୨ ତିମଥି 1 - New Testament in Pengo Parja Languageଜୱାର୍ 1 ଆନେଙ୍ଗ୍ ପାଉଲ ଇ ଚିଟି ପକ୍ତାନାଙ୍ଗା। ଯୀଶୁ ଖ୍ରୀଷ୍ଟତାକେ ପାର୍ତିକିନି କାଜିଙ୍ଗ୍ ଈଶ୍ୱର ଇମ୍ଣି ୱିଜ୍ୱି ଜିବୁନ୍ ହିଦ୍ନି କାଜିଙ୍ଗ୍ ପାର୍ମାଣ୍ କିତ୍ତାନ୍ନା, ହେ କାତା ଶୁଣାୟ୍ କିନି କାଜିଙ୍ଗ୍, ଈଶ୍ୱର ନାଙ୍ଗେଙ୍ଗ୍ ଖ୍ରୀଷ୍ଟନି ରକାନ୍ ବାଚିକିତି ଚେଲା କିତ୍ତାନ୍ନା। 2 ତିମତି ଆନେଙ୍ଗ୍ ନି ଲାଗାୟ୍ ଇ ଚିଟି ଲେକିକିନାଙ୍ଗା। ଏନେଙ୍ଗ୍ ନା ଲାଡ୍ନି ମାଜି ଲେକେ। ଆବା ଈଶ୍ୱର ଆରେ ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଆଶ୍ରିବାଦ୍, ଦୟା ଆରେ ଶାନ୍ତି ହିଦେନ୍। ପାଉଲ ଈଶ୍ୱରତିଙ୍ଗ୍ ଦନ୍ଯବାଦ୍ ହିତାନ୍ 3 ଆନେଙ୍ଗ୍ ଏଚେପାଦ୍ନା ପାର୍ତାନା ୱିଜୁଦିନ୍ ନି ତର୍ତିଙ୍ଗ୍ ମାନ୍ତ ଏତୁ କିନାଙ୍ଗ୍, ଆରେ ଈଶ୍ୱରତିଙ୍ଗ୍ ୱିଜୁଦିନ୍ ଦନ୍ଯବାଦ୍ ହିଜି ପାର୍ତାନା କିନାଙ୍ଗ୍। ହେ ଈଶ୍ୱରତିଙ୍ଗ୍ ଆନେଙ୍ଗ୍ ଆରେ ନା ଆକଦାଦିର୍ ହାର୍ଦି ମାନ୍ତାଙ୍ଗ୍ ହେବା କିନାପା। 4 ଆନେଙ୍ଗ୍ ମିବେତାଙ୍ଗ୍ ଜେକ ଆତିହିଙ୍ଗ୍ ଏପେଙ୍ଗ୍ ବେସି ଆଡ଼୍ବାତାଦେର୍। ଲାଗିଙ୍ଗ୍ ଆନେଙ୍ଗ୍ ଇନେସ୍ ବେସି ୱାରି ଆଦେଙ୍ଗ୍ ଆଡ୍ନାଙ୍ଗ୍, ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ନିଙ୍ଗେଙ୍ଗ୍ ହୁଡ଼୍ଦେଦେଙ୍ଗ୍ ବେସି ଇଚା କିନାଙ୍ଗା। 5 ଏପେଙ୍ଗ୍ ହାର୍ଦି ମାନ୍ତାଙ୍ଗ୍ ଖ୍ରୀଷ୍ଟତାକେ ପାର୍ତି କିନାଦେରା ଇଞ୍ଜି ଆନେଙ୍ଗ୍ କାବୁର୍ ପାୟାଆତାଙ୍ଗ୍ନା। ଏପେଙ୍ଗ୍ ପାର୍ତିକିନି ଆଗେ ମି ବୁଡିଆୟା ଲୋହି ଆରେ ମି ଆୟା ଇଉନିକିତାକେ ମାଚାତ୍। ଆରେ ମିବେ ପା ମାନାତ୍ ଇଞ୍ଜି ନା ପୁରା ପାର୍ତି ମାନାତ୍। 6 ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ମାନ୍ତ ଏତୁକିୟି କିଦେଙ୍ଗ୍ ଇଚା କିନାଙ୍ଗା ଯେ ଆନେଙ୍ଗ୍ ମି କାପ୍ଡ଼ା ଜପି କେଇ ଡ଼ାପ୍ତିହିଙ୍ଗ୍ ଇମ୍ଣି ଈଶ୍ୱର ଦାନ୍ ପାୟା ଆତାଦେର୍ନା, ହେଦାଙ୍ଗ୍ତିଙ୍ଗ୍ ଆରେରଗ ଦିରେ-ଦିରେ କିଜି କାଚାୟ୍ କିୟାଟ୍। 7 ଇନେସ୍କି ଈଶ୍ୱର ମାଙ୍ଗେଙ୍ଗ୍ ପାଣ୍ଡ୍ରାଆନି ଆତ୍ମା ହିଦ୍ୱାତାନ୍ନା, ମାତର୍ ଶାକ୍ତି, ଜେକନିକାନିଙ୍ଗ୍ ଲାଡ୍ କିନାକା ଆରେ ଜାର୍ତିଙ୍ଗ୍ କଣ୍ଟ୍ରୁଲ୍ କିନି କାଜିଙ୍ଗ୍ ଆତ୍ମା ହିତ୍ତାନ୍ନା। ହାର୍ଦିକାବୁର୍ ଶୁଣାୟ୍ କିନି କାଜିଙ୍ଗ୍ ଲାଜା ଆମାଟ୍ 8 ଇଦାଙ୍ଗ୍ କାଜିଙ୍ଗ୍ ଜେକନିକାରିଙ୍ଗ୍ ମାପୃ ଯୀଶୁ ଖ୍ରୀଷ୍ଟ ବିଷୟରେ ୱେଚ୍ନି କାଜିଙ୍ଗ୍ ଲାଜା ଆମାଟ୍, କି ଆନେଙ୍ଗ୍ ହେୱାନିଙ୍ଗ୍ ହେବା କିତି କାଜିଙ୍ଗ୍ ବନ୍ଦି ଆତି କାଜିଙ୍ଗ୍ ଲାଜା ଆମାଟ୍। ମାତର୍ ଈଶ୍ୱର ହିତ୍ତି ଶାକ୍ତି ବ୍ଯବହାର୍ କିୟାଟ୍ ଆରେ ନା ହୁଦାଙ୍ଗ୍ ମାହାଆଜି ହାର୍ଦିକାବୁର୍ କାଜିଙ୍ଗ୍ ଦୁକ୍କଷ୍ଟ ପାୟାଆଡ। 9 ହେୱାନ୍ ମାଙ୍ଗେଙ୍ଗ୍ ଉଦାର୍ କିତ୍ତାନ୍ନା ଆରେ ପବିତ୍ର ଜିବୁନ୍ କାଟିକିନି କାଜିଙ୍ଗ୍ ମାଙ୍ଗେଙ୍ଗ୍ କୁକ୍ତାତାନ୍ନା। ଆସେଙ୍ଗ୍ ହାର୍ଦି କାମାୟ୍ କିନି କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ବାଚି କିଦ୍ୱାତାନ୍ନା, ମାତର୍ ତା ଜାର୍ ଜଜ୍ନା ଆରେ ଦୟା କାଜିଙ୍ଗ୍ କିତ୍ତାନ୍ନା। ଈଶ୍ୱର ଇ ପୁର୍ତିତିଙ୍ଗ୍ ରହ୍ନି ଆଗେ ନେ, ଯୀଶୁ ଖ୍ରୀଷ୍ଟ ମା କାଜିଙ୍ଗ୍ ଇ ପୁର୍ତିତାକେ ହାଃନି କାଜିଙ୍ଗ୍ ହେୱାନ୍ ଜଜ୍ନା କିଜି ଦୟା ଚଚ୍ଚାତାନ୍ନା। 10 ମାତର୍ ନଙ୍ଗୟ୍ ମାଙ୍ଗେଙ୍ଗ୍ ଉଦାର୍ କିଦ୍ନି ଯୀଶୁ ଖ୍ରୀଷ୍ଟ ୱାତାନ୍ନା ଆରେ ତା ଦୟା ଚଚ୍ଚାତାନ୍ନା। ହେୱାନ୍ ହାଃନି ଶାକ୍ତିତିଙ୍ଗ୍ ଆରାଇ କିତାନ୍ନା। ଆରେ ହାର୍ଦିକାବୁର୍ କାଜିଙ୍ଗ୍ ୱିଜ୍ୱି ଜିବୁନ୍ତାକେ ହାନି ହାଜି ମାନାତ୍ ଇଞ୍ଜି ଚଚ୍ଚାତାନ୍ନା। 11 ହେ ହାର୍ଦିକାବୁର୍ କାଜିଙ୍ଗ୍, ଈଶ୍ୱର ନାଙ୍ଗେଙ୍ଗ୍ ରକାନ୍ ଶୁଣାୟ୍ କିନାକାନ୍, ବାଚିକିତି ଚେଲା ଆରେ ମାଷ୍ଟେର୍ ଲେକେ ବାଚି କିତ୍ତାନ୍ନା। 12 ଇ ହାର୍ଦିକାବୁର୍ ମାନାୟାରିଙ୍ଗ୍ ଶୁଣାୟ୍ କିନି କାଜିଙ୍ଗ୍ ପା ଆନେଙ୍ଗ୍ ଇୱିଜୁ ଦୁକ୍ ପାୟାଆତାଙ୍ଗ୍ନା, ଆତିସ୍ପା ଆନେଙ୍ଗ୍ ଲାଜା ଆଉଙ୍ଗା। ଇନେସ୍କି ଆନେଙ୍ଗ୍ ଇନେର୍ତାକେ ପାର୍ତି କିନାଙ୍ଗା, ହେୱାନିଙ୍ଗ୍ ଆନେଙ୍ଗ୍ ପୁନାଙ୍ଗ୍। ଖ୍ରୀଷ୍ଟ ନାଙ୍ଗେଙ୍ଗ୍ ଇନାକା ହିତ୍ତାନ୍ନା, ହେୱାନ୍ ୱାନି ପାତେକ୍ ହେୱାନ୍ ରକ୍ଷା କିଦେଙ୍ଗ୍ ଆଡ୍ନାନ୍ ଇଞ୍ଜି ଇଦାଙ୍ଗ୍ ବେସି ପାର୍ତି କିନାଙ୍ଗା। ଯୀଶୁତାକେ ମାହାଆଜି ମାନାଟ୍ 13 ଏପେଙ୍ଗ୍ ନାବେତାଙ୍ଗ୍ ଇମ୍ଣି ୱିଜୁ ସତ୍ ହିକ୍ଷା ୱେଚାଦେର୍ନା, ହେଦାଙ୍ଗ୍ତିଙ୍ଗ୍ ଆସ୍ତି ଏପେଙ୍ଗ୍ ହେ ଅନୁସାରେ କିୟାଟ୍। ଯୀଶୁ ଖ୍ରୀଷ୍ଟତାକେ ରବେଆଜି ମାନି କାଜିଙ୍ଗ୍ ପାର୍ତି ଆରେ ଲାଡ୍ତିଙ୍ଗ୍ ଆସ୍ତି ମାନାଟ୍। 14 ମାବେ ବାହାକିଜି ମାଚି ପବିତ୍ର ଆତ୍ମା ସାଇଜତାଙ୍ଗ୍ ଏପେଙ୍ଗ୍ ପାୟାଆତି ସତ୍ ବିଷୟତିଙ୍ଗ୍ ହାର୍ଦାଙ୍ଗ୍ ଇଟାଟ୍। 15 ଏପେଙ୍ଗ୍ ପୁଚାଦେର୍ନା ଯେ ଏସିଆ ଜିଲ୍ଲାତାକେ ବାହାକିଜି ମାଚି କେତେକ୍ ପାର୍ତି କିନାକାର୍ ନାଙ୍ଗେଙ୍ଗ୍ ପିସ୍ତାତାର୍ନା। ପୁଗେଲ ଆରେ ହର୍ମଗେନା ପା ନାଙ୍ଗେଙ୍ଗ୍ ପିସ୍ତାତାର୍ନା। 16 ଅନୀସିଫରନି ପରିବାର୍ତିଙ୍ଗ୍ ମାପୃ ଦୟା କିଦେନ୍। ଇନେସ୍କି ହେୱାନ୍ ନାଙ୍ଗେଙ୍ଗ୍ ବେସିହଟ୍ ଗିଟାଆନି କାଜିଙ୍ଗ୍ ୱାତାନ୍ନା ଆରେ ସାଇଜ କିତ୍ତାନ୍ନା। ଜଇଲ୍ ଇଞ୍ଜ ନାଙ୍ଗେଙ୍ଗ୍ ୱାଜି ଗିଟାଆନି କାଜିଙ୍ଗ୍ ଲାଜୁ କିୱାତାର୍ନା। 17 ମାତର୍ ହେୱାନ୍ ରୋମ ସହର୍ତାକେ ଏକିତି ପାଚେ, ନାଙ୍ଗେଙ୍ଗ୍ ହେୱାନ୍ ୱିଜୁ ନିପଣ୍ ଡେକ୍ତାତାନ୍ ଆରେ ନା ହୁଦାଙ୍ଗ୍ ଗିଟା ଆତ୍ତାନ୍। 18 ବିଚାର୍କିନି ଦିନ୍ତ ମାପୃ ଅନିସିଫରତିଙ୍ଗ୍ ବେସି ଦୟା କିୟେନ୍। ଆନେଙ୍ଗ୍ ଏପିସ ସହର୍ତାକେ ମାନିହିଙ୍ଗ୍ ହେୱାନ୍ ନାଙ୍ଗେଙ୍ଗ୍ ବେସି ସାଇଜ କିତ୍ତାନ୍ନା, ହେଦାଙ୍ଗ୍ ଏପେଙ୍ଗ୍ ହାର୍ଦାଙ୍ଗ୍ ପୁଚାଦେର୍ନା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation