୨ ଥେସଲନୀକିୟ 3 - New Testament in Pengo Parja Language

ପାଉଲ ପାର୍ତାନା କିଦେଙ୍ଗ୍ ଗୁୱାରି କିତାନ୍

¹ ଏ ପାର୍ତିକିନି ଟଣ୍ଡାର୍‌କାଦେର୍, ମା କାଜିଙ୍ଗ୍ ପାର୍ତାନା କିୟାଟ୍ ଯେ, ଆପେଙ୍ଗ୍ ମାପୃ ଯୀଶୁ ଖ୍ରୀଷ୍ଟ ବିଷୟରେ ବେଗି-ବେଗି ୱିଜୁ ବାହାତାକେ ଶୁଣାୟ୍ କିନାପ୍, ଆରେ ହେଦାଙ୍ଗ୍ ୱେନି ମାନାୟାର୍ ପାର୍ତି କିୟେର୍। ଏପେଙ୍ଗ୍ ଇନେସ୍‌ଲେକେ ପାର୍ତି କିତାଦେର୍।

² ବେସି କରାପ୍ ଆରେ ଦୁଷ୍ଟ ମାନାୟାର୍‌ତାଙ୍ଗ୍ ଉଦାର୍ ପାୟାଆନି କାଜିଙ୍ଗ୍ ଏପେଙ୍ଗ୍ ମା କାଜିଙ୍ଗ୍ ଈଶ୍ୱରତାକେ ପାର୍ତାନା କିୟାଟ୍। ଇନେସ୍‌କି କେତେକ୍ ମାନାୟାର୍ ମାପୃ ଯୀଶୁ ବିଷୟରେ ୱେନାର୍ ଆରେ ପାର୍ତି କିଉର୍।

³ ଏପେଙ୍ଗ୍ ମାପୃ ଯୀଶୁଙ୍ଗ୍ ଆହା କିୟାଟ୍ ଯେ, ହେୱାନ୍ ମିଙ୍ଗେଙ୍ଗ୍ ସାସ୍ କିଦ୍‌ନାନ୍ ଆରେ ରକ୍ଷା କିଦ୍‌ନାନ୍, ଲାଗିଙ୍ଗ୍ ହେ କରାପ୍ ଶୟତାନ୍ ମିଙ୍ଗେଙ୍ଗ୍ ହରିଆଣ୍ କିଦ୍‌ଦେଙ୍ଗ୍ ଆଡ଼୍‌ଦୁତ୍।

⁴ ଆପେଙ୍ଗ୍ ଈଶ୍ୱରତିଙ୍ଗ୍ ପାର୍ତି କିନାପା ଯେ, ଆପେଙ୍ଗ୍ ହିତ୍‌ତି ଆଦେସ୍‌ତିଙ୍ଗ୍ ଏପେଙ୍ଗ୍ ମାନି କିନାଦେରା, ଆରେ ମାନିକିଜି ମାନାଦେର୍।

⁵ ଆପେଙ୍ଗ୍ ମି କାଜିଙ୍ଗ୍ ମାପୃ ଯୀଶୁତାକେ ପାର୍ତାନା କିନାପା। ଈଶ୍ୱର ମାଙ୍ଗେଙ୍ଗ୍ ବେସି ଲାଡ୍ କିନାନା ଇଞ୍ଜି ପୁଞ୍ଜେଙ୍ଗ୍ ସାଇଜ କିଦେନ୍, ଆରେ ମାପୃ ଯୀଶୁ ଖ୍ରୀଷ୍ଟ ଇନେସ୍ ଦୁଃକ୍ କଷ୍ଟତିଙ୍ଗ୍ ସମ୍ବାଲି କିଜି ମାଚାନ୍। ତା ଲେକେ ଆସେଙ୍ଗ୍ ଦୁଃକ୍ କଷ୍ଟତିଙ୍ଗ୍ ସମ୍ବାଲି କିଦେଙ୍ଗ୍ ଈଶ୍ୱର ମାଙ୍ଗେଙ୍ଗ୍ ସାଇଜ କିଦ୍‌ନାନ୍।

ପାଉଲ ଆଡ଼୍‌ସାୟ୍ ଲଗାଙ୍ଗ୍ କାମାୟ୍ କିଦେଙ୍ଗ୍ ଆଦେସ୍ ହିତାନ୍

⁶ ଏ ପାର୍ତିକିନି ଟଣ୍ଡାର୍‌କାଦେର୍, ଆପେଙ୍ଗ୍ ମାପୃ ଯୀଶୁ ଖ୍ରୀଷ୍ଟ ତର୍‍ଦାଙ୍ଗ୍ ମିଙ୍ଗେଙ୍ଗ୍ ଇ ଆଦେସ୍ ହିଦ୍‌ନାପା। ଇମ୍‌ଣାକାର୍ ଆପେଙ୍ଗ୍ ହିଜିମାଚି ହିକ୍ଷାତିଙ୍ଗ୍ ମାନିକିଉର୍‌, ଆରେ ଆଡ଼୍‌ସାୟ୍ ଆଜି ମାନାନ୍, ହେଲେଗ୍‌ଦି ମାନାୟାର୍‌ତାଙ୍ଗ୍ ଏପେଙ୍ଗ୍ ଦେହା ମାନାଟ୍।

⁷ ଏପେଙ୍ଗ୍ ପୁଚାଦେର୍‌ନା ଯେ, ଇଲେକେ ବ୍ଯବହାର୍ କିନି ଦର୍‌କାର୍, ଇନେସ୍‌ଲେକେ ଆପେଙ୍ଗ୍ କିଜି ମାଚାପ୍। ଆପେଙ୍ଗ୍ ଏଚେକାଡ଼୍‌ଦ ମିତାକେ ମାଚାପ୍ ଆଡ଼୍‌ସାୟ୍ ଆୱାଦାଙ୍ଗ୍ କାମାୟ୍ କିଜି ମାଚାପ୍।

⁸ ଆରେ ଡାବୁଙ୍ଗ୍ ହିୱାଦାଙ୍ଗ୍ ଆପେଙ୍ଗ୍ ଇନେର୍ ଇଞ୍ଜ ପା ଉଣ୍‌ୱାଦାଙ୍ଗ୍ ମାଚାପ୍, ମାତର୍ ମା ଦର୍‌କାର୍‌ନି ଜିନିଷ୍ କାଜିଙ୍ଗ୍ ମିଙ୍ଗେଙ୍ଗ୍ ହରିଆଣ୍ କିଦ୍‌ୱେଦେଙ୍ଗ୍ ୱେଡ଼ା ନାଣା କଷ୍ଟକିଜି ମାଚାପ୍।

⁹ ଆପେଙ୍ଗ୍ କଷ୍ଟ କିନାପା, ଆରେ ମା ଆଦିକାର୍ ମାନାତ୍ ଯେ, ଏପେଙ୍ଗ୍ ମାଙ୍ଗେଙ୍ଗ୍ ସାଇଜ କିଦାଟ୍ ଇଞ୍ଜି ଇଞ୍ଜେଙ୍ଗ୍ ଆଡ଼୍‌ଦାନାପ୍, ମାତର୍ ଆପେଙ୍ଗ୍ ହେଲେକେ କିୱାତାପ୍‌ନା। ଇନେସ୍‌କି ଆପେଙ୍ଗ୍ ଇଚା କିଜି ମାଚାପ୍ ଯେ, ଆପେଙ୍ଗ୍ ଇନେସ୍‌ଲେକେ କିଜି ମାଚାପ୍ ହେଲେକେ ଏପେଙ୍ଗ୍ ପା କିୟାଟ୍।

¹⁰ ଆପେଙ୍ଗ୍ ଏଚେକାଡ଼୍‌ଦ ମି ଲାହାଙ୍ଗ୍ ମାଚାପ୍, ମିଙ୍ଗେଙ୍ଗ୍ ଆପେଙ୍ଗ୍ ଇ ଆଦେସ୍ ହିଜି ମାନ୍‌ଞ୍ଚାପ୍, “ଇମ୍‌ଣି ମାନାୟ୍ କାମାୟ୍ କିଦେଙ୍ଗ୍ ଇଚା କିଉନ୍, ହେୱାନ୍ କାଦି ପା ତିନ୍‌ମେନ୍।”

¹¹ ଆପେଙ୍ଗ୍ ଇ କାତା ୱେଚାପ୍‌ନା ଯେ, ମି ବିତ୍ରେତାଙ୍ଗ୍ କେତେକ୍ ମାନାୟ୍ ଆଡ଼୍‌ସାୟ୍ ଆନାରା, ଆରେ ହେୱାର୍ ଜାର୍ କାମାୟ୍ ପିସ୍ତି ଜେକନିକାର୍ କାମାୟ୍ କିଜି ହିଦେଙ୍ଗ୍ ଜେଲ୍ ଆଜି ମାନାର୍।

¹² ଇଲେଗ୍‌ଦି ମାନାୟାର୍ କାଜିଙ୍ଗ୍ ମାପୃ ଯୀଶୁ ଖ୍ରୀଷ୍ଟ ତର୍‍ଦାଙ୍ଗ୍ ଆଦେସ୍ ଆରେ ହିକ୍ଷା ହିନାପା, ଏପେଙ୍ଗ୍ ଜାର୍-ଜାର୍ କାମାୟ୍ କିଜି ଜିନି କାଜିଙ୍ଗ୍ ଡାବୁଙ୍ଗ୍ କମାୟ୍ କିୟାଟ୍।

¹³ ଏ ପାର୍ତିକିନି ଟଣ୍ଡାର୍‌କାଦେର୍, ହାର୍ କାମାୟ୍ କିଦେଙ୍ଗ୍ ନିରାସ୍‌ ଆମାଟ୍।

¹⁴ ଆରେ ଇମ୍‌ଣି ମାନାୟ୍, ଆପେଙ୍ଗ୍ ଚିଟିତାକେ ଲେକିକିତି କାତାତିଙ୍ଗ୍ ମାନିକିଉନ୍, ଲାଗିଙ୍ଗ୍ ହେୱାନିଙ୍ଗ୍ ପୁନ୍‌ଞ୍ଜି ମାନାଟ୍। ହେୱାର୍‌ତାଙ୍ଗ୍ ଦେହା ମାନାଟ୍, ଲାଗିଙ୍ଗ୍ ହେୱାର୍ ଲାଜ୍ ପାୟାଆନାର୍‌।

¹⁵ ଆରେ ହେୱାନିଙ୍ଗ୍ ଶତୃ ଇଞ୍ଜି ପା ବାବିକିମାଟ୍, ମାତର୍ ପାର୍ତିକିନି ଟଣ୍ଡେନ୍ ଇଞ୍ଜି ବାବିକିଜି ଜାଗ୍ରତ୍ କିୟାଟ୍।

ସେସ୍ ଆଶ୍ରିବାଦ୍

¹⁶ ଆନେଙ୍ଗ୍ ମି କାଜିଙ୍ଗ୍ ପାର୍ତାନା କିନାଙ୍ଗା, ମାଙ୍ଗେଙ୍ଗ୍ ଶାନ୍ତି ହିଦ୍‌ନି ମାପୃ ନିଜେ ମିଙ୍ଗେଙ୍ଗ୍ ୱିଜୁଦିନ୍ ଆରେ ୱିଜୁ ପର୍‌କାର୍ ଶାନ୍ତି ହିଦେନ୍। ଆରେ ମାପୃ ୱିଜୁଦିନ୍ ମି ଲାହାଙ୍ଗ୍ ମେନେନ୍।

¹⁷ ଆନେଙ୍ଗ୍ ପାଉଲ ଜାର୍ କେଇଦାଙ୍ଗ୍ ଇ ଚିଟି ଲେକିକିଜି ଜୱାର୍ କିନାଙ୍ଗା। ନା ୱିଜୁ ଚିଟିଙ୍ଗ୍ ଚିନ୍ କିଦେଙ୍ଗ୍ ଆନେଙ୍ଗ୍ ଇଲେକେ ଲେକିକିନାଙ୍ଗା।

¹⁸ ଆନେଙ୍ଗ୍ ପାର୍ତାନା କିନାଙ୍ଗା ଯେ, ମା ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ୱିଜୁଦିନ୍ ଦୟାକିଜି ମାଞ୍ଜେନ୍‌।