୨ ତିମଥି 2 - New Testament in Pengo Parja Languageଯୀଶୁ ଖ୍ରୀଷ୍ଟନି ହାର୍ଦି ସେନା ଆଡ 1 ଲାଗିଙ୍ଗ୍ ଏ ନା ମାଜି ତିମତି, ଯୀଶୁ ଖ୍ରୀଷ୍ଟନି ଇମ୍ଣି ଦୟା ନିଙ୍ଗେଙ୍ଗ୍ ହିତ୍ତାନ୍ନା ହେବେତାଙ୍ଗ୍ ଜାର୍ତିଙ୍ଗ୍ ସାହାସ୍ କିୟା। 2 ଆନେଙ୍ଗ୍ ନିଙ୍ଗେଙ୍ଗ୍ ବେସି ମାନାୟାର୍ ମୁମ୍ଦ ଯୀଶୁ ଖ୍ରୀଷ୍ଟ ବିଷୟରେ ୱେଚ୍ନାକା ୱେଚାଙ୍ଗ୍ନା। ଇମ୍ଣାକାର୍ ଜେକନିକାରିଙ୍ଗ୍ ପା ହିକ୍ଷାହିଦେଙ୍ଗ୍ ଆଡ୍ନାର୍, ଇଲେକେ ବିଶ୍ୱସ୍ତ ମାନାୟାରିଙ୍ଗ୍ ହେ କାତା ୱେଚା। 3 ଯୀଶୁ ଖ୍ରୀଷ୍ଟନି ରକାନ୍ ହାର୍ଦି ସେନା ଲେକେ ଆଜି ନା ହୁଦାଙ୍ଗ୍ ମାହାଆଜି ଦୁକ୍କଷ୍ଟ ପାୟା ଆ। 4 ରକାନ୍ ସେନାଦଳ୍ନି କାମାୟ୍ କିନିହିଙ୍ଗ୍ ହେୱାନ୍ ଜେକ ଆରେ ର କାମାୟ୍ କିଉନ୍। ଇନେସ୍କି ହେୱାନ୍ ତା ଗାଜା ଅପିସର୍ତିଙ୍ଗ୍ ୱାରି କିୟିକିଦେଙ୍ଗ୍ ଇଚାକିନାନ୍। 5 ହେଲେକେ ରକାନ୍ ମାନାୟ୍ କେଲ୍ତାକେ ତର୍ ଲେକାଇ କିତାନ୍, କେଲ୍ କାଜ୍ନି ନିୟମ୍ତାଙ୍ଗ୍ କାଜ୍ୱିତିସ୍, ହେୱାନ୍ ଇନାୱେଡ଼ାଙ୍ଗ୍ ପା ପୁରଷ୍କାର୍ ପାୟା ଆଉନ୍। 6 ଇମ୍ଣାକାନ୍ କାମାୟ୍ କିନାକାନ୍ ବେସି କଷ୍ଟ କିନାନ୍, ହେୱାନ୍ ନେ ପାର୍ତୁମ୍ ତିନି ଦର୍କାର୍। 7 ଆନେଙ୍ଗ୍ ନଙ୍ଗୟ୍ ଇନାକା ୱେଚ୍ଚାତାଙ୍ଗ୍, ହେ ବିଷୟରେ ଚିନ୍ତା କିୟା। ଇ ୱିଜୁ ବିଷୟରେ ବୁଜା ଆଦେଙ୍ଗ୍ ମାପୃ ନିଙ୍ଗେଙ୍ଗ୍ ସାଇଜ କିଦ୍ନାନ୍। 8 ଯୀଶୁ ଖ୍ରୀଷ୍ଟ ବିଷୟରେ ୱିଜୁଦିନ୍ ଏନେଙ୍ଗ୍ ମାନ୍ତ ଏତୁକିଜି ମାନା। ହେୱାନ୍ ଦାଉଦ ରାଜା ଲାତ୍ରାନି ମାନାୟ୍ ଆରେ ଈଶ୍ୱର ହେୱାନିଙ୍ଗ୍ ହାଃତି ମାନାୟାର୍ତାଙ୍ଗ୍ ଆରେରଗ ଜିବୁନ୍ କିଜି ନିକ୍ତାନ୍ନା। ଇ ହାର୍ଦିକାବୁର୍ ଆନେଙ୍ଗ୍ ଶୁଣାୟ୍ କିନାଙ୍ଗା। 9 ଇ ହାର୍ଦିକାବୁର୍ ଶୁଣାଇକିତି କାଜିଙ୍ଗ୍ ଆନେଙ୍ଗ୍ ରକାଙ୍ଗ୍ ଦସି ଲେକେ ଗାଚିୟାଆଜି ଜଇଲ୍ ଇଞ୍ଜ ଦୁକ୍ ପାୟାଆନାଙ୍ଗା। ମାତର୍ ଇନେର୍ ପା ଈଶ୍ୱର କାତା ଶୁଣାୟ୍ କିନି କାଜିଙ୍ଗ୍ ବନ୍ଦି କିଦ୍ଦେଙ୍ଗ୍ ଆଡ଼୍ଦୁର୍। 10 ଲାଗିଙ୍ଗ୍ ଈଶ୍ୱର ବାଚିକିତି ମାନାୟାର୍ ଇନେସ୍ ଯୀଶୁ ଖ୍ରୀଷ୍ଟତାକେ ପାର୍ତି କିଜି ଉଦାର୍ ପାୟାଆନାର୍, ଆରେ ୱିଜୁଦିନ୍ ମାନି ଗୌରବ ପାୟାଆନାର୍। ଇଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ହେୱାର୍ କାଜିଙ୍ଗ୍ ୱିଜୁ ବିଷୟତିଙ୍ଗ୍ ସାହାସ୍ ଆସ୍ତି ମାଞ୍ଜେଙ୍ଗ୍ ରେଡି ମାନାଙ୍ଗ୍। 11 ଇ କାତା ପାର୍ତିକିନି ଦର୍କାର୍, ଯଦି ଆସେଙ୍ଗ୍ ଖ୍ରୀଷ୍ଟ ହୁଦାଙ୍ଗ୍ ହାଃତାସ୍ନା, ଲାଗିଙ୍ଗ୍ ହେୱାନ୍ ହୁଦାଙ୍ଗ୍ ପା ଜିବୁନ୍ ଆନାସ୍। 12 ଯଦି ଆସେଙ୍ଗ୍ ହେୱାନ୍ କାଜିଙ୍ଗ୍ ସାହାସ୍ ଆସ୍ତି କିନାସ୍, ଲାଗିଙ୍ଗ୍ ହେୱାନ୍ ହୁଦାଙ୍ଗ୍ ପା ରାଜା ଲେକେ ଆଜି ସାସନ୍ କିନାସ୍। ଯଦି ଆସେଙ୍ଗ୍ ହେୱାନିଙ୍ଗ୍ ପୁନୁଙ୍ଗ୍ ଇଞ୍ଜି ୱେଚ୍ନାସ୍, ଲାଗିଙ୍ଗ୍ ହେୱାନ୍ ପା ମାଙ୍ଗେଙ୍ଗ୍ ତା ମାନାୟ୍ ଇଞ୍ଜି ୱେଚୁନ୍। 13 ଆସେଙ୍ଗ୍ ଖ୍ରୀଷ୍ଟତାକେ ବିଶ୍ୱସ୍ତ ଆୱିତିସ୍ପା, ହେୱାନ୍ ମା ଲାଗାୟ୍ ୱିଜୁଦିନ୍ ବିଶ୍ୱସ୍ତ ଆଜି ମାନ୍ଗାନାନ୍। ଇନେସ୍କି ହେୱାନ୍ ନିଜେ ମିଚ୍ ଇଞ୍ଜି ୱେଚୁନ୍। ଈଶ୍ୱର ଆସ୍ତିନି ଲେକେ କାମାୟ୍ କିୟାଟ୍ 14 ଆନେଙ୍ଗ୍ ୱେଚ୍ଚି ମାନ୍ଞ୍ଚି ଇୱିଜୁ କାତା ପାର୍ତି କିନାକାରିଙ୍ଗ୍ ବାଣା ଆମାଟ୍ ଇଞ୍ଜି ୱେଚା। ର କାତାତିଙ୍ଗ୍ ଅଜି ଯୁକ୍ତି କିୱେଦେଙ୍ଗ୍, ମାପୃତିଙ୍ଗ୍ ସାକି ଇଡ଼୍ଜି ହେୱାରିଙ୍ଗ୍ ଜାଗ୍ରତ୍ କିୟିକିୟା। ଇନେସ୍କି ଇଲେକେ ଯୁକ୍ତି କିବା ଆନାକା ଇନା ମୁଲ୍ଯ ଆକାୟ୍, ମାତର୍ ଇଦାଙ୍ଗ୍ ୱେଚି ମାନାୟାରିଙ୍ଗ୍ ଗାଜା କଷ୍ଟ ହିନାତ୍। 15 ବେସି କଷ୍ଟ କାମାୟ୍ କିନି ମାନାୟ୍ ଇନେସ୍ ତା ଜାର୍ କାମାୟ୍ ବିଷୟରେ ଲାଜ୍ ପାୟା ଆତିଲେକେ କାମାୟ୍ କିଉନ୍, ଆରେ ଈଶ୍ୱର ସତ୍ କାତା ଇନେସ୍ ରକାନ୍ ମାନାୟ୍ ଟିକ୍ ବାବ୍ରେ ହିକ୍ଷା ହିନାନ୍। ହେଲେକେ ଏପେଙ୍ଗ୍ ପା ଈଶ୍ୱର ଆସ୍ତିତି ଲେକେ କାମାୟ୍ କିୟାଟ୍। 16 ମାତର୍ ଈଶ୍ୱରତିଙ୍ଗ୍ ସନ୍ମାନ୍ ଆୱିତି ଲେକେ ବେଣ୍ବାଟ୍ତାଙ୍ଗ୍ ଦେହା ମାନାଟ୍। ଇନେସ୍କି ଇମ୍ଣାକାର୍ ହେବେ ମାହାଆନାର୍, ହେୱାର୍ ଈଶ୍ୱରତିଙ୍ଗ୍ ବେସି ଅପ୍ମାନ୍ କିନାର୍। 17 ଗାଉ ଇନେସ୍ ଗାଜା ଆଜି ଗାଗାଡ଼୍ନି ତଲ୍ତିଙ୍ଗ୍ ନଷ୍ଟ କିନାତ୍ ହେ ଲେକେ ହେୱାର୍ କାତା ପା ବାଡା ଆଜି ମାନାୟାର୍ ପାର୍ତି କିନାକାଦିଙ୍ଗ୍ ପା ନଷ୍ଟ କିନାତ୍। ହୁମନାୟ ଆରେ ଫିଲୀତ ଇ ରିକାର୍ ହେ ଲେକେ ମାନାୟାର୍। 18 ହେୱାର୍ ସତ୍ କାତାତିଙ୍ଗ୍ ପିସ୍ତି ଜେକନି ହାଜ୍ଦିଙ୍ଗ୍ ହାନାରା। ହେୱାର୍ ଆରେରଗ ଜିବୁନ୍ଆଜି ନିଙ୍ଗ୍ତାରେ ଇଞ୍ଜି ୱେଚ୍ଚି, କେତେକ୍ ପାର୍ତି କିନାକାର୍ ପାର୍ତିତିଙ୍ଗ୍ ବାଙ୍ଗାଇ କିନାରା। 19 ପାଉଣ୍ଡେସେନ୍ ଇନେସ୍ ପୁରା ଆଟ୍ୱା ଆଜି ମାନ୍ଗାନାତ୍ ହେଲେକେ ଈଶ୍ୱର ମାନାୟାର୍ ମାନ୍ଗାନାର୍। ଇ ପାଉଣ୍ଡେସେନ୍ ଜପି ଇଦାଙ୍ଗ୍ ଲେକାଆତାତ୍ନା, “ମାପୃ ତା ଜାର୍ ମାନାୟାରିଙ୍ଗ୍ ପୁଚାନ୍ନା।” ଆରେ, “ଇନେର୍ ମାପୃ ତର୍ଦାଙ୍ଗ୍ ହେବା କିନାନ୍, ହେୱାନ୍ କରାପ୍ କାମାୟ୍ କିନାକା ପିହେନ୍।” 20 ର ଗାଜା ଇଞ୍ଜ ଆପ୍କା ହନା ଆରେ ରୁପା ଟାଙ୍ଗା ମାନ୍ଗାନାତ୍, ହେଦାଙ୍ଗ୍ ଆକାୟ୍, ମାତର୍ ମାର୍ ଆରେ ଚିକ୍ଲାନି ଟାଙ୍ଗା ପା ମାନ୍ଗାନାତ୍। କେତେକ୍ ବେସି ଦାମ୍ନି ଜିନିଷ୍ ହାର୍ଦି ନାଞ୍ଜିଙ୍ଗ୍ ବ୍ଯବହାର୍ କିୟାଆନାତ୍ ଆରେ କେତେକ୍ ସାସ୍ତା ଜିନିଷ୍ ୱିଜୁଦିନ୍ ପା ବ୍ଯବହାର୍ କିୟାଆନାତ୍। 21 ଲାଗିଙ୍ଗ୍ ଇମ୍ଣି ପାର୍ତିକିନି ମାନାୟାର୍ ଜାର୍ତିଙ୍ଗ୍ ୱିଜୁ କରାପ୍ ବିଷୟତାଙ୍ଗ୍ ଦେହା ମାନ୍ଗାନାନ୍, ହେୱାନ୍ ରକାନ୍ ହାର୍ଦି ସମୟ୍ତ ବ୍ଯବହାର୍ କିତିଲେକେ ସନ୍ମାନ୍ ପାୟା ଆନାନ୍। ହେୱାନ୍ ଦରମ୍ ମାନାୟ୍ ଆନାନ୍ ଆରେ ମାଲିକ୍ନି ବ୍ଯବହାର୍ କାଜିଙ୍ଗ୍ ହେୱାନ୍ ଟିକ୍ ଆନାନ୍। 22 ମାତର୍ ଏନେଙ୍ଗ୍ ବେଣ୍ଡିଆ ୱେଡ଼ାତାଙ୍ଗ୍ କରାପ୍ କାମାୟ୍ତାଙ୍ଗ୍ ଦେହା ମାନା। ମାପୃତିଙ୍ଗ୍ ହାର୍ଦି ମାନ୍ତାଙ୍ଗ୍ ହେବାକିନି ମାନାୟାର୍ ହୁଦାଙ୍ଗ୍ ଏନେଙ୍ଗ୍ ଇ ୱିଜୁ ମାନି କିଦେଙ୍ଗ୍ ଉପାୟ୍ କିୟା ଏନେଙ୍ଗ୍ ଇନାକା ଟିକ୍ ହେଦାଙ୍ଗ୍ କିଦେଙ୍ଗ୍ ଉପାୟ୍ କିୟା। ଖ୍ରୀଷ୍ଟଙ୍ଗ୍ ପାର୍ତି କିୟା, ଜେକନିକାରିଙ୍ଗ୍ ଲାଡ୍ କିୟା, ଆରେ ରିସା ଆୱାଦାଙ୍ଗ୍ ଜେକନିକାର୍ତାକେ ହାର୍ ଆଜି ମାନା। 23 ବୁଦି ହିଲାକାର୍ ଆରେ ମୁର୍କ ଲକାର୍ ଜୁକ୍ତି କାଜିଙ୍ଗ୍ ଗଣ୍ଡ୍ଗଲ୍ ଉବ୍ଜା ଆନାତ୍, ଇଦାଙ୍ଗ୍ ପୁନ୍ଞ୍ଜି ହେ ୱିଜୁତାଙ୍ଗ୍ ଦେହା ଆଜି ମାନା। 24 ମାପୃନି ଦାସ୍ ଗଣ୍ଡ୍ଗଲ୍ କିନାକା ଟିକ୍ ଆକାୟ୍। ମାତର୍ ହେ ୱିଜାକାର୍ କାଜିଙ୍ଗ୍ ଦୟା ଚଚ୍ନି ଦର୍କାର୍, ହେୱାନ୍ ଈଶ୍ୱର କାତା ପୁରା କିଲେର୍ ବାବ୍ରେ ହିକ୍ଷାହିଦେଙ୍ଗ୍ ଆଡ୍ନାକା ମାନାତ୍ ଆରେ କୁର୍ଲିୟା ମାନାୟାର୍ ହୁଦାଙ୍ଗ୍ ଶାନ୍ତିଆଜି ମାନି ଦର୍କାର୍। 25-26 ହେୱାନିଙ୍ଗ୍ ବିରଦ୍ କିନି ମାନାୟାରିଙ୍ଗ୍ ଶାନ୍ତିତାଙ୍ଗ୍ ସତ୍ ବିଷୟରେ ବୁଜାଇକିନି ଦର୍କାର୍। ଇନେସ୍କି ଶୟତାନ ତା ଇଚାତାଙ୍ଗ୍ ଚାଲାଇ କିଦେଙ୍ଗ୍ ଇ ମାନାୟାରିଙ୍ଗ୍ ଜାଲ୍ଦ ରାତ୍ତାତାତ୍ନା। ମାତାର୍ ଇନେସ୍ ହେୱାର୍ ଇଦାଙ୍ଗ୍ ପୁନ୍ଞ୍ଜି ହେ ଜାଲ୍ଦାଙ୍ଗ୍ ମୁକ୍ତି ଆଦେଙ୍ଗ୍ ଆଡ୍ନାର୍, ଇଦାଙ୍ଗ୍ କାଜିଙ୍ଗ୍ କେଜାଣେ ଈଶ୍ୱର ହେୱାରିଙ୍ଗ୍ ସତ୍ ବିଷୟରେ ପୁଞ୍ଜେଙ୍ଗ୍ ଆରେ ପାପ୍ କାମାୟ୍ ପିସ୍ତି ମାପୃତାକେ ୱାଦେଙ୍ଗ୍ ସାଇଜ କିଦ୍ନାନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation