୨ ପିତର 2 - New Testament in Pengo Parja Languageବୁଲ୍ ହିକ୍ଷାହିନି ମାଷ୍ଟେରାର୍ ହାତ୍ପା ଦଣ୍ଡ୍ ପାୟାଆନାର୍ 1 ଇସ୍ରାଏଲ ଦେସ୍ତାକେ ଇନେସ୍ ଆଗେ ବୁଲ୍ ଭବିଷ୍ଯତବକ୍ତାର୍ ଚଞ୍ଜିଆଆଜି ମାଚାର୍, ହେଲେକେ ବୁଲ୍ ହିକ୍ଷାହିନି ମାଷ୍ଟେରାର୍ ମି ବିତ୍ରେ ଚଞ୍ଜିୟା ଆନାର୍। ହେୱାର୍ ମିଚ୍ ହିକ୍ଷା ହିନାର୍, ଲାଗିଙ୍ଗ୍ ମାନାୟାର୍ ଖ୍ରୀଷ୍ଟତାକେ ପାର୍ତି କିନାକା ବନ୍ଦ୍ କିନାର୍। ଇ ବୁଲ୍ ହିକ୍ଷାହିନି ମାଷ୍ଟେରାର୍ ଖ୍ରୀଷ୍ଟଙ୍ଗ୍ ହେୱାର୍ ମାଷ୍ଟେର୍ ଇଞ୍ଜି ମାନିକିଉର୍, ଆରେ ଖ୍ରୀଷ୍ଟ ହେୱାରିଙ୍ଗ୍ ପାପ୍ନି ଶାକ୍ତିତାଙ୍ଗ୍ ମୁକ୍ତି କିତ୍ତାନ୍ନା ଇଞ୍ଜି ପା ଆହୁର୍। ହେୱାର୍ ଇଲେକେ ନିଜେତିଙ୍ଗ୍ ନିଜେ ହେଦାପ୍ରେ ନଷ୍ଟ ଗଟାଇକିୟା ଆନାର୍। 2 ପାର୍ତି କିନାକାପ୍ ଇଞ୍ଜି ୱେଚ୍ନି ବେସି ମାନାୟ୍ ଇ ବୁଲ୍ ହିକ୍ଷାହିନି ମାଷ୍ଟେରାର୍ ଲାଜ୍ ପାୟାଆନି ଲେକେ କରାପ୍ ହାଜିତିଙ୍ଗ୍ ହାନାର୍, ଆରେ ପାର୍ତିକିୱି ମାନାୟାର୍ ହାର୍ଦାଙ୍ଗ୍ ଜିବୁନ୍ କାଟିକିନି ବିଷୟରେ ନିନ୍ଦା କାତା ୱେଚ୍ନାର୍। 3 ଇ ମାଷ୍ଟେରାର୍ ବେସି ଲବ୍ରାର୍। ହେୱାର୍ ମିବେତାଙ୍ଗ୍ ଡାବୁଙ୍ଗ୍ ଲାବ୍ ପାୟାଆନି କାଜିଙ୍ଗ୍, ହେୱାର୍ ମାନ୍ତାଙ୍ଗ୍ ରସ୍ତି କାତା ୱେଚ୍ଚି ମିଙ୍ଗେଙ୍ଗ୍ ଟକାୟ୍ କିଦ୍ନାର୍। ଲାଗିଙ୍ଗ୍ ଈଶ୍ୱର ବେସି ବାହ୍ରୁ ଆଗେ ହେୱାରିଙ୍ଗ୍ ଦଣ୍ଡ୍ ହିନାନ୍ ଇଞ୍ଜି ଇଚା କିତାନ୍ନା, ଆରେ ହେୱାନ୍ ଇଦାଙ୍ଗ୍ କିନି କାଜିଙ୍ଗ୍ ରେଡି ଆତାନ୍ନା। ହେୱାନ୍ ହେୱାରିଙ୍ଗ୍ ହାତ୍ପା ନଷ୍ଟ କିନାନ୍। 4 ଇନେସ୍କି ଆସେଙ୍ଗ୍ ପୁନାସ୍ ଯେ ଇମ୍ଣି ଦୁତ୍କୁ ଈଶ୍ୱର ଆଗେ ପାପ୍ କାମାୟ୍ କିଜି ମାଚିକ୍, ଈଶ୍ୱର ହେୱେକିୟାକାଙ୍ଗ୍ ଦଣ୍ଡ୍ ହିତାନ୍। ହେୱାନ୍ ହେୱେକିୟାକାଙ୍ଗ୍ ନରକ୍ତାକେ ତୁସିହିତାନ୍ନା, ଆରେ ହେୱେକିୟାକାଙ୍ଗ୍ ବିଚାର୍ କିଜି ଦଣ୍ଡ୍ ହିନି ଦିନ୍ ପାତେକ୍, ହେୱାନ୍ ହେୱେକାଙ୍ଗ୍ ମାଜ୍ଗା ଜଇଲ୍ ଇଞ୍ଜ ଇଡ଼୍ତାନ୍ନା। 5 ଏପେଙ୍ଗ୍ ଇଦାଙ୍ଗ୍ ପା ପୁଚାଦେର୍ନା ଯେ ଆଗେନି ମାନାୟାର୍ ଏଚେପାଦ୍ନା ଈଶ୍ୱରତିଙ୍ଗ୍ ପାଣ୍ଡ୍ରା ଆୱାତାର୍, ହେୱାନ୍ ହେୱାର୍ କରାପ୍ କାମାୟ୍ କିନି ବିଷୟତିଙ୍ଗ୍ ଦଣ୍ଡ୍ ହିୱାଦାଙ୍ଗ୍ ପିହ୍ୱାତାନ୍। ହେୱାର୍ ଇନେସ୍ ଏଜୁକାଙ୍ଗ୍ ମୁନ୍ଞ୍ଜି ନଷ୍ଟ ଆନାର୍, ଇଦାଙ୍ଗ୍ କାଜିଙ୍ଗ୍ ଈଶ୍ୱର ପୁର୍ତିତିଙ୍ଗ୍ ପୁରା ଡାବାଇ କିଦେଙ୍ଗ୍ ବନ୍ଯା ପକ୍ତାନ୍। ମାତର୍ ହେୱାନ୍ ନୋହ ହୁଦାଙ୍ଗ୍ ତା ପରିବାର୍ନି ଜେକନି ସାତ୍ ଜାଣ୍ତିଙ୍ଗ୍ ରକ୍ଷା କିତାନ୍। ଈଶ୍ୱର ହୁଦାଙ୍ଗ୍ ଟିକ୍ଆଜି ମାନି ବିଷୟରେ ନୋହ ଶୁଣାୟ୍ କିଜି ମାଚାନ୍। 6 ଏପେଙ୍ଗ୍ ଇଦାଙ୍ଗ୍ ପା ପୁଚାଦେର୍ନା ଯେ ସଦୋମ ଆରେ ଗମୋରା ସହର୍କୁକାଙ୍ଗ୍ ବାହାକିନି ମାନାୟାର୍ କରାପ୍ କାମାୟ୍ କିତି କାଜିଙ୍ଗ୍, ଈଶ୍ୱର ହେୱାରିଙ୍ଗ୍ ଦଣ୍ଡ୍ହିଜି ବିଚାର୍ କିତାନ୍। ହେୱାନ୍ ହେୱାରିଙ୍ଗ୍ ପୁରାପୁରି ନିସ୍ ଆନି ପାତେକ୍ କାଡିକିଜି ନଷ୍ଟ କିତାନ୍। ଈଶ୍ୱରତିଙ୍ଗ୍ ପାଣ୍ଡ୍ରାଆୱି ମାନାୟାରିଙ୍ଗ୍, ହେୱାନ୍ ଇନାକା କିନାନ୍ ଇ ଗଟ୍ନାତାଙ୍ଗ୍ ଚଚ୍ନାନ୍ନା। 7 ମାତର୍ ସଦୋମ ସହର୍ତିଙ୍ଗ୍ ନଷ୍ଟ କିନି ଆଗେ, ହେୱାନ୍ ଲୋଟଙ୍ଗ୍ ହେ ସହର୍ତାଙ୍ଗ୍ ହପ୍ଚି, ହେୱାନିଙ୍ଗ୍ ଉଦାର୍ କିତାନ୍। ଲୋଟ ରକାନ୍ ଦରମ୍ ମାନାୟ୍ ମାଚାନ୍। ସଦୋମ ସହର୍ନି ମାନାୟାର୍ ରଞ୍ଜାଙ୍ଗ୍ ପା ନିୟମ୍ତିଙ୍ଗ୍ ମାନିକିୱି କାଜିଙ୍ଗ୍ ଆରେ ହେୱାର୍ ଦାରି କାମାୟ୍ ଲେକେ ବେସି କରାପ୍ କାମାୟ୍ କିତି କାଜିଙ୍ଗ୍, ହେୱାନ୍ ବେସି କଷ୍ଟତାଙ୍ଗ୍ ମାଚାନ୍। 8 ଲୋଟ ଇ କରାପ୍ ମାନାୟାର୍ ବିତ୍ରେ ବାହାକିଜି ମାଚାନ୍। ୱିଜୁଦିନ୍ ହେୱାର୍ କିନି କରାପ୍ କାମାୟ୍, ହେୱାନ୍ ହୁଡ଼୍ଜି ମାଚାନ୍, ଆରେ ହେୱାର୍ ୱେଚ୍ନି କରାପ୍ ବେଣ୍। ହେୱାନ୍ ୱେନ୍ଞ୍ଜି ମାଚାନ୍, ଆରେ ବେସିତାଙ୍ଗ୍ ବେସି କଷ୍ଟ ପାୟାଆଜି ମାଚାନ୍, ଇନେସ୍କି ହେୱାନ୍ ରକାନ୍ ଦରମ୍ ମାନାୟ୍ ମାଚାନ୍। 9 ମାପୃ ନିଜେ ରକ୍ଷା ଆରେ ଦଣ୍ଡ୍ ହିନି ବିଷୟ କିଜିମାଚି କାଜିଙ୍ଗ୍, ହେୱାନିଙ୍ଗ୍ ପାଣ୍ଡ୍ରାଆଜି ଇମ୍ଣି ମାନାୟାର୍ ଦୁକ୍କଷ୍ଟ ପାୟାଆନାର୍ ହେୱାରିଙ୍ଗ୍ ରକ୍ଷା କିଦେଙ୍ଗ୍ ପୁଚାନ୍ନା। ଆରେ ହେୱାନ୍ କରାପ୍ କାମାୟ୍ କିନି ମାନାୟାରିଙ୍ଗ୍ ବିଚାର୍କିନି ଦିନ୍ତ ଦଣ୍ଡ୍ ହିଦେଙ୍ଗ୍ ପା ପୁନାନା। 10 ଇ ବୁଲ୍ ହିକ୍ଷାହିନି ମାଷ୍ଟେରାରିଙ୍ଗ୍ ହାତ୍ପା ଈଶ୍ୱର ଦଣ୍ଡ୍ ହିନାନ୍। ଇନେସ୍କି ଇ ବୁଲ୍ ହିକ୍ଷାହିନି ମାଷ୍ଟେରାର୍ ଦାରି ଲେକେ ବେସି କରାପ୍ କାମାୟ୍ କିଜି ଜାର୍ ଇଚାରେ କିନାର୍, ଆରେ ହେୱାର୍ ଇନେର୍ ତାରେନ୍ ମାଞ୍ଜେଙ୍ଗ୍ ଇଚା କିଉର୍। ହେୱାର୍ ମୁର୍କିୟା ଆରେ ବାଟ୍ପାଣିଆ ଇଞ୍ଜି ୱେଚ୍ନି ମାନାୟାର୍। ହେୱାର୍ ଗୌରବନି ଦୁତ୍କୁ ବିଷୟରେ ନିନ୍ଦା କିଦେଙ୍ଗ୍ ପାଣ୍ଡ୍ରାଆଉର୍। 11 ଦୁତ୍କୁ ଇ ବୁଲ୍ ହିକ୍ଷାହିନି ମାଷ୍ଟେରାର୍ତାଙ୍ଗ୍ ବେସି ଷ୍ଟ୍ରଙ୍ଗ୍ ଆରେ ଶାକ୍ତି କାଟିକିକ୍। ମାତର୍ ଇ ମାଷ୍ଟେରାର୍ ବିରଦ୍ତାକେ, ଦୁତ୍କୁ ଈଶ୍ୱର ଲାଗାୟ୍ ଇନସ୍ତା ବେଣ୍ ୱେଚୁକ୍। 12 ମାତର୍ ଇ ବୁଲ୍ ହିକ୍ଷାହିନି ମାଷ୍ଟେରାର୍ ରାନ୍ତି ପଶୁ ଲେକେ। ଇ ପଶୁ ଚିନ୍ତା କିଦେଙ୍ଗ୍ ଆଡୁକ୍, ଶିକାର୍ କିନାକା ନେ ହେୱେକ୍ ଚିନ୍ତା କିଜି ମାନିକ୍। ଇ ମାନାୟାର୍ ମାନ୍ ବିତ୍ରେ ଇମ୍ଣି ଚିନ୍ତା ୱାନାତ୍, ହେୱାଙ୍ଗ୍ ହେୱାର୍ କିନାର୍, ଆରେ ହେୱାର୍ ଇନାକା ବୁଜା ଆଉର୍, ହେ ବିଷୟତିଙ୍ଗ୍ ହେୱାର୍ ବିରଦ୍ କିଜି ନିନ୍ଦା କାତା ୱେଚ୍ନାର୍। ହେୱାର୍ ହାତ୍ପା ନଷ୍ଟ ଆନାର୍। 13 ହେୱାର୍ ଅଦରମ୍ରେ କିତି ପୁରଷ୍କାର୍ ହେୱାରିଙ୍ଗ୍ ନଷ୍ଟ କିନାତ୍। ହେୱାର୍ ୱେଡ଼ାଲିଙ୍ଗ୍ କରାପ୍ କାମାୟ୍ କିନି କାଜିଙ୍ଗ୍ ବେସି ୱାରିୟା ଆନାର୍। ହେୱାର୍ ମି ବିତ୍ରେ ରଞ୍ଜାଙ୍ଗ୍ ଅପ୍ମାନ୍ ଆରେ ପ୍ରାଲ୍ ଲେକେ। ହେୱାର୍ ହାର୍ଦାକାଙ୍ଗ୍ ଇଞ୍ଜି ଚଞ୍ଜି ଆଜି ମିହୁଦାଙ୍ଗ୍ ମାହାଆଜି ଚିଚିସ୍ ପା, ହେୱାର୍ ଟକାୟ୍କିନି କାମାୟ୍ତିଙ୍ଗ୍ କିଦେଙ୍ଗ୍ ୱାରିୟା ଆନାର୍। 14 ହେୱାର୍ ହୁଡ଼୍ତି କଗ୍ଲେକ୍ତାଙ୍ଗ୍ ଦାରି କାମାୟ୍ କିଦେଙ୍ଗ୍ ଇଚା କିନାର୍। ହେୱାର୍ ପାପ୍ କାମାୟ୍ କିନି ସୁଯଗ୍ତିଙ୍ଗ୍ ପିହୁର୍। ଖ୍ରୀଷ୍ଟତାକେ ଇମ୍ଣାକାର୍ ଷ୍ଟ୍ରଙ୍ଗ୍କିଜି ପାର୍ତି କିଉର୍, ହେୱାରିଙ୍ଗ୍ ଇ ବୁଲ୍ ହିକ୍ଷାହିନି ମାଷ୍ଟେରାର୍ ଟକାୟ୍ କିନାର୍, ଆରେ ହେୱାରିଙ୍ଗ୍ ଇ ମାଷ୍ଟେରାର୍ ପାପ୍ କାମାୟ୍ କିୟିକିନାର୍। ଆରେ ହେୱାର୍ ବେସି ଲବ୍ରା ଆତି କାଜିଙ୍ଗ୍, ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍। 15 ଇନାକା ଟିକ୍ ହେଦାଙ୍ଗ୍ ହେୱାର୍ କିଉର୍, ଆରେ ଆଗେ ବିୟୋରନି ମେହି ଭବିଷ୍ଯତବକ୍ତା ବିଲିୟମ ଇନେସ୍ କରାପ୍ କାମାୟ୍ କିଜି ମାଚାନ୍, ହେଲେକେ କରାପ୍ କାମାୟ୍ କିନାକା ହେୱାର୍ ଆରମ୍ କିତାର୍ନା। ବୁଲ୍ କାମାୟ୍ କିଜି ଡାବୁଙ୍ଗ୍ ଆର୍ଜା ଆଦେଙ୍ଗ୍ ବିଲିୟାମ ବେସି ଇଚା କିଜି ମାଚାନ୍। 16 ହେୱାନ୍ ଇଲେକେ କରାପ୍ କାମାୟ୍ କିତି କାଜିଙ୍ଗ୍, ଈଶ୍ୱର ହେୱାନିଙ୍ଗ୍ ରିସା ଆତାନ୍। ତା ଗଦ ହେୱାନିଙ୍ଗ୍ ମାନାୟ୍ ଲେକେ ବେଣ୍କିଜି, ହେଲେକେ ବୁଲ୍ କାମାୟ୍ କିନାକା ବନ୍ଦ୍ କିୟିକିତାତ୍। 17 ୱାଚ୍ଚି ଜାରାଣ୍ଲେକେ ଇ ବୁଲ୍ ହିକ୍ଷାହିନି ମାଷ୍ଟେରାର୍। ବାହ୍ରା ଆନି ଆଗେ ଇନେସ୍ ବେସି ଡ଼ୁଇଦୁକା ଆଜି ବାଦାଡ଼୍ତିଙ୍ଗ୍ ଗୁଚାଇ କିନାତ୍, ଇ ମାଷ୍ଟେରାର୍ ହେଲେକେ ମୁଲ୍ୟ ହିଲାକାର୍। ଈଶ୍ୱର ହେୱାର୍ କାଜିଙ୍ଗ୍ ବେସି ମାଜ୍ଗା ଆତି ବାହା ରସ୍ତାନ୍ନା। 18 ଇ ମାଷ୍ଟେରାର୍ ଏଚେପାଦ୍ନା ହିକ୍ଷା ହିନାର୍, ହେୱାର୍ ମୁଲ୍ୟ ହିଲାକା ଆରେ ନିଜେ ଗାଜାକାଙ୍ଗ୍ ଇଞ୍ଜି ଚଚିୟାଆନି କାତା ୱେଚ୍ନାର୍। ଅପ୍ମାନ୍ ପାୟାଆନି କାମାୟ୍ ହେୱାର୍ ଗାଗାଡ଼୍ ଇଚା କିତିସ୍ ହେଦାଙ୍ଗ୍ କିଦେଙ୍ଗ୍ ଆଡ୍ନାର୍ ଇଞ୍ଜି ହେୱାର୍ ମାନାୟାରିଙ୍ଗ୍ ୱେଚ୍ନାର୍। ଇମ୍ଣାକାର୍ ଇଲେକେ କରାପ୍ ଜିବୁନ୍ତାଙ୍ଗ୍ ହସି ନୁଆଁରେ ଖ୍ରୀଷ୍ଟାନ୍ ଆତାର୍ନା, ହେୱାରିଙ୍ଗ୍ ଇ ବୁଲ୍ ହିକ୍ଷାହିନି ମାଷ୍ଟେରାର୍ ଟକାୟ୍ କିଜି ପାପ୍ କାମାୟ୍ କିୟିକିନାର୍। 19 ଇ ମାଷ୍ଟେରାର୍ ମାନାୟାରିଙ୍ଗ୍ ୱେଚ୍ନାର୍ ଯେ ହେୱାର୍ ଇନାକା ଇଚା ହେଦାଙ୍ଗ୍ କିଦେଙ୍ଗ୍ ହେୱାର୍ ସ୍ୱାଦିନ୍ ଆତାର୍ନା, ମାତର୍ ହେୱାର୍ ପାପ୍ କାମାୟ୍ କାଜିଙ୍ଗ୍ ହେୱାର୍ ନିଜେ ଦାସ୍ ଆତାର୍ନା। ଇନେସ୍କି ଇନାକା ମିଙ୍ଗେଙ୍ଗ୍ କଣ୍ଟ୍ରୁଲ୍ କିଦ୍ନାତ୍, ଏପେଙ୍ଗ୍ ହେବେନି ଦାସ୍ କାଦେର୍। 20 ମାନାୟାର୍ ଯୀଶୁ ଖ୍ରୀଷ୍ଟଙ୍ଗ୍ ହେୱାର୍ ମାପୃ ଆରେ ଉଦାର୍ କିଦ୍ନାକାନ୍ ଇଞ୍ଜି ଆସ୍ତି ପାଚେ, ହେୱାର୍ ଇ ଜଗତ୍ନି କରାପ୍ ବିଷୟତାଙ୍ଗ୍ ହନ୍ଞ୍ଚି ହାଚାର୍ନା। ମାତର୍ ହେୱାର୍ ଆରେରଗ ନଙ୍ଗୟ୍ କରାପ୍ କାମାୟ୍ କିନାରା ଆରେ କରାପ୍ କାମାୟ୍ ହେୱାରିଙ୍ଗ୍ କଣ୍ଟ୍ରୁଲ୍ କିନାତା। ଲାଗିଙ୍ଗ୍ ହେୱାର୍ ଖ୍ରୀଷ୍ଟାନ୍ ଆୱି ପରିସ୍ତିତିତାଙ୍ଗ୍ ଖ୍ରୀଷ୍ଟଙ୍ଗ୍ ମାନିକିୱି ପରିସ୍ତିତି ଆଦିକ୍ କରାପ୍ ଆନାତ୍। 21 ଯଦି ହେୱାର୍ ଦରମ୍ ମାନାୟ୍ ଲେକେ ଜିବୁନ୍ନି ବିଷୟ କାଟି କିନାକା ପୁନ୍ୱାଦାଙ୍ଗ୍ ମାଚିସ୍, ଇଦାଙ୍ଗ୍ ହେୱାର୍ କାଜିଙ୍ଗ୍ ହାର୍ ଆତାତ୍ମା। ଇନେସ୍କି ଇନାକା ଟିକ୍ ହେଦାଙ୍ଗ୍ ହେୱାର୍ ନଙ୍ଗୟ୍ ପୁଚାର୍ନା, ମାତର୍ ଆସେଙ୍ଗ୍ ବାଚିକିତି ଚେଲାକାସ୍ ହିକ୍ଷା ହିତି ଈଶ୍ୱର ଆଦେସ୍ତିଙ୍ଗ୍ ହେୱାର୍ ଆହୁରା। 22 ଇ ରିଣ୍ଡାଙ୍ଗ୍ ଜ୍ଞାନ୍ନି କାତାଲେକେ: “ର ନିକୁଡ଼୍ କାକ୍ନାତ୍, ଆରେ କାକ୍ତି ଜିନିଷ୍ତିଙ୍ଗ୍ ନେ ତିନାତ୍ ଆରେ ରକାନ୍ ର ପାଞ୍ଜିତିଙ୍ଗ୍ ଏଜୁଙ୍ଗ୍ ଇତ୍ପିତି ପାଚେ, ଆରେରଗ ହେ ପାଞ୍ଜି ହାଲ୍ଜି କାଦତାକେ ହୁଞ୍ଜ୍ନାତ୍।” ଇ ବୁଲ୍ ହିକ୍ଷାହିନି ମାଷ୍ଟେରାର୍ ଇଲେକେ। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation