ପକ୍ୟାତାକା 10 - New Testament in Pengo Parja Languageକର୍ଣିଲିୟ ର କେଚ୍କଣ୍ ହୁଡ଼୍ତି କାତା 1 କାଇସରିଆ ସହର୍ତାକେ କର୍ଣିଲିୟ ତର୍ଦାକାନ୍ ରକାନ୍ ମାନାୟ୍ ମାଚାନ୍। ହେୱାନ୍ ଇତାଲିକ ଦଳ୍ନି ଶହେ ସେନାନି ମୁକ୍ଯା ମାଚାନ୍। 2 ହେୱାନ୍ ରକାନ୍ ଈଶ୍ୱରତିଙ୍ଗ୍ ହେବାକିନାକାନ୍ ମାଚାନ୍। ହେୱାନ୍ ଆରେ ତା ପରିବାର୍ ନିକାର୍ ଈଶ୍ୱରତିଙ୍ଗ୍ ପାଣ୍ଡ୍ରାଆଜି ମାଚାର୍। ହେୱାନ୍ ଯିହୁଦିନି ଗରିବ୍ ମାନାୟାରିଙ୍ଗ୍ ଆଦିକ୍ ଦାନ୍ ହିଜିମାଚାନ୍, ଆରେ ୱିଜୁଦିନ୍ ଈଶ୍ୱରତାକେ ପାର୍ତାନା କିଜି ମାଚାନ୍। 3 ଦିନେକ୍ ମିକାହାରେସ୍ ତିନ୍ଟା ୱେଡ଼ାଙ୍ଗ୍ ହେୱାନ୍ ର କେଚ୍କଣ୍ ହୁଡ଼୍ତାନ୍। ଈଶ୍ୱର ଦୁତ୍ ରକାନ୍ ତା ଲାଗାୟ୍ ୱାଜି କୁକ୍ତାନ୍, “ଏ କର୍ଣିଲିୟ।” 4 କର୍ଣିଲିୟ ଦୁତ୍ତିଙ୍ଗ୍ ମାନ୍ଦିୟାନ୍ କିଜି ହୁଡ଼୍ଜି ପାଣ୍ଡ୍ରାଆଜି ୱେଚ୍ଚାନ୍, “ଏ ମାପୃ ଇନାକା ଇଞ୍ଜ୍ନାୟା?” ହେ ଦୁତ୍ କର୍ଣିଲିୟଙ୍ଗ୍ ୱେଚ୍ଚାତ୍, “ନି ପାର୍ତାନା ଆରେ ଦାନ୍ ହିନାକା ୱିଜୁ ପୁଜା କିନିଲେକେ ଈଶ୍ୱରତିଙ୍ଗ୍ ୱାରି କିନାତା। 5 ନଙ୍ଗୟ୍ ଏନେଙ୍ଗ୍ ଯାପା ସହର୍ତାକେ ମାନାୟାରିଙ୍ଗ୍ ପକ୍ଚି ଶିମୋନତିଙ୍ଗ୍ କୁକ୍ଚି ତାସିୱାଡ, ତା କୁକ୍ନି ତର୍ ପିତର। 6 ପିତର ତଲ୍ କାମାୟ୍ କିନି ଶିମୋନ ଇଞ୍ଜ ଗତେନ୍ଲେକେ ଆଜି ମାନାନ୍। ତା ଇଲ୍ ହାମ୍ଦୁର୍ କାଣ୍ଡିତ ମାନାତ୍।” 7 କର୍ଣିଲିୟ ହୁଦାଙ୍ଗ୍ ଦୁତ୍ ବେଣ୍କିଜି ହାଚି ପାଚେ, ହେୱାନ୍ ତା ଇଞ୍ଜ କାମାୟ୍ କିନି ହଲିଆ ବିତ୍ରେତାଙ୍ଗ୍ ରିକାରିଙ୍ଗ୍, ଆରେ ସେନାର୍ ବିତ୍ରେତାଙ୍ଗ୍ ଈଶ୍ୱରତିଙ୍ଗ୍ ହେବା କିକିନାକାନିଙ୍ଗ୍ ରକାନିଙ୍ଗ୍ କୁକ୍ତାନ୍। 8 ଆରେ ହେୱାରିଙ୍ଗ୍ ୱିଜୁ କାତା ବୁଜାଇକିଜି ଯାପା ସହର୍ତାକେ ପକ୍ତାନ୍। ପିତର ର କେଚ୍କଣ୍ ହୁଡ଼୍ତି କାତା 9 ଆର୍କାତ୍ ନାଞ୍ଜିଙ୍ଗ୍ କର୍ଣିଲିୟ ପକ୍ଚିମାଚି ହେ ତିନ୍ଜାଣ୍ ଯାପା ସହର୍ତାକେ ଏକିନିହିଙ୍ଗ୍, ପିତର ପାର୍ତାନା କିଦେଙ୍ଗ୍ ହେୱାନ୍ ମାନି ଚାତ୍ ଜପି ହାଚାନ୍। ହେପାଦ୍ନା ପାକାପାକି ୱେଡ଼ା ବାର୍ଟା ଆଜି ମାଚାତ୍। 10 ପିତର ନାସ୍କି ଆଜି ଚିଞ୍ଜେଙ୍ଗ୍ ଇଚାକିଜି ମାଚାନ୍। ମାନାୟାର୍ କାଦି ୱାଞ୍ଜ୍ନିହିଙ୍ଗ୍ ହେପାଦ୍ନା ହେୱାନ୍ ଜାକ୍ ଆଜି ଇ କେଚ୍କଣ୍ ହୁଡ଼୍ତାନ୍, 11 ସରଗ୍ ଜେୟା ଆଜି ର ଶାଲ୍ ଚାରିଗଟା କନାକାଙ୍ଗ୍ ଆସ୍ତି ତାରେନ୍ ଜୁତ୍ତି ଲେକେ ର ଜିନିଷ୍ ପୁର୍ତିତାକେ ୱାନାକା ହୁଡ଼୍ତାନ୍। 12 ହେବେତାଙ୍ଗ୍ ପୁର୍ତିନି ୱିଜୁ ପର୍କାର୍ ଚାରିଗଡ଼ିଆ ପଶୁଙ୍ଗ୍, ପଟତାଙ୍ଗ୍ ତାଙ୍ଗ୍ନି ପଶୁଙ୍ଗ୍ ଆରେ ବାଦାଡ଼୍ନି ପଟିଙ୍ଗ୍ ମାନିକ୍। 13 ତାପାଚେ ଈଶ୍ୱର ଇ କାତା ୱେଚ୍ନାକା ପିତର ୱେଚାନ୍, “ଏ ପିତର, ନିଙ୍ଗା, ହେ ପଶୁଙ୍ଗ୍ ବିତ୍ରେତାଙ୍ଗ୍ ଅସ୍ତି ତିନା।” 14 ମାତର୍ ପିତର ୱେଚ୍ଚାନ୍, “ଆକାୟ୍ ମାପୃ। ଚିଞ୍ଜେଙ୍ଗ୍ ନିୟମ୍ ହିଲ୍ୱି ପଶୁକାଙ୍ଗ୍ ଆନେଙ୍ଗ୍ ଇନାୱେଡ଼ାଙ୍ଗ୍ ପା ତିନ୍ୱାତାଙ୍ଗ୍ନା।” 15 ଆରେରଗ ଈଶ୍ୱର ପିତରତିଙ୍ଗ୍ ୱେଚ୍ନାକା ୱେଚାନ୍, “ଇମ୍ଣାକା ଆନେଙ୍ଗ୍ ତିନାକା ଇଞ୍ଜି ନିୟମ୍ କିତାଙ୍ଗ୍ନା, ଏନେଙ୍ଗ୍ ହେଦାଙ୍ଗ୍ ଚିଞ୍ଜେଙ୍ଗ୍ ନିୟମ୍ ଆକାୟ୍ ଇଞ୍ଜି ୱେଚ୍ମା।” 16 ହେଲେକେ ଈଶ୍ୱର ୱେଚ୍ଚାକା ତିନ୍ହଟ୍ ଆତାତ୍, ହେଦାପ୍ରେ ହେ ଜିନିଷ୍ତିଙ୍ଗ୍ ସରଗ୍ଜପି ଅତାନ୍। 17 ପିତର ଇ କେଚ୍କଣ୍ ହୁଡ଼୍ଜି, ଇଦାଙ୍ଗ୍ନି ଅର୍ତ ଇନାକା ଆନାତ୍ ଇଞ୍ଜି ବାବିକିଜି ମାଚାନ୍, ହେଦାପ୍ରେ କର୍ଣିଲିୟ ପକ୍ତି ମାନାୟାର୍ ତଲ୍ କାମାୟ୍ କିନି ଶିମୋନ ଇଲ୍ ଡେକ୍ଚି-ଡେକ୍ଚି ଦୁୱେର୍ ଲାଗାୟ୍ ୱାତାର୍। 18 ହେୱାର୍ ହେ ଇଞ୍ଜାକାରିଙ୍ଗ୍ କୁକ୍ଚି ୱେନ୍ବାତାର୍, ପିତର ଇନେରିଙ୍ଗ୍ ଶିମୋନ ଇଞ୍ଜି ଇନାର୍ ହେୱାନ୍ ଇବେ ଗତେନ୍ଲେକେ ଆଜି ମାନାନ୍ କି? 19 ପିତର ହେ କେଚ୍କଣ୍ ହୁଡ଼୍ତି ବିଷୟ ଚିନ୍ତା କିନିହିଙ୍ଗ୍ ପବିତ୍ର ଆତ୍ମା ହେୱାନିଙ୍ଗ୍ ୱେଚ୍ଚାତ୍, “ଶିମୋନ ନିଙ୍ଗେଙ୍ଗ୍ ତିନ୍ଜାଣ୍ ମାନାୟ୍ ଦାସ୍ତାନାରା। 20 ନିଙ୍ଗା, ତାରେନ୍ ହାଲ୍ଜି ଇନାକା ଡାଉଟ୍ କିୱାଦାଙ୍ଗ୍ ହେୱାର୍ ହୁଦାଙ୍ଗ୍ ହାଲା। ଇନେସ୍କି ଆନେଙ୍ଗ୍ ହେୱାରିଙ୍ଗ୍ ପକ୍ତାତାଙ୍ଗ୍ନା।” 21 ହେବେତାଙ୍ଗ୍ ପିତର ହେ ମାନାୟାର୍ତାକେ ଜୁଜିୱାଜି ୱେଚ୍ଚାନ୍, “ହୁଡ଼ାଟ୍, ଏପେଙ୍ଗ୍ ଇନେରିଙ୍ଗ୍ ଡେକ୍ନାଦେରା, ହେୱାନ୍ ଆନେଙ୍ଗ୍। ଏପେଙ୍ଗ୍ ଇନା କିଦେଙ୍ଗ୍ ୱାତାଦେର୍ନା?” 22 ହେୱାର୍ ୱେଚ୍ଚାର୍, “କର୍ଣିଲିୟ ତର୍ଦାକାନ୍ ରକାନ୍ ଶହେ ସେନାର୍ ମୁକ୍ୟା। ହେୱାନ୍ ଦରମ୍ ମାନାୟ୍ ଆରେ ଈଶ୍ୱରତିଙ୍ଗ୍ ପାଣ୍ଡ୍ରାଆନି ମାନାୟ୍। ଆରେ ୱିଜୁ ଯିହୁଦି ଜାତିର୍ତାକେ ହେୱାନ୍ ସନ୍ମାନ୍ ପାୟା ଆନାନ୍। ନି କାତା ୱେଞ୍ଜେଙ୍ଗ୍ ଇଞ୍ଜ କୁକ୍ଚି ଅଦେଙ୍ଗ୍, ପବିତ୍ର ଦୁତ୍ ହେୱାନିଙ୍ଗ୍ କେଚ୍କଣ୍ତାକେ ଚଞ୍ଜିଆଆଜି ୱେଚ୍ଚାତ୍ନା।” 23 ହେବେତାଙ୍ଗ୍ ପିତର ହେୱାରିଙ୍ଗ୍ ଇଲ୍ ବିତ୍ରେ କୁକ୍ଚି ଦେକାଶୁଣା କିତାନ୍। ଆର୍କାତ୍ ନାଞ୍ଜିଙ୍ଗ୍ ହେୱାନ୍ ନିଙ୍ଗ୍ଞ୍ଜି ହେୱାର୍ ହୁଦାଙ୍ଗ୍ ହାଚାନ୍। ଆରେ ଯାପା ସହର୍ତାକେ ମାନି ମାନାୟାର୍ ବିତ୍ରେତାଙ୍ଗ୍ କେତ୍ଜାଣ୍ ତା ହୁଦାଙ୍ଗ୍ ହାଚାର୍। କର୍ଣିଲିୟ ଇଞ୍ଜ ପିତର ହାଚାନ୍ 24 ତା ଆର୍କାତ୍ ନାଞ୍ଜିଙ୍ଗ୍ ହେୱାର୍ କାଇସରିଆ ସହର୍ତାକେ ହାଚାର୍। ଆରେ କର୍ଣିଲିୟ ଜାର୍ ଲକ୍ବାକ୍ତିଙ୍ଗ୍ ଆରେ ତା ହାଙ୍ଗ୍ଦାକାରିଙ୍ଗ୍ କୁକ୍ଚି ରବେକିଜି ପିତରତିଙ୍ଗ୍ ଆରେ ହେ ପକ୍ତାକାରିଙ୍ଗ୍ କାସି ମାଚାର୍। 25 ପିତର ତାଞ୍ଜ ଏକିତି ଦାପ୍ରେ କର୍ଣିଲିୟ ହେୱାନିଙ୍ଗ୍ ହୁଡ଼୍ଜି ତା କାଲ୍ ତାରେନ୍ ହେୱାନିଙ୍ଗ୍ ସନ୍ମାନ୍ କିଦେଙ୍ଗ୍ ଜୱାର୍ କିତାନ୍। 26 ମାତର୍ ପିତର ହେୱାନିଙ୍ଗ୍ ନିକ୍ଚି ୱେଚ୍ଚାନ୍, “ନିଙ୍ଗା, ଆନେଙ୍ଗ୍ ପା ରକାଙ୍ଗ୍ ମାନାୟ୍ ନେ।” 27 ହେବେତାଙ୍ଗ୍ ପିତର ହେୱାନ୍ ହୁଦାଙ୍ଗ୍ କାତାବାର୍ତା ଆଜି ଇଲ୍ ବିତ୍ରେ ହାଚାର୍। ଆରେ ପିତର ହେବେ ବେସିହେନି ମାନାୟାର୍ ରବେ ରୁଣ୍ଡା ଆତାକା ହୁଡ଼୍ତାନ୍। 28 ଆରେ ହେୱାନ୍ ହେୱାରିଙ୍ଗ୍ ୱେଚ୍ଚାନ୍, ଏପେଙ୍ଗ୍ ପୁଚାଦେର୍ନା ଯିହୁଦିର୍ ମାନାୟାର୍ ବିନ୍ଜାତିର୍ ହୁଦାଙ୍ଗ୍ ମେହାଆଦେଙ୍ଗ୍ କି ହେୱାର୍ ଲାଗାୟ୍ ହାଞ୍ଜେଙ୍ଗ୍ ବିଦି ହିଲେତ୍। ମାତର୍ ଇନେରିଙ୍ଗ୍ ପା ଅଚୁଆଁ ମାନାୟ୍ ଇଞ୍ଜି ୱେଚ୍ୱେଦେଙ୍ଗ୍ ଈଶ୍ୱର ନାଙ୍ଗେଙ୍ଗ୍ ହିକାଇ କିତ୍ତାନ୍ନା। 29 ହେଦାଙ୍ଗ୍ କାଜିଙ୍ଗ୍ ନାଙ୍ଗେଙ୍ଗ୍ କୁକ୍ତିତି ଦାପ୍ରେ ଆନେଙ୍ଗ୍ ପା ମୁନା କିୱାଦାଙ୍ଗ୍ ୱାତାଙ୍ଗ୍। ଲାଗିଙ୍ଗ୍ ଏପେଙ୍ଗ୍ ନଙ୍ଗୟ୍ ୱେଚ୍ଚାଟ୍ ଇନା କିଦେଙ୍ଗ୍ ନାଙ୍ଗେଙ୍ଗ୍ କୁକ୍ତାତାଦେର୍ନା? 30 କର୍ଣିଲିୟ ୱେଚ୍ଚାନ୍, “ଚାରିଦିନ୍ ଆଗେ ଟିକ୍ ଇ ତିନ୍ଟା ୱେଡ଼ାଙ୍ଗ୍ ଆନେଙ୍ଗ୍ ମିକାହାରେସ୍ ମାଞ୍ଜ ପାର୍ତାନା କିଜି ମାଚାଙ୍ଗ୍। ହେଦାପ୍ରେ ଡ଼ିଞ୍ଜ୍ନି ହେନ୍ଦ୍ରା ଉସ୍ପିତି ରକାନ୍ ମାନାୟ୍ ନା ମୁମ୍ଦ ନିଲ୍ଚି ୱେଚ୍ଚାତାନ୍, 31 ‘କର୍ଣିଲିୟ ନି ପାର୍ତାନା କିନାକା ଈଶ୍ୱର ୱେଚାନ୍ନା, ଆରେ ନି ୱିଜୁ ଦାନ୍ ହିନାକା ଈଶ୍ୱରତିଙ୍ଗ୍ ୱାରି କିତାତ୍ନା।’ 32 ଆରେ ହେ ଦୁତ୍ ନାଙ୍ଗେଙ୍ଗ୍ ୱେଚ୍ଚାତାତ୍, ‘ନଙ୍ଗୟ୍ ଏନେଙ୍ଗ୍ ଯାପା ସହର୍ତାକେ ମାନାୟାରିଙ୍ଗ୍ ପକ୍ଚି ଶିମୋନତିଙ୍ଗ୍ କୁକ୍ଚି ତାସିୱାଡ, ହେୱାନ୍ ତଲ୍ କାମାୟ୍ କିନି ପିତର ଇଞ୍ଜ ଗତେନ୍ଲେକେ ଆଜି ମାନାନ୍। ତା ଇଲ୍ ହାମ୍ଦୁର୍ କାଣ୍ଡିତ ମାନାତ୍।’ 33 ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଡେରି କିୱାଦାଙ୍ଗ୍ ନି ଲାଗାୟ୍ ମାନାୟାରିଙ୍ଗ୍ ପକ୍ତାତାଙ୍ଗ୍, ଆରେ ଏନେଙ୍ଗ୍ ୱାଜି ହାର୍ କିତାଇନା। ଲାଗିଙ୍ଗ୍ ଈଶ୍ୱର ନିଙ୍ଗେଙ୍ଗ୍ ଇନାକା ୱିଜୁ ଆଦେସ୍ ହିତ୍ତାନ୍ନା, ହେଦାଙ୍ଗ୍ ୱେନି କାଜିଙ୍ଗ୍ ଆପେଙ୍ଗ୍ ୱିଜାକାପ୍ ଈଶ୍ୱର ମୁମ୍ଦ ରୁଣ୍ଡା ଆତାପ୍ନା।” ପିତର କର୍ଣିଲିୟ ଇଞ୍ଜ ହିକ୍ଷା ହିତାନ୍ 34 ପିତର ହେୱାନିଙ୍ଗ୍ ୱେଚ୍ଚାନ୍, “ନଙ୍ଗୟ୍ ଆନେଙ୍ଗ୍ ବୁଜାଆତାଙ୍ଗ୍ ଈଶ୍ୱର ୱିଜାକାରିଙ୍ଗ୍ ହାମାନ୍ ହୁଡ଼୍ଦାନାନ୍। 35 ଇଦାଙ୍ଗ୍ ନଙ୍ଗୟ୍ ଆନେଙ୍ଗ୍ ହାର୍ଦାଙ୍ଗ୍ ପୁଚାଙ୍ଗ୍ନା, ଈଶ୍ୱରତିଙ୍ଗ୍ ଇମ୍ଣି ଜାତିନି ମାନାୟାର୍ ପା ପାଣ୍ଡ୍ରାଆଜି ଦରମ୍ କାମାୟ୍ କିନାର୍, ହେୱାନିଙ୍ଗ୍ ଈଶ୍ୱର ଆହ୍ନାନ୍। 36 ଈଶ୍ୱର ମା ଇସ୍ରାଏଲ ଜାତିତାକେ ପକ୍ତିତି କାବୁର୍ ଏପେଙ୍ଗ୍ ପୁଚାଦେର୍ନା। ଈଶ୍ୱର ତା ଶାନ୍ତିନି ହାର୍ଦିକାବୁର୍ ୱେଚ୍ଚାତାନ୍ନା। ଇନେସ୍କି ମାନାୟାର୍ ଯୀଶୁ ଖ୍ରୀଷ୍ଟଙ୍ଗ୍ ପାର୍ତି କିଜି ହେୱାର୍ ଈଶ୍ୱର ହୁଦାଙ୍ଗ୍ ଶାନ୍ତିତାଙ୍ଗ୍ ମାଞ୍ଜେଙ୍ଗ୍ ଆଡ୍ନାର୍। ହେୱାନ୍ନେ ୱିଜାକାର୍ ମାପୃ। 37 ଡୁବନ୍ହିନି ଯୋହନ ଡୁବନ୍ହିନି ବିଷୟରେ ହିକ୍ଷା ହିତି ପାଚେ, ଗାଲିଲୀ ଜିଲ୍ଲାତାଙ୍ଗ୍ ଆରମ୍ କିଜି ଯିହୁଦା ଜିଲ୍ଲାତାକେ ଗଟାଆତି ୱିଜୁ ଗଟ୍ନାତିଙ୍ଗ୍ ଏପେଙ୍ଗ୍ ପୁଚାଦେର୍ନା। 38 ଈଶ୍ୱର ନାଜରିତ ସହର୍ତାଙ୍ଗ୍ ୱାତି ଯୀଶୁଙ୍ଗ୍ ପବିତ୍ର ଆତ୍ମା ଆରେ ଶାକ୍ତି ହିତାନ୍। ଈଶ୍ୱର ତା ହୁଦାଙ୍ଗ୍ ମାନି କାଜିଙ୍ଗ୍ ହେୱାନ୍ ୱିଜୁ ନିପଣ୍ ବୁଲାଆଜି ମାନାୟାରିଙ୍ଗ୍ ହାର୍ ଆଦେଙ୍ଗ୍ ସାଇଜ କିତାନ୍, ଆରେ ଶୟତାନ ଆଦିକାର୍ତାକେ ରଗ୍ ଆହିଆତାକାରିଙ୍ଗ୍ ହାର୍କିତାନ୍। 39 ହେୱାନ୍ ଯିହୁଦି ଜାତିର୍ ମାନି ବାହାତାକେ ଆରେ ଯିରୁଶାଲାମ ସହର୍ତାକେ ଇନା-ଇନାକା କାମାୟ୍ କିତାନ୍, ଆପେଙ୍ଗ୍ ହେ ୱିଜୁ ବିଷୟତିଙ୍ଗ୍ ସାକି। ଯିରୁଶାଲାମ ସହର୍ତାକେ ମାନି ଯିହୁଦି ନେତାର୍ ଯୀଶୁଙ୍ଗ୍ କୃଶକାଟ୍ତାକେ ଦୁପ୍ଚି ମାର୍ନେ ଅସ୍ତାର୍। 40 ମାତର୍ ଈଶ୍ୱର ହେୱାନିଙ୍ଗ୍ ତିନ୍ଦିନ୍ତାଙ୍ଗ୍ ଆରେରଗ ଜିବୁନ୍ କିତାନ୍। ଆରେ ୱିଜାକାରିଙ୍ଗ୍ ଚଚ୍ଚାନ୍ନା। 41 ହେୱାନ୍ ୱିଜୁ ଯିହୁଦି ମାନାୟାରିଙ୍ଗ୍ ଚଞ୍ଜି ଆୱାତାନ୍ନା, ମାତର୍ ଈଶ୍ୱର ମାଙ୍ଗେଙ୍ଗ୍ ଆଗେ ବାଚିକିଜି ମାନ୍ଞ୍ଚାନ୍, ଲାଗିଙ୍ଗ୍ ହେୱାନ୍ ମାଙ୍ଗେଙ୍ଗ୍ ନେ ଚଞ୍ଜି ଆତ୍ତାନ୍ନା। ହେୱାନ୍ ହାଃତାକାନ୍ତାଙ୍ଗ୍ ଜିବୁନ୍ଆଜି ନିଙ୍ଗ୍ତି ପାଚେ ଆପେଙ୍ଗ୍ ତା ହୁଦାଙ୍ଗ୍ ଚିଚାପ୍ ଉଟାପ୍। 42 ଯୀଶୁଙ୍ଗ୍ ହାଃତାକାରିଙ୍ଗ୍ ଆରେ ଜିବୁନ୍ ମାନାକାରିଙ୍ଗ୍ ବିଚାର୍ କିଦେଙ୍ଗ୍ ଈଶ୍ୱର ବାଚି କିତାନ୍ନା। ଇ ବିଷୟରେ ୱିଜୁ ମାନାୟାରିଙ୍ଗ୍ ଶୁଣାୟ୍ କିଦେଙ୍ଗ୍, ଆରେ ସାକି ହିଦେଙ୍ଗ୍ ହେୱାନ୍ ମାଙ୍ଗେଙ୍ଗ୍ ଆଦେସ୍ ହିତ୍ତାନ୍ନା। 43 ହେଦାଙ୍ଗ୍ କାଜିଙ୍ଗ୍ ଇମ୍ଣାକାନ୍ ହେୱାନ୍ତାକେ ପାର୍ତିକିନାର୍, ହେୱାନ୍ ତା ତର୍ଦାଙ୍ଗ୍ ପାପ୍ କେମା ପାୟା ଆନାନ୍, ଇ କାତା ୱିଜୁ ଭବିଷ୍ଯତବକ୍ତାର୍ ହେୱାନ୍ ବିଷୟରେ ଶୁଣାୟ୍ କିତାର୍ନା।” ବିନ୍ଜାତିନି ମାନାୟାର୍ ପବିତ୍ର ଆତ୍ମା ପାୟାଆତାର୍ 44 ପିତର ଇ ୱିଜୁବେଣ୍ ୱେଚ୍ନିହିଙ୍ଗ୍ ଏଚେଜାଣ୍ ମାନାୟ୍ ଈଶ୍ୱର କାତା ୱେନ୍ଞ୍ଜି ମାଚାର୍, ହେୱାର୍ ପବିତ୍ର ଆତ୍ମା ପାୟାଆତାର୍। 45 ଲାଗିଙ୍ଗ୍ ବିନ୍ଜାତିନି ମାନାୟାରିଙ୍ଗ୍ ପା ପବିତ୍ର ଆତ୍ମାନି ବର୍ଦାନ୍ ପାୟାଆତାକା ହୁଡ଼୍ଜି, ପିତର ହୁଦାଙ୍ଗ୍ ୱାଜିମାଚି ଯିହୁଦି ଜାତିନି ପାର୍ତିକିନି ମାନାୟାର୍ ଚାନିଆଆତାର୍। 46 ଆରେ ହେୱାର୍ ବିନ୍ଜାତିନି ମାନାୟାର୍ ବାରବିନି ବାଷାତାଙ୍ଗ୍ ବେଣ୍ କିନାକା ଆରେ ଈଶ୍ୱରତିଙ୍ଗ୍ ଜୟ୍-ଜୟ୍ କିନାକା ୱେଚାର୍। 47 ହେପାଦ୍ନା ପିତର ୱେଚ୍ଚାନ୍, “ଇୱାର୍ ପା ମା ଲେକେ ପବିତ୍ର ଆତ୍ମା ପାୟାଆତାର୍ନା। ହେଦାଙ୍ଗ୍ କାଜିଙ୍ଗ୍ ଇନେର୍ ପା ଇ ମାନାୟାରିଙ୍ଗ୍ ଏଜୁକାଙ୍ଗ୍ ଡୁବନ୍ ଅଦେଙ୍ଗ୍ ମୁନା କିଦେଙ୍ଗ୍ ଆଡୁର୍।” 48 ଲାଗିଙ୍ଗ୍ ପିତର ହେ ବିନ୍ଜାତିନି ମାନାୟାରିଙ୍ଗ୍ ଯୀଶୁ ଖ୍ରୀଷ୍ଟ ତର୍ଦାଙ୍ଗ୍ ଡୁବନ୍ ଅଦେଙ୍ଗ୍ ଆଦେସ୍ ହିତାନ୍। ପିତର ଆରେ ତା ହୁଦାଙ୍ଗ୍ ମାଚି ମାନାୟାରିଙ୍ଗ୍ ହେୱାର୍ ହୁଦାଙ୍ଗ୍ କେତେକ୍ ଦିନ୍ ମାଞ୍ଜେଙ୍ଗ୍ ୱେଚ୍ଚାର୍। ଲାଗିଙ୍ଗ୍ ହେୱାର୍ କେତେକ୍ ଦିନ୍ ହେବେ ମାଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation