୨ ଥେସଲନୀକିୟ 1 - New Testament in Pengo Parja Languageପାଉଲ ଥେସଲନିକିୟ ସହର୍ନି ମାନାୟାରିଙ୍ଗ୍ ଜୁୱାର୍ କିତାନ୍ 1 ଆନେଙ୍ଗ୍ ପାଉଲ, ନା ଲାହାଙ୍ଗ୍ ଶିଲା ଆରେ ତିମତି ମାନାର୍, ଇ ଚିଟି ଆପେଙ୍ଗ୍ ଥେସଲନିକିୟ ସହର୍ନି ମଣ୍ଡ୍ଲିତାକେ ଲେକିକିନାପା, ଇନେର୍ ମା ଆବା ଈଶ୍ୱରତି ଆରେ ମାପୃ ଯୀଶୁ ଖ୍ରୀଷ୍ଟନି ଲକ୍। 2 ମା ଆବା ଈଶ୍ୱର ଆରେ ମାପୃ ଯୀଶୁ ଖ୍ରୀଷ୍ଟ ମିଙ୍ଗେଙ୍ଗ୍ ଦୟା ଆରେ ଶାନ୍ତି ହିଦେନ୍। 3 ଏ ପାର୍ତିକିନି ଟଣ୍ଡାର୍କାଦେର୍, ମି କାଜିଙ୍ଗ୍ ଆପେଙ୍ଗ୍ ଈଶ୍ୱରତିଙ୍ଗ୍ ଦନ୍ଯବାଦ୍ ହିନାପା। ହେଲେକେ କିନି ଦର୍କାର୍ ଯେ, ଏପେଙ୍ଗ୍ ଯୀଶୁଙ୍ଗ୍ ବେସିହେନି ପାର୍ତି କିନାଦେରା, ଆରେ ଏପେଙ୍ଗ୍ ଜାର୍-ଜାର୍ବିତ୍ରେ ବେସି ଲାଡ୍ କିନାଦେରା। 4 ଏପେଙ୍ଗ୍ ଦୁଃକ୍ କଷ୍ଟ ପାୟାଆଜି ମାଚିସ୍ ପା, ସାସ୍ ଆଜି ଯୀଶୁ ଖ୍ରୀଷ୍ଟଙ୍ଗ୍ ପାର୍ତି କିନାଦେରା। ହେଦାଙ୍ଗ୍ କାଜିଙ୍ଗ୍ ଈଶ୍ୱରତିଙ୍ଗ୍ ପାର୍ତିକିନି ମଣ୍ଡ୍ଲିନି ମାନାୟାର୍ ଆଗେ ମି ବିଷୟରେ ଆପେଙ୍ଗ୍ ସାର୍ଦା ଆଜି ୱେଚ୍ନାପା। ଯୀଶୁ ଆରେରଗ ୱାନି ଦିନ୍ତି ବିଚାର୍ନି କାତା 5 ଏପେଙ୍ଗ୍ ଈଶ୍ୱର ସାସନ୍ କିନି ରାଜିତାକେ ହାନି କାଜିଙ୍ଗ୍ ଦୁଃକ୍ କଷ୍ଟ ପାୟାଆନାଦେରା, ଆରେ ହେ ଦୁଃକ୍ କଷ୍ଟ କାଜିଙ୍ଗ୍ ଈଶ୍ୱର ତା ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଯଗ୍ଯ କିନାନ୍। 6 ମାପୃ ଯୀଶୁ ଏଚେକାଡ଼୍ଦ ଆରେରଗ ପୁର୍ତିତାକେ ୱାନାନ୍, ହେପାଦ୍ନା ହେୱାନ୍ ତା ଶାକ୍ତିକାଟି ଦୁତ୍କୁ ହୁଦାଙ୍ଗ୍ ଆରେ କାଚାଆନି ନାଣି ହୁଦାଙ୍ଗ୍ ସରଗ୍ତାଙ୍ଗ୍ ୱାନାନ୍। 7 ହେପାଦ୍ନା ମିଙ୍ଗେଙ୍ଗ୍ ଦୁଃକ୍ କଷ୍ଟ ହିଦ୍ନି ମାନାୟାରିଙ୍ଗ୍ ଈଶ୍ୱର ହେଲେକେ ନେ ହେୱାରିଙ୍ଗ୍ ଦୁଃକ୍ କଷ୍ଟ ହିନାନ୍। ଆରେ ଏପେଙ୍ଗ୍ ଦୁଃକ୍ କଷ୍ଟ ପାୟାଆଜି ମାଚି କାଜିଙ୍ଗ୍ ହେୱାନ୍ ମା ହୁଦାଙ୍ଗ୍ ମିଙ୍ଗେଙ୍ଗ୍ ଶାନ୍ତି ହିଦ୍ନାନା, ଇଦାଙ୍ଗ୍ ନେ ଈଶ୍ୱରତି ନ୍ୟାୟ୍ ବିଚାର୍। 8 ଇମ୍ଣି ମାନାୟାର୍ ଈଶ୍ୱରତିଙ୍ଗ୍ ପୁନ୍ୱାତାର୍ନା, ଆରେ ମା ମାପୃ ଯୀଶୁତି ହାର୍ଦିକାବୁର୍ ମାନି କିୱାତାର୍ନା, ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। 9 ହେୱାର୍ ମାପୃ ଯୀଶୁତାଙ୍ଗ୍, ଆରେ ତା ଗୌରବ ଶାକ୍ତିତାଙ୍ଗ୍ ୱିଜୁଦିନ୍ କାଜିଙ୍ଗ୍ ଅଲ୍ଗା ଆନାର୍, ଈଶ୍ୱର ହେୱାରିଙ୍ଗ୍ ୱିଜୁଦିନ୍ କାଜିଙ୍ଗ୍ ଦୁଃକ୍ କଷ୍ଟ ପାୟା ଆଦେଙ୍ଗ୍ ୱିଜ୍ୱି ଦଣ୍ଡ୍ ହିନାନ୍। 10 ଏଚେପାଦ୍ନା ମାପୃ ଯୀଶୁ ତା ପବିତ୍ର ମାନାୟାର୍ତାଙ୍ଗ୍ ଗୌରବ ଆରେ ସନ୍ମାନ୍ ପାୟା ଆଦେଙ୍ଗ୍ ଆରେରଗ ପୁର୍ତିତାକେ ୱାନାନ୍। ଆରେ ହେୱାନ୍ ସନ୍ମାନ୍ ପାୟାଆନି ନାଞ୍ଜିଙ୍ଗ୍, ହେବେ ଏପେଙ୍ଗ୍ ପା ମାନାଦେର୍, ଇନେସ୍କି ଆପେଙ୍ଗ୍ ତା ବିଷୟରେ ୱେଚ୍ଚିତିଲେ ପାର୍ତି କିତାଦେର୍। 11 ହେଦାଙ୍ଗ୍ ଆପେଙ୍ଗ୍ ମି କାଜିଙ୍ଗ୍ ୱିଜୁଦିନ୍ ପାର୍ତାନା କିନାପା ଯେ, ଈଶ୍ୱର ମିଙ୍ଗେଙ୍ଗ୍ ଇମ୍ଣି କାମାୟ୍ କିଦେଙ୍ଗ୍ ବାଚି କିତ୍ତାନ୍ନା। ଈଶ୍ୱର ମିଙ୍ଗେଙ୍ଗ୍ ତା ଶାକ୍ତିତାଙ୍ଗ୍ ସାଇଜ କିଦେନ୍, ଆରେ ଏପେଙ୍ଗ୍ ପାର୍ତି କିଜି କିନି ୱିଜୁ ହାର୍ କାମାୟ୍ତିଙ୍ଗ୍ ଈଶ୍ୱର ପୁରାକିଦେନ୍। 12 ଆପେଙ୍ଗ୍ ଇଲେକେ ପାର୍ତାନା କିନାପା ଯେ, ମି କାଜିଙ୍ଗ୍ ମା ମାପୃ ଯୀଶୁଙ୍ଗ୍ ମାନାୟାର୍ ସନ୍ମାନ୍ ହିଏର୍, ଆରେ ହେୱାର୍ ମିଙ୍ଗେଙ୍ଗ୍ ସନ୍ମାନ୍ ହିଦ୍ନାର୍ ଯେ, ଏପେଙ୍ଗ୍ ଯୀଶୁଙ୍ଗ୍ ପାର୍ତି କିନାଦେରା। ମା ଈଶ୍ୱର ଆରେ ମାପୃ ଯୀଶୁ ଖ୍ରୀଷ୍ଟ ମାଙ୍ଗେଙ୍ଗ୍ ଦୟା କିଦ୍ନାରା। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation