୨ ଥେସଲନୀକିୟ 2 - New Testament in Pengo Parja Languageମାପୃ ୱାନିହିଙ୍ଗ୍ କରାପ୍ ମାନାୟ୍ ଚଞ୍ଜିଆ ଆନାନ୍ 1 ଏ ପାର୍ତିକିନି ଟଣ୍ଡାର୍କାଦେର୍, ଆପେଙ୍ଗ୍ ମାପୃ ଯୀଶୁ ଖ୍ରୀଷ୍ଟ ଆରେରଗ ୱାନି ବିଷୟରେ ମି କାଜିଙ୍ଗ୍ ଲେକିକିନାପା, ହେପାଦ୍ନା ଆସେଙ୍ଗ୍ ୱିଜାସ୍ ମାହାଆଜି ହେୱାନିଙ୍ଗ୍ ବେଟା ଆନାସ୍। 2 ଏପେଙ୍ଗ୍ ଚାନିଆ ଆଜି ପାଣ୍ଡ୍ରା ଆମାଟ୍, ମିଙ୍ଗେଙ୍ଗ୍ ଯଦି ଇନେର୍ ମାପୃ ଯୀଶୁ ଆରେରଗ ୱାତାନେ ଇଞ୍ଜି ୱେଚ୍ଚିତିସ୍ ପା ଏପେଙ୍ଗ୍ ପାର୍ତି କିମାଟ୍। ଆରେ ପା ମାନାୟ୍ ଇଲେକେ ୱେଚ୍ଚି ଟକାୟ୍ କିଦ୍ଦେଙ୍ଗ୍ ଇଦାଙ୍ଗ୍ ଈଶ୍ୱର ୱେଚ୍ଚାନ୍ନା ଇଞ୍ଜି ୱେଚ୍ଚାନାର୍, ନଇଲେ ଇଦାଙ୍ଗ୍ ଆପେଙ୍ଗ୍ ମି କାଜିଙ୍ଗ୍ ଚିଟି ଲେକିକିତାପ୍ନା ଇଞ୍ଜି ୱେଚ୍ଚାନାର୍। 3 ଇନେସ୍କି ଇନେର୍ପା ମିଙ୍ଗେଙ୍ଗ୍ ଟକାୟ୍ କିଦୁର୍ ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍ ଯେ, ମାପୃ ଯୀଶୁ ୱାୱି ଆଗେ ବେସିହେନି ମାନାୟାର୍ ଈଶ୍ୱରତିଙ୍ଗ୍ ବିରଦ୍ କିନାର୍। ଆରେ ହେ ବିନାସ୍ କିନି ମେହି ଅଦରମ୍ନି ମାନାୟ୍ ଚଞ୍ଜିଆ ଆନାନ୍, ହେଲେକେ ଆୱି ପାତେକ୍ ମାପୃ ଯୀଶୁ ପୁର୍ତିତାକେ ୱାଉନ୍। 4 ମାନାୟାର୍ ହେ ଅଦରମ୍ ମାନାୟ୍ ଈଶ୍ୱର ଇଞ୍ଜି ପୁଜା କିନାର୍, ଆରେ ହେୱାନ୍ ନିଜେତିଙ୍ଗ୍ ଗାଜାକାଙ୍ଗ୍ ଇଞ୍ଜି ଚଞ୍ଜିଆ ଆନାନ୍। ଆରେ ହେୱାନ୍ ଈଶ୍ୱର ମାନି ମନ୍ଦିର୍ତାକେ ହାଲ୍ଜି ଆନେଙ୍ଗ୍ ଈଶ୍ୱର ଇଞ୍ଜି ଚଞ୍ଜିଆ ଆନାନ୍। 5 ଆନେଙ୍ଗ୍ ମିହୁଦାଙ୍ଗ୍ ମାନିହିଙ୍ଗ୍ ଇ ବିଷୟରେ କେତ୍ତର୍ ୱେଚ୍ଚାତାଙ୍ଗ୍ନା, ହେଦାଙ୍ଗ୍ ମିଙ୍ଗେଙ୍ଗ୍ ମାନ୍ତ ହିଲେତ୍ କି। 6 ନଙ୍ଗୟ୍ ପାତେକ୍ ହେ ଅଦରମ୍ ମାନାୟ୍ ଚଞ୍ଜିଆ ଆଉନେ, ଇନେସ୍କି ହେୱାନ୍ ଚଞ୍ଜିଆ ଆୱେଦେଙ୍ଗ୍ ଇନାକାନେ ରଞ୍ଜାଙ୍ଗ୍ କଷ୍ଟ ହିନାତା, ହେଦାଙ୍ଗ୍ ଏପେଙ୍ଗ୍ ପୁଚାଦେର୍ନା। ଲାଗିଙ୍ଗ୍ ଏଚେକାଡ଼୍ଦ ଈଶ୍ୱର ଇଚାକିତି ଦିନ୍ ୱାନାତ୍, ହେ କରାପ୍ ମାନାୟ୍ତିଙ୍ଗ୍ ହୁଡ଼ିଆ ଆନାତ୍। 7 ହେ ଅଦରମ୍ ମାନାୟ୍ ଶାକ୍ତି, ନଙ୍ଗୟ୍ ପାତେକ୍ ଡ଼ୁଗ୍ଜି ପୁର୍ତିତାକେ କାମାୟ୍ କିନାତା, ମାତର୍ ର ମାନାୟ୍ ମାନାନ୍ ହେୱାନ୍ ହେ ଶାକ୍ତିତିଙ୍ଗ୍ ବନ୍ଦ୍ କିନାନା। ହେ ଶାକ୍ତିତିଙ୍ଗ୍ ଅୱି ପାତେକ୍ ଇ ଅଦରମ୍ ମାନାୟ୍ ଇଲେକେ କାମାୟ୍ କିଜି ମାନାନ୍। 8 ହେପାଦ୍ନା ହେ ଅଦରମ୍ ମାନାୟ୍ ଚଞ୍ଜିଆ ଆନାନ୍, ଆରେ ଏଚେପାଦ୍ନା ମାପୃ ଯୀଶୁ ୱାନାନ୍, ହେ ଅଦରମ୍ ମାନାୟ୍ତିଙ୍ଗ୍ ତା ଆଦେସ୍ତାଙ୍ଗ୍ ମାର୍ନେ ଅହ୍ନାନ୍। 9 ହେ ଅଦରମ୍ ମାନାୟ୍ ଶୟତାନନି ଶାକ୍ତିନି କାମାୟ୍ କିନାନ୍। ହେୱାନ୍ ୱିଜୁ ପର୍କାର୍ ଚାନିଆ କାମାୟ୍, ଚିନ୍ ଆରେ କାବା ଆନି କାମାୟ୍ କିନାନ୍, ଲାଗିଙ୍ଗ୍ ମାନାୟାର୍ ତାଙ୍ଗେଙ୍ଗ୍ ଈଶ୍ୱର ଇଞ୍ଜି ବାବିକିନାର୍। 10 ହେୱାନ୍ ୱିଜୁ ପର୍କାର୍ କରାପ୍ କାମାୟ୍ କିନାନ୍, ଆରେ ଈଶ୍ୱର ଇନେରିଙ୍ଗ୍ ବିନାସ୍ କିଦେଙ୍ଗ୍ ବାଚି କିତାନ୍ନା ହେୱାରିଙ୍ଗ୍ ଟକାୟ୍ କିନାନ୍। ଇନେସ୍କି ହେୱାର୍ ଯୀଶୁ ମାପୃ ସତ୍ ବିଷୟତିଙ୍ଗ୍ ମାନି କିୱାତାର୍, ହେଦାଙ୍ଗ୍ କାଜିଙ୍ଗ୍ ଈଶ୍ୱର ହେୱାରିଙ୍ଗ୍ ରକ୍ଷା କିଉନ୍। 11 ଈଶ୍ୱର ହେୱାରିଙ୍ଗ୍ ଟକାୟ୍ କିୟା ଆନି ମାନ୍ ହିତାତ୍ନା, ହେଦାଙ୍ଗ୍ କାଜିଙ୍ଗ୍ ହେ ଅଦରମ୍ ମାନାୟ୍ ମିଚ୍ ୱେଚ୍ଚିସ୍ ପାର୍ତିକିନାର୍। 12 ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍, ଇମ୍ଣି ମାନାୟ୍ ସତ୍ତିଙ୍ଗ୍ ପାର୍ତି କିଉନ୍ ଆରେ ପାପ୍ କିଦେଙ୍ଗ୍ ୱାରିୟା ଆନାର୍। ୱିଜୁଦିନ୍ ହାର୍ଦିକାବୁର୍ତିଙ୍ଗ୍ ପାର୍ତି କିଜି ମାନାଟ୍ 13 ଏ ପାର୍ତିକିନି ଟଣ୍ଡାର୍କାଦେର୍, ଆସେଙ୍ଗ୍ ୱିଜୁଦିନ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନି ଦର୍କାର୍, ଇନେସ୍କି ମାପୃ ମାଙ୍ଗେଙ୍ଗ୍ ଲାଡ୍ କିଦ୍ନାନା। ଈଶ୍ୱର ପୁର୍ତି ଉବ୍ଜାୟ୍ କିତି ଆଗେ ମାଙ୍ଗେଙ୍ଗ୍ ଉଦାର୍ କିଦ୍ଦେଙ୍ଗ୍ ବାଚି କିତ୍ତାନ୍ନା, ଈଶ୍ୱର ଆତ୍ମା ସାଇଜତାଙ୍ଗ୍ ଆସେଙ୍ଗ୍ ପବିତ୍ର ଆୟା ଆନାତ୍, ଇନେସ୍କି ଆସେଙ୍ଗ୍ ମାପୃ ଯୀଶୁ ସତ୍ ବିଷୟତିଙ୍ଗ୍ ପାର୍ତି କିନାସା। 14 ହେୱାନ୍ ମିଙ୍ଗେଙ୍ଗ୍ ଉଦାର୍ କିଦ୍ଦେଙ୍ଗ୍ ବାଚି କିତ୍ତାନ୍ନା, ଇନେସ୍କି ଆପେଙ୍ଗ୍ ଶୁଣାୟ୍ କିତି ହାର୍ଦିକାବୁର୍ତିଙ୍ଗ୍ ଏପେଙ୍ଗ୍ ପାର୍ତି କିନାଦେରା। ଲାଗିଙ୍ଗ୍ ଈଶ୍ୱର ଇମ୍ଣି ଗୌରବ ମା ମାପୃ ଯୀଶୁ ଖ୍ରୀଷ୍ଟଙ୍ଗ୍ ହିଜିମାଚାନ୍, ଈଶ୍ୱର ହେଦାଙ୍ଗ୍ ମିଙ୍ଗେଙ୍ଗ୍ ପା ହିଦ୍ନାନ୍। 15 ଏ ପାର୍ତିକିନି ଟଣ୍ଡାର୍କାଦେର୍, ଆପେଙ୍ଗ୍ ମିତାକେ ୱାଜି ହିକାୟ୍ କିତ୍ତି ବିଷୟ, ଆରେ ମା ଚିଟିତାକେ ଲେକିକିତି ବିଷୟତିଙ୍ଗ୍ ୱିଜୁଦିନ୍ ପାର୍ତି କିଜି ମାନାଟ୍। 16 ଆସେଙ୍ଗ୍ ପାର୍ତାନା କିନାସା ଯେ, ମା ମାପୃ ଯୀଶୁ ଖ୍ରୀଷ୍ଟ, ଆରେ ମା ଆବା ଈଶ୍ୱର ମାଙ୍ଗେଙ୍ଗ୍ ଲାଡ୍ କିଦ୍ନାର୍, ଆରେ ହେୱାର୍ ମାଙ୍ଗେଙ୍ଗ୍ ଦୟାକିଜି ୱିଜ୍ୱିଦିନ୍ନି ସାସ୍, ଆରେ ହାର୍ ଆହା ହିଦେନ୍। 17 ଆନେଙ୍ଗ୍ ମି କାଜିଙ୍ଗ୍ ପାର୍ତାନା କିନାଙ୍ଗା ଈଶ୍ୱର ନିଜେ ମିଙ୍ଗେଙ୍ଗ୍ ସାସ୍ ହିଦେନ୍, ଆରେ ମିଙ୍ଗେଙ୍ଗ୍ ହାର୍ କାମାୟ୍ କିଦେଙ୍ଗ୍ ଆରେ ୱେଚ୍ଚେଙ୍ଗ୍ ଶାକ୍ତି ହିଦେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation