୍ତିୟକିଆ ସହର୍ନି ମଣ୍ଡ୍ଲିତାକେ ଭବିଷ୍ଯତବକ୍ତାର୍ ଆରେ ଗୁରୁର୍ ମାଚାର୍। ହେୱାର୍ ତର୍ ଇଲେକେ ବର୍ଣ୍ଣବା, ଶିମିୟନ ତର୍ ନିଗର ପା ଇନାର୍, କୁରିଣିୟ ସହର୍ନି ଲୁକିୟ, ହେରୋଦ ରାଜା ମାନିହିଙ୍ଗ୍ ମନହେମ, ଶାଉଲ ମାଚାର୍। 2 ହେୱାର୍ ଉପାସ୍ କିଜି ମାପୃତିଙ୍ଗ୍ ପୁଜାକିଜି ମାଚାର୍। ହେପାଦ୍ନା ପବିତ୍ର ଆତ୍ମା ହେୱାରିଙ୍ଗ୍ ୱେଚ୍ଚାତ୍, “ଇମ୍ଣି କାମାୟ୍ କାଜିଙ୍ଗ୍ ଆପେଙ୍ଗ୍ ବର୍ଣ୍ଣବାଙ୍ଗ୍ ଆରେ ଶାଉଲତିଙ୍ଗ୍ କୁକ୍ତାପ୍ନା, ହେଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ ଜେକ କିୟାଟ୍।” 3 ହେବେତାଙ୍ଗ୍ ହେୱାର୍ ଉପାସ୍ତାଙ୍ଗ୍ ପାର୍ତାନା କିତି ପାଚେ, ହେୱାର୍ ଶାଉଲ ଆରେ ବର୍ଣ୍ଣବା ଜପି କେଇ ଇଡ଼୍ଜି ଈଶ୍ୱର କାମାୟ୍ କିଦେଙ୍ଗ୍ ପକ୍ତାର୍। ଶାଉଲ ଆରେ ବର୍ଣ୍ଣବା ସାଇପ୍ରସ୍ ସହର୍ତାକେ ଈଶ୍ୱର କାମାୟ୍ କିତାର୍ 4 ପବିତ୍ର ଆତ୍ମା ଶାଉଲ ଆରେ ବର୍ଣବାଙ୍ଗ୍ ହାଜି ଚଚ୍ଚି ମାଚାନ୍। ଲାଗିଙ୍ଗ୍ ହେୱାର୍ ଆନ୍ତିୟକିଆ ସହର୍ତାଙ୍ଗ୍ ସେଲୁକିଆ ସହର୍ତାକେ ହାଚାର୍। ହେବେତାଙ୍ଗ୍ ହେୱାର୍ ଜାଜ୍ତ ଦୁମ୍ଜି କୁପ୍ରଦ୍ୱିପ୍ତାକେ ହାଚାର୍। 5 ହେୱାର୍ ସାଲାମି ସହର୍ତାକେ ଏକିତି ପାଚେ, ଯିହୁଦିର୍ ପାର୍ତାନା ଇଲ୍କୁକାଙ୍ଗ୍ ହାଲ୍ଜି ଈଶ୍ୱର କାତା ଶୁଣାୟ୍ କିଦେଙ୍ଗ୍ ଲାଗାତାର୍। ଆରେ ଯୋହନ ହେୱାରିଙ୍ଗ୍ ସାଇଜ କିଜି ମାଚାନ୍। 6 ହେୱାର୍ ୱିଜାକାର୍ ସାଇପ୍ରସ୍ ଦ୍ୱିପନି ସହର୍ତାକେ ହାଚି ପାଚେ, ପାଫ ସହର୍ତାକେ ୱାତାର୍। ହେବେ ହେୱାର୍ ବର୍ଯିଶୁ ତର୍ଦାକାନିଙ୍ଗ୍ ଗୁଣିଆ କାମାୟ୍ କିନି ର ମିଚ୍ୱା ଭବିଷ୍ଯତବକ୍ତାଙ୍ଗ୍ ଗିଟାଆତାର୍। ହେୱାନ୍ ରକାନ୍ ଯିହୁଦି ଜାତିନି ମାନାୟ୍ ମାଚାନ୍। 7 ବର୍ଯିଶୁ ସେର୍ଗିୟ ପାଉଲ ରାଜା ହୁଦାଙ୍ଗ୍ ମାଚାନ୍। ହେ ରାଜା ରକାନ୍ ବୁଦିକାଟି ମାନାୟ୍ ମାଚାନ୍। ହେ ରାଜା ବର୍ଣ୍ଣବା ଆରେ ଶାଉଲତିଙ୍ଗ୍ କୁକ୍ଚି ଈଶ୍ୱର କାତା ୱେଞ୍ଜେଙ୍ଗ୍ ଇଚା କିତାନ୍। 8 ମାତର୍ ବର୍ଯିଶୁ ବର୍ଣ୍ଣବା ଆରେ ଶାଉଲତିଙ୍ଗ୍ ବିରଦ୍ କିଜି ମାଚାନ୍। ଗ୍ରୀକ୍ ବାଷାତାକେ ହେୱାନିଙ୍ଗ୍ ଅଲ୍ଲିମା ଇଞ୍ଜି ୱେଚ୍ଚି ମାଚାର୍। ହେ ରାଜାଙ୍ଗ୍ ଯୀଶୁତାକେ ପାର୍ତି କିମେନ୍ ଇଞ୍ଜି ବୁଲ୍କାଇ କିଜି ମାଚାନ୍। 9 ଲାଗିଙ୍ଗ୍ ଶାଉଲ ଇନେରିଙ୍ଗ୍ ପାଉଲ ପା ଇନାର୍, ପବିତ୍ର ଆତ୍ମାତାଙ୍ଗ୍ ପୁରାଆଜି ଗୁଣିଆ କାମାୟ୍ କିନାକାନିଙ୍ଗ୍ ହାରାହାଣ୍କୁ ହୁଡ଼୍ଜି ୱେଚ୍ଚାନ୍, 10 “ଏନେଙ୍ଗ୍ ଶୟତାନ୍ ଲେକେ ୱିଜୁ ହାର୍ଦି କାମାୟ୍ତିଙ୍ଗ୍ ବିରଦ୍ କିନାଇ। ଏନେଙ୍ଗ୍ ସବୁୱେଡ଼ାଙ୍ଗ୍ ମିଚ୍ କାତା ୱେଚ୍ନାୟା, ଆରେ ହେୱାରିଙ୍ଗ୍ ଏନେଙ୍ଗ୍ ବୁଲ୍ କାମାୟ୍ କିୟିକିନାୟା। ମାପୃ ବିଷୟରେ ଇନାକା ସତ୍ ମାନାତ୍ ହେଦାଙ୍ଗ୍ ସତ୍ ଆକାୟ୍ ଇଞ୍ଜି ୱେଚ୍ଚେଙ୍ଗ୍ ଉପାୟ୍ କିନାଇ। 11 ହୁଡ଼ା, ନିଙ୍ଗେଙ୍ଗ୍ ନଙ୍ଗୟ୍ ମାପୃ ଦଣ୍ଡ୍ ହିଦ୍ନାନ୍। ଏନେଙ୍ଗ୍ କାଣା ଆଜି କେତେକ୍ ସମୟ୍ ପାତେକ୍ ୱେଡ଼ା ହୁଡ଼୍ଦେଙ୍ଗ୍ ଆଡୁୟ୍।” ହେଦାପ୍ରେ ଗୁପ୍ଟା ଆରେ ମାଜ୍ଗା ୱେଡ଼ାତିଙ୍ଗ୍ ଡାବାଇ କିତାତ୍, ଲାଗିଙ୍ଗ୍ ହେୱାନିଙ୍ଗ୍ କେଇଦ ଆସ୍ତି ହାଜି ଚଚ୍ଚେଙ୍ଗ୍ ହେୱାନ୍ ଇନି ଆନି ଟାମ୍ଡା ଆଜି ମାନାୟ୍ତିଙ୍ଗ୍ ଦାସ୍ତେଙ୍ଗ୍ ଲାଗାତାନ୍। 12 ହେ ରାଜା ଇ ଗଟ୍ନା ହୁଡ଼୍ଜି ଯୀଶୁ ମାପୃଙ୍ଗ୍ ଚାନିଆ ଆଜି ପାର୍ତି କିତାନ୍। ପାଉଲ ଆରେ ବର୍ଣ୍ଣବା ପିସିଦିଆ ବାହାତାକେ ଈଶ୍ୱର କାମାୟ୍ କିତାର୍ 13 ପାଉଲ ଆରେ ତା ହାଙ୍ଗ୍ଦାକାର୍ ପାଫ ସହର୍ତାଙ୍ଗ୍ ଏଜ୍ ଜାଜ୍ତାକେ ହାଲ୍ଜି ପପୁଲିଆ ଜିଲ୍ଲାନି ପର୍ଗି ସହର୍ତାକେ ୱାତାର୍। ମାତର୍ ଯୋହନ ହେୱାରିଙ୍ଗ୍ ପିସ୍ତି ଯିରୁଶାଲାମ ସହର୍ତାକେ ଲେଉଟା ଆଜି ହାଚାନ୍। 14 ହେୱାର୍ ପର୍ଗି ସହର୍ତାଙ୍ଗ୍ ୱାଜି ଆନ୍ତିୟକିଆ ସହର୍ନି ପିସିଦିଆ ଜିଲ୍ଲାତାକେ ଇକାତାର୍। ଆରେ ଜମ୍ନିଦିନ୍ତ ପାର୍ତାନା ଇଞ୍ଜ ହାଲ୍ଜି କୁଚ୍ଚାର୍। 15 ଆରେ ମୋଶା ଲେକିକିତି ନିୟମ୍ନି ସାସ୍ତର୍ ଆରେ ଭବିଷ୍ଯତବକ୍ତା ସାସ୍ତର୍ ପଡ଼ିକିତି ପାଚେ, ପାର୍ତାନା ଇଲ୍ନି ମୁଡ଼୍ଦାକାର୍ ହେୱାର୍ ଲାଗାୟ୍ ଇଦାଙ୍ଗ୍ ୱେଚ୍ଚି ପକ୍ତାର୍, “ଟଣ୍ଡାର୍କାଦେର୍, ମାନାୟାରିଙ୍ଗ୍ ସାହାସ୍ ହିଦେଙ୍ଗ୍ ଇମ୍ଣି କାତା ମାଚିସ୍ ୱାଜି ୱେଚାଟ୍।” 16 ହେବେତାଙ୍ଗ୍ ପାଉଲ ନିଲ୍ଚି କେଇ ସାକିୟା କିଜି ୱେଚ୍ଚେଙ୍ଗ୍ ଲାଗାତାନ୍, “ଏ ଇସ୍ରାଏଲ ଜାତିନି ମାନାୟାର୍ ଆରେ ଈଶ୍ୱରତିଙ୍ଗ୍ ପାଣ୍ଡ୍ରାଆନି ବିନ୍ଜାତି ମାନାୟ୍ କାଦେର୍ ୱେନାଟ୍! 17 ଇ ଇସ୍ରାଏଲ ଜାତିନି ଈଶ୍ୱର ମାଙ୍ଗେଙ୍ଗ୍ ମା ଆକଦାଦିରିଙ୍ଗ୍ ବାଚିକିତାନ୍। ଆରେ ହେୱାର୍ ମିସର୍ ଦେସ୍ତାକେ ହାଲ୍ଜି ବାହାକିତିହିଙ୍ଗ୍ ଈଶ୍ୱର ହେୱାରିଙ୍ଗ୍ ବେସିହେନି ମାନାୟାରିଙ୍ଗ୍ ବାଡାଇ କିୟିକିତାନ୍। ଆରେ ତା ଶାକ୍ତିତାଙ୍ଗ୍ ହେୱାରିଙ୍ଗ୍ ହେବେତାଙ୍ଗ୍ ହପ୍ଚି ତାତାନ୍। 18 ହେୱାର୍ ଈଶ୍ୱରତିଙ୍ଗ୍ ମାନିକିୱାଦାଙ୍ଗ୍ ମାଚିସ୍ ପା, ହେୱାନ୍ ହେ ମାନାୟାରିଙ୍ଗ୍ ଚାଲିଶ୍ ବାର୍ହୁ ପାତେକ୍ ଟାଙ୍ଗ୍ରାବାହାତାକେ ଜାତୁନ୍ କିତାନ୍। 19 ଆରେ ଈଶ୍ୱର କିଣାନ ଦେସ୍ତାକେ ବାହାକିଜି ମାଚି ସାତ୍ଗଟା ଜାତିରିଙ୍ଗ୍ ନଷ୍ଟ କିତାନ୍। ଆରେ ହେୱାନ୍ ମା ଆକଦାଦିରିଙ୍ଗ୍ ପାକାପାକି ଚାରିଶ ପଚାସ୍ ବାର୍ହୁ ପାତେକ୍ ଆଦିକାର୍ କିଦେଙ୍ଗ୍ ହିତାନ୍। 20 ଇସ୍ରାଏଲନି ମାନାୟାରିଙ୍ଗ୍ ବିଚାର୍ କିଦେଙ୍ଗ୍ ଭବିଷ୍ଯତବକ୍ତା ଶାମୁଏଲ ପାତେକ୍ ଈଶ୍ୱର ବିଚାର୍ କିନାକାରିଙ୍ଗ୍ ବାଚିକିତାନ୍। 21 ଶାମୁଏଲ ହେୱାରିଙ୍ଗ୍ ବିଚାର୍ କିନାକାନ୍ ମାନିହିଙ୍ଗ୍, ହେ ମାନାୟାର୍ ହେୱାନିଙ୍ଗ୍ ମା ଜପି ସାସନ୍ କିଦ୍ଦେଙ୍ଗ୍ ର ରାଜା ହିଦା। ଲାଗିଙ୍ଗ୍ ଈଶ୍ୱର ଶାଉଲତିଙ୍ଗ୍ ହେୱାର୍ ରାଜା ଆଦେଙ୍ଗ୍ ବାଚିକିତାନ୍। ହେୱାନ୍ ବିନ୍ଯାମିନ ଲାତ୍ରାନି କିଶ ମେହି ମାଚାନ୍। ଶାଉଲ ହେ ମାନାୟାରିଙ୍ଗ୍ ଚାଲିଶ୍ ବାର୍ହୁ ସାସନ୍ କିତାନ୍। 22 ପାଚେ ଈଶ୍ୱର ଶାଉଲତିଙ୍ଗ୍ ରାଜା ପାଦ୍ତାଙ୍ଗ୍ ନିକ୍ଚି ଦାଉଦତିଙ୍ଗ୍ ରାଜା କିତାନ୍। ଈଶ୍ୱର ପା ତା ବିଷୟରେ ୱେଚ୍ଚାନ୍, ‘ଆନେଙ୍ଗ୍ ଯିଶି ମେହି ଦାଉଦତିଙ୍ଗ୍ ଗିଟାଆତାଙ୍ଗ୍, ଇୱାନ୍ ନା ଇଚାତାଙ୍ଗ୍ ତାଙ୍ଗ୍ନି ମାନାୟ୍। ଆନେଙ୍ଗ୍ ଇନାକା ୱିଜୁ ଇଚା କିନାଙ୍ଗ୍ ହେୱାନ୍ ହେ ୱିଜୁ କିନାନ୍।’ 23 ଈଶ୍ୱର ହେୱାନିଙ୍ଗ୍ ପାର୍ମାଣ୍ କିଜି ମାଚାନ୍, ଆରେ ତା ଲାତ୍ରାତାଙ୍ଗ୍ ଇସ୍ରାଏଲନି ଜାତିରିଙ୍ଗ୍ ରକାନ୍ ଉଦାର୍ କିଦ୍ନାକାନ୍ ଆନେଙ୍ଗ୍ ପକ୍ତାନାଙ୍ଗ୍, ହେୱାନ୍ ଆନାନା ଯୀଶୁ। 24 ହେ ଯୀଶୁ ୱାୱି ଆଗେ ଯୋହନ ଇସ୍ରାଏଲ ଜାତିନି ମାନାୟାରିଙ୍ଗ୍ ହେୱାର୍ ପାପ୍ କାମାୟ୍ ପିସ୍ତି ମାପୃତାକେ ୱାଜି ଡୁବନ୍ ଅନି କାତା ଶୁଣାୟ୍ କିଜି ମାଚାନ୍। 25 ଆରେ ଯୋହନ କାମାୟ୍ ୱିସ୍ତି ୱେଚ୍ଚାନ୍, ‘ଏପେଙ୍ଗ୍ ନାଙ୍ଗେଙ୍ଗ୍ ଇନେର୍ ଇଞ୍ଜି ବାବି କିଦ୍ନାଦେରା? ଆନେଙ୍ଗ୍ ହେ ରକ୍ଷାକିଦ୍ନାକାଙ୍ଗ୍ ଆକାୟ୍। ମାତର୍ ନା ପାଚେ ରକାନ୍ ୱାନାନା, ନାବେତାଙ୍ଗ୍ ହେୱାନ୍ ବେସି ଗାଜାକାନ୍, ଲାଗିଙ୍ଗ୍ ଆନେଙ୍ଗ୍ ତା ଦାସ୍ ଆଜି ତା କାଲ୍ ପାନାନି ପାଣ୍ଡାୟ୍ ରିକ୍ତେଙ୍ଗ୍ ଆଦିକାର୍ ଆକାୟ୍।’ 26 ଅବ୍ରାହାମ ଲାତ୍ରାନି ହିମ୍ଣାୱାକ୍ଡ଼ା ଆରେ ଈଶ୍ୱରତିଙ୍ଗ୍ ପାଣ୍ଡ୍ରାଆନି ବିନ୍ଜାତିର୍ ଟଣ୍ଡାର୍କାଦେର୍, ଈଶ୍ୱର ମି କାଜିଙ୍ଗ୍ ଉଦାର୍ ପାୟାଆନି କାବୁର୍ ପକ୍ତାତାନ୍ନା। 27 ଯିରୁଶାଲାମ ସହର୍ନି ମାନାୟାର୍ ଆରେ ହେୱାର୍ ନେତାର୍ ଯୀଶୁ ଖ୍ରୀଷ୍ଟଙ୍ଗ୍ ପୁଞ୍ଜେଙ୍ଗ୍ ଆଡ୍ୱାତାର୍। ୱିଜୁ ଜମ୍ନିଦିନ୍ତ ହେୱାର୍ ଭବିଷ୍ଯତବକ୍ତାର୍ ସାସ୍ତର୍ ପଡ଼ିକିଜି ମାଚାର୍। ମାତର୍ ହେୱାର୍ ହେଦାଙ୍ଗ୍ ବୁଜା ଆଦେଙ୍ଗ୍ ଆଡ୍ୱାତାର୍। ହେଦାଙ୍ଗ୍ କାଜିଙ୍ଗ୍ ହେ ନେତାର୍ ଭବିଷ୍ଯତବକ୍ତାର୍ ଲେକିକିତି କାତା ପୁରା ଆନି କାଜିଙ୍ଗ୍ ଯୀଶୁଙ୍ଗ୍ ହେ ନେତାର୍ ମାର୍ନେ ଅସ୍ତାର୍। 28 ହେ ନେତାର୍ ଯୀଶୁଙ୍ଗ୍ ହାଃନି ଦଣ୍ଡ୍ ହିଦେଙ୍ଗ୍ ଇମ୍ଣି ଦସ୍ ପା ଗାଟା ଆୱାତାର୍। ଆତିସ୍ପା ହେୱାର୍ ପିଲାତ ରାଜାଙ୍ଗ୍ ଗୁୱାରି କିତାର୍। 29 ତା ବିଷୟରେ ସାସ୍ତର୍ତାକେ ଇନାକା ୱିଜୁ ଲେକା ମାନାତ୍, ହେ ୱିଜୁ ପୁରା ଆତିପାଚେ, ହେୱାନିଙ୍ଗ୍ କୃଶକାଟ୍ତାଙ୍ଗ୍ ଜୁତ୍ତି ତାହିୱାଜି ଦୁଗେର୍ତାକେ ମୁଚ୍ଚାର୍। 30 ମାତର୍ ଈଶ୍ୱର ହେୱାନିଙ୍ଗ୍ ହାଃତାକାର୍ତାଙ୍ଗ୍ ଜିବୁନ୍ କିଜି ନିକ୍ତାନ୍। 31 ଆରେ ଇମ୍ଣାକାର୍ ତା ହୁଦାଙ୍ଗ୍ ଗାଲିଲୀ ଜିଲ୍ଲାତାଙ୍ଗ୍ ଯିରୁଶାଲାମ ସହର୍ତାକେ ୱାଜିମାଚାର୍, ହେ ଚେଲାହିରିଙ୍ଗ୍ କେତେକ୍ ଦିନ୍ ପାତେକ୍ ହେୱାନ୍ ଚଞ୍ଜିଆତାନ୍। ଇମ୍ଣାକାର୍ ହୁଡ଼୍ତାର୍ନା ହେୱାର୍ ଇସ୍ରାଏଲନି ମାନାୟାର୍ ଲାଗାୟ୍ ସାକି ମାନାର୍। 32 ମା ଆକଦାଦିରିଙ୍ଗ୍ ଈଶ୍ୱର ଇମ୍ଣି ଶପତ୍ କିଜି ମାଚାନ୍, ହେ ବିଷୟରେ ଆପେଙ୍ଗ୍ ମିଙ୍ଗେଙ୍ଗ୍ ଇ ହାର୍ଦିକାବୁର୍ ୱେଚ୍ଚାନାପା। 33 ଆପେଙ୍ଗ୍ ହେୱାର୍ ହିମ୍ଣା ଆତିଲେ ଈଶ୍ୱର ଯୀଶୁଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି, ହେୱାନ୍ କିଜିମାଚି ଶପତ୍ତିଙ୍ଗ୍ ପୁରା କିତାନ୍ନା। ଇନେସ୍କି କେର୍କଣ୍ ବହିନି ଦୁଇ ନମ୍ବର୍ କେର୍କଣ୍ତାକେ ଲେକାଆତାତ୍ନା, ‘ନେଞ୍ଜେଙ୍ଗ୍ତାଙ୍ଗ୍ ଆନେଙ୍ଗ୍ ମିଞ୍ଜ୍ବା ଆତାଙ୍ଗ୍ ଆରେ ଏନେଙ୍ଗ୍ ନା ମାଜି ଆତାୟ୍।’ 34 ଈଶ୍ୱର ହେୱାନିଙ୍ଗ୍ ହାଃତାକାର୍ତାଙ୍ଗ୍ ଆରେରଗ ଜିବୁନ୍ କିତାନ୍ନା, ଲାଗିଙ୍ଗ୍ ହେୱାନ୍ ଆରେ ଇନାୱେଡ଼ାଙ୍ଗ୍ ପା ହାଃଉନ୍। ଇ ବିଷୟରେ ହେବେ ଲେକାଆତାତ୍ନା, ‘ଆନେଙ୍ଗ୍ ଦାଉଦତିଙ୍ଗ୍ ଶପତ୍ କିଜି ମାଚିଲେ ହେଲେକେ ନେ ମିଙ୍ଗେଙ୍ଗ୍ ଆଶ୍ରିବାଦ୍ କିଦ୍ନାଙ୍ଗ୍। 35 ଦାଉଦ ଇଦାଙ୍ଗ୍ ପା ଆରେ କେର୍କଣ୍ତାକେ ୱେଚ୍ଚାନ୍ନା, ଆନେଙ୍ଗ୍ ନିଙ୍ଗେଙ୍ଗ୍ ହେବା କିଦ୍ନାଙ୍ଗା ଆରେ ମାନି କିଦ୍ନାଙ୍ଗା, ଲାଗିଙ୍ଗ୍ ଆନେଙ୍ଗ୍ ଇନାୱେଡ଼ାଙ୍ଗ୍ ହାଃତିସ୍ ନା ଗାଗାଡ଼୍ତିଙ୍ଗ୍ ନଷ୍ଟ ଆଦେଙ୍ଗ୍ ହିଦୁଇ।’ 36 ଇ କାତା ତ ଦାଉଦ ବିଷୟରେ ୱେଚ୍ୱାତାଙ୍ଗ୍ନା, ଇନେସ୍କି ଦାଉଦ ଈଶ୍ୱର ଇଚାତାଙ୍ଗ୍ ୱିଜୁ କାମାୟ୍ କିଜି ପାଚେ ହେୱାନ୍ ହାଃତାନ୍। ଆରେ ତା ଆକଦାଦିର୍ ଲେକେ ଦୁଗେର୍ତାକେ ମୁଚିୟା ଆଜି ନଷ୍ଟ ଆତାନ୍। 37 ମାତର୍ ହେୱାନ୍ ଯୀଶୁ ବିଷୟରେ ୱେଚ୍ଚି ମାଚାନ୍, ଇନେରିଙ୍ଗ୍ ଈଶ୍ୱର ହାଃତିତାଙ୍ଗ୍ ଆରେରଗ ଜିବୁନ୍ କିତାନ୍ନା, ଆରେ ହେୱାନ୍ ନଷ୍ଟ ଆୱାତାନ୍ନା।” 38 ହେବେତାଙ୍ଗ୍ ଏ ଟଣ୍ଡାର୍କାଦେର୍ ଇ କାତା ଏପେଙ୍ଗ୍ ପୁନ୍ଞ୍ଜି ମାନାଟ୍, “ଯୀଶୁତାକେ ଏପେଙ୍ଗ୍ ଯଦି ପାର୍ତି କିତିସ୍ ଈଶ୍ୱର ମି ପାପ୍ ୱିଜୁ କେମା କିଦ୍ନାନ୍। ଇ ବିଷୟରେ ଆପେଙ୍ଗ୍ ମିଙ୍ଗେଙ୍ଗ୍ ଶୁଣାୟ୍ କିଦ୍ନାପା। 39 ଆରେ ମୋଶା ଲେକିକିତି ନିୟମ୍ ସାସ୍ତର୍ତିଙ୍ଗ୍ ମାନିକିଜି ଏପେଙ୍ଗ୍ ଦରମ୍ ମାନାୟ୍ ଆଦେଙ୍ଗ୍ ଆଡ୍ୱାତାଦେର୍। ମାତର୍ ଯୀଶୁତାକେ ପାର୍ତି କିତିସ୍ ମିଙ୍ଗେଙ୍ଗ୍ ଈଶ୍ୱର ଦରମ୍ ମାନାୟ୍ ଇଞ୍ଜି ଗାଣା କିଦ୍ନାନା। 40 ଲାଗିଙ୍ଗ୍ ସାବ୍ଦାନ୍ ଆଜି ମାନାଟ୍, ଭବିଷ୍ଯତବକ୍ତାର୍ ସାସ୍ତର୍ତାକେ ଇନାକା ଲେକା ମାନାତ୍, ହେଦାଙ୍ଗ୍ ଇନେସ୍ ମି କାଜିଙ୍ଗ୍ ଗଟା ଆଦୁତ୍। 41 ‘ଏ ନିନ୍ଦାକିନି ମାନାୟ୍ କାଦେର୍, ଏପେଙ୍ଗ୍ ହୁଡ଼୍ଜି, ଚାନିଆ ଆଜି ନଷ୍ଟ ଆନାଦେରା, ଲାଗିଙ୍ଗ୍ ଆପେଙ୍ଗ୍ ମି ସମୟ୍ତ ର କାମାୟ୍ କିନାପା, ଯଦି ଇନେର୍ ହେ କାମାୟ୍ ବିଷୟରେ ମିଙ୍ଗେଙ୍ଗ୍ ୱେଚ୍ଚିତିସ୍ ପା, ଏପେଙ୍ଗ୍ ହେଦାଙ୍ଗ୍ତିଙ୍ଗ୍ ପାର୍ତି କିଉଦେର୍।’” 42 ପାଉଲ ଆରେ ବର୍ଣ୍ଣବା ପାର୍ତାନା ଇଞ୍ଜାଙ୍ଗ୍ ହସିହାନିହିଙ୍ଗ୍, ଆରେ ର ଜମ୍ନିଦିନ୍ତ ହେ ବିଷୟରେ ଆରେରଗ ୱେଚ୍ଚେଙ୍ଗ୍, ମାନାୟାର୍ ହେୱାରିଙ୍ଗ୍ ଗୁୱାରି କିଦେଙ୍ଗ୍ ଲାଗାତାର୍। 43 ପାର୍ତାନା ଇଲ୍ନି ମିଟିଙ୍ଗ୍ ୱିସ୍ତି ପାଚେ ଯିହୁଦି ଦରମ୍ ମାନିକିନି ବିନ୍ଜାତିନି ମାନାୟାର୍ ବିତ୍ରେତାଙ୍ଗ୍ କେତେକ୍ ମାନାୟାର୍ ପାଉଲ ଆରେ ବର୍ଣ୍ଣବା ପାଚେ-ପାଚେ ହାଚାର୍। ହେୱାର୍ ହେୱାରିଙ୍ଗ୍ କେତେକ୍ କାତା ୱେଚ୍ଚି ସାହାସ୍ କିୟିକିତାର୍, ଆରେ ଈଶ୍ୱର ଦୟାତାଙ୍ଗ୍ ତିର୍ଆଜି ମାଞ୍ଜେଙ୍ଗ୍ ୱେଚ୍ଚାର୍। ପାଉଲ ବିନ୍ଜାତି ମାନାୟାର୍ତାକେ ଈଶ୍ୱର କାତା ଶୁଣାୟ୍ କିତାନ୍ 44 ଆରେ ର ଜମ୍ନିଦିନ୍ତ ଆନ୍ତିୟକିଆ ସହର୍ନି କେତେକ୍ ମାନାୟାର୍ ଈଶ୍ୱର କାତା ୱେଞ୍ଜେଙ୍ଗ୍ ପାର୍ତାନା ଇଞ୍ଜ ରବେ ଆତାର୍। 45 ମାତର୍ ଯିହୁଦି ନେତାର୍ ବିନ୍ଜାତିର୍ ମାନାୟାରିଙ୍ଗ୍ ହୁଡ଼୍ଜି ରିସାଆତାର୍। ଆରେ ହେୱାର୍ ପାଉଲ ୱେଚ୍ଚି କାତାତିଙ୍ଗ୍ ବିରଦ୍ କିଜି ନିନ୍ଦା କିଦେଙ୍ଗ୍ ଲାଗାତାର୍। 46 ପାଉଲ ଆରେ ବର୍ଣ୍ଣବା ହେୱାରିଙ୍ଗ୍ ସାହାସ୍ଆଜି ୱେଚ୍ଚାର୍, “ପାର୍ତୁମ୍ ମିଙ୍ଗେଙ୍ଗ୍ ଈଶ୍ୱର କାତା ୱେଚ୍ନାକା ମାଚାତ୍। ମାତର୍ ଏପେଙ୍ଗ୍ ହେଦାଙ୍ଗ୍ତିଙ୍ଗ୍ ମାନି କିଉଦେରା, ଆରେ ଏପେଙ୍ଗ୍ ୱିଜ୍ୱି ଜିବୁନ୍ ପାୟା ଆଦେଙ୍ଗ୍ ଇଚା କିଉଦେରା। ଲାଗିଙ୍ଗ୍ ଆପେଙ୍ଗ୍ ବିନ୍ଜାତିର୍ତାକେ ହାନାପା। 47 ଇନେସ୍କି ଈଶ୍ୱର ମାଙ୍ଗେଙ୍ଗ୍ ଇଲେକେ ଆଦେସ୍ ହିତ୍ତାନ୍ନା, ‘ଆପେଙ୍ଗ୍ ନିଙ୍ଗେଙ୍ଗ୍ ବିନ୍ଜାତିନି ମାନାୟାର୍ କାଜିଙ୍ଗ୍ ର ଲାଇଟ୍ ଲେକେ ଅଜଡ଼୍ ରସ୍ତାପ୍ନା, ଏନେଙ୍ଗ୍ ପୁର୍ତିନି ଚାରିବେଣ୍ତାଙ୍ଗ୍ ମାନି ମାନାୟାରିଙ୍ଗ୍ ଉଦାର୍ କିଦ୍ନାକାନ୍ ବିଷୟରେ ୱେଚ୍ନାଇ।’” 48 ବିନ୍ଜାତିନି ମାନାୟାର୍ ଇଦାଙ୍ଗ୍ ୱେନ୍ଞ୍ଜି ୱାରି ଆତାର୍। ଆରେ ଈଶ୍ୱର କାତାତିଙ୍ଗ୍ ଜୟ୍-ଜୟ୍ କିଦେଙ୍ଗ୍ ଲାଗାତାର୍। ଈଶ୍ୱର ଇମ୍ଣାକାରିଙ୍ଗ୍ ୱିଜ୍ୱି ଜିବୁନ୍ ପାୟାଆନି କାଜିଙ୍ଗ୍ ବାଚିକିଜି ମାଚାନ୍ ହେୱାର୍ ପାର୍ତି କିତାର୍। 49 ହେଲେକେ ଈଶ୍ୱର କାତା ହେ ସହର୍ନି ଚାରିବେଣ୍ତି ନାସ୍କୁକାଙ୍ଗ୍ ବିଚାଆତାତ୍। 50 ମାତର୍ ଯିହୁଦି ନେତାର୍ ଯିହୁଦି ଦରମ୍ ମାନିକିନି ବିନ୍ଜାତି ଜଣାସୁଣା କଗ୍ଲେକାଙ୍ଗ୍ ଆରେ ସହର୍ନି ମୁଡ଼୍ଦାକାରିଙ୍ଗ୍, ପାଉଲ ଆରେ ବର୍ଣ୍ଣବା ବିରଦ୍ତାକେ ଟିଉଲାୟ୍ କିତାର୍। ଲାଗିଙ୍ଗ୍ ହେୱାର୍ ପାଉଲ ଆରେ ବର୍ଣବାଙ୍ଗ୍ ଦୁକ୍କଷ୍ଟ ହିତାର୍। ଆରେ ହେୱାର୍ ଏରିଆତାଙ୍ଗ୍ ହପ୍ତାର୍। 51 ଲାଗିଙ୍ଗ୍ ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିୟେନ୍ ଇଞ୍ଜି ପାଉଲ ଆରେ ବର୍ଣ୍ଣବା ଜାର୍ କାଲ୍ ପାନାନି ଦୁଡ଼ି ଡ଼ାତ୍ତାର୍। ପାଚେ ହେୱାର୍ ଇକନିୟ ସହର୍ତାକେ ହାଚାର୍। 52 ମାତର୍ ଆନ୍ତିୟକିଆ ସହର୍ତାକେ ମାନି ପାର୍ତିକିନି ଚେଲାହିର୍ ୱାରିତାଙ୍ଗ୍ ଆରେ ପବିତ୍ର ଆତ୍ମାତାଙ୍ଗ୍ ପୁରା ଆଦେଙ୍ଗ୍ ଲାଗାତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation