୨ ପିତର 1 - New Testament in Pengo Parja Languageଜୱାର୍ 1 ଆନେଙ୍ଗ୍ ଶିମନ ପିତର ଯୀଶୁ ଖ୍ରୀଷ୍ଟନି ରକାଙ୍ଗ୍ ଦାସ୍ ଆରେ ବାଚିକିତି ଚେଲା ଇ ଚିଟି ଲେକିକିନାଙ୍ଗା। ଯୀଶୁ ଖ୍ରୀଷ୍ଟତି ମା ଈଶ୍ୱର ଆରେ ଉଦାର୍ କିଦ୍ନାକାନ୍, ହେୱାନ୍ ଈଶ୍ୱର ଲାଗାୟ୍ ମାଙ୍ଗେଙ୍ଗ୍ ଦରମ୍ ମାନାୟ୍ କିତ୍ତାନ୍ନା। ଆରେ ହେୱାନ୍ ମାଙ୍ଗେଙ୍ଗ୍ ବେସି ମୁଲ୍ୟକାଟି ପାର୍ତି ହିତ୍ତାନ୍ନା, ଆରେ ଇମ୍ଣାକାର୍ ମା ଲେକେ ହାମାନ୍ ପାର୍ତି ପାୟାଆତାର୍ନା, ହେୱାର୍ ଲାଗାୟ୍ ଆନେଙ୍ଗ୍ ଇ ଚିଟି ଲେକିକିନାଙ୍ଗା। 2 ଈଶ୍ୱର ଆରେ ମା ମାପୃ ଯୀଶୁ ବୁଦିତାଙ୍ଗ୍ ବାଡାଆନି କାଜିଙ୍ଗ୍, ଈଶ୍ୱର ମିଙ୍ଗେଙ୍ଗ୍ ଦୟା ଆରେ ଶାନ୍ତି ବେସିକିଜି ହିଦେନ୍। ପାର୍ତିତାଙ୍ଗ୍ ବାଡା ଆନାସ୍ 3 ଆସେଙ୍ଗ୍ ଈଶ୍ୱରତିଙ୍ଗ୍ ୱାରି କିତିଲେକେ ଜିବୁନ୍ କାଟିକିନି କାଜିଙ୍ଗ୍, ଈଶ୍ୱର ନିଜେ ତା ଶାକ୍ତି ମାଙ୍ଗେଙ୍ଗ୍ ଦାନ୍ କିତ୍ତାନ୍ନା। ଇଦାଙ୍ଗ୍ ପୁରା ଆଦେଙ୍ଗ୍ ଆଡ଼୍ତାତ୍, ଇନେସ୍କି ଆପେଙ୍ଗ୍ ଈଶ୍ୱରତିଙ୍ଗ୍ ପୁଚାପ୍ନା ଆରେ ତା ଗୌରବ ଆରେ ହାର୍ଦି ଗୁଣ୍ କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ତା ମାନାୟ୍ କିଦ୍ଦେଙ୍ଗ୍ କୁକ୍ତାତାନ୍ନା। 4 ଆରେ ତା ଗୌରବ ଆରେ ହାର୍ଦି ଗୁଣ୍ କାଜିଙ୍ଗ୍, ହେୱାନ୍ ମାଙ୍ଗେଙ୍ଗ୍ ବେସି ଗାଜା ଆରେ ବେସି ମୁଲ୍ୟନି ପାର୍ମାଣ୍ ୱିଜୁ ଦାନ୍ କିତ୍ତାନ୍ନା। ଇ ଜଗତ୍ନି କରାପ୍ ଇଚାତାଙ୍ଗ୍ ହସି ହାଞ୍ଜେଙ୍ଗ୍ ଆରେ ଈଶ୍ୱର ଗୁଣ୍ ହୁଦାଙ୍ଗ୍ ମାହାଆଜି ମାନି କାଜିଙ୍ଗ୍, ଇ ପାର୍ମାଣ୍ ୱିଜୁ ମାଙ୍ଗେଙ୍ଗ୍ ସାଇଜ କିଦ୍ନାତ୍। 5 ଈଶ୍ୱର ଗୁଣ୍ତିଙ୍ଗ୍ ପାୟାଆନି କାଜିଙ୍ଗ୍, ଏପେଙ୍ଗ୍ ଆପ୍କା ଯୀଶୁ ଖ୍ରୀଷ୍ଟତାକେ ନେ ପାର୍ତି କିମାଟ୍, ମାତର୍ ଇନାକା ହାର୍ ହେଦାଙ୍ଗ୍ କିଦେଙ୍ଗ୍ ଏପେଙ୍ଗ୍ ୱିଜୁଦିନ୍ ଉପାୟ୍ କିୟାଟ୍। ଇନାକା ହାର୍ ହେଦାଙ୍ଗ୍ ନେ ଏପେଙ୍ଗ୍ କିମାଟ୍, ମାତର୍ ବୁଦି ହୁଦାଙ୍ଗ୍ ବ୍ଯବହାର୍ କିନି ମାନାୟ୍ ଲେକେ ବ୍ଯବହାର୍ କିୟାଟ୍। 6 ଏପେଙ୍ଗ୍ ବୁଦି ହୁଦାଙ୍ଗ୍ ନେ ବ୍ଯବହାର୍ କିମାଟ୍, ମାତର୍ ଜାର୍ତିଙ୍ଗ୍ କଣ୍ଟ୍ରୁଲ୍ କିନି ଦର୍କାର୍। ଏପେଙ୍ଗ୍ ଆପ୍କା କଣ୍ଟ୍ରୁଲ୍ ନେ କିମାଟ୍, ମାତର୍ ଦୁକ୍କଷ୍ଟ ୱାତିସ୍ ପା ଏପେଙ୍ଗ୍ ସାହାସ୍ ଆସ୍ତି ମାନାଟ୍। ଆପ୍କା ସାହାସ୍ ଆସ୍ତି ନେ ମାନ୍ମାଟ୍, ମାତର୍ ଏପେଙ୍ଗ୍ ଈଶ୍ୱରତିଙ୍ଗ୍ ସନ୍ମାନ୍ କିତିଲେକେ ଜିବୁନ୍ କାଟିକିୟାଟ୍। 7 ଏପେଙ୍ଗ୍ ଆପ୍କା ଈଶ୍ୱରତିଙ୍ଗ୍ ସନ୍ମାନ୍ କିତିଲେକେ ଜିବୁନ୍ କାଟି କିମାଟ୍, ମି ଜାର୍ ପରିବାର୍ ମାନାୟ୍ ଲେକେ ଜେକନିକାରିଙ୍ଗ୍ ପା ଲାଡ୍ କିୟାଟ୍। 8 ଇ ୱିଜୁ ବିଷୟ ଯଦି ମିବେ ମାନ୍ଞ୍ଜି ବାଡା ଆନାତ୍, ଲାଗିଙ୍ଗ୍ ମା ମାପୃ ଯୀଶୁ ଖ୍ରୀଷ୍ଟ ବିଷୟନି ବୁଦିତାଙ୍ଗ୍ ଏପେଙ୍ଗ୍ ବ୍ଯବହାର୍ କିତିଲେକେ ଆରେ ପାଡ଼୍ ଆସ୍ତି ଲେକେ ଆଦେଙ୍ଗ୍ ଆଡ୍ନାଦେର୍। 9 ମାତର୍ ଯଦି ଇନେର୍ ଇଲେକେ ବ୍ଯବହାର୍ କିଉନ୍, ହେୱାନ୍ ରକାନ୍ କାଣାମାନାୟ୍ ଲେକେ। ଇନେସ୍କି ଈଶ୍ୱର ତା ଆଗେନି ୱିଜୁ ପାପ୍ତିଙ୍ଗ୍ ବାଣା ଆତାନ୍ନା। 10 ଇଦାଙ୍ଗ୍ କାଜିଙ୍ଗ୍ ଏ ପାର୍ତିକିନି ଟଣ୍ଡାର୍କାଦେର୍, ଈଶ୍ୱର ମିଙ୍ଗେଙ୍ଗ୍ କୁକ୍ତାତାନ୍ନା ଆରେ ତା ଜାର୍ ମାନାୟ୍ କିଦ୍ନି କାଜିଙ୍ଗ୍ ବାଚି କିତ୍ତାନ୍ନା ଇଞ୍ଜି ଜାର୍ତିଙ୍ଗ୍ ଆରେ ଜେକନିକାରିଙ୍ଗ୍ ପୁନିକିଦେଙ୍ଗ୍। ଏପେଙ୍ଗ୍ ହାର୍ଦି ଜିବୁନ୍ କାଟି କିଦେଙ୍ଗ୍ ବେସି ଉପାୟ୍ କିୟାଟ୍। ଯଦି ମି ଲାଗାୟ୍ ଇ ଗୁଣ୍ ମାଚିସ୍, ଏପେଙ୍ଗ୍ ଇନାୱେଡ଼ାଙ୍ଗ୍ ପା ପାପ୍ତାକେ ପଡ଼ାଆଉଦେର୍। 11 ଆରେ ମା ମାପୃ ଆରେ ଉଦାର୍ କିଦ୍ନାକାନ୍ ଯୀଶୁ ଖ୍ରୀଷ୍ଟ ଇମ୍ଣି ରାଜିତାକେ ୱିଜ୍ୱିଦିନ୍ ପାତେକ୍ ରାଜା ଲେକେ ସାସନ୍ କିନାନ୍, ହେ ରାଜିତିଙ୍ଗ୍ ଈଶ୍ୱର ମାଙ୍ଗେଙ୍ଗ୍ ହାର୍ଦାଙ୍ଗ୍ ଆସ୍ତାନାନ୍। ସାସ୍ତର୍ତିଙ୍ଗ୍ ଦିୟାନ୍ ହିନି ବିଷୟ 12 ଏପେଙ୍ଗ୍ ଇ ୱିଜୁ ବିଷୟ ସତ୍ ଇଞ୍ଜି ପୁଚାଦେର୍ନା ଆରେ ପୁରାପୁରି ପାର୍ତି କିନାଦେରା, ଆତିସ୍ପା ଇ ୱିଜୁ ବିଷୟରେ ମିଙ୍ଗେଙ୍ଗ୍ ୱିଜୁଦିନ୍ ମାନ୍ତ ଏତୁ କିୟିକିଦ୍ଦେଙ୍ଗ୍ ଆନେଙ୍ଗ୍ ଇଚା କିନାଙ୍ଗା। 13-14 ମା ମାପୃ ଯୀଶୁ ଖ୍ରୀଷ୍ଟ ନାଙ୍ଗେଙ୍ଗ୍ ପୁରା କିଲେର୍ ବାବ୍ରେ ୱେଚ୍ଚାତାନ୍ନା ଯେ, ଆନେଙ୍ଗ୍ ହାଃନାକା ଏକିୱାନାତା। ଲାଗିଙ୍ଗ୍ ଆନେଙ୍ଗ୍ ଜିବୁନ୍ ମାନିହିଙ୍ଗ୍, ମିଙ୍ଗେଙ୍ଗ୍ ଇ ୱିଜୁ ବିଷୟରେ ଏତୁ କିୟିକିଦ୍ନାକା, ଆନେଙ୍ଗ୍ ଟିକ୍ ଇଞ୍ଜି ବାବିକିନାଙ୍ଗା। 15 ଆରେ ଆନେଙ୍ଗ୍ ହାଃତି ପାଚେ ପା, ଇନେସ୍ ଏପେଙ୍ଗ୍ ୱିଜୁଦିନ୍ ୱିଜୁ ବିଷୟତିଙ୍ଗ୍ ମାନ୍ତ ଇଡ଼୍ଦେଙ୍ଗ୍ ଆଡ୍ନାଦେର୍, ଇଦାଙ୍ଗ୍ କାଜିଙ୍ଗ୍ ନଙ୍ଗୟ୍ ଆନେଙ୍ଗ୍ ବେସି କଷ୍ଟକିଜି ମି ଲାଗାୟ୍ ଇ ୱିଜୁ ବିଷୟ ଲେକିକିନାଙ୍ଗା। ଖ୍ରୀଷ୍ଟତି ଗୌରବନି ସାକି 16 ଇନେସ୍କି ଆପେଙ୍ଗ୍ ଏଚେପାଦ୍ନା ମା ମାପୃ ଯୀଶୁ ଖ୍ରୀଷ୍ଟତି ଶାକ୍ତି ଆରେ ତା ଆରେରଗ ୱାନି କାତା ମିଙ୍ଗେଙ୍ଗ୍ ୱେଚ୍ଚାତାପ୍, ହେପାଦ୍ନା ଚାଲାକି ହୁଦାଙ୍ଗ୍ ଜାର୍ ମାନ୍ତ ରସ୍ତି କାତା ପା ୱେଚ୍ଚାୱାଦାଙ୍ଗ୍ ମାନ୍ଞ୍ଚାପ୍। ମାତର୍ ଆପେଙ୍ଗ୍ ଜାର୍ କାଣ୍କୁତାଙ୍ଗ୍ ଖ୍ରୀଷ୍ଟତି ଗୌରବ ହୁଡ଼୍ତାପ୍ନା। 17-18 ଆବା ଈଶ୍ୱର ଏଚେପାଦ୍ନା ଖ୍ରୀଷ୍ଟଙ୍ଗ୍ ସନ୍ମାନ୍ ଆରେ ଗୌରବ ହିତାନ୍, ହେପାଦ୍ନା ଆସେଙ୍ଗ୍ ହେୱାନ୍ ହୁଦାଙ୍ଗ୍ ପବିତ୍ର ମାଡ଼ିଜପି ମାଚାସ୍। ହେପାଦ୍ନା ବେସି ଗୌରବ ମାନି ଈଶ୍ୱର ହେୱାନିଙ୍ଗ୍ ଇ ବେଣ୍ ୱେଚ୍ଚାନ୍, “ଇୱାନ୍ନେ ନା ଲାଡ୍ନି ମାଜି, ଇୱାନ୍ତାକେ ଆନେଙ୍ଗ୍ ବେସି ୱାରି।” ସରଗ୍ତାଙ୍ଗ୍ ଇ ବେଣ୍ ୱେଚ୍ନାକା ଆସେଙ୍ଗ୍ ନିଜେ ୱେଚାସ୍। 19 ଲାଗିଙ୍ଗ୍ ଭବିଷ୍ଯତବକ୍ତାର୍ ଇନାକା ସାସ୍ତର୍ତାକେ ଲେକିକିତାର୍ନା, ହେବେତାଙ୍ଗ୍ ଆସେଙ୍ଗ୍ ବେସି ପାର୍ତି କିନାସା। ଏପେଙ୍ଗ୍ ଯଦି ଇ କାତାତିଙ୍ଗ୍ ଦିୟାନ୍ କିନାଦେର୍, ଲାଗିଙ୍ଗ୍ ଏପେଙ୍ଗ୍ ହାର୍ଦି ବିଷୟ କିଦେଙ୍ଗ୍ ଆଡ୍ନାଦେର୍। ଇନେସ୍କି ୱେଡ଼ା ଇନେସ୍ ପୁର୍ତିତିଙ୍ଗ୍ ଅଜଡ଼୍ କିନାତ୍, ହେଲେକେ ଇଦାଙ୍ଗ୍ ପା ର ବଇଟା, ଅଜଡ଼୍ ଆୱି ପାତେକ୍ ମାଜ୍ଗା ଇଞ୍ଜ ଇଦାଙ୍ଗ୍ ଅଜଡ଼୍ ହିଦ୍ନାତ୍, ଆରେ ଖ୍ରୀଷ୍ଟତି ଅଜଡ଼୍ ମି ଗରବ୍ତାକେ ଅଜଡ଼୍ କିଦ୍ନାତ୍। 20 ମାତର୍ ମୁକ୍ୟ ବିଷୟ ଇଦାଙ୍ଗ୍ ଏପେଙ୍ଗ୍ ପୁନାଟ୍ ଯେ ଭବିଷ୍ଯତବକ୍ତାର୍ ବେଣ୍ ଇନାକା ଆସେଙ୍ଗ୍ ସାସ୍ତର୍ତାକେ ପଡ଼ିକିନାସା, ହେଦାଙ୍ଗ୍ ତା ଜାର୍ ଜ୍ଞାନ୍ନି କାତା ଆକାୟ୍। 21 ଇନେସ୍କି ଭବିଷ୍ଯତବକ୍ତାର୍ ଇମ୍ଣି କାତା ୱେଚ୍ଚାର୍ ହେଦାଙ୍ଗ୍ ତା ଜାର୍ ଇଚାତାଙ୍ଗ୍ ୱେଚ୍ୱାତାର୍ନା, ମାତର୍ ପବିତ୍ର ଆତ୍ମା ସାଇଜତାଙ୍ଗ୍ ଈଶ୍ୱର ଇଚାକିତି କାତାତିଙ୍ଗ୍ ହେୱାର୍ ୱେଚ୍ଚାର୍। |
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
Beyond Translation