୨ ତିମଥି 3 - New Testament in Pengo Parja Languageଯୁଗ୍ସେସ୍ ୱେଡ଼ାଙ୍ଗ୍ ବୟ୍ଙ୍କାର୍ କଷ୍ଟନି ଦିନ୍ ଆନାତ୍ 1 ଏ ତିମତି ନଙ୍ଗୟ୍ ଇନାକା ଆନେଙ୍ଗ୍ ୱେଚ୍ଚାନାଙ୍ଗ୍ ହେଦାଙ୍ଗ୍ ଏନେଙ୍ଗ୍ ମାନ୍ଦିୟାନ୍ ଆଜି ୱେନା, ଯୁଗ୍ସେସ୍ ୱେଡ଼ାଙ୍ଗ୍ ବୟଙ୍କାର୍ କଷ୍ଟ ଆନାତ୍। 2 ମାନାୟାର୍ ଜାର୍ ବିଷୟରେ ନେ ଜାର୍ତିଙ୍ଗ୍ ବଲ୍ପାୟା ଆନାର୍, ହେୱାର୍ ଦନ୍ତିଙ୍ଗ୍ ଲବ୍ରା ଆନାର୍। ହେୱାର୍ ଜାର୍ ବିଷୟରେ ଗାଜା-ଗାଜା ବାଟ୍ପାଣିଆ ବେଣ୍ କିନାର୍, ଜାର୍ତିଙ୍ଗ୍ ଜେକନି ମାନାୟ୍ତାଙ୍ଗ୍ ହାର୍ ଇଞ୍ଜି ଚଚ୍ନାର୍। ହେୱାର୍ ଜେକନିକାରିଙ୍ଗ୍ ନିନ୍ଦା କାତାକିଜି ବେଣ୍ କିନାର୍, ଆବାର୍ କାତା ମାନିକିଉର୍, ସାଇଜ କିଦ୍ନି ମାନାୟାରିଙ୍ଗ୍ ଦନ୍ଯବାଦ୍ ହିଉର୍, ଈଶ୍ୱର ନିୟମ୍ତିଙ୍ଗ୍ ମାନିକିଉର୍। 3 ହେୱାର୍ ଜେକନିକାରିଙ୍ଗ୍ ଦୟା କିଉର୍, ଜେକନିକାରିଙ୍ଗ୍ କେମା କିଉର୍, ଜେକନିକାର୍ ବିରଦ୍ତାକେ ମିଚ୍ କାତା ୱେଚ୍ନାର୍। ହେୱାର୍ ଜାର୍ ଇଚାତାଙ୍ଗ୍ କଣ୍ଟ୍ରୁଲ୍ କିଉର୍, ଅମାନ୍ଯା ମାନ୍ ଆନାର୍, ହେୱାର୍ ହାର୍ଦି ବିଷୟତିଙ୍ଗ୍ ମାନିକିଉର୍। 4 ହେୱାର୍ ଟକୁୱା ହେବେ, ହେୱାର୍ ଇନାକା ବୁଜାଆୱାଦାଙ୍ଗ୍ କାମାୟ୍ କିନାର୍, ଜାର୍ତିଙ୍ଗ୍ ଗାଜାକାଙ୍ଗ୍ ଇଞ୍ଜି ବାବିକିନାର୍, ଆରେ ହେୱାର୍ ଈଶ୍ୱରତିଙ୍ଗ୍ ଲାଡ୍ କିୱାଦାଙ୍ଗ୍ ୱାରିତାଙ୍ଗ୍ ମାଞ୍ଜେଙ୍ଗ୍ ଇଚାକିନାର୍। 5 ହେୱାର୍ ଈଶ୍ୱରତିଙ୍ଗ୍ ସନ୍ମାନ୍ କିତିଲେକେ ଚଚ୍ନାର୍, ମାତର୍ ହେୱାର୍ ଜିବୁନ୍ତିଙ୍ଗ୍ ବାଦ୍ଲାଇ କିଦେଙ୍ଗ୍ ହେୱାର୍ ଈଶ୍ୱର ଶାକ୍ତିତିଙ୍ଗ୍ ମାନିକିଉର୍। ଇ ଲେକେ ମାନାୟାର୍ ହୁଦାଙ୍ଗ୍ ମାହା ଆମା। 6 ଇନେସ୍କି ଇୱାର୍ ବିତ୍ରେତାଙ୍ଗ୍ କେତେକ୍ ମାନାୟାର୍ ଇଞ୍ଜ-ଇଞ୍ଜ ହଣ୍ଜି ପାପ୍ କାମାୟ୍ କିଜି ଚିନ୍ତାତାଙ୍ଗ୍ ମାନାର୍ ଆରେ ବାରବିନି କରାପ୍ ଚିନ୍ତାରେ ମାନି କଗ୍ଲେକାଙ୍ଗ୍ ହେୱାର୍ ତା କଣ୍ଟ୍ରୁଲ୍ତାକେ ଇଟ୍ନାର୍। 7 ଇ କଗ୍ଲେକ୍ ୱିଜୁଦିନ୍ ବିନ୍-ବିନ୍ ହିକ୍ଷା ହିକାଆନିକ୍, ମାତର୍ ହେୱେକ୍ ଇନାୱେଡ଼ାଙ୍ଗ୍ ପା ଯୀଶୁ ଖ୍ରୀଷ୍ଟ ବିଷୟରେ ସତ୍ ହିକ୍ଷା ପୁଞ୍ଜେଙ୍ଗ୍ ଆଡୁକ୍। 8 ଆରେ ଇନେସ୍ ଯନ୍ନିସ୍ ଆରେ ଯମ୍ୱ୍ରସ୍ ମୋଶାଙ୍ଗ୍ ବିରଦ୍ କିଜି ମାଚାର୍, ହେଲେକେ ମିଚ୍ୱା ମାଷ୍ଟେରାର୍ ପା ସତ୍ତିଙ୍ଗ୍ ବିରଦ୍ କିନାର୍। ହେୱାର୍ ମାନ୍ ବିତ୍ରେ କରାପ୍ ଚିନ୍ତା ମାନାତ୍ ଆରେ ପାର୍ତିକିନି ବିଷୟରେ ପିସ୍ତାର୍ନା। 9 ହେୱାର୍ ବେସି ସମୟ୍ ମାନାୟାରିଙ୍ଗ୍ ଟକାଇ କିଦେଙ୍ଗ୍ ଆଡୁର୍ ଆରେ ତା ଟକାଇ କିନାକା ପୁରା ଆଉତ୍। ଇନେସ୍କି ମାନାୟାର୍ ଇନେସ୍ ଯନ୍ନିସ୍ ଆରେ ଯମ୍ୱ୍ରସ୍ ଇ ରିକାରିଙ୍ଗ୍ ମୁର୍କ ଇଞ୍ଜି ପୁଚାର୍, ହେଲେକେ ମାନାୟାର୍ ଇୱାର୍ ମୁର୍କ ବିଷୟରେ ପା ପୁନାର୍। ୱିଜୁ ସାସ୍ତର୍ ଈଶ୍ୱରତାଙ୍ଗ୍ ୱାତାତ୍ନା 10 ମାତର୍ ନା ହିକ୍ଷା ହିନାକା ଇନେସ୍, ଚାଲିଚଲନ୍ ଇନେସ୍, ନା ଯଜ୍ନା ଇନେସ୍, ନା ପାର୍ତି କିନାକା ଇନେସ୍, ଆରେ ଆନେଙ୍ଗ୍ ଇନାକା ସମ୍ବାଲି କିନାକା ଏପେଙ୍ଗ୍ ପୁଚାଦେର୍ନା। ଏପେଙ୍ଗ୍ ପୁଚାଦେର୍ନା ଯେ ୱିଜୁ ମାନାୟାର୍ ହୁଦାଙ୍ଗ୍ ଶାନ୍ତିଆଜି ମାନ୍ଞ୍ଜି ଆରେ ଲାଡ୍ କିନାନ୍, ଆନେଙ୍ଗ୍ ସାସ୍ ଆସ୍ତି ମାନାଙ୍ଗ୍, 11 ମାନାୟାର୍ ନାଙ୍ଗେଙ୍ଗ୍ ଦୁକ୍କଷ୍ଟ ଆରେ ବେସିଦୁକ୍ ହିତାର୍ନା। ଆନ୍ତିୟକିଆ, ଇକନିୟ ଆରେ ଲୁସ୍ତ୍ରା ସହର୍କୁକାଙ୍ଗ୍ ନା ହୁଦାଙ୍ଗ୍ ଇନାକା ୱିଜୁ ଗଟାଆତାତ୍ନା ହେ ବିଷୟରେ ଏପେଙ୍ଗ୍ ପୁଚାଦେର୍ନା। ଆନେଙ୍ଗ୍ ହେ ୱିଜୁ ମାନିକିଜି ମାଚାଙ୍ଗ୍, ଆରେ ମାପୃ ନାଙ୍ଗେଙ୍ଗ୍ ହେ ୱିଜୁତାଙ୍ଗ୍ ଉଦାର୍ କିଜି ମାନ୍ଞ୍ଚାନ୍। 12 ସତ୍ରେ ଇମ୍ଣାକାନ୍ ଯୀଶୁ ଖ୍ରୀଷ୍ଟତାକେ ପାର୍ତିକିନାର୍ ଆରେ ଇନାକା ଈଶ୍ୱରତିଙ୍ଗ୍ ୱାରି କିୟିକିନାର୍ କି ହାର୍ ଲାଗ୍ଦାନାତ୍ ହେଦାଙ୍ଗ୍ କିଦେଙ୍ଗ୍ ଇଚାକିନାର୍, ହେୱାର୍ ଦୁକ୍କଷ୍ଟ ପାୟାଆନାର୍। 13 ମାତର୍ କରାପ୍ ମାନାୟାର୍ ଆରେ ଟକ୍ୱା ମାନାୟାର୍ ଆଦିକ୍ତାଙ୍ଗ୍ ଆଦିକ୍ କରାପ୍ କାମାୟ୍ କିନାର୍। ହେୱାର୍ ମାନାୟାରିଙ୍ଗ୍ ଟକାଇ କିନାର୍ ଆରେ ନିଜେ ପା ଜେକନିକାର୍ତାଙ୍ଗ୍ ଟକାଇ କିୟିଆନାର୍। 14 ମାତର୍ ଆପେଙ୍ଗ୍ ଇନା-ଇନାକା ହିକ୍ଷା ହିତ୍ତାପ୍ନା ହେଦାଙ୍ଗ୍ ପାର୍ତିକିୟାଟ୍, ହେଦାଙ୍ଗ୍ ଏପେଙ୍ଗ୍ ସତ୍ ଇଞ୍ଜି ପୁଚାଦେର୍ନା। ଇନେସ୍କି ଏପେଙ୍ଗ୍ ପୁଚାଦେର୍ନା ଆରେ ପାର୍ତି କିଦେଙ୍ଗ୍ ଆଡ୍ନାଦେର୍ ଇନେର୍ ମିଙ୍ଗେଙ୍ଗ୍ ହିକାଇ କିତ୍ତାର୍ନା। 15 ଏପେଙ୍ଗ୍ ହିରୁ ୱାଡ଼ାତାଙ୍ଗ୍ ସାସ୍ତର୍ ବିଷୟରେ ପୁଚାଦେର୍ନା ଯେ ଯୀଶୁ ଖ୍ରୀଷ୍ଟତାକେ ପାର୍ତି କିନାସ୍ ଆରେ ଉଦାର୍ ପାୟାଆନି କାଜିଙ୍ଗ୍ ହେଦାଙ୍ଗ୍ ବୁଦି ହିଦେଙ୍ଗ୍ ଆଡ୍ନାଦେର୍ ଇଞ୍ଜି। 16 ୱିଜୁ ସାସ୍ତର୍ ଈଶ୍ୱରତାଙ୍ଗ୍ ୱାତାତ୍ନା। ଇଦାଙ୍ଗ୍ ହାର୍ଦି ହିକ୍ଷାହିନି କାଜିଙ୍ଗ୍, ବୁଲ୍ଟିକ୍ ବିଷୟରେ ହିକାଇ କିନି କାଜିଙ୍ଗ୍, ବୁଲ୍ କାମାୟ୍ତିଙ୍ଗ୍ ଟିକ୍ କିଦେଙ୍ଗ୍, ଆରେ ଇନାକା ଟିକ୍ ହେଦାଙ୍ଗ୍ କିଦେଙ୍ଗ୍ ହିକ୍ଷାହିଦେଙ୍ଗ୍ ସାଇଜ କିଦ୍ନାନ୍। 17 ଇନେସ୍ ଈଶ୍ୱରନି ମାନାୟ୍ ପୁରାପୁରି ଟିକ୍ ଆନାର୍ ଆରେ ୱିଜୁ ହାର୍ଦି କାମାୟ୍ କିଦେଙ୍ଗ୍ ରେଡି ଆଜି ମାନ୍ଗାନାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation