ପକ୍ୟାତାକା 11 - New Testament in Pengo Parja Languageଈଶ୍ୱର ବିନ୍ଜାତି ମାନାୟାରିଙ୍ଗ୍ ପା ଜିବୁନ୍ ପାୟାଆନି ଦାନ୍ ହିତାନ୍ନା 1 ବାଚିକିତି ଚେଲାହିର୍ ଆରେ ଯିହୁଦା ଜିଲ୍ଲାତାକେ ମାନି ଜେକନି ଚେଲାର୍ ବିନ୍ଜାତିନି ମାନାୟାର୍ ପା ଈଶ୍ୱର କାତା ୱେଚାର୍ନା ଇଞ୍ଜି ହେଦାଙ୍ଗ୍ ୱେଚାର୍। 2 ଏଚେପାଦ୍ନା ପିତର ଯିରୁଶାଲାମ ସହର୍ତାକେ ୱାତାନ୍, ହେପାଦ୍ନା ଯିହୁଦି ଜାତିନି ସୁନତ ଆତି ପାର୍ତି କିନାକାର୍ ହେୱାନ୍ ହୁଦାଙ୍ଗ୍ ଜୁକ୍ତି କିତାର୍। 3 ଆରେ ହେୱାର୍ ପିତରତିଙ୍ଗ୍ ୱେଚ୍ଚାର୍, “ଏନେଙ୍ଗ୍ ବିନ୍ଜାତିନି ଇଞ୍ଜ ହାଚାଇ, ଆରେ ହେୱାର୍ ହୁଦାଙ୍ଗ୍ ମେହାଆଜି ଚିଚାଇନା।” 4 ଲାଗିଙ୍ଗ୍ ପିତର ଇ ବିଷୟନି ୱିଜୁ କାତା ହେୱାରିଙ୍ଗ୍ ବୁଜାଇ କିଦେଙ୍ଗ୍ ଆରମ୍ କିଜି ୱେଚ୍ଚାନ୍, 5 “ଆନେଙ୍ଗ୍ ଯାପା ସହର୍ତାକେ ପାର୍ତାନା କିଜି ମାଚାଙ୍ଗ୍, ଆରେ ମୁର୍ଚା ଲେକେ ଆଜି ର କେଚ୍କଣ୍ ହୁଡ଼୍ତାଙ୍ଗ୍, ବାଦାଡ଼୍ ଜେୟା ଆଜି ର ଶାଲ୍ ଚାରିଗଟା କନାକାଙ୍ଗ୍ ଆସ୍ତି ତାରେନ୍ ଜୁତ୍ତି ଲେକେ ର ଜିନିଷ୍ ପୁର୍ତିତାକେ ୱାନାକା ହୁଡ଼୍ତାଙ୍ଗ୍। 6 ଆରେ ହେଦାଙ୍ଗ୍ ନା ଲାଗାୟ୍ ପାତେକ୍ ୱାତାତ୍, ହେବେତାଙ୍ଗ୍ ପୁର୍ତିନି ଚାରିଗଡ଼ିଆ ପଶୁ, ରାନ୍ତି ପଶୁଙ୍ଗ୍, ପଟତାଙ୍ଗ୍ ତାଙ୍ଗ୍ନି ଜାତୁଙ୍ଗ୍ ଆରେ ବାଦାଡ଼୍ନି ପଟିଙ୍ଗ୍ ୱିଜୁ ହୁଡ଼୍ତାଙ୍ଗ୍। ଆନେଙ୍ଗ୍ ହେଦାଙ୍ଗ୍ତିଙ୍ଗ୍ ହାରାହାଣ୍କୁ କିଜି ହୁଡ଼୍ଜି ଚିନ୍ତା କିଦେଙ୍ଗ୍ ଲାଗାତାଙ୍ଗ୍। 7 ଆରେ ଈଶ୍ୱର ୱେଚ୍ଚିତି ବେଣ୍ ପା ଆନେଙ୍ଗ୍ ୱେଚାଙ୍ଗ୍, ‘ଏ ପିତର, ନିଙ୍ଗା, ହେ ପଶୁ ବିତ୍ରେତାଙ୍ଗ୍ ଅସ୍ତି ତିନା।’ 8 ମାତର୍ ଆନେଙ୍ଗ୍ ୱେଚ୍ଚାଙ୍ଗ୍, ‘ଆକାୟ୍ ମାପୃ। ଚିଞ୍ଜେଙ୍ଗ୍ ନିୟମ୍ ହିଲ୍ୱି ପଶୁକାଙ୍ଗ୍ ଆନେଙ୍ଗ୍ ଇନାୱେଡ଼ାଙ୍ଗ୍ ପା ତିନ୍ୱାତାଙ୍ଗ୍ନା।’ 9 ଆରେରଗ ସରଗ୍ତାଙ୍ଗ୍ ଈଶ୍ୱର ନାଙ୍ଗେଙ୍ଗ୍ ୱେଚ୍ଚାତାନ୍, ‘ଇମ୍ଣାକା ଆନେଙ୍ଗ୍ ତିନାକା ଇଞ୍ଜି ନିୟମ୍ କିତାଙ୍ଗ୍ନା, ଏନେଙ୍ଗ୍ ହେଦାଙ୍ଗ୍ ଚିଞ୍ଜେଙ୍ଗ୍ ନିୟମ୍ ଆକାୟ୍ ଇଞ୍ଜି ୱେଚ୍ମା।’ 10 ହେଲେକେ ଈଶ୍ୱର ୱେଚ୍ଚାକା ତିନ୍ହଟ୍ ଆତାତ୍, ହେଦାପ୍ରେ ହେ ଜିନିଷ୍ତିଙ୍ଗ୍ ସରଗ୍ଜପି ଅତାନ୍। 11 ହେଦାପ୍ରେ କର୍ଣିଲିୟ ଇମ୍ଣି ତିନ୍ଜାଣ୍ ମାନାୟ୍ତିଙ୍ଗ୍ କାଇସରିଆ ସହର୍ତାଙ୍ଗ୍ ନା ଲାଗାୟ୍ ପକ୍ଚି ମାଚାନ୍, ହେୱାର୍ ଆପେଙ୍ଗ୍ ଇମ୍ଣି ଇଞ୍ଜ ମାଚାପ୍ ହେ ଦୁୱେର୍ ଲାଗାୟ୍ ୱାତାର୍। 12 ହେପାଦ୍ନା ପବିତ୍ର ଆତ୍ମା ନାଙ୍ଗେଙ୍ଗ୍ ୱେଚ୍ଚାତାତ୍, ‘ଇନାକା ଡାଉଟ୍ କିୱାଦାଙ୍ଗ୍ ହେୱାର୍ ହୁଦାଙ୍ଗ୍ ହାଲା।’ ଲାଗିଙ୍ଗ୍ ନା ହୁଦାଙ୍ଗ୍ ମାନି ଚଅଜାଣ୍ ଟଣ୍ଡାର୍ କୁକ୍ତେଙ୍ଗ୍ ୱାଜିମାଚି ମାନାୟାର୍ ହୁଦାଙ୍ଗ୍ ମେହାଆଜି ଆପେଙ୍ଗ୍ କର୍ଣିଲିୟ ଇଞ୍ଜ ହାଚାପ୍। 13 ଲାଗିଙ୍ଗ୍ ହେୱାନ୍ ମାଙ୍ଗେଙ୍ଗ୍ ୱେଚ୍ଚାତାନ୍, ହେୱାନ୍ ରଞ୍ଜାଙ୍ଗ୍ ସରଗ୍ ଦୁତ୍ତିଙ୍ଗ୍ ତାଞ୍ଜ ହୁଡ଼୍ତାଙ୍ଗ୍ ଇଞ୍ଜି ୱେଚ୍ଚାତାନ୍। ଆରେ ହେ ସରଗ୍ଦୁତ୍ ହେୱାନିଙ୍ଗ୍ ୱେଚ୍ଚାତ୍, ‘ଯାପା ସହର୍ତାକେ ମାନାୟ୍ ପକ୍ଚି ପିତରତିଙ୍ଗ୍ କୁକ୍ଚି ତାଡ, ଇନେସ୍କି ଶିମୋନ ଇଞ୍ଜି କୁକ୍ନାର୍। 14 ଈଶ୍ୱର ମିଙ୍ଗେଙ୍ଗ୍ ଆରେ ମି ୱିଜୁ ପରିବାର୍ ୱିଜାକାରିଙ୍ଗ୍ ରକ୍ଷା କିନାନ୍, ହେ ୱିଜୁ ବିଷୟରେ ହେୱାନ୍ ମିଙ୍ଗେଙ୍ଗ୍ ୱେଚ୍ଚାନାନ୍। 15 ପାଚେ ଆନେଙ୍ଗ୍ ବେଣ୍କିନିହିଙ୍ଗ୍ ପେଣ୍ଟିକଷ୍ଟ ପାର୍ବୁ ନାଞ୍ଜିଙ୍ଗ୍ ଇନେସ୍ ମା ଜପି ପବିତ୍ର ଆତ୍ମା ୱାଜି ମାଚାତ୍, ହେଲେକେନେ ହେୱାର୍ ଜପି ପା ୱାତାତ୍।’ 16 ହେପାଦ୍ନା ଯୀଶୁ ମାପୃ ୱେଚ୍ଚିତି ବେଣ୍ ମାନ୍ତ ୱାତାତ୍, ‘ଡୁବନ୍ହିନି ଯୋହନ ଏଜୁକାଙ୍ଗ୍ ଡୁବନ୍ ହିତାନ୍, ମାତର୍ ଈଶ୍ୱର ମିଙ୍ଗେଙ୍ଗ୍ ପବିତ୍ର ଆତ୍ମାତାଙ୍ଗ୍ ଡୁବନ୍ ହିଦ୍ନାନ୍।’ 17 ଆରେ ଆପେଙ୍ଗ୍ ଯୀଶୁ ମାପୃ ଖ୍ରୀଷ୍ଟତାକେ ପାର୍ତିକିନି ସମୟ୍ତ ଈଶ୍ୱର ଇନେସ୍ ମାଙ୍ଗେଙ୍ଗ୍ ଦାନ୍ ହିଜିମାନ୍ଞ୍ଚାନ୍, ହେଲେକେ ହେୱାରିଙ୍ଗ୍ ପା ହାମାନ୍ ଦାନ୍ ହିତାନ୍ନା। ଲାଗିଙ୍ଗ୍ ଆନେଙ୍ଗ୍ ଇନେସ୍ କିଜି ଈଶ୍ୱର ହିତି ଦାନ୍ତିଙ୍ଗ୍ ଟେବାଇ କିଦେଙ୍ଗ୍ ଆଡ୍ନାଙ୍ଗ୍?” 18 ଯିହୁଦି ଜାତିର୍ ପାର୍ତି କିନାକାର୍ ଇ ୱିଜୁବେଣ୍ ୱେଚାର୍ ହେୱାର୍ ଚିମ୍ରା ଆଜି ମାଚାର୍। ଆରେ ଈଶ୍ୱରତିଙ୍ଗ୍ ଜୟ୍-ଜୟ୍ କିଜି ୱେଚ୍ଚାର୍, “ଲାଗିଙ୍ଗ୍ ଈଶ୍ୱର ବିନ୍ଜାତିରିଙ୍ଗ୍ ପା ୱିଜ୍ୱି ଜିବୁନ୍ ପାୟାଆନି କାଜିଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାଦେଙ୍ଗ୍ ଦାନ୍ କିତାନ୍ନା।” ବିନ୍ଜାତିନି ମାନାୟାର୍ ବେସିହେନି ଯୀଶୁଙ୍ଗ୍ ପାର୍ତି କିତାର୍ 19 ସ୍ତିପାନତିଙ୍ଗ୍ ଯିହୁଦି ନେତାର୍ ଅସ୍ତିପାଚେ, ବେସିହେନି ପାର୍ତି କିନାକାର୍ ଯିରୁଶାଲାମ ସହର୍ ପିସ୍ତି ବିନ୍-ବିନ୍ ବାହାତାକେ ହାଚାର୍। କେତ୍ଜାଣ୍ ମାନାୟ୍ ପୈନିକିଆ ଜିଲ୍ଲା, ଆରେ କେତ୍ଜାଣ୍ କୁପ୍ର ଦ୍ୱିପ୍ ଆରେ ଆନ୍ତିୟକିଆ ସହର୍ତାକେ ହାଚାର୍। ହେୱାର୍ ଯିହୁଦି ଜାତିରିଙ୍ଗ୍ ନେ ଯୀଶୁ ବିଷୟରେ ଶୁଣାୟ୍ କିଜି ମାଚାର୍। 20 ମାତର୍ ହେୱାର୍ ବିତ୍ରେତାଙ୍ଗ୍ କେତେକ୍ କୁପ୍ରିୟ ଦ୍ୱିପ୍ ଆରେ କୁରିଣିୟ ସହର୍ନି ମାନାୟାର୍ ଆନ୍ତିୟକିଆ ସହର୍ତାକେ ୱାତାର୍। ଆରେ ହେୱାର୍ ଗ୍ରୀକ୍ ଜାତି ମାନାୟାର୍ତାକେ ଯୀଶୁ ଖ୍ରୀଷ୍ଟ ବିଷୟରେ ହାର୍ଦିକାବୁର୍ ଶୁଣାୟ୍ କିତାର୍। 21 ଆରେ ହେୱାର୍ ହୁଦାଙ୍ଗ୍ ଈଶ୍ୱର ଶାକ୍ତି ମାନାତ୍, ହେଦାଙ୍ଗ୍ କାଜିଙ୍ଗ୍ ହେୱାର୍ ୱେଚ୍ଚି କାବୁର୍ ୱେନ୍ଞ୍ଜି ବିନ୍ଜାତିର୍ ବେସିହେନି ମାନାୟାର୍ ଯୀଶୁତାକେ ପାର୍ତି କିତାର୍। 22 ଆନ୍ତିୟକିଆ ସହର୍ତାକେ ବିନ୍ଜାତିନି ମାନାୟାର୍ ଯୀଶୁଙ୍ଗ୍ ପାର୍ତିକିନି କାବୁର୍, ଯିରୁଶାଲାମ ସହର୍ତାକେ ମାନି ମଣ୍ଡ୍ଲିନି ମାନାୟାର୍ ୱେଚାର୍। ହେବେତାଙ୍ଗ୍ ହେୱାର୍ ଆନ୍ତିୟକିଆ ସହର୍ତାକେ ବର୍ଣ୍ଣବାଙ୍ଗ୍ ପକ୍ତାର୍। 23 ହେୱାନ୍ ହେବେ ଏକିସ୍ ଈଶ୍ୱର ଦୟା ହୁଡ଼୍ଜି ୱାରି ଆତାନ୍। ଆରେ ଯୀଶୁ ମାପୃତାକେ ନେ ପାର୍ତି କିଜି ମାଞ୍ଜେଙ୍ଗ୍ ହେୱାନ୍ ହେୱାରିଙ୍ଗ୍ କେତେକ୍ କାତା ୱେଚ୍ଚି ସାହାସ୍ କିୟିକିତ୍ତାନା। 24 ବର୍ଣ୍ଣବା ରକାନ୍ ହାର୍ଦି ମାନାୟ୍ ମାଚାନ୍। ହେୱାନ୍ ପବିତ୍ର ଆତ୍ମାତାଙ୍ଗ୍ ପୁରାଆଜି ମାଚାନ୍ ଆରେ ଈଶ୍ୱରତିଙ୍ଗ୍ ମାନ୍ ପାରାଣ୍ ହିଜି ପାର୍ତି କିଜି ମାଚାନ୍। ହେବେତାଙ୍ଗ୍ ବେସିହେନି ମାନାୟାର୍ ଯୀଶୁ ମାପୃଙ୍ଗ୍ ପାର୍ତି କିତାର୍। 25 ବର୍ଣ୍ଣବା ଆନ୍ତିୟକିଆ ସହର୍ ପିସ୍ତି ଶାଉଲତିଙ୍ଗ୍ ଦାସ୍ତେଙ୍ଗ୍ ତାର୍ଷ ସହର୍ତାକେ ହାଚାନ୍। 26 ହେୱାନ୍ ହେବେ ଶାଉଲତିଙ୍ଗ୍ ଗିଟାଆତାନ୍। ଆରେ ବର୍ଣ୍ଣବା ହେୱାନିଙ୍ଗ୍ ଆନ୍ତିୟକିଆ ସହର୍ତାକେ କୁକ୍ଚି ତାତାନ୍। ଲାଗିଙ୍ଗ୍ ଶାଉଲ ଆରେ ବର୍ଣ୍ଣବା ହେ ମଣ୍ଡ୍ଲି ହୁଦାଙ୍ଗ୍ ର ବାର୍ହୁ ପାତେକ୍ ମାଚାର୍, ବେସିହେନି ମାନାୟାରିଙ୍ଗ୍ ହିକ୍ଷା ହିତାର୍। ଆରେ ଆନ୍ତିୟକିଆ ସହର୍ତାକେ ପାର୍ତିକିନି ଚେଲାହିରିଙ୍ଗ୍ ପାର୍ତୁମ୍ ଖ୍ରୀଷ୍ଟାନ୍ ଇଞ୍ଜି ୱେଚ୍ଚାର୍। 27 ହେପାଦ୍ନା କେତ୍ଜାଣ୍ ଭବିଷ୍ଯତବକ୍ତାର୍ ଯିରୁଶାଲାମ ସହର୍ତାଙ୍ଗ୍ ଆନ୍ତିୟକିଆ ସହର୍ତାକେ ୱାତାର୍। 28 ହେୱାର୍ ବିତ୍ରେତାଙ୍ଗ୍ ଆଗାବ ତର୍ଦାକାନ୍ ରକାନ୍ ଭବିଷ୍ଯତବକ୍ତା ନିଙ୍ଗ୍ତାନ୍ ଆରେ ଈଶ୍ୱର ଆତ୍ମାତାଙ୍ଗ୍ ପୁରାଆଜି ୱେଚ୍ଚାନ୍, “ପୁର୍ତିନି ଚାରିବେଣ୍ତାଙ୍ଗ୍ ଗାଜା ମାର୍ଡି ଆନାତ୍।” କ୍ଲାଉଦିଅ ତର୍ଦାଙ୍ଗ୍ ରକାନ୍ ରାଜା ମାନିହିଙ୍ଗ୍ ଇ ମାର୍ଡି ଆଜି ମାଚାତ୍। 29 ଲାଗିଙ୍ଗ୍ ଚେଲାର୍ ଆନ୍ତିୟକିଆ ସହର୍ନି ମଣ୍ଡ୍ଲିନି ପାର୍ତି କିନାକାର୍ ଜାର୍ ଶାକ୍ତି ହୁଡ଼୍ଜି, ଯିହୁଦା ଜିଲ୍ଲାତାକେ ମାନି ପାର୍ତିକିନି ଟଣ୍ଡାରିଙ୍ଗ୍ ସାଇଜ ପକ୍ତେଙ୍ଗ୍ ଇଚାକିତାର୍। 30 ଆରେ ହେୱାର୍ ଡାବୁଙ୍ଗ୍ ଇସ୍ପାତାର୍। ଯିରୁଶାଲାମ ସହର୍ତାକେ ମାନି ମଣ୍ଡ୍ଲିନି ପ୍ରାଚିନାରିଙ୍ଗ୍ ହିଦେଙ୍ଗ୍ ବର୍ଣ୍ଣବା ଆରେ ଶାଉଲ କେଇଦ ହେ ଡାବୁଙ୍ଗ୍ ହିତାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation