ପକ୍ୟାତାକା 12 - New Testament in Pengo Parja Languageହେରୋଦ ରାଜା ଯାକୁବଙ୍ଗ୍ ଅସ୍ତାନ୍ ଆରେ ପିତରତିଙ୍ଗ୍ ବନ୍ଦି କିତାନ୍ 1 ହେପାଦ୍ନା ହେରୋଦ ରାଜା ମଣ୍ଡ୍ଲିନି କେତ୍ଜାଣ୍ ମାନାୟ୍ତିଙ୍ଗ୍ ଦୁକ୍କଷ୍ଟ ହିଦେଙ୍ଗ୍ ହେୱାରିଙ୍ଗ୍ ବନ୍ଦି କିତାନ୍। 2 ହେରୋଦ ରାଜା ବାଚିକିତି ଚେଲା ଯାକୁବଙ୍ଗ୍ କାଣ୍ଡାତାଙ୍ଗ୍ ଅସ୍ତାନ୍। ବାଚିକିତି ଚେଲା ଯୋହନ ଗାଜା ଟଣ୍ଡାହି ଯାକୁବ ମାଚାନ୍। 3 ଇ ବିଷୟରେ ଯିହୁଦି ନେତାର୍ ୱାରି ଆନାକା ହୁଡ଼୍ଜି, ହେରୋଦ ରାଜା ପିତରତିଙ୍ଗ୍ ପା ବନ୍ଦିକିଜି ଅସ୍ତେଙ୍ଗ୍ ଉପାୟ୍ କିତାନ୍। ହେପାଦ୍ନା ସଡ଼ା ମେହାଆୱିତି ରୁଟିତିନି ପାର୍ବୁ ମାଚାତ୍। 4 ପାଚେ ହେୱାନ୍ ହେୱାନିଙ୍ଗ୍ ଆସ୍ତି ଜଇଲ୍ ଇଞ୍ଜ ବନ୍ଦି କିତାନ୍। ଆରେରଗ ଦଳ୍ତାକେ ଚାରି ଜାଣ୍ ଲାକା ମାନି ଚାରିଗଟା ସେନାଦଳ୍ ହେୱାନିଙ୍ଗ୍ କାୟିକିତାନ୍। ହେ ନିସ୍ତାର୍ ପାର୍ବୁ ୱିସ୍ତି ପାଚେ ହେୱାନ୍ ପିତରତିଙ୍ଗ୍ ମାନାୟାର୍ ଲାଗାୟ୍ ଦଣ୍ଡ୍ ହିଦେଙ୍ଗ୍ ଇଚା କିତାନ୍। 5 ଲାଗିଙ୍ଗ୍ ପିତର ଜଇଲ୍ ଇଞ୍ଜ କେତେକ୍ ଦିନ୍ ମାଚାନ୍। ମାତର୍ ଯିରୁଶାଲାମ୍ ସହର୍ ମଣ୍ଡ୍ଲିନି ପାର୍ତିକିନି ମାନାୟାର୍ ପିତର କାଜିଙ୍ଗ୍ ର ମାନ୍ଆଜି ଈଶ୍ୱରତାକେ ପାର୍ତାନା କିଜି ମାଚାର୍। ସରଗ୍ଦୁତ୍ ପିତରତିଙ୍ଗ୍ ଜଇଲ୍ ଇଞ୍ଜାଙ୍ଗ୍ ମୁକ୍ତି କିତାତ୍ 6 ଇମ୍ଣିଦିନ୍ ହେରୋଦ ରାଜା ପିତରତିଙ୍ଗ୍ ବାର୍ତ ହପ୍ଚି ମାନାୟାର୍ ଲାଗାୟ୍ ଦଣ୍ଡ୍ ହିଦେଙ୍ଗ୍ ଇଚାକିଜି ମାଚାନ୍, ହେନାଞ୍ଜ୍ ମିକା ପିତର ରିକାର୍ ସେନାର୍ ମାଦି ହୁନ୍ଞ୍ଜି ମାଚାନ୍। ହେୱାନିଙ୍ଗ୍ ରିଣ୍ଡାଙ୍ଗ୍ ହିକ୍ଡ଼ିଙ୍ଗ୍ତାଙ୍ଗ୍ ଗାଚ୍ଚି ମାଚାର୍। ରିକାର୍ ହୁନ୍ଞ୍ଜି ମାଚାର୍ ଆରେ ରିକାର୍ ଜଇଲ୍ନି ଗେଟ୍ ଲାଗାୟ୍ କାସି ମାଚାର୍। 7 ହେଦାପ୍ରେ ସରଗ୍ଦୁତ୍ ପିତର ଲାଗାୟ୍ ୱାଜି ନିଲ୍ତାତ୍। ଲାଗିଙ୍ଗ୍ ପିତର ମାନି ବାକ୍ରା ଅଜଡ଼୍ ଆତାତ୍। ଆରେ ହେ ଦୁତ୍ ପିତରତିଙ୍ଗ୍ କୁଚିଙ୍ଗା ନିପଣ୍ ଇଡ଼୍ଜି ନିକ୍ଚି ୱେଚ୍ଚାନ୍, “ବେଗି ନିଙ୍ଗା।” ହେବେତାଙ୍ଗ୍ ପିତର କେଇଦ ଗାଚ୍ଚି ହିକ୍ଡ଼ିଙ୍ଗ୍ ରିଙ୍ଗ୍ତିକ୍। 8 ଆରେ ଦୁତ୍ ପିତରତିଙ୍ଗ୍ ୱେଚ୍ଚାତ୍, “ମେଙ୍ଗାକାଙ୍ଗ୍ ଗାଚିଆ ଆରେ ପାଣ୍ଡାୟ୍ ତୁଜା।” ହେୱାନ୍ ହେଲେକେ କିତାନ୍। ଆରେ ଦୁତ୍ ତାଙ୍ଗେଙ୍ଗ୍ ୱେଚାତ୍, “ନି ଆଙ୍ଗି ଉସ୍ପିସ୍ ନା ପାଚେ-ପାଚେ ୱା।” 9 ପିତର ହସି ତାପାଚେ-ପାଚେ ହାଚାନ୍। ମାତର୍ ପିତର ଦୁତ୍ ଇନାକା କିଜି ମାଚାତ୍, ହେଦାଙ୍ଗ୍ ସତ୍ ଇଞ୍ଜି ବାବି କିୱାଦାଙ୍ଗ୍ କେଚ୍କଣ୍ତାକେ ହୁଡ଼୍ନାଙ୍ଗା ଇଞ୍ଜି ମାନ୍ତ ବାବିକିଜି ମାଚାନ୍। 10 ହେୱାର୍ ପାର୍ତୁମ୍ ଗେଟ୍ ଆରେ ଦୁଇ ନମ୍ବର୍ ଗେଟ୍ତାକେ କାସିମାଚି ମାନାୟାରିଙ୍ଗ୍ ଜିତାଆଜି ର ଲୱା ଗେଟ୍ତାକେ ଇକାତାର୍। ହେ ଲୱା ଗେଟ୍ ନିପଣ୍ ଆଜି ସହର୍ତାକେ ହାଲିଆନାତ୍। ହେ ଗେଟ୍ ତା ମାନ୍ତାଙ୍ଗ୍ ଜେୟା ଆତାତ୍। ଆରେ ହେୱାର୍ ହେବେତାଙ୍ଗ୍ ହସି ହାଉଡ଼ି ୱିସ୍ତିତାଙ୍ଗ୍ ହାଚାର୍। ହେଦାପ୍ରେ ଦୁତ୍ ହେୱାନ୍ତାଙ୍ଗ୍ ମାୟାଁ ଆତାତ୍। 11 ହେପାଦ୍ନା ପିତର ହେଦାଙ୍ଗ୍ ନିଜେ ପୁନ୍ଞ୍ଜି ଜାର୍ତିଙ୍ଗ୍ ୱେଚିଆତାନ୍, “ଆନେଙ୍ଗ୍ ନଙ୍ଗୟ୍ ପୁଞ୍ଜେଙ୍ଗ୍ ଆଡ଼୍ତାଙ୍ଗ୍ ଯେ, ମାପୃ ତା ଦୁତ୍ତିଙ୍ଗ୍ ପକ୍ଚି ହେରୋଦ ରାଜା ଶାକ୍ତିତାଙ୍ଗ୍ ଆରେ ଯିହୁଦି ନେତାର୍ ବାବିକିତି ଆହାତାଙ୍ଗ୍ ନାଙ୍ଗେଙ୍ଗ୍ ଉଦାର୍ କିତ୍ତାନ୍ନା।” 12 ମାପୃ ହେୱାନିଙ୍ଗ୍ ରକ୍ଷା କିତାନ୍ନା ଇଞ୍ଜି ପୁଚି ପାଚେ, ହେୱାନ୍ ମାର୍କ ତେହି ମରିୟମ ଇଞ୍ଜ ହାଚାନ୍। ମାର୍କଙ୍ଗ୍ ଜେକନି ତର୍ ଯୋହନ ଇଞ୍ଜି ୱେଚ୍ଚି ମାଚାର୍। ହେ ଇଞ୍ଜ ପାର୍ତି କିନାକାର୍ ରୁଣ୍ଡାଆଜି ପାର୍ତାନା କିଜି ମାଚାର୍। 13 ପିତର ଦୁୱେର୍ନି କାପାଟ୍ତିଙ୍ଗ୍ ଇସ୍ତାନ୍, ରଦା ତର୍ଦି ରଞ୍ଜେଲ୍ ଚାକ୍ରାଣି ଇନେର୍ ଇଞ୍ଜି ୱେନ୍ବେଦେଙ୍ଗ୍ କାପାଟ୍ ଲାଗାୟ୍ ହାଚାତ୍। 14 ହେଦେଲ୍ ପିତର ବେଣ୍ ୱେନ୍ଞ୍ଜି ବେସି ୱାରି ଆତାତ୍। ମାତର୍ ହେଦେଲ୍ କାପାଟ୍ ଜେୱାଦାଙ୍ଗ୍ ବିତ୍ରେ ପାର୍ତାନା କିନି ମାନାୟାର୍ତାକେ ହାଲ୍ଜି ୱେଚ୍ଚାତ୍, “ପିତର କାପାଟ୍ ଲାଗାୟ୍ ନିଲ୍ତାନ୍ନା!” 15 ଲାଗିଙ୍ଗ୍ ହେୱାର୍ ହେଦେଲିଙ୍ଗ୍ ୱେଚ୍ଚାର୍, “ଏନେଙ୍ଗ୍ ବାଉଡ଼ି।” ମାତର୍ ହେଦେଲ୍ ଆକାୟ୍ ହେୱାନ୍ ପିତର ନେ ଇଞ୍ଜି ୱେଚ୍ଚି ମାନ୍ଚାତ୍। ଲାଗିଙ୍ଗ୍ ହେୱାର୍ ୱେଚ୍ଚାର୍, “ଇଦାଙ୍ଗ୍ ତା ଦୁତ୍ ଆଜି ମାନ୍ଗାନାତ୍।” 16 ମାତର୍ ପିତର କାପାଟ୍ତାକେ ବାର୍ମ୍-ବାରମ୍ ଇଡ଼୍ଜି ମାଚାନ୍, ଆରେ ହେୱାର୍ କାପାଟ୍ ଜେସି ପିତରତିଙ୍ଗ୍ ହୁଡ଼୍ଜି ଚାନିଆଆତାର୍। 17 ମାତର୍ ହେୱାନ୍ ହେୱାରିଙ୍ଗ୍ କେଇ ଚଚ୍ଚି ଚିମ୍ରା ଆଦେଙ୍ଗ୍ ୱେଚ୍ଚାନ୍। ଆରେ ହେୱାନିଙ୍ଗ୍ ମାପୃ ଇନେସ୍ ଜଇଲ୍ ଇଞ୍ଜାଙ୍ଗ୍ ବାର୍ତ ହପ୍ତାନ୍, ହେ ୱିଜୁ କାତା ହେୱାରିଙ୍ଗ୍ ୱେଚ୍ଚାନ୍। ଆରେ ହେୱାନ୍ ୱେଚ୍ଚାନ୍, “ଇୱିଜୁ କାତା ଯାକୁବ ଆରେ ଟଣ୍ଡାରିଙ୍ଗ୍ ୱେଚାଟ୍।” ତାପାଚେ ହେୱାନ୍ ହେବେତାଙ୍ଗ୍ ଜେକନି ବାହାତାକେ ହସିହାଚାନ୍। 18 ଅଜଡ଼୍ ଆତିପାଚେ ପିତର ଇମେ ହାଚାନ୍ ଇଞ୍ଜି ଜଇଲ୍ ଇଞ୍ଜିଙ୍ଗ୍ କାସିମାଚି ସେନାର୍ ବିତ୍ରେ ବେସି ଚିନ୍ତା ଆତାର୍। 19 ଆରେ ହେରୋଦ ରାଜା ପିତରତିଙ୍ଗ୍ ଡେକ୍ଚି ଗାଟା ଆୱିତିଲେ, ଜାଗୁୱାଡ଼ିରିଙ୍ଗ୍ ୱେନ୍ବିତି ପାଚେ ହେୱାରିଙ୍ଗ୍ ମାର୍ନେ ଅସ୍ତେଙ୍ଗ୍ ଆଦେସ୍ ହିତାନ୍। ପାଚେ ହେରୋଦ ରାଜା ଯିହୁଦା ଜିଲ୍ଲାତାଙ୍ଗ୍ କାଇସରିଆ ସହର୍ତାକେ ହାଲ୍ଜି ବାହା କିତାନ୍। ହେରୋଦ ରାଜା ହାଃତାନ୍ 20 ହେପାଦ୍ନା ହେରୋଦ ରାଜା ସୋର ସହର୍ ଆରେ ସିଦନ୍ ସହର୍ନି ମାନାୟାର୍ତାକେ ବେସି ରିସାଆଜି ମାଚାନ୍। ହେ ସହର୍ ନିକାର୍ ମାନ୍ଦାଆଜି ରାଜାଙ୍ଗ୍ ମେହାଆଦେଙ୍ଗ୍ ୱାତାର୍। ଆରେ ହେୱାର୍ ରାଜାତାଙ୍ଗ୍ ସାଇଜ ଏନ୍ତେଙ୍ଗ୍ ପାର୍ତୁମ୍ ମନ୍ତ୍ରି ବ୍ଳାସ୍ତ ତର୍ଦାକାନିଙ୍ଗ୍ ୱେଚ୍ଚାର୍। ତାପାଚେ ରାଜା ହୁଦାଙ୍ଗ୍ ଶାନ୍ତିଆଜି ମାଞ୍ଜେଙ୍ଗ୍ ୱେଚ୍ଚାର୍। ଇନେସ୍କି ହେୱାର୍ ରାଜା ସାସନ୍ କିନି ଦେସ୍ତାଙ୍ଗ୍ ତା ଦେସ୍ତାକେ କାଦି କଣ୍ଡା ହାଲ୍ଜି ମାଚାତ୍। 21 ହେ ସହର୍ନି ମାନାୟାର୍ ହୁଦାଙ୍ଗ୍ ମେହାଆଦେଙ୍ଗ୍ ର ବାଚିକିତି ଦିନ୍ତ ହେରୋଦ ରାଜା ଆଙ୍ଗି ଉସ୍ପିସ୍ ବିଚାର୍ କିଦେଙ୍ଗ୍ ସିଙ୍ଗାସନ୍ତାକେ କୁଚ୍ଚାନ୍। ଆରେ ହେୱାନ୍ ହେୱାର୍ ଲାଗାୟ୍ ବାଷଣ୍ ହିଦେଙ୍ଗ୍ ଲାଗାତାନ୍। 22 ହେ ବାଷଣ୍ ୱେନି ମାନାୟାର୍ ଚେରାଆଜି ୱେଚ୍ଚେଙ୍ଗ୍ ଲାଗାତାର୍, “ଇଦାଙ୍ଗ୍ ତ ମାନାୟ୍ କାଟ୍ ଆକାୟ୍, ଇଦାଙ୍ଗ୍ ତ ଈଶ୍ୱର କାଟ୍।” 23 ରାଜା ଈଶ୍ୱରତିଙ୍ଗ୍ ଜୟ୍-ଜୟ୍ କିୱିତିଲେ ହେଦାପ୍ରେ ସରଗ୍ଦୁତ୍ ହେୱାନିଙ୍ଗ୍ ର ରଗ୍ ଗିଟାଇ କିତାତ୍। ଆରେ ହେୱାନିଙ୍ଗ୍ ପିକୁ ଚିଚିଲେ ହେୱାନ୍ ହାଃତାନ୍। 24 ମାତର୍ ପାର୍ତି କିନାକାର୍ ଈଶ୍ୱର କାତାତିଙ୍ଗ୍ ବିନ୍-ବିନ୍ ବାହାତାକେ ଶୁଣାୟ୍ କିଜି ମାଚାର୍। ଆରେ ଯୀଶୁଙ୍ଗ୍ ପାର୍ତି କିନାକାର୍ ପା ବେସି ବାଡା ଆତାର୍। 25 ବର୍ଣ୍ଣବା ଆରେ ଶାଉଲ ଯିହୁଦା ଜିଲ୍ଲାତାକେ ମାନି ପାର୍ତି କିନାକାରିଙ୍ଗ୍ ସାଇଜ କିଦେଙ୍ଗ୍ ଡାବୁଙ୍ଗ୍ ହିତି ପାଚେ, ହେୱାର୍ ଯିରୁଶାଲାମ ସହର୍ତାଙ୍ଗ୍ ଆନ୍ତିୟକିଆ ସହର୍ତାକେ ୱାତାର୍। ହେୱାର୍ ମାର୍କଙ୍ଗ୍ ଆସ୍ତି ହାଚାର୍ ହେୱାନିଙ୍ଗ୍ ଯୋହନ ଇଞ୍ଜି ଇନାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation