୩ ଯୋହନ 1 - New Testament in Pengo Parja Languageଗାୟଙ୍ଗ୍ ଯୋହନ ଜୱାର୍ କିତି କାତା 1 ଆନେଙ୍ଗ୍ ଯୋହନ, ଆରେ ଆନେଙ୍ଗ୍ ର ମଣ୍ଡ୍ଲିନି ପ୍ରାଚିନ୍, ଆନେଙ୍ଗ୍ ହାତ୍ପା ଲାଡ୍କିନି ଗାୟ ତାକେ ଇ ଚିଟି ଲେକିକିନାଙ୍ଗା। 2 ଏ ନା ଲାଡ୍ନି ସାଙ୍ଗ, ଆନେଙ୍ଗ୍ ପାର୍ତାନା କିନାଙ୍ଗା ଯେ, ଏନେଙ୍ଗ୍ ଟିକ୍ଟାକ୍ ମାନାଇ। ଆରେ ନି ଗାଗାଡ଼୍ ହାର୍ ମାନାତ୍। ହେଲେକେ ନି ଆତ୍ମା ଈଶ୍ୱର ହୁଦାଙ୍ଗ୍ ହାର୍ ରୱାଣ୍ ଇଡ଼୍ତାୟ୍ନା। 3 ଆନେଙ୍ଗ୍ ବେସି ୱାରିୟା ଆତାଙ୍ଗ୍, ହେପାଦ୍ନା କେତ୍ଜାଣ୍ ଟଣ୍ଡାର୍ ୱାଜି ନାଙ୍ଗେଙ୍ଗ୍ ୱେଚ୍ଚାତାର୍, ଏନେଙ୍ଗ୍ ଈଶ୍ୱର କାତା ମାନିକିଜି ସତ୍ ଯିବୁନ୍ କାଟି କିନାୟା। 4 ଏ ନା ମାଜିର୍ କାଦେର୍, ଏପେଙ୍ଗ୍ ଈଶ୍ୱର ହିକାୟ୍ କିତ୍ତି ସତ୍ କାମାୟ୍ କିନାଦେରା, ହେଦାଙ୍ଗ୍ ୱେନ୍ଞ୍ଜି ଆନେଙ୍ଗ୍ ବେସି ୱାରିୟା ଆତାଙ୍ଗ୍। 5 ଏ ନା ଲାଡ୍ନି ସାଙ୍ଗ, ଏନେଙ୍ଗ୍ ଈଶ୍ୱରତି ହାର୍ଦିକାବୁର୍ ଶୁଣାୟ୍ କିଜି ବୁଲା ଆନି ଟଣ୍ଡାରିଙ୍ଗ୍ ବେସି ସାଇଜ କିନାୟା, ଆରେ ଏନେଙ୍ଗ୍ ପୁନ୍ୱାତାକାରିଙ୍ଗ୍ ପା ସାଇଜ କିନାୟା। 6 ଏନେଙ୍ଗ୍ ହେୱାରିଙ୍ଗ୍ ଲାଡ୍କିନି ବିଷୟ, ଆରେ ହାର୍ ବ୍ଯବହାର୍ କିତି ବିଷୟ ମଣ୍ଡ୍ଲିତାକେ ୱାଜି ୱେଚ୍ନାରା, ନଙ୍ଗୟ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା। ଏନେଙ୍ଗ୍ ଇନେସ୍ ହେୱାରିଙ୍ଗ୍ ସାଇଜ କିଜି ମାଚାୟ୍ ହେଲେକେ ସାଇଜ କିଜି ମାନା, ଲାଗିଙ୍ଗ୍ ଈଶ୍ୱର ୱାରିୟା ଆନାନ୍। 7 ଇନେସ୍କି ହେୱାର୍ ଖ୍ରୀଷ୍ଟଙ୍ଗ୍ ପାର୍ତିକିୱି ମାନାୟାରିଙ୍ଗ୍ ସାଇଜ ଏନ୍ତେଙ୍ଗ୍ ହେୱାର୍ ହତ୍ୱାତାର୍ନା, ମାତର୍ ଖ୍ରୀଷ୍ଟତି ହାର୍ଦିକାବୁର୍ ୱେଚ୍ଚେଙ୍ଗ୍ ୱାତାର୍ନା। 8 ଲାଗିଙ୍ଗ୍ ଆପେଙ୍ଗ୍ ଈଶ୍ୱରତିଙ୍ଗ୍ ପାର୍ତିକିନି ମାନାୟାରିଙ୍ଗ୍, ଆସେଙ୍ଗ୍ ନିଜେ ସାଇଜ କିନି ଦର୍କାର୍, ଆରେ ଆସେଙ୍ଗ୍ ହେୱାର୍ ହୁଦାଙ୍ଗ୍ ମାହାଆଜି ଈଶ୍ୱରତି ସତ୍ ବିଷୟତିଙ୍ଗ୍ ମାନାୟାରିଙ୍ଗ୍ ୱେଚ୍ଚେଙ୍ଗ୍ ଆଡ୍ନାସ୍। 9 ଆନେଙ୍ଗ୍ ଆଗେନି ଚିଟିତାକେ ମି କାଜିଙ୍ଗ୍ ଇ ୱିଜୁ ଲେକିକିଜି ମାଚାଙ୍ଗ୍, ମାତର୍ ଦୀୟତ୍ରଫା ନା ହିକ୍ଷାତିଙ୍ଗ୍ ୱେନ୍ୱାଦାଙ୍ଗ୍ ମାଚାନ୍। ଇନେସ୍କି ହେୱାନ୍ ମଣ୍ଡ୍ଲିନି ପ୍ରାଚିନ୍ ଆଦେଙ୍ଗ୍ ୱିଜୁଦିନ୍ ଇଚା କିଜି ମାଚାନ୍। 10 ଲାଗିଙ୍ଗ୍ ଆନେଙ୍ଗ୍ ଏଚେପାଦ୍ନା ମି ସହର୍ତାକେ ୱାନାଙ୍ଗ୍, ଆନେଙ୍ଗ୍ ୱିଜାକାର୍ ଆଗେ ଦୀୟତ୍ରଫାଙ୍ଗ୍ ନା ବିରଦ୍ତାଙ୍ଗ୍ ଇନାକା ମିଚ୍ କାତା ଇନାନା। ହେଦାଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ପୁନି କିଦ୍ନାଙ୍ଗ୍। ହେୱାନ୍ ଈଶ୍ୱର ହିକ୍ଷାତିଙ୍ଗ୍ ୱେଚ୍ନି ଟଣ୍ଡାରିଙ୍ଗ୍ ମଣ୍ଡ୍ଲିତାକେ ୱାଦେଙ୍ଗ୍ ମୁନା କିନାନା, ହେଦାଙ୍ଗ୍ ହାର୍ ଆକାୟ୍। ଆରେ ଇମ୍ଣି ମାନାୟ୍ ଈଶ୍ୱରତିଙ୍ଗ୍ ହେବା କିନାକାନିଙ୍ଗ୍ ତା ମଣ୍ଡ୍ଲିତାକେ ହିର୍ବାନାର୍, ହେ ହିର୍ବିନି ମାନାୟ୍ତିଙ୍ଗ୍ ମଣ୍ଡ୍ଲିତାଙ୍ଗ୍ ହେୱାନ୍ ହପ୍ନାନା, ଆରେ ହେୱାନ୍ ବିନେନି ମାନାୟାରିଙ୍ଗ୍ ସାଇଜ କିନି ମାନାୟ୍ତିଙ୍ଗ୍ ମୁନା କିନାନା। 11 ଏ ନା ଲାଡ୍ନି ସାଙ୍ଗ କାଦେର୍, କରାପ୍ ମାନାୟାର୍ କାମାୟ୍ତିଙ୍ଗ୍ ଏପେଙ୍ଗ୍ ହିକାଆମାଟ୍, ମାତର୍ ହାର୍ଦି କାମାୟ୍ କିନାକାର୍ କାମାୟ୍ ହିକାଆଡ। ଇମ୍ଣି ମାନାୟ୍ ହାର୍ କାମାୟ୍ କିନାନ୍ ହେୱାନ୍ ଈଶ୍ୱର ମେହି ଇଞ୍ଜି ପୁନ୍ୟା ଆନାତ୍, ଆରେ ଇମ୍ଣି ମାନାୟ୍ କରାପ୍ କାମାୟ୍ କିନାନ୍ ତା କରାପ୍ କାମାୟ୍ତିଙ୍ଗ୍ ହୁଡ଼୍ଜି ପୁନିୟା ଆନାତ୍ ଯେ, ହେୱାନ୍ ଈଶ୍ୱରତିଙ୍ଗ୍ ପୁନ୍ୱାତାନ୍ନା। 12 ୱିଜାର୍ ମାନାୟାର୍ ଇନାରା ଯେ, ଦିମିତ୍ରିୟ ରୱାନ୍ ହାର୍ଦାକାନ୍, ଇନେସ୍କି ହେୱାନ୍ ସତ୍ ଯିବୁନ୍ କାଟି କିନାନା, ହେଦାଙ୍ଗ୍ କାଜିଙ୍ଗ୍ ହେୱାନିଙ୍ଗ୍ ହାର୍ଦାକାନ୍ ଇଞ୍ଜି ଇନାର୍। ଆପେଙ୍ଗ୍ ପା ହେୱାନ୍ ହାର୍ଦାକାନ୍ ଇଞ୍ଜି ଇନାପା, ଆରେ ଏପେଙ୍ଗ୍ ପୁଚାଦେର୍ନା ଯେ ଆପେଙ୍ଗ୍ ୱେଚ୍ଚାକା ୱିଜୁ ସତ୍। ସେସ୍ ଜୁୱାର୍ 13 ଆନେଙ୍ଗ୍ ମିଙ୍ଗେଙ୍ଗ୍ ବେସି ବିଷୟ ୱେଚ୍ଚେଦେଙ୍ଗ୍ ଇଚା କିନାଙ୍ଗା, ମାତର୍ ଚିଟିତାକେ ଲେକିକିଉଙ୍ଗା। 14 ଆନେଙ୍ଗ୍ ଆହା କିନାଙ୍ଗା ଯେ, ଜଲ୍ଦି ମିଙ୍ଗେଙ୍ଗ୍ ହୁଡ଼୍ଗା ୱାନାଙ୍ଗ୍, ଆରେ ଆସେଙ୍ଗ୍ ୱିଜାକାସ୍ ମାହାଆଜି କାତାବାର୍ତା ଆନାସ୍। 15 ଈଶ୍ୱର ମିଙ୍ଗେଙ୍ଗ୍ ଶାନ୍ତି ହିଦେନ୍, ଏ ନା ସାଙ୍ଗ କାଦେର୍ ଆନେଙ୍ଗ୍ ଜୁୱାର୍ କିଦ୍ନାଙ୍ଗା, ଆରେ ନା ଜୁୱାର୍ ହେବେ ମାନି ସାଙ୍ଗରିଙ୍ଗ୍ ୱେଚାଟ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation