୨ ତିମଥି 4 - New Testament in Pengo Parja Languageଈଶ୍ୱର କାତା ଶୁଣାୟ୍ କିଦେଙ୍ଗ୍ ମାନ୍ ହିୟାଟ୍ 1 ଯୀଶୁ ଖ୍ରୀଷ୍ଟ ରାଜା ଲେକେ ବିଚାର୍ କିଦେଙ୍ଗ୍ ୱାନାନ୍, ଜିଜି ମାଚି ମାନାୟାର୍ ଆରେ ହାଃଜି ମାଚି ମାନାୟାରିଙ୍ଗ୍ ହେୱାନ୍ ବିଚାର୍ କିନାନ୍। ଲାଗିଙ୍ଗ୍ ଆନେଙ୍ଗ୍ ଈଶ୍ୱର ରାଜିତିଙ୍ଗ୍ ଆରେ ଖ୍ରୀଷ୍ଟଙ୍ଗ୍ ସାକି ଇଡ଼୍ଜି, ଆନେଙ୍ଗ୍ ମିଙ୍ଗେଙ୍ଗ୍ ଆଦେସ୍ ହିଦ୍ନାଙ୍ଗା, 2 ଈଶ୍ୱର କାତା ଶୁଣାୟ୍ କିୟାଟ୍, ସମୟ୍ତ କି ଅସମୟତ ପା କାତା ଶୁଣାୟ୍ କିଦେଙ୍ଗ୍ ରେଡି ଆଡ। ଏପେଙ୍ଗ୍ ପୁରା ଶାନ୍ତି ଆରେ ମାନ୍ଦିୟାନ୍ କିଜି ମାନାୟାରିଙ୍ଗ୍ ବୁଲ୍ କିନିହିଙ୍ଗ୍ ଟିକ୍ କିୟିକିୟାଟ୍, ପାପ୍ କାମାୟ୍ କିନିହିଙ୍ଗ୍ ରିସା ଆରେ ହେୱାରିଙ୍ଗ୍ ହାର୍ଦି ହିକ୍ଷାହିଜି ସାହାସ୍ ହିୟାଟ୍। 3 ଇନେସ୍କି ସମୟ୍ ୱାନାତ୍, ମାନାୟାର୍ ସତ୍ ହିକ୍ଷାତିଙ୍ଗ୍ ୱେଞ୍ଜେଙ୍ଗ୍ ଇଚା କିଉର୍। ମାତର୍ ହେୱାର୍ କିତୁଲିକାଙ୍ଗ୍ ହୱାଦ୍ ଆନିଲେକେ ବେଣ୍ ୱେଚ୍ନି ମାଷ୍ଟେରାରିଙ୍ଗ୍ ଡେକ୍ନାର୍ ଆରେ ହେୱାର୍ ଜାର୍ ଇଚାତାଙ୍ଗ୍ ଜିବୁନ୍ କାଟିକିନାର୍। 4 ଆରେ ହେୱାର୍ ସତ୍ କାତାତିଙ୍ଗ୍ ୱେନ୍ୱାଦାଙ୍ଗ୍ କାତା ୱେଚ୍ନାକାଦିଙ୍ଗ୍ ୱେଞ୍ଜେଙ୍ଗ୍ ଇଚାକିନାର୍। 5 ମାତର୍ ଏପେଙ୍ଗ୍ ୱିଜୁ ବିଷୟତାଙ୍ଗ୍ ଜାଗ୍ରତ୍ ଆଜି ମାନାଟ୍, କଷ୍ଟତିଙ୍ଗ୍ ମାନି କିୟାଟ୍ ହାର୍ଦିକାବୁର୍ତିଙ୍ଗ୍ ଶୁଣାୟ୍ କିୟାଟ୍ ଆରେ ମି ହେବା କାମାୟ୍ନି କାମାୟ୍ତିଙ୍ଗ୍ ପୁରା କିୟାଟ୍। 6 ଆନେଙ୍ଗ୍ ମିଙ୍ଗେଙ୍ଗ୍ ଇ ଆଦେସ୍ ହିଦ୍ନାଙ୍ଗା, ଇନେସ୍କି ଆନେଙ୍ଗ୍ ପୁନାଙ୍ଗା ଯେ ଆନେଙ୍ଗ୍ ହାଃନି ସମୟ୍ ୱାତାତେ। ଲାଗିଙ୍ଗ୍ ଈଶ୍ୱର କାଜିଙ୍ଗ୍ ନା ଜିବୁନ୍ ଆରେ କାମାୟ୍ ୱିଜ୍ଦେଙ୍ଗ୍ ହାନାତା। 7 ଜୁଜ୍ କିନିତାକେ ମାନି ସେନା ଇନେସ୍ ଜୁଜ୍କିଜି ମାନାନ୍, ହେଲେକେ ଆନେଙ୍ଗ୍ ଖ୍ରୀଷ୍ଟ କାଜିଙ୍ଗ୍ ବେସି କଷ୍ଟ କିନାଙ୍ଗା। ଆନେଙ୍ଗ୍ ହନ୍ନି ଲାଇନ୍ ୱିସ୍ତାଙ୍ଗେ, ଆନେଙ୍ଗ୍ ପାର୍ତିତିଙ୍ଗ୍ ଆସ୍ତି ଇଡ଼୍ତାଙ୍ଗ୍ନା। 8 ମାପୃ ନ୍ୟାୟ୍ତାକେ ବିଚାର୍କିନି ମାନାୟ୍ ଆରେ ବିଚାର୍ କିନିହିଙ୍ଗ୍ ନା କାଜିଙ୍ଗ୍ ଇଡ଼୍ତି ଦରମ୍ନି ମୁକୁଟ୍ ନାଙ୍ଗେଙ୍ଗ୍ ହିଦ୍ନାନ୍। ଆପ୍କା ନାଙ୍ଗେଙ୍ଗ୍ ନେ ପୁରଷ୍କାର୍ ହିଦୁନ୍, ମାତର୍ ଏଚେଜାଣ୍ ହେୱାନ୍ ୱାନି ହାଜ୍ଦିଙ୍ଗ୍ ବେସି ହୁଡ଼୍ଜି ମାନାରା, ହେୱାରିଙ୍ଗ୍ ପା ହିନାନ୍। ପାଉଲ ତିମତିତିଙ୍ଗ୍ କେତେକ୍ ଆଦେସ୍ ହିତାନ୍ 9 ନାବେ ବେଗି ୱାଦେଙ୍ଗ୍ ଉପାୟ୍ କିୟାଟ୍। 10 ଇନେସ୍କି ଦୀମା ଇ ପୁର୍ତିତିଙ୍ଗ୍ ଲାଡ୍କିଜି ନାଙ୍ଗେଙ୍ଗ୍ ପିସ୍ତି ହାନ୍ଞ୍ଚାନ୍ ଆରେ ଥେସଲନିକି ସହର୍ତାକେ ହାଚାନ୍ନା। କ୍ରେସ୍କେନସ୍ ଗାଲାତିୟ ଜିଲ୍ଲାତ ହାଚାନ୍ନା, ଆରେ ତିତସ ଦଲ୍ମତିଆ ସହର୍ତିଙ୍ଗ୍ ହାଚାନ୍ନା। 11 ଆପ୍କା ଲୁକ ନା ହୁଦାଙ୍ଗ୍ ମାନାନ୍। ମାର୍କଙ୍ଗ୍ ମିହୁଦାଙ୍ଗ୍ ତାସିୱାଡ, ଇନେସ୍କି ହେୱାନ୍ ନା ହେବା କାମାୟ୍ତାଙ୍ଗ୍ ସାଇଜ କିଦେଙ୍ଗ୍ ଆଡ୍ନାନ୍। 12 ତୁକିକଙ୍ଗ୍ ଆନେଙ୍ଗ୍ ଏପିସ ସହର୍ତାକେ ପକ୍ତାଙ୍ଗ୍ନା। 13 ତ୍ରୋୟା ସହର୍ତାକେ କାର୍ଫ ଲାଗାୟ୍ ଆନେଙ୍ଗ୍ ଇମ୍ଣି ଜପି ଉସ୍ପିନି କଟ୍ ପିସ୍ତି ୱାତାଙ୍ଗ୍ନା, ଏପେଙ୍ଗ୍ ୱାନି ୱେଡ଼ାଲିଙ୍ଗ୍ ହେଦାଙ୍ଗ୍ ଆରେ ସାସ୍ତର୍, ଦୟାକିଜି ତଲ୍ ଜପି ଲେକାଆତି ବହି ତାସି ୱାନାଦେର୍। 14 ଆଲେକ୍ଜାଣ୍ଡ୍ରିଆ କଂସାରି ହେୱାନ୍ ନାଙ୍ଗେଙ୍ଗ୍ ବେସି ଅନିଷ୍ଟ କିତ୍ତାନ୍ନା। ମାପୃ ତା କାରୁମ୍ତାଙ୍ଗ୍ ହେୱାନିଙ୍ଗ୍ ପାଡ଼୍ ହିନାନ୍। 15 ଏପେଙ୍ଗ୍ ପା ହେୱାନ୍ତାଙ୍ଗ୍ ଜାଗ୍ରତ୍ ଆଜି ମାନାଟ୍। ଇନେସ୍କି ହେୱାନ୍ ଖ୍ରୀଷ୍ଟ ବିଷୟନି ହିକ୍ଷାତିଙ୍ଗ୍ ବେସି ବିରଦ୍ କିଜି ମାନ୍ଞ୍ଚାନ୍। 16 ନା ବିଚାର୍ ଆନି ଦିନ୍ନି ପାର୍ତୁମ୍ ଶୁଣାୟ୍ କିନିହିଙ୍ଗ୍ ଇନେର୍ ପା ନା ସପଟ୍ ଆଦ୍ୱାତାର୍, ମାତର୍ ୱିଜାକାର୍ ନାଙ୍ଗେଙ୍ଗ୍ ପିସ୍ତି ହାନ୍ଞ୍ଚାର୍। ଇଦାଙ୍ଗ୍ ହେୱାର୍ ବିରଦ୍ତାକେ ଈଶ୍ୱର ଗାଣା କିମେନ୍। 17 ମାତର୍ ମାପୃ ନା ନିପଣ୍ ଆଜି ନାଙ୍ଗେଙ୍ଗ୍ ଶାକ୍ତି କିତ୍ତାନ୍, ଆରେ ଆନେଙ୍ଗ୍ ଇନେସ୍ ହାର୍ଦିକାବୁର୍ ପୁରାପୁରି କିଲେର୍ କିଜି ଶୁଣାୟ୍ କିଦେଙ୍ଗ୍ ଆଡ୍ନାଙ୍ଗ୍। ଆରେ ବିନ୍ଜାତିର୍ ୱିଜୁ ମାନାୟାର୍ ହେଦାଙ୍ଗ୍ ୱେଞ୍ଜେଙ୍ଗ୍ ଆଡ୍ନାର୍, ଇଦାଙ୍ଗ୍ କାଜିଙ୍ଗ୍ ହେୱାନ୍ ନାଙ୍ଗେଙ୍ଗ୍ ହାଃନିତାଙ୍ଗ୍ ରକ୍ଷା କିତ୍ତାନ୍। 18 ମାପୃ ନାଙ୍ଗେଙ୍ଗ୍ ୱିଜୁ କରାପ୍ କାମାୟ୍ତାଙ୍ଗ୍ ଉଦାର୍ କିଦ୍ନାନ୍ ଆରେ ନାଙ୍ଗେଙ୍ଗ୍ ରକ୍ଷା କିଜି ତା ସରଗ୍ ରାଜିତାକେ ଅସାହାଞ୍ଜ୍ନାନ୍। ଯୁଗ୍-ଯୁଗ୍ତ ହେୱାନିଙ୍ଗ୍ ଗୌରବ ଆୟେତ୍, ଆମେନ୍। ସେସ୍ ଜୱାର୍ 19 ପ୍ରିସ୍କିଲା ଆରେ ଆର୍କିଲା ଆରେ ଅନୀସିଫରନି ପରିବାର୍ତିଙ୍ଗ୍ ଆନେଙ୍ଗ୍ ଜୱାର୍ କିଦ୍ନାଙ୍ଗା। 20 ଏରାଷ୍ଟ କରନ୍ତିୟ ସହର୍ତାକେ ମାନାରା, ମାତର୍ ତ୍ରପିମ ରଗ୍ ଆତି କାଜିଙ୍ଗ୍ ଆନେଙ୍ଗ୍ ହେୱାନିଙ୍ଗ୍ ମିଲିତ ସହର୍ତାକେ ପିସ୍ତି ୱାତାଙ୍ଗ୍ନା। 21 ଏପେଙ୍ଗ୍ ପିନିମାସ୍ ଆଗେ ୱାଦେଙ୍ଗ୍ ଉପାୟ୍ କିୟାଟ୍। ଇଉବୁଲ୍, ପୁଦେନସ୍, ଲିନ୍, କ୍ଲାଉଦିୟା ଆରେ ଜେକିନି ପାର୍ତିକିନି ଟଣ୍ଡାର୍ ୱିଜାକାପ୍ ମିଙ୍ଗେଙ୍ଗ୍ ଜୱାର୍ କିଦ୍ନାପା। 22 ମାପୃ ମିହୁଦାଙ୍ଗ୍ ମାନେନ୍ ଆରେ ହେୱାନ୍ ମିଙ୍ଗେଙ୍ଗ୍ ଦୟା କିଦେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation