୨ ପିତର 3 - New Testament in Pengo Parja Languageମାପୃ ୱାନି ପାର୍ମାଣ୍ 1 ନା ଲାଡ୍ନି ସାଙ୍ଗ କାଦେର୍, ଏପେଙ୍ଗ୍ ପୁଚି ବିଷୟତିଙ୍ଗ୍ ମାନ୍ତ ଏତୁକିନି କାଜିଙ୍ଗ୍ ଆରେ ମି ମାନ୍ତ ହାର୍ଦି ବାବ୍ନାତିଙ୍ଗ୍ ଜାଗାୟ୍ କିନି କାଜିଙ୍ଗ୍, ନଙ୍ଗୟ୍ ଆନେଙ୍ଗ୍ ମି ଲାଗାୟ୍ ଇ ରି ନମ୍ବର୍ ଚିଟି ଲେକିକିନାଙ୍ଗା। 2 ପବିତ୍ର ଭବିଷ୍ଯତବକ୍ତା ୱେଚ୍ଚି କାତା, ଆରେ ମା ମାପୃ ଯୀଶୁ ଖ୍ରୀଷ୍ଟତି ହିକ୍ଷା ଇନାକା ବାଚିକିତି ଚେଲାର୍ ମି ଲାଗାୟ୍ ୱାଜି ୱେଚ୍ଚାତାର୍ନା। ହେଦାଙ୍ଗ୍ ମିଙ୍ଗେଙ୍ଗ୍ ଏତୁକିୟି କିଦ୍ନି କାଜିଙ୍ଗ୍, ଇଦାଙ୍ଗ୍ ଆନେଙ୍ଗ୍ ଲେକିକିନାଙ୍ଗା। 3 ପାର୍ତୁମ୍ ଇଦାଙ୍ଗ୍ ଏପେଙ୍ଗ୍ ବୁଜାଆଡ ଯେ, ସେସ୍ କାଡ଼୍ଦ ଜାର୍ କରାପ୍ ଇଚା ବ୍ୟବହାର୍ କିନି ମାନାୟାର୍ ଚଞ୍ଜ୍ନାର୍। ଖ୍ରୀଷ୍ଟ ଆରେରଗ ୱାନି କାତାତିଙ୍ଗ୍ ହେୱାର୍ ଇନସ୍ତା କିନାର୍। 4 ଆରେ ହେୱାର୍ ୱେଚ୍ନାର୍ “ହେୱାନ୍ ଆରେରଗ ୱାନି ପାର୍ମାଣ୍ ସତ୍ ଆକାୟ୍! ହେୱାନ୍ ଇନାୱେଡ଼ାଙ୍ଗ୍ ପା ୱାଉନ୍! ଇମ୍ଣାକାର୍ ମା ଆଗେ ନେତାର୍ ଆଜି ମାଚାର୍, ହେୱାର୍ ୱିଜାକାର୍ ହାଃତାର୍, ଆରେ ଅଲପ୍ପା ବାଦ୍ଲା ଆୱାତାତ୍। ଇନେସ୍କି ଈଶ୍ୱର ପୁର୍ତିତିଙ୍ଗ୍ ଉବ୍ଜାଇ କିତି ସମୟ୍ତାଙ୍ଗ୍ ଇନେସ୍ ମାଚାତ୍, ହେଲେକେ ନଙ୍ଗୟ୍ ପାତେକ୍ ମାନାତା।” 5 ଉବ୍ଜାଣ୍ ଆତି ବିଷୟ ହେୱାର୍ ପୁନ୍ଞ୍ଜି-ପୁନ୍ଞ୍ଜି ବାଣା ଆତାର୍ନା ଯେ, ଈଶ୍ୱର କାତାତାଙ୍ଗ୍ ସରଗ୍ ଉବ୍ଜାଣ୍ ଆଜି ମାଚାତ୍। ତା କାତାତାଙ୍ଗ୍ ହେୱାନ୍ ଏଜୁଙ୍ଗ୍ତାଙ୍ଗ୍ ପୁର୍ତିତିଙ୍ଗ୍ ଜେକ କିତାନ୍ ଆରେ ଏଜୁଙ୍ଗ୍ ବିତ୍ରେ ୱାଚ୍ଚି ମେଦ୍ନି ରସ୍ତାନ୍। 6 ଆରେ ଇ ଏଜୁଙ୍ଗ୍ତାଙ୍ଗ୍, ହେ ସମୟରେ ମାନି ପୁର୍ତିତିଙ୍ଗ୍ ହେୱାନ୍ ନଷ୍ଟ କିତାନ୍। ହେୱାନ୍ ଗାଜା ବାହ୍ରାତିଙ୍ଗ୍ ପକ୍ତାତାନ୍ ଆରେ ଇଦାଙ୍ଗ୍ କାଜିଙ୍ଗ୍ ପୁର୍ତିତାକେ ବନ୍ୟା ଆତାତ୍ ଆରେ ଜିବୁନ୍ ମାନି ୱିଜୁ ଜାତୁଙ୍ଗ୍ ନଷ୍ଟ ଆତିକ୍। 7 ମାତର୍ ଇ ସରଗ୍ ଆରେ ପୁର୍ତିତିଙ୍ଗ୍ ନାଣିତାଙ୍ଗ୍ ନଷ୍ଟ କିଦେଙ୍ଗ୍, ହେ କାତା ଈଶ୍ୱର ଇଡ଼୍ତାନ୍ନା। ହେୱାନ୍ ବିଚାର୍କିନି ଦିନ୍ କାଜିଙ୍ଗ୍ ଆରେ ଇମ୍ଣାକାର୍ ହେୱାନିଙ୍ଗ୍ ମାନିକିଉର୍ ହେ ମାନାୟାରିଙ୍ଗ୍ ନଷ୍ଟ କିଦେଙ୍ଗ୍, ହେୱାନ୍ ହେୱାରିଙ୍ଗ୍ ଇଡ଼୍ତାନ୍ନା। 8 ମାତର୍ ଏ ନା ଲାଡ୍ନି ସାଙ୍ଗ କାଦେର୍, ଏପେଙ୍ଗ୍ ଇ ବିଷୟତିଙ୍ଗ୍ ବାଣା ଆମାଟ୍ ଯେ ମାପୃ ଲାଗାୟ୍ ରଦିନ୍ ହାଜାର୍ ବାହ୍ରୁ ଲେକେ ଆରେ ହାଜାର୍ ବାହ୍ରୁ ରଦିନ୍ ଲେକେ। ରଦିନ୍ ଆରେ ରହାଜାର୍ ବାହ୍ରୁ ତା ଲାଗାୟ୍ ହାମାନ୍। 9 ମାପୃ ତା ଆରେରଗ ୱାନି ବିଷୟରେ ପାର୍ମାଣ୍ ପୁରା କିଦେଙ୍ଗ୍ ବିଲମ୍ କିନାନା ଇଞ୍ଜି କେତ୍ଜାଣ୍ ବାବିକିନାରା। ମାତର୍ ମାପୃ ଜାର୍ ପାର୍ମାଣ୍ ବିଷୟରେ ହେଲେକେ ବିଲମ୍ କିଉନା, ମାତର୍ ହେୱାନ୍ ମି କାଜିଙ୍ଗ୍ ସାସ୍ ଆସ୍ତାନ୍ନା। ଇନେସ୍କି ରକାନ୍ ପା ନଷ୍ଟ ଆମେର୍ ଇଞ୍ଜି ହେୱାନ୍ ଇଚା କିନାନା। ଆରେ ୱିଜାକାର୍ ମାନାୟ୍ ଇନେସ୍ ପାପ୍ କାମାୟ୍ ପିସ୍ତି ତା ଲାଗାୟ୍ ୱାନାର୍, ଇଦାଙ୍ଗ୍ ହେୱାନ୍ ଇଚା କିନାନା। 10 ଖ୍ରୀଷ୍ଟ ହାତ୍ପା ଆରେରଗ ୱାନାନ୍। ଚର୍ ଇନେସ୍ ଇନେର୍ ପୁନ୍ୱିହିଙ୍ଗ୍ ହେଦାପ୍ରେ ୱାଜି ମାନାନ୍, ହେଲେକେ ମାପୃ ପା ହେଦାପ୍ରେ ୱାନାନ୍। ହେ ସମୟ୍ତ ବାଦାଡ଼୍ତାକେ ଗାଜା ଶବଦ୍ ଆନାତ୍, ଆରେ ବାଦାଡ଼୍ ଅଲପ୍ପା ଚଞ୍ଜ୍ଜୁତ୍। ସରଗ୍ତାକେ ମାନି ୱିଜୁ ଜିନିଷ୍, ୱେଡ଼ା, ଲେଞ୍ଜ୍ ଆରେ ହୁକାକାଙ୍ଗ୍ ଈଶ୍ୱର ପୁରାପୁରି ବାବ୍ରେ ନାଣିତାକେ କାଡି କିନାନ୍। ହେ ଦିନ୍ ମାନାୟାର୍ ଇ ପୁର୍ତିତାକେ ମାନିହିଙ୍ଗ୍ କିଜିମାଚି ୱିଜୁ ବିଷୟ ଈଶ୍ୱର ଚଚ୍ନାନ୍ ଆରେ ହେୱାରିଙ୍ଗ୍ ହେୱାନ୍ ବିଚାର୍ କିନାନ୍। 11 ଇଦାଙ୍ଗ୍ ସତ୍ ଯେ ଈଶ୍ୱର ଇ ୱିଜୁ ବିଷୟ ଇଲେକେ ନଷ୍ଟ କିନାନ୍। ଲାଗିଙ୍ଗ୍ ଏପେଙ୍ଗ୍ ପବିତ୍ର ଆରେ ଈଶ୍ୱରତିଙ୍ଗ୍ ୱାରି କିତିଲେକେ ଜିବୁନ୍ କାଟିକିୟାଟ୍। 12 ଈଶ୍ୱର ଆରେରଗ ୱାଜି ପୁର୍ତିତିଙ୍ଗ୍ ବିଚାର୍କିନି ଦିନ୍ତିଙ୍ଗ୍ ଏପେଙ୍ଗ୍ କାସିମାନି କାଜିଙ୍ଗ୍, ଏପେଙ୍ଗ୍ ହାର୍ଦାଙ୍ଗ୍ ଜିବୁନ୍ କାଟିକିୟାଟ୍ ଇନେସ୍ ହେ ଦିନ୍ ବେଗି ୱାନାତ୍। ହେଦିନ୍ ଈଶ୍ୱର ସରଗ୍ତିଙ୍ଗ୍ ନାଣିତାଙ୍ଗ୍ କାଡିକିଜି ନଷ୍ଟ କିନାନ୍ ଆରେ ହେବେ ମାନି ୱିଜୁ ଜିନିଷ୍ତିଙ୍ଗ୍ ନାଣି ଗରମ୍ତାକେ ତର୍ଲାଇ କିନାନ୍। 13 ମାତର୍ ଆସେଙ୍ଗ୍ ଈଶ୍ୱରକିତି ପାର୍ମାଣ୍ ଅନ୍ସାରେ ରଞ୍ଜାଙ୍ଗ୍ ପୁନି ସରଗ୍ ଆରେ ପୁନି ପୁର୍ତିତିଙ୍ଗ୍ କାତାସ୍ନା। ଆପ୍କା ଦରମ୍ ମାନାୟ୍ ହେବେ ମାନ୍ଗାନାର୍। ସେସ୍ ଆଦେସ୍ 14 ଲାଗିଙ୍ଗ୍ ଏ ନା ଲାଡ୍ନି ସାଙ୍ଗ କାଦେର୍, ଏପେଙ୍ଗ୍ ଇ ୱିଜୁ ବିଷୟତିଙ୍ଗ୍ କାସିମାନି କାଜିଙ୍ଗ୍, ଏପେଙ୍ଗ୍ ପବିତ୍ର ଆନି କାଜିଙ୍ଗ୍, ଦସ୍ ହିଲ୍ୱି ଲେକେ ଜିବୁନ୍ କାଟିକିନି କାଜିଙ୍ଗ୍ ଆରେ ଜାର୍-ଜାର୍ ଶାନ୍ତିରେ ମାନି କାଜିଙ୍ଗ୍ ଉପାୟ୍ କିୟାଟ୍। 15 ମା ମାପୃ ସାସ୍ ଆସ୍ତି ମାନାକା ଏପେଙ୍ଗ୍ ପୁଚାଦେର୍ନା, ଇନେସ୍କି ହେୱାନ୍ ଇନେସ୍ ମାନାୟାରିଙ୍ଗ୍ ରକ୍ଷା କିନାନ୍ ଇଦାଙ୍ଗ୍ କାଜିଙ୍ଗ୍ ହେୱାନ୍ ହେୱାରିଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାନି କାଜିଙ୍ଗ୍ ସମୟ୍ ହିନାରା। ଈଶ୍ୱରତାଙ୍ଗ୍ ପାୟାଆତି ଜ୍ଞାନ୍ ଅନୁସାରେ, ମା ଲାଡ୍ନି ପାର୍ତିକିନି ଟଣ୍ଡେନ୍ ପାଉଲ ପା ମି ଲାଗାୟ୍ ଇଲେକେ ଚିଟି ଲେକିକିତାନ୍ନା। 16 ହେୱାନ୍ ତା ଚିଟିତାକେ ଇୱିଜୁ ବିଷୟ ଲେକିକିତାନ୍ନା। ମାତର୍ ହେୱାନ୍ ଲେକିକିତି ବିଷୟତାଙ୍ଗ୍ କେତେକ୍ ବିଷୟ ମାନାତ୍, ହେଦାଙ୍ଗ୍ ବୁଜା ଆଦେଙ୍ଗ୍ ବେସି କଷ୍ଟ। ଆରେ ଅଶିକିତ୍ ମାନାୟ୍ ଆରେ ପାର୍ତିତାକେ ତିର୍ ହିଲ୍ୱି ମାନାୟ୍, ସାସ୍ତର୍ ଜେକନି କାତାଲେକେ ଇ ବୁଜାଆୱି ବିଷୟତିଙ୍ଗ୍ ଇ ମାନାୟାର୍ ବୁଲ୍ ବାବ୍ରେ ବୁଜାୟ୍ କିନାର୍। ଇଦାଙ୍ଗ୍ କାଜିଙ୍ଗ୍ ହେୱାର୍ ନିଜେତିଙ୍ଗ୍ ନିଜେ ନଷ୍ଟ ଗଟାୟ୍ କିନାରା। 17 ଲାଗିଙ୍ଗ୍ ଏ ନା ଲାଡ୍ନି ସାଙ୍ଗ କାଦେର୍, ଇୱିଜୁ ଗଟାଆନାତ୍ ଇଞ୍ଜି ଏପେଙ୍ଗ୍ ଆଗେତାଙ୍ଗ୍ ପୁଚାଦେର୍ନା। ଲାଗିଙ୍ଗ୍ ଇ କରାପ୍ ମାନାୟାର୍ ଇନେସ୍ ମିଙ୍ଗେଙ୍ଗ୍ ମିଚ୍ କାତା ୱେଚ୍ଚି ମିଙ୍ଗେଙ୍ଗ୍ ଟକାୟ୍ କିଦୁର୍, ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜାଗ୍ରତ୍ ଆଜି ମାନାଟ୍। ଯଦି ଏପେଙ୍ଗ୍ ହେୱାର୍ କାତା ୱେନାଦେର୍, ଲାଗିଙ୍ଗ୍ ଏପେଙ୍ଗ୍ ଇମ୍ଣି ବିଷୟରେ ପାର୍ତି କିନାକା ଷ୍ଟ୍ରଙ୍ଗ୍କିଜି ଇଡ଼୍ତାଦେର୍ନା ହେ ବିଷୟରେ ଡାଉଟ୍ କିଦେଙ୍ଗ୍ ଆରମ୍ କିନାଦେର୍। 18 ମାତର୍ ଏପେଙ୍ଗ୍ ମା ମାପୃ ଆରେ ଉଦାର୍ କିଦ୍ନି ଯୀଶୁ ଖ୍ରୀଷ୍ଟନି ଦୟାତିଙ୍ଗ୍ ଆରେ ବୁଦିତିଙ୍ଗ୍ ଆଦିକ୍ତାଙ୍ଗ୍ ଆଦିକ୍ ବୁଜାଆଡ। ଆରେ ହେୱାନିଙ୍ଗ୍ ଏପେଙ୍ଗ୍ ଆଦିକ୍ତାଙ୍ଗ୍ ଆଦିକ୍ ନଙ୍ଗୟ୍ ଆରେ ୱିଜ୍ୱିଦିନ୍ ପାତେକ୍ ଗୌରବ କିୟାଟ୍। ଆମେନ୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation